Туйвежын

Матын снаряд потöмсянь контузитöм бöрас сiйö босьтiсö пленö, видзыштiсö лагерьын, а вот öнi кыскисö поездöн. Пленнöйес вöлiсö уна, но некин эз тöд, кытчö вайöтасö. А мунiсö не öтiк лун и бöраныс кольччисö уна тöдтöм посаддэз, станцияэз да городдэз, но поездыс руштiс-мунiс, и сё тарöвтчис одзлань. Рельсаэзлöн оча локтöммезас öтмоза сяткöтыштлiсö вагон увтсис колесоэс, жекöтыштлiсö туйвежжезын, качайтiсö вагонсö öтмöдöрö, треситiсö ловсö. Фрол Петрович Караваев часто сулавлiс решёткаöн кутöм öшын дынас да шысеттöг видзöтлывлiс адззывлытöм ладорсö. И эстöн, товар кыскалан вагонас, сылö тöдвылас усис, кыдз гортас колис сьöктöм Овдясö, кöдакöт грешитiс гöтрасьтöдз и кöдалöн, натьтö, шогмис кага. Мöдiс эд сiйö вайöтны, но айыс эз лэдз, сiдз кыдз колiс мунны служитны.

— Службаыс эд не гöститан места, — висьталiс сiя. — Вермас лоны и юртö пуктан Отечествоыс понда. Локтан кö здоровöйöн — нывкаэс тыр лоасö.

Пондöтiс службасö Николаевск городын. Солдатскöй оланыс первосянь эз гленитчы, уна пукавлiс гауптвахтаын сiйöн, что кутчисьлiс паныт царскöй офицеррескöт. Вынокыс сэк вöлi, и смевыс тырмис. А нёль год бöртi шедiс фронт вылö, кöр мунiс русско-германскöй война, кытöн наградитiсö Георгиевскöй крестöн. Вöлi эта Киев город гöгöрын. Öнi, вагоныс мунтöн, кöр мывкыдыс пондiс лöсявны, син одзас лоисö окоппес, сьöд тшыныс да кылiс сотчан дукыс, и этасянь нельки вывтырыс зэгнитчис, бытьтö йöрнöс увтас ловзисö насекомöйес да пондiсö йирны кучиксö. Чужöмыс чикыртчис, кыдз зубытсянь, и сiя вешшис öшын дынсис да пуксис вагонсис джодж вылас.

Пленнöйесö вайöтiсö Берлинö и йöртiсö лагерьö, кытöн видзисö месяц гöгöр, а сэсся петкöтiсö базарö вузавны. Городсис почтеннöй отирыс видзчисис ни вузасьöмлiсь пондöтчöмсö. Пöриськодь мужиккез инькаэзныскöт степеннöя ветлöтiсö вöвлöм воякаэс гöгöр да бöрйисö ловья товарсö. Нiя донсьöтiсö мортыслiсь вывтырсö, видзöтiсö сылiсь пиннесö, пешлiсö ченöрсö* и, ежели мортыс гленитчас, сувтлiсö сы дынö и видзчисисö вузасисьсö. Фролöс да эшö кынымкö мортöс небис барон Вальтер Вильгельм. И пондöтчисö вились некокнит луннэз. Бароныс лыддис нiйö раббезöн, тшöктiс уджавны лöз асывсянь сёр рытöдз, а вердiс умöля, медбы только эзö кулö. Правотöм мужиккес керисö быдöс, мый тшöктiс кöзяиныс: гöрисö да кöдзисö, ытшкисö турун, гуддисисö карчйöрас да садас, вöдитiсö и подасö.

[* Ченöр — кужöм, мастерство]

— Егор, тэ кылiн? — юалiс арланяс öтiк местаын олiсьыслiсь Фролыс. — Россияас керöмась пö революция. Вот бы шедны гортö.

— Бур вöлi бы, конешно, только кыдз?

— Миянöс эд некин оз дозирайт...

Бароныс видзис нiйö не сiдз крепыта, и кык сосед гусьöника лöсьöтчисö пышшик кежас. Быдса август öктiсö да косьтiсö нянь, а сентябрьскöй ойö иньдöтчисö туяс. Мунiсö только ойезнас, а луннэс джендамисö. И сё жö нiйö кутiсö граница вылас да вайöтiсö бöр важ местаас. Кöзяиныс тшöктiс öшöтны коккезöттяныс да вартлыны нiйö плетьöн.

— Медбы не бöрнаныс, а юрнаныс думайтiсö, — сералiс бароныс.

Пышшалiссесö пондiсö дозирайтны и ой кежас пöднавлiсö замок сайö. Овны лоис эшö умöльжык. Сэсся эзö ыставлö базарас. Кыдз не кыдз, а бароныс эд мынтiс ны понда деньга. Сылö не мортыс колiс, а удж керисьыс. И некин эз тöд, кöр эта кончитчас. Сроксö нылö эд эзö сувтöтö. Мукöдпырся Фролыс касьтывлiс ассис модзсö, да мый сэтiсь? Только ассис сьöлöмсö гудыртiс. А эта кадö, кывсис, Россияас паськалöм гражданскöй война.

— Вот чулалас суматохаыс, — Фролыс баитiс, — и миянöс лэдзасö. Татöн эд вексö озö видзö.

И нiйö лэдзисö, кöр Брестас гижисö мир йылiсь договор. Эта йылiсь Фролыс ыстiс гортас гижöток, кöсйисис локны, но петiс сiдз, что öтлаасис будёновскöй армиякöт. Чожа сылö сетiсö эскадрон, и лоис Фрол командирöн. Аслас деревняö локтiс дасöкмысöт годö.

— Но, висьтасьö, кыдз олiтö? — юалiс айыслiсь да малыштiс сьöд уссэсö. — Меным некöр вöлi гижны, то воюйтi, то походын. Нельки вöввесö доримö пидзöс выланым... Быдса дас год чулалiс.

— Олiмö тай малодело, — сьöкыта баитiс Сыско Петраыс и полöмöн видзöтлiс зоныс вылö. — Эн лöгась, но мийö дугдiмö ни видзчисьны тэнö. И вичкуас тшöктi служитны молебен, сёртокö гижи.

— Одзöв покойникас ыстiтö, одзöв, — Фролыс падмыштiс, руыс эз понды тырмыны, но эта лунö дзебис лöгасьöмсö пиас. «Вот кытшöм вöлöма Сыско увтырыс, — думайтiс сiя джоджöттяс ветлöттöн. — Но менам мывкыдыс не умöльжык. Öнi ме понда орсны».

Сiя вашöтiс айсö да мамсö керкусис избушкаö, а ны туйö вайöтiс Колька воныслiсь инькасö, кöдалöн вöлi сизимгодся зон.

— Мыля жö тэ грехсö ас вылат босьтан, — пондылiс баитны айыс.

— Эн сюй чукатö, кытчö оз тöр, — эрнитiс сы вылö Фролыс. — Вöлыс лоас менам и мöссö коля аслым. Десятинасö понда гöрны. И меным колö овны морт моза.

* * *

Палёво деревняок кöркö пондiс строитны Сыскоыс. Сiя русско-турецкöй война бöрын получитiс «вольнöйсö» и гортас эз понды овны, а Отево посадiсь мунiс сук вöрö и сэтчин керис хутор. Акулина инькаыс да кык зон лякисö телега бöрас. Мунiсö нiя не öддьöн дыр, а шондi пуксян дорас Сыскоыс сувтöтiс вöвсö да висьталiс:

— Вот эстöн пондамö поздiсьны.

Кöзяиныс юскис вöвсö да кутчисис керны шалаш. Сук вöр коласас вöлi куштöлок, кöда вылö мöдiс керны Сыскоыс виль керку. Эстöн сiя мыччалiс недюжиннöй вын. Зоннэс отсöтöн ар кежас сувтiс керкуыс и шогмис картаыс. Семьянас ректiс вильса, медбы тулыснас вöлi кытчö кöдзны сюсö. А виль керку гöгöрас садитiс куим кедр, кöдна и öнöдз быдмöны. Сыскоыс гöтралiс пöрисьжык зон Митрейсö, и нылöн шогмисö нёль челядь. Сэсся гöтрасис Петраыс, и тожö лоисö учöттэс. Зоннэс пондiсö овны янын. Митрейсö босьтiсö русско-японскöй война вылö и сэтчин вийисö. А Петралöн Фролыс быдмыштiс, но эз велöтчы уджавны, а лöсьöтчис служба вылö.

Дас год гöгöр бöртi сiя локтiс бöр и застанитiс только нывсö, а модзыс мунöма жöник сайö. Вот сэк Фролыс и бöбöтiс ас саяс Колька воныслiсь инькасö, кытчöдз воныс вöлi армияын. Нылöн лоисö куим зон да кык ныв. Кöзяиныс тэрмасис паськöтны ассис хозяйствосö, керны сiйö крепытжыкö да богатöйö.

— Кöть бы челядьсö ассит любитыштiн, — водöм бöрас сылö баитiс Настя инькаыс. — Тэ эд нiйö он и адззывлы.

— Кöр вот лоасö отсасиссезöн, — баитiс сэк Фролыс, — сэк и понда любитны. Öнi жö мый ныись толкыс?

Фролыслö гленитчис, кыдз содiс семьяыс и ровно чинiс одзжык керöм керкуыс. Мöдiс бы керны вильö. Но перво колö тшупны мельницаок, кöдö мöдiс сувтöтны Лопва юок вылас. Эта понда кералiс да ваялiс вöрсö берег дорас. Карта пытшкас эта кад кежö вöлiсö ни кык вöв да кык мöс. Тöдчöмöн и десятинасö паськöтiс. Сюыс öксис, а изны вöлi некытöн.

— Ме мöда, Настасся, уджалiссезöс вайöтны, — кыдзкö рытнас висьталiс сiя иньыслö. — Öтнамлö сьöкыт лоö бергавны.

— Только бöрйы арталiссезöс, — шыасис Настяыс.

— Ме сiдз жö думайта. Ковсяс и помеч керлыны. Сытöг мельницасö он сувтöт. Колас, дак и инькаэсö корламö.

Настя полiс сы лöгасьöмись и только этасянь сетчис сылö, кöр Фролыс локтiс сы ордö да пондiс маласьны. Сьöд синнэс сэк öзйисö биöн, чапкисö бичир, и ачыс быдсöн треситчис. Сэк Настяыс вунöтiс жöниксö, а кöр казясис, мый лоис, ас пондас сьöкыта ловзисис, а сэсся эз думайт, мый лоас одзлань, каттисис пым любитöмас — да öтлаасисö. И вот олöны да быдтöны челядьсö. Настяыс любитiс Фролсö и керис быдöс, мый сылö гленитчö, лебезитiс сы одзын.

— Мельницасö вот керамö, и пизьыс ачыс пондас локны, — нетэрмасьöмöн баитiс Фролыс. — Быд изöм пуд понда мынтасыс лоас фунтöн. Не унажык. Мужиккес вермасö лöгасьны. Ныкöт хитрöя колö овны.

— Асьтö орöтан, а ме кытчö воштiся?

— Эн пов, будёновецыс быдöс вермас керны.

— Но мыля öтнат мисулитан?

— Вот босьтамö уджалiсьöс, а то и кыкö.

— Ачыт тöдан, мый керан.

— Пондамö овны, медбы не ме мунi, а ме дынö локтiсö корны.

* * *

Фрол Петровичлöн хозяйствоыс тöдчöмöн отасялiс, вильмис да крепамис. Öтiк местаын олiссес только боккезнысö шовкöтiсö: ны син одзын эд мортыс богатсялiс. И пашняыс сылöн лоис куим десятина, мельницаыс уджалö, подаыс йылö, сусекыс паськалö. Баитiсö, что бароныс велöтiс сiйö уджавны, вот и тöбасьö счастьеыс. А Фролыс некыдз эз вермы сувтны, чинтны ассис тöвнырсö, шоччисьыштны кöть бы невна, видзöтны да донсьöтны керöмсö. Городас бур овны, да сэтчин мортыс налькйö йöртöма, похлёбкаыс понда колö котрасьны столовöйö. Сэтчинiссес и нянь кöрсö озö тöдö. Но пасьтасьöны бытшöма, нем он шу. Деревняыс жö керö быдöс ачыс. Фролыс пукалiс да бергöтлiс этö аслас юрын.

— Кытшöм, Фролушко, дума сьöлöмтö гудыртö? — гусьöна, медбы не лöгöтны жöниксö, юалiс инькаыс. — Миян быдöс ни эм, тырмö.

— Мый тэ вежöртан хозяйствоас? Колö вот амбарресö паськöтны. Сюыс содö, а кисьтны некытчö. Да и картаыс лоис учöтöв.

— Босьтiн бы аслыт уджалiсьсö, — полöмöн висьталiс инькаыс. — Вон батрак Илькаыс сiдз жö шатласьö.

— Помещикас ме ог мöд лоны, медбы батраккес уджалiсö. Мымда вынö тырмас, сымда и кера. Вежöртана тэныт? Вот быдмасö юрвердiссезö, сэк мöднёж понда баитны. Дозирайт нiйö буражык.

— Уджалiсь мортыслö сiдз и колö. Кытчöдз ме не пöрись да вына и верма уджавны, кера быдöс, медбы менам челядьыс тшыгсö эзö тöдö. Только дыш мортлöн керкуыс киссьö.

Палёво деревняыс шогмис Сыскоыс керкусянь и пондiс сiя быдмыны да паськавны. Сыскоыслöн увтырыс йылiс. Сэтчö жö томмес вайöтiсö инькаэзнысö мöдiк увтырись, содтiсö роднясö. Фролыс шочыника ветлывлiс и гöститны, кöр шедас кадыс. Но Масленица коста сiя сетлiс аслыс волясö. Колö жö эд мыччавны отирыслö ассис том жеребецсö, кöда шутнялö-мунö кыдз тöвчик. Но кошоваас эта коста сiя пукавлiс öтнас. Пуксьöтлывлiс только нывкаэзöс да лымсö кошова бöрас каттьöмöн петкöтлiс деревня саяс и нуöтлiс тэллезöт мунан туй вылö. Еныс тöдö, мый нiя сэтчин керлiсö. Мужиккес тай баитлiсö, что богатöй мужикыс асьсö тешитö. А нывкаэс гöняйтöм бöрас мылякö эз лысьтö видзöтны веськыта, синнэзнысö дзеблiсö. Этö еныс проститас, нылöн асланыс секреттэс. Тулысыс эд быд мортлiсь сьöлöмсö гильöтö.

Фролыс пондiс кывны ассис вынсö и тöдiс, что деревенсаыс озö лысьтö мунны сылö паныт, и лоас сiдз, кыдз сiя висьталас. И кöстiс ас увтас, мый только вермис да ештiс.

— Фролушко, мыля жö сiдз керан? — полöмöн баитiс сылö иньыс.

— Кыдз кера, — чикыртчöмöн да лöга сiя видзöтiс иньыс вылö, — мый оз гленитчы? Тэ ваяв меным челядьсö да быдты, а сэсся öмтö пöднав. Не нывкаöс босьтi, а куканя мöс ни вöлiн.

— Господи! Этадз и пыр кöритны пондан?

— Ме ог корит, но тöд ассит места. Гортын пукав да чöлыштлы.

Настяыс тöдiс сылiсь перыт кисö и эз понды вермасьны. Сiя вöлi довольнöй, что керкуас быдöс тырмö. Вот пондiс кывсьыны, что быд деревняын лоасö колхоззэз, но некин эз тöд, мый сiя сэтшöмыс. Сё жö Фролыс вежöртiс, кытчö кöстö политикаыс, и мый лöсьöтчöны варганитны.

— Меным колхозыс, даки, оз ков, — баитiс сiя соседдэскöт. — Сытöг уджала ойсö и лунсö, кисьта ньылöмöс. Мырси да вильсасö лэбтi, медбы няньсö быдтыны, а öнi быдöс пон бöж увтö чапкыны ог думайт. Только дыш мортыслö сiя бур, что öтiк пызан сайын пондасö сёйны. Ась менö шöри кераласö, но некöр ог öтлаась.

Рыттэзнас Фролыс пукавлiс гортас дузгыльöн и етша баитiс. Сiя полiс, что öтлаын мöдiккезкöт вермас шедны ыстыны не сэтшöм ылын местаэзö. А мый понда? Только аслас мыдзтöг уджалöм понда. Медбöрын сiя висьталiс иньыслö:

— Тыдалö, гортiсь кытчöкö колас ветлыны. Не олан локтö, а каторга. Сьöрам босьта Опоньсö, и мунамö городас. Тэ жö пыран колхозас и чулöтан муткыля кадсö. Только ов бура, эн лэдзчись.

И мунiс городланяс. А увтырыс варышöн уськöтчис сы хозяйство вылö: сусеккесö быдöс чышкисö да нуöтiсö сюсö. Мельницасö öтлаöтiсö колхозас. Карта вылас колисö öтiк кукань. Челядьыс кольччисö тшыгйöн. Керкуас дугдiс сотчыны биыс. Неделя бöртi семьясö адззисö гор вылiсь. Ловьяэс эзö вöлö. Настясö челядьнас чапкисö да тыртiсö. Фрол Петрович уджалiс эта кадö Мотовилихаын и только война одзас локтiс аслас деревняö. Но лöгыс кольччис айыс, воныс да племянникыс вылö. Кувтöдззас эз вермы нылö проститны.

ЛАРЕЦ

Быдöнныс уджалiсö колхозын, а вот Костя Климов олiс öткаса оланöн и эз мöд тöдчыны некинкöт. Да и мыйлö? Аслас сылöн вöлi карчйöрыс джын гектар, вöлi кытöн бергавны, кытчö вынсö лязны. Костяыс серавлiс нiйö, кöдна ниртöны колхозас тöв и гожум, а деньгасö сё сымда адззылöны. Любитiс зубыта павкöтлыны Попов Тимаöс, кöда уджалiс конюхöн.

— Вöввесö вердан быдса табун, — баитлiс сылö, — а мынтöны кыкьямыс рубöн. Тэ эд мужик, а шедтан инькася етшажык. Мöдöрын бы витiсь унажык вештiсö. Эх тэ, недотёпа.

Климовыслöн шульга киыс вöлi стрöйдöм. Локтiс гражданскöй война вылiсь бытьтö ранитöм. А вöлi не сiдз. Кöр вуджисö Азовскöй море, сiя лыйис кисö ачыс. Суматоха коста некин эз и казяв. Костясö ыстiсö лечитчыны Ленинградö, а сэтчин шедiс воинскöй складö, кытiсь гусялiс да вузалiс солдаттэз понда паськöм, но кужис пышшыны, а то бы судитiсö. Локтiс гортас да гöтрасис. Иньканас вайöтiс Евдокия Матвеевнаöс, кöдакöт шогмисö кык зон да öтiк ныв. Инькасö эз лэдз уджавны колхозас, и сiя лунтырöн мышкырасьлiс огородечас. Зоннэс тожö вöвлiсö мамныскöт, нывкаыс быдмыштiс да пондiс вельмавны и пышшавны гортсис. Айыс тэчис юанас мышьяк и отравитiс нывсö. Пашко зоныс быдмис айыс сьöрья и локтiс сэтчöдз, что вийис мортöс. Конешно, пукалiс и локтiс бöр.

— Рытнас нылö эн ни пантась, — баитiсö отирыс. — Виясö, и нем он босьт. Разбойниккез и эмöсь.

Костяыс решитiс йöрйыны карчйöрсö глухöй заборöн, медбы некин эз адззыв, мый сы сайын быдмö. Эта понда заптiс столббез да ён горбыль и гарйис ямаэсö. Пондöтiс керны арнас, кöр карчыс вöлi дзимлялöм. Столббесö сувтöтiс крепытöсь, кондовöй пожумись, пряслаэзсö лöсьöтiс кыз потшшезiсь и сувтöтiс вольöм горбыллез, кöднö бура йывдiс. «Вот менам лоас крепость, — шоччисикас думайтiс сiя. — Кин пондас пырны, дак ась кынöмсö поткöтас. Лёквир нылö, кин меным завидуйтö. Ме не том ни, колö заптöсок керны. Ларчиксö öнöдз эг видз. Шудтöм инькаö кытöнкö, вешьянокас ли мый ли, видзö деньгасö? Тырмас терпитны. Аслам киын понда видзны. Быд копейкаыс эд жаль. Кöр деньгаыс эм, дак гажöнжыка кадыс чулалö. Кошелёксö мырддя и — точка. Унаöв сiя волясö босьтiс. Ачыс баржа кодь ни лоис. Тырмас».

Костяыс мыдзöмöн пырис гортас. Иньыс вердiс подасö, кöда коласын вöлiсö и дзодзоггез, курöггез, уткаэз, пырис да пуксис веськыта лабичас, киэсö тэчис пидзöссэз вылас. И сэтöн тöдвылас усис да юалiс жöникыслiсь:

— Столббесö мыля öтöрланяс сувтöтан? Бöра эд виль налог пуктасö.

— Ась жö пондыласö, ме мыччала нылö, — лöга горöтчис Костяыс. — Весись разь вирöс кисьтi? Тэ тöд, что быд муторыс деньга сетас. А мымда миян сэтчин öксис деньгаыс?

— Мымда эм, быдöс тай миян.

— Но тэ... эн пиньгы, а висьтав. Меным колö тöдны. Локтан тöлö мотоцикл небамö. Лисапедсö педаллесö колö тальны, а сiя ачыс кыскö. Да эшö сэтчö вот тележка кера. Красота лоас. Тэ вот он ветлы базарас и он тöд, мый отирыс небö, а ме тöда, мыйись позьö деньгасö керны.

Жагöника чулалiс нятьöсь арыс, и локтiс кöдзыт тöв. Виль йöр саяс вайöтiс столаэз, каттис сэтчö лымсö. Костя эшö арнас небис мотоциклсö и сiя жö кадö резьöтiс велосипедсö да пондiс керны прицеп. Эта понда кыськö вайис некыз кöртiсь кык лист и чожа дорис ящик, кöдö сувтöтiс велосипедсис колесоэс вылö. Стрась кокнит шогмис тележкаыс. Быдöс этö Костяыс керис гортас, керкуас, кöр öтöрас бушуйтiс пургаыс. Пессö тöв кежас сiя заптiс одзжык, и эз вöв тöждiсьöм шонытыс йылiсь. Горысся вöлi кöртовöй печкаок, кöдö лонтлывлiс, кыдз сайкалыштас керкуыс. Некытчö эз пет не эз пыр, а пыр олiс инькаыскöт, кöть и видчывлiс сыкöт, но чожа миритчывлiс да тшöктiс чышкыны джоджсö, кытчö керлiс ёгсö. Олiс кыдз дачаын. Деревняоксис олiссес то ли понсис полiсö, а, натьтö, унажыксö кöзяиныслiсь, эзö лысьтö сы ордö вовлыны. Ыджыт поныс вачкисис зверь вылö, а кöзяиныслöн вöлi пишаль. Вермас травитöтны, а то и просто вийны. Кин тöдас, мый сылö юрас пырас.

Кöзяиныс эз тöжды соседдэс понда. Сiя олiс аслас оланöн, видзöтлiс погоддяыс сьöрын, кыдз сылö лымыс да локтö тулысыс. Öтiк ойся кынтыштöм бöрын петкöтiс огородечас пöим да киськалас лымсö, медбы чожажык сылiс. И сылöн огородечыс косьмис медодз, кольччис только гöрны. Плугыс вöлi аслас, но вöлыс, даки, колiс. Плугсö гусявлiс колхозсис жö, а вöвсö эд он гусяв. Костяыс чышкис лемех вевдöрсö, кöдö мавтлiс солидолöн и висьталiс инькаыслö:

— Асьным гöрамö. Вöв туяс ачым кутчися, а тэ гöрсö видзан.

— Кытчö тэрмасян? Отирыс пондас гöрны, и кинкö отсалас.

— Кадсö колö выиграйтны, неделяыс весись чулалас. Плугсö кыскан кöрт дынсяняс сiя лöсьöтiс лямкаэз, кышалiс пельпоннэзас и пондiс кыскавны. Уджыс мунiс жагöна.

— Вöлыслö только плеть оз тырмы, — серöмтчис инькаыс.

— Эн рызъяв, — кымöссис васö чышкикö лöгöн горöтчис Костяыс. — Босьта вот варовиннöй* гезторсö, лэбта юбкатö да пешла небыт местаэтö. Сэк пондан тöдны, кыдз деньгаыс шедö, а то тэнат бöбöв яй ни пондiс быдмыны. Кыдз кань олан керкуас.

[* Варовиннöй — гез, кöдö кыйтöнняс дёгöдялöны]

Эта кадö ны огородеч дынöт лöсялiс мунны вöлöн Ладановлö, кöда ним вылö Костяыс гижлiс мöс, медбы ас вылас вöлi только öтiк, а то налогсö ыджытö пуктасö, казялiс нылiсь мырсьöмсö да пыртiс Воронкосö карчйöрас и час-мöдсö уджалыштiс плугнас. Сiдз гöрсис огородечын. Керисö и гряддэзсö.

— Нёль паськыт грядас сюян луксö, — висьталiс иньыслö Костяыс, — а витöтас быдкодь шурум-бурумсö.

— Некöр тай сымданас эгö садитлö, — шыасис иньыс.

— Куим грядсис вузаламö и деньга керам, а öтiкыс кольччас аслыным. Велöтчы видзöтны одзлань, лыдтöм пасма тэ.

— Кытшöм эм, мöдiкö оз ков. Меным и сымдаыс тырмас.

Гожумыс паськöтiс отсö. Зелёнöйсялiс туруныс, быдмöмсö босьтiс быд пуокыс, а Костялöн огородечас быдмис лукыс. Кöзяиныс важын ни видзчисис этö кадсö, лöсьöтчис сы кежö. Тöбалiс быдса тележка да и мунiс городö базарö. Сувтiс бöра жö мöймуся местаас, шöрись навес увтас, кытчö öксьö отирыс. Зеленьыс мунiс öддьöн боёка. Чожа тележкаыс простамис, и Костяыс гöняйтiс бöр да эшö вайис.

— Небö, матушкаэз, да вердö семьяэзнытö, — гажöна баитiс Костяыс öшлiсикас. — Зеленьыс тулыснас быд мортыслö колö.

— Доныс яйся вылынжык, — пеняйтiсö прилавок одзас, но небисö.

— Дак эд быдтыны колö. Сiя жö витамин. Тöдiт бы, кыдз ас вылам гöри.

— Тöвнас и челядьыс кельдöтiсö, — норасьöмöн баитiсö инькаэс.

— Эдö жалейтö деньгасö, — ылöтчöмöн сералыштлiс Костяыс. — Сiйö эд он сёй, пызан вылас он пукты.

— Тэ невнаöн сет да быдöнныслö тырмöт.

— Эдö тöждö, тырмас, ме верма эшö вайны. Эстöн эд абу ылын, дыр ли гöняйтыштны, вöлыс кык колесоа, перыта мунö.

Костяыс кужис вузасьны и пыр тöдiс, мый оз тырмы базарас. Мукöд лунас вовлiс гортас кыкисьöн-куимисьöн и чожа сылöн лук гряддэс кушамисö. Сэтöн сiя уськöтчис иньыс вылö:

— Мый нö тэ сунасян? Он тöд, мый керны? Вод койка вылас да паськöтчы, ме висьтала. Помидорреслöн рассадаыс важын ни цветитö, а гряддэс пустöйöсь. Тэ былись только öтiкö тöдан. Локта рытнас и мыччала, тöдны пондан. Тырмас мöсвöраэтö малавны. Рыт кежас медбы помидорыс вöлi садитöм.

— Вот ылöстöмыс. Да нiя жö жарас куласö. Рытнас садита. А тэ кöр локтан? Кöр видзчисьны?

— Вузалышта и берта, ог öш. Пет да кöть весöтчы. Кöзяиныс ветлiс городас да шондiыс лэдзчан дорын локтiс гортас, сувтöтiс мотоциклсö и пырис керкуас да сэк жö корис ларецсö, кöдаын иньыс видзис деньгасö. Ларецнас нiя шуисö кöртовöй банка, кöдалöн вевдöрыс вöлi басöка рисуйтöма быдкодь цветоккезöн и кытчö тöрлiс не öтiк килограмм леденеццез. Костяыс босьтiс киас, öшлыштiс долонь вылас да вöлись осьтiс. Сэтчин куйлiсö бытшöма тэчöм деньгаэс. Сылöн сьöлöмыс шоналiс и рожаыс шынньöвтiс. Кöзяиныс кыскис полевöй сумкаись нöитчöм деньгаэсö да пондiс лыддьыны. Гырисьжык купюраэсö тэчис бокö, медбöрын öтлаöтiс нiйö да кöрталiс кыз сунисöн и пуктiс ларецас. Кольччöм руббесö сюйыштiс карманас, а ларецсö замокалiс. «Колас дзебны, — думайтыштiс сiя. — Инькаö вермас ылсöтны, а пуктан местаö — спокой лоас».

Но спокойыс эз лок. Костяыс пыр думайтiс, кыдз петкöтны гортсис ларецсö, медбы иньыс эз адззыв? Сылö немлö тöдны, мымда öксис деньгаыс. Кылыс лоас дженытжык. Натьтö, быдöс деревняыс ни тöдö, мымда ларецас деньгаыс. Инькаыслiсь öмсö пöдналас только могилаыс. А кытчöдз колö повны. Грабитасö, и нем он босьт. Разь кинат только макнитан. Костяыс дыр думайтiс, кыдз гортсис ыстыны иньсö и локтiс сэтчöдз, что эз вермы узьны. Сылö кажитчис, что иньыс пыр видзöтлö сы сьöрын. Медбöрын эз вермы терпитны да ыстiс Евдокиясö неылiсь деревня Мичашорö да тшöктiс корны Сенька Ваньлiсь щёголёк.

— Важын ни сiя менчим босьтлiс да эз вай, а сытöг делоыс оз пет. Котрасян, ылын я эстöн.

— Ветла инö, раз колö дак, — шыасис иньыс.

— Сытöг нянь кусöксö плотникыс оз шедты. Етштö оз орöт.

Иньыс мунiс, а Костяыс сы коста петкöтiс ларецсö, пуктiс люлькаас да заводитiс моторсö и мунiс деревня сайись вöрас.

Сылöн важын ни вöлi бöрйöм местаок, кытчö пуктыны ассис казнасö, кöда вöлi каттьöма трепичö да пуктöма банкаас. Сук тэлляын вöлi ыджыт мыр, кöда увтö керис ямаок да сюйыштiс сэтчин ларецсö, а лоöм осьтасö бура вевттис нитшöн да чапкалiс сэтчö чашьясö. Некин оз думайт, что мыр увтас мыйкö эм. Пернапасасис керöм вылас да тэрмасьöмöн бертiс гортас, медбы иньыс нем эз казяв. Öнi сьöлöмыс радъялiс: деньгасö некин оз вöрзьöт. И, кöр вузасьны немöн, Костяыс ветлывлiс тшакьявны, кöть сiя годö тшакыс петавлiс етша. «Мыйсянь бы этö, — думайтiс иньыс. — Тшаксö оз любит, а пондiс ваявны». Но сiя чожа казялiс, что ящичокыс деньганас оз тыдав. «Эз ли нуöт сiйö вöрас? — чарöтiс сiйö дума. — Мый тэ сылiсь босьтан?» И пондiс казявлыны, кыдз вузасьöм бöрас мöд жö лунас Костяыс лöсьöтчывлiс вöрас и деньгасö гортö эз кольлы. Тыдалö, сiя суськö и дзебö сы шогья выручкасö. Сэк решитiс караулитны ассис жöниксö. И öтпыр мунiс сы туй кузя. Сьöрас босьтiс корзина, бытьтö тшакьявны. Луныс вöлi шоныт да мича, кöть и сибалiс ни ар. Евдокияыс пасьтасис кокнитика и мунiс ыбвыв туй вылöт, кöда вайöтiс вöрас. Сiя жагöника оськалiс колесоэзнас кольöм следдэз сьöртi, кöдна вайöтiсö мотоцикл дынас. Только мöдiс мунны тэлляинас, кыдз сы бокись казялiс жöниксö, и чужöмас чавкнитiс вирыс, рожабаннэс гöрдöтiсö.

— Овдöть, мый сэтчин кошшан? — казялiс иньсö да горöтiс Костяыс,

— Тшаккез тай смекайта, — повзьыштiс иньыс.

— Лок инö öтлаö, шоччись. Стрась бур погоддяыс.

— Тшакыс мылякö етша, — локтöнняс баитiс иньыс. — Унажыксö синявка петöма. Видзöт, мымдыш öктi. Кок садь только бырöтi.

— Да эстi ме ветлöтi ни, — висьталiс Костяыс да косöйöн видзöтыштiс иньыс вылö. — Колö саясжык ветлыны.

— Ась уж, шоччисьышта да вöлись. Кинкö то и нитш босьтöма. Отирыс тöждiсьö да керö, а миян сё не сiдз петö.

Этна кыввес клёнгисö Костяыслö юрас. Значит, иньыс мыйкö тöдö или жö думайтö. Сiйöн и вöтлiсьö сьöрас, кыдз понок. Оз ли думайт янсöтчыны? Видзöтiс-кытшöвтiс ас гöгöрсö, но нем эз казяв и висьталiс: «Ветламö инö вон лог саяс, а сэсся öтлаын мунамö гортö».

Лог саяс быдмис том тэлляин, эшö абу сiсьмöма чашьяыс. Костяыс ветлöтiс иньыскöт, öктiс корзинаас тшаксö. Öтiк мыр дынын сiя висьталiс:

— Лок-ко татчö, видзöт, Öвдöть.

— О-о, нитшыс тай кыдз подушка! Вот öктыны бы да гортö вайны.

— Пуксьышт да костö веськöт, мыдзин, поди.

Иньыс лэдзчисис небыт нитш вылас и нюжöтiс коккесö. Костяыс сибöтчис сы дынö, малыштiс пидзöссö, кутiс голяöттяс да водтöтiс вöрись ольпась вылас.

— Мый тэ, мый тэ, — вашкыштiс иньыс, — али гортын умöль? Мый тэныт тöдвылат усис? Эстöн эд отир ветлöтöны.

— Чöв и эн пиксы, — сьöкыта лолалöмöн горöтчис Костяыс.

— Да адззыласö эд, — дзигмалöм сьöлöмöн горöтчис иньыс. — Неужто он терпит? Костя-а?

Иньыс думайтiс только эта минута йылiсь, а жöникыслöн сы коста шогмис умöль план. Сiя мездöтiс кисö иньыс голя увтiсь да быдöс вывтырнас личкис инькасö, а певвес зэлöтiсö горшсö. Чушыктыны лоис немöн. Иньыс öштiс сознаннёсö, лэдзис киэсö, но Костяыс сё зэлöтiс чуннесö, кыдз бытьтö тувдiс сэтчö. «Ме эд не челядь, — думайтiс сiя, — а мужик. Мыйлö ме сьöрын вöтлiсян? Öнi пондан чöвны, некинлö он висьтась».

Иньыс эз вöрöтчы, кöр сiя чеччис да видзöтчис гöгöр. Только вöрыс полöмöн шушкис...

Кулöмсö, кöда вöлi сюйыштöма öктöм уввез увтö, адззисö тшакьялiсь отир. Народнöй судас Костяыс эз понды пыксьыны керöмсис.