Горвылын

— Вöлi рытъяв кад. Эшö не пöрись Егор Ширинкин эз адззы аслыс местасö, ветлöтiс джоджöттяс и думайтiс, кысь бы адззыны юыштны. Ась и не уна, кöть бы ньылыштны. Сылöн и кылыс лякасис öмас, дульыс косьмис. Просто садьыс пондiс бырны. Быдса лун терпитiс, а вот рытнас шогöтыс одолейтiс. Тöн соседыскöт сап петтöдз винасö юисö, а талун кöслун. Ветлы бы магазинас, да сэтчин одзöсöн озö сетö. Деньгасö инькалiсь корны — нем оз пет. Тэнö жö эшö и ругайтас. Инькаыс эд сэтшöм бестия, что сы дынö куш киöн он лок. «А, поди, мыйкö петас? — думайтыштiс Егорыс, да видзöтыштiс горвылас, кытчö инькаыс кайис шоччисьны. — Не йöзлöн эд, аслам. Ноко, пондыла». Егорыс жагöника сувтiс западня вылас, а сэсся тальччис ступенька дорас и лэбтiсис горвылас. Инькаыс вешшыштiс бокö и сетiс жöникыслö водны ордчöн. Егор куйлыштiс невна, шоналiс да и усис тöдвылас томся оланыс.

— Тэ мый, эн ли бöбсяв? — инькаыс барöтiс сы вылö синнэсö. — Не том ни эд, эн бöбав, и челядьыс вермасö пырны...

— Лолö тай шоналiс да охоткаö лоис.

— Ойыс эд асланым, терпитышт...

— Сэтчöдз эшö ен тöдас мый вермас лоны. Меным öнi колö.

Дрöжитан кинас Егорыс мöдöртiс юбкасö да пондiс чöвтны трусиксö, кöда вöлi зэлыт резинка вылын, каджсис эз мезмы. Егорыслöн киыс нильдiс кок пöлöняс и сэтчин павкис кошелёкас, кöдö инькаыс дзеблывлiс жöникыс шогья.

— Тэ былись ли мый ли мöдан?

— Ог тай рызйы-серав, — лöга шыасис жöникыс.

А чуннес коласö шедiс ни кошелёкыс, и Егорыс чожа кыскис кисö да сюйыштiс кошелёксö карманас, а сэсся мошкоритчыштiс да кутчис дело бердас... Кымöсас мыччисис ньылöм, кöдö некöр вöлi чышкыны. Сыбöрын сiя куйлыштiс недыр да висьталiс: «Мыйкö жар лоис, лэдзчыла, ноко, улö». Асьсö лöсьöтыштiс да колис горвывсö и мунiс комас, кытöн осьтiс кошелёксö да босьтiс сэтчинись поллитра вылö. А инькаыс пондiс сэтчин кышöтчыны да ыш лолавны. Егорыс локтiс горвыв дорас и тшöка лолалöмöн юалiс:

— Мый сэтшöмыс лоис?

— Да лядьбейöс тай пондiс сотны...

— А эта мый валяйтчö? — Егорыс гусьöн пуктiс бöрас кошелёксö да мыччалiс сы вылö. — Вай жö трекнитыштамö.

— Лёк сулема тэныт оз ков, — инькаыс кватитiс кошелёксö да дзебис няняэз коласас. — Только бы пируйтны, а сэсся толкыт некытчö оз тырмы.

Кöзяиныс тöдiс инькаыслiсь öбичейсö и эз кутчись паныт. Часöт сiя пондöтас видчыны, касьтылас дедсö и бабасö да содтас аймамсö, öтлаöтас соседдэсö, еныс вылö пуктас пернапассö, оз вунöт ассис тöждiсьöмсö, каттяс сэтчö челядьсö, тöдвылас уськöтас мусис и васис босьтытöмсö да сiдз, что джоджсис бусыс столбöн сувтö. Одзжык Егорыс лöгасьлывлiс и киэслö волясö сетлiс, а медбöрын вежöртiс, что тышкасьöмнас инькасö он велöт, и пондiс мунны гортсис. Вот и талун вöлi бур причина мездöтчыны. Сiя кватитiс шапкасö да кинитчис öтöрас. Кокнит кокöн сiя оськöвтiс ворота саяс да тэрмасьöмöн иньдöтчис магазинас, кöда вöлi неылын. Вузасисьыс босьтiс деньгасö да серöмтчис:

— Видзöтö жö, — висьталiс сiя небсиссеслö, — Егорыс талун кытшöм богатöй, ачыс винасö небö.

— Деньгасö колö кужны керны, — гордитчöмöн шыасис сiя.

Вузасисьыс вериттöг лэбтiс деньгасö шондi югöр вылас да видзöтiс öтöрсянь и мöдöрсянь, но нем эз казяв.

— Печатайтан станокыс менам абу, — öнi серöмтчыштiс Егорыс. — Не сiдз думайтан. Ме эд кыдз не кыдз, а мужик, и этöн быдöс висьталöма. Вот жöник саяс мунан, сэк вöлись вежöртан. Но... Баляссэз менам некöр тöчитны. Сет бутылкасö, да колö мунны.

Вузасисьыс шысеттöг сетiс бутылкасö. Егорыс чикыртыштiс синнэсö, донсьöтöмöн босьтiс да дзебис карманас и котöрöн петiс магазинсис. Вöлись öтöрас сiя ловзисис быдса моросöн, а синнэс баралiсö да öшöмöн кошшисö местаок, кытöн позис бы юыштны. Но магазин гöгöрас быдлаын вöлi отир. Голюк понсис ны дырни эд он то юышт. А бутылкаыс кыдз бытьтö бы сэтчин гыжьясис, пизис, сотiс боксö да тшöктiс чожажык осьтны пробкасö. «Вот эд кытшöм нечистöй дук, — думайтiс Егорыс öтiк местаас тальсикö. — И бутылка винаыс эм, да он лысьт джыннявнытö. Вот оланыс лоис, кыдз Микишкалöн. Колас мунны Кузька Романöдззас. Баклашыс сылöн, натьтö, тожö потласьö».

Кысь и коккезас лоис выныс, и Егорсö, кыдз тöвчикöн, пöльтыштiс местасис. Сiя бордпавйöн мунiс дружокыс дынö. Шув-пав пырис тöдса керкуас да юасьтöг сувтöтiс бутылкасö пызан вылас и корис стопкаэсö:

— Но, Роман, висьтав спасибо, что еныс эм эшö кымöррез вевдöрас, а то бы кысь этö зеллёсö босьтiн. И-эх-эх, ноко, дзурснитамö важ дружбаыс понда! Ло здоров! Шогöтыс ась боки мунас.

Нiя пукалiсö да юисö, юисö да баитiсö, и Егорыс эз вермы видзсьыны, медбы не висьтавны, кыдз талун адззис деньгасö.