Кусöм биэз



1

Вижгис лэчыт тöв, вöр вылiсь нетшкис арся басöк лист да койис му вылö. То зэрис, то усис лым. Неöтпыр ни пуксьылi туй бокö шоччисьны, но колiс мунны одзлань, гортöдз вöлi эшö вель ылын. Кытöнкö вöрас китшкис катша, лэбзисö öтi-öтi ракаэз, столовга ¹куст вылын шутнялiсö жоннез.

Вöрын ветлöта мöдiк лун. Колö тэрмасьны гортö, но коккез оз бы кывзiсьö. Думайта, кыдз бы кыссьыны Тиминаöдз да сэтöн пöттöдз шоччисьны, ашын чеччыны одзжык и вöлись питкыльтны гортö.

Тимина — деревня. Эстöн кöркö вöлiсö дас етш керкуэз, олiсö отир, но талун оз кыв не морт голос, не поннэзлöн вувтöм.

Мыдз коккезнам ружтi-мунi, думайтi, кöда керкуö бы пырны да узьны: Ульян баб ордö или Митрей дед дынö? Старикыскöт, натьтö, эд лöсяласжык: куритам, баитам олан йылiсь, ошшасям, кин да кыдз вöралiс, кöда унажык гортö вайис добыча. А бабкöт мый?

Коли ыб. Пыри вöрокö, вуджи шорок и нырö пондiс павкны тшын дук. Сэтöн и Тимина: кык керку да нiя кыдз дзебсисьöмась кöззэз сайö, чышьянасьöмась сера чышьяннэзöн и шы оз сетö, полöны йöз отирись. Керкуэс сулалöны öтамöдныс дынсянь дас метр ылына, и Ульян баб керкуись петö тшын, но менам коккез топ асьныс кежисö Митрей керкулань. Тешитiс дума: «Пыра, коккезiсь кыскала сапоггез, чöвтча, нюжöтча полатьö и понда узьны да вöтасьны. Дедыслiсь ог кор не сёйны, не юны: сылöн, поди, аслас кынöмас тöв шутнялö...» Эна думаэзöн сибöтчи старикыс керку дынö, но посöдз ыбöсыс пöдана, пос увтсянь уськöтчис Митрейлöн рыжöй да кузь гöна пон, паськöтiс öмсö, мыччис пиннесö и пондiс сёйны-вувтны.

— Бусик, Бусик! — кеймися поныслö, медбы сiя лэдзис керкуас.

— Повзин?! — сэтöн бöрсяням кижган голосöн горöтчис Митрейыс, кöдö эг адззыв, кысянь локтiс, и кöда кыдз сералiс. Старикыс кöс мыгöра, кузь киа да кузь тоша, вылас вешьяныс бырöм и вочöм, коккезас сапоггес резьдöмась, сулалö дынам зэв да лолалö пыдына, кыдз кинiськö повзьöм, котöртöм не öтiк километра и лолалö морос тырнас.

— Поныс абу ош, тэнö оз сёй — лёка веськыта синнэзö видзöтiс старикыс, кыдз менö эз тöд, бытьтö сы понлö лöсьöтчи лыйны. Митрейыс эз юав, кытчö муна, мый меным колö, а эрзыштiс: «Шогала... Смертьыс кышасис и оз вермы вийны... — сьöвзис менам кок ныррез дынö. — Кöть бы кытшöмкö лекарсво вайин...»

Унаись ни пантасьлiм дедыскöт, öтлаасьлiм кытöнкö улицаын, колхознöй правленнёын, больницаын, кытöн уджала, гортын, кöр Митрейыс пыравлö миянö, медбы жар лунö юны ыркыт квас — дедсö лыддя бур мортöн, — а талун видзöт жö...

— Пельшöрыс дынö некöр мунны! — модис пöрисьыс, но керкуас эз кор, топ эз тöд, что ме фельдшерыс и эм.

— Да-а-а, — шлёчкис сiя кывнас. — Кулан эстöн и некин оз понды тöдны, некинлö дзебны...

— Дед, ашын вая лекарствосö!

— Да-а-а, ваян тай... Мый ме сiйöн кера? Ме ачым тöда, што меным лекарсвоыс оз отсав.

«Но и чёрт тэкöт!» — лöгöтiс ни дума, мыдзыс ни öшис коккезiсь, буржык ойнас гортöдз ни котöртны, нем ог ло, нежели этатшöм мортыскöт узьны öтiк керкуын. Старикыс дынсянь нырö патшкис ньылöм дук, кыдз вöв дынсянь, кöдö томсянь доддялöмась и талун оз юскö, бытьтö, некöр и мортыслö миссьыны баняын — ой и лун мырсьö-уджалö.

— Заразнöй шогöт ме бердö кутчисис, — пондiс ружтыны да кивзыны старикыс, кутчисис кынöмыс бердö кыкнан кинас, кык кусiнь кöстiс, норасис. — Вот эд, пельшöр, куимöдз лун ни кынöмö висьö. Котрася öтöрö да керкуö, до смерти ни сысъялiс заразаыс... И кытiсь сiя ме бердö кутчисис?! Натьтö, эта... Суседкаö городсис вайис да козьналiс... — видзöтiс веськыта синнэзö, чужöмас топ гижöм, что мортыс вот-вот... Бöрья чассэз олö и тэ, фельдшер, сэтöн нем ни он вермы керны.

— Дед, некытшöм лекарство менам абу! Вöравны эд мунi, — дорйи ачымöс.

— Конешно, — шуис старикыс. — Конешно, ойи-и-их! — чужöмыс чуман моз чукыртчис и саясис чомыс сайö.

Ме чожажык шыбыльтi Ульян баб керкулань.

2

Ульян бабыс сулалiс аслас посöдзын и шыннялiс, рад, топ менö видзчисьöм куим лун ни кыдз дона гöсьöс.

— Тэ мый сы ордiсь кошшан? Сэтшöмыс дынiсь... — бабыслöн голосыс том да гажа, рожабаннэзас сöдз вир, синнэс югытöсь, лöзöсь, гажаöсь да томöсь, ачыс топыт, кызкодь дженыт кока, пасьтасьöм дубасö, кöдö öнi миян важын ни оз новйö. Паськöмыс бабыс вылын сiдз лöсялiс, бытьтö казьмöтiс меным томся оланöс, кöр нывкаэс новйисö дубассэз, и ми, зонкаэс, ны коласiсь аслыным кошшим невестаэз.

Шагнялi баб керкулань, видзöтi сы вылö и юрö пырис дума: «Коккезас бы кöмавны воннезöн нинкöммез и кöть жöник сайö сет...» Но мортыслöн коккезас вöлiсö виль резиновöй сапоггез, и бабыс киас видзис асвурöм наберук ¹. Здоровайтчи, öмöс осьтi, медбы юасьны узьны, но сiя одзалiс висьтавны:

— Пыр чожажык керкуас! Чöвтчы да пöрччась, шоччись... Натьтö, кынöмыт сималö?

Пыри керкуас, коккезсим кыскалi вамöм носкиэз сорöн сапоггез, чöвтчи да порог дорö коли ва паськöмöс, и сэтöн синнэз куньсисö, пöрöтчи бы кычан моз порогыс дорö и ланьтi, но Ульян бабыс пырис керкуас, дзар керис паськöмö вылö, чушки-пашки мунiс комö, мыйкö пондiс вöрöтны и баитiс: «Кин тэнö этатшöм погоддяас гортiсь вашöтö?»

— Гажтöм вöрыстöг, баб, — висьталi ме.

— Тöда, — серöмтчис хозяйкаыс. — Менам эд кöркö сэтшöм жö вöлi. Гортын неделяöн жö эз узьлы, а мый керан, ежели вöрыстöг эз вермы овны? Но уж яйнас бöра вердiс! Сёйи пöт, а öнi видзöта, кин мунö пишальнас, и синваэз петöны...

— Баб, — пыри котомаам да сэтчинiсь кыски сьöла.

— Тэ мый керан? Эн вöрöт добычатö, поди, öтiк сьöла кутiн да сэтöн кыскасян. Ю! — хозяйкаыс одзам сулалiс ни тыра кружкаöн.

Юи. Польдiс кынöмö, сьöкыт лоис лолавны, а бабыс сулалiс одзам и модис: «Ю эшö, кага... Пöт ю! Тöдан эд ми, комиэс, кытшöмöсь. Квастöг öтiк минута ог вермö овны, — и бöра пондiс осудитны Митрейсö. — Мый тэ сэтшöмыс ордiсь кошшин? Сiя эд асьсö оз любит, а эшö йöзöс...»

Кöть тэ мый, баб, баит, кöть вид соседтö, кöть ошкы, нем ог шу. Долыт меным, ырöш бöрсянь коккез небзисö, юрö кайис вирö и пондiс орсны, козьнавны вын, вунöтi ни лунся кузь туйöс, кöда новйöтiс сэтшöм местаэзöт, что он бы куж и висьтавны, кытöн и вöлiн ни.

— Немöн Митрейыс оз шогав, — одзлань баитiс бабыс. — Сiя сэтшöм и эм. Видзöт, кыдз тэнö горт дынсис вашöтiс, а мыля бы? Да сiйöн, медбы тэ керкуас эн пыр, эн сёй да ю, эн кушты мортсö.

Арся ойыс видзöтчис ни керку öшыннэзöт. Керкуас пемыткодь ни.

— Узя бы, — висьталi хозяйкаыслö.

— Ештан, — висьталiс бабыс. — Сёян и вöлись! Ме тэнö водтöта кроватьö, небытiнас, мед буржыка шоччисин. Ашын бöра эд пондан отир гöгöр бергавны. Миян коддесö веськöтны... Кинлöн юр висьö, кинлöн кынöмыс, а кöда Митрейыс моз жö, поди, личемеритö, вот сэтшöмсö и веськöт, тöд сылiсь шогöтсö. Сiдз эд?

Ме шы эг сет, шыннялi да кывзi пöрисьсö. Горвывсянь чеччöвтiс рыжöй кань да джоджö уськöтiс ёггез. Бабыс сэк жö кырымас öктiс ёггесö и чапкис городзö, ачыс ошшасис, мымда сiя таво солалiс тшак да ваялiс ягöд.

— Öтнат он пов? — юалi пöрисьыслiсь.

— Кинiсь повны?! — эз вежöрт сiя. — Гортын эд!

Горт... Этатшöм вöррезас, лешакыс позын?.. Ме пишальнас муна и сьöлöмын недолыт, сiдз топ и öша, кöиныс сёйö и ошыс повзьöтö, а сiя...

— Нем ог думайт! — ошшасис бабыс. — Кытчö понда мунны, ыбöсас зарга бедь и — Христос мекöт! Разь Митрейыс жö?.. Но ме сiйö чожа кута!

Вот сiдз, ёрттэз! Миян посадын этадз жö вöвлi: кытчö мунам, ыбöсас заргам бедь и — Христос тэкöт! Не асланым, не йöзыс керкуас юасьтöг оз пыр, а öнi... Талуннянас грех и ошшасьны.

Öтöрас локтö арся ой, пемдö öддьöнжык, и вöрыс топ зэв ни сибöтчö керкуыс дынö, топ кинкö öшын одзын и сулалö, синйö миянöс. Лампаыс, кöда сотчö пызан вылын, югдöтö умöля.

Думайта, мый жö бабыс керö татöн, вöр коласас? Тшак-ягöдсö эд позьö öктыны миян посад дынiсь...

— Талун старикöлöн чужан лун, — думаэзöс сорис бабыс. — Ловья бы, бат, вöлi, но еныс сiдз шуис, что янсöтчим. Кыкдас год ни öтлаын ог олö...

Лöсьöтчи бы юавны, мыля одз кулiс жöникыс, но бабыс сьöкыта ловзисис да пондiс висьтасьны.

Кадыс кыдз лэбзьö. Топ тöн вöлi челядь, а талун, видзöт, пöрись ни.

Ульяныс чужис сiя посадын, кытöн чужи и быдми ме. Семьяыс эз вöв ыджыт: айыс, мамыс да кык вон, а куимöтыс челядьыс коласын — Ульяныс, öтнас нывкаыс — кыдз шöрыштöм шöрöм.

Посадным грива вылын, гажа местаын. Нывкаыслöн керкуныс вöлi лунлань ладорас, кытöн мусис петö ключ-шорок и визывтö керöсыс кырылö, юкталö видззез, матiсь вöрсö, пода, быдкодь кайсö и гагсö. Ульяныс любитiс челядьыскöт орсны шорокыс дорын, радейтiс видзöтны керöсыс вывсянь видззез, вöрсö и айсö да мамсö, кöдна уджавны ветлöтiсö унажык керöсыс кырылö да вовлiсö сэтчинсянь жö. Но нылочкаыслö недыр усис весь овны и орсны челядьыскöт, колiс томся-томöн отсасьны мамыслö: печкыны, вурны-вочны, а сыбöрын кыйны дöра, усис и вöв вылын пинявны. Некин сэк эз жалейт, эз шу, что тэ быдмы, да вöлись асьтö и нярьяв сьöкыт уджын, а пыр кылiс: «Этö кер. Сiйö отсав...» И кывзiс Ульяныс пöриссесö, эз норась, уджнас эз тшык, кöть и нывкася олансö топ эз адззыв. Кытшöм ни сэтöн зонкаэз йылiсь басни, кöть и Степансö тöдiс бура, тöдiс, что зонка эм да олö гортас, уджалö аслыс. Пантасяс кö öтпыр улицаын, тэ вылö дзар оз кер, кöр эшö тэ учöт мыгöра, ай-мам синйöны быд шагын, бытьтö тэ быдман и быдмыны он вермы, сё учöт кага, кöдö колö видзöтны быд местын, медбы эшö эн öш, эн кеж кытчöкö, эн доймы. Некöр вöлi зонкаэс йылiсь думайтны, некöр вöлi ныкöт пантасьны, сулавны кытöнкö син сайын öннямоз. Будь тöвнас разь мунан пукаланiнö и сэтчин адззылан зонкаэсö, но Ульян кодьсö некин оз адззы, некинлö полiсьыс оз ков, кöда пыр чышьян пельöснас вевттис öмсö, полiс кыв горöтчыны, а кöр и шыасьлiс, кыдз шыр пиксыштлiс, и одзлань пукалiс да печкис кытöнкö порог дорын.

Ой и лун уджалiсö деревняын том и пöрись, вердiсö асьнысö, богатсялiсö бы, но эз вермö — дзуртiсö да олiсö, а кöр пондiс вежсьыны оланыс, кöр вермасисö гöрддэс да чочкоммес, оланыс сорласис, дзугсис, и сьöкыт вöлi вежöртны, кин да кинöс вермис.

История... Миян деревняö локтiс Колчак. Вöлi лёк мороз, öтöрын ловзисьны немöн — руыс сотö горш. Улица тыр доддя вöввез, йöз отир. Доддез увтын дзуртö лым, несйöны вöввез. Öтöрись ыбöссö Ульянлöн айыс жвангис-игналiс зорöн, мед некин учöт керкуас оз пыр, лабич увтö дзебис чер, медбы мыйись-мый... И пукалöны гортын — не кулöм, не ловьяöсь, пыдынжыка ловзисьны оз лысьтö, еныслö юрбитöны, медбы отсалiс-дорйис врагыс шогья.

— Господи! Простит менчим грешнöй душаöс, дорйы супостаттэзсис! — Ульянлöн мамыс юрбитö ен одзын, кымöснас люкалö джоджсö. — Господи! Кысянь миян юр вылö уськöтчис сотанаыс?!

Еныс лёк чужöма, угöвсянь дзиргö-видзöтö инькаыслань, кыдз осудитö, мыля норасьö оланыс вылö.

Морозыс шовкöтö керку угöлын. Сьöлöммезныс чеччалöны, кöччез моз кывзiсьöны, оз я кинкö кай посöдзас, кеймöны, медбы врагыс орддис... Но, тыдалö, етша юрбитiсö: кинкö дзурка-вирка кайис посöдзаныс. Сьöлöммезныс чеччöвтiсö öманыс бы...

— Господи! — сёпкö мамыс да пернапасасьö, чужöмыс — сьöд шом. Господи!

— Тупкав öмтö! — эрзыштiс айыс, лабичыс увтiсь босьтiс черсö и пондiс кывзiсьны, оз я посöдзсис лэдзчö да мунö, но йöзыс, тыдалö, пырö бы керкуас, йирк-йорк брякнитiс ыбöсас и ыкöстiс: «Хозяин! Открывай!»

— Эн осьт! — мамыс кеймисьö айыслö. — Христа ради, эн осьт! — Дрöжитö — пиннес кальскöтöны öмас, веськыт кинас кресталö мороссö.

«Стук-бряк!» — мыйöнкö сiдз вачкисö ыбöсас, что потолоксис буждiс песок. Чочкоммис рожаыс Ульяныс айлöн.

— Открывай!

— Осьт, — кеймисьö ни иньыс мужикыслö. — Сотасö...

Ульянлöн мамыс полiсь, мыйись-мый сiдз сьöлöмыс и потö, сiдз и кулö, кеймö еныслö, корö отсöт, но повзьöмувья жö вермас уськöтчыны кöть кин вылö, гыжьявны рожа, сьöвзьыны синнэзö, брынгыны и вачкыны. Öнi инькаыс сунилабичись ¹босьтiс быгрöтчан, синнэзас öзйис нёштöм югöр, сiйö и видзöт, кыдз чепöссяс паныт йöз отирыслö, тояс-лояс...

— Мам... — нылыс кутiс да мырддис мамыс киись быгрöтчансö. — Мам, тэ мый? Нiя эд миянöс киж-каж керасö...

Эта коста айыс петiс да осьтiс ыбöссö, и керкуас утугаöн пырисö сизим солдат — öтiк ыджыт, мöдiк эшö ыджытжык, öтiк лёк, мöдiк эшö лёкжык, пырисö, пишаллезнысö пуктiсö лабичö, жмитчисö гор бердö, шонтiсьöны, синнэзнаныс сёйöны-видзöтöны керку пытшксö, Ульянсö, мурзьöны да ружтöны. Усаыс эз ешты пырны, ыксö ни:

— Хозяйка, сёйны вай! Вай сёйны да тэрмась! Мыйöн бы сэтшöм вижлöксö вердны? Асьныс сёртни да кушман кöччез моз йирöны, а нiя: «Вай!»

Ульянлöн мамыс кодя: кин йöзыс пырас керкуас, сё ни мыйöнкö вердас, ачыс оз сёй, но пызан вылö ваяс, и сэтöн горзiс-керис да вердiс враггесö, а нiя дзик эз пöтö, мый усяс син выланыс, бöра ыксöны: «Вай!», асьныс куритöны, сьöласьöны, орсöны картiэзöн, корöны вина, кöда эз вöв и абу, гöрдлöны-сералöны да киэзнысö нюжлалöны инькаэс дынö.

Айыс эм керкуас и абу: коскас чер, пиас пурт и öшис — öтнас оз лысьт кутчисьны сизимыскöт. Гым кымöр öшалö керкуас. Гортын, кыдз йöзын, олöны шыррез моз, полöны горöнжык ловзисьны, кыв горöтчыны, гор сайö да полатьö дзебсисьöны и еныслö кеймöны, медбы сiя дорйис.

Йöз отир... Солдаттэз. Усаыс сё öддьöнжык кузь киэсö Ульяныс дынö нюжлалö бы. Нывкаыс öтпыр шедлiс ни, жмитлiс ни «поныс» порогувт угöлас, но мöдыс пондiс чирзыны. Мамыс уськöтчис гормöччанöн, — мездiс нывсö и висьталiс: «Пет баняас да сэсся керкуас эн пыр!»

Эта чассянь нывкаыс керкуас кодьöн эз ни пырав: баняын олiс, печкис да саöн мавтчис, гортö мыччасьлiс гусьöн.

Пышшалiс Ульяныс враггез шогья, чулöтiс кадсö шыр моз да надейтчис, что «поннэс» чожа мунасö (кывсис, что Ошыбланьын гöрддэс да чочкоммес кутчисьöмась оча морос, поди, еныс и адззö, что колö дорйыны беднöй отирсö).

Нылыс олö баняын, а мамыс керкуын, комын сайласьö да юрбитö енлö, корö отсöт, но не весь жö баитöны, что кырнышыс пондас кö лэбавны керкуыс весьтын, видзчись синва: петiс нывкаыс кайöтны öшымöсiсь ва, мышкыртчис ведранас öшымöсыс весьтö и эз казяв, кыдз «кöиныс» сибöтчис бöрсяняс да быд вынсис жмитiс морос бердас — не ловзисьны, не ыкöстны. Пондiс пессьыны Ульяныс, гыжьявны стыдтöм мортлiсь синнэсö, но нем ни оз вермы керны: гардыштiсö киэсö бöрас, öмас заргисö кепись да пöдтöны, джагöтöны бы, кыскöны луншöрнас карта мышканыс, ылöжык отир син одзись.

Ульяныс кивзö, летö асьсö, корö отсöт, но некин оз кыв и оз дорйы, некин позорсö ныв мортыс весьтiсь оз вешты. Кöдзыт — ловзисьны немöн.

— Ма-а-а! — быд вынсис ыксö нывкаыс, но сибдö голосыс, пöдтö врагыс пола увтын и кöдзыт ва киссьö нывкаыс вылö, дума вийö — сёйис зверьыс...

Китшсьö катша. Кайыс повзьöм да лэбзьö кытчöкö керкуэс вевдöрöт, понныс кивзышалö пос увтын. Еныс я мый я мамыслö висьталiс или сьöлöмыс нылыслiсь кылiс чирзöмсö: петiс керкусис карта вылö сёдны мöс, кылiс Ульяныслiсь голоссö, и кыдз вöлi пасьтöм, сiдз кай моз и уськöтчис öтöрас, ачыс чирзö, ыксö: «Тэ мый керан, морт сёйись?! Морт вийись! Враг! Лэдз нывкасö! Еныс одзын пыран грехö. Господи, мый эта лоö?! Отсалö-ö-ö!».

Кöдзыт. Рунас пöдан. Голос сибдö моросын. Морозыс чеплялö киэз, сотö. Матын тöдсаэс некин абу. Кöс да учöт мыгöра Ульянлöн мамыс, но чож: киэс юр вевдöрас — сярганнэз, уськöтчис чикись моз «варышыс» вылö, чирзö-горзö, вартлö кулаккезнас врагсö, но выныс етша, нем оз вермы керны — син одзас нывсö сёйöны.

— Лэдз, кикимора, лэдз! Еныс чарöтас!

Мöдыс оз и кыв мамыслiсь голоссö, пишкö ныр увтас да ассис бы керö.

— Лэдз, роднöй! Лэдз, дона, мый тэныт колö, сiйö и сета, но нылö вылö позорсö эн кышав!

Лэбзьö-китшкö катша, нöбöтö умöль юöр. Пос увтын вувтö пон, полö мыччисьны син одзö. Чирзöны инькаэс, ружтö врагыс...

Одзза годдэзö талуння лунö отирыс кайис вичкуö — гез кыссис, а талун улицаын öтiк морт абу: морозыс и врагыс отирсö йöртiсö керкуэзö. Талун праздник бы — Рождество, но кытшöм эта праздник?!

— Сёйисö-ö-ö да сёйисö-ö-ö! — быд горшсис горöтiс мамыс, ачыс сё курччасис зi моз врагыскöт, но мыдзис, и кикокыс лоисö сырлёль, нюжалiс лымыс вылö, усис садьтöг.

Ульяныс мымда вын пессис-вермасис врагыскöт и мыдзис жö. И вöлi сэк сылö шестнадцатöй год, пикан, типок кодь, кöда быдмис мамыс борд увтын, и öнi мамыс борд увтiсь и пышшöтöны...

Сэтöн нывкаыс кыдзкö эд мезмис «варышыс» гыжжезiсь, кыдз еныс козьналiс борддэз, чеччöвтiс врагыс увтiсь ни, коккезнас вöйис лымас, кыссис шаг-мöд и люкасис морт вылö. Сьöлöмыс моросас тёпкöтö, кыдз каёклöн, бöра ыксö: «Мама!..», но одзас не мамыс ни, а Степан — асланыс мортыс, зонка, кöда олö мöд улицаас, талань етша сибавлö, а öнi кысянькö локтöм, топ усьöм кымöрсяняс, сувтöм нывкаыс одзö и шыннялö.

— Степан, Степан! — нывкаыс сыркьялö, жмитчö зонкаыс бердö, дрöжитö, синнэсö тiльö. — Степан...

— Нем эз ло, — висьталö зонкаыс, сулалö, кыдз пöлян, чужöмыс сьöдрöма, синкыммес паськытöсь, лэчыта видзöтö и морос тырнас лолалö.: — Нем эз ло! — Веськыт киас майöг, шульгаас — шапкаыс. Эн вöрзьöт, а кутчисян кö — сёяс: сöтас и пöран.

— Степан! Еныс тэнö вайöтiс, — горзö нывкаыслöн мамыс, лымсö зонкаыс одзын тальö, пасьтöм, баличаэс разьсьöмась, öмыс пиньöвтчöм.

Сулалö зонкаыс, немись оз пов. Сы дынö кыссьö бы Ульянлöн мамыс, но не врагыс дынö моз ни, не тышкасьны-гыжьясьны, а малыштны бы кисö, окыштны чужöмсö. Чеччöвтiс бы Степаныс дынö мамыс, но падмис солдатыс вылö, кöда сунгисьöм коккес увтö: юр вылас шапкаыс абу и лымыс гöгöр вирöсь. Падмис солдатыс бердö мамыс, повзис я öддьöнжык, радмис я, ыкöстiс бы, но виньдiс и пондiс окавны зонкаыслiсь пась поласö.

— Тётка, тэ мый керан? — кутiс да коккес вылö сувтöтiс инькасö зонкаыс. Сiя вына, смев. Степаныс эд Андриянлöн зон, а Андрияныс тöдан кытшöм! Миян кодьыскöт öтiк пызан сайö оз пуксьы, йöзсö мортö оз пукты, пондас кö уджавны — вешшы! Сэтшöм зонкаыслöн айыс, и Степаныс, натьтö, айыс кодь жö, но талунöдз эз кывсьы, некин оз норась, медбы кинкö вылö лэбтiс кисö или кинöскö дойдiс кывнас, а öнi видзöт мый петiс... Оз ни лолав эд лымыс вылын солдатыс, оз вöрöтчы врагыс, кöда öнi только нярьялiс Ульянсö, сёйис бы лёк горшнас. Мый öнi лоас, Ульяна?!

Степаныс шынь керис, малыштiс нывкаыс мамлiсь юрсö да висьталiс рамыника:

— Тётка, немись эн пов! Кин мый кошшис, сiйö и адззис...

Рождество. Кöдзыт. Некин улицаын оз мыччась.

— Мый лоас? Мый лоас? — горзö мамыс. — Кытчö воштiсьны? Керкуö пырны — виясö, öтöрын овны оз туй...

Кöдзыт. Руыс гора. Посöдз бердын несйöвтiс вöв, кöдö доддялöмась да одзас вунöтöмась чапкыны турунчир и сулав пö, Воронко!

Степаныс видзöтыштiс посöдзлань, инькаэслö сэсся шы эз сет, перыта бергöтчис, куимись чеччöвтiс посöдзыс дынöдз, вожасис доддьö, шутньöвтiс и турöпöн ¹гардыштiс син одзись — абу и вöлöм.

— Христос тэкöт! — бöрсяняс пернапасалiс Ульянлöн мамыс, чышкис синваэсö.

Сымда и адззылiсö зонкасö. Кытчö лоис, некин оз тöд. Христос сыкöт, мед еныс дорйö да козьналö здоровье. Пиннес сяткöтöны, дрöжитöны инькаэс, оз тöдö, кытчö воштiсьны. Колö бы пышшыны, но керкуын враггез, йöзын враггез — абу оланыс.

Шваткöтö морозыс, вартö йöррез бердö, керку угöввезö, пырö паськöм увтö. Лэбзис каёк, берездасис лымас, топ лыйисö.

Ульяныс усьöмöн-пöрöмöн котöртiс лым кузя, колис мамсö. Горзö мамыс, ас вылас бедасö ыксö, а нылыс пырис посöдзö, босьтiс чилькöтчан доз и петiс мöсыс дынö. Чилькöтчис и дрöжитiс, киэс эз кывзiсьö.

Мöсыс дыр видзöтiс том хозяйкаыс вылö, пишнитiс нырнас и пондiс сёйны турун.

Чилькöтiс йöвсö пань-мöд, пырис керкуас: тырппес лöзöсь, синнэс... Кыдз мезмöм капканiсь, а сэтöн йöз мужиккес бöра гöрдлöны:

— Го-го, вай татчö йöвсö!

Мырддисö кисис дозсö, юисö йöвсö, каньлö эз кольö и эшö корöны: «Вай!»

Гортас жö пырис мамыс. Ыбöссянь заргисис гор сайö.

— Эй, кержачка! Кытöн Прошаыс?! Кытöн солдатыс? Или эн вермы гöтравны нылыткöт? — мамыс бердö лякасис кузь ныраыс, вöтчис комöдз (сёйны и думайтö) — Кытöн Прошаыс?!

Мöдiк бы гортiсь пышшис, бöрас дзар эз кер, колис мый эм и абу, а мамсö гортiсь смертьыс оз вермы вашöтны: жаль позыс, жальöсь дöраовöй дубассэс, гуняыс, нинкöммес, мöсыс карта вылас, курöггес — быдöс аслас, ас киэзнас кыйöм и быдтöм, дона!

— Кытöн Прошаыс?! — гор гöгöрын вöтлiсьö мамыс сьöрын солдатыс, кутö бы мамсö и оз вермы. Пышшалöны керкуын врагыс шогья инькаэс. Дрöжитöны нiя кыдз йöзын, смерть видзчисьöны.

Сэтöн дзуркнитiс-оссис керку ыбöсыс, и, видзöт, öтöрсис пырис вартлöм врагыс. — Ловья! Баöн кыссьö керкуас Проша нимаыс: чужöмыс вирöсь, синнэс гöрдöсь, кымöсас сюр — морт сёйись и эм!

— Господи! — пернапасасис Ульянлöн мамыс, чужöмыс лöзöтiс, пиннес сяткöтöны. — Господи!

Вийöм-вартлöмыс баöн кыссис керкуас, кижгö:

— Вöвсö гусялiсö!

Куима — ыбöсö! Командирныс öмсö осьтiс, мыччис кузь пиннесö, чеччöвтiс пызан сайись, кык шаг и гор дынын ни, кыскö ни горыс сайись хозяйкасö, эрзö:

— Тэ, ведьма, вöввесö гусялiн?!

Кöдзыт ва вывтырö киссьö, сiдз и этадз, тыдалö, колас кувны. Некин инь отирсö оз дорйы.

— Ая, кытöн тэ?! — горзö Ульяныс.

Кошшы айтö, кöр сiйö чочкоммес тшöктiсö доддявны вöвнысö да нуöтiсö сьöраныс. Мужикыс, поди, абу ни ловья...

— Вийö! — еныс одзö уськöтчис мамыс. — Мед еныс видзöтö, кыдз горт шöрын морт сёйиссес вийöны бы.

Враггес комиöн оз вежöртö, мамсö мортö оз пуктö, кöть и юрбитö сiя жö енлö, кöдалö, натьтö, юрбитöны враггес. Да юрбитöны я, тöдöны я енсö этатшöм отирыс?

Эз ешты керку ыбöсыс пöднассьыны, бöр ни оссьö, солдаттэс чирзöны: «Вöлыс абу!»

Кöдзыт керкуас, öтöрсянь джодж кузя пызан дынöдз катыльтчö чочком мороз, пырö быд пельöсö, кынтö.

— Вия! — кисö лэбтiс мамыс юр вевдöрö врагыс. — Кытöн вöлыс?!

— Курöг позын! — синнэс нёштöма югйöвтiсö мамыслöн. Швыркнитiс комö: смевмö инькаыс, кыдз шыр кань одзын, полö, но гыжьясьö бы паныт.

— Вия! — пиннесö гичыралö тошаыс.

— Вий! Сёй! — мамыс чеччалö солдатыс одзын, летö юрсисö. — На! Потан, поди, — сэтчин-татчö котрасьö. Швыркнитiс комö, киас шедiс гормöччан, лэбтiс сiйö юрыс вевдöрö, бöба унньöвтiс: «Ы-ы-ы! Пазда!»

И Ульяныс ни смевмис, босьтiс сартас пес и мамыс моз жö киэс вевдöрын, голосыс чиння, лявзö: «Петö керкусис!»

Шы эз ло враггеслöн, бытьтö повзисö, сулалöны джодж шöрын, видзöтöны — синнэзныс кöдзытöсь, лэчытöсь, кваркыш оз керö.

Марфалöн коккес дрöжитöны, кынöмыс повзьöмсянь висьö, садьыс бырö бы, но асмознас смев, ыксö:

— Он сёй! Ачым керкуас хозяйкаыс. Ачым! Враг командирыс сьöвзис джоджыс шöрö, вирснитiс нырнас и ёрттэсö шуис:

— Кутö жö бöжтöм дзельсö! Ме сылö мыччала, кин керкуас хозяйкаыс...

Минута — и Марфаыс джоджын ни. Кивнитiс и абу — кикокыс жвангöмась-кöрталöмась — не вöрзьыны, не пыдынжыка ловзисьны. Сымда асьтö и мыччалiн...

— Мама-а-а! — бöбсялiс нылыс, синнэс вирдалöны, сiдз бы и уськöтчис да пурис, кöр мамсö син одзас пöрöтiсö ни лабич вылö, — вывтырыс куш, грех и стыд! Да пукалöны вылас кыкöн: öтыс юрсö видзö, мöдыс — коккесö, а куимöтыс киын плеть. — Мама-а-а!

Шутньöвтiс солдатыс киын плетьыс. Кыдз вачкисö Марфаыслö, сiдз спинасис и вир чездiс, кыдз вачкисö, сiдз спинаыс вылö чунь кыза шур кайис.

— Господи-и-и! — кивзö инькаыс, синваöн горзö, горзö и нылыс. Кынмöм öшынöт керкуас видзöтчö тöвся шондi. Вартлöны Ульянлiсь мамсö, топ нывкаыслiсь масьтöны сьöлöмсö: öтыслöн спинасис чездö вир, а мöдыслö зубыт.

Швыч, швыч! — инькаыс спина вылын чеччалö плетьыс. Ружтö солдатыс, кыдз бур удж керö: öт кинас вачкас, сьöвзяс долоннес вылö да мöднас вачкö, бытьтö сiдз сiя и кужö уджавны.

Командирныс пуксис пызан сайö и рад.

«Ая, отсав! Отсав, ая!» — Ульяныс жмитчис гор бердö.

Кылас я, нылiньöй, айыт? Некин эд матын роднöйет абу, каньыс нельки заргисис джоджулö. Шутнялö плетьыс керкуын, шöралö мам спина вылiсь кучиксö. Ружтö лабичын Марфаыс, не ранаэзсянь, а унажык стыдсянь. Сэтöн нылыс син вылö усис пурт. Бöб вир чепöссис юрас, пызаныс вылiсь босьтiс пуртсö, чирзö: «Начкыла!» Не ачыс нывкаыс — бес чеччалö синнэзас.

Мый одзлань лоис, нем оз тöд, оланыс — умöль вöт: öтсö вартлiсö садь быртöдз, сыбöрын — мöдсö и пöдналiсö керкуас.

Öтöрын би мороз, а керкуын жар, тшын пöдтö-вийö: сотчö керкуыс, öтöрсянь öшынöт пырö биыс. Ульяныс бöбмис, чепсасьö öшынö, но петны некытчö: ыбöсыс öтöрсянь пыкöм, а öшыннэз одзын сулалöны солдаттэз.

Пöдтö тшын и сотö би. Праздник Рождество талун. Эттшöм лунö овлö керкутыр отир: мамыс оз ешты пызан вылiсь дзимлявны, бöр ни кайöтö сёйны — виль гöссез керкуас, а öнi некытчö лоас гöссеслö пырны, некинöс вердны медбöрья чöвпаннас. Сотчас лабич бердö кöрталöм хозяйкаыс и нылыс сотчас, да пöимсö кояс öтмöдöрö лэчыт тöв.

Сотчö керкуыс. Биыс нюлö кöдзыт лöз кымöрсö. Шондiыс чышьянасьöм веж чышьянöн: видзчись пурга.

3

Асланым жö отирыс кыскисö биыс пытшкись инькаэсö. Нылöн паськöмныс сотчöм, юрсиэзныс палитчöмась, кин вылö и вачкисьöны?! Кыдз шойна гуись петöмась и бöр колö гуö пырны.

Ульяныс жагвыв саймис. Кöмтöм, пасьтöм, лöзöтöм ни, кылыс öмас оз бергав и öмыс оз оссьы. Кинкö коккезас козьналiс важ нинкöммез, пасьтöтiс важ гуняöн, юрыс вылö кышалiс важ чышьян, киас сетiс няньтор. Кинкö шонтiс, кинкö жалейтiс.

Шондiа лöз небоыс. Кöдзыт, сьöвзян и дульыт оз ешты лым вылас усьны — кынмö.

Керку местын пöим да шоммез, но картаыс дзонь. Подаыс отирысся öддьöнжык баксöны. Кытiськö локтöм айыс, сулалö шоммес одзын, чужöмыс шоммес кодь жö сьöд, öшöм, горзö:

— Кытöн пондам овны?

Видзöтö, отир, мый ныкöт еныс керис! Еныс разь? Враг эд уськöтчис Ульяннэс вылö, враг — и мый понда? Мыйöн нiя виноватöсь «зверрес» одзын?

— Кытöн пондам овны?! — моросыс бердö нывсö жмитö айыс, и нывкаыс кыдз саймö, мöдöр югытсис бертö, шуö:

— Эн горзы, ая. Виль одзын...

— Нылок тэ... — айыслöн визывтöны синваэс: йöзыс оз тöд, кытшöм сьöкыт керны керкусö, некин оз тöд, кыдз тшуписö да лэбтiсö срубсö...

Сьöкыта олiсö Ульяннэслöн. Сьöкыта... Пешлiсö тшыг кынöм и öткаса удж, медбöрын бытьтö лолалiсö кокнитжыкамоз ни и на тэныт! Горзö айыс, горзö нылыс.

— Эн горзы, Ульяна. Одзлань эшö лоасö синваэт,— бурмöтö öтiк.

— Ловьяöсь и бур, — висьталö мöдiк. Вартлiсö-дойдiсö Ульянсö, но эз вийö. Ранаэс бурдiсö, кыдз кыдзок бердын, а мамыс тшыкис — не морт лоис: кывнас сорасьö и, кыдз локтö виль тöлiсь, гортiсь кытчöкö пышшö бы, модьö: «Ой, бöра сотасö-ö!»

Синваа оланыс — не кувны он кув, не овны он ов. Некинöс эд сiдз врагыс деревняын эз пур, кыдз Ульяннэсö. Колiс бы кышавны котомаэз да тшыг поннэз моз ветлöтны керкуись керкуö, юрбитны-кеймисьны няньтор понда, корны, но Совет властьыс козьналiс гид кодь керку, эшö куим кока вöв: мыйöн богатöсь, сiйöн и радöсь. И жагвыв да жагвыв ловзисö, пондiсö уджавны.

Сiдз кöркö олiс Ульян бабыс. Сiдз вöлi. Тöда эта йылiсь, мамö висьтасьлiс, кыдз миянö вовлöмась чочкоммес — врагся-враггез. Öнi кывза Ульян баблiсь висьтасьöмсö и думайта, кыдз сiя томся-том терпитiс враглiсь тешитчöмсö, и верита, что пöрисьыс томнас вöлöм чож и смев.

Öтöрын пемытiнас ойыс гусьöн ветлöтö керку гöгöр, видзöтчö öшыннэзöт, топ юасьö бы узьны. Гажтöм ойнас вöрдорся учöт деревняын, нельки поннэслöн рытнас шы абу.

Крыша вывсянь кинкö гужи-важи ыскöвтiс и брякнитчис бурундук ¹вылö. Спинаö дзик кöдзыт ва киссис, повзьöтiс дума: «Оз я старухаыс тöдчы Вöрисьыскöт? Оз я...» Но хозяйкаыс сэтöн жö пондiс серавны: «Розбойник, бöра ветлöтан!» Меным ни шуис: «Тупка велалiс ысласьны крышаыс вывсянь... Öтпыр вердi шырöн, и мöдöтпыр, тыдалö, корö бы... Вот и ысласьö».

«Но и баб!» — гажа дума ошкис бы пöрисьöс, но бабыс асьсö эз сет ошкынытö, горöтчис:

— Кынöмыт эд сималö, а ме басниэзнам верда, — и пызан вылö пондiс ваявны сёян.

Пызан вылын сотчис лампа — «шыр би». Велалi электричество дынö, и эта лампаыс нерис, кыдз гажöтiс, топ шедi аслам челядься кадö. Тöдвылö усис асланым «шыр биыс» и сiя, кыдз умöля быдмим, эз вöв керосиныс, сотiм сартас. Кöр эта вöлi? Топ вöтын, ылын и матын, бытьтö тöн эшö вöлi челядёк. Сорласьö кадыс, кольö, пöрисьтö...

Кытöнкö лэбзис самолёт — керкуыс дрöжитiс. Öшын весьтын вöр сайсянь мыччисис тöлiсь.

— Няньыс чорыт, — висьталiс Ульян бабыс, веськöтiс думаэзöс.

— Кытiсь няньыт, баб?

Кокнита бергöтчыштiс, гажöн шынньöвтiс, юалiс: «Тэ мый, зон, он я мый я тöд, кытiсь миян няньыс? Видзöт чöвпаннэсö...»

Чöвпан кыдз чöвпан: шогдi пизись пöжалöм, кöра, видзöтан и дуль сöдзö. Этатшöм няньсö пöжавлiс мамö, а öнi сёям пекарняись, кытшöмöн вердöны!.. Талун бур, ашын буханкаыс абу пöжассьöм... А баблöн няньыс нянь кодь!

Пуксим пызан сайö, паньыштi кöра шыд, пешлi сола тшаккез, сьöд ягöдiсь вареннё, сэтöн жö хозяйкаыс комись вайис рюмка да джыння бутылка.

— Ог ю, — висьталi ме.

— Ог верит! — горöтчис сiя. — Öнi винатöг петухлiсь юрсö оз кералö, а тэ — гöсь. И колiс пань етш пешлыны «лекарствосö». Винаыс аскоддя, небыт, чöскыт, кыдз тулысся ма, кытчö сорлассьöм быдкодь цвет дук, вын да гаж. Ньылыштi винасö, шоналi, сырлёль небзисö кикок, öшис лунся мыдзöм. Охота лоис пукавны дыржык, кывзыны баблiсь басни. И сiя эз дышöтчы, висьтасис. Тöдчис, что гажтöмтчö отиртöг: öтiкö пондöтас и сэтöн жö кутас мöдiкö, уна разьö, баитö сiйö, мый тöдö, пешлiс овтöнняс, адззылiс и кылiс отирсянь.

4

— Степан... — кусiс баб синнэзын гаж, пуксис меным паныт лабичö, öлöдзас пуктiс чорзьöм да пöрисьмöм киэсö, кöдна, тыдалö, öтiк лун весь эз олö, висьтасис и юасис.

— Тэ разь Степансö он тöд? — дивуйтчис старухаыс. — Сiя эд менам жöникö и эм. Эх, Степан, Степан! — чышкис син дорресö. — Кыдз тэ сэтчин метöг и олан? (Вежöртi, что пöрисьыс веритö, бытьтö мужикыс ловья мöдöр югытас.) Сьöкыта, кага, усис миянлö овнытö. Видзöт, кыдз чочкоммес орсiсö миян вылын! Мед сэтшöмсö йöзыс оз пантав... Не зонкаыс бы... Эг бы талун тэкöт баит. А, поди, сiдз бы буржык вöлi?! Нем бы эг адззыв, а то видзöт... Шерыс вартiс и тшыгыс вийис, а кыдзкö, батя, эд ловьяöсь кольччим. Ловьяöсь! Горзiм

Да олiм, кöть грех бы горзыны еныс вылö. А Степаныс сэк менö чочком бесыс дынiсь мырддис! Эз думайт, что ачыс бы шедiс. Кытчö тэ!

Гажöн висьтасис зонка йылiсь бабыс, гордитчис, и тэ кывзы да гордитчы, велöтчы овны сiдз жö, кыдз олiс Степаныс.

Видзöт, кыдз зонкаыс пышшис чочкоммес дынiсь ны вöлöн жö! Син одзись вотьыштiс и эз мыччась сэтчöдз, кытчöдз врагыс эз мун деревнясис. Кöр властьыс вежсис, чулалiс гражданскöйыс, Степаныс вöлись локтiс гортö.

Этö нывкаыс кылiс отирсянь, а ачыс нырсö полiс мыччавны öтöрын: ветлас уджавны и гортö! Стыд эд. Топ быд видзöтö да сералö, мортö оз пукты, кöр быдöн тöдö, кыдз шедлiн врагыс киö. Кытчö ни сэтöн, ныв морт, жöниккес йылiсь думайтны?!

Олö Ульяныс, думайтö, что сотчис томся-томöн, сiдз и кулас ни: не гоз-ёрт, не счастьесö оз пантав.

Кыдзкö рытнас пызан сайын мамыс, кöдö старухаэс юкталiсö туруннэзöн и пондiс асьсö вежöртны, айыслö модьö:

— Баля юр (öтамöднысö ниммезнаныс эз тöдö), Баля юр, ветлiн бы зонкаыс дынö. Спасибо бы висьталiн. Ежели бы не сiя...

— Мый не сiя?! — мурзьыштiс айыс. — Кыдз ме сэтчин муна? Мый висьтала? Тэ он тöд, Андрияныс кытшöм...

Сэтшöм айыс: гортын — варыш, йöзын — кöиннэз сёйöны, ошшасьны оз туй и видны грех.

— Баля юр, — сюр-сяр горöтчис иньыс. — Менö бы тэ местö!.. Меным бы мужикнас лоны...

— Ло. Кин видзö? — ружтiс-керис айыс, пасьтасис — пымалiс, ньылöмыс пондiс öшавны нырыс йылын и петiс. Мый сiя Степаныскöт баитiс, эз висьтась.

Вундiссисö да дзимляссисö сюэс, инь-отир пондiсö куделясьны, нывкаэс ветлöтiсö пукаланiнö: рытнас печканнэзöн öксясö öтiк керкуö и рытывбыт сотöны сартас, печкöны да сьылöны, а кин висьтасьö сказкаэз, öтлаын жö зонкаэс, гардчöны-кошшöны невестаэз.

Öтпыр пукаланiнö петiс и Ульяныс. Поди, бы эз и ков, но мамыс жö гортiсь вашöтiс: «Сiдз и пондан сiсьмыны? Ветлы да видзöт, кыдз томмес гажöтчöны!»

Эна кыввез бöрсянь нывкаыс синнэсö кунис да мунiс томмес дынö.

Жагöн чулалöны кузь арся рыттэс. Ульяныс томмес коласын печкö. Сiя некин вылö оз видзöт, и нывкасö топ некин порог дорсис оз адззы.

Öтiк рыт печкис йöзын, мöдiк рытö мунiс. Видзöтö: сэтöн керкуö пырö Степаныс. Нывкаытлöн сьöлöмыс тёп да тёп! Повзис мыйиськö, но ачыс оз тöд мыйись, кöть и вежöртö, что сы вылö некин оз видзöт, кöть и сьöлöмыс гусьöн видзчисьö... Сьöлöмыс не весь чеччалö: Степаныт быдмöм, пельпоннэс паськалöмась, быдтöм уссэз, юрсиыс чим сьöд, кудриэс пизьöны, синнэс лэчытöсь, кыдз дзар керас, сiдз и мöртас сьöлöмö. Кыдз зонкаыс видзöтыштiс Ульяныс вылö, сiдз топ пым пöим вылö и пуксьöтiс... Кынмис местаас или жарö чапкис, оз вежöрт. Думайтö, что Степаныс пондас касьтывны, кыдз мырддис врагыс дынiсь — сутшкас ¹позорö, кöть сыбöрын джагöтчы, оланыс оз ло, но зонкаыс адззис и эз: порог дорсянь дзар керис, и веськыта Еля дынö! Сiдз и колö, сiдз ась и лоö: Еляыс эд кыз, небыт яя, ылiсянь ота рожабаннас тыдалö, сiйö и видзчисьö, курöг моз кушкыртчö зонкаэс одзын, рад, что тэнö оз адззö, а сiя бöбöтö жöниккесö. Дыш Еляыс, но айыс богатöй, и кытчö ни беднöйеслö богаттёыс сьöрын вöтлiсьны? Ошшасян жö бы важ дубаснат, коккезат виль нинкöммез жö новьян, юрыт вылын чышьяныс бытьтö бы виль жö, но абу ни Еляыслöн кодь потшшалокыс, абу.

Зонкаыс локтiс Еля дынö, пуксис, малыштiс юрсö и, кыдз смилитiс, мыйсянь кызыс син одзын сылiс. Нывкаэс хи-хи да ха-ха, нывкаэс радöсь. Сотчö ёгпешын сартас. Швыргöны-бергалöны чöрссэз. Еля лабичын зонкаыс бокын бергалö, топ ёсь вылын, бытьтö сiя öтнас, сiя и эм, сы кодьыс некин абу — чож, смев, прока, кужö и вермö, а тi... Идъя-зöрьяöсь: не печкыны, не дöра кыйны, не зонкаэсö бöбöтны... И видзöтан кö, мöд нывкаэсö ни топ вежисö, нiя ни дзугсьöны уджнаныс: Öльöныс ни ниртчö Öльöш бердын, Февраыс мыйкö шушкö пель одзас Иванлö, сыбöрын Öльöшыс да Иваныс пиньласьöны ни Степаныс вылö да няпралöны кулаккезнысö: видзöт, зонка, кыдз боккетö гындасö!

Ульяныс пöв синнас видзöтышалö Степаныс вылö и жаль зонкаыс, но нем оз вермы керны, оз лысьт шуны: «Вешшы, Степан, Еляыс дынiсь! Мун, кытчöдз боккет дзоньöсь...»

А Степаныс, тыдалö, сэтшöм жö смев, кытшöм и вöлi, оз ошшась, но мыччалö, что тöдö и оз Иван да Öльöш коддесö — кин гленитчö, сiя и сылöн!

Ёгпешын чискö и кусö биыс. Степаныс öзтö виль сартас. Биыс содö, зонкалiсь югдöтö сьöдрöма рожасö, уссэсö, лэчыт синнэсö. Сiя сартассö пешалiс ёгпешö и веськыта видзöтыштiс Ульяныслань, кыдз юалiс: «Татöн?» «Татöн!» — сьöлöмыс джöмдыштiс нывкаыслöн, чöрсыс усис кисис.

— Нем оз ло! — Степаныс öзтiс чигарка, нюшкыштiс табак тшынсö, бöра веськыта видзöтiс Ульяныслань, шынь керис, кыдз юалiс: «Кыдз ни олан?»

Куритö зонкаыс. Нывкаыс мышкыртчис да джоджсис босьтiс тыра чöрссö. Киэс дрöжитöны... Куритö зонкаыс (ой, сэрпöсь öмыс!). Ны деревняын только Митрей сотö табаксö, кöда асьсö бытшöма оз вермы вердны, пыр уджалö йöзлö да кульö поннэз, эшö кужö ошшасьны, что вына, вермас öтнас лэбтыны керку, а сэтöн... Степан.

Ульяныс печкö. Киас чöрсыс швыр да швыр и сьöлöмыс пессьö, видö асьсö: «Мыля ме талун гортiсь петi?!» Пышшыны бы гортö, но оз туй, бöра эд бöрсяняс пондасö серавны, пондасö шуны, что Степансис стыдитчö. И джендöтö нывкаыс рытсö, печкö, кыдз не ачыс: кисис чöрсыс усьö да усьö, сiя босьтас чöрссö да одзлань печкö.

Пукалöны нывкаэс, печкöны да гöрдззисьöны, сотöны сартас — джоджöдз керкуын тшын. Нывкаэс гöгöрын гардчöны зонкаэс, бöрйöны невестаэз.

Степаныс куритö да висьтасьö сказкаэз, ниртчö кыз Еля дынын. Зонкаыс висьтасьны кужö, быдöс топ адззылöм и тöдö. Медодз гардiс сказкаэз, сыбöрын пондiс висьтасьны, кыдз ветлöм разведкаö: чочкоммес ныр увтын изöм и абу шедöм.

Томмес пеллезнысö öшöтiсö, öммезнысö осьтiсö и кывзöны, кöда веритö, а кин и пиннесö вузалö:

— Степан, вермас я сiдз лоны? Натьтö, эд эн жö адззыв...

Степаныс кучиксис оз пет, ассис оз гыв: веритö кöть эдö, асьныт тöдат, йöз киэзöн эд шыдсö панялiт. Пешлiт бы асьныт, сэк бы эд сералö.

Винерик да учöтик мыгöрнас Ульяныс, пукалö лабичын печкан вылын, оз лысьт синнэсö осьтны, а сэтöн Степаныс понда обида курччöвтiс, жаль лоис зонкаыс, что сы вылын гöрдлöны, кöр асьныс эз шедлö не гöрддэс, не чочкоммес дынö — кин да кытöн и вöлi, а öнi нiя, бытьтö, сэтöн и эмöсь. Сьöлöмыс нывкаыслöн öзйис, сiя смевмис, синнэс югйöвтiсö, голосыс вынсялiс да сэтчö и горöтчис:

— Кин враггезлiсь вöвсö луншöрнас гусялiс?! Может, тэ, Серко Иван?! Мылякö пон кымöстö сэк эн мыччав, бöжтö коккет коласö дзебин да пос увтаныт олiн, а Степаныс пос увтсяняс тэ моз враггес вылö эз нёджжась. Сiдз эд?!

«Вот кыдз, дзулим! А ми... — öттэс пöдналiсö öмнысö, а мöддэс горöнжык шуисö: «Сiдз! И не тiянлö зонкасö серавны!»

Степаныс кылiс да эз нывкалiсь дорйöмсö, шынь эз кер, одзлань висьтасьö, кыдз чочкоммес дынö шедлiс пленö ни, но бöра жö еныс сорöн мезмис, петö, что эз ни бы ков лоны ловья, а сiя, на! Баитö зонкаыс и Ульяныс вылiсь синнэсö оз ни öшты. Синнэс сьöдöсь да лэчытöсь, топ цыганлöн, кöда быдöс адззö, тöдö одзлань. Видзöтiс, видзöтiс и юалiс: «Кыдз олан, гулю?»

Ульяныс гöрдöтiс — пеллес сотчöны. Эз ешты нем висьтавны, сэтчö Серко Иваныс, прыг чеччöвтiс лабичись, чывкнитiс джоджыс шöрö. Кытöн ныр увтсис оз ылöст чышкыны, а сэтöн пурö:

— Мый сылö?! Кöин мульöсыслö... Жöникыс сайö не петны эд...

Вот кытöн, Ульяна, тэ вылö вöлись эд нятьсö кисьтöны — садь бырö. Лöгыс Серко Иванлöн нывкаыс вылö не весь петö. Иваныс думайтiс, шедлiс кö Ульяныс чочкоммес увтö — сылöн нывкаыс, сэсся некинлö ни оз ков, но сы моз эз ло: кыт пырисö корасьны Иванлöн сваттэс, сэт и петiсö: нывкаыс айлö арттöм зятьыс оз ков да и Ульяналö оз ков сэтшöм жöникыс. Этасянь лöгыс и летö зонкаыслöн, этасянь и кеслö пиннесö, пурö бы, тöдö, кöр колö обидаыс понда вештiсьны.

— Ме бы сэтшöм невестасö сизим верста ордди! — сiсьмöмась-сьöдöтöмась пиннес Иванлöн, öмсис дуль чижйö, думайтö сiдз и лоас, сы моз и петас.

А Степаныс бытьтö кылö и оз Ивансö, адззö и оз шуиссесö, ласковöя одзлань баитö:

— Кыдз здоровьеыт, кутю?

— Бур, — гусьöн синваэспыр висьталö нывкаыс.

— Чож! Сiдз и колö овны!

«Мыля Степаныс мекöт сэтшöм кыввезöн баитö? Мый ме сылö?.. Отирыс сералöны и сiя... — визывтöны рожабаннэзöт синваэс. — Ой, нывка! Чарöтiс тэнö томся-томöн оланыс, и пондан öтнат овны, кыдз гажа видз вылын стройнöй рябина, кöдö кувтöдз пондас летны лэчыт тöв, кынтыны лёк мороз, олан жагвыв, косьман, кельдöтан, и кайыс оз ни понды сьывны тэ дынын тулысся песнясö, разь ракаэс пондасö лэбавны гöгöрат да карзыны, — корны гым кымöррез. И Степаныс сэтöн жö... Мый вылö сэк сiя мырддис врагыс киись? Горшöс пуртöн орöтiс бы, и öнi нем эг тöд»...

Ульяныс печкис, уджалiс, и кок увтас топ дюттясис джоджыс. Сiя полiс Степансис, синнэс видзöтiсö джоджö, а Серко Иваныс чывкйö джодж шöрын да карзö:

— Ульян, вай окышта да юр пыдöстö малышта, хи-хи!

— Öмыт сэрпöсь! — терпитiс-видзсис нывкаыс, но сэтöн кыдз кытiськö мезмис, дорйис ни асьсö. — Кытшöм эм, ас пондасим! Тэныт не серавны!

— Ой! Хи-хи, — йöктiс одзас Иваныс, чывкйис петух моз, дынсис ньылöм дук: некöр оз пывсьы баняын. — Ме тэ коддесö уна эшö пантала...

Степаныслöн сэтöн вöлись и вежсис чужöмыс, чочкоммис зонкаыс, гичыртiс пиннесö, няпыртiс кулаккесö и чорыта тэчöмöн висьталiс:

— Иван! Вешшы сэтiсь...

— Мый лоис? — öмсö пиньлалö згальникыс. — А-а-а, этö тэ, Степан?! Шуöны эд, что тэ сэтöн жö пö панясьöмыт, этаыскöт...

Керкуын бы гут лэбзис, и кылiс, натьтö. Повзисö пукалiссес, адззöны, что петуххес весь сорссэзнысö оз лэбтö. Мыйкö лоас!

Кусiс сартас. Керкуас пемыт, тшыныс ныр курöтö. Джодж шöрын йирк да торк! Потолоксис песокыс буждö — кин да кинöс и вермö... Вешшы, пышшы, а то, видзöт, и тэныт пель бокат пöжаласö!

Нывкаэс ыбöсö! А зонкаэс тышкасьöны, топ гуна вылын вартöны.

Тышкасьлöны деревняын томмез и пöриссез, но праздниккез коста, пывсьöтöны öтамöднысö кулаккезнаныс, а кöр и зоррезöн госнысö пыркöтöны юыштöмувьяныс, кöр киэзныс лудöны, кöр мужиккес öтiк лунсö весь овнытö оз кужö. Будденьö ой и лун уджалöны, а праздникöн тышкасьöны, но талун, ёрттэз, абу праздник, а зонкаэс гындöны öтамöднысö кулаккезнаныс — нывка понда вирныс пизьö.

Зонкаэс тышкасьöны, а нывкаэс ыбöсö!

Рытыс пемыт, рытыс кöдзыт, вижгö лэчыт тöв — пурга. Усьö-пöрö, гортö котöртö Ульяныс. Эз ешты гортöдз локны, кыдз бöрсяняс кинкö кутiс чорыт киэзöн. Сьöлöмыс, ой! Чирнитiс.

— Эн пов. Этö ме, — голосыс Степанлöн.

— Мый месянь колö?! — горзö ни нывкаыс.

— Чож, — небыта баитiс зонкаыс. — Верман пышшавнытö, а ме кутi!

— Вешшы. Думайтан, беднöйöсь кö, быдöнныслö серавны позьö...

— Ме серала?! — лöгасьö Степаныс. — Да ме тöдан мый!.. Кöр ме тэ вылын сералi?! Или сэк?

— Сёйи бы ни «кöиныс»... Öтiк эд, — сыркьялö ни нывкаыс.

— Некин оз сёй! Некинлö ме тэнö ог сет! — Степаныс кутö кöдзыт кисö и жмитö долоняс. — Некинлö ог сет, аслам лоан. Гöтрася!

— Эн серав.

Сулалöны стола вылын. Дрöжитö нывкаыс: кынмö или полö, ачыс оз тöд, а зонкаыс сё корасьö.

Стыдыс!.. Öнi эд нач ни синнэз эн осьт, öтöрас эн пет, сiя и басни бöра лоас, что Ульяныс кыскасьö ни пö Степаныскöт, а сiя модьö: «Гöтрася!» Тыдалö, быль колö сылö Ульяныс, кöть мый кер. А нывкаыс эд абу ас вылас хозяйка. Эшö мый висьталасö аймамыс, кöр öтыс богатöй родiсь, а мöдыслöн — мый вылас, сiя и гортас?

— Грех, Степан! — нетшкöвтчис Ульяныс, пемытiнас только сьöд керисö нинкöммес и абу ни.

Уннялö керку угöлын тöв, крыша вылын жольöтö труба. Эрзыштiс пон и лöнис.

5

Ыджыт гöрд шар кодь лэбтiсис тöлiсь, югдöтiс öшын увтiсь луд, кыдззез. Сёйи да видзöтлi öшынö, адззи вöр и топ вöтаси, что шедi сказкаись оланö и одзам пукалö важся-важ морт. Сiя нинкöммеза, кокошника, вылас дубас, кытшöм вöлi одзза кадö, сэтшöм и эм, и стенаын öшалöны кушаккез, кöднö кыйöм басöка. Прока миян отирыс вöлi, любитiс уджавны, а мылякö быд местаын важ олансö кыдз кужöны, сiдз и видöны, топ комиэс нем абу кужöмась керны, тшыгйöн кулöмась и шогöттэз нiйö вийöмась...

— Тэ кывзы да сёй пöт, — вердö менö Ульян бабыс, юалö. — Юан эшö винаоксö?

Баитам кыкöн. Видзчисьтöг оссис керку ыбöс и пырис кузь мыгöра Митрейыс, пырис кык кусiньöн, вожмöвтiс порогсö, пуксис западня дорö. Кöр мортыс кайис посöдзас, эг кыв, кыдз кужö пемытiнас ветлöтны, ог тöд, но повзьыштi, бытьтö пырис йöз.

Митрейыс пуксис да жаднöя пондiс видзöтны пызанлань, ньылалiс дульсö. Пукалöв-керис кортöм гöсьыс, чупкöтыштiс тырппезнас, горöтчис:

— Мда-а-а... — сэсся нем эз горöтчы, малыштiс тошсö, öзтiс чунь кыза чигарка, пукнитiс тшынсö, лэдзис керкутыр табак дук.

— Гортат оз пукассьы? — лöга юалiс хозяйкаыс. — Кыскалан öтмöдöрö сэрпöсь шогöттö...

— Мда-а-а, — шыасис старикыс, чуп-чап керис тырппезнас, лэчыта видзöт-керис пызанлань, юалiс. — Од я вина юö?

— Юам. А мый?

— Кынöмö висьö. Лекарсво бы...

— Аскерöм винаыт разь юсис ни? Натьтö, эд кöньöсат тыр вöлi?.. — бабыс сералiс, кокнита кыввезнас дойдiс и осудитiс дедсö.

— Юа тай... — виноватöя шуис Митрейыс. — Кинкö юö, а ме кывза... Отирыс эд öнi сэтшöм... Чуньтö мыччан и курччöвтöны ни.

— Оз ков мыччавны!

— А кытчö воштiсян? Локтасö, горшö пурт мöртасö и, вай! Вöр шöрын и олам. Нiя эд, батя, отирыс не миян кодьöсь: то бригадир, то бугалтер... Начальсво! Быдöн дынö колö йöрмыны. Гусьöн гортсиныс пышшасö, локтасö ме дынö, бытьтö мунасö вöравны, и вöралöны ме ордын садь быртöдз... Вот и пантав да кольлав: öтiк кружка дзунгасö, вай мöдiкö! Бур тэныт... Некин оз адззы, оз пыр и оз кор... Юа разь ме ачым винасö? — обидитчис Митрейыс. — Мымда песся-кера, сымда и адззыла.

— Сiдз, Митрей! — сералö бабыс. — Кужан овны, а ме ог. Мыля бы начальсвоыслö ме ордö не пырны?!

— Мый нiя тэ дынö öштiсö? Тэ эд мортыс надз.

— Но, а этö... Вештiсьöны мыйöн?

— Мыйöн колö вештiсьны? Кило-мöд пизь гижасö и бур.

— Колхознöйсö! — лöгасис бабыс.

— Озö жö ассиныс... А мый? Поди, тшöктан этö... Весь горшаныс кисьтны? Мед кошшöны юртöммесö... Кыдз юасö, ась сiдз и вештiсьöны. Ме уна ог кор: кило пизь и пöт. Вот шогавны пондi...

«Мый сiя? — полöтiс дума. — Мунi вöрö шоччисьны, думайтi, что мезма час-мöд кежö аслам уджись, но вöр коласас панталöны...»

— Быль шогалан? — Митрейыслö эз верит хозяйкаыс.

— Шогала, Ульян, шогала, кага. Кула, и он понды тöдны. Он и пет. Кытшöм тэ сэтшöмыс сусед? Вöр шöрын эд... Кыкöн. Мда-а-а...

— Нем ме тэ дынö эг öшты.

— Öштiн или эн, но колö синйыны. Мужик ме! Иньтöг ола! Курыт, батя, оланыс, мда-а-а...

— Тэ кодь мужикыс меным оз ков, кöда олансö тшыкöтö табакнас.

— Юктав винанат, эн жалейт, сiдз жö эд кольччас. Юктав, эн серав мортсö. Меным вот сакарсö бöра ваясö, ачым бöра сысъяла да сэтшöмö, что тараканнэс пондасö кодавны, и некытшöм шогöт ме бердö оз лякась, а öнi, видзöт... — чуп-чап керис тырппезнас. — Ежели Покровöдззас ог кув, да уррес чочкоммасö, видзöт жö бöра мый лоас! — ошшасьö ни старикыс мöдiкö. — Таво голиыс эм, и урыс эм шыр мымда. Видзöтан кö, коласас и туланыс пантасяс, — нютшкис чигаркасö и тöдчис, что мортыслöн некыт оз вись. — Да-а-а... Мöйму, öнджа, сват, веритан — он?.. Туланнэсö шестнадцетьö кутi. Во! Шестнадцетьыс сьöрын колiс вöтлiсьны, а абу ни эд том, одззамоз коккезö оз ни котрасьö...

— Кытчö воштiн туланнэтö? — юалiс хозяйкаыс.

— Тэныт разь колöны?!

— Колöны! — гажöн видзöтiс мелань бабыс. — Голяö кынмö... Отирыс пö воротниккез вурöны, ме, поди, вури жö бы...

— Деньгаыт эм? Абу эд! — гажмис старикыс. — Тэнат эд бöрыт рышкыт, катша моз китшсян-ошшасян, а лекарсвосö ньöбны немöн жö овлö... Сiдз?! А öтiк туланыс, любимöй, сулалö ог-го-го... Лун сы сьöрын колö котрасьны, да-а-а... Вежöртiн, кытчö пусö пöрöта?

— Мымда коран? — баснинас орис бабыс.

— Мымда?.. — чуп-чап тырппезнас керис старикыс. — Мöйму витдас сетiсö, а таво ог тöд... Натьтö, содас...

— Государствоас?! — повзис старухаыс.

Шы ог сет, кывза, мый баитöны пöриссес, пеллез сайö тэча.

— Государствоö? — дивуйтчö Митрейыс. — Öмтö осьт да босьт... Нöбöтi заготовительыслö кык кучик. Мыся, того... Сета донöнжык, а сiя налим: öтыс понда чельскис двадцетьö, а мöдыс понда... Стыд и висьтавны... Понлöн совестьыс заготовительыслöн, стыд бы и баитны. Шныгö отирсö быд шагын, вот ме сылö таво этö и мычча, — няпыртiс нятьöсь чуннезсис кулаксö. — Кытшöм дурак весь пондас чапкыны добросö?! Кинöскö богатсьöтны... Не-е-е, старуха! Öнi отирыс сiдз оз ни олö, гажтöм сэтшöм оланыс... Вешьянтöг сiдз-ту верман кольччыны.

— А тэ кинöс кучиккезнас богатсьöтiн?

— Кинöс? Мунiн бы ме сайö, тэнат вöлi! Да-а-а...

— Колан кинлöкö...

Котыс бöжсö лэбтiс, гöнсö сувтöтiс и пондiс чушкайтны старикыс коккез дынын, топ адззис понöс. Пöрисьыс эшö öтпыр корис винасö, но бабыс лöга висьталiс, медбы сiя миссис киэсö да пуксис пызаныс сайö, а эз сэтöн порогыс дорын корась.

— Ошыс некöр оз миссьы да пыр яй сёйö! — висьталiс Митрейыс, пондiс видзöтны киэс вылö, кöр пызаныс дынсянь тыдалiс, что гыжжес кыдз варышлöн и нятьöсьöсь — сьöлöм гудыртчö. Ме бы этатшöм мортыскöт, кöда сьöласьö, несйö, нютшкö табак, норасьö умöль шогöт вылö, öтiк пызаныс сайö эг пуксьы, но мый керан? Не гортын эд.

Митрейыс киэсö вадiс жö миссян увтын, кань моз ва киэзнас малыштiс чужöмсö — небзьöтiс нятьсö — да чышкис сöстöм чышкöт бердö, кöда öшалiс сэтöн жö, и шлёпкисис пызан сайö. Сёйны сiя кужис и вермис, пиннес вылö эз норась — нянь шöрöмсö кыкись курччöвтiс и абу! Изiс сiдз, что пиннес дзуртiсö. Рюмкаись винасö юис ма местö, ме моз эз чукрась, эз пöд и ружты, но чожа коддзис, кылыс пондiс гардчыны.

«Э-э-э, дед! — гажöтiс дума. — Ошшасян, а мылякö чожа коддзин. Тыдалö, годдэт тальöны ни...»

— Мда-а-а, — син дорсö чышкис нятьöсь чунь йывнас Митрейыс. — Том бы том, ышö бы!.. А öнi мый ни? Олiм-олiм, а мый вылö? Кинлö? Висьтав, что чочком светсö эг адззылö, — вирскайтiс нырнас, ошшасис, что деньгаыс сылöн сымда-а-а... Ой мымда! Лякис бы бабыс керкуись стенаэсö и эшö кольччисö сто рублёвöй гижöттэс, медбы лякны гроб пöввесö. Вежöртiн? А тэнат, зонка, мый эм? Али тэнат, старуха? Да-а-а...

— Господи, — клоп вартiс боккезас Ульян бабыс, дивуйтчис, топ Митрейсö адззис только талун. — Мый вылö деньгасö öктан? Кытчö видзан?

Старикыс гажмис, чужöмыс югмис, сералiс старухасö:

— Тэнат, Ульян, саван дöрасö ньöбны немöн, а ме... Да-а-а...

— Сiдз жö кулан да гаггес сёясö...

Адзза, что разьсьöм деревняын олöны кык морт, кыкнанныс аскоддяöсь, асланыс думаэзöн, сiйöн и пурсьöны пызаныс сайын, — серöмтöтöны менö.

Пöриссес баитöв-керисö, эрзiсö öтамöдныс вылын, Митрейыс эшö öтпыр пондылiс корасьны старухасö, но мöдыс сьöвзис: «Кыдз ме сэтшöмыс сайö муна?» — и пондiс висьтасьны Митрейыс йылiсь.

6

Медодз Ульян бабыс стариксö кöритiс иньыс понда, видiс и шуис, кыдз кужис, гардiс мортыслö умöль слава, и петiс, что старикыс кöркö аслыс иньсö босьтiс-бöбöтiс бöбöтчöмöн, висьтав, что смилитiс кывнас да мыгöрнас: видзöтö жö зонкаыс кытшöм! Ыджыт, бытшöм, прока да чож. Быдöс сiя кужö и быдöс сылöн аркмö! Некинлiсь и нем оз одзöст, пондас кö уджавны — вешшы! Да эшö сэк, кöр мужиккес ошкöны: «Митрей, тэ эд миян коласын медвына!» Вот сэк зонкаыс и ружтö: «Ме?! Да-а-а...» И босьтас керку керсö öтнас, кöдö бергöтлöны нёль морт, лэбтас пельпоныс вылö да мунö, топ йöктö, коккес мöддэс моз оз куснясьö. Выныс ошлöн, а мывкыдыс кöинлöн: керку угöв тшупны оз куж, чер оропыс оз аркмы, курансö керö йöз, и мый вылö бы сэк выннас ошшасьны, но кытчö тэ?! Митрейыс кужис ошшасьны.

— Да-а-а, — сорис баблiсь баснисö старикыс. — Вöлi, Ульяна, вöлi. Вынсö некинлiсь, батя, эг ньöб. Лэдзчам Лолымыс вылö изны, мужиккес мельничаыс одзын сьöд вöр, быдöн одзжык бы изö, а ме понда разь видзчисьны? Конувтам босьта тыра мешöккесö кыкö и быдöнöс пыка бокö... Вот кыдз вöлi!

— Эн кывзы тэ сылiсь! — сорис старикыслiсь баснисö бабыс. — Выныс вöлi, а уджас эз письты: етша уджалiс, сё вöррезын ош моз öвтчис, неделяöн гортö эз вовлы.

— Кин?! Ме вöррезын öвтчи?! Сэк тэ я мый я öтнат колхозас уджалiн?!

— Кöть мый, а ме бы тэ сайö эг мун! — сералö бабыс. — Ог тöд, мый Василисаыслö тэись гленитчис? Натьтö, беднöя жö олiсö, сiйöн тэ сайö и бöбасис. Сiдз эд, Митрей?

— Да-а-а, — сьöкыта ловзисис старикыс. — Бытьтö ми богатöсь вöлiм... Пыр жö бырöм нямöттэзöн коккезнымöс каттим да... Вот öнi отирыс богата олöны! Быд мортлöн машина: велосипедыс, моточикыс, ышö не öтiкöн, а сэк мый миян вöлi? Ох-хо, стыд бы и висьтасьны... А тэ менö мортыс одзын стыдитан... Кулöммесö касьтылан...

— Пызаныс дорö эд касьтыла, умöльö ог, — асьсö дорйис бабыс — Василисаыт эд учöтик вöлi да кöсыник, топ кульöм ур, вылас полiн бы и видзöтны, мед не вомдзавны, но уджалiс... Быдöс ештiс керны, и тэнö кöмöтiс да пасьтöтiс... Эз я ачыс нинкöммесö кый?

— Вöлi, — юрнас гогыньтыштiс Митрейыс.

— Вот тэныт и Митрей! Сьöктансö, мыся, киат эн жö куж видзны, а ошшасян. Мöдiк бы Василисасö киэс вылын новйöтiс, а тэ мый керин?! Сё эд кокалiн юр пыдöссö, быд шагын кулаккезнат гындiн, мый не тэ сьöртi, кыз голоснат эрзiн: «Тэ, кöин мульöс! Йöз мужиккес дынö пышшалан!» Öдззан летны горштö — кылö Пальникöдззас, и ошшес пышшöны Каменкаыс дынöдз... Сiдз эд?! А кöр эшö код... О-о-о, Митрей, кытшöм тэ басöк вöлiн томнат коднас! Юан да бöбман, пондан герьявны да уннявны, причитайтны: «Тэ менам, Василиса, любимöй да золотöй! Öмидзтусь тэ менам...» Ачыт соссэтö пуджан, лöсьöтчан вартлыны ни. Сiдз?

— Бат, вöлi... — ружтiс Митрейыс.

— А сыбöрын, кöр кулiс ни Василисаыс, и пондiн герьявны Тиминаыс тыр: «Василиса тэ менам, любимöй да золотöй, мыля менö и коли-и-и-н?! Тэтöг эд ме сiсьма да косьма ни, ох-хо-хо!» Вот эд кытшöмöсь тi, мужиккес... Кöр иньныт ловья, оз ков, вильö кошшат, кулас кö — бöра вильö вай!

— Тырмас, Ульяна, — рамыника висьталiс Митрейыс. — Мун ме сайö и быдöс бур лоас. Ышö пондам овны сто год, поди, кагаэз лоасö... Тиминанымöс бöр лэбтам коккес вылö... Мыся, деньгаыс менам тыр...

— Ох-хо-хо! — бабыс пондiс куснясьны-серавны. — Миян тэкöт и лоасö ни кагаэс... Буждö жö ни песокыс да... Пороз тэ, Митрей! Вийин иньтö да эшö менö торкан. Мун жö бы тэ сайö, бöра эд горштö öдззан летны: «Лешак тэныт лоас! Дышыт петö уджавнытö да личемеритан!..» Сэтшöм тэ, зонка! Чожа вунöтан, мый кöсъян... Эз ков иньыт вывтi серавны. Кулiс Василисаыс и бур. Öнi быдöс син одзат мыччисьö. Или оз? Сiдз тэныт, беслö, и колö, мед тэ öтнат и кулан да керкуат сiсьман.

Ме пукалi да кывзi пöриссесö. Серöм петiс, но эг серав, öтöрас пемытiнас, кылö, уннялiс Митрейлöн поныс, топ кулiс ни хозяиныс. Митрейыс асьсö дорйис хозяйкаыс одзын:

— Эн баит, Ульяна. Весь мортыс дырни ме вылö нятьсö эн кисьт.

— Весь! — лöгасис бабыс. — Ой кытшöм тэ кодя лоин! Дона жöник! Котрасян, кошшан бур невестаэз, а он думайт, что талун-ашын кулан?

— Мда-а-а, — кокнита согласитчис старикыс. — Сiдз, Ульян, и эм. Сiйöн ме вылö кикиморасö и лэдзан, тьфу! — сьöвзис пызан саяс коккес увтö.

Пукала пöриссескöт, кывза мый нiя гардöны, кужöны баитны, нем он шу. Нiя унажык олiсö, унажык тöдöны, нысянь миян кодьыслö колö бы велöтчыны овнытö, дружитны, овны ёрт-ёртöн, а нiя вöр коласын кыкöн оз тöрö: öтыс и мöдыс посöдзсянь да вöрö, натьтö, ме дырни только и пантасисö. Сэк эг бы и ов Тиминаын, мун бы отирыс коласö жö, но олöны эд... И кин татчö пöриссесö кöрталiс?

Кытöнкö кылiс машиналöн шы, сiя пырис керкуöдз. Öтöрын тöлiся ни, югыт, сэтшöм гажа, что котöртi бы гортö, но коккез мыдзöсь и кывза бы йöзлiсь олансö, кöдöн ошшасьöны ёрттэзö. Думайта, что, поди бы ме татöн олi, вöлiсö бы электричество и радио.

— Мый тэ тешитчан? — дедыс ни осудитiс бабсö. — Тэ эд татчö вовлан только гожумыс кежö, тури моз... А кыдз пондас лымыс усьны, бöра котöртан городат, а менам татöн гортö.

— Мый ме татöн тöвнас понда керны? Тэнö я мый я синйыны? — обидитчис бабыс.

— Сiдз, мда-а-а, — Митрейыс бöра лякасис бабыс бердö. — Öнi тi быдöнныт ылöсаöсь: гожуммезнас зоббезнытö тыртат деревняын, а тöв кежас лэбзят, тулыснас бöра ни татöн, медбы садитчыны, босьтны урожайсö и одзлань овны.

— Жаль тэныт?!

— Жаль! Ог любит, кöр деревняас вовлат кыдз гусясьны!

— Гажа рытыс! — пöриссеслiсь дзуги баснисö. — Натьтö, кöччес котрасьöны?

— Кöччес! — горöтiс Митрейыс. — Котрасьöны. Öнi нiя чочкомöсь, ылiсянь тыдалöны. Тöн кöчыслö öшынсяняс лыйи...

— А ме думайтi... — серöмтчис бабыс.

— Да-а-а, — осудитiс дедыс. — Öнi, кага, одззамоз звирьыс абу ни, вöрас мун кöть эн... Росöн чышкöм! Натьтö, тiян кодь весь олiссес унажык и паздöны, тöв и гожум пишаллезнас öвтчöны, тöв и гожум лыйöны, А кинöс? Кöр отирыс и ештöны вöравнытö? Мыля оз уджалö? Мый бы и вöлi, Ульяна, ежели бы этадз олiм одзжык? Тшыгйöн бы эд быдöнным пезьдiм! — öмас заргис кепись ыжда сола тшак, петух моз ньылыштiс, сьöкыта ловзисис. — Ульян, миянлö тэкöт уна оз ни ков, а отирыслö колö. Кöркö, видзöт, ой и лун уджалiм, киöн гöрим и кöдзим, а ветлы жö Пальникас! Правленнёас весь олiсьыс мымда пукалö, ой-ой! Уджалiс бы эта армияыс, мый бы сiя керис! И машинаэс... Вöввес колхозаным етшажык вöлiсö. Машинаэзöн уджалöны, а няньсö кытiськö вайöны — асьнымöс эг пондö вермыны вердны, да-а-а... Бöбöв жö миян государствоыс, кöть тэ мый шу... Мильонöн пö деньгасö сетö, а ми мый сетам? Беда, кытшöм олан вöтiс... Сiйöн, Ульян, кöччес эз эд и лоö... Джагöтчисö...

— Кин джагöтчис?! — повзис бабыс.

— А кöччес! Мый нö сэсся нылö керны, кöр быд кöз увтын весь олiссес пишальöн пукалöны?! Да ышö ероплансяняс пö ядöн вöрсö киськалöны да удобреннёыс...

— Законыс мый вылö?! — Митрейсö баснинас дзугис бабыс. — Мыля кöччесö некин оз дорйы? Ола вот городас нылö ордын, кöр нем керны, кывза радиосö... Мый сэтчин оз и лёбö! Законнэс йылiсь висьтасьöны жö, кöдна пö бытьтö дорйöны жö вöрсис олансö, а петö...

— Педöт картабöр петö, вот мый! — резгис-висьталiс дедыс. — Законсö мый вылö гижöны? Медбы ошшасьны, вежöртiн?

Пукалöв-керим эна кыввез бöрсянь, правдаыс вийис и кольмöтiс думаэзнымöс, кöдна ошкисö олансö. Пукалöв-керим, бабыс и горöтчы жö:

— Тэ эд, Митрей, самогоннат татчö браконьерресö бöбöтан! Судитны колö...

— Судит! Мый он судит?! Весь олiссесö он вермы судитны, а ме вылö пиннет мöртчöны!

— Сэк керкусö тшыннат эн покастит!

— Вашöтан, сiдзкö? — дедыс чеччис пызаныс сайись, босьтiс фуражкасö. — Вашöтан, сiдзкö? Но и муна! Ов öтнат... Но сыбöрын ме понда эн горзы... — шуис и петiс керкусис.

Висьтавны кö, мыйöнкö гленитчис ни Миртейыс, жалькодь лоис, но йöзын, ог шу, что сiдз эн кер, баб...

Хозяйкаыс дедыс бöрсянь пöдналiс ыбöссö да кресталiс кинас, пыр тай пöриссес кресталöны ыбöссэсö и öшыннэсö, кöр водöны узьны или видзчисьöны гым кымöр. Бабыс крестасис да осьтiс осьтана öшынсö. Пондiс кывны öшын одзын сыспуэзлöн шы, топ пуэс ловьяöсь и шушкöны öтамöдныс коласын, баитöны мыйкö.

— Медкыз пусö садитiс Степаныс! — пондiс ошшасьны бабыс, вишкыштiс, малыштiс чукрасьöм рожабансö. — Мöддэсö вайлiсö Иваныс да Борисыс. Öтiк лунö и садитiсö айыскöт. Учöтöсь эшö вöлiсö челядьö, и пуэс учöтöсь, а öнi, видзöт, быдмисö ни, и зонкаэс абу ни... — Синваэсö пондiс чышкыны да баитны. — Кытöн тi менам, кагаэз, и узят?! Кин тiянöс и шебралiс небыт мунас? Поди, тшыгöсь или кынмат?

Сiдз, зонка. Мамыс горзö зоннэс понда, бытьтö нiя кöть кулiсö, но ловьяöсь, ловьяöсь и сыспуэс, кöднö локтöнням топ эг адззыв, думайтi, что нiя быдмöны ас кежаныс...

Сьöкыт вöлi сьöлöм вылын, кöр горзiс бабыс, топ виноватöй мыйöнкö сы одзын... А сiя мöдöрö ни баснисö бергöтiс:

— Кага, ог тöд, мый понда и ола. Мыдзи ни быд год садникас бергавны, а сьöлöмö кыскö городсис. Эна сыспуэс понда, поди... Пуэсö зоннэзö местö видзöта, кывза, кыдз нiя ас кежаныс шушкöны, и сьöлöмö вылын лоö личытжык. А тöдан эд ышö мый петö, — пондiс норасьны бабыс. — Пуэсö эд менчим вийöны бы! Кыдз зоннэзöс жö... Мöйму, видзöт, гортiсь мунi тöв кежас, тулыснас локтi, видзöта: кералöмась эд дорись пусö! Вольдöмась качсö и ниммезнысö, бессэз, гижöмась. Иван да Петра пö... Господи, мый ни эта лоö? Мыля нö миян отирыс сэтшöм лоис, что сы весьтын не пуыс, не туруныс оз сулав?! Вöрыс разь оз тырмы? Видзöт жö мымда пуэс, а сэтчин оз мунö да оз керасьö, деревняыс вылын этö керöны... Тайнö, кöркö этатшöмыс эз вöв... Чарöт бы сэтшöм отирсö еныс!

Мый сэтчö бабыслö висьтала?

7

— Тырмас горзынытö, вай мöдiк басни пондам баитны, — синваэсö чышкис Ульян бабыс и пондiс висьтасьны одззасö.

Степаныс сайö сiдз Ульянсö эз и корасьö, сэтшöм невестаыс зонкаыс аймамлö эз ков: нем сэтшöмнас керны, кöр отирыс пинь выланыс видзöны — сералöны быд местаын! Богатöй Степанлöн айыс. Кöть Андрияныс и сюсö некöр оз вузав, но чомсис йöртöттэс оз рекмö, пыр тыраöсь. Батраккезöс сiя оз видз, йöзсö оз уджöт, но ачыс би — паздö-уджалö и челядьыслö узьны оз сет.

Богатöй Степанлöн айыс, а Ульяныс кин? Кикыль-кокыль, не вылас, не кокас, не сёйны пöт, не юны коддзытöдз — талун эм, ашын абу, видзöт, кыдз кортöн мунасö ветлöтны. Медбы гöтравны Степансö, Андрияныс куим год видзöтлiс невестасö, думаэзнас кошшис, бöрйисис, быд нывкасö сизимись думанас бергöтлiс, öшлiс, гöтралiс бы зонсö и сэтöн жö бöр янсöтiс, эз бы дзуг ассис олансö, мед отирыс эз сералö...

Чорыт да лёк Андрияныс, синнэс пыр вирдалöны, уна оз баит, висьталас — кералас, а пондан кö паныт, киас шать босьтас, сöтас — эн горзы, эн норась, а пондан кö норасьны — содтас, оз видзöт, что тэ инь, зон или ныв, том или пöрись — быдöнлö öтмоз, öтмымда, öткодь оланыс, некинöс и немымда оз жалейт.

— Котрасьö! Тэрмасьö! — сэтшöм Андриянлöн басни.

Челядьыс быдмисö, кыдз йöзын. Керкуын ветлöтiсö гусьöн: гусьöн баитiсö и гусьöн сёйисö. Сы местö Степанлöн мамыс вöлi рам: кöть тэ сылö мый висьтав, пыр шынь видзö. Сьöлöмыс шоныт и киэс небытöсь: кужис челядьыслiсь юрнысö малыштны и ас бердас жмитны.

Степаныслöн мывкыдыс мамыс кодь бы, но мыйкö и эм айыслöн. Быдмис зонкаыс, некинкöт эз видчы, некинлö эз вачкы, кывнас эз дойд. Учöтсянь уджалiс. Кöр локтiс Колчакыс, Степаныс ыджыт ни вöлi, аслас юрöн ни колiс бы овны, но айыс жö шуис: «Степан, видзöт менам... Кытöн нiя эмöсь, сэтöн тэ абу! Орддьы. Кинлö колö, ась смертьсö кошшö, ась öтамöдныс коласын пурсьöны... Миянлö тэкöт чомсиным тырмас!» Быд керкуын олiс солдат, но Андрияныс кыдзкö кужис аслас юр весьтiсь вештыны гым кымöрсö: Степаннэзлiсь солдаттэз орддисö керкусö. Ась пö нiя асланыс туйöт ветлöтöны. Бур бы сiдз вöлi, но сiдз эз шогмы...

Зонкаыс локтiс гортö арнас, пырис керкуас, здоровайтчис айыскöт. Колiс бы радуйтчыны, а Андрияныс казялiс керкусис зонсö, пондiс уннявны:

— А-а-а, локтiн, Буско! Поныс моз жö гортiсь пышшалан... Айытлö колö отсавны, а тэ... Кытöн шатласин, сэтчин и мун да сёй! Пызаныс вылiсь няньсö эн вöрзьöт.

Тшыгйöн бы айыс зонсö видзö, но зоныс весь гортсис эз пышшав, весь йöз отирыс коласын эз кой, адззылiс öтiк-мöдiкö, синнэс оссисö, öзйис Степанлöн сьöлöмыс, лöгасис, гичыртiс пиннесö, ас кежас шуис: «Видзöтам, буржуй! Адззылам эшö, кöдным тшыгйöн кулам!..» Туй вывсянь чöвтчис, ваöн гывьялiс киэсö, топыт шаггезöн локтiс пызан дынö, пуксис лабичö и айыс дырни жö мамыслö шуис: «Мам, вай сёйны!» Ой, мый сэтчö и лоис айыскöт! Синнас ыждiсö, гичыртiс пиннесö — вермис, туйис бы, курччöвтiс зонсö, мырддис бы одзсис няньсö, но шоччись, Андриян! Степаныс абу ни одззакодь учöт, кыдз бы ассит няньсö эз мырддьы...

Степаныс лöгувья сёйис-пурис, сёйтöнняс эшö тышкасис думаэскöт, кöдна öвтiсö öтöрö и мöдöрö, видзисö и вашöтiсö гортiсь; гортын дзескыт, но йöзас тожö эд не ма, колö овны, а кыдз?

— Мам, кыдз овнытö?— зоныс юалö мамыслiсь.

— Ог тöд, — синваэсö чышкö мамыс, нач öшис, топ йöзын: кикокыс кöрталöм и öмсö оз лысьт осьтны, горöнжык баитны.

— Ась, мам, — сёйöв-керис да висьталiс зоныс. — Гöтрася.

— Гöтрась, — висьталiс мамыс. — Кыдзкö эд олат жö...

— Олам! — зубыта дульсö ньылыштiс Степаныс.

Эз тöд эшö, кин невестаыс, кытöн быдмö, эм или абу, колiс сiйö кошшыны да кыдз эшö корасьны, кöр айыс жö бöра сувтас паныт и шуас: «Кытчö тi кикыль-кокыллез?! Ачым!» Сiйö и видзöт: мунас ачыс, корасяс, кин сылö колö, гленитчö, вайöтас и ов! Кöть невестаыт шедас пöрись, кöть том, ась лоас и öтiк кока, öтiк сина или пиньöла чужöма, но вöлi бы богатжык семьяись, медбы асьсö кикыль-кокыль славанас не стыдитны. Айыс керас, айсö он вермы!.. «Поди, вермам!» — лöгыс петö Степаныслöн, кылö ни, что айыс сы вылын абу ни хозяин, веритö ни, что вермас овны Андрияныстöг.

— Мед сiя корасьнытö нырсö оз сюй! — сёйис, пöтiс и пызаныс сайись чеччытöн мамыслö висьталiс зоныс.

Бöра шы эз сет мамыс. Мый сiя вермас висьтавны? Оз жö шу, что брынгы да таль, зон, сэтшöм айсö, мед сiя оз гардчы миян син одзын.

Степаныс сiя жö лунö эз гöтрась, эз янсöтчы аймамыс дынiсь, кытчöдзкö олiс гортын, уджалiс сэтöн жö, кытöн айыс, сёйис-юис öтiк пызан сайын, кöть Андрияныс и эз баит, будзгылясис быд шагын.

Сiдз гожйисö, олiсö Илья лунöдз, кöдö лыддьöны арся праздникöн ни, кöда лунö грех уджавны и дыш петö бы весь овны. Степаныс обедайттöн бöра веськыта висьталiс, что мöдö гöтрасьны.

Андрияныс пишнитiс, був-бав видзöтыштiс зоныс вылö, чеччис пызан сайись, пасьталiс виль йöрнöс-вешьян, кöмалiс сапоггез, кöднö видзис праздниккес кежö, и петiс керкусис. Сiя гортсянь веськыта мунiс Помич Гриша ордö, сэтшöм жö пишкан ныр ордö, кöда сёйö да няньсö иньыс и нылыс шогья дзебö. Нылыс Пишканыслöн ендöм. А мыля? Быдöн айыс кузя: кин локтас корасьны — оз ков, жöникыс абу нылыс сьöрья: öтiк дыш, мöдiк вывтi чож. И корасиссес петöны керкусис и мунöны мöдiклаö. Сэтшöм виль род мунiс кошшыны Андрияныс, мунiс корасьны Гришалiсь ныв, чатырöн видзис юрсö, шагнялiс кокнита, тöдiс, что невестаыс лоас зоныслöн. Сiдз и петiс: Андрияныс пырис Гришаэзас, пернапасасис, пызан вылö сувтöтiс вина и пуксис сёйны. Сёйисö да юисö мужиккес, ошшасисö, лёбисö, что Андрияныс да Гришаыс кодь Пальникас некин абу — нiя только и эмöсь.

— Нуöт, нуöт, Андриян сват! Дзимлялам сюэсö, сэк невестаыс лоас тэнат, а öнi нывкаыс гортын колö... Некинлö уджавнытö.

— Некинлö ни бöра тэнат уджавны... Ачыт сизим местö соровтан, — Андрияныс кыскö асланяс.

— Ог сет öнi! — Гришаыс висьталiс, и быдöс сэтöн.

— Видзчисям сэк, — некытчö лоис воштiсьны Андрияныслö, кисö нюжöтiс сватыслö да петiс керкусис, рад, что чожа сылöн содас уджалiсь да эшö кытшöм!

Олiсö арöдз. Ыббез вылiсь дзимлялiсö сюэз. Кадыс личамис. Рыттэзнас нывкаэс да зонкаэс пондiсö ветлöтны пукаланiнö. Сэтöн Степаныс и пантасис Ульяныскöт. Кыдз казялiс нывкасö, сiдз аслыс и шуис: «Менам!» И Покров рытö эз юась, эз висьтась, невестасö пыртiс гортас. Вожмöвтiсö гозйöн Андриянлiсь порогсö, зоныс висьталiс:

— Гöтрасим, мам.

Айыс луннас юис сюромкаэз да шоныт ырöшшез, дундiс, ружтiс да куйлiс западня вылын, а, кыдз керкусис казялiс зонсö нывкаыскöт, сiдз и пуксис чуйк! Кымöс увтöт пондiс видзöтны и коссис пöрччалiс кушаксö.

Степаныс вежöртiс, что эстöн Ульяныскöт оланыс оз ло, кутiс пельпонöттяс невестасö, жмитыштiс и гажöн висьталiс:

— Мунам. Миянлö тэкöт эстöн нем керны! — мамыслö ни шуис. — Мам, миян понда эн горзы, ми асьнымöс вермам ни вердны.

Мамыс уськöтчис еныс одзö да пондiс юрбитны. Ар. Кöдзыт. Зэрö.

— Мый лоас?! — жмитчис жöникыс бердö Ульяныс.

— Ог кулö! — гажöн баитiс Степаныс, видзöтiс деревнясö öтöрсянь и мöдöрсянь: позыс некытöн абу, некин оз видзчись, кöть пон моз пос увтö пыр. И иньдöтчисö томмес важ баняö, кöдö айыс таво лöсьöтчис разьны да сотны горын. Эта баняын и чулöтiсö медодзза ойсö, а ашынас сэтчö жö баня угöлö Степаныс вартiс гор, лонтiс и пуис похлёбка.

Важ баняын эшö туйис овны: не зэрыс оз вад, не тöлыс оз вижгы, только кынöм сималö, врагся-враг тшыг кынöмыс — или тшыгйöн кув, или мун да юрбит айытлö. Кытчö, Ульяна воштiсьны? Мый керны? Оланыс — крест, кыдз бы эн бергöтлы, сералö.

Андриянлöн сюыс тыр, сэтöн жö эд и Степаныслöн пайыс, но пöрисьыс моньсö пöв синнас оз бы адззы. Гордöй Андрияныс, но Степаныс эшö гордöйжык — сэтшöм нылöн род. Томыслöн киэс уджись оз полö, юрбитны йöзлö оз куж. И Степаныс кутчисис уджавны. Сiя öтiклö тшупсис, мöдiклö назём кыскалiс. Чулöтiс гортын арсö, а кыдз лымыс усис, янсöтчис иньыскöт и шыбыльтiс Усольелань, Галлезö, кытöн отирыс олöны богатöя: эн дышöтчы и лоан пöт.

Мунiс гортсис мужикыс да öшис, кыдз торксис, вунöтiс том иньыс йылiсь. Эта коста Ульяныс нач эз жö тшыгьяв, асьсö вердiс, кытöн шедiс, жöникыс моз жö киэс некытшöм уджись эз полö: öтiклö медасис назём кыскавны, мöдiклö гуна вылын вартны сю, куимöтлö пестуничайтiс, а кузь тöвся рыттэзнас гöрдззисис да печкис — бöра жö йöзлö. Уджалiс садь быртöдз, кок вылiсь усьтöдз, а кöр кычанок моз водлiс аслас керкуокö, оныс эз вöв, топ сiдз кинкö керкуыс дынын öтöрас и дзуртiс-ветлöтiс, лöсьöтчис юасьтöг пырны. Кыдз ой, сiдз и сьöкыт вöт...

Полiс ойезнас öтнас керкуокас, ойесö чулöтiс, кыдз сутшкывлiсö дзирыт ваö. Не олан — шогöт.

— Пышша, мам! — котрасис мамыс дынö да горзiс.

— Некытчö эн мун! — падтiс мамыс. — Мый висьталас Степаныс, кöр локтас?! Кытшöм керкуас хозяйка, кöр пондан пышшавны гортсит?!

— Кыдз сэк, мам?

— Терпит!

Синваэзнас миссис, но терпитiс. Водас узьны, еныслö кеймö, видзчисьö асывсö, а сiя топ оз петавлы: тöвся луннэс дженытöсь да кымöраöсь, гажтöмöсь, кыдз горзöны, мыйкö öштöмась и оз адззö. Вижгö лэчыт ойтöв, вижгö-уннялö учöтик керку угöввезын, нöбöтö-гардö лым, тыртö Ульянлiсь избушкасö.

Одз асывнас инькаыс йöр пöлöн пидзöссэс вылын кыссис керкусис, талис ыбöсыс одзöт пыдын лымсö, кöдö нöбöтöм ойнас, мунiс-тэрмасис, котöртiс бы Ипат Öльöксан ордö, кöда корис нярьявны лён. Öльöксаныс жаднöй: уджöтас дзирс пемытöдз, но уна сылiсь он сёй: тёритас кушман, кизертас сiйö ваöн и паняв. Кынöмыт сималас кö, сёян да спасибо висьталан. Курöтас кушманыс, сьöлöм гудыртчас, синваэз петасö, горзан пöт, но некин оз отсав, оз тöд, мый сьöлöмыт вылын.

Тэрмасис Ульяныс Öльöксан ордö. Паныт вижгис лэчыт ойтöв. Инькаыс вевттис-сайöвтiс кеписьнас рожабансö, мунiс и одзас эз видзöт, эз казяв, кыдз воротаокыс коласын люкасис батшкоыскöт, кöдалöн рыжöй тошыс жмитчöм кортöн ветлöтiсь Опось бердö.

Опосьыс пыр миссьытöм, сьöд рожабана, вылас паськöмыс — поннэз пурöмась-летöмась, коккезас бырöм отопкиэз, спинаыс сайын учöтик бырöм кöзича. Беднöй мортыс. Сэтшöм ни беднöй, что и поннэс оз завидуйтö, оз вувтö, а жалейтöны. Кортöн инькаыс ветлöтö, öктö сёян — кин да мый сетас, сiйö и босьтö. Некинлö Опосьыс оз ков, оз мешайтчы, но Андрияныслö инь мортыс колöм — грехись оз пов: жмитöм столб бердö... Мöдыс кивзö, пессьö, мездöтчö бы ош мыгöра мужикыс дынiсь, но кытчö тэ! Андрияныс паськыт ки долоньнас вевттьö бы инькаыслiсь öмсö, ачыс юрсö тупка моз бергöтлö, синнэс югьялöны.

Ульяныс люкасис батшкоыс вылö и сiдз повзис, что садьыс бырис: чирнитiс быд горшись и бöр сöтiс аслас баняö. Эз адззыв, кыдз Опосьыс мезмис Андрияныс киись, кыдз коккес увтын талис да колис котомасö... Мурзьыштiс пон моз Андрияныс, эрзыштiс, курччöвтiс тырппесö...

Вижгис лэчыт тöв. Гардiс лымсö. Улицаын некин оз тыдав. Ульяныс заргисис аслас керкуокö. Дрöжитö, оча пинь оз локтö, но ыбöссö пытшксяняс пыкис гормöччанöн, кресталiс, топ бесiсь полiс» «Мый лоас? Мый лоас?!» — дрöжитiсö киэс и сьöлöмыс пессис. Сэтöн ыбöсас вачкисö кыдз нöшöн — потолоксис буждiс песок, кивнитiс лабич увтын каньлöн пиянокыс, кöдö инькаыс неважын адззис öтöрись и вайöтiс ёрт вылö.

— Осьт, тютя!!! — рявзö ыбöсыс одзын Андрияныс, пиннезнас йирö ыбöс вугсö. — Осьт!

«Господи, отсав! — юрбитö Ульяныс. — Кытöн еныс? Мыля сiя беднöй отирсö оз адззы, мыля богатöйес дор?!»

Учöт керкуокыс, но киöн керöм: не тöлыс оз пöрöт, не зверьыс оз разь. Пурö ыбöссö Андрияныс кытчöдз пиннес дзоньöсь, брынгö и кулакнас вачкö, но пырны оз вермы. Ульяныс дрöжитiс-керис, смевмис и пондiс пытшксяняс ыксыны: «Уйс, Серко! Пур, курччав öддьöнжык! Поди, пиннет мöртчасö...»

— Разя дзöдзыв позтö, разя! — Андриянлöн öмсис быг петö, ружтö, но нем оз вермы керны и пондö кеймисьны ни. — Осьт, кага... Нем ме тэнö ог кер...

Вижгö ой тöв, нöбöтö-гардö лымсö. Öтöрын некин оз адззы Андриянсö, мый сiя керö, кыдз пырö бы моньыс дынö, некин оз лок да оз юав: «Мый тэ сэтöн керан, мужик? Кинöс йöртан баняас?! Стыд тэнат абу...» Сьöвзис бы рожаас...

Ружтiс-керис Андрияныс ыбöсыс одзын и дзурка-вирка вешшис.

Вижгö тöв, дзуртö баняокыс, горзö Ульяныс, причитайтö: «Кытöн тэ, Степа-а-ан?! Мыля менö колин?!» Полö инькаыс, что не талун дак ашын вермас шедны кытöнкö «ошыслö», сералас Андрияныс и ковсяс джагöтчыны. Горзiс-керис инькаыс, петiс керкуоксис и мунiс уджавны. Уджалiс коккес вылiсь усьтöдз, локтiс гортö, вайис Öльöксанлiсь куим-нёль картошкаэз — сымда и шедтiс, и бöра — öтнас.

Кöдзыт. Тöлыс сё уннялö-сьылö асмознас керку угöввезын. Гортыс топ ош поз — кöдзыт и пемыт.

Кытiськö кылöм ни мамыс, что нылыс шедлöм Андрияныслö, котöртiс, пырис — чужöмыс не аслас: сьöдöтöм, горзö:

— Лок гортö! Кöть мый... Эм кö Степаныслöн юрыс, веритас, вежöртас, а оз... Ачыс тöдас. Сэтшöм, ныв, миян тэкöт судьба...

Судьба... Овны оз туй и норасьны некинлö.

Ульяныс эз кывзы мамсö, гортсис эз пышшы, а лонтiс гор, öзтiс сартас, кушкыртчис угöлö и пондiс печкыны. Уджалö и сьöлöмыс, кыдз каёклöн, чеччалö быд шагын, быдкодь шысис повзьö, кöдна пемытiнас уна: тöв шутнялö трубаын, биыс сартас бердын чискö, баня пöлскын кань гыжьясьö... Оланыс оз вачкись олан вылö. Кöр ни Степаныс локтас?! Но уна эшö лымыс усяс, кöр мужикыс осьтас ыбöссö, уна эшö лёк тöлыс вижгас да гладьöтас лымсö, йöррез бердö керас столаэз, дыр эшö нiя оз чинö, а сыбöрын содасö луннэс. Уна эшö инькаыс сотас сартас.

8

Степаныс пырис гортас, кöр крыша вылiсь сылiс ни лым и öшалiсö йыжоллез. Ульяныс öшöтчис мужикыс голя бердö, горöтiс нёштöм голосöн, öдззис герьявны да норасьны-висьтасьны, кыдз олiс öтнас, мый тöвбытнас пöжис сьöлöмыс бердын.

Сьöдöтiс Степаныс. Сьöлöмыс чорзис, но öтiк кыв эз горöтчы, кыдз эз кыв иньыслiсь норасьöмсö. Мужикыс гичыртiс пиннесö и ашынас жö мунiс уджавны йöзлö ― нянь шедтыны. Уджалö Степаныс талун эталö, ашын сылö, айыс пантасяс и нерö:

— Чöскыт йöз бекöрас сёяныс?

Мамыс пантасяс, жалейтö:

— Кыдз косьмöмыт... Чапкы иньтö да лок гортö!

Степаныс кылiс и эз аймамыслiсь кыввесö, видзчисис тулыс, бытьтö тулысыс мыйкö ваяс да козьналас. Таво тулысыс локтiс сёрöнжык, лымсö сылöтiс дыша. Отирыс одз лöсьöтчисö гöрны да кöдзны, а Степаныс мый жö пондас керны? Бöра йöзлö уджавны, тшыгьявны да кинöскö вердны? Сьöлöмыс педзö, аслыс жö бы сюсö быдтö, отир моз жö бы олö, сiйöн и небис вöв, кöдö вузалiс туй морт. Вöлыс — вöв вылö оз и вачкись — лы да кучик, топ тöвнас турунсö абу адззылöм, но Степаныс эз пов: сыналiс Синькосö, малалiс, няньторöн вердiс, пуксис вылас — хозяин ни, эм ни аслас подаок!

Хозяинöдззас ылынкодь эшö, уна эшö колас тшыгьявны, йöзлö уджавны, но узьö и вöтасьö ни, что пондас овны отир моз жö, веритö виль властьыслö, кöда понда не весь отирыс пессьö, натьтö, сiя беднöйес дор лоас эд.

Сылö лым. Син одзын ыббес мыччисьöны лым увтiсь. Шондiыс шонтö öддьöнжык и öддьöнжык. Сьылöны ыбшаррез, сьöдкайес ни пондiсö тэчны поззэз.

— Мунам татiсь! — иньыслö кыдзкö висьталö мужикыс.

— Кытчö?! — повзис Ульяныс. — Кин миянöс видзчисьö? Или бöра кытöнкö голяö йöз сийöс кышавны?

— Сийöстöг нем оз пет, — шынньöвтiс Степаныс. — Колас доддясьны да гöрны. Тöдан, мый ме думайта... Тиминаын эм чапкöм шутём... Весöтыштны бы сiйö, гöрны да кöдзны... Ылынкодь гортсянь, но вилинас, думайта, няньыс шогмас...

Ылын или матын, сэтiсь иньыс эз пов, кыдз шуöны: ылö пуктан да матiсь босьтан, вöлi бы кытöн уджавны, аслат бы муыс вöлi... Ульяныс повзис сэтiсь, кöр мужикыс горöтчис: «Сэтчин и пондам овны...» «Вöр шöрас... Кужö Степаныс медодз кывнас керны, а сыбöрын киэзнас уджавны, кужö...» — мужикыс вылö видзöтö иньыс.

Иньыс эшö бытшöма думайтны эз ешты, мунас я овнытö виль местаö, а Степаныс ошшасьö ни:

— Тшупам да лэбтам керку. Арнас пырам сэтчö овнытö, — куритö, синнэс шыннялöны. — Он верит?! Ме быль эд баита. Миян сьöрö эшö мöдiккез вöтчасö.

— Вöр шöрас вöтчасö я? — гажтöма баитö Ульяныс. — Ош позас...

— Видзöтам! — унажык ни баитö мужикыс. — Лоас миян коммуния...

— Мый сiя сэтшöмыс? — синваэс петöны Ульяныслöн.

— Сэтшöм... Öтлаын пондам гöрны и кöдзны, вартны и изны, öтiк бекöрись панявны — челядь моз сералö Степаныс.

— Поди, иннезнытö öтлаын пондат видзны?..

— Сы йылiсь асьныт ни думайтö...

Оз верит иньыс мужикыслö: любитö Степаныс сказкаэз гардны, кытöн сералö асьсö, кытöн и иньыс вылын кеслö пиннесö. А öнi лöгасис, пондiс резны-паздыны, что не весь Совет властьыс понда тышкасис, что колö керны виль олан да сэтшöмö, кöдаын некин оз понды тшыгьявны, отирыс лоасö öткодьöсь.

Воштiсьны некытчö: кытчö ем, сэтчин и сунис, кытчö мужик, сэтчин и инь.

Степаныс иньыскöт локтiсö вöр коласö, кыдз позтöм кöккез.

Мужикыс вöвсö лэдзис межа дорö, сулалыштiс, видзöтiс омöн, видзчисьтöг киэсö паськöтiс, русö жмитiс моросыс бердö, гажöн быд вынсис горöтiс: «Го-го-го! Ыбок, менö важын ни видзчисян?! Вот ме и локтi. Пондам уджавны да гажöтчыны. Не сiдз я мый я?!» Ульяныс повзис кодь, видзöтö мужикыс вылö, эз я бöбмы сiя. Кляча вöлыс юрсö лэбтiс, гöрöктiс, несйис.

Цветитiс лымдорчача, больгис шорок, кымöрсянь кисьтiсö сьыланкыв ыбшаррез, шутём дорись лэбтiсис тар, вöр дорын котрасисö кöччез — богатöй вöрыс, он ни эстöн тшыгйöн кув, только эн дышöтчы.

Гажаöсь местаэс.

— Эта кöз увтö и керам керкунымöс, — Степаныс спина сайись лапья кöз увтö шупкис котомаок, чер, ветлiс важ турун зород дынö, вöлыслö вайис сёян, чапкис одзас и пуксис куритны. Куритiс мужикыс и шыннялiс — рад сьöлöм вылас, видзöтiс кытчöкö ылö и тöдчис, что мыйкö думайтö, а иньыслö гажтöм, синваэс петöны.

Дзульзьöны ыбшаррез, кöкö кöк, больгö шорок, муыс лолалö шоныт руöн, лэбалö балямош. Межаэзын лым эшö, но пипуэс öшлöмась ни пелькытшшез — цветитöны, потö ни льöмпу лист.

— Мый тiльсян? — Степаныс юалö иньыслiсь.

— Мый тiлься?.. — синнэсö тiльö Ульяныс. — Мый пондам сёйны? Кытöн узьлыны? Кинкöт уджавны?

— Мый сёйны?! Го-го! — готсьö мужикыс. — Гожум оз я локтö!.. Вöлiсö бы кикокыт, а коми мортсö гожумнас тшыгйöн он вий... Видзöт жö: быдмö ни кöчазь, сыбöрын лоас пикан, а то, — чуньнас мыччалiс гöпок дорö, — кöктоиныс мымда! А пишальыс мый вылö?! Тэ менö, Ульяна, вöрас овтöн эн полöт, ме мортыс сэтшöм... Менö мамö вайöма пö кöз увтö... Ог кö пондö дышöтчыны, дöс миян лоас.

— Ог тöд... — мöднёжа ни шыасис Ульяныс, пондiс видзöтны, кыдз вöлыс марскö кöс турунсö.

Кадыс павжун. Кынöм сималö. Степаныс пöрччалiс кöзичанысö, кыскис сэтчинiсь чорзьöм няньтор, пöжалöм картошка. Сёйисö, пöтiсö. Мужикыс босьтiс чер, сьöвзис долоннес вылö и пондiс керасьны: медодз суййис уввесö лапья кöзыслiсь, чукöртiс нiйö и керис стан: öзты би, пыр да узь, не зэрыс оз вад, не номыс оз сёй и руыс сöстöм. Луннас уджалiс Степаныс, рытнас вöлыс одзö чапкис сiйö жö кöс турунсö, спинаыс сайö кышалiс важ пишаль, иньыслö горöтчис: «Тэ бисö öзты да пукалышт. Ме чожа!» И пырис вöрас: спинаыс эз ешты саясьны, лыйис...

Кувтыртiсö-бобгисö таррез, сьылiс быдкодь каёк, кин кыдз кужис да вермис, сiдз и гажöтiс тулыссö. Жмитчисö öтамöдныс бердö да узисö кöз увтын. Мöд лунас Степаныс сэсь жö, ыбокыс бердiсь, пондiс пöрöтны вöр. Мужикыс кералiс керрез, а иньыс нiйö вöвнас петкöтлiс межаыс дорöдз. Неделя уджалiсö, тэрмасисö: тшупсис Степаныс, ачыс видзöтлiс шондiыслань да ыб вылö, ыб вылö да шондiыслань, видзчисис час, кöр муыс вылiсь сылас быдöс лымыс и пондас туйны гöрны. Сылöтны оз тэрмась: ойезнас кынтö, луннэзнас шонтö.

Мужикыс гöрсö доддялiс сiя часö, кöр лымыс эз ло джын муыс вылын, кöр пондöтчис гöрны, бороздаöт сьöрас визывтiс шорок.

— Мый сэтчö тэнат быдмас? Сэтшöм ваас... — шыасис иньыс, кöда сьöкыта уджавтöн сiдз умöльтчис, что кытчö падмö, сэтчö и усьö, чужöмас кольччисö синнэс да нырыс.

— Гы, — кокнита баитö Степаныс. — Эн пов! Кытöн нять, сэтöн не öтiк, а квать... Вот мый понда кöдзны? Кöдзысным эд абу...

— Куд етш эм, — ошшасьö Ульяныс.

— Куд етшнас петухыс курöггес одзын ошшасьöм, но, а ми лöсьöтчам овны... Кöть мый, но колас кеймисьны айöлö...

— Тэнат айыт, тэ и кор сэтшöмыслiсь...

— Кора! Оз кö сет, мырддя! Муна волисполкомас, норася, сымда и лоас!

— Норасьтöн пондан ветлöтны! — видö ни мужиксö Ульяныс.

Погоддяыс бур, шондiаöсь луннэс. Степаныс кык лунöн гöрис мусö, куимöтас пуксис вöв вылö и гортö! Айыс дынö... Мунiс, олiс рытöдз, локтiс, вöлыс вылын вайис ведра зöр и сымда жö ид. Сюыс тöрича сора — джыныс ёг, мöд джыныс сю, но мый керан? Мымда эм, кытшöм шедiс... Етша жö кöдзысыс...

— Мымда эм, — юрсö гыжьялiс Степаныс. — Бöра няньтöг пондас ковны тöвйыны...

Шы эз сет Ульяныс. Гусьöн чышкис синваэсö, иньдöтчис гортлань, думайтiс, что айыс оз я содз-мöд сет сюсö... Мужикыс бöрсяняс ыкöстiс жö: «Кытчö мунан?!» Эз жö бы лэдз кеймисьны, кöр асьныс уджалöны, но иньыс ассис керис: мунiс деревняö, но медодз не аймамыс дынö, тöдiс, что нiя асьныс уджалiсö йöзлö, медбы шедтiсьны, а мунiс...

Лун да мöдiкö кытöнкö олiс Ульяныс. Локтiс и вайис спинаыс сайын котомаын сю.

— Кытöн вöлiн? Кысь адззин? — юасьö мужикыс.

— Кытöн вöлi, сэтчин абу ни... Кортöн ветлöтi... Öктi... Кöда содзнас сетiс, кöда кырымнас — сымда и эм...

— Кыдз босьта шатьсö! — мурзьö Степаныс, но сьöлöмыс вылын кокнитжык ни, топ оз ни сiдз мыдз нинкöммезнас нятьсö лойны бороздаас.

Уджалiсö — ойшöрнас водлiсö узьны: öт синнысö куньлiсö, мöднысö осьтлiсö... А кыдз сэсся? Мöднёж эз туй, кöр думайтiсö одзлань овны, и Микола гöгöрын кöдзсис: öтiк лекаын кöдзсьö, мöдас осяыс петалö ни — зелёной пасьöн гажöтö муыс.

Кöдзсис, но шоччисьны некöр, бöра кутчисисö тшупны керку. Кытчöдз эз ытшкисьö, Степаныс чукöртiс помеч: отирыс гортiсь жö котöртiс, кутчисис удж бердö, пондiс уджавны кинлöн мый шогмис: кöдна пилитiсö тёс, кöдна лэбтiсö керку, кöдна сэтöн жö тшуписö ни карта. Уна вöлiсö помечанаыс, паз керисö-уджалiсö, сёйисö, юисö, рытнас гажöтчисö и тырмис... Мунiсö горттэзö.

Быдöн, кин вермис, отсасис Степанлö, но айыс... Кымöссö Тиминаö эз мыччав. Чорыт Андрияныс! Но и ась... Ачыс тöдö: пöрисьсö томмеслö не велöтны, бур, что талун лэбис керкуыс, ашын вевттясö тёсöн, писькöтасö öшыннэз, вöвдасö джодж да потолок... Чожа баитсьö, но жагöн керсьö.

— Ой да ой! Кыдз и пондам тöвйыны? — гожум шöрнас тöждiсьö Ульяныс.

— Тöвьям! — гажöн баитö Степаныс. — Петiм ни кöзыс увтiсь, а тэ горзан...

― А подаыс?.. — бöра вишыкасьö иньыс. Инькаытлö мöсыс да баляэз жальöсь, кöдна эшö эз вöлö, но лöсьöтчöны босьтны. — Мöстöг, Степан, сьöкыт.

— Сьöкыт, — иньыс вылö видзöтö мужикыс (Ульяныслöн кынöмыс быдмö), тюкöтö-керасьö öшыннэз дынын. Уджалöв-керис, пуксис шоччисьны. Вдруг юрыс вевдöрö, крышаыс увтö кысянькö пыркнитiс-лэбзис гулю, пондiс асмознас сьывны. Вöрсис прыг да скок чеччалiс-локтiс уджалiсь дынö зэв матö кöч, сувтiс, кывзiсьыштiс и сöтiс вöрланяс.

— Степан! Кöчыс! — ыксö Ульяныс.

— Мый ыксан? Кут да йöрт керкуас, вот тэныт и пода лоас, — сералö мужикыс.

— Ась котрасьö, — шуö Ульяныс, — ар кежас быдтö пияннэсö. Вывтi асьтö эн ни вий, ашын, натьтö, пондас ковны ытшкисьны ни.

— Пондöтчам, — висьталö мужикыс и бöра видзöтö иньыс кынöм вылö: сьöкыта пондасö керны турунсö...

Жар. Пöжö. Погоддяыс талун бур — ытшкы да курт. Талун уджалiсö керку дынын, ашын пондöтчасö ытшкисьны. Кытöн тшыгöсь, кытöн пöтöсь, но эта оз полöт, умöль сiя, что ой и лун номыс да гебыс сьöраныс кымöрöн лэбалö, петшöралö-сёйö, кöть кытчö дзебсись, адззö.

Уджалöны. Оз полö, что вöр коласын öтнаныс, что ойнас вöлыс пирскайтiс да коккезнас вартiс му бердас, натьтö, матын ветлöтiс ош, но сiя вöвсö эз вöрзьöт.

9

Арланяс, кыдз ойес лоисö кöдзытжыкöсь, ном-гебыс öшис.

Öзиммез кöдзан гöгöрын Тиминаö локтiс Митрей. Сiя доддялöм няридзö вöв, тэчöм няридзас öтiк-мöдiкö и мунö, шутнялö. Сувтöтiс вöвсö Степаннэз öшын увтö, лэдзчис Воронкоыс вылiсь, öзтiс чигарка, видзöтiс омöн, горöтчис: «Да-а-а...» и сэсся кытчöдзкö нем эз шу.

— Кытчöдз нö, Митрей вонö? — Степаныс юалiс Митрейыслiсь.

— Тэ дынöдз... Овны локта. Примитан?

— Ачыт тöдан, — шуис Степаныс. Ми эд ог дзескамö, видзöт, оланыс татöн кытшöм гажа.

— Да-а-а, гажа, — шлёчкис кывнас Митрейыс, пондiс видзöтны, кыдз бöрсяняс подöн локтö иньыс, мырсьö-мунö, топ печикасьö сырчик: учöтик да кöсыник.

— Вöрöтчы-ы-ы! Пон мульöс, коккет сiсьмисö я мый я?! — Митрейыс ыксö иньыслö. — Тэрмась, пондам керны керку.

— Керкуыс йылiсь эн на баит, тöрам öтiкас. Медодз колö кöдзны öзимсö, — баитö Степаныс.

— Тэ мый, Степан? Кöдзам, нем керны! — ошшасьö Митрейыс. — Кöдзам!

Куритiсö мужиккес. Митрейыс жаднöй синнэзöн видзöтiс омöн, унажык ыб вылö, кытöн Степаныслöн быдмö ид, кузь заа, кузь да тыра шепа, но эшö вундытöм.

— Бур сюыс тапкöм, — кывнас шлёпкö Митрейыс.

— Сетiс еныс, — висьталiс мöдыс. — Овны пондам, но, öнджа... Дышшесö татöн муыс оз радейт.

— А ми сэтшöммесö бокö вештам, — сьöвзьö Митрейыс, ружтö, коссис кыскö чер, шуö. — Мый, Степан? Уджавны пондам...

— Сёйин бы да вöлись...

— Ме тöн ышö сёйи, — Митрейыс кутчисис кызкодь кер бердö, лэбтiс сiйö пельпоныс вылö, ружтыштiс и нöбöтiс гладь местаö — складнöй кер местö.

— Тэ мый керан?! — повзис Степаныс.

— А мый? — мороссö малыштiс Митрейыс, шынь эз кер — тöд миянöс!

— Гöгыт эд письтас!

— Мыля сiя письтас, кöр письтыны абу керöм?! — мöдiк кер бердö кутчисис Митрейыс.

Степаныс рад. Öнi гажажык лоас Тиминаын и кокнитжык ни уджавнытö, кöр важын ни тöдö Митрейсö — ошкы мортсö, ош моз уджсö бергöтö, а шу мыйкö не сы сьöртi — водас межаö, лун узяс, но чуньöн некытчö оз павкöт.

Эшö öтiк мужик содiс Тиминаын, эшö öтiк керку пондöтчисö тшупны вöр коласö. Мужиккес уджалiсö черрезöн. Ульяныс киас черсö эз ни босьт, а тöдiс инь мортлiсь удж: пуис и пöжис, вердiс мужиккесö, кöдна сы вылö видзöтлiсö полöмöн — моросыс одзын кынöмыс быдмис, сiйö и видзчись, что ашын Тиминаын содас морт.

— Тэ, öнджа... Вöрас пыдö эн пыр... Ошыс... — ружтö Митрейыс, кöр керкутшуписсес пуксьöны шоччисьны. — Öнджа... Батя, ошыс резьöтö пö тыра инькаэсö... Резьöтас кынöмтö, кыскас кагасö, мыр вылö пуксьöтас и быдöс сэтöн!

— Кытiсь тэ сэтшöмсö кылiн? — мужиккес гöгöрын бергалö Ульяныс, то киас зор босьтö, то потш — öтiкö отсалö бы да мöдiкö.

— Отирыс баитöны... Тэ зорсö кисит чапкы и миян гöгöрын эн гардчы. Да-а-а, — кывнас шлёчкö Митрейыс.

— Вешшы сэтiсь! — иньыс вылö лöгасьö ни Степаныс. — Тэтöг керам.

— Кыдз од керö... — син одзись саясьö Ульяныс. Керасисö мужиккес. Асывсянь сёр рытöдз вöрсö гажöтiсö черрезöн. Шондiыс вöлi пуксьö ни, мыдзисö ни, но Степаныс жö шуис, что этö керсö эшö пазитам, пуктам срубыс вылö и талун тырмас, шоччисьны колö.

— Курит да вöлись, — Митрейыс пуксьыштiс кер вылö да пондiс гардны чигарка. Эта коста межаыс дорын, син сайын, кöззэс увтын кинкö пондiс жексыны.

— Кöч эд, — шынь керис Митрейыс. — Варыш кутiс.

— Кöч тай... — Степаныслöн чочкоммыштiс чужöмыс, сiя вежöртiс кытшöм «кöч» вермас жексыны кöззэс увтын. Мужикыс черсö шупкис срубыс бокö и котöртiс межаланяс. Чожа сэтчинiсь петiсö гозйöн: Ульяныс дубас подолас каттьыштöм кагаок.

Митрейыс черсö сöтiс кер бердö и лынь-лынь иньдöтчис мöд межаланяс, кыдз сэтчин мыйкö öштiс.

Тиминаын содiс морт.

Мужиккес вунданöдз Митрейлö керкусö тшуписö матицаэсви, но сэтöн колiс чапкыны черрезнысö да босьтны чарлаэз.

Погоддяыс сулалiс. Мича луннэс тэрмöтiсö. Сюэсö кöдзис Степаныс, а вунiдсö öтлаын — Степанлö суслон и Митрейлö суслон, кöть и Степан гозъяыс уджалiсö кыкöн: Ульяныслöн кага, но гортын оз пукав, сэтöн жö, некин инькаыслö декретнöй отпусксö эз сет и эз вежöрт, мый сiя сэтшöмыс. Нимöтас кагаоксö, тöбалас рузуммезö да сьöрас... Мамыс вундö, а учöтикыс узьö или горзö суслон увтын.

Уджалöны тиминса, сю вундöны. Арыс гажа. Отсалö дзимлявны няньсö сiдз, что и вундiссис одз, и мужиккес ештiсö сувтöтны лымыс усьтöдз мöдiк керку. Öнi, кыдз пондасö лэбзьыны туриэз, ась кривзöны! — быдöнлö ошшасьöны, что вöр шöрын быдмö виль деревня, кöда пондас сулавны сэтчöдз, кытчöдз отирыс пондасö овны му вылын... И кин мунiс Усольеö да сёрмис туйын, сё ни эз орддьы этö деревнясö, кежис туйыс вылiсь татчö, кыссис отирыс дынö шонтiсьны да шоччисьны. Ульяныс йöз отирсö панталiс, кыдз тöдсаэзöс: кин бы да кытiсь мортыс эз вöв, вердiс няньöн-солöн, юкталiс юанöн, колiс — узьтöтiс... И отирыс тöдiсö ни, что Тиминаын олöны кодя морттэз — асланым отир.

Арыс гажа — сьöлöм сьылö. Олöны, некин хозяин ны вылын абу — не ыджыт, не учöт, мый колö, сiйö и кер: колö — уджав, колö — босьт пишаль да котöрт вöравны, кöр пöткаыс садниккезныс кырылын.

Степаныс любитiс вöрсö, и Митрейыс радейтiс, пуксяс посöдзö мыдзувья шоччисьны, видзöтö вöрыс вылö, адззö, кыдз синнэз гажöтö öзимыс, кыдз сы вылын котрасьöны кöччез, куритö да баитö:

— Да-а-а, Сибирьыс гортын вöлöма... Локтö, ёрттэз, миянö овнытö!

Сибирь... Мымда комиэс мунiсö сэтчин кошшыны нянь да бур олан! Мыйись мый, быдöн касьтылiс Сибирь... Мунiсö и абуöсь, не то олöны, не то озö — не шы, не тöв, а гортын бы позис жö овнытö — сiйö жö няньсö сёйны, только эн дышöтчы!

Талун Митрейыс пöт. А пöтувья мый эшö мортыслö колö?

Пöт Митрейыс, куритö, кынöмсö малалö, посöдзсянь видзöтö кöччез вылö, кыдз нiя котрасьöны öзим вылын. Посöдзö керкуись петö иньыс и корö:

— Мöсыслö бы весйöт ¹колö лöсьöтны...

— Кытшöм весйöт?! — рявзö Митрейыс. — Лöсьöтсяс кöркö...

— Кöр? Кöр мöсыс баляэслiсь сюррезнас кынöммезнысö писькöтлас?

— Ась люкалö! — пишкö мужикыс. — Он адззы, посöдзыс весьтöт колö вевттьыны... — дышыс петö уджавны, кöр бöбöтлöны кöччес: босьтiс бы пишаль да вöрö! А иньыс бизгö, тшöктö керны öтiкö да мöдiкö.

Василисаыс тыра. Кынöмыс ыджыт — нырыс вылö кайис ни, сiйö и видзöт, кыдз керрес коласö пичкыртасö-нилясö. Жаль инькаыс. Йöзлö жаль, а Митрейыс кутчисис посöдзыс вевдöрö лэбтыны тёс, ыксö: «Черань! Кут тёссö да вöрöтчы! Чöскыта бы сёян, шоныта узьлан, а дышыт петö уджавнытö. Тэрмась!»

Инькаыс зэркыта лэбтыштiс тёссö, кивнитiс, кык кусiньöн кусiньтчис и баöн моз кайис посöдзаныс да кыссис керкуас.

Кыдз йылö керкуыс дынö зэв пуксис дозмöр и пондiс бергöтлыны юрсö, видзöтны, мый керö Митрейыс, кöда етшажык талун уджалiс, унажык тотис-видчис ас кежас, иньсö видiс, но сытöг топ ловзисьны эз вермы — дынас мед вöлi.

Керкуас олiсö ни, кöть стенаэс эшö лöсавтöмöсь, горыс варттöм, кык öшын писькöттöмöсь.

Митрейлöн керкуыс лэбис, а иньыс, кыдз мужикыслö отсалiс посöдз вевдöрö лэбтавны тёссэсö, сiдз ойнас и чöвтчис — чапкис кынöмсис кагасö, кöда чужис, горзiс ни, олiс час-мöд и кулiс. Вот тэныт и виль деревня! Эз на ештö вилинас буржыка вужьясьны, а кулiсь ни лоис, сiдзкö, и Тиминаын шойнатöг оланыс оз ло.

Василисаыс шогалö, но мужикыс адззö и оз этö, оз вежöрт, что колö дзебны кагаоксö, одз асывнас босьтiс пишаль и öшис гортсис, мунiс и абу, локтiс только рытнас: спинаыс сайын кыскис кык дозмöр да кöч, пиас вайис нёль сьöла. Пырис керкуас, ыксö: «Кöчсö куль да кайесö кушты!»

— Ог вермы-ы-ы, — западня вылын кивзыштiс иньыс.

— Мый лоис, он вермы? Челядясин, а кытöн кагаыт? Вайин пон мульöссö! Йöз мужиккес увтын куйлiн, сiйöн и кагасö чапкин!

— Ой, Митре-е-ей... — пондiс юрбитны Василисаыс.

— Мый Митрейыс?! — нерö иньсö мужикыс. — Мый тэныт Митрейыс умöльсö керис? Кагасö не кага кодьö или мый?!.. Мда-а-а... Яйсö эн вöрзьöт! Ачым сёя...

— Сёй, Христос тэкöт! Сёй... — ловсö кыскалö Василисаыс, баöн кыссьö мужикыс добыча дынö, пондö куштыны дозмöрсö.

Керкуас пырö Ульяныс. Адззö Василисасö, повзьö, пондö видны Митрейсö:

— Мужик! Сiдз разь колö видзны иньтö?! Он адззы, сiя шогалö!

— Но и мый? Аслам эд иньыс. Да-а-а, — пишкö Митрейыс. — Кыдз колö, сiдз и олам, — пукалöв-керö, ошшасьö, кыдз да кытiсь лыйис дозмöрресö и кöчсö, лöсьöтчö тöвнас кутны туланнэз — деньга керны, видзчисьтöг юалö. — Ульяна, сюсö эд, поди, öтлаын жö бöра пондам вартны?

— Поди тэ торйöтчан? — эз вежöрт инькаыс соседсö.

— Кин торйöтчас?! Ме? Кысь тэ сiйö кылiн? Мыся, коммуния Тиминааным керам! Сэк оланыс вöлись эд лоас!

— Мый тi и вöтасят кык мужик? Мый сiя лоö? — оз вежöрт Ульяныс.

— Коммунияыс шуан?.. Ме мыйöн тöда? Степаныс жö баитö, а ме ог тöд. Бытьтö пö öтласа удж и оланыс пö öтласа жö...

10

Посадын кывсьö Тиминаись оланыс (Митрейыс жö унажык ошшасьöм), бытьтö пö вöр коласас сюэс шогмöмась сэтшöмöсь, что оз тöдö кытчö воштыны, не то вузавны, не то козьнавны, а öтiк рытö Степаннэзö локтiс Спирья. Домалiс вöвсö йöр бердö, пырис керкуас, здоровайтчис, пернапасасис ен угöлö, кöть и енсö тöдiс да эз (гортын эз ылöст юрбитны), пуксис западня вылö да баитö:

— Степан, тöдан жö мый... Поди, ме татчö локта овнытö?..

— Мый лоис? — Степаныс бытшöмика юасьö мужикыслiсь.

— Виль местаись бы пешла олансö...

— Лок... Ежели кöиннэсис он пов. Миян эд тöвнас кöиннэс посöдзаным узьлöны, а гожумнас номмезсянь оланыс абу, дзебсись бы кытчöкö да ош моз узь, но колö уджавны. Кыдз уджалан, сiдз и сёян.

— Уджавтöг нем оз керсьы, — ылöсöн баитö Спирьяыс. — Сiя и эм, Степан Андриянович, что овнытö гортын эз понды туйны... Быдöннымöс сюртнялöны ¹.

Уна оз баитö, а висьталасö... али тэ колхозас пыран, али враг.... Мый вöлi, эз — быдöс öтлаöтöны. Чожа иннезнымöс, мать боль, мырддясö да öтлаöтасö.

— Оз гленитчы?

— Кинлö сiя гленитчас, — нач гажтöма шыасис Спирьяыс.

— Сiдзкö, пышшан гортiсь?

— Мый нö! Кытчö нö воштiсьны? Жаль вöлыс, — горзöмсорöн ни баитö мужикыс.

— А миян, Спиридон, колхоз жö ни эд, — не то нерö, не то ошшасьö Степаныс.

— Натьтö, мöдкодь тiян колхозныт? — оз верит мортыс. — Вöвсö кöть, поди, од мырддьö? Кöть од тшыгьялö миян моз... Миян тай кулöм вöввесö ни сёйöны бы.

— Огö жö ышö кулöм вöввесö сёйö, — серöмтчис Степаныс. — Кöччес асьныс керкуас пырöны. Тöн Митрейыс öтiкö öшынсяняс лыйис... Колхоз миян, вонö, колхоз...

Мыля оз тшыгьялö, веськыта эз висьтав, сюсö мымда вермисö, сетiсö государствоас, аслыныс колисö только кöдзыссö. Поди и умöль луныс вöтiс бы, да Степаныс юрöн уджалö: тулыснас гöрисö да кöдзисö вöр коласiсь ылiсь ыббесö — ошыс позö чапкисö сюсö, арнас вундiсö, дзимлялiсö, и некин оз тöд, что тиминса няньсö сёйöны кытiськö вöр коласiсь...

— Тiян, натьтö, мöдкодь колхозныт, — ассис пыкö Спиридоныс.

— Гленитчö кö, лок, но... Пондас ковны ой и лун уджавны.

— А ме мый? Ог я мый я ой и лун уджав? Эх, Степан! Мортö ни эд пондö пуктыны Спирьясö!..

Посадiсь Тиминаö локтiс Спирья, сы бöрсянь вöтчисö эшö морт-мöд. Степаныс кодя, чукöртö ас гöгöрас отирсö, кöда сiйö оз орддьы, а кöда орддьö, ачыс тöдö. А Митрейыс мылякö кымöртчис, бытьтö сылö Тиминаын овны лоö дзескыт уна отирыскöт, оз тöр вöрас, мöдöрö баитö:

— Степан, а Степан... Оз я Спирья коддес миянöс юрöн-кокöн сёйö? Да-а-а...

— Тэ пов, а ме ог.

— Да-а-а, — ружтö Митрейыс.

Медодзза тöвсö Тиминаын олiсö кык семья, а тулыснас мужиккес эшö тшуписö керкуэз. Кайез сьылöны, отир паз уджалöны, а Митрейыс пондiс асныравны — пишаль да вöр, талун эм, ашын абу.

— Митрей, миянöс яйнас верд жö, — Степаныс öтпыр отирыс дырни горöтчис соседыслö.

— Мун да вий, вöлись и сёй, — кывнас шлячкис-висьталiс Митрейыс.

— Тэ мыля сэтшöмыслiсь коран?! — Митрейыслöн иньыс пондiс баитны Степаныскöт. — Сiя менö яйнас оз верд, а ышö тэ бы сёян...

— Ась сэк ачыс сёйö... Видзöт кыдз, беднöйка, умöльтчöм — лы да кучик кольччöмась...

— Мый сылö лоас? Пызаныс сайö пуксяс, вожасяс пон моз нянь чöвпаныс вылö и пурö... Кытчöдз быдöс оз сёй, оз чеччы... — норасьö Василисаыс.

Ась Митрейыс котрасьö пишальнас, ась... Видзöтам, мый пондас сёйны арнас...

Митрейыс тулыснас унажык пондiс котрасьны пишальöн, а мужиккес гöрöны: таво бороздаын уджалöны вит вöлöн ни, витнанныс öтiк лекаын... Шутнялыштлöны мужиккес, тэрмöтöны вöввесö, некöр нылö кывзыны, кыдз сьылöны кайес.

Митрейыс вöрсянь петiс пишальöн, сувтiс межаö, видзöтöв-керис, кыдз уджалöны мужиккес, горöтчис Степаныслö:

— Кытчö тэрмасят? Уджалат одзся-одз... Бороздаöттяс ышö шор визывтö, а тi гöрат... Видзчисьыштiт бы, косьмис да вöлись...

Степаныс шутньöвтiс вöлыслö, топ эз и адззы Митрейсö.

— Да-а-а, — ружтыштiс Митрейыс. — Сэтшöммескöт уна няньсö он сёй. Асныраэскöт... — иньдöтчис гортö, шупкис пишальсö полатьö, кутiс вöв и кайис ыбыс вылö, но гöрны сувтiс торйын.

Гажа. Кайес сьылöны, шоррез больгöны, межа дорын пиксö сьöла, бöбöтлö Митрейсö, тшöктö ветлыны гортö, босьтны пишаль да, локны татчö пишальнас, но öнi мужикыс кайесö оз ни кыв, шутньöвтö да шутньöвтö вöлыслö, öвтышалö шатьöн.

Мужиккес гöрисö павжунöдз, вöввесö эз и шоччöтö. Павжуннас дыркодь узисö межаын, вердiсö Буланкоэзнысö да Воронкоэзнысö, а Митрейыс гöрис: вöлыс люзь вамис, сiдз пымалiс, но шатьыс сiйö и керис öвтчис Чалöйыс спина вевдöрын. Этадз кö быд лун уджавны, натьтö, Чалöйыс дыр оз тырмы, усяс коккес вылiсь...

— Эй, Митрей, шоччöт вöвсö! — Спирьяыс ыкöстiс мужикыслö, но сiя бытьтö эз кыв ёрттэслiсь баснисö, шутньöвтiс да вачкис вöлыслö.

— Мед асьсö нярьялö, — висьталiс Степаныс. Мужиккес шоччöтiсö вöввесö, одзлань пондiсö гöрны, и Митрейыс гöрис. Рытнас, шондi пуксян гöгöрын, мужиккес юскисисö.

Вöввес мыдзöсь, кынöммезныс жмитчисö, а Митрейлöн Чалкоыс нач сырсмис, но хозяиныс рад, локтiс бригадирыс дынö, висьталiс:

— Бригадир! Меряйт кин да мымда гöрис. Натьтö, эд менам гöрöмыс унажык.

— Ог тöд, — гажтöма шуис Степаныс, босьтiс сажень и пондiс меряйтны гöрöмсö. Меряйтiс, кин мымда гöрис, горöн лыддис соткаэсö. Петiс, что öтнас гöрöм семьдесят пятьö, а артильöн шестьдесят.

— Вот кыдз колö уджавнытö! — сэтöн жö ошшасьö Митрейыс. — А тi... Да-а-а...

— Ашын бöра торйын сувтан? — ёртныслiсь юалiс Спирьяыс.

— Сувта. А мый?

— Нем абу...

— Кывзö, челядь, ме талун вöрас яй кери... Поди, ветлам да ваям? Сьöкыта эд уджалам, яйсö сёйыштам и кокнитжык лоас.

Некин нем эз шу, пуксисö вöввез вылö.

Сьылöны да уджалöны тиминса: будденьö — удж, праздникö — гаж. Кыдз праздник, грех уджавны: кöть кытшöм страда — шоччисьöны. Степаныс туй мортлiсь небис тальянка, учöт, но гора гармошка. Кыдз босьтас киас гармошкасö, паськöтас да чарöтас, öдззас орсны, пöрись и том чеччöвтöны йöктыны, изöны куль пизьсö сэтчöдз, что вывсиныс ньылöм вотялö. Уджалöны отирыс и гажöтчöны. Мыйöн бы гажöтчыны, кöр сьöкыта уджалöны и юрныс винаöн оз кольмы? А гажöтчöны эд, натьтö, гажнас вермöны мыдзсö, кыдз, тай, шуöны ой тöлыс пö лунся тöлыскöт вермасьöны.

Сьöкытöсь годдэс. Усолье туй кузя городлань кыссьö отир. Нiя тшыгöсь, нiя мунöны кошшыны нянь и мунтöнняныс кулöны. Кулöны туйын йöз отир и посадын ни кулöны асланым, но учöт деревнясö кыдзкö тшыгыс орддьö, отирыс пöтöсь и радöсь. И кытiсь Тиминаын гажа оланыс, кин нылö этö козьналiс? Мöдiк я мый я татöн светыс?

— Уджавны колö, ёрттэз! — гардыштö сьöд уссэсö Степаныс: дзирс пемыт чеччö, медодз доддялö вöв и ыб вылö кыскö назём. Одзся-одз быд лун пондöтчö уджавны бригадирыс, и колхозниккеслö стыд кольччыны Степаныс сьöрись. Уджалöны тиминса пöт и сёйöны пöт — вот тэныт и секрет, сэтöн и нянь, но Митрейыс жö ошшасьö:

— Колö кужны овны, пальнишана! Да-а-а... Кужны овнытö... Мый разь ми ог кужö овнытö?

Или юррезным мöдкодьöсь? Или киэзным не сэтшöмöсь? Или олам мöдiк светын? Кöть мый, Митрей, но Тиминааныт мыйкö не сiдз... Натьтö, тi этö... Од я сэтчин гусясьö али разбойниккезö пöртчывлö? А мый? Вöрын эд олат...» — пальнишанаыс жö баитöны тиминса йылiсь, но и ась баитöны, кыввезныс вылö эд гадьыс оз кай...

Олöны отир. Деревняыс учöт, но дружнöй. Уджалöны, гажöтчöны и оз адззö, кыдз чулалö кадыс: вежсьöны тулыссэз да аррез, гожуммез да тöввез. Чужöны и быдмöны челядь. Ыджытöсь ни Степанлöн Иваныс да Борисыс, сьöрся-бöрся зонкаэс. Кыкнанныс чожöсь: лабич дорсянь вöввез вылö лякасисö, отсасьöны ыджыттэслö гортын и ыб вылын. Айыс пеллесö адззö, что сылöн быдмöны зоннэз, а зыбкаын чирзö ни Роман, кöда бöра жö ыджыт öма, топыт яя да ылöса, кужö ни шуны айсö айöн и мамсö мамöн, а мамыслöн быдмö виль кынöм.

Степаныс кужö ыб вылын уджавны и челядь быдтыны.

А Митрейлöн быдмö Толя нима зон. Зонкаыс нач мöдкодь, нежели шуам Борисыс или Иваныс: лöнь мывкыда, пыр пукалö посöдзын да гуддисьö, то черöн керасьö, то пуртöн вундасьö. Толялöн эм учöтик вонок, сiя котрасьö ни лабич дор, уна оз жö баит, сэтшöм жö прока, воныс моз жö — чер да пурт.

— О-о, менам быдмасö богатыррез! — ошшасьö Митрейыс. — Не тэ кодь, Степан, антилигенттэз...

— Кытiсь тэ адззан интеллигенттэсö? — сералö Степаныс.

— А мый нö? Да-а-а... Бориссис разь петас уджалiсьыс, кöр сiя этатшöмсянь сьылö да йöктö, топ чиган и эм...

— Ог тöд... — шынь видзö Степаныс.

— Кывзы, Степан!... Поди, не менам Толяыс?.. Бокö эд бöра Василисаыс тальччöм, мда-а-а... Степан, а Степан... Эн жö тэ, поди, менам инь дынö сибав? А мый тэнчит босьтан? Бригадир эд...

— Аслам гортын эм, — оз лöгась бригадирыс. — Кытшöм каб, сэтшöм, натьтö, и нинкöм...

— Сiдз, — нютшкö табаксö Митрейыс.

Чожа быдмöны челядьыс: öтiккез лоöны ыджытжыкöсь, ны местö зыбкаö водöны мöдiккез.

11

Степаныс луннас уджалiс, а рытнас сы дынö посадiсь локтiс гöститны айыс. Важын ни зоныс эз адззыв Андриянсö, топ öтамöдныс дынсянь олiсö не сизим верста ылына, а сизимдас верста, кытчö шедны сьöкыт. Пантасьлiсö ая-зона и одзжык, но Андрияныс, кыдз казялас зонсö, ылiсянь кежлiс бокö — орддис Степансö, кыдз врагöс, а öнi пырис зоныс ордö, вожмöвтiс порогсö, здоровайтчис, юрбитiс енлö, пуксис лабичö и юалiс:

— Кыдз ни олат?

— Олам жагвыв, — висьталiс Ульяныс, эз тешитчы, эз лöгав, баитiс кыдз гöськöт.

Андрияныс одззакодь жö кыз, топ сыспуись пилитöм сира джек, рожабаннэс отаöсь — польдöмась, но синнэс топ ныжмöмась ни, рожаыс вылiсь öшöм югыт вирыс и горбыльтчöм кодь мортыс. Голосыс Андрияныслöн мыдз, бытьтö öддьöн ылiсянь локтöм подöн.

Керкуö пырис гöсь, кöть и кортöм, но асланыс. Зоныс рад и моньыс топ гажмис, но... Ульянлö недолыт: пессьö сьöлöмыс, места оз адззы, бытьтö Андрияныс абу батшко, йöз пырис керкуас, медбы бöра мыйкö сэтшöмö керны, мыйсянь пондан горзыны...

Кадыс тулыс. Гажа. Луныс шондiа и рытыс лöнь. Сьылöны кайез, син одзын быдмö турун да цветитöны цветтэз. Андрияныс юасис-керис, кыдз олöны да мый ни керöны, котомасис кыскис виöн мавтöм пирöггез (челядьыслö гöснеч), сьöкыта ловзисис, гöснечсö сетiс моньыслö, сылö жö сетiс чышьян, а зоныслö посöдзись пыртiс важ пишаль. Эз бы вöлö эна козиннэс, Андриянсö примитiсö бы кыдз колö, а сэтöн виль чышьяныс моньыслiсь топ сотiс киэсö: некыдз оз вермы вунöтны Ульяныс, кыдз кöркö тöвйис баняын, и кыдз сы вылö кöин моз уськöтчылiс батшкоыс да юрыс вылiсь кульыштiс бырöм чышьянсö... Öнi чапкис бы бöр козинсö, но кывсö курччöвтiс да терпитiс, эд Андрияныс, кытшöм бы эз вöв, но морт и асланыс.

Кайпоз вылын сьылiс сьöдкай. Керкуын чирзiсö челядьыс, топ нылö талун öтöрас нем лоис керны: гöснечыс вöлi чöскыт, и пишальыс Степаныслö бытьтö гленитчис.

Мужиккес пукалöв-керисö лабичын, тпру да ны — кыв-мöдöн чапкисисö и лöнисö: эз аркмы басниыс. Сэк Андриян пызан вылö торскис шкалик.

Öшын увтын цветитiс льöмпу. Тöн садникö садитiсö картошка и талун, кöть рыт ни, сьöдкайес сiйö и керöны: гöрöм му вылiсь öктöны гаггез. Тэрмасьö тулысыс, он и казяв, кыдз локтас гожум, а приметаэз сьöртi гожумыс таво кöсйисьö лоны бур, гажа.

Андрияныс пукалö зоныс ордын, ружтö, видзöтлö öшынöт öтöрö, ниртö оча долонь. Тöдчö эд, что мыйкö мортыслö не сiдз, не сiя, не сы моз, тыдалö, лöсьöтчö бы, поди, овны зоныскöт да моньыскöт, но оз эд вермы, или сылö оланыс оз гленитчы?

Кытшöм вöлi Андрияныс букали-пороз, кыдз отирыскöт эз лöсяв, сэтшöм и эм, оз куж веськыта баитны, оз юав зоныслiсь: «Но, кыдз, Степан? Мый нö керны? Быдöнныс эд колхозö пырöны, а ме...»

Моньыс пызан вылö вайис сёян, мужиккеслö висьталiс, медбы пуксисö сёйны. Андрияныс ружтiс-керис, вöлись пондiс баитны негорöн, кутчис висьтасьны, кытшöм колхозаныс оланыс — не олан, бессэз орсöны, öтамöдныслiсь быдöс мырддьöны, гусялöны, пышшöтöны, отирсö кольöны кöмтöг и пасьтöг, тшыгйöн! Мый пö эта лоö, Степан?!

Степаныс шы эз сет, бытьтö нем оз тöд, эз кыв, кöть тi пö Пальниканыт мый керö.

— Тöн, — лöга серöмтчис айыс, локтiсö гортöдз, горш бердö кутчисисö и пондiсö ыксыны: «Вай! Тэнат эм сюыс!» А кытöн сiя?! Ой и лун, тöв и гожум быдмö я мый я? Пизьö! — видзöтiс öшынö — öтöрас некин абу, серöмтчис, бытьтö горшас дзуртiс пöрись пу. — Ме эд, зон, мортыс абу бöрöн керöм. Тöда ни, кыдз колö овнытö... Кольöм кресенняö ойнас сюсö гортiсь дзимлялi... Дзеби. Сизим понöн кошшасö да оз адззö. — Гöрдöтiс, ыкöстiс. — Буржык лоас, кöр, няньыс сiсьмас муын, но сэтшöммеслö ог сет! Кыдз думайтан, зон?!

Бöра шы эз сет Степаныс. Сiя эз радейт айсö, но сэтöн жö и жаль Андрияныс, кöр ой и лун уджалö, уджалö, а кинлö да мыйлö? Талун эм, ашын абу... Локтасö, мырддясö, и кыдз верман, сiдз и ов, кöть тшыгйöн кув... Не сiйöн я кулöны отирыс, что мый вöлi, эз вöв, быдöс нылiсь мырддьöны?..

— Поди, тэныт, зон, сюыс колö? Доддяв вöвсö да ойнас лэдзчыв. Кайöтан, мымда верман. Сiдз жö эд понлö да порсьлö...

— Эг на тшыгьялö, — айыс дынiсь комлань бергöтчис зоныс и медучöтыслö ыкöстiс. — Вешшы дедыт дынiсь!

Челядьыс орсiсö ыджыттэс гöгöрын. Дедныс малыштiс быдöнныслiсь юррезнысö, пешлiс юрсиоккезнысö чорыт кинас да висьталiс: «Кыш, буссэз!»

Учöттэс — кинлö кытчö туй, шы керкуас эз ло.

Пуксисö пызан сайö, пондiсö сёйны ая-зона, пешлiсö вина, мед вöлi отир моз жö, кыдз айлöн да зонлöн — роднöйöсь эд!

Ульяныс бергалiс комын, кылiс и эз, мый баитiсö мужиккес.

— Отир моз жö, — мурзис Андрияныс. — Ой и лун, зон, мырси... Заптi. А кинлö?! — чышкис долоньнас син дорсö, ружтiс. — Кинлö, зон, висьтав?! — нетшкöвтiс рыжöй тошсö, синнэс югьялiсö варышлöн моз. — Тiян понда жö бы... Тэныт... А тэ!.. — гичыртiс пиннесö, унньöвтiс, öмас заргис няньтор и пондiс аклявны.

Зоныс юрнас гогинялiс, нюмралiс öмсö, кывзiс, ружтiс да мыччалiс кулаксö челядьыслö, кöдна бöра ни вунöтiсö, что нылö оз ков жöдзны джоджас. Айыс сёйис и адззис, что зоныслöн сы дынö сьöлöмыс сайкалöм, сё кöдзыт, что кыввес Степаныс дынöдз оз локтö, и Ульяныс комсис оз мыччась. Андрияныс модис-керис, сьöлöмыс бергöтчис мöдöрö ни, сайкалiс ни бöр Степаныс дынö, лöгасис да ыкöстiс:

— Колö тэныт сюыс?!

— Меным? — Степаныс кыдз öшис пызан сайын.

— Кинлö нö ышö?! Ме эд талун эм, ашын абу... Гробам оз пуктö, а колхозыслö?.. Не, зон! Мед быдтöны да сёйöны ассиныс! — няпыртiс кулаксö, гичыртiс пиннесö и веськыта пондiс видзöтны Степаныс синнэзö.

— Мый ме, ая, сюнас кера? — гажöн ни висьталiс Степаныс. — Миян асланым тыр. Тöн куим телега бöра посадас кыским, мед отирыс сёйисö. Видзöт, тшыгйöн кулöны...

— Юртöм öнджа тэ... — сьöкыта ловзисис Андрияныс, пондiс буржыка вежöртны, что зоныс ылö ни кежöм сы дынсянь, вешшöм, и нем сыкöт лёбны, но Степаныс зон эд, а айыслö колö бы велöтны ассис кагасö — тувдыны да иньдыны.

— Эх, Степан! Ме бы... Öтiк тусь бы тэ местын эг сет! Сэтшöммеслö... — серöмтчис асмознас: поснита, топ кисьтiс ведраö шыдöс. — Кöдна тöвсö чужьялöны... Оз уджалö, а чöскыта бы сёйöны... Видзöт, колхоз чукöртöны, — нерис. — Колхоз... Öтласа удж пö... Висьтав, кыдз öтлаын уджавны, кöр тэ том, а ме пöрись, тэ вына, а ме мый? Эх-то, да... Сэтöн и эм, ми тэкöт, ай да зон, öтiк пызаныс сайын öтамöдным вылö пиньласям, ог тöрö керкуас, а колхозас, зон, отирыс — баля табун эд! Öтiк пондас садь быртöдз уджавны, а сизима — сёйны да весь овны и уджалiссесö жö серавны. Он верит пöрись айытлö?! Ачыт, мыся, тöдан... Айыт, зон, весь оз куж быздынытö и тэнö умöля овны оз велöт... Ме, поди, мыся, талун-ашын... Виясö да чапкасö кытчöкö кöз увтö, а тэныт овны... Син одзат лоас оланыс, тöдвылат, бат, кöркö айытлöн кыввес усясö, эн вунöт!

— Ая! — öмалiс бы айсö Степаныс, но Андрияныс кылiс да эз зонсö, лёкжыка шуис:

— Колхозыскöт менам туйыс янсалö, зон! Мед нiя и олöны пода моз и сёйöны кулöм вöввесö. Мед!

— Ая, а мыля бы тэныт колхозас не пырны? — юалiс зоныс. — Тэ эд ошшасян богатствонат, а ветлöтан нинкöммезöн жö... Или вöввет жальöсь?

— Кинлöн?! — серöмтчис Андрияныс. — Синькоыс да Гнедкоыс... А тэ думайтан? Абу нiя меным жальöсь, кöр ме нiйö быдтi, кыдз тэнö жö, и мöссэс... Слава богу, кыкö чилькöта, да баляэс... Кинкö нiйö меным козьналiс я мый я?! Ачым эд быдтi! То эна киэзöн! — мыччис чорыт да гадьöн тшыкöтöм долоннесö. — Эта мый?! Кинкö йöз меным уджалö, сiдз? Сiйöн айтö и колö разьны?!

— Уна поданыт да зоннытлö некинöс эд сетö! — комас чирзыштiс моньыс. — Зоныт эд тэнат жö...

— Тупкав öмтö! — Степаныс ыкöстiс иньыслö.

Эз вовлы татчö Андрияныс и эз бы ков локны сто год, медбы сылöн татöн дукыс эз вöв, но мый керан, кöр петас сэтшöм лёк лун? Терпитiс кытчöдзкö Степаныс, ружтiс, но видзсис, а айыс кеймисис ни:

— Степан, мамыт шогалö. Юöр иньдiс... Мед пö зонным миянöс öбидаö оз сет. Надейтчам тэ вылö, зон... Кывсьö, что тэ пö сельсоветаныс бöрйöмовöй жö. Начальник бытьтö... Он жö эд чапкы аймамтö.

Сьöкыт Степаныслö, кывзiс айсö, паныт лыйис-висьталiс бы мыйкö сэтшöмö, мед Андрияныс петiс керкусис, но видзсис: кыным айыс баитiс лёкжыка, сыным зоныслö сiя вöлi жальжык. «Ай эд... Но мыля сiя сэтшöм?! Мыля оз вежöрт, что Совет властьыслö нем ни ордавны паныт? Мыля кежö отирыс дынiсь?»

Мужиккес баитöны — öтамöднысö дойдöны: эз вöв оланыс ая-зона коласын и оз ло.

Ульяныс комын, сiя гардчö гор гöгöрын. Сьöлöмыс пессьö, чеччалö. Дзескыт лоис гортын, пышшö бы керкусис, петö видззес вылö, кытöн öнi сэтшöм гажа, что и рытнас бы гортö он пыр: öкты пиканнэз да кывзы, кыдз кöкыс кöкö, кыдз больгö-визывтö гажа шорок, сьылöны каёккез.

Öтöрас пондiсö пурсьыны поннэз, чирзiсö челядьыс. Пукалiсö мужиккес пызан сайын, сэтöн зоныс айыслö и висьталiс:

— Ая, ме тэныт немöн ог вермы отсавны!

— Сiдз, зон! — нырнас пишкыштiс мöдыс. — И мыйлö ме тэнö быдтi?! Шогмин гаг кодь... Сэк жö колiс юрыт вылö тальччыны, öнi сьöлöм бы вöлi местаын...

Степаныслöн чужöмыс эз вежсьы, мывкыдсö эз öшты.

— Батшко! — моньыс дрöжитö ни комын. — Батшко!..

Андрияныс швырк чеччис пызаныс сайись, юрыс вылö пуктiс колпаксö, мурзьыштiс, кокнита чывкйыштiс порогыс дорöдз, брынгис ыбöсас и петiс.

— Кольлав айтö! — синваэспыр горöтчис Ульяныс. Степаныс дыш вöв моз тальччö и оз, петiс посöдзö, но айыслöн следыс ни сайкалöм. Кинкö чарöтiс-лыйис Лолымлань.

12

Тиминаын сулалiсö кыкдас керку. Одзлань отирыс эз содö. Кык семья эшö чинiсö: повзисö номмезiсь да бöр пышшисö овнытö посадö. Ась нiя мунöны, кöдна сюраöсь, оз лöсялö отирыскöт, кошшöны кокнитжык удж, а тиминса велалiсö ни сьöкыта уджавны да ошшасьны, что олöны богатöя. Нiя и зверрескöт кужöны овны: велалiс подаыс дынö ош, ветлöтö вöрас öтлаын, а рытнас мöссэскöт локтö зэв картаэс дынöдз, только син одзö оз мыччись.

Арнас, лымыс усян панытö, кöда годö зоныс дынö вовлiс Андрияныс, ошыс джагöтiс Степаннэзлiсь мöснысö. Мырддис зверьыс челядьыслiсь йöв, семьялiсь юрвердiсьсö. Бöра беда вöтiс Степаннэсö, бöра Ульяныс горзiс да видiс Андриянсö, норасис, что батшкоыс весь татчö эз вовлы: пыртiс керкуас синва.

Мужиккес ошсö лöсьöтчисö лыйны, но Степаныс жö падтiс: «Челядь, пишаллезнаныт эд орсö! Зверьыс абу морт, оз вежöрт кинлöн мöсыс, кöр кынöмыс сималö. Поди, эшö не сiя зверьыс, кöда гожумнас олiс подаыскöт? Вовлiс кытшöмкö горттöм шатун, и на!..

Сiдз, бригадир, но аслат эд сьöлöмыт дзирыт ваын: кывсьö, что вöррезын пондiсö öвтчыны зверьыс кодь жö отир — пышшалiссез. Банда пö... Вот эд кытчöдз олiм! Тиминаын инькаэс öтнаныс эз пондö лысьтны петны керкусис öтöрö.

— Мый тi и полат? — Степаныс сералö инькаэсö.— Бандиттэс, поди, сэтшöм жö отир! Оз жö миянöс сёйö.

— Отир... Адззöмыт отирсö, кöдна Совет властьсö ни онняюртöны бы. Кылiн?! Васькинаись петкöтöмась пö лавка...

— Менчим нем гусявнытö, — сералö Степаныс.

— Тэ пыр ассит! Нем гусявнытö, но медодз тэ бердö кутчисясö, кыдз бригадирöс адззасö, — гардö бригадирлöн иньыс.

— Дугды! Сьöлöм гудыртчö баснисянят, — мужикыс падтö иньсö.

Быль, Степаныс кылiс ни, что Васькинаись петкöтöмась лавкасö, и тöдiс, кин сэтчин ойнас уджалöм, асланыс жö эд отирыс пö вöлöмась... Враггез...

Дзугöны олансö, а мый понда? Быдöс эд му понда, кöда жаль, некин бы колхозас оз пыр, оз сет мусö, кытчö кöдзис и быдтiс сю. А, поди, мырддясьöны ни паньбекöрöн? Мый бы эз вöв, но олансö сорöны, дзугöны, öтамöдкöт пурсьöны, бытьтö сэтшöм ни богатöя олöны, что öтамöдлiсь быд торыс понда пондасö горшшезнысö орлавны... Степаныс оз вежöрт отирсö, кöр Тиминаын отирыс öткодьöсь — некытшöм беднöй не богатöй абу, быдöнлö öтмоз. Эмöсь кытöнкö бандиттэс и ась, а Тиминаын луннас уджаласö пöт, а ойезнас шоччисьöны. Сiдз вöлi тöн, а талун Степанлö кывсьö ни, бытьтö пö айыс пöртчöм бандитас — этö висьталiсö сельсоветын, кöр ветлiс Пальникö. Медодз эта йылiсь эз бы верит бригадирыс: кытшöм бы эз вöв айыс, но бандитö пöрны... Кыв оз бергöтчы, и пель бы оз кыв... «Быль кö сiдз, Степан? Быдöн эд пондас синö бытшкыны, быд шагын шуны, что, Степан, бур мортö бы пуксян, бытьтö тэ и эм — бригадир! Пыр тэнö ошкöны, быд собраннёö корöны, а тэ... Айыт бандит... Мый нö ни керсьö? Мыля рокыс соровтö олансö? Эз пыр колхозас тятьыс и эз... Бытьтö сытöг колхозыс оз вермы овны... Кыдз сiйö öтлаö шатьöн бы вашöтiсö... Но и асныр! Но и бес! Кут бы да мый бы и кер!» — унажык ас пондасис, а не айыс понда тöждiсьö Степаныс.

Тöдвылас сiя, кыдз вовлiс Тиминаö, кыдз пурис колхозниккесö: «Буссэз! Дзугитö олансö! Не-е-е... Ме колхозас ог пыр! Сюсö ог сет, мед быдöнныс тшыгйöн черпезьдöны!» Ачыс кошшис, медбы пуктiсö контрибуция, кыдз кулаклö, ачыс ас вылас кытсалiс гым кымöрсö, эз вешты контрибуциясö и на... Гортас локтiсö кошшисьны да додьтыр адззисö сюсö, кöть Андрияныс и ошшасис зоныслö, бытьтö сiдз дзебис няньсö, что нельки ачыс оз адззы.

Адззисö дзебöм сюсö Андрияныслiсь и юалiсö: «Эта мый?!»

— Сюыс не менам! — сьöдöтiс Андрияныс. — Зонöлöн няньыс. Сiя идсö гусьöн ваялiс Тиминасис да этчö тыртiс, а öнi ме вылö бы кышалат... Нöбöтö! Абу жаль. Не менчим нöбöтат. Ась коммунисыс горзö. Сiя тiян кодь жö, пон кулись: рака ракалiсь, поди, синнэсö оз кокав.

Гажа луныс вöлi, но Андрияныс зоныс весьтö павдöтiс нятьöсь рузум, и Тиминаись бригадирсö луншöрнас локтiсö да нуöтiсö гортсис. Степаныс эз ешты некинлö кыв горöтчыны. Вöлi бригадир да öтiк лунöн пöрис врагö...

Тиминаын оланыс кымöртчис, отирыс медодз дзик öшисö, кöть и уджалöны, но быдöн думайтö: «Мыйлö бы?! Оз я Пальникас жö кыдз локтö да мырддьö быдöс, мый эм и абу?»

— Челядь! — Митрейыс жö юрсö öвтö. — Челядь... Уджалам, уджалам, а кыдз бригадирным сьöрö быдöннымöс нуöтасö? Разясö öтiк лунöн Тиминанымöс и быдöс сэтöн!

— Митрей, тэ кывтö, батя, кузя эн видз! — Спирьяыс падтö Митрейсö.

— Да-а-а, — ружтö Митрейыс. — Некытчö ог мунö да нем ог тöдö, а ме ветлi Кöсöдззас да тöдат жö мый кылi... Бытьтö пö Гришинасис отирсö джын деревнясис ни нуöтöмась... Не след, не юöр... Кытчö и воштöмась. Öнджа..

— Тэ рака моз эн карзы! — Спирьяыс öмалiс Митрейсö.

— Мый рака моз?! Ме эд ас йывсим ог висьтась! Мый эм, сiя и эм.

Неделя гортын бригадирыс абу. Некин оз тöд, кытöн Степаныс. Синваöн миссьö Ульяныс, олö челядьыскöт и оз тöд, мый керö, кыдз чулалö ой-луныс. Тиминса сiдз жö öшисö, бытьтö кинкö да мыйкö нылiсь гусялiс, оз тöдö, тшупöтчыны или вартны, назём кыскавны или вöрö мунны. И ло жö сэтöн сэтшöм притча: луннас вартiсö да тöлöтчисö, уджалiсö сёрöдз, но гунаыс вылiсь сюсö быдöс эз вермö дзимлявны, куралiсö мешöккезö и долоньыс вылö колисö.

— Мый сылö лоас? Кин вöрзьöтас?! — Митрейыс жö баитiс инькаэскöт. — Колям ой кежас, а ашын локтам да дзимлялам.

— Ог тöд... — кыдз одзлань тöдiс Спирьяыс.

— Мый он тöд? Пыр этадз, да некин эшö эз гусясь, а öнi, бытьтö, эз ни понды туйны сюсö гуна вылас кольны? Колям, инькаэз! — ассис пыкис Митрейыс.

Вит мешöк колисö гуна долонь вылас. Ашынас Митрейыс жö пемытöн кайис тшупöтчыны, видзöтö: сюыс мешöккезнас абу... Сэтöн мужикытлöн юрсиыс шапкасö и лэбтiс, вöлись кынöмыс и пондiс висьны. Митрейыт öшис, пондiс чупкöтны тырппезнас: «Да-а-а... Вот... Öнджа эд... Мый нö эта лоö?! Мыля? Этатшöмсö тай Тиминааным эг адззывлö и эг кывлö, а сэтöн... Митрей!.. Пондасö кö шуны, что тэ гусялiн?! Да-а-а...» Сэк жö гуна вывсянь бöр котöртiс гортö, пырис

Ульяннэзö, ышки-пойки ыбöсыс дорын жö пондiс норасьны: «Ульяна... Тöдан жö мый? Беда эд бöра миян... Сюсö гуна вывсис гусялöмась! Да-а-а...»

Ульяныс бергалiс гор гöгöрын, кылiс мужикытлiсь энö кыввесö, медодз эз вежöрт, мый Митрейыс висьталö, видзöтiс кыдз йöз вылö.

— Сюсö, мыся, гусялöмась! — ыкöстiс Митрейыс.

— Кин?! — вöлись повзис Ульяныс, саймöтiс челядьсö.

— Кикоксö абу кольöма да...

— Ой-ой! — киэсö пондiс öвтны Ульяныс, сiдз повзис, бытьтö ассис чомсис нöбöтiсö пизьсö, кöда вöлi джын мешöк етш.

— Вот сiдз, — юрсö öшöтiс Митрейыс — Поди, ме вылö пондасö шуны? А ме еныс одзын верма юрбитны... Локтi, адзза сэтшöмсö и бöр!

— Мыля жö бöра тэ вылö пондасö шуны? — Ульяныс жöдзис джоджыс шöрын.

Öтöрын югыт ни. Спирьяыс ни локтö Ульяннэзö, медбы юасьны, мый талун пондасö уджавны, бытьтö Ульяныс бригадир, кольччис мужикыс местö, бытьтö сэсся некинлö Тиминаын бригадиравны. Пырис Спирьяыс, здоровайтчис, пондiс серавны:

— Миян поныс талун ойнас стрась вувтiс. Кöиннэз я мый я ветлöтiсö? Заргисьöм посыс увтö и час сэтчин. Ыксi и мый, оз пет.

— Кык кока кöиннэс... — гажтöма шуис Митрейыс.

— Кык кока кöиннэз асьнымöс и поннэсö сёясö, бытьтö шогалiс Ульяныс да баитiс мыдз голосöн. — Гусялöмась эд гуна вывсис сюсö...

— Мый тэ сiйö баитан?! — повзис Спирьяыс.

— А вот... Кайи тшупöтчынытö, видзöта тыра мешöккес абу. Да-а-а... — куритiс ни Митрейыс. — Поди, ме вылö пондат шуны?

— Сё ассит... Эн гард, мый оз ков! — Спирьяыс лöгöн висьталiс Митрейыслö, Ульяныслiсь жö бöра юалiс. — Мый пондам керны?

— Мый керны?! — кыдз йöз вылö пондiс видзöтны Митрейыс. — Мый тэ сэтöн керан? Колö кошшыны сюсö! Абу эд сiя содз мымда, а вит мешöкся унажык вöлi. Асланым...

— Кытiсь кошшынытö? — эз вежöрт Ульяныс.

— Кытiсь? — гажöн юалiс Ванькаыс, кöда чеччис полатись, миссис ни и пондiс баитны ыджыттэскöт, топ быдöс тöдö, — бандиттэс жö эд гусялiсö.

— Бандиттэз... Асланым жö пöртчасö бандиттэзас и уджалöны, — сьöвзис Митрейыс.

— Ой кытшöм олан локтiс! — шуис Спирьяыс. — Вöлi бы Степаныс!..

— Мый бы сiя тiянлö эстöн керис? — эз вежöрт мужиккесö Ульяныс.

— Мый бы керис? Сiя эд миян бригаде-е-ер... Мыйкö бы сё ни керис, — баитiс Митрейыс.

Эта коста öтöрас югдiс öддьöнжык. Бöра лёка вувтiс поныс Спирьяыслöн, Ульяннэзö пондiсö локны тиминса, том и пöрись, бытьтö колхознöй правленнёö, медбы юасьны-висьтасьны да мунны уджавны.

— Кöть мый, челядь, а мыйкö колö керны, — медбöрын висьталiс Спирьяыс.

— А мый керны? — челядь моз баитiс Митрейыс. — Овинсö ме тшупöта, а тi?..

— Мый ми?! Сю пондам ваявны да вартны, но эд тыра мешöккес абу! — лёка баитiс Спирьяыс, вирскайтiс кузь да йыла нырнас.

— Чёрт ныкöт! Абу и абу мешöккес, — сэтöн Куличика старуха пондiс рочöн-комиöн ректасьны. — Мый тi мешöккес понда и горзат ни? Вартам да тöлöтам, вот тiянлö и сю. Степансö колö кыдзкö мездöтны! Тöдат эд... Гришаыс моз жö кытчöкö воштасö бригадирнымöс и абу, быд лун пондат эстöн овны, кыдз öшöмöсь.

— Но да, сiдз тэ и Степансö мырддян ГПУ-сис? Видзöт, кыдз бы асьтö эз нуöтö, али этö... Быдöннымöс чышкасö, и оз ло Тиминаным, — Спирьясö ни полöтiс Митрейыс.

— Кузьöв кылыт, Митрей... Натьтö, сiйö тэнчит чинтасö жö кöркö...

— Ась чинтöны! Мый тэ сы понда горзан? Тэ ас пондасит горзы, — виль чигарка гардiс Митрейыс.

— Сунавны кö пондам, быдöннымöс сьöвталасö, — Куличикаыс жö смела лыйлiс кыввезнас.

— Öнджа... поди, челядь, доддявны вöввесö да ветлыны сельсоветöдззас? А мый? Мунам и юалам, кытöн бригадирным, висьталасö жö, — видзчисьтöг гардыштiс Митрейыс, повзьöтiс ёрттэсö, кöр быдöн вежöртiс, что Степансö сельсоветас öнöдз оз видзö, и сельсоветыс, натьтö, нем оз вермы керны.

— Ог тö-ö-öд? — эз тöд, мый этчö висьтавны Спирьяыс.

— Мый тöднытö! Сельсоветыс кин? Не миян я властьыс или мый, инькаэз? — асланяс кыскис Митрейыс. — Мунам артильöн и быдöс сэтöн! Быдöннымöс оз судитö, а судитасö кö, пукалам. Гажажык лоас табунöн сэтчин.

Мужиккес чапкасисö кыввезнаныс, вермасисö, мунiсö и эзö бы сельсоветас, полiсö и эзö лёк отирись, кöдна уна ны кодьыскöт оз баитö, вермасö нуöтны гортiсь, но не быдöннысö жö! Или быдöннысö?

— Ме муна! — сэтöн петух моз юрсö чатыртiс Куличика старуха. — Ветла! Мыйись-мый... Сымда ни ола, ог жö кык век енсö понды нерны? — петiс керкусис да веськыта иньдöтчис дворлань.

— Мый нö, мужиккез? — топ стыд лоис Спирьяыслö. — Сiдз и пондам пукавны?

— Мунам старухаыс сьöрö, — висьталiс Митрейыс и чеччис западня вылiсь.

Том и пöрись, тиминса мунiсö да артильöн доддялiсö вöввез, пуксисö телегаэзö и вöрзисö Пальниклань. Луныс оссис кымöра, ыркыт да уль. Кельдöтöм луд вылын, говмöм пуэз вылын, увдöрын и вевдöрын öшалiс кыз лысва. Нять. Вöввес мунöны да ружтöны, ружтöны телегаэс вылын и тиминса, шутнялыштлö Митрейыс, нырнас вирскайтö Спирья, Куличика старухаыс видзчисьтöг пондылiс сьывны чиння голосöн, но дзугсис.

— Мый сiя? — кыдз повзис Спирьяыс. — Код я мый я или дзугсис оланнас? — Баитiс старухаыс йылiсь, полiс, топ сiдз кинкö вöрöт мунтöн уськöтчас кöззэс увтсянь да кыскас телегаыс вылiсь.

Ружтiсö вöввез, гажöн котöртiсö поннэз, сувтчылiсö туйыс бокын да одзлань. Матiсь Кокорник ыб вылын Митрейыс сувтöтiс вöвсö, гажтöма видзöтiс-керис одзлань да Спирьяыслiсь юалiс: «Кывзы, поди, бöр бергöтчам?»

— Повзин?! — серöмтчис мöдыс.

— Эг повзьы, но меным талун колiс бы видзöтны лось петляэз. Вöтаси, бытьтö ыджы-ы-ыт кышасьöма. Тшыкас яйыс...

— Ачыт тшыкан! — серöмтчис ёртыс. — Öтiк луннас нем оз ло яйыслö, адззан кöдзыт...

— Да-а-а, — öмсö тупкалiс Митрейыс, вачкис вöлыслö шатьöн, сьöвзис, öзтiс чигарка, чужöмыс — бырöм нинкöм: сэтшöм жö тоша-уса, сiдз жö нятьöсьмöм или думаэссянь лöзöтöм — он вежöрт.

Пальникöдз туйыс нятьöсь, гуа-гöпья. Сельсоветö локтiсö луншöр гöгöр, сувтöтiсö öшын увтö вöввесö, домалiсö йöр бердö, топ цыганнэзлöн табор, только паськöмныс сьöртi и тöд, что отирыс татiсь, некин сэсся сэтшöм нинкöммезнас оз ветлöт.

Куличикаыс пернапасасис, гажöн горöтчис: «Но, мужиккез! Мый нö?» «А мый? — öшис Митрейыс. — Кöть мый...» — пондiс гардны чигарка — кыскис кадсö, медбы кинкö пырис одзас, но не сiя, не сылö кымöссö мыччыны начальствоыс одзын.

Спирьяытлöн бытьтö пöрччассис кокыс бердiсь нинкöм воньыс, мышкыртчис да пондiс гардны виль нямöтыс бердö виль гöрд воньсö.

— Мужиккез! — пыдына ловзисис Куличикаыс, тальччис нинкöмнас ва гöпö и веськыта ни мунiс сельсовет посöдзлань.

Тиминсалöн да пальнишаналöн поннэс кутчисö пурсьыны — гöн тöвзьö! Кинкö тиминсалiсь юалiс: «Мый нö талун? Кытчö сiдз? Свадьба я мый я?» «Свадьба, — мурзьыштiс Митрейыс, кöда отирыс коласын гардсис, сiдз и кайис сельсовет посöдзö отирыс коласын и пырис керкуö, здоровайтчис, пондiс видзöтны тöдтöм да лёк чужöма мужик вылö, кöда пукалiс сельсоветын пызаныс сайын, сёйис-видзöтiс локтiссес вылö и юалiс:»

— Но?!

— Дак мый но? Дак эта эд! — смела, веськыта шырзис рочöн-комиöн Куличикаыс. — Понимаешь ли, господин начальник... Это самое... Где у нас бригадер?! Куда Вы его дели? Почему забрали и ни слуху ни духу?! Как это сегодня называется? Или бога совсем не стало, али Христос ышö не умер? Скажи, мне товарыш начальник? Хочем бы знать всем миром, ту есть, всем колхозом...

Митрейыслöн сьöлöмыс сiдз и чеччалiс моросас, сiдз и петiс öмöттяс, сiя мыйкö бы содтiс жö ассис, но видзсис, кывзiс и надейтчис Куличикаыс вылö, мыйись-мый... Абу дак абу старухаыс, кöр сылöн талун-ашын...

— Во-первых!..— чочкоммис пызан сайын чужöмыс тöдтöм мужикыслöн. —Во-первых, я вам не господин, а товарищ! Во-вторых, кто вы такие? Чо за табор? И откуда бы, хочется знать, а то, понимаешь ли, ходят тут сейчас сякие... Которые, это самое... Мы можем, это самое, с бандитами разговаривать короче.

— Какие такие, то да сё, это бандиты мы?! Скажи, Иван Петрович, какие мы бандиты?!— Куличикаыслöн петiсö ни синваэс, сiя баитiс ни сельсоветiсь предыскöт. — Висьтав, Иван Петрович, кытшöм ми то да сё? А?

— Тиминса эна, Мефодий Христофорович, — рамыника да полöмöн висьталiс сельсоветсис предыс.

— Тиминса?! — начальникыс дзик повзис, что тиминса вермасö лоны сэтшöмöсь, веськыта кö висьтавны, комиэз, да не комиэз, кöдна пондасö тэкöт баитны не рочöн, не комиöн... Кывлiс ни, что эм сэтшöм деревняыс, но эз думайт, что сэтчин олöны Куличика коддес, кöдна веськытöсь и рочöн эшö шырöны.

— Дак где, это самое, наш бригадер?! — лякасис начальникыс бердö Куличикаыс. —Мы ведь без него, это самое, ни один день не можем, работа стоит, а вы тут, это самое...

— Тише, старуха!

— А мый тише?Мый, мыся,тише?! — комиöн ни ытшкис Куличикаыс. — Кин таво государсвоас сюсö сетiс двести чентерсö? А?! Вот тэныт и на — тиминса, мыся, а тi... Миянкöт од бы и баитö.

— Да, — сэтчö нырсö сюйыштiс Спирьяыс ни, кыдз мужиккес коласын медпöрись бы, — сюсö ми таво сетiм двестися унажык, но одзлань... Ог тö-ö-д... Ежели кö Степансö оз лэдзö, аминь лоас Тиминанымлöн...

— Одзлань эн кув, Спиридон сват, — шынь керис сельсоветсис предыс. — Öтiк мортыс понда эшö оланыс эз сувтлы и оз сувт.

— Кыдз оз сувт?! — сэтчö виль нинкöммезнас медодзö чывкнитiс Василисаыс ни. — Кыдз оз сувт? Вот сувтас кö! — смев вöлöма инькаыт. Кытöн дак шыр моз олö — эм и абу, а сэтöн... — Мыся, разьсяс Тиминаным Степаныстöг!

— Вообче то, öнджа... — Митрейыс ни пондiс баитны бытшöмика, бытьтö сiя и эм. — Вообче то, да-а-а, ми татiсь некытчö ог мунö, кытчöдз бригадирнымöс од лэдзö!

Петö, что тиминса заргисисö сельсоветö зэв-зэв, кыдз öвинö кольтаэз, кöть тэ нiйö сю моз жö тшупöт, би весьтын сот, тшынöт, тыдалö, оз петö татiсь, кытчöдз бригадирныс оз ло.

— Тише, товарищи! Тише! — эшö пондылiс бы начальникыс полöтны лёк голоснас тиминсасö, но адззö, что нiйö кывнас оз вермы, вежис мывкыдсö, рамжыка ни пондiс баитны. —Сейчас я позвоню в район и узнаем, где же Ваш бригадир. — Босьтiс телефон трубка, бергöтыштiс оропсö и пондiс ыксыны. — Алё, алё!

А тиминса сулалiсö сельсоветын, кыдз вичкуын, только вичкуас еныс одзын асьнысö эз бы мыччалö лёк отирöн, а эстöн мыччалöны...

Джын часся унажык начальникыс трингис да баитiс телефонöт и вöлись рада висьталiс: «Некытчö бригадирныт эз ло! Локтас...»

— Локтас я? — эз верит Куличикаыс.

— Ме висьталi, что локтас, и локтас! — начальникыс бöра лöгасис. — Но тэ и старуха! Кытiсь тэ сэтшöмыс локтiн?

— Кытiсь? Да гортiсь! Тиминаись, мыся! Мый разь он адззы «сапоггезным» сьöртi?

— Быль тай, — кыдз саймис начальникыс и пондiс видзöтны виль «сапоггез» вылö, кöднö кöмалöма Василисаыс, нiя симöтiсь кыйöмöсь да сэтшöмöсь, что сэсся некысь он адззы, он неб и он мырддьы.

Начальникыс топ лоис рад ни, что сiдз петiс: локтiсö сельсоветö отир, топ усисö сы юр вылö кымöрсис да пондылiсö пурсьыны бы, но быдöс лöсьöтiсö баснинаныс.

— Прошевайте, ёрттэз! Мунö да уджалö, нем умöльсö эд думайтö.

— Адззисьлытöдз! Ась еныс тiянлö шуö овны дыржык да буржыка, — гажöн ни висьталiс старухаыс, кöр адззис, что начальниккес коласын эмöсь жö бур отирыс, но... — Мыйись-мый... Тиминсаыс, ёрт, туйсö татчö оз вунöтö!

— Мун ни, мун, — сералiс ни сельсоветсис предыс.

13

Асывнас бöра отирыс локтiсö Степаннэзö, медодз юасьны Ульянлiсь, кытчö мунны да мый керны.

— Да-а-а, — табаксö нютшкö Митрейыс. — Пöрьялiсö эд, пон табун!

— Кин? — эз вежöрт Спирьяыс.

— Кин?.. А сельсоветыс! Абу эд Степаныс! Бöра колас доддявны вöввесö.

— Спасибо висьтав, что Степаныс дынö быдöннымöс эз нуöтö! — Ульяныс ни гажöнжык баитö. — То бы...

— Эн пов! Ми эд отир жö, — шынь видзö Спирьяыс, видзöтö öшынö и горöтö. — Степаныс эд, челядь!.. Быль, абу я сiя, то гриваыс вылын ни локтö.

— Сiя! — öшынö юрсö сюйыштiс Митрейыс. — Сiя, инькаэз! Öнi бöра пондат уджавны вöввез моз, а то сё горзат, что уджсö бригадирыстöг од адззö.

Петiс шондi, сiя видзöтчис, топ праздник лунö, кöр тöдан, что талун нем понда оз ни ков тöждiсьны — кокнит сьöлöм вылын. Степаныс локтiс посöдзныс дынö, пуксис джек вылö, öзтiс чигарка. Отирыс сьöрсьöн-бöрсьöн петiсö керкусиныс, здоровайтчисö бригадирныскöт, кыдз типоккез баба гöгöр чукöртчисö, и пондiсö видзчисьны, мый висьталас бригадирныс, а сiя куритiс да видзöтiс кытчöкö вöрланяс, топ дыр абу адззылöм деревняыс бердiсь мусö, вöрсö и Лолымыс сайись гриваэсö. Дыр мыйись вöлись и юалiс:

— Мый ни керат?

— Уджалам, тай, — висьталiс Митрейыс.

— А ме ог, — гажтöма висьталiс Степаныс, шынь керис. — Менö эд бокö од жö керö, няньнас пондат жö вердны?

— Тэ мый, Степан?! Ачыт я?!

— Кытчö талун мунат бы?

— Вот ог и тöдö, мый керны? То ли тшупöтчыны, то ли вартны? — сералö Спирьяыс.

— Кытчö мунат, сэтчин и мунам! — гажöн баитö Степаныс.

И тиминса одзлань уджалöны.

...Степаныс гортын, а айыс вöрын. Öвтчö Андрияныс вöрын — не вöралiсь, а бандит. Думаэс не вöравны ни, а отир бы торкны: эн пантась! Лыяс и зоныслö — киыс чорыт, синыс лэчыт.

Андрияныс медодз лöсьöтчис сотны роднöй посадсö, но сьöлöмыс, тыдалö, эз жö лэбты чапкыны бисö: кöс погоддяыс коста баныс чышкис бы ассис позсö, вичкусö, и еныс сылö бы, натьтö, эз простит, öвтчö вöрын

Андрияныс, думайтö, что вот-вот Советыслöн властьыс онняюртчас, сiя локтас гортö, пондас овны одззамоз — ачыс ас вылас хозяин!

Андрияныс медодз синйис сельсоветiсь предсö: узьлiс деревняыс сайись вöрокын, ойезнас вовлiс деревняö, дзебсисьлiс чомö или баняö и видзчисис...

Мымда бы кыссис этадз оланыс, ачыс эз тöд, но надейтчис... Не овны бы бандитыслö пыр вöрас, но вöлiсö отир, кöдна пышшалiсьсö жалейтiсö, гусьöн вердiсö и юкталiсö.

«Тэрмась, Андриян! — пурис асьсö пышшалiсьыс, и эз ни понды видзчисьны, кöр панталас предсö кытöнкö öтöрын — туйын, а ойнас чарöтiс-лыйис öшынöт. Пуляыс бокö эз мун: ранитiс мортсö.

Андрияныс лыддис ассис медлёк врагöн öтiк мортöс и вештiсис сыкöт, а одзлань мый? Овны эз туй и кувны эз думайт: бандитлöн сьöлöмыс кыскис Сибирьö — сэтчин кытöнкö олiсö тöдсаэз, роднöйез и йöззэз, кöдна, натьтö, вöлiсö бур отир. Сибирьын Андрияныс думайтiс мöдпöв овны ассис олансö, мыччавны асьсö, сiдз уджавны, медбы бöра завидуйтiсö отирыс, киэс эшö сылöн эз косьмö, юрыс уджалiс, но кытчöдз Сибирьö туйыс вöлi пöдана — туйсö поперегалiс Курай, кöдалöн петiс жö лöгыс Совет властьыс вылö, эз гленитчö колхоззэс, чукöртiс вöрас ас коддесö жö, лöсьöтчис бергöтны олансö. Вöрын шатласьтöн и пантасис Андриян Курайыскöт. И медодз Курайыс жö шуис: «Ветлiн бы зоныт дынö гöститны... Мыйкö вывтi ни ошкöны Степантö! Бытьтö сiя и эм...»

Эз веськыта висьтав, что Тиминаись бригадирсö колö дзимлявны, но вежöрт...

Андрияныс абу полiсь, киэс чорытöсь, кыдз уджалiсь мортлöн, кöдна гöр и пишаль кужöны видзны, и коккес эшö новйöтöны кöть кытчö.

Лöнь. Оланыс суналiс. Андриян тöдiс вöрись быд туёк. Сiя иньдöтчис туйö, кытшöвтiс шоррез пöлöн, мунiс вöрöт, боки да син сайöт, гусясис моз, гусьöн шагнялiс кöззэз увтöт, локтiс Тиминаö, кöр луннас некин абу, но дрöжитiс жö, топ кинкö сiйö лöсьöтчис лыйны. Андрияныс локтiс учöтик деревняö, дзебсисис вöрокö баняэс сайö и пондiс кывзiсьны да видзöтчыны.

Пукалö кöз увтын Андриян, номмез вердö, кöдна бизгöны пеллес одзын, пышналöны-курччасьöны, пырöны синнэзö, пеллезö и öмö. Тышкасьö мортыс ном-гебыскöт, лэчыта видзöтö керкуэзлань, кытöн быдöнлöн ыбöссэс осьтаöсь, кöть быдöс нöбöт — некин нем оз понды тöдны, видзчисьö, кöр мыччисяс зоныс, но кытчöдз татöн некин абу — не пон, не кань, не Куличикаыс, кöда отсасьö жö томмеслö. Весь овтöн Андриянсö кытшлалöны думаэз, кöдна лёкöсь, кöдна рамöсь: öтiккес быдöс бы вийöны-вартлöны, мöдiккес — олöны бы.

Пукалö кöз увтын Андрияныс, сэтöн видзчисьтöг бöрсяняс ровно ыкöстiс мамыс: «Тэ мый сэтöн керан?! Андриян, Андриян... Быдтi ме тэнö сьöкыта да сiдз и кулан... Сiсьман кöзыс увтын, некин оз дзеб, оз горзы тэ понда, оз понды касьтывны нянь-солыс дорö... Оз жö бы сiдз ков...»

«Прости господи! — киэс пондiсö дрöжитны Андрияныслöн. — Простит грешнöй душаöс. — Пернапасасис. Кöр ни кулiс мамыс, а бытьтö баитö зоныскöт, велöтö бы овнытö.

Жар. Дзулля ва вотялö кымöссис, горшыс косьмö и кынöмыс сималö — пон моз или олö. Пукалöв-керис, думаэс сёйисö, пурисö, етша лоис — син одзас вуджöртчис тоша морт — вöт и быль, оз тöд, поди, прикашайтчис. «Прости господи! — бöра касьтылiс енсö, синнэс бöбсялiсö, пышшис бы, некинкöт бы сэсся эз ни пантась, но кытчö?! Вöрыс паськыт, а ош моз гуö он дзебсись — не ёрттэс дак мöддэс адззасö, не öттэс дак мöддэс лыясö, колясö кöзыс увтö и сiсьман...

Сiдз я олiс бы Андрияныс? Сы понда я ой и лун дзуртiс-уджалiс, а öнi не бöрас, не одзас, быд шагын смертьыс вöтлiсьö...

— Адззин! Панталiн! Морт вийись! Зонтö ни вийны лöсьöтчан! — топ иньыслöн ни кысянькö кылiс голосыс.

Вот сiдз, Андриян. Пыр уджалiн да уджалiн, öнi сё думаэт унажык удж йылiсь, а иньыт ни пурö.

— Пон табун! — быд вынiсь вачкис лöдзлö, кöда зубыта курччöвтiс пельсö. — Тшыг пон табун, сöтiт-вартiт, мырддит мый вöлi и эз и гажöтчат да уджалат, од думайтö, кин вöрсö весöтiс эна ыббез вылiсь, кин ньылöмнас киськалiс быд аршинсö, медбы быдтыны сю да сёйны нянь? Кинкö пессис, а тi гажöтчат да олат, орсат да уджалат йöз киэзöн керöмыс вылын!.. Эдна... Еныс эд эм жö. Адззас. Одз ошшасят... — синваэс петiсö Андрияныслöн, что сiя вöрын öтнас ― некинлiсь юасьны, некинлö висьтавны, некин оз адззы, оз кыв, оз жалейт, оз ошкы — быдöн враг, врагöс моз вийöны бы, еныслiсь ни юалö. — Мый понда сiдз?! Мый ме тэныт умöльсö кери?! Или отирсö пури, мырдди, кöр ой и лун уджалi, и на тэныт! Не горт, не ёрт, не вон, не зон, быд поныс ме вылö уськöтчö, — гичыртiс пиннесö — синнэзсис чеччöвтiсö бичиррез. — Зонöс колö вийны, а?! Роднöй кагаöс... Грехыс! Кыдз мöдöр югытас вирöсь киэзöн мыччисян? Мый понда висьтавны еныслö?

Сэтöн жö, эта кöз увтын жö, асьсö адззис кулöмöн ни, бытьтö куйлö кöзыс вужжез вылын, шондiыс югдöтö куньöм синнэсö, шонтö, а чужöмыс вылын гутыс и гагыс... Сiсьмö... Вöлi да абу, некинлö саван дöрасö чужöмыс вылö павдöтны, лыэсö дзимлявны... Ен батюшко!

Думаэс, öтiк сёйö, мöдiк вийö, куимöтыс ловйöн кольö. Пондiс кынмыны спинаыс, топ не гожум, не жар, а би мороз, сiдз топ бöрсяняс и кутö, джагöтö бы... Абу Андрияныслöн оланыс и оз ло, а сiя олö бы, но одззамоз жö бы — ачыс аслыс хозяин, мед сылiсь туйсö одзöттяс эз вожмöвтö, некин мед эз ордчы паныт, эз вöрöт, и сiя некинöс оз понды вöрöтны.

Вöрыс мыдз, суналö жар лунö. Бизгö быдкодь тварьыс. Пукалö кöз увтын Андрияныс, видзчисьö зонсö, медбы не баитны, не гöститны, а вийны. Ачыс я сiя? Аслас юрöн я олö? Аслас киэзöн я керö? «Тэ мый, Андриян?! Тэ мый?.. — Пель одзас баитö ни айыс. — Андриян, ме тэнö разь сы вылö быдтi?» «Мый нö керны, тять? Кыдз нö овнытö? Оз эд туй...» — тырппесö курччалö, быд шыыс вöрас прикашайтчö, бöбöтö, нерö, сорö думаэсö, ныждö ни лöгсö. Вöрын öтнас, некин оз адззы и оз кыв, кöть тэ мый кер, кöть кытчö бы мун.

Вермасьö думаэскöт Андрияныс, ачыс оз тöд мый керны. Эз и адззыв, кыдз бöрсяняс туёк вылын мыччисис кузь мыгöра Митрей. Митрейлöн киас литовка и везйö-мунö кузь шагöн гортланяс, ачыс ныр увтас бобгö: «Но и Степан... Но и жаднöй! Колiс разь айыслiсь Лолымыс дорись ытшкыны видзсö? Оз я мый я пöт горт гöгöрись туруннас? Да-а-а... Не эта бы... Грехыс бы сымда эз лэб, а то банда... Сёйöны öтамöднысö, бытьтö бöра война», — мужикыс прокмис видчыны, пондiс öвтны веськыт кинас да шуны сякö начальствосö и бригадирнысö, бытьтö кинкö кылiс сiйö да лöсьöтчис керны сы моз.

Митрейыс мунiс и видчис, думайтiс, что сiйö некин оз кыв, но кöз увтын кывзiс сiйö Андрияныс, быд кылыс Митрейлöн йиджис сьöлöмöдззас, нерис... Колiс бы сэтöн радъявны, ошкыны мужиксö, что лöгыс петö виль оланыс вылö, а Андрияныслöн пондiс лöгыс петны Митрейыс вылö жö, сылö жö бöрсяняс горöтчис: «Пон! Он тöд кинöс и пурны, кытöн сёян, сэтчö жö и какан... Ме бы тэнö Степаныс местын велöтi овнытö!» Курччöвтiс Андриянсö лöдз, кыдз биöн сотыштiс, сорис думаэсö, кöдна бöра бергöтчисö аслас видззезлань, кöдна вöлiсö да эз лоö, пондiс ныр увтас туткыны: «Медбöрья видззесö ни ытшкат... Адззисит хозяиннэз!»

— Айыс бандит, а зоныс!.. — сэтöн бöра кылiс шорокыс дорын ни Митрейыслöн голосыс, кöда, тыдалö, сулалiс кытöнкö неылын. — Зоныс, мужиккез, сэтшöм жö. Миян кодьыс вылö вожасис и веськöтлö! Но и мед... Ме кытчöдз нем ог шу, а колас, висьтала веськыта...

Митрейыс топ сьöлалiс Андрияныс синнэзö, кыдз кужис, сiдз и стыдитiс ни роднысö, медбы эн вунöт... «Нем эд шуö... Тi эшö Степаныскöт адззылат! — Андрияныслöн гурнитiс лöг. — Ме тiянöс, буссэзöс, велöта овнытö! Ме тiянöс!..»

Пондыв сэтöн мортсö падтыны, висьтав, что нем ни тэныт чеччавны, кöр тэнö талис ни оланыс, и ов ни öнi, кыдз ен шуис, но Андрияныс вöлi Андриян и кольччис сэтшöм жö.

Эшö югыт, рыт и не рыт. Шондiыс вылынкодь. Андрияныс петiс вöрсис, локтiс Тиминаö зоныс керку дынö, и посöдзыс дынын быд вынiсь ыкöстiс:

— Степан! Петав.

Отирыс кылiсö энö кыввесö. Повзисö и гулюэз, кöдна пыр пукалiсö Степаннэс керку вылын. Быдöн ни адззис, что локтiс Степанлöн айыс, но некин эз лысьт петны öтöрö: видзöтчисö отирыс öшыннэзöт да видзчисисö, мый жö лоас.

Дзарнитiс öшынö Ульяныс и невна гатш эз пöр: дрöжитö, челядьсö жмитiс бердас да дзебсисис гор сайö, ачыс кеймисьö мужикыслö:

— Степан, эн пет! Христа ради, жалейт челядьсö!

— Степан, ме мыдзи ни видзчисьнытö! — öтöрын ыксö айыс.

Гажа öтöрас. Номмес «йöктöны» пес костёр весьтын. Поныс бöжсö лэдзöм да дыша видзöтö Андрияныс вылö. Мöдiкöс бы сёйис-вувтiс, а сiйö оз: натьтö, кылö роднöй вирсö.

Степаныс оз тэрмась. Сiя лун уджалiс, мыдзис, öнi жагвыв гардiс чигарка, öзтiс сiйö, ачыс öтiк синнас видзöтiс öшынö, видзчисис жö бы, что айыс пырас керкуас, пондасö баитны, сёясö-юасö... Ай эд!

— Степа-а-ан!

— Пета, — горöтчис зоныс да шагньöвтiс порогсö: киас не чер, не пурт — эз эд айыскöт вирöдз тышкасьны пет. Петiс мужикыс гортiсь, а Ульяныс син одзын пемдiс керкуас, кывзö, кыдз чарöтас батшкоыс мужиксö.

Степаныс петiс посöдзаныс, сувтчис, видзöтiс-керис, кыдз шондiыс öшöтчö кöз йыввес вылö, кыдз крышаыс вылö пуксисö гулюэз, пондiсö бергавны-йöктыны асмознаныс.

— Мыля керкуас он пыр? Натьтö, эд кынöмыт сималö, — юалiс айыслiсь.

Мöдыс сибдöм голосöн шуис:

— Ме сотанаыскöт öтiк бекöрсис ог панясь!..

— Нырыт кыз — кынöмыт вöснит, — висьталiс зоныс, гардыштiс уссö.

— Быдтi ас юрö вылö!.. Айыт сьöлöм вылö тальччин, прости господи! — рыг-рыг серöмтчис айыс, одзлань пиннесö мыччалiс.

— Тэ, ая, абу дзöдзыв, и ме некин юр вылö эшö эг тальччыв...

— Тальччин! — айыс пондiс лэдзны пельпоныс вылiсь пишальсö, ачыс синнэзнас топ сёйис бы зонсö.

Чир-чир! — юррез вевдöрын пондiс чирзыны ватшкан, кайыс адззис топ зверрезöс, повзис и юöртiс, мый керсьö Тиминаын. Гажа бы оланыс, но ог кужö овнытö — öтамöднымöс виям бы.

— Мый кувтöннят айытлö висьталан? — айыс юалiс зоныслiсь.

— Он я тэ месся одзжык кув?! — зоныслöн чочкоммис чужöмыс.

Митрейыс мыччисис посöдзаныс и бöрöн-бöрöн саясис син одзись.

— Но мый?! — пишальсö жагвыв лэбтiс Андрияныс, öмыс пиньöвтчис, синнэс гöрдöсь, рожаыс тоша, нятьöсь. — Лыя эд...

— Лый, — топ орсiсö, сiдз горöтчис Степаныс.

— Лыя! — ыкöстiс айыс, лыйö бы и оз лысьт. Степаныс куритiс, бытьтö эз и адззы айсö. И чарöтiс деревнясö лыйöм шы. Кинкö чирнитiс, кыдз ранитiсö йöзöс. Кивнитiс пон. Ульяныс керкуас кыдз сулалiс горыс сайын, сiдз и усис садьтöг. Лыйöмыс бöрсянь тшыныс жагвыв гардчис улицаын. Эта порок тшыныс коласын сулалiс Степаныс, чигаркаыс сотчис ныр увтас, топ нем эз и вöв — öтiк юрси тылöп эз вöрзьы юрыс вылiсь, шынньöвтiс бытьтö — öмыс пиньöвтчыштiс и горöтчис: «Ая, он куж лыйсьынытö... Эн бы орс пишальнат...»

— Вия! — нач нёштöммис Андриянлöн чужöмыс, пондiс гуддисьны пиас, тыдалö, кошшис виль патрон.

— Менам эд пишальыс эм жö! — лёкжыка ни висьталiс Степаныс. — Видзöт, кыдз бы аслыт кымöсат эг пöжав...

Айыс сьöвзис, гичыртiс пиннесö, бергöтчис и перыт шаггезöн иньдöтчис вöрас. Бöрсяняс чепöссис поныс, пондiс сёйны-вувтны, сiдз бы и пурис Андриянсö.

— Буско! — поныслö ыкöстiс Степаныс. — Буско!

14

Эта минутасянь Ульянлöн сьöлöмыс пондiс повны быд шагын: лэбтiсяс я туй бокись каёк — сьöлöмыс шур-шар! Каньыс гор вылiсь чеччöвтас, бöра сьöлöмыс берездасьö. Степаныс жö сералö: «Нуöтлыны тэнö ош вийны, дугдiн бы берсясис повны...» Баитö этадз, ачыс иньыслö вайö туруннэз, пöжö да юкталö: öтiклö кымöсас лыйисö да нем сылö абу, мöдiк адззылiс да дрöжитö... Öтiк олö да дрöжитö, а мöдiкöс вийöны бы да сiя олö, ошшасьö, что Ванькаыс да Борисыс бытшöма велöтчöны школаын, отсасьöны ни, а сэтöн, видзöтан кö, быдмас нывкаыс — бöра велöтчись, быдöнныс керкуас лоасö грамотнöйöсь, айныслö нем лоас керны, пондас ковны гор вылын пукавны да чуньнас мыччавны, кинлö мый керны... И отирыс топ зэвжыка жмитчисö бригадирныс бердö, ой и лун синнэзнысö оз öштö Степаныс вылiсь, быдöн баитö: «Мый бы миян и вöлi Степаныстöг?» Горзöны, кыдз бригадирныс эшö öтпыр кувны лöсьöтчö, а сiя сералö: «Кулiт бы метöг... Дружнöйжыка колö овны! Мыйись-мый... Сiя эд вермас деревнянымöс сотны... Пишаллезнытö видзö матынжык...» И не весь сiдз баитiс: эшö вовлiс айыс Тиминаö, пондылiс сотны бы колхознöй чоммезнысö, но Митрейыс жö вöрсянь пишальöн локтiкö, казялiс Андриянсö и ыкöстiс: «Тэ мый керан?!» Мöдыс вуджöртчис и — абу...

Гожумыс чулалö чожа, и арыс абу кузь: эз ештö быдöс вундыны, видзöтан кö, лыммез ни лэбалöны, лымыс сорöн и дзимлялiсö медбöрья сюсö. Вундiссис. Степаныс босьтiс пишаль и висьталiс, что ветлас вöрö.

— Кытчö тэ?! — горзö иньыс. — Бöра колян миянöс!.. Юртö öштан, а ме эстöн челядьнас понда уннявны...

— Нем оз ло, — висьталiс и петiс керкусис. Рытнас пырö, спинаыс сайын котомаын ош яй, сералö: «Йöлыс кытчöдз абу, сёйö ош яйсö...»

Сьöвзис Ульяныс, котомасö пöрччалö да нырсö пиньлалö: терпитны оз вермы ош яй дуксö, но колö! Некытчö он воштiсь... Челядьыс айныс гöгöрын гардчöны, юасьöны: «Ая, кыдз ошсö кутiн?! Сiя тэнö эз гыжьяв?..»

Сералö айыс, пондö висьтасьны: «Эг ешты гортсянь петны, ештi только вуджны Лолымсö... Вуджи Лолымсö да туёкыс кузя мельничаыслань гусьöник муна... Мыся, оз я сьöла лэбтiсь, а поснита зэрö и лöнь, но...»

Ванькаыс осьтiс öмсö, Борисыслöн пиннес гер, тэрмöтö айсö: «Ая, тэ, натьтö, эд тэрмасин муннытö?..»

— Кытчö вöрас тэрмасьнытö? Кöч сьöрö я мый я котöртан? Не, челядь, вöрас колö жагöн — тальччы да видзöт... Но ме и муна — тальчча и ог... Дзар кери — одзам ош: питкыльтö мелань паныт. Ох тэ, мыся! Кытчö жö, мыся, Мишка, тэрмасян? Мый бöра эн ешты керны?

— Ха-ха! — сералö Борисыс. — Тять, ошыс бöра эд вунöтiс миссьынытö да Лолымыс дынö котöртiс, медбы кöтöтны ваас ош чужöмсö.

— Дугды тэ! — Иваныс воныслö ныр увтас мыччалö кулаксö. — Кывзы!

— Тэ кывзы, эн сунав! — модьö Борисыс. — Тять, а мый одзлань?

— Мый одзлань? Сiя, челядь, одзлань, что ме этö кери... Дзебсиси кыз пожум сайö туёкыс бокö и пондi видзчисьны, а сiя... Шырö-мунö, бытьтö гортас ветлöтö, мелань локтö... Локтiс, локтiс ме весьтöдз зэв, но ме сэтöн к-ы-ыдз этö кери!.. Шапканам пожумыс бердö вачки, сiя ыкöстiс быд вынсис: «Ой-ой-ой!» и сöтiс... Ачыс вöр тыр ружтö да ыксö: «Сёйисö-ö-ö! Кутiсö-ö-ö!..»

Челядьыс кусiнясьöны-сералöны, синваэзныс петiсö. Мамныс шыннялö жö, веритö и оз мужикыслö, кöда шынь оз кер, оз куж бöбöтчыны, а сэтöн...

— Степан, быль я мый я?

— Мый нö ме баита? Кыдз вöлi, сiдз и висьтася... — куритö Степаныс.

— Ая, мый сэсся лоис?! — Борисыс педзö лабичыс вылын.

— Мый лоис?.. Рявзытöн мунiс дынсим ошыс и лöнис. Ме сулалыштi, куритöв-кери и думайта, мыся, ужо ветла неылöдз, видзöта, кыдз сiя пышшис, нитшсö борис кузь гыжжезнас... Шагнялöв-кери логланяс моз, видзöта, куйлö... Локтi матöжык — оз вöрöтчы, эшö матöжык... Оз лолав... Сымда вöлi...

— Быль, Степан?! — иньыс оз верит мужикыслö.

— Абу бы быль, эг бы и висьтась!

— А мый нö сылö лоис?!

— Тэныт мый жö овлö, кöр повзян?

— Сьöлöмö тай... — шыасьö Ульяныс.

— Потiс повзьöмувья сьöлöмыс, — сералö Борисыс.

— Тэнö бы ошыс моз вöрас повзьöтны! — шуö Ванькаыс. — Ог тöд, мый бы лоас?!

— Нем бы мекöт оз ло! — ошшасьö мöдыс.

— Тырмас, челядь, баняыс ештiс, колö пывсьыны, — висьталö мамныс.

Вöралöм бöрсянь Степаныс чöвтчис и йöрнöс-вешьяннас зоннэскöт петiс баняö. Мужикыс пывсьыны любитiс, кыдз пырас баняас, чöвтчас, оз миссьы, сэкжö гумыштас кöштыр ва, койыштас пым иззэс вылö... Баня горыс ловзисяс сэтшöм кöс жарöн, что пöдтö — ловзисьны немöн, киэз сотö... Челядьыс чожажык заргисясö лабич увтö, а айныс — полок вылö и коросьнас пондö масьтыны-вартлыны асьсö, ачыс гажöн ыксö: «Ванька! Кытöн тэ?! Содты ышö! А тэ, Бориска, мый керан?! Кай бокам полокыс вылö да буржыка пывсьöт коккетö, мед рака сетöм чакчуриэт небзисö. Вöрöтчы!

— Меным мый?.. Зубыт да... — кивзö Борисыс, кöр тулыссянь арöдз олö кöмтöг, кöть лым, кöть нять, зэрö или гажа, котрасьö, кыт шедас — веськыта вöрас и деревняас, и коккес нятьын да ваын сiдз вартчасö, сiдз потласясö, что баняö пырас и ой, ой! Коросьнас вачкас — биöн сотö, но сыбöрсянь некытшöм лекарство ни оз ков, баняыс бöрсянь кыдз виль сапоггез кöмалас, и мöдiк баняöдз бöра кöмтöг да пасьтöг — не нять, не ва, кöть ыб вылын орасьны-нетшкыны сю коласiсь ёг или пинявны... Чожöсь быдмöны Степанлöн зоннэс, но баняын жарсö нятьöсь да вартчöм коккезнаныс оз терпитö.

Айныс пывсьö полок вылын — пеллез сотö, сэтшöм жар, но зоннэслö ыксö: — Ванька, чажгы ышö!

Степаныс ружтö да пывсьö полок вылын, ыксö ни бöра мöд зоныслö: «А тэ, Бориска, кай чожажык бокам! Ме ачым тэнö пывсьöта». Айныс оз любит модьны, висьталiс и кер! И Борисыс кивзö да кайö полок вылö, нюжöтчö айыс бокö, а воныс сэтöн и эм: калитчöм иззэс вылö бöра кöштыр ва... Ух! Вöлись эд лоö жар, вöлись эд... Шовкöтöны короссез, ружтö Ванькаыс, кивзö, кеймисьö айыслö Борисыс, медбы сiя эз öддьöн, эз вынöн пывсьöт, но айыс шовкйö зонсö да пöдö-баитö:

— Тi мый, мужиккез?! Терпитö! Баняыс медбур лекарство, быдтö учöттэсö и шогöттэз веськöтö. Ванька, кытöн тэ?! Содты ышö!..

Ванькаыс сiйö и видзчисьö: кöшнас бöра, раз! Да эшö, два!

— У-у-у! — вöлись пöтö айныс. — Тырмас, зон... Унаöв ни сетiн...

Сыбöрын мамныс нылыскöт да Ромкаыскöт мунöны баняö, сэтчин жö, кылö, бобгытöн кыссьöны Митрейлöн иньыс, Спирика, Куличика, сьöрсьöн-бöрсьöн, кинлöн дышыс оз пет... Ась. Быдöнныслö öдыс тырмас. А мужиккес керкуас шоччисьöны, пыдына лолалöны. Узьны бы колö, кыдз овлö пыр баняыс бöрсянь, но Борисыс бöра пондö юасьны айыслiсь:

— Тять, тэ быль ошыслö эн лый?!

— Бориска... — тятьыс обидитчö моз. — Он верит — эн юась...

— Сэк быль, тыдалö, тять, эд повзьöмсяняс ошыс кулiс...

— Мый нö тэныт... — воныскöт баитö Ванькаыс. — Оз жö тятьö понды пöрьясьны. Кин сiя тэныт? Митрейыс я мый я, кöда öтiк сьöла гортö ваяс, а сизимö висьталö...

Челядьыс недыр кежö лöньсьöны, Борисыс топ нырнас пишкö ни, ланьтiс ни, но недыр-мыйись лэбтö полатьын юрсö и пондö никсыны:

— Тять, тэ бы висьталiн сказка...

— Узь ни, ме вунöтi сказкаэсö.

— Вунöтiн тай...

Сэк Ванькаыс пондö висьтасьны чёрт йылiсь да поп йылiсь медкузь сказкасö, сорасьлö, а айныс кывзö да веськöтлö, кытöн не сiдз. Степаныс тöдö сказкаэсö да сымда, что вермас висьтасьны рытсянь асылöдз. И талун öдззисö висьтасьны, кöда тöдö уна, кöда эшö унажык — öшис онныс. Инькаэс кайисö баняись, шоччисьыштiсö. Сойныс зонкаэслöн ланьтiс, мамныс пуксис печкыны, Степаныс босьтiс панöм нинкöм, кабьялiс сiйö и пондiс кыйны, а Ванькаыс пондiс панны виль нинкöм, кинлöн мый шогмö, сiйö и керö: киэзныс уджалöны и öмныс весь оз ов, гардöны сказкаэз.

Уджалiсö вель дыр. Борислöн пондiсö куньсьыны синнэс, сiя пондiс модьны: «Тять, уррес пö чочкомöсь ни.... Ветлам ашын вöрас, а?.. Ветлам, а?..»

— Велöтчыны колö, Бориска! — висьталö тятьыс.

— Кресення эд... — Ванькаыс ни модьö.

— Мый тiянкöт и кер?.. — мöдiк нинкöм кабьялö Степаныс, гажöнжык содтö. — Вот мый!.. Таркоть шорыс гöгöрö ме дозмöрреслö сиялi лöччез ¹, ветлат ашын да видзöтат... Эз я кинкö кышась?

— А пишальсö?! — Борисыс куйлiс ни полатьын, чеччöвтiс джодж шöрö и пондiс йöктыны. — Пишальтöг ог мунö, тять! Ошыс ветлöтö...

— Ванькаыслö сета, а тэныт ог. Тэ кывнат вöрсö полöтан и некинöс сэтчинiсь он пантав.

— Ки-и-и-н? Ме! Да ме вöрас ог и лолав, сiдз ветлöта.

— Кин жö, мыся, оз лолав? — сералö Ванькаыс.

— И умöля пö велöтчан! — висьталö айыс.

— Ме?! Кин сiйö висьталiс? Эта бöра! — Борисыс долоньнас шлёпкис воныслö пель бокас. Мöдыс лэбтiс кабья нинкöмсö, öвтыштiс...

— Дугдö, петуххез! — мурзьыштiс Степаныс. — Тэ, Бориска, эн суськись. Меным Яков Семёновичыс висьталiс, бытьтö пö историянас босьтöмыт два.

— Кöр?! — синваэс петöны томжыкыслöн. — Мöйму босьтлi, а таво эг.

— Кöть одзынö, кöть мöйму, но вöлi эд? Вöлi! И нем сэтöн дорйисьны. Вод да узь, — айыс висьталiс Борисыслö, но мöдыс кытчö тэ! Модьö ассис:

— Мунам вöрас, тять!.. И быдöс сэтöн.

— Мунат то мунат, но ме думайтi, мыся, пинявны бы колiс ашын. Видзöтö: рудзöгсö кöдзим и колö гыжьялыштны мусö, а то кайес сюсö кокаласö.

— Но-о-о, а мыля сэтшöм сёрöн? — бытьтö быдöс тöдö Борисыс, кöр колö кöдзны, гöрны и вундыны, юалö айыслiсь. — Илья лун гöгöрас эд кöдзöны рудзöггесö, а ашын мый ни луныс?

— Сiдз петiс, — висьталiс айыс. — Кöдзыссö, видзöт, вартiм да кыским Пальникас... А пальнишанаыт бöра абу вермöмась государствоас плансö сетны... Вот и öнöдз кыским...

— Сизимись, натьтö, плансö содтылiсö... — öбидитчис Борисыс, дзик унажык тöдiс пöриссезся.

— Мый керан, Бориска? Кöр плансö оз содтывлö? Но колас пинялыштны, некинлö сэсся... Тi школаын, ми тшупöтчам да тöлöтчам... Нач некинлö лоис уджавнытö...

— Двадцать соткасö ме бы эг и касьтыв... — öмсö пиньöвтiс Борисыс.

— Шондiтöг чеччам, керам и абу! Нем баитны, Бориска! — висьталiс Ванькаыс.

— Керам, но пишальыс, тять..

Сёр ни рытыс, öтöрын пемыт — синнэзö ёсь мöрт, нем оз тыдав. Поныс видзчисьтöг посöдзсис йирк-йорк чеччöвтiс и пондiс сёйны-вувтны.

— Ошыс локтö, — серöмтчис Борисыс.

— Мортöс вувтö, — висьталiс Степаныс, чапкис кисис нинкöм, лöсьöтчис петны посöдзö, но эз ешты: кинкö кылö кайис, сяткыштiс ыбöсö и керкуас гужа-важа пырис тöдса милиционер. Сiя здоровайтчис, гажöн горöтчис: «Степан Андриянович, гöсьсö эд колö пантавны!..»

— Колö, да эг ешты. Вывтi чожа пырин. Пуксьы да шоччись. Оз тэныт узьсьы... Кытчö бöра этатшöм пемытiнас? — юасис и висьтасис Степаныс, ачыс кошшис кисет, долоннезнас вартлiс боккезас. — Кытöн нö табакö? Кытчö бöра öштi? Челядь, эд адззылö?! Мам, тэ кытчö воштiн кисетсö?!

— Баняын пывсьö, — саймис Ульяныс, пондiс сынавны юрсö. — Пыр табактö öштан...

— Тэ, мам, менö эн серав, а вай табаксö!

— Курит, — милиционерыс пуксис западня вылö да нюжöтiс папироса.

— Ог ме сэтшöмсö курит, — Степаныс эз босьт папиросасö, сiйö кыдз кинкö вежис: жöдзис джоджыс шöрын, не пуксьыны, не баитны — олан табакыстöг эз ло. Эта коста Ульяныс гöсьыслö пызан вылö вайис ни нянь да сов, юкталiс ни милиционерсö юанöн, а мужикыс жöдзис...

Милиционерыс сералö, оз верит, что Степаныслö табактöг умöль, а хозяйкаыс гöсьсö пуксьöтö ни пызан сайö, но мöдыс оз бы пуксьы, оз пö кынöмыс симав.

— Ачыт пуксьы пызаныс сайö! — иньыс висьталö ни мужикыслö. — Тэтöг, видзöт, гöсьыс пызаныс сайö оз пуксьы.

— Сёя тай ме тэнчит сёянтö, кöр табакыс абу, — бобгö Степаныс, малалö полать юр.

— Кудöбаыс бöра пиньöвтiс... Кулас табакыстöг... Öнi тай эн я курит! — видчö ни Ульяныс.

— Мöдiк кисет сiя... Этаись куритсис.

Смех и грех, но абу табакыс. Сэтöн Степаныс видзчисьтöг Ванькаыслö и шуö:

— Челядь... Натьтö, колас эд ветлыны Пальникöдззас! — висьталö сiдз, бытьтö колö петавны посöдзöдззас, и öтöрас абу пемыт.

Милиционерыс чатыртiс юрсö да пондiс видзöтны Степаныс вылö, топ сiйö адззис только талун. И Ульяныс видзöтö жö мужикыс вылö, но нем оз шу, бытьтö сiдз и колö, мый айныс челядьыслö висьталас, сiйö и керасö, мед кöть ой, кöть лун, тöв или гожум — мöдöр югытас иньдас, сэтчин котрасясö, а сизим километраыс сэтчин да татчö мый ни? Тьфу и абу эд...

— Тять, öнi жö колö? — юалiс Ванькаыс.

— Öнi жö бы... Öльöксан дядьытлöн табакыс эм. Корат, а ме сыбöрын сылö сета бöра... Только вöвнас, но?

— Степан... — шыасис Ульяныс, но Степаныс мый пондас керны, кымöснас люкалас, но керас, и челядьыс сэтшöмöсь жö: Борисыс кöмалö ни нинкöммез, Иваныс кошшö шапка, а милиционерыс ружтышалö и шуö жö: «Пемыт эд, Степан Андриянович...»

— Мый пемытыс? Нем оз видз! — йöктышалö Борисыс, петö керкусис, кыдз вотьыштö пемыт гуö. Öтöрас зонкаыс шутньöвтö поныслö. Сьöрсяняс мöдыс вожмöвтö порогсö. Мамныс сьöраныс... Зоннэсö кольлалö посöдзöдз, бöр пырö и кокнита висьталö: «Христос кагаэзöкöт...»

— Кöиннэслö пемытiнас понсö эз жö бы сетö — поныс понда тöждiсьö Степаныс.

— Но тэ и Степан Андриянович! — милиционерыс кöритö хозяинсö да ньылалö дульсö: керкутыр чöскыт пöжöм яй дук.

— Нем оз ло! Мед велöтчöны овнытö, — милиционерыскöт баитö Степаныс, гöсьсö пуксьöтö пызан сайö, медбы мортсö вердны сьöла да дозмöр яйöн.

Дыр пукалiс милиционер Степаннэзас — кадсö кыскис баснинас: öтiкö да мöдiкö юасьö да висьтасьö, видзöтан кö ойшöр гöгöр ни: курöгпозын борддэзнас поркнитiс петухыс, китöстiс и лöнис. Швыр да швыр Ульяна киын бергалö чöрс. Полатьын пишкöны-узьöны Роман да нылокныс. Мужиккес мыдзисö пукавны, пондiсö баитны — минутанас кыв да öтiкö, но зонкаэс абуöсь и табакыс абу.

Мöдöтпыр китöстiс петухыс, сэк вöлись öтöрын гажöн шыасис поныс, посöдзö тура-бара кайисö зонкаэс, пырисö керкуас.

— Мый нö?! — зонкаэс эз ештö пыдынжыка ловзисьны керкуись руöн, юасьö ни айныс.

— Вайим, — висьталö Борисыс.

— Öльöксан дядьныт мый керö?

— Мый сiя керас?.. Нинкöммез тай кыйö, — Борисыс жö Ванькасö бöра одзалiс висьтавны.

— Öнi водö да узьö, — Степаныс пондiс гардны чигарка.

Милиционерыс висьталiс спасибо и видз — эн видз, петiс керкусис и мунiс аслас туйöт. Вöлi пыд ой.

Ашынас пемыт сорöн зонкаэс доддялiсö вöввез и мунiсö пинявны. Нiя уджалiсö джын лун, павжунöдз пиняэзöн сыналiсö рудзöгöн кöдзöм мусö, локтiсö гортö, юскисисö, сёйисö, босьтiсö пишаллез и лэдзчисö Лолымлань. Гортiсь мунiсö павжун гöгöр да öшисö: рытнас пемыт, пондiс зэрны, некин и некытöн оз кыв, нем оз тыдав, а челядьыс абу.

— Ошыс сёйис! Торксисö зонкаэс, — пондiс модьны мамныс.

— Кытшöм ош сёяс?! — лöгасис Степаныс. — Тшыг я мый я арнас зверьыс?! Локтасö, оз кö узьö кытöнкö кöз увтын, а узясö кö..» Ашын бы колö велöтчыны, вот эта да... Прогул эд...

— Сьöлöмыт тэнат челядьыс дынö сайкалöм, — пеничайтö Ульяныс.

— Тэнат, поди, сайкалöм... — чунь кыза чигарка куритö мужикыс, бöра пуксьö кыйны нинкöммез (кöмöтны эд колö семьясö, кöр нинкöмсö новьян неделя и абу — вильö вай!)

Зонкаэс локтiсö нач пемытöн. Мыдзöсь, паськöмныс люзь ва. Медодзын керкуас пырис Борисыс — пиннес гер, синнэзас гаж, ышки-пойки лолалö, ошшасьö:

— Тять, дозмöр вайим да ышö кытшöмкö öтiк пеля зверьöс...

— Кытшöм бöра зверь? Поди, этö... Ванька, мый нö он висьтав?

Ванькаыс шыннялö, но воныс моз оз куж ошшасьны.

— Кытшöм нö зверь? — мöдпöв юалö тятьныс. — Сюра-бöжа кöч али куим кока ош?..

— Кöч, тять, — висьталö Ванькаыс. — Öтiк пельыс мылякö абу.

— Вот. А тэ, Бориска, шуан абу кöч...

— Вежö паськöмнытö, сёйö да водö. Ашын школаö колö, — зоннэслö висьталö мамныс.

— Дыш менам петö велöтчынытö-ö-ö, — пызаныс сайö пуксьытöн кивзö Борисыс.

— Мый?! — дивуйтчö тятьыс. — Мый бы керан? Поди, кутчисян гöрны?.. Гöр, ме ог горзы тэнат школа понда, но быдман кö, тятьтö эн вид, ас вылат горзы.

Зонкаэс пурöны-сёйöны, пöтöны, а томжыкыслöн пызаныс сайын жö синнэс куньсьöны — лязö он.

15

— Вийны колiс! — кытöнкö рака моз карзöм Митрейыс, кöр Степаныслö лыйлiс айыс. — Вийны колiс... — гусьöн баитöм, но кылыс абу воробей: öмсит лэдзин, сэсся он кут, сё ни пырас йöз пельö.

— Мый бы тэныт содiс?! — öтпыр лöгасис да юалiс соседыслiсь Ульяныс.

— Пурсьö мужикыт... Сюррез быдмöны бригадирнымлöн...

Митрейлiсь уна он босьт: кытöн пуксян, сэтöн и чеччан, нем сэтшöм мортыскöт кутчисьны, но Ульяныслöн сьöлöмыс места оз адззы, мужикыслiсь ни юалö:

— Мый сiя тэ вылö бöрöн кайö?!

— Кыв да эн... Бöб юрнас ась лёбö, — висьталiс Степаныс, эз юöрт иньыслö, что Митрейсö штрафуйтiсö, мыля мöд неделяас эз уджав öтiк лун, öшлiс гортiсь пишальöн.

Лэбзисö туриэз, и чожа ны бöрсянь ойсянь ловзисис кöдзыт тöв, сiя пöльыштiс лажмыт кымöррезöн да ыркыт зэрöн. Дыр кежö дзугсис погоддяыс. Степаныс ойесö эз узь: петас ойся-ойшöр посöдзас, видзöтö, кыдз кымöрас куйлö тöлiсьыс, ружтö, видö, мыля тöлiсьыс öшалö гатш — дзугсьö сэк погоддяыс, быд лун кисьтö-зэрö.

Бригадирыс отирсö иньдiс вундыны, отсавны Пальниклö, кытöн ыббес вылын ендiс вель уна сюыс. И инькаэс мужиккескöт вонясянöдз тальöны нять, вундöны — быд шепсö öктöны кайез моз да видöны мöд бригадасис отирсö, мыля нiя дышöсь, эз вермö аскадö дзимлявны сюсö. Мый керан, кöр öтiк бригадаын уджыс оз джöмды, а мöдiкын берездасьö? Тиминаын и сэтöн отирыс не öткодьöсь: Митрей, шуам, аслыс, Степаныс — мöдöрö, öтыс — вöрö, мöдыс — колхозö. Кыдз Тиминаын вундiссис, Митрейыс кышалiс спинаыс сайö пишаль и öшис гортсис.

Олöны тиминса, быд мортыс син одзын, сувтасö вундыны öтiк лекаö, инькаэс лэбтасö косви дубассэзнысö, медбы паськöмныс вывтi эз нятьöсьмы и уджалöны, некöр спинанысö гыжьявны, киэзныс пыр уджын, но öммезныс осьтаöсь, Ульяныс Василисалiсь юасьö:

― Василиса, уна Митрейыс сьöлаэсö вайис?

— Котомаас тыр, — гажтöма содтö. — Мый меным сылöн сьöлаыс? Кушта да солала, а яйсö ог адззыв.

Тöдö Митрейлiсь мывкыдсö соседкаыс, но юасьö эд, осудитö:

— Мый сэтшöмыс?! Мыля он адззыв? Керкуас эд тэ хозяйкаыс.

— Эмöсь миян кодь хозяйкаэс рос угöлас... — гажтöма горöтчас Василисаыс. — Няньсö пызаныс вылiсь юасьтöг он лысьт сёйны...

— Ой, дева! Миян сiдз оз кер! — Ошшасьö Ульяныс. — Ваяс — на! Мый пö керан, сiйö и кер.

Василисаыс пондiс бы ошшасьны жö:

— Ми рыжöй поныс вылö ог надейтчö, ог видзчисьö, кöр сiя коскаэсö йирас да шупкас миянлö. Толяыс ни вöрсис вайö. Тöн рытнас важ пишальнас куим сьöла пыртiс... Яйтöг ог олö.

— Толяыт тэнат не айыс сьöрья. Чож зонкаыс, етша баитö, но керö. — Гусьöнмоз ни, мед некин эз кыв. — Кума... Эн лöгась... Эн жö, поди, грешит?.. Мыся, Толяыс Митрейыслöн я?..

— Господи-и-и! — повзис Василисаыс. — Мый тэ, кума, и кöтан?! Тэ Степансö вежлiн али эн кинкö вылö? То-то... Еныс чарöтас эд... Кыдз Христосыс шуис, сiдз и олам...

— Сiдз, Василиса. Кöть горзы, кöть сьыв сэтшöм мужикыс сайын... Жаль тэ меным. Но тэ эн горзы, чожа челядьыс быдмасö, и Митрейыслö кушман пуктан, мед панялö ассис.

Ошшасьöны маммес зоннэзнаныс. Быдмöны нылöн зоннэзныс сэтшöмöсь, что некытчö оз йöрмö: ештöны котрасьны и вöрö ветлöтны, а кресенняэзöн, кöр гортын, пуксясö вöввез вылö да койöны öтлаын ыджыттэскöт ыббез вылын: трудодень шедтöны.

Степаныс вундö инькаэс бокын, öт пельнас кывзö, мый лёбöны нiя, мöд пельнас мужиккеслiсь судьбасö торйöтö, кöдна ружтöны сэтöн жö, но оз баитö. Чышкыштас бригадирыс кымöс вылiсь ньылöмсö, шынньöвтас ас кежас да думайтö, что сылöн отирыс бригадаас кöть кытчö — биö и ваö, и йöз мужиккес вылö ассиныс оз вежö. Кытiсь бы эшö Василисасö да Ульянсö адззан? «Митрей тэ Митрей... Юала, ожось, ме тэнчит, кыдз тэ вöралан да семьятö сьöлаэзнас вердан?..»

А кымöррес сiдз и гудыртчöны, сукмöны, лэдзчисьöны лажмытжыка, вöрыс весьтын öшалö сук да кöдзыт туман. Чожа пондö пемдыны. Инькаэс пондöны модьны, что колö бы гортö ни мунны, что пемытiнас умöль жö тальны нятьсö да и учöттэс... Не сад, не ясли — эд эз вежöртö, мый сiя сэтшöмыс... А кинкö эшö касьтылiс ошшезöс, кöдна таво ёна ни шырзисö зöрресö. Бригадирыс торкис ни сюыс дынiсь зверьсö: лабазсянь лыйис. Сэк Степаныс вöралiс зоныскöт. Чож, видзöт, быдмö Борисыс, кöть уджавны, кöть велöтчыны, кöть вöравны... И сьывны да йöктыны кужö.

Думайтö зоннэс йылiсь бригадирыс, аслас киэс пизьöны-уджалöны, вундöны сё, а инькаэс чирзöны ни, корöны гортö.

Пемыт. Коккез увтын из торрес оз тыдалö, а бригадирыс сё бы уджöтö, модьö: «Эшö невна, инькаэз! Видзöтö жö кымöррес кытшöмöсь... Ойнас кыдз тапкас лымыс, сюыс шедас увтас...»

— Миянлö не сёйны, — горöтчис кинкö, — пальнишанаыс асьныс жö сёясö...

— Кин бы эз сёй, но нянь кок увтаным! — мурзьö бригадирыс. — Уджалыштам ышö!

Уджалöны мымдакö, вишыкасьö Мититлöн иньыс ни: «Степан, оз ни тыдав эд шепыс...»

— Сiдз бокыт и сайкалö! — нерö Мититiкасö Спирья старикыт. — Лок, ме шонта. Томся кадöс вöтла.

— Мый ни, поди, тэись, дед? Косьмöмыт ни урбöж моз, а сё эшö нюкьясян бы...

— Ме?! — чеччöвтiс бы суслоннэс коласын старикыс, но нинкöммес лякасисö сёяс и сапкисис кыминь.

Инькаэс öдззисö серавны сiдз, что мыдзныс öшис, топ вунöтiсö гортныс йылiсь.

Кымрасьö. Руыс кöдзыт, коккез увтын нять, муö вöйöны коккез, нинкöммез нять сорнас пуд сьöкытаöсь, но тиминса уджалöны, вундöны сэтчöдз, что гортö мунны öзтöны симöттэз, биыс югдöтö туйнысö, и мунöны гортö уджалiссес, коккезныс увтын шлёчкöтö гöппезын ва. Мыдзисö инькаэс, но гортын эшö колö вöдитны пода, вердны челядь — уджыс эшö видзчисьö пöттöдз. Талун уджалiсö, ашын бöра колö уджавны — не кресення, не праздниккез... Но некин оз норась, оз горзы, бытьтö сiдз и колö. А кыдз эшö колö? Кин тэнö вежас ыб вылын? Или чапкан уджавны, пиннетö öшлан тув вылö и он понды сёйны, эд тэныт няньсö некин оз вай?

Мыдзöсь инькаэс. Зэрö и бöр дугдö. Пемыт кок увтын, ва, нять — синнэз бы эн ни осьт.

— Инькаэз! — кылö Спирьялöн гажа голосыс. — Сьылыштам, поди?! — Сэтöн жö чиння голоснас ыкöстiс. — Эх, чужи да быдми сьöд вöр шöрын да ой...

Во дедыс! Вöрыс кыдз саймис, лэбтiс юрсö и пондiс кывзiсьны.

«Чужи да быдми сьöд вöр шöрын да ой!» — старикытлöн голосыс, кыдз томлöн, кыдз петух китöстiс, повзис кöз вылын тупка: кайыс паськöтiс борддэсö и отирыс юр вевдöрöт лэбзис зэв. Сьыланкылыс гажöтiс ойсö, олансö. Кытшöм ни мыдзöсь уджалiссес, но песняыс топ юкталiс тагья ырöшöн, козьналiс вын, сьöлöммезын гурнитiс гаж, кыдз ыджыт праздник коста, кöр Тиминаö чукöртчасö сымда отир, что оз тöрö керкуэзас.

Поснита да кöдзыта пызитiс-зэрис. Вöлi бы недолыт, но уджалiссес сьылiсö, и медодз гора голосыс кылiс старикыслöн. Инькаэс сьылiсö, но туйыс эз волькам, эз югмы, эшö гортöдз колiс тальны да тальны нятьсö, сэк Мититiкаыс жö горöтчис: «Дед, сё тэнат öтiк песня — чужи да быдми сьöд вöр шöрын... Вай мöдiкö ыкöстам и пондöтiс: «Сотня юных бойцов из Будённовских войск на разведку в поля поскакала...»

Ылын ыббез вывсянь Тиминаöдз, ылын да матын: эз казялö кыдз кадыс чулалiс туйын.

Луннас деревняыс суналiс, только раз-мöд китсасис петух да пон вылö ыксiс Куличика-старуха и сэсся шы эз вöв, а кыдз пондiсö пемытiнас гортаныс сибöтчыны уджалiссес, оланыс саймис, гажмис, саймисö керкуэс, пондiсö баксыны мöссэз да баляэз, паныт инькаэслö котöртiсö поннэз, китсасисö петуххез.

Отирыс лунтыр спинанысö эз веськöтö, уджалiсö, мыдзисö и гортын шоччисисö бöра жö уджын: кин мöс высьтiс, кин петiс йöрö да мыйкö гуддисис, кöть и нач ни тыдалiс умöля.

16

Оз узьсьы. Видзöтi потолокö, тöлiсь югöр вылö и баитi бабкöт. Сыбöрын петалi öтöрö, видзöтi ойлiсь тöлiся да гажа олансö, вевдöрись кизерик кымöр палачоккез, кöдна югьялiсö золотöй рöмöн и тэрмасисö-лэбзисö ойлань. Руыс гора, кылiс, кыдз ружтiс Лолым ю, топ узис сьöкыт удж бöрсянь. Керкуэс коласын вуджöртчис-лэбзис кай. Вöрын чирнитiс кöч, натьтö, шедiс тупка гыжжезö или руч öмö. Картаын рöмысьтiс мöс.

«Но, баб! — дивуйтчи ас кежам. — Пода видзö... Быль эд, тыдалö, жаднöй, не весь тэнö Митрейыс кулитö. Кин жö öнi эшö олö вöр шöрын да видзö пода? Ме бы... Мый сэтöн баитны? Велалiм чöскыта сёйны, небыта да шоныта узьлыны, но уджавны — асьнымöс ог вийö, и ась старухаыс гумлалö да куртö асланяс! Пöтас жö кöркö...» Эна думаэзöн пыри керкуас, юалi пöрисьыслiсь:

— Баб, тэнат быль мöс эм?

— Куима вöлiсö да кыксö нуöтiсö ни...

Вот тэныт и старуха! Адззылiт, мый керö... Начкылас мöссö, яйсö кыскас городö, вузалас и на — деньга! Грешнöй, жаднöй дума медодз бöбöтiс керны сiдз жö — кокнита богатсявны, но сэтöн жö повзи уджись: «Мед кинлö колö... Ась гумлалö!»

— Не менам подаыс! — серöмтчис бабыс. — Совхозыслöн... Гожумнас татöн видзисö куканнесö, нуöтiсö, а куимыс кольччöмась... Дыр шатласисö Торья кушыс вылын, öнöдз топ некинлö эз колö, а меным подаыс жальöсь... Кутi да и йöртi и пондi вердны. Спасибо ась висьталöны, что эг дышöтчы, гожумнас мымдакö весь овтöнням турунсö кери, то мый бы и вöлi?! — кивзыштiс, кыдз спинаыс кузя вачкисö. — Ог ни вермы, а сё колö. Кытчö воштiсян, кöр бригадирыс лякасис: «Кер да кер турунсö!»

«Вот кыдз! — бöра эд эг вежöрт бабсö, осудитi, что сiя пöрисьувья керöм турун да вердö совхозлiсь куканнез. Думаэзнам осудитi пöрисьсö, а сiя кыдз дорйис асьсö:

— Мый меным сэсся керны? Мымда верма уджала, отсася бы отирыслö...

— Вештiсö жö?

— Вешты кöть эн! Мый ме деньганас кера? Пензасö ¹эд сетöны... Тöдан, кöркö уджалiм трудодень вылö, öтiк руб эг босьтö да олiм, а öнi уна босьтам да пыр кулам, сё етша. — Думайтöв-керис и содтiс. — Öнi, зон, томмес асьнысö миян моз оз вийö, а кöркö... Шоччисьны эг кужö, уджалiм, кытчöдз коккез вылiсь эг усьö. Талун, видзöт, пенза босьтöны пятьдесят год вылын, рожаэзныс гöрдöсь — невестаэз! Кыдз петасö пензаыс вылö, совхозас чуньöн ни оз ляпкö.

Этö ме, баб, ачым тöда и адзза, кöр отирыс сьылö да олö, няньыс понда некин ни оз тöждiсь, вöлi бы деньга.

— Деревняас некинлö ни лоис уджавнытö, кольччисö ме кодь старухаэс. А мый миянiсь? Ме тай шуи ни, мыся, уджавны некинлö, а чöскыта бы сёям, яйтöг öтiк лун бы ог олö, а кытöн сiя? Кин быдтö? Ой дышöсь, кага, отирыс лоисö! Кöркö...

Мый кöркö? Тешитчы, пöрись, ошшась важ оланнат, кöда нем вылö эз туй, некинлö öнi оз ков — сералам.

— Деревняаным керкуэс сулалiсö öтiк лёдз, — ошшасис бабыс. — А отирыс... Олiм, кыдз öтамöдным бердö кöрталöмöсь, некин гортiсь эз пышшы, и подасö мымда видзим! Веритан он, Тиминааным, этö öтiк бригадаокас, вöлiсö кыкдас вöв, эшö куканнез витдас гöгöр. Сэтчö содты баляэз, — серöмтчис. — Хозяинö тай öтпыр вöлi шуа: «Инькаэз, вайöтам гуссез... Вот яйыс! Оз ков вердны, асьныс Лолымыс дынын адззасö сёянсö» — юрнас öвтыштiс. — Жаднöй жö вöлi эд Степаныс! Сё уна колiс. А мый? Поди, гуссесö и вайöтiм бы, эг повзьö видзнытö, но сэтчö ачым жö нырас сюйыштi, мыся, тэныт, öнджа, бöжа бессэс колхозас оз я ышö пондö ковны? Нiя пö юр ыжда кольттесö кольттялöны... Вежöртiн кытчö баснисö кежöтi?.. Сiдз олiм. Овны мый? Водiн — чеччин, сэтчин да татчö, и луныс чулалö, некöр спина гыжьявны, а пондыв кö видзны öтiк мöссö, некöр эд лоас узьнытö, уджавны пондас ковны.

Висьтала, что ми видзам жö мöссö, артильöн сы понда уджалам — этö айö, мамö, иньö, ме... Сьöкыта йöлыс шедö, и нем меным висьтавны, кыдз колö видзны подасö, но...

— Вот, — серöмтчис пöрисьыс, тэ кылiн ни эд, кыдз ми олiм... Гуссесö, мыся, эг адззö, ны местö курöггез бердö кутчисим — етша гортын вöлiсö дак колхозас пондiм кольттьöтны. Абу ни курöгыс пода бы... Шогöт жö ныкöт вöлi: быд угöлö кольттялiсö, поннэс и катшаэс кольттесö сёйисö, но тырмис ракаэслö и отирыслö, телегаöн, мыся, посаданым кыскалiсö, вöзйисö больничаö да школаö: «Ньöбö, роднöй да любимöйез! Деньгасö уна ог корö... Öтiкыс понда кытöнкö копейка-мöд, а нiя, вежöммез: «Асьныт сёйö! Миян кольтьсяняныт сьöлöммезным гудрасьöны...» Вежöртiн? Сiдзкö, отирыс пöтöсь вöлiсö. А öнi курöггесö ог видзö и кольтьыс абу... Кокнита, мыся, пондiм овны, кокнита, кага! Али дышным нач ни вожасис пельпоннэзным вылö?! Мыйкö ме думайта и ог бы вежöрт.

Окав бы тэнö веськыт кыввет понда, баб, ежели бы нiя олансö веськöтiсö, иньдiсö бур туйö, но ми ог ни тiян туйöт мунö, огö...

Каньыс комын пондiс орсны шырöн, кöдö, думайта, кутiс джоджулiсь.

Кывза пöрисьыслiсь висьтасьöмсö, видзöта öшынö тöлiсь югöр вылö. Тöдвылам одзза кад, кöр вöлi миян сельсоветын заготовитель — Нилогов, пöрись чужöма ни мужик. Сiя вöлöн-телегаöн гожуммезнас пыр ветлöтiс деревняись деревняö, кыдз цыган, öктiс кольть, вурун, ви, кучиккез да öтiк-мöдiкö, мый эз ков гортын. Вот локтас, шуам, Нилоговыс больница öшын увтö и кеймисьö-горзö: «Челядь, босьтö жö курöг яйсö... Кольттесö босьтö!» А ми пöтöсь курöг яйнас, и кольттес, во! Некытчö воштыны сёянсö, сiйöн старикыслö веськыта шырзям: «Мун тэ, дед, син одзись да ачыт сёй!..» Заготовительыс горзытöн телеганас дзурка-вирка мунö районö, кыскö, мый отирыслiсь öктiс. Кытöнкö, поди, сiйö и видзчисьöны... Öнi мый? Öнi миян больницаын мукöдпыр кольтьсö колö кошшыны синваöн, кеймисьны сымда сэтчин и татöн, что эн бы и уджав ни. Городын кольтьыс эм, а миян абу... Бытьтö сералам олансö, а сiя миянöс сералö öддьöнжык.

— Мый сералан? — юалiс хозяйкаыс.

Пондiм баитны, что подасö ог любитö видзны, а сёям бы. Сьöкыт, баб, турунсö керны, сьöкыт жар гожумöн ытшкисьны, тöвнас доддявны вöв, сiйöн эд колхозсис порссесö и вузалiм, баляэзлö гортаныс мöртiм пурт, курöггезлiсь кералiм юррез, колим только мöссэз, а нiя мылякö йöвсö сетöны етша. Умöля я мый я вердöны? А, поди, сэтшöм порода видзöны, что мöссэс уна сёйöны, но етша йöвсö сетöны, эд суткинас высьтöны нёль да вит литраöн — не мöссэз кыдз, а кöзаэз... Натьтö, мыся, порода миян сэтшöм... Неöтпыр ни вайöтлiсö мöдкодь мöссэсö, на мылякö виль подаыс оз йыв: олыштасö нетеллес и öшасö, сорласясö асланым мöссэзкöт и одзлань сiя жö — чилькöтöны нёль да вит литраöн.

Ась, ме йöвсö фермасис ог сёй. Эм миян гортын мöсыс, эмöсь курöггез, карта вылын баксö баля, но... Мыйись-мый... Кулас кö айö, натьтö, эд ашын жö янсöтча сюра-бöжаыскöт, поди, коля öтiк петух, мед сiя, мымда вермö, сымда и китсасьö, ошшасьö, что деревняным нач эшö эз кув.

Баитöв-керим асланым пода йылiсь и бöра кутчисим совхоз бердö, бытьтö ми сэтöн жö уджалам, кöда олö, кыдз нятьöт мунö-кыссьö, мырсьö — не доход, не приход, государствоыс сетас деньга, сёясö-юасö да вились босьтöны. Миллион ни долгыс... И мыля жö одзжык колхозным сетiс государствоас, а государствоыслiсь эз босьт, а öнi ог сетö, а босьтам? Кысянь этатшöм оланыс пондöтчис и мыля? Кин миянöс пöртiс вежöммезас, что öмным пыр осьта, пыр чирзам: «Вай да вай!» Поди, тэ тöдан, баб? Тэ эд унажык олан, а ме мый? Но бабыс тöдö öтiкö: колö уджавны, оз ков видзчисьны, кöр локтас йöз дядь да сюйыштас öманым няньсö.

Бабыскöт ми бы лöсьöтiм деревняын олансö, одззамоз жö бы видзим уна пода, медбы быд бригадаын видзисö не только мöссэз, но и баляэз, курöггез да порссез. Отирыс бы гортiсь одззамоз эз пышшы, уджалiс бы, кыдз уджалiс кöркö, сэк бы городас яйыс вöлi. А кытiсь вайны сiйö отирсö, кöда абу ни? Кытiсь ни кошшыны Тимина кодь деревнясö, кöда тырис петшöрöн? Кин пондас гöрны да кöдзны чапкöм муэсö, кöдна тырисö и тырöны вöрöн, кöр быд муокыс кöркö козьналiс сю?

— Кывзы!.. — видзчисьтöг татшкис-юалiс бабыс. — Мыля жö миян öнi челядьсö учöтсянь оз велöтö уджавнытö? Видзöтан кö, быдмöны, жöниккез ни, а сё котрасьöны вешьянтöг бы... Стыд и видзöтны сэтшöм весь олiссес вылö, а миян быдмисö жö... Айныс сьöрись этатшöмсянь эз кольччö, — мыччалiс пызан увтiсь джек вылö. — Тöдвылын сiя, кыдз вайöтас айныс вöв, Иваныс öт бокас, Борисыс — мöдас, ниртчöны айныс бердын, никсöны: «Ая... Пуксьöт Синькоыс вылö... Ая, ме бы вöвнас ыслася...» Во кыдз вöлi! Пуксяс Степаныс вöлыс вылö, одзас пуксьöтас Бориссö, бöрас Ивансö, и куимöн мунöны уджавны... Челядьыс зiэз моз лякасисö вöлыс бердö, школаö мунтöдз пинялiсö ни, эз норасьö, что сьöкыт, что одзöв нiйö нярьялöны... А öнi! Не гортын, не школаын, пасьтасясö велöтiссес моз жö и чатрасьöны деревняын. Срам!

— Олан сэтшöм, баб, вöтiс! — висьталi бабыслö, бытьтö сiя оз тöд, что сэтшöм олан локтiс, эг понды разьны ассим думаэзöс, мыля да кыдз, кöр аслам челядьыс эшö учöтöсь, сiдз жö велöта овны, кыдз йöзыс, эм нылöн дед, баб, мам — быдöнныс асмознаныс, асланяныс, а радиоыс да телевизорыс мый вылö? А кытчö пондас велöтны школаыс? Мый пондасö лыддьöтны книгаэзiсь да газетаэзiсь? Оз жö пондö этна и нiя челядьсö одззамоз уджöтны-нярйöтны... Сiдз что, баб, олам ми тэкöт, уна тöдам, но некин миянöс оз кывзы.

— Абу ни öнi одззакодь отирыс, — тöждiсьö пöрисьыс, ми бöра сыкöт мымдакö шы ог сетö, олам думаэзнаным, но недыр: сэтöн жö хозяйкаыс веськыта юалö. — Мый жö бы вöлi, эз бы кö отирыс торксьы войнаыс вылын? Натьтö, эд мöднёж бы олiм...

Ой, баб, ме эд нiйö отирсö тöда и ог, топ кытiськö адззылi вöтöн... Тэнат басни сьöртi жö нiя вöлöмась уджаöсь...

Дума пондö бергавны война гöгöр, нiя отир гöгöр, кöдна вöлiсö бы талун ловьяöсь, ась и пöрисьöсь, но ловьяöсь. Мый бы нiя уджалiсö, колисö я ассиныс деревняэзнысö, талуннямоз жö я овнытö бы велöтiсö зоннэзнысö и внучеккезнысö? Бабыс эз бы горзы зоннэс понда... А öнi вот кольччисö Тиминаö кык морт — Ульян баб да Митрей дед, и нiя öтамöдныскöт люкасьöны, оз тöрö.

Война годö кыдзкö Степансö корисö райисполкомö. Бригадирыс доддялiс вöв и гöнитiс районö, пырис райисполкомö председательыс дынö, баитöв-керисö кыкöн олан йылiсь, бригадирыс норасис, что отирыслö лоис сьöкыт, топ тиминсаыс тшыгйöн лöсьöтчöны кувны (кытшöм бригадир бы сiя вöлi, кöр кольччис няньтöг?), председательыс видзöтiс-керис Степаныс вылö и веськыта юалiс :

— Степан Андриянович, тэ мужикыс юра, ме тöда, что весь горзан сiдз. Висьтав честнöя, сюыс эм эд тэнат?

— Кöдзысыс вылö видзам, — сьöкыта ловзисис бригадирыс.

— Кöдзыс...

Бригадирыс райисполкомас эз лок, медбы вöзйыны-козьнавны кöдзыссö да тулыснас кольччыны рака моз, но предыс модьö:

— Отсав, Степан Андриянович! Отирыс тшыгьялöны...

Синнэсö бригадирыс бергöтiс мöдöрö, шуис: «Ми эд сiдз сюсö сетам...»

— Эшö колö, Степан Андриянович, — кеймисьö райисполкомись предыс.

Степаныслöн сьöлöмыс вылын пöим: кöдзыссö ни мырддьöны... Дума сёйö: «Мый пондам кöдзны?! Кыдз одзлань овны?! Сэтчин вийöны и татöн смерть...» Бригадирыс ас пондасис оз тöждiсь ― отирыс син одзас, медодз нылö мыйкö колö висьтавны, бöбöтны кыдзкö, что миянлö сьöкыт, но олам эд, олам... Вежöртасö я тэнö, бригадир, тиминсаыс, оз я шуö, что тэ нiйö вузалiн? «Кöть мый, председатель, но медбöрья сюсö ме ог вермы сетны!» — думайтö Степаныс, а мöдыс веськыта видзöтö синнэзас, не оз вид, не оз кеймись ни, а видзчисьö, топ ачыс кувны жö лöсьöтчöм... Ыкöстiс бы, кöсйисис бы нуöтны гортiсь, кыдз врагöс, а сiя — синнэзнас корö, синнэзас председательыслöн гижöм, что не аслыс — отирыслö колö.

Степаныс тшыгьявлiс ни и тöдö, кыдз отирыс тшыгьялöны. Тöдвылас медодз усис, кыдз сiя Тиминаын овтöн ни öтпыр арнас медодзза лымыс вылöт мунiс вöравны. Гортсяняс веськыта Усолье туйöт заргисис вöрö-волокö. Мунö вöралiсьыс да небыт лымыс вылiсь синйö зверрезлiсь следдэз и адззö, что рытнас эшö одзас мунöм морт: лымыс мымдакö тыртöм ни следсö, но тöдчö... Сьöкыт муннытö виль лымыс вылöт: тальччан и коккез увтын нять, нильыг, гöппезiсь резсьö ва, но Степаныслö нятьыс да ваыс кыдз абу, сiя шупыта мунö, не сiдз, кыдз тöн сы одзын мунöм мортыс, турьялöм да öвтчöм — несьö код, несьö сэтшöм мыдз, что асьсö ни бура абу вермöм видзны, но и мед... Мый вöралiсьыслö йöзыс? Мед ветлöтöны кинлö да кытчö колö, а сiя мунö да кывзышалö понсö, оз я Бускоыс понды вувтны урöс, ась таво уррес и етша, кытöнкö öтi-öтi, но вöралiсьсö сьöлöмыс кыскö одзлань, надейтчö кытiськö адззыны не урсö дак туланöс. Шупыта мунö вöралiсьыс — коккес чожöсь, пеллес кылöны бура, синнэс лэчытöсь. Степаныс вуджис логсö, кайис грива вылö и сэтöн лапья кöз дынын пеляс павкис шы, кыдз кинкö шыасис киж-каж: никсыштiс зверь или кивзыштiс морт, медодз эз вежöрт, но сувтiс и пондiс кывзiсьны. Вöлi лöнь. Шоча кышöтiс — усис лым.

Пистöггез шыасьлiсö да быркайтiсö кöз вылiсь кöз вылö, сэсся кундöм вöрыс, нем эз кыв. Но, чу! Кöзыс увтын эд бöра кинкö жексыштiс ловья. Степаныс чожа лэдзис пельпоныс вылiсь пишальсö, шагньöвтiс кöзыслань и... лымыс увтiсь пондiсö тыдавны мортлöн кок ныррез, бырöм нинкöммез (нямöттэс тыдалiсö нинкöммес пытшкись)... Кöть кин бы сэтöн повзис, öшис, и вöралiсьыс медодз повзис жö: тöдiс эд, что мортыс битöг лым вылас оз бы вод жö... «Господи, прости!» — думаэзнас пернапасасис Степаныс, шагньöвтiс, медбы видзöтны кинлiсь еныс мырддис олансö, абу я кинкö тöдса... Шагньöвтiс вöралiсьыс шаг и кулöмыс бокись казялiс кагаокöс, кöда веклясис мамыс бокын, кыссис бы моросыс дынö, тырппезнас чупкöтiс-нимасис бы... Мый и лоис сэтöн сьöлöмыс?!.. Степаныс ачыс эз вежöрт, но нач эз бöбмы, перытжыка шагньöвтiс кагаокыс дынö, кеписьтöм киэзнас босьтiс сайкалöм ни мортоксö, малыштiс юрсö, жмитiс моросыс бердö, ловзисис рожаас. Учöтыс веклясис кынмöм-тувдöм гаг моз, эз осьт синнэсö, топ лолалiс ни умöля, бöра вöрöтiс тырппесö — кошшис няня...

— Мый лоас? Мый нö керны?! — öшис Степаныс, сувтöтiс кöзыс увтö пишальсö, сэтчин да татчö... Пöрччалiс гунясис киззесö, жмитiс моросыс бердö кагаоксö, зепсис ¹кыскис няньтор, пондылiс бы вердны, но мöдыс няньсö öмас эз кут и синнэсö эз осьт.

Поныс дынас эз вöв. Усис жагвыв лым, кышöтiс кöз уввес бердын. Степаныс видзöтыштiс öтмöдöрö: кöдзыт, уль ру. Би бы öзтыны, но матын не кöс мыр, не кöс уввез... «Мый жö керны? — думаэс чеччалiсö и нерисö, кöр гортöдз куим верста гöгöр (верстаэзöн меряйтiсö этö туйсö). А мый сiя вермас керны вöрас кагаокнас, кöр гортын учöттэскöт етша вöдитчö — пыр мамныс да мамныс? Сэтöн жö сöтiс дума: «Гортö колö, Степан! Инькаэс дынö! Буско-о-о!» — шутньöвтiс поныслö, кагаокнас одзсис вожмöвтiс колода, нильдiс, усис, чеччис, сьöвзис, ловзисис пиас (ловнас шонтiс бы учöтсö) и пондiс везйыны гортлань, но чожа баитсьö, а жагöн керсьö: виль лымыс коккез увтын нильыг, лымыс увтын нять да ва — шаг одзлань, шаг бöрлань, но суййис-мунiс, натьтö, ыбыс дорöдз локтiс ни, тэрмасис и сiдз пымалiс, что ньылöмыс визывтiс кымöссис, ачыс сiйö и керис, кинас пешлiс моросыс одзись кагаоксö — öт синыс видзöтiс одзсис, мöдыс мороссис, но эз адззыв, эз казяв, кöр дугдiс моросыс бердын вöрöтчыны чочком юра нылочкаыс.

Лöнис кагаокыс. Степаныс паськöтiс моросыс одзись поласö, киас босьтiс учöтсö, кöда эз ни лолав, сырлёль, но дзик эшö вöлi ловья — узьö и узьö... Сэтöн вöлись и повзис, топ кулiс аслас нылокыс, киас кулiс, а сiя нем эз вермы керны. Сэтöн жö пуксис колода вылö, кулöмсö видзис öт кинас пидзöссэс вылын, мöднас гардiс чигарка, заргис öмас, пондiс куритны.

Вöралiсьыс горзiс. Бускоыс пукалiс лымыс вылын одзас, никсiс, легралiс бöжнас, кыдз вöлi виноватöй хозяиныс одзын.

Сiя жö лунö Тиминаын мужиккес керисö гроб (одзжык дзеблiсö ни кулöммесö, но вöрын гроббесö эз керлö, а öнi керисö), мамсö да кагаоксö водтöтiсö öтлаö, гарйисö гу сiя жö кöз увтö, кытöн йöз мортсö вöтiс смертьыс, и дзебисö. Кыдз ассиныс, кöть некин эз тöд, кытiсь вöлi мортыс, кысянь локтiс.

Тиминса тöдiсö, что мортыс кулiс тшыгсянь.

Дзебисö кöз увтö мортсö, сулалыштiсö шойна дорын тиминса, чышкисö синваэзнысö, жалейтiсö, мыля сiдз лоис, кöр инькаыслö колiс бы овны да овны, Степаныс жö горöтчис: «Мыля нö инькаыс орддис Тиминанымöс? Пырис бы миянö, ме бы пöжалöм картошкаöн да вердi... Лонтi бы печка, шонтi, а öнi мый ни?..»

— Кагаокыслö бы пань йöв да адззи, — синваэсö чышкис Ульяныс.

— Да ме бы гырнич тыр одзас йöвсö сувтöтi, — висьталiс Спирья дедыс.

— Вердiм бы пöт и баня лонтiм! — шуис Игнатика, бытьтö кöзыс увтö дзебис ассис сойсö.

— Да-а-а, — куритiс-керис Митрейыс, шлячкыштiс кывнас. — Да-а-а, инькаэз... Тöн рытнас эд сiя миянö пыралiс...

«Сiдзкö, кулöмыс, кöр вöлi ловья, эз орддьы Тиминасö. Грехыс! Ой, господи! Митрей, тэ нö мый?! Мыля сэтшöм?!» ― быдöн осудитöмöн пондiс видзöтны Митрейыс вылö, кöр тöдiсö ни, что Митрейыссянь позьö видзчисьны кöть мый.

— Вöлiсö... — сибдöм голосöн горöтчис Митрейикаыс. — Пырисö керкуас, юрбитiс мамыс еныслö, эз ешты пуксьыны западняыс вылö, ошыс вижлöк öмнас вашöтiс керкусис, пондiс эрзыны: «Дышыт уджавнытö петö! Сiйöн и шатласят... Нем менам сетнытö абу! Кытiсь локтiт, сэтчин и мунö!» Сiдз эд тöн рытнас вöлi, Митрей?

— А мый нö-ö-ö-ö... — унньöвтiс Митрейыс. — Ветлöтöны... Быд лун, ыбöс дзирыс бырис ни...

Сiдз вöлi. И кинöс сэтöн осудитны, шуны и видны? Митрейсö я öтнасö? Оз кужö висьтавны. Öнi Степаныс оз-оз да вöтасьлö киас кулöм кагаоксö, бытьтö сiя ловья, корö сёйны, и öнi, кыдз пондiс райисполкомсис предыс корны сюсö, бöра бригадирыс одзö мыччисис кагаокыс, бытьтö кулiс сы понда...

Уна ни тиминсаыс отсасисö отирыслö и эшö колö отсавны — ачыт эн сёй да йöзсö верд. Сiдз я мый я, Степан, миян керсьö? «Сiдз! — висьталiс аслыс бригадирыс, районсянь жö локттöн Тиминаö сьöрас вайöтiс доддя вöввез, сувтöтiс вöввесö колхознöй чомыс дынö, осьтiс ыбöссö и — нате! Куралö...

— Да-а-а... А мый ми? Ог тшыгьялö? Кынöммезным йöзлöн али мый? — сэтöн и эм Митрейыс, киэс вевдöрын, горшыс ошлöн кодь.

— Дугды, Митрей, йöз отирыс дырни... — бригадирыс падтö Митрейсö...

Веськыта кö висьтавны, быль тиминсалöн кöдзысыс кольччис тю-тю... А сёяныс йылiсь ог ни пондö баитны, кöть татöн эшö вывтi эз тшыгьялö, и, натьтö, тшыгьявны оз пондö, кöр еныс шуöм овны пöт кынöмöн: тöн бригадирыс йöртöттэзiсь йöз отирлö козьналiс сю, талун асывнас чеччис пемыт, спина сайö кышалiс котома, петiс керкусис, шутньöвтiс поныслö и абу.

Иньыс некöр эз юась, кытчö да дыр кежö я Степаныс мунö вöрас — олас талун, ашын, кöть неделя вöрсис оз петав, но локтас эд, ваяс или оз кинöскö, но оз горзы, оз норась, мыля сiдз лоис — добычаыс эз шед, только шуас жö: «Ась. Мöдöтпыр пантасяс...»

И талун Ульяныс мужиксö вöрас кольлалiс бур думаэзöн, кöть и асылыс вöлi кымöра, лöнь, дзик погоддяыс мыйкö думайтiс, суналiс да лöсьöтчис уджавны. Сiдз и лоис: шондi петан гöгöрас вöрын ловзисис тöв, пондiс дзуртны пу, час эз чулав и лэбтiсис сэтшöм пурга, что не син, не пель... Вöрыс пондiс дзуртны, ружтыны, кыдз норасис аслас сьöкыт олан вылö, но Степаныс пургасис эз повзьы — сы сьöртi погоддяыс.

Шушкöны кöззэз, дзуртöны пöрись пипуэз, гардчö лым, лямпаэз увтын оз кыв, кыдз дзуртö лымыс — зэв сибöтчы зверьыс дынö, и сiя лоас тэнат!

Талун вöралiсьыс вöрас асьсö уна эз вий: небыт лымöт мунiс лямпаэзöн Лолымсай грива дынöдз, инмис вöрмöс следдэз вылö, гусялiс зверьсö, лыйис, бытьтö лосьсö вийис карта вылiсь. Рытнас рöма-дзара локтiс гортö. Тиминса адззылiсö, кыдз бригадирыс пельпоннэс вылын кыскис зверьлiсь лядьвей. И кин гажöтчис добычаыс вылö, кин адззис да эз, а Митрейыс бöра ватшкис: «Миянöс няньтöг колис, а ачыс пондас йитшкыны яй...»

Öтнас... А мый Тиминаын бригадирыс бытьтö öтнас и керö? Уджалö быдöнкöт, сёйö-юö öтiк пызан сайын, вöрись ваяс сьöла, сiйö масьтас да быдöннысö вердö, и öнi Степаныс чукöртiс бригадасö да нуöтiс вöрас.

— Шедам! — дрöжитiс Митрейлöн иньыс. — Некытчö ог мунö, ась сёйöны.

— Мед сёйöны, — Митрейыс кайис гор вылö да пондiс ружтыны, бытьтö коскыс висьö, вöрзьыны оз вермы, но и мед: нырыс кыз, да кынöмыс вöснит, некин тэныт гортат оз вай да оз понды силöй вердны.

17

Завидуйтi тиминсалö, топ нiя олiсö медбура, гладя. Быдöс нылöн вöлi, быдöс бур, ась эз вöв клуб да радио, но вайисö вöрись яй, сёйисö, кöть, поди бы, эз ков торкны зверресö.

Сёйöны тиминса вöрись яй, пöтöсь, оз тöждiсьö, что тшыгйöн куласö, а сэтöн — бац! Локтiс милиционер, бытьтö сытöг татöн эз кужö овны, медодз пырис Митрейезö.

Ульяныс адззылiс посöдзсяняс милиционерсö и сьöлöмыс бергöтчыштiс, сöтiс дума: «Яйсö кошшыны эд локтöны!» Öтöрсянь керкуö, Степаныс дынö — синнэс баралöмöсь и шуö: «Степан, милиция!» «Но и мый?» — тусь эз повзьы мужикыс.

— Митрейезас эд...

— Но и мый?

— Митрейыс эд яйысла эз ветлы! Кöсйисьöм пö норасьны.

— Но и мый?

— Судитасö эд!

— Но и мый?

— Айтöг челядьсö колясö!

— Нем оз кольö! — чорыта висьталiс Степаныс, кöть аслас моросас лоис недолыт жö, топ шедны вермас, а шедас кö, уна оз пондö баитны...

А милиционерыс пырис Митрейезас да сибдiс, олö керкуас и олö.

— Но жö ме котрася, — смевмис кодь ни Ульяныс. Ульяныс Митрейезас дыр эз ов: петiс, пырис и бöр гортö! Висьталö: «Митрейсö мöдöны гортсис нуöтны!»

— Мый сэтшöмыс?! — эз вежöрт Степаныс.

— Кыввес понда. Кытöнкö мыйкö пö баитöм... Кинкö чушкис, натьтö...

— Ветлам! — иньыслö висьталiс мужикыс.

— Эн мун, Степан! Öтлаын жö каттясö... — кивзö иньыс, но Степансö этатшöм оланас гортын он видз — петiс и абу.

Милиционерыс Митрейезын пукалiс лякöсь пызан сайын да мыйкö гижис, юасис:

— Кытöн сiйö баитiн?

— Кытöн? Да-а-а... — куритiс Митрейыс, рожаыс сьöдöтöм, сырсмöм, голосыс сибдöм.

— Тэк-так... — гажöн юасис милиционерыс. — Значит, сiдз... Няньсö государствоö бы босьтiсö, а тэ?

— Кытшöм лешöй государствоö?! — дорйисис Митрейыс. — Ворошилов нима колхозас пö кыскöмась да...

— Сёровно государствоö!

«Слава богу, — Степаныслöн сьöлöмыс вылiсь ыскöвтiс сьöкыт из. — Не вöрись яйыс понда... Но этасянь оланыс эз ло личытжык, кöр бригадирыс вылö

Митрейыс сiдз видзöтыштiс, топ мортсö Степаныс сёйис.

— Поедешь со мной, — рочöн висьталiс милиционерыс.

— Кытчö? — нач кизермис Митрейыс.

— Р-р-разговорчики!!

Мыйкö колiс керны, или Митрейытлöн быль эд оланыс овсяс и няньыс сёйсяс: кытшöм бы эз вöв мортыс, но асланыс. Степаныс кыскис зепсис кисет, нюжöтiс милиционерыслань, шуис: «Курит, ёрт».

Милиционерыс босьтiс кисетсö, гардiс чигарка, öзтiс, но чужöмыс сё сэтшöм жö лёк, бригадирыс думайтiс ни: «Ага, кокыштiн табаксö, öнджа... Сiдзкö, тэ морт сора жö, абу жö нач звировöй...», но и пондiс юасьны, кытiсь да кин аймамыс, кытöн быдмис да велöтчис, кыным год ни уджалö милиционернас. Мöдыс öтöрö да мöдöрö: кывнас чорыт, а тöдчö, что миян кодь жö деревняись, сiя няньöн жö быдмöм, нинкöммез новйöм, но, видзöт, шедöм уджавнытö этчö, пасьтöтöмась мортсö казённöй паськöмöн, и бытьтö сiя и лоöм, миян кодьсö мортö ни оз пукты бы.

— Öнджа!.. — Степаныс сэтöн кыдз саймис. — Кывзы, Пётр Емельянович! Этö эд... Ми эд тэнат айкöт Кöсваыс кузя öтiк тулысö вöр кылöтiм... Ваыс тулыссянь учöт вöлi, но и ми сэк пессим, но и нярьялiм асьнымöс! Быд керсö береггезсис выланым ваыс дынöдз кыскалiм, кула да понда тöдны, ог вунöт. Кыдз ни здоровьёыс Öмель ёртöлöн?

— Кыдз? Сё сiдз, — висьталö айыс йылiсь милиционерыс. — Сiя эд Армияын жö, нуöтiсö арнас, босьтiм öтiк письмо и сэсся нем эг кылö...

— Вот тэ, кикимора олан! Бура ни отирсö сёйис сэрпöсь войнаыс! Ме тай, видзöт, кытчöдз ловья... Но а челядьыс?

— Ыджытжык вонö абу жö гортын, медучöтыс лабич дор котрасьö, а ме кытчöдз эстöн гардча... Ветлi жö фронт вылас, ранитiсö и этчö шедi уджавнытö...

— Мый нö тэ сэк? Эта... Вежöрт миянлiсь олансö! Митрейыс эд бöб юрнас мукöдпыр оз жö тöд, мый керö, да колхозыс понда жö... Ас пондасис сiя бы шыр моз пукалiс кытöнкö гор сайын, а сэтöн, видзöт, колхознöй сюсö бытьтö гусялöны... Ох, Митрей, Митрей! Велöта ме тэнö овнытö, велöта, а тэ пыр ассит... Кöр ни ми тэкöт отирыс моз жö пондам овнытö?!

— Да! — юрсö дюттьöтiс Митрейыс. — Юрöс бы керав да некинлö! Сэк бы пондi тöдны...

— Во! Некинлö, а менам киö оз лэб, но кераласö кö, ме вылö эн горзы, ачыт виноватыс...

— Да, ачым, — куритiс Митрейыс, лöсьöтчис кузь туйö да сэтшöмö, кöр, поди, нуöтасö и сэсся гортсö оз ни адззыв, но эз жö бы мун Тиминасис, олiс жö бы эшö, сiйöн и кеймисьöмöнмоз шуис: — Нем я мый я сэсся оз ни туй кернытö? Быль я мый я ме сэтшöм ни виноватöй?!

— А кыдз нö тэ думайтан? Думайтан, поди, што абу виноватöй, поди, öнджа... Не-е-е, Митрей, эстöн ог тöд... — баитiс Степаныс и видзöтiс милиционерыс вылö боксяняс, гусьöнмоз: оз я погона мортыслöн чужöмыс небзьы, сьöлöмыс ло мужиккес дор. И былись мыйкö милиционерыслöн дзик вöрзис, кыдз сiя небзьыштiс, топ жальöсь кодь я мый я сылö мужиккес, лоисö, и шуис осудитöмöн:

— Кывзы, Митрей... Мортыс эд кузь туй вывсянь!.. Ми тэкöт асъяпоннас тытким пöт да нем ог думайтö, а сылöн кынöмыс сималö! Тэнат абу я дозмöр яй?

— Эм! — рад лоис Митрейыс. — Кык дозмöр кринкаокö ачым солалi..

— Сэк мый нö тэ?!

— Оз менам симав! — висьталiс милиционерыс.

— Кыдз оз симав? Сималö! — ассис пыкис Степаныс, Митрейыс иньлö ни ыкöстiс. — Василиса, кылан он, мый ми баитам?

Василисаыс сэтöн и эм, сiя öнi жö бы сетiс быдöс ни, мый эм и абу, только бы мужиксö эз нуöтö. (Кöть кытшöм да мужик эд, аслас.) Пондiс пызан вылö ваявны нянь да не сiйö, кöдö пöжалö аслыныс — куш идовöй пизись, а турун сорасö, кöдö пöжавлö этатшöм час кежö кориссезлö да туйын отирлö, мед тöдiсö, что нiя сiдз жö олöны умöля, кыдз и быдöнныс. Вайис Василисаыс пызаныс вылö турун сорöн пöжалöм нянь, гырничöн йöв, бекöрöн пöжöм яй, луккез, сов.

— Оз менам симав, оз! — дульсö ньылалö милиционерыс да жаднöя видзöтö пызаныс вылö, но кытчö воштiсяс, не гортас эд. Тиминасяняс сёйнытö гортö он лэбзьы, кöть мый, но колö пызаныс сайö вешшыны, и вешшис пызаныс сайö милиционерыс, босьтiс нянь шöрöмсö, курччöвтiс бы етша, но шедiс курччöвтнытö джыныс и öмтырнас пондiс аклявны-нярьявны сёянсö, бытьтö куим год ни тшыгьялöм.

— Во! Важын бы этадз! — Степаныс смела ни пондiс видзöтны то Митрейыс вылö, то милиционерыслань, сьöкыта ловзисис. — Этчö бы ышö винаок, но öння кадын вöтöн ни сiйö ог вöтасьлö...

— Кыдз ог вöтасьлö?! — Василисаыс бöра сэтöн и эм. — Менам пань етш эм, ог и тöд ни кöр босьтлiм, да видза лекарсво местö...

— Мый нö тэ сэк, Василиса?... — мурзьыштiс Степаныс, и быдöн ни керкуас вежöртiс, что Василисаыс винасö видзис только талун кежö, медбы Тиминаыс весьтiсь гывьявны гым кымöрсö — вештыны юр вевдöрсиныс бедасö, а сэсся кöть мый ло...

Сёйис милиционерыс, чеччис пызаныс сайись, спасибо висьталiс, пуксис лабичö и куритö мужиккескöт.

— Мый нö пондам керны? — Степаныс жö бöра пондöтiс басни. — Митрей?

— Ог тöд... — бöра öддьöн недолыт лоис Митрейыслö, сiдз синваэс и петöны бы. — Ог тöд...

— Эд нач некинлö кольччас уджавнытö! Кöть бöра мый эстöн мужиккезтöг кер?! И этö тэ понда, Митрей, баля юр! Тэ понда, мыся!..

— Да. Ме понда...

— Ладно, мужиккез! — лöга гöрöтчис милиционерыс. — Спасибо висьталö, что меным öтнамлö норасисö, а то бы... асьныт тöдат, мый вöлi...

— Сiдз... — синваэсö чышкö ни Митрейыс.

— Тэ миянiсь эн пов, ми отирыс абу кузь кылаöсь, — Степаныс пондiс гардны асланяс, топ Митрейсö босьтiс порука вылö.

— Но... — мужиккеслiсь баснисö сорис милиционерыс. — Мыйись-мый... Локта ышö...

Степанлöн радувья лудiсö ни киэс, медбы мортыслö сетны гöснеч — вöрмöслiсь яйтор, но видзсис, вермис асьсö, медбы йöзыс одзын не мыччавны жö, кыдз татöн джендöтöны дзескыт ой-лунсö, чеччис лабичись, медбы кольлавны гöсьсö, кöда юрыс вылö пуктiс шапкасö.

Мунiс милиционерыс. Мужиккес ловзисисö пыдынжыка, пондiсö видзöтны, кыдз шондiыс пуксьö вöр саяс, топ сьöрас Тиминаись кыскис сэтшöм шогöт, кöдö вöтöн он вöтась.

Месяц етш Тиминаын олiсö да полiсö, быд лун видзчисисö милиционерсö, кöда вермас локны да нуöтны Митрейсö, а, поди, öтлаын и Степансö.

Завидуйтi ме öнi тиминсалö, топ ны весьтын некöр эз öшалö гым кымöррез, бытьтö нiя пыр олiсö кокнита да медбура, кöр эз тшыгьялö, а сэсся мый колö? Кытшöм эшö олан? А клуб, радио, газетаэз... Нiя и миян Пальниканым эз вöлö, да олiм жö.

Тиминаын клуб местö вöлi бригадирлöн керку, кытöн рыттэзнас Степаныс отирыслö лыддьöтлiс газетаэз, кöдна татчö шедлiсö жö öтiк-öтiк, бригадирыс висьтасьлiс, кыдз тышкасис чочкоммескöт, ошшасис йöз оланöн, кöдö кывлiс, кöр сельсоветö ветлöтлiс сессияэз да собраннёэз вылö (не öтпыр эд бöрйылiсö депутатöн), нельки висьтасис сказкаэз.

Висьталам, что тиминса любитiсö книгаэз. Нiйö ваялiсö кысь шедас: медодз сельсоветiсь, школаись, а сыбöрын, кöр посадын оссис библиотека, сэтчинiсь.

Öтпыр арнас ни, кöр ойес пемытöсь и рыттэс кузьöсь, мужиккес пукалiсö Степаннэзын да кывзiсö, кыдз лыддьöтiс Борискаыс богатыррез йылiсь.

— Да-а-а, — Митрейыс жö пондiс юрнас öвтны. — Вöлöмась отирыс... А ми мый?

— Кыдз мый?! — мужиккес коласö нырсö сюйыштiс Куличика, кöда татчö локтiс печканöн, печкис, кывзiс-керис и пондiс баитны. — Ты, Митрей, хуже чо ли этих богатырей? Вон кытшöм вына! Ме эд адззывлi, кыдз öтнат керку керсö босьтан и кокнита нöбöтан пельпоннэт вылын.

— Мый сiя керыс?! Мыйкö разь эм?! Ме сiйö кыдз истöгöс нöбöта...

— Тöдам, а вот тэ ойнас ветлы шойна вылас да сэтчинiсь крест вай...

— Мый ме крестнас кера?! — синнэс ыждiсö Митрейыслöн.

— Выннат кужан ошшасьны, а шойнаыс вылö ойнас он эд мун? Он! Ме тöда, — Куличикаыс пондiс нерны Митрейсö.

— Ме?! Да ме кытчö колö, сэтчин верма и мунны, но шойнаыс вылö ог мун, кöть вий... Джагöтасö кын синаэс...

— Ме сiдз и тöдi, — пондiс серавны старухаыс.

— А ме муна! — западня вылын кыдз саймис Митрейлöн Толяыс, кöдалiсь баснисö уна он и кыв — луннас куим кыв горöтчас и пöт.

— Тэ мунан?! — Митрейыс пондiс видзöтны зоныс вылö, кыдз первуись адззис.

— И ме муна! — Борисыс сэтöн и эм.

— Э-э-э, — Куличикаыс бöра рапкö. — Кыкöн и ме верма котрасьны шойнаыс вылö, тi вот öтнаныт.

— Öтнам муна! — Толяыс висьталö ассис.

— Кытчö тi ойнас?! — повзис Ульяныс.— Вöрöттяс... Кык верстасö...

— Да некин миян Тиминааным сэтшöммес абу! — сералö Куличикаыс. — И тэ, Ульяна, эн пов, зонкаэс некытчö оз мунö.

— Кин оз мун?! — западняись чеччöвтiс Толяыс и ыбöсö! Бöрсяняс посöдзö петiс Митрейыс, пемытiнас ыкöстiс: «Толя, некытчö эн мун! Видзöт тэныт мамыт бöра мый висьталас! Бöра менö пондас видны. Толя!» Абу Толяыс, кошшы сiйö пемытiнас, кöр, поди, котöртiс гортö, кайис гор вылö, дзебсисис сэтчин, а тi эстöн, ыджыттэс, сы понда тöждiсьö.

Митрейыс бöр пырис керкуас, пондiс куритны да нюжлавны: «Да-а-а, батя, этö-ö-ö... Тэ, старуха, абу ни морт вöлöмыт...»

— Мыля ме не морт? — сералö старухаыс. — Тэ тöдан, Митрей, кыдз на горе-то собаки дрались да только гöн лэбзис, а тэ видзöт и коласаныс эн пыр, а мыля бы?

— Мый ме поннэс коласiсь кошша? — оз вежöрт пöрисьсö Митрейыс.

— Мый кошшан? Сiйö кошшан, Митрей, што, мыся, челядьыс коласö ныртö некöр эн сюй, мед нiя велöтчöны овнытö.

— Адззисьöм велöтiсь! Натьтö, ассит нимтö он куж гижны, а сэтöн жö... На горе дерутся да гöн лэбзьö... — пондiс Куличикасö нерны Митрейыс.

Челядьыс кывзöны пöрисьжыккесö да киксöны-сералöны, некытшöм он абу.

— Баб, а баб?.. А петухсö рочöн кыдз шуöны? — Борисыс жö юалö Куличикаыслiсь.

— Петухсö?! — некыдз оз вежöрт пöрисьыс. — Ме мыйöн тöда? Натьтö, курöгöн, ежели курöггес коласын олöны...— Уна бабкöт он баит, серав — эн серав, оз лöгась и бур эд.

А эта коста, кöр сералiсö да баитiсö, Толяыс йирка-торка, ышки-пойки кайö посöдзö, осьтö ыбöс и керкуас пыртö крест.

— Господи! — пернапасасьö Ульяныс. — Толя...

— Но тэ и дурак жö, Толя!.. — айыс висьталö зоныслö. — Ме кодь жö юртöм быдман. Да-а-а... Нöбöт бöр öнi жö сэтчин, кытiсь босьтiн!

— Но тэ мый зонкасö öтмöдöрö вашöтлан? — Степаныс видö Митрейсö. — Сувтöтö öтöрас, ашын асывнас нöбöтат.

— Мед öнi жö нöбöтö! — ассис модьö Митрейыс. — Мед кытiсь босьтiс, сэтчин и пуктö!

— Нöбöта эд! Думашог нöбöт, — Толяыс вирскайтiс нырнас.

— Отсалам! — джодж шöрö чеччöвтö Борисыс. — Ванька, мунам!

Ванькаыс шы оз сет, но пасьталö зипун.

— Кытчö ойнас?! — Ульяныслöн чочкоммö чужöмыс.

— Мед мунöны. Некин нiйö оз сёй, — Степаныс малыштö ассис уссö.

Зонкаэс бöра йирка-торка крестöн петöны керкусис. Ульяныс пернапасасьö, думайтö, что, натьтö, мужиккес весь оз орсö, бöра эд мыйкö лоас — асланыс юррез вылö тешитчöны...

Талун этадз чулалö пемыт да кузь арся рытыс, ежели кö ойнас оз тöлöтчö или оз тшупöтчö, а уджалöны кö, сэк басниыс абу — мöдiк кадыс. Талун этадз чулалö Тиминаын рытыс, кöдö пондасö касьтывны дыркодь, ашын лыддьöтас Степаныс книга, мöдлун, видзöтан кö, ойнас гуна вылö каясö тöлöтны сю, кöдö вартiсö луннас.

Покров куимöт лунас, кöр Тиминаись гöссес мунiсö ни горттэзаныс, кöда Васькинаö, кöда Пальникö, Борисыс лыддьöтiс книга. Отирыс сёрмис бригадирыс керкуын, книгаись кывзiсö олан, а киэзнаныс кин мый вермис да кужис, сiйö и керис: кöда нинкöм кыйис, кöда пестер панiс — быдöс эд колö деревняын, и керöны быдöс. Китсасис ни сёр петух. Сэтöн Степанлöн пондiс поныс лёка вувтны. Кинкö öтöрас чирнитiс и öшынö павкис би югöр. Öшынас сэк кежö бедьöн вачкис Анна да бöбöв моз горöтiс: «Сотча-а-ам!»

— Кин сотчö?! — эз вежöрт бригадирыс, кöдö повзьöтны, что ыджыт из вöрзьöтны.

— Чоммес сотчöны! — чирзiс öтöрын Аннаыс.

Инькаыс татöн олö вöлись год-мöд. Ылiсь эз лок, шыбыльтiс посадiсь, кытöн сылö инь отирыссянь оланыс эз ло: öтiк видö, мöдiк шуö, а куимöтыс сьöвзьö, шедас кö, эшö и юрсисö нетшкасö. Баитiсö, бытьтö бы инькаыс быдöнлiсь мырддьö мужиккезнысö. Вашöтiсö, сiдзкö, Аннасö гортсис, и сiя пондiс овны Тиминаын важ керкуын, кöдö колис Вачкись Миков, войнаöдззас эшö мунiс татiсь и сэсся эз мыччась. Олö Тиминаын Аннаыс и олö, морт моз уджалö, некинлiсь эшö мужиккесö эз мырддьы, некинлiсь одзсис няньсö оз сёй, а öнi, видзöтö, öтöрас котрасьö да ыксö: «Сотча-а-м!»

Инькаэс повзисö, öшисö, оз тöдö, мый керны, мый бердö кутчисьны, унажык чирзöны да гардчöны.

— Тэрмасьö! — ыкöстiс бригадирыс, посöдзись босьтiс ведра и — складдэс дынö! А сьöрсяняс пöрись и том, ыджыт и учöт, кыдз борда кöдзыввез отирыс лэбзьöны чоммез дынö, мырддьöны бы билiсь сю-нянь. Мыйись-мый... Пиннез эд тувйö öшлы... Кин этö Тиминаын эз вежöрт?

Инькаэс горзöны, биас пырöны. Мужиккес биыс вылö койöны ва, кусöтöны бы, а биыс сьöласьö да öддьöнжык öдззö, нюлö-судзöтö ойся кымöрсö.

Ой. Омöн пемыт. Биыс синнэз гусялö, сотö-пöжалö, матö оз туй локны. Сотчö сю. Омöн паськалö пöжалöм нянь дук.

— Мый нö эта сэтшöмыс?!— нетшкö юрсиэсö Аннаыс. — Мыля миянöс еныс дойдiс?!

— Враг! Бандиттэс öзтiсö! — кинкö быд вынсис ыксö. — Бригадир, висьтав?!

Бöра бригадир... Тэнат, натьтö, юрси тылöппет ни оз тырмö, медбы быдöс понда вештiсьны. Сотчö колхознöй сю. Степаныс пукалö биыс дынын, юрсö öшöтöм моросыс вылö, думайтö, полö видзöтны колхозниккес вылö, кыдз виноватöй ёрттэс одзын. Бригадирыслöн сьöлöмыс измис, чорзис, душаыс висьö — шогöтся-шогöт йирö. Умöль Степаныслö, сэтшöм сьöкыт, что одзлань овны дышыс ни петö,

Асылöдз пукалiс Степаныс биыс дынын, чужöмыс сьöдöтöм, а мыйсянь? Нето тшынсянь, нето горесянь — он эд тöд. Пукалö Степаныс сотчöм чоммес дынын и думайтö: «Мый понда жö эта?! Мый ме умöльсö кери?! Кинлö?!» Думайтö и оз вежöрт. Эстöн бригадирсö кыдз кыз онiсь саймöтiс милиционер, кöда ештöм ни гöнитны посадсянь чож вöв вылын.

— Мый лоис?! — юалiс лёк милиционерыс.

— Нем ог тöд, — синваэсö чышкö бригадирыс.

— Кытшöм тэ сэк бригадир?!

Эз бы ков милиционерыслö чапкасьны сэтшöм кыввезнас, но мый керан... Степансö öнi кöть шатьöн вартлы, паныт оз ордчы, бытьтö оз кыв, что зубыт: вирыс петас, а оз кивзы.

Арыс гажа. Кöс. Сьылöны чикиссез. Кайес öнöдз гортын. Кузь лоас арыс. Дыр лымыс оз тырт сотчöм чоммезлiсь местасö, дыр бригадирыслöн пондас висьны сьöлöмыс колхознöй сюыс понда...

Степансö нуöтiс милиционер.

Горе Тиминаын: не сю эз ло, не бригадирныс абу. Степансö быдса неделя видзисö районын. Эта коста тиминса тöлöтiсö сотчöм сюсö, кöда вевдöрсяняс долонь кызöн сотчöм, но увтас пöжасьöм и кольччöм. Уджалöны отирыс да лёбöны сэтшöм басни, быдын кошшöны врагöс: öтiк висьталö, что Лолым сайись бытьтö адззöмась кытшöмкö мортöс, мöдiк шуö, что сiя рытö Тиминаöт кытчöкö мунöма пö код морт. Сэтчöдз отирыс кывнаныс гардöны, что пондöны öтамöдныс вылö ни лöгавны, сiйö и видзöт, кыдз учöт деревняын дзугсяс оланыс.

Эта коста Степаныс пукалiс милицияын. Некин эз тöд, кытшöм думаэзöн олiс сiя, кöр луннас кыкись-куимись пыртлiсö следователь дынö, юасисö да лöсьöтчисö судитны, бытьтö бригадирыс аслыс враг, гарйö гу, а сiя веськыт, шырö-висьталö, кыдз вöлi, оз куж бöбöтны, кöр тшöктöны висьтавны, что бисö чапкис Митрейыс или Аннаыс.

— А может, бригадир, ачыт сотiн?! Не весь жö адззылöмась тöдтöм мортöс, кöда пö вачкисьöм бригадирыс вылö... Кытчö, поди, гортiсь рытнас петалiн, Степан?

— Кытчö петала, кöр вöлi öтлаын мужиккескöт? Од веритö?! Мунö да юасьö отирыслiсь, мунö, а эд сэтöн... — шуис Степаныс.

— Тöдам! Юасям! Адззам, кутам! — модис следовательыс, баитiс кыдз врагкöт, кöда бöрсянь быль думаэс сёйисö: «Но, Степан!.. Люкалiн медбöрын воротасö, кöда вöлi тэ одзын пöдана да осьтiсö и кыскöны сэтчин, кытчö уна ни мунiсö да етша локтöны...»

Степаныс милицияын думаэзнас мöдпöв олiс асссис олансö. Быд лун тöдвылас, кыдз быдмис, тышкасис чочкоммескöт, гöтрасис, поздiсис и быд лун отиркöт да отирлö, аслыс нем эз босьт, эз öтнас яйторсö сёй, няньсö эз дзеб, а шöрöмсö керис шöриöн да вердiс отирсö, а öнi враг... Колiс я пыр уйны ва паныт?! Туйис эд кывтны ньылат, кöр айыслöн вöлi быдöс — ов да ов бы... Пессьыны, сир ньылöмöн миссьыны бы эз ков, а сiя айыс дынiсь кежис, пышшис кошшыны сьöкытжык олан, а öнi, Степан, некин тэныт оз отсав, и осьтасö думаэзнат эн кошшы, мед и вöлiн бригадирöн. Абу кокнитжык, что бригадир... «Хозяйство видзны — не кульзöр кöдзны...» — баитö Спирья дедыс, вежöрт, что ачыс нем оз аркмы, быд местаын колö лоны бригадирлö, одзжык чеччыны и сёрöнжык водны. Видiс асьсö, что жалейтiс трудодень, сторожсö эз видз складдэс дынын, а бöра жö эд надейтчис отирыс вылö... Öнi милицияыс одзын и вузав рожатö. А кин вот думайтiс одзлань, что этадз лоас? «Степан, Степан,— судитасö эд!.. — тöждiсис и сэтöн жö асьсö видiс. — Но и мый? Сэтчин тэныт и туй!»

Кытчöдз тиминса дзимлялiсö сотчöм сюсö, Степансö милицияись недыр кежö лэдзлiсö гортö. Пырис гортö, иньыс эз тöд: кольччöмöсь синнэс да нырыс.

— Мый тэныт лоис?! — горзö Ульяныс.

— Одз горзан. Эг эшö кув! — лöгасис мужикыс, топ иньыс жö виноватöй, что сы понда горзöны.

Эз ешты пырны керкуас, сьöрас отирыс — гез кыссьö: быдöс бригадаыс, том и пöрись пырисö керкуас.

— Мый пондам керны, Степан? Кытчö сюсö дзимлявны?

— Талунсянь ме тiянлö абу слуга, керö кыдз колö, — отирыслö висьталö Степаныс.

— Кин сiдз баитö?! — медодз мороссö паськöтiс Митрейыс. — Ме нылö мыччала, ась тöдöны тиминсасö!

— Митрей, кывтö кузя эн видз! Тэнчит оз юасьö, — ёрттэс висьталiсö Митрейлö.

— Мда-а-а, — нютшкö чигаркасö Митрейыс. — Степан, кöть мый, но висьтав отирыслö, мый пондам одзлань керны?

— Уджавны.

— Ми разь ог уджалö? Öшим ми, вот мый!

— Кынöмныт сималас, уджалат! — гажöнжык ни шуис бригадирыс.

18

Эта коста арыс эз узь. Чикиссес дугдiсö ни лэбавны да сьывны ассиныс сьыланкыв. Погоддяыс тшыксис: кымöрсянь киссис ни лым сорöн зэр. Куличика сё эшö ветлöтö тшакла: босьтас наберук и межа дорöт лэдзчисьö Лолымлань, етшажык тшаксö вайö, унажык отирсö повзьöтö, висьтасьö, бытьтö талун адззылöм Вöр дядьсö, топ сiя быль мыччисьлöм пöрисьыс одзö — морт и абу морт, бытьтö пö кöззэс сувда, кузь мыгöра, тоша и, кыдз мунö, сiдз вöрыс и куснясьö-окласьö, ризя-вазя чегласьöны пуэс. Мöдiк лунö пöрисьыс бытьтö пö адззылöм бöра сюра кöинöс, а куимöтас — бандит, и дзик сiйö мортсö, кöда сотöм Тиминаись колхознöй чомсö.

— Да-а-а... — кывнас шлечкö Митрейыс. — Нем бурсö, старуха, эн видзчись. Смертьыс ни тэ сьöрын вöтлiсьö...

Смерть или не смерть, но öтiк-мöдiк пондiсö повны рыттэзнас петны керкуэзiсь. А мый? Вöрыс эд зэв, быд кöз увтын пукалöны Куличикалöн «ёрттэз».

Отирыс олöны и мыйиськö полöны, но челядьыс — Митрейлöн да Степанлöн зоннэзныс некинiсь оз полö: субботанас локтiсö школаись, книгаэз швырк лабич увтö, пиэзö заргисö няньторрез, спина сайö кышалiсö пишаллез и абуöсь!

— Тi кытчö?! — повзис Борислöн мамыс.

— Котрасям Лолым дорöдз, мам. Сэтöн, мам, дозмöрыс, ой, мый ыжда! Вöв ыжда, натьтö, и эм, кыдз лэбтiсяс, сiдз пуэс и нёкрасьöны!

— Бандит пö ветлöтö! — зоннэсö полöтö мамныс. — Кутас кö тiянöс...

— Кинöс?! Ой, хо-хо! Кыдз асьсö сьöвталам. Мый тэ ныкöт керан, кöр быдмöны асныраöсь?!

Вуджöртчисö син одзын челядьыс и öшисö, айныслö эз мыччасьö, кöда, поди, падтiс бы, а мамсö разь кывзасö?

Лун кымöра, а рытнас пемдiс одзжык, зэрö, кöдзыт — морт сёйись погоддяыс, а челядьыс абу и абу.

— Нем ныкöт оз ло! — висьталö Степаныс.

— Сэтшöм айсö бы! — кивзö Ульяныс.

— Кытшöм айыс? Тiян кодь жö я мый я? Мед челядьыс велöтчöны.

Пемдiс, а челядьыс абу. Зэрö öддьöнжык ни, кöдзытжык лоис. Мамсö кыдз лудык сёйö — жöдзö татчö да сэтчин, видзчисьö зоннэсö.

А нiя котöртiсö Лолым сайö, сыбöрын сьöлöмныс кыскис ылöжык, пыдöжык вöрас, кытöн сьöлаэс лэбалöны «табунöн».

Павжун бöрсянь зонкаэс ылö эз ештö мунны, но рыт кежас локтiсö Таркоть шутём вылöдз, кытöн таво путриктiс öзим. Шутём дорын лапья кöз увтын эм будка, узьны эм кытöн, и челядьыс тöдiсö, мый керны: медодз межа дорö пуксисö видзчисьны кöччез, кöдна ыбокыс вылö вöрсис петасö пемдан дорас сёйны небыт сюсö.

Поснита зэрö. Лöнис тöлыс. Вöрыс ас кежас топ мыйкö шушкö, полöтöкодь и кытöнкö дзуртö пу. Ёрттэс пукалöны межа дорын, синöн оз кваркыштö, горöнжык оз ловзисьö, видзчисьöны кузь пеля зверьöс, кöда мылякö талун оз тэрмась ужнайтны. Шутёмыс син одзын, кыдз долонь, и избушкаыс, кыдз öшын увтаныс баняныс. Ыбокыс дорöт визывтö шорок, больгö дугдывтöг, и вöлi бы гажа, эз бы кö вöв омöн пыд вöр, эз бы сулалö омöн «тоша» пырейöн гардöм кöззэз.

Пемдiс чожа. Уль. Ыркыт. Муыс лолалö аскоддя руöн, бытьтö полö узьны. Син одзын вöрыс сорласьö, дзик сукмö. Лэчытжыка видзöтан, и учöтик бадь пондö вöрöтчыны, топ ловзьö... И сэк нач ни пемытiнас кысянькö чеччöвтiс кузь кока да чочком вешьяна кöч, пуксис öзимыс вылö, кывзiсьыштiс, орсiс пеллезнас и сöтiс шутёмыс шöрöдз да пондiс пукавны — не дробыс оз судзöт, не матöжык он лок.

Борисыс пукалiс-керис воныс бокын, пыдына ловзисис и серöмтчис: нерис чочком вешьяна кöчыс...

«Ме тэныт мыччала!» — пиннесö гичыртiс Ванькаыс, лэбтiс пишальсö, но лыйны эз ешты: кöчыс видзчисьтöг ордчис, сувтiс кык кок вылö и йöктытöн котöртiс вöрас.

«Но и кикимора! — киэс пондiсö дрöжитны Борисыслöн. — Öтiк кöч одзаным петалiс да и сiя пышшис».

Ванькаыс кулаксö мыччис воныслö: вежöрт, что лöгасис и тiляс нырöм гöгöртö, а Борисыс киргö ни:

«Мый тэ сэтшöмыс понда горзан? Мöдiк пантасяс... Шогöтöсьыс оз ков».

— Мыйöн тэ тöдан, что сiя шогалö? — Ванькаыс пондiс шушкыны воныслö пель одзас.

— Видзöт: повзис да кынöм висян кутчисис, хи-хи...

— Тэ бердö оз я кутчись?! Адззисин сэтöн...

Зонкаэс шушкисö-баитiсö межа дорас кöзок увтын — гусьöн бы колiс пукавны, но баиттöг овны оз вермö.

— Дугды, мыся, джыннян! — шуис öтыс.

— Ачыт джыннян, — öмсö осьтiс Борисыс и пондiс видзöтны избушкаыслань, кöда пемытiнас тыдалiс сё умöльжыка и, кöда весьтын топ кинкö вуджöртчис — морт или не морт, он вежöрт. Зонкаэс жмитчыштiсö öтамöдныс бердö, вунöтiсö кöччес йылiсь. Больгис матын шор, сэсся шы не тöв, только кылö, кыдз пыдына лолалö Толяыс и сьöлöм вартö моросын. Пукалыштiсö вöралiссес, кывзiсьыштiсö, сэтöн Толяыс жö кижгыштiс: «Кин сiя?»

Чажгис-зэрмис, кыдз вевдöрсяняс кинкö кырымтыр койыштiс гырись сю тусь и лöнис: погоддяыс орсiс. Кöз уввес вылiсь вотялiс ва. Избушкаыслань сэсся некин эз тыдав и нем эз кыв. Öт вöрыс дорсянь мöд вöрыс дорöдз ыбокыс кузя быд вынсис лыйис-котöртiс кöч. Зверьыс пемытiнас тыдалiс умöля, челядьыс топ эз и адззылö сiйö, куимнанныс дзиргисö öддьöнжык будкаыслань. Кадыс чулалiс унакодь. Ыркöтiс öддьöнжык, пемдiс сукжыка. Колiс бы кытчöкö водны, но кытчö вот? Кытöн песыс? И кытшöм ни сэтшöм узьöм, кöр, поди, быль кинкö эм керкуокас?

— Ванька... — горöн ни шыасис Борисыс. — Ме муна да пыка ыбöссö.

— Мун. Юрыт дзонь кö... Кыдз сэтчинсянь урвенитас мыйöнкö!

— Ойбыт я мый я эстöн гегдыны?

— Колас и гегдан, — висьталiс Толяыс да ёнжыка жмитiс пишальсö.

— Ог эд! — Борисыс жмитыштiс жö ассис важ пишальсö, кöдöн не вöрö ни бы ветлыны, а горись пессэз сорлавны: кыдз пондан лыйны, сизимись опчекайтас да вöлись и гренитас, но пишаль эд.

— Но тэ и чож! Ачыт капкансö кошшан, — вонсö видiс Иваныс.

— Мый сэк?!

— Видзöт...

Кöть мымда пемытiнас избушкаыс вылö видзöт, нем оз тыдав: син одзын öтiкыс местö лоöны куима.

— Кывзы... — шыасис Борисыс, но воныс вермис, лöгöн шуис: «Сулав!»

Нырö павкис тшын дук.

— Морт кинкö... — Толяыслöн сибдiс голосыс.

— Морт, — нерис ёртсö Борисыс. — Лешöйыс, натьтö! — шуис да кыдз гренитiс-лыйис вевдöр. Синнэз гусялiс пишались би, кöда пемытiнас паськалiс омöн. Пеллезын пондiс чинньыны. Толяыс чеччöвтiс и... Кöччес моз жö вöрас! Иваныс гичыртiс пиннесö. Вöрыс топ жмитчис да дугдiс лолавны. Избушкаын кöть бы мый... Некин эз мыччись и эз шыась. Зонкаэс пондiсö ни думайтны, что быль кинкö прикашайтчö ни — некин эз вöв и абу татöн! Борисыс негорöн шутньöвтiс Толяыслö, кöда пемытiнас, поди, гортöдз оз жö пышшы... Сiдз и вöлi: ёртыс мыччисис и бöра пуксис зэв дынаныс, юалiс: «Мый пондам керны?» Пиннес сяткöтiсö зонкаыслöн.

— Поди, гортö мунам? — шыасис Борисыс.

— Пемытiнас?! — повзис Иваныс, кывсö сэтöн жö курччöвтiс: дзуркнитiс избушка ыбöсыс, сэтчинiсь кинкö петiс да шлёчка-шлячка ва гöппезöт веськыта, кылö иньдöтчис туйлань. Кин? Морт или зверь? Кокшыыс кыдз мортлöн, но...

— Эй! — Борисыс ыкöстiс бы, но виньдiс: Иваныс долоньнас пöдналiс öмсö.

Бöра сютки-патки зэрмис. Иваныс пондiс кынмыны. Пукалыштiсö эшö мымдакö, видзчисисö, но будкаö бöр некин эз лок, кыдз ыбöсыс кольччис осьта, сiдз и вöлi.

— Мый пондам керны? — юалiс Толяыс, вирснитiс кузь нырнас, синнэс пемытiнас ыждiсö, кыдз не аслас.

— Мунö тi сэтiсь! — Борисыс чеччöвтiс, сьöвзис, пишальсö кутiс киас да смела иньдöтчис будкалань.

— Но мый тэ бöб юрыскöт керан? — лöгасис Иваныс. — Юрас невна оз тырмы, сiйöн и пырö, кытчö оз ков.

Толяыс шы эз сет, иньöтчис Борисыс сьöрö.

Будкаыс пытшкын учöтик печкаын шаялiсö биа шоммез. Шоныт. Долыт, вод да чискы-узь, но Борисыс жö шуис: «Ог тö-ö-öд... Кыдз узьтöнняным локтас?..»

— Но и мый? Ась локтö. Тöрам эд, — Иваныс печкаыс пытшкö чапкис песжуггез, гажöнжык ёрттэслö висьталiс: — Водö да узьö, челядь! Поди, кинкö морт жö. Миян моз жö ендiс вöрас и оз понды кöззэс увтын джендöтны кузь ойсö. — Эй, кин тэ?! Лок татчö!

Челядьыслöн синнэзныс куньсисö. Öтöрас бöра пондiс зэрны ведра понiсь. Будкасянь öтöрсис нем эз тыдав — гуын кыдз пемыт, ась бы и кинкö локтiс, пырис, эз бы адззылö. Гажöн чалöтiс-лонтiсис печка, вамöм паськöммез вылiсь кайис пар.

— Узьö, а ме пукалышта, — висьталiс Иваныс.

— Кин жö сiя? — шыасис Борисыс и ланьтiс. Джын ойсö эз узь Иваныс, суналiс да печкаö содталiс пес, а мöдджын ойсö эз ни вермы тышкасьны аслас онкöт, кöда зонкасö октiс печкаыс бокö, и пондiсö узьны вöралiссес да сiдз, что кыскы будкасис коккезöттяныс, нем оз кылö.

Асывнас югдiс дыша. Эз ни зэр, но кымöррес öшалiсö лажмытжыка и тэрмасисö кытчöкö ойланяс. Вöлi ыркытжык, нежели рытнас. Лöз югыт. Иваныс гусьöн петiс будкасис, кывзiсьыштiс, видзöтчис, сулалыштiс будка ыбöсыс дынын. Талун сiя немись ни эз пов, сьöлöмыс вылын вöлi кокнит, а сэтöн и добычаыс, кыдз ачыс вöзйисис вöралiсьыслö: ыбокыс шöрö вöрись петiс кöч и нюкьясьтöн пондiс шляпкöтны будкаыслань. Иваныс жмитiс пишальсö и лыйис сэк, кöр кöчыс локтiс зэвмоз — дас метра ылына.

Вöралiсьыс босьтiс кöчсö, эшö вель дыр пукалiс будкаыс дынын, но сэсся кöччес эз мыччисьö.

Час бöртi зонкаэс иньдöтчисö гортö. Нiя эз тэрмасьö: гусясисö-вöтлiсисö быд сьöлаыс сьöрын, кöдна лэбтiсисö туйыс бокись, но добычаыс эз шед кокнита — лыйисö кык кай. Вöрсянь локтiсö гортö. Одзаныс мунöма морт (нять гöппес дорын бура тöдчисö следдэс), мортыс сапоггезöн, сiдзкö, йöз: сапоггесö ны ладорын некин оз новйы. Мый арнас вöрсис кошшö йöзыс, челядьыс оз тöдö, нiя мунiсö и полiсö, думайтiсö, что эта бандит, топ сiя сiдз нiйö бöрсяняныс и кутас да мырддяс пишаллезнысö. Сiйöн зонкаэс уна эз и пондö шляйтчыны, а туйыс вылöт локтiсö Лолым дорö, вуджисö посок кузя юсö, кайисö ыб вылö. Отирыс, тыдалö, гортын эз ни вöлö, натьтö, нiя уджалiсö гуна дорын или весöтiсö видз. Вöралiссесö панталiс Буско, кöда тöн гортын эз вöв (вöтчылiс Степаныс сьöрö). Поныс чеччалiс-керис куимнанныс моросö, öвтыштiс бöжнас, ыбыс дорись лапья кöзiсь пондылiс вувтны ур, чапкис и сöтiс гортö, но баняыс дынöдз эз лок: сувтöтiс гöнсö да пондiс эрзыны.

— Буско! Тэ мый? Ош я мый я деревняыс вылын? — челядьыс пондiсö серавны понсö, но Бускосö он бöбöт: сiя бöжсö эз лэдз, эрзiс и пондiс гардчыны вöралiссес дынын.

— Кинкö, натьтö, йöз морт Тиминааным, — горöтчис Толяыс, кöда весь эз любит баитны.

— Вермас лоны, — шуис Иваныс. — Бандитыс... Кутас вот Борисканымöс и...

— Мый и?.. Мый и?.. Думайтат, Борисыс тiян кодь жö полiсь? Думайтат сiдз, ага?! Э-э-э, Ванька! Тэ ышö вонтö умöля тöдан... Сiя, батя, уна ни öтiк-мöдiкö адззылiс, но тэ моз...

— Мый ме моз?! — дузгыльтчис Иваныс. — Мый ме? Нем я мый я эг адззыв? Неделя вöрас öтнам олi! Тшыгйöн... Эг тай кув, и ошсис эг пов, не бандиттэс эз кутö, а тэ... (Квать год вöлi Иваныслö, кöр сiя öтпыр петiс гортiсь, пырис вöрас, и неделяся унажык зонкасö кошшисö ыджыттэс, думайтiсö ошыс сёйис или тшыгйöн кулiс Ванькаыс, но сiя эз кув, олiс вöрас, сёйис пиканнэз да тшаккез.) Сэксясö быдöс оз ни тöд зонкаыс, но вöтöнмоз юрас видзсьö, кыдз Лолым нюрас вердiс номмесö, и сiйö вердiс кытшöмкö морт, а поди, не морт, но некин оз вермы висьтавны, кин вöлi Ванькаыс дынын...

— Э-э, Ванька! Счастливöй вöлöмыт, а то бы Вöрисьыс зон вылö нуöтiс, и талун миянкöт эн баит! — Борисыс пондiс быргыны воныскöт, ачыс сiйö и керис дзарышалiс бöрланяс, топ бöрсяняс сiдз Вöрисьыс и вöтчö.

— Некытшöм лешöй вöрас абу! — висьталiс Иваныс.

— А ме тэныт шуа, мыся, эм! Тöдан арнас тятьö гунаыс дынiсь адззылöм... Сiя пöрьясьнытö оз куж.

— Но и мый?! Сiя эд быдöнлö оз жö мыччись, а мыччисяс кö, бур одзын оз, сё ни мыйкö лоас, — Толяыс пондiс баитны гажтöма. — Видзöтö, кöр тятьöс милиционерыс вовлiс гортiсь нуöтны, сы одзын мамöлö пантасьлöм жö.

— Сiдз, челядь. Мыйкö эм, но и мед. Сы йылiсь оз пö ков горöн баитны, ась кытöн олö, сэтчин и ветлöтö, — поныс вылö видзöтiс Борисыс: Бускоыс зонкаэслiсь дзугис баснинысö, уськöтчис Толяэс баня дынö, чеччöвтiс ыбöсас и пондiс эрзыны да гыжьявны.

— Кöть тi мый шуö, челядь, но баняас кинкö эм, — баняланяс иньöтчис Иваныс, ачыс мунтöнняс пельпоныс вылiсь лэдзис пишальсö.

— Куличика бабным оз я сэтчин пукав? — сералiс Борисыс, но пишальсö лэдзис жö пельпоныс вылiсь.

Кыввезнаныс чожöсь, баснинаныс смелöсь, а сьöлöммезныс тёп да тёп жö — полöны жö, но куимöн эд, да и гортаныс, да луннас.

Поныс чеччалiс баня ыбöсас, эрзiс и гыжьялiс ыбöссö.

— Мый пондам керны, кутам кö баня чудсö? — серöмтчис Борисыс.

— Кутiсь тэ-э-э! — Толяыс нерис ёртсö. — Сiя тэнö вот кутас!

— Кинöс?! Уна ни тай куталöмöсь!.. Буско! Уйс! Буско... — Борисыс нач вельмис керкуэс дынын.

Поныс пондiс сёйны-йирны банясис ыбöс вугсö, эрзiс — öмсис петiс быг.

— Вперёд! — медодзын öдззис котöртны баняыс дынö Борисыс.

— Сулав, Борис! — воныс ыкöстiс Борисыслö, одзалiс сiйö, кутчисис ыбöс вугыс бердö, нетшкöвтiс асланяс и ыкöстiс рочöн: «Кто там?! Выходи, а то стрелять будём!»

— Ой, Ванька! — вак-вак серöмтчис Борисыс, малыштiс чочком юрсисö. — Но тэ и чож! Ой и кужан! Ме бы тэ местын...

Но Бускосö он бöбöт, сiя чеччöвтiс ни баняыс пытшкö, кинкö бердö кутчисис, эрзiс, пурис, и кинкö сэк жö чирнитiс: «Кутö, челядь, поннытö!»

— Буско!

Поныс петiс банясис. Сы сьöрö мыччисис тоша морт, синнэс був-бав, рожаыс саöн мавтöм (некöр, тыдалö, оз миссьы), коккезас сапоггез, зипуныс лешки-вошки, киэс — кураннэз, гыжжес, кыдз ошлöн, кузьöсь да нятьöсьöсь, чужöмыс лёк, синнэс гöрдöтöмöсь — вир пытшкын, баитö — Бускоыс моз жö, эр да эр, мурзьö: «Дзимлялö поннытö... Кишкаэсö лэдза!»

— Тэ мый, дед? Ачыт я? — пишальсö лэбтыштiс Иваныс.

— Пишальнат эн орс! — тöдтöмыс висьталiс зонкаыслö. — Вешты моросö весьтiсь...

— Дед, тырмас кывнат мавтны! — Толяыс ни шуис пöрисьыслö. — Мый тэ миян баняын öштiн?

Некин эд ыджыттэс абу Тиминаын, и Куличикаыс нельки мунöм уджавны. И кöть тэ сэтöн мый кер?

Поныс эрзö, бергалö старикыс гöгöрын, но зонкаэс Бускосö падтöны, мед мортсö эз жö пур.

— Руки вверх! — сэтöн ыкöстiс Борисыс.

— Бориска, дугды! Тэ мыля мортыскöт сiдз? — Иваныс пондiс стыдитны вонсö.

— Öнджа эд...— пишальсö сё öтмоз видзис Борисыс.

Öтамöдныскöт пурсьытöн нёльöн ни локтiсö Степаннэс посöдз дынöдз. Эстöн тошаыс видзчисьтöг пондiс кеймисьны: «Челядь, мый ме тiянлö умöльсö кери? Лэдзö менö... Ме эд пöрись ни, муна гортö Усольесянь, мыдзи, кынöмö сималö, горшö косьмö, а тi... Кинлöн тi сэтшöммес? Не Степаныслöн я? Ме эд Степансö бура тöда...

«Вот тэныт и на, вот и бандит. Мый нö ми керам, зонкаэз? Тöдса мортсö кутiм да пишаллезнаным лöсьöтчам лыйны...» — быдöн юрын чеччалiс ни дума — стыд лоис, кöть горзы.

— Тэ, дед, натьтö, эд пöрьясян? Мыйкö чужöмыт вывтi ни сьöд да басниыт лёк... Абу я тэ бандит сора, — пишальсö лэдзис ни Борисыс.

— Кужан, Степан пиян, кужан... Тэ бы менö няньöн вердiн да юанöн юкталiн. Ме бы спасибо висьталi, еныслö бы пондi кеймыны, медбы тiянлö буржык здоровьё сетiс, а тi...

Вот тiянлö и бандит, а... Ванькаыс нач люшмис, эз понды тöдны, мый керны, но ёрттэслö шуис жö: «Тi видзöтö, а ме пырала...» Пырис керкуас, петкöтiс нянь чöвпан да кружкатыр йöв, и тошаыслö шуис: «Сёй, дед... Но ми тэнö ыджыттэзтöг ог лэдзö...»

— Да тырмас тiянлö, бес чужöммез! Сералат пöрисьыс вылын, — старикыс пондiс менöвтны-сёйны öмтырнас, кыдз тшыг пон. Сэтöн гуналаньсянь и мыччисис Степаныс, ылiсянь зоннэслö ыкöстiс:

— Тi мый мортсö öтöрас вердат?! Мый сэтшöмыс лоис?!

— Тять...

— О-о-о, — сэтöн жö чужöмыс вежсис Степаныслöн, кыдз öшис, дзугсисö шаггес, дугдiс баитны, локтiс посöдзыс дынö зэв и пондiс видзöтны пöрисьыс вылö, топ тöдса вылö, кöдö важын ни эз адззыв. Тошаыс дугдiс сёйны, гажöн горöтiс:

— Но, зон, сiдз айтö и панталан? Грех жö тэныт лоас, грех...

Челядьыс нач люшмисö, чужöммезныс нюжалiсö, кывныс öшис.

— Локтiн и бур, — висьталiс бригадирыс.

— Видзöт жö, мый внучеккезö керöны!... Кымöсам оз я лыйны лöсьöтчö, — дедыс норасис Степаныслö. — Быдмат жö öнi, грех кöть спасеннё! Няньсö тiянсянь уна он сёй...

— Ая, эн горзы челядьыс вылö! Асьтö вид, а нiя мый? — Степаныс висьталiс пöрисьыслö («Быль я мый я дедныс?!» — эз вежöртö челядьыс, видзöтiсö пöрисьыс вылö, бытьтö Вöрисьыс пöртчöм мортö и сералö.)

— Степан, тэ менö баняат кöть пывсьöт да вöлись ме муна, — одзлань кокнита гардiс дедыс.

— А кытчö тэ мунан? — бригадирыс юасис тошаыслiсь.

— Некытчö ог мун! Понда тэ ордын овны. Али он примит? Али ме тэныт абу ни ай?! Но дак мый нö сэтöн?!

— Ай... Но кывзы жö, ая... Тэ эд ачыт кежин ме дынiсь... Ми тэкöт олiм бы... Мый вöлi — эз, вунöтам, но отирыс... Кытчö ме тэнö дзеба?!

— Сiдзкö, ми тэкöт враггез? — сьöкыта ловзисис старикыс. — Да-а-а, Степан... А ме думайтi, мыся, олышта зонö дынын...

Старикыс Степаныслö лоис жаль: морт эд и не йöз да эшö пöрись... Кытчö ни сiя? Вöррезас... Кинöс ни, поди, дойдас? Мый сэтiсь?

— Олiн бы... — гажтöма баитiс Степаныс. — Но кытчö ме тэнö дзеба?! Талун жö эд локтасö и кыкнаннымöс нуöтасö...

— Полан, сiдзкö?

— А тэ он пов? Эн бы пов, ая, эн бы кöин моз пышшав... Сiдзкö, олам бы...

— Олам бы да оз туй овнытö! — синваэсö пондiс чышкыны Андрияныс, и сэтшöм ни сiя лоöм, что вылас полан видзöтны — лы да кучик.

Кымöра луныс, а сэтöн недыр кежö мыччисис шондi, лоис лöнь.

— Ась. Тi грамотнöйöсь... А ми мый? Тöдiм öтiкö — удж да бöра удж садь быртöдз, и еныс эта понда миянöс жö мыжйис... Овсис оланыс айытлöн, Степан, овсис! Тырмас... Мыдзи шатласьнытö, кынмыны-косьмыны, тшыгьявны да номмесö вердны. Лый кымöсам! Лый, мыся!

— Челядьыс дыр сiдз эн баит!

— Мый челядьыс?!.. Нiя эд тэ моз жö ни олöны, миян кодьсö оз жö ни вежöртö... Мед кывзöны дедныслiсь бöрьясö... — синваэсö чышкис дедныс. — Лыян или он меным?

— Тэ мый, тять?! — пондiс куритны Степаныс. — Ачыт я? Кинöн менö лыддян? Сёй или пырам керкуас... Шоччисян, рытнас лонтам баня, пывсян и вöлись...

— Сэк вöлись и кула... — серöмтчис дедыс.

— Мунан сельсоветас... Сэтчин, кöть мед мый керöны...

— Муна ме сельсоветаныт, муна! А кытчö воштiсьны? Думайтi, мыся, кула тэ ордын, кöть дзебан... Зон эд! А тэ...

— Мый ме?! — лöгасис Степаныс. — Мый ме тэныт умöльсö кери?!

— Нем эн...

— Ванька! — бригадирыс ыкöстiс зоныслö. — Кут Чалкосö, доддяв да нуöт дедтö...

— Кытчö? — эз вежöрт Ванькаыс. Зонкасö лязiсö думаэз... Сэтшöм думаэз, что ачыс нем эз вежöрт: быль я мый я эта старикыс сылöн дед, кöда йылiсь сiя эз и тöд и пондiс вöлись тöдны сэксянь, кöр челядьыс кöритiсö: «Тэнат дедыт эд бандит!» Бандит... Мыйöн дедыс вачкисьö бандитыс вылö?

Но колö кывзыны пöрисьжыккесö, и зонкаыс иньдöтчис садник кырылас, кытöн гез бердö кöрталöм вöлыс сёйö отава да видзöтышалö отирыслань, топ дышыс петö весь овнытö, видзчисьö Ванькасö, а сiя мунö и гужгö коккесö, кöдна бердö кыдз кöрталiсö пуд сьöкыта иззэз.

Степаныс пырис керкуас, олыштiс сэтчин, петiс бöр да айыслö шуис:

— Ая, тэ бы быль пырин да шоччисьыштiн...

— Шоччисям, — нач гажтöма висьталiс Андрияныс. — Шоччисям, зон!

— Сэк веж паськöмтö, — Степаныс айыс одзö пуктiс чочком йöрнöс-вешьян, ассис важ гунясö.

— Вежа, зон, ог брезгуйт, мöдöр югытас, видзöт, важ паськöмнас стыд жö мыччисьнытö, еныс пондас юавны: «Андриян, мый нö тэ? Али нач ни весь олiн, вылат абу вермöмыт кыйны да вурны йöрнöссö? Ме тай думайтi, мыся, Андрияныс йöзыс вылö эз надейтчы, а тэ... Господи, прости!» — пернапасасис старикыс. — Степан, думайтiя ме, что пöрисьма да этчöдз локта?»

Степаныс ружтытöн бöр пырис керкуас и сэсся эз мыччась. Зонкаэс доддялiсö вöв, телеганас локтiсö öшын увтаныс. Дедыс пуксис телегаас, пернапасасис, шутньöвтiс, и Чалкоыс вöрзис туйö.

19

Степаныс немöн эз мыччав, что тöждiсьö айыс понда, но вежсис, топ пондiс шогавны, сьöлöмыс висьö, но оз норась, пöжö ас кежас шогöтсö, пöжö... Бригадирыс сiдз тöждiсис, что умöльтчис, чужöмыс нюжалiс, синнэс ыждiсö. Да сэтчö эшö соседыс содтiс, кыдз осудитiс сiйö. Митрейыс жö отирыс коласын куритiс и ружтiс: «Да-а-а... Айсö, батя, эз жалейт... Лыйнытö благословитiс...»

— А, поди, эз вийö жö стариксö?! — баитiсö инькаэс, надейтчисö, что пöрисьсö колисö ловйöн.

— Да-а-а... Оз вийö... Кодя отирсö öнi оз жалейтö, а сэтшöмыс вылö, натьтö, оз видзöтö... Тузгисö кымöсас и абу! Не касьтывны нянь-сов дорас, не горзыны... Пон моз... — сiя жö Митрейыс висьталö ассис.

— Висьталан жö, Митрей...

Митрейыс сэсся шы оз сет, тöдö, что уна оз ков баитны — нем кывсö кузя видзны...

Тиминса неделя етш баитöв-керисö Андриян йылiсь да вунöтiсö, и Степаныслöн, талун да ашын и видзöтан кö, кокнитжык лоис сьöлöмыс вылын, сiя иньыслö горöтчис: «Быдöс бур, старуха!»

Бур и гажöтчы, кöр тиминса таво вундiсö и вартiсö сюэсö унажык, нежели мöйму или одззынö, сетiсö государствоö мымда колiс, эшö сюыс кольччис пöт сёйны и юны. Оланыс ошшасис, лöсьöтчис лоны богатжык да гажажык, и отирыс орсiс да уджалiс, быдöнлöн медодз сьöлöмыс висис колхоз понда — быдöн гортiсь уджсö колис да котöртiс уджавны бригадаö, только мукöдпыр дзугсьывлiс Митрейыс, кöда арнас или тулыснас, меддзескыт луннэзö, босьтас пишаль и öшас.

— Кытöн бöра вöлiн?! — Митрейлiсь веськыта юалас бригадирыс и веськыта жö висьталас. — Прогул тэнат!

Прогуллэз понда уна эз баитö, кутасö да судитасö — не то гортiсь нуöтасö, не то гижасö вештыны принуд и уджав сы бöрсянь, пессьы и шедтöмтö джынсö босьтан, а мöд джыныс мунас дядьлö...

— Эн жö бöра, Степан, норась. Да-а-а... Öнджа эд лоас... Ме, кывзы, öтiк луныс местö кыкö уджала... Ой и лун бергöта, — кеймисьö Митрейыс.

— Норася! Тырмас тэ вылö видзöтнытö, — лöгалö бригадирыс — биöн сотö, но бергöтчас и думайтö: «Мый норасьöмыс ваяс?! Мортсö судитасö, а миянлö колö уджавны — быд киыс сизим местö... Мед...» — и иньдас Митрейсö сэтшöм удж керны, кытöн сьöкыт, кытöн мужикыт уджсö ош моз бергöтö, ружтö — куим лун оз сёй, но керас.

Гожумнас деревняын уджыс уна, тöвнас етшажык. Гожуммезнас мужиккес гортын, а тöвнас керöны вöр. Вöр да гöр, гöр да вöр... Гöраныс йылiсь нем баитны — гöртöг сюсö он быдты, няньсö он сёй, асланым ыб вылын уджыс, а вöр кераныс... Мый бы сэтiсь содö тиминсалö? Нянь или пань? Кöть бы отирыс деньга уна вöрас шедтiсö, босьтiсö кöмкöт да паськöм, но сiя эд абу... И оз бы вöр кераныс ков, но пондыв кö кежны бокö, эн мун вöрсö керны, эн кывзiсь, сельсоветыс сэтöн и эм: корасö, веськыта висьталасö: «Или мунан, или... Тэч котома...» Кин жö гортiсь кузь туяс мунас, кин янсöтчас семьяыс дынiсь? Уджалöны мужиккес тöввезнас вöрын сiя лунсянь, кыдз усяс медодзза лым, и тулысöдз, а тулыснас эшö иньдасö сплав вылö, оз видзöтö, что колö кöдзны. Сплавнас вöрсö кылöтöны мукöд годас сэтчöдз, кытчöдз туруныс оз быдмы пидзöссэзви.

Эта тулысö сылöтiс дыша, юэс содлiсö и чинiсö бöр. Степансö кыкись ни корлiсö сельсоветö, тшöктiсö иньдыны сплав вылö отир, а кинöс? Кöдакöт пондас гöрны да кöдзны?

— Ме муна, — висьталiс Митрейыс.

Митрейыс сьöрас босьтiс Толя зонсö, кöда таво эз ни велöтчы, бöбöтiс Ивансö и Бориссö, и мунiсö сплав вылö, и кытöнкö олiсö Микола бöрöдз, кытчöдз туруныс эз быдмы четверться кузьжык. Мужиккес локтiсö гортö лешки-вошки: паськöмныс бырöм, чужöммезныс нюжалöмась, ошшасьöны, что шедтiсö уна деньга.

— Кытöн нö деньганыт? — зоннэслiсь юалö Степаныс.

— Кытöн?.. — синнэс ыждiсö Борисыслöн. — Шедтiм да колим. Вештiсим нянь да сов понда. Винаöн ышö юкталiсö, табак босьтiм...

— Чожöсь менам, кагаэзö, чожöсь, — несьö сералö, несьö лöгасьö айныс. — Кужат вина юны и куритны ни. Поди, гöтрасьны думайтат ни?

— Кыдз нö? Котрасям, тять, нывкаэс сьöрын. А мый? Оз разь ков? Ванькаыс дак мöдö вайöтны инь ни.

— Чожöсь! А тэ мыля Ванькаыс сьöрись кольччан? Öтiк ыбöсöт пыртат невестаэзнытö и бур лоас, мамныт пеллесö пондас адззыны, что отсасиссез вайöтат, но ме бы тiян местын табаксö эг курит.

— Мый ми, тять, зонкаэсся умöльжыкöсь, али мый? Быдöнныс эд куритöны.

Тятьыс гардыштiс уссö, видзöтö зоныс вылö и думайтö: «Мужиккез ни эд! Ме ны годдэзын ой ни мымда кери и кытöн вöлi!.. Мед орсöны да олöны. Мымда гажöтчасö, сымда и адззыласö... Кин тöдö, кытшöм оланыс лоас одзлань?»

— Тять, тэ лэдз миянöс рытнас вöрö ветлыны, — юалö Ванькаыс.

— Кинöс öнi вöрсис адззан? Кайес пукалöны, зверресö оз туй торкны. Яйыс эд эм, челядь.

— Ветлам бы, — кивзö Борисыс.

— Мунö да весь некинлö эд лыйö. Нем торкны весь зверьсö.

— Сiдз, тять...

И зонкаэс котöртiсö Лолымлань не то пикан öктыны, не то чериавны. Час-мöд олiсö кытöнкö, видзöтан кö, локтöны ни. Борисыс жö ышки-пойки висьталö: «Тять, ошыс син одзаным вöрмöссö джагöтiс!»

— Быль, тять! — висьталö мöдыс. — Пуксим мельничаыс дынö вугыррезнас, кыкись-куимись чапким вугырсö, сэтöн — рас! Буз-баз ваыс резсьö кöззэс коласын. Видзöтам, лось, а сьöрсяняс... Ошыс! И син одзаным джагöтiс, мымда бы эг ыксö. Эх, пишальыс эз вöв!

Степаныс видö ошсö: «Вот разбойник! Тшыг я мый я гожумнас, что джагöтö мöссö?! Кöть бы подасö эг понды вöрöтны... Эй, Спирья дед? Кор отирсö, яйла мунам!»

— Да-а-а... Ме дак некытчö ог мун. Мед сёйöны кулöм лоссесö, — посöдзаныс пукалö и кывнас шлёчкö Митрейыс.

— Мун кöть эн. Пöт! — висьталö бригадирыс и тиминса одзын иньдöтчö вöрö, сьöрсяняс ник и няк — быдöн, кöда вермö ветлöтны...

Луннэс гажаöсь. Чулалiс лун-мöд, тиминса вочöны йöррез, гортö вовлöны пажнайтны, öтiк лунö пажнайттöнняс видзланьын поннэс пондiсö вувтны зверьöс. Немымда кадыс эз чулав, кыдз вöрланьсянь деревнялань ыбыс кузя веськыта суййис-котöртiс лось. Поннэс сьöрсяняс. Некин эз ешты буржыка видзöтны, мый лоис, кыдз зверьыс зэв локтiс керкуэс дынö да осьта воротаöт заргисис Митрейез карта пытшкö. Митрейыс сёйис пызан сайын, чапкис паньсö, чеччöвтiс öтöрö, жвангис карта воротасö, йöртiс вöрмöссö и быд вынсис горöтiс: «Го-го! Яйыс ачыс чугунас вöзйисьö!»

— Он жö, поди, вий! — посöдзын шыасис иньыс.

— Кин?! Мыля ог вий?! Гортö локтiс да ен быдтöмыс, — шваткис-висьталiс мужикыс. — Вай пишальсö!

— Кытöн пишальыс?! — öшис Василисаыс, кöда бöра сьöкыта кыскалiс тыра кынöмсö.

— Ы-ы-ы, черань! — öтöрсянь керкуö заргисис Митрейыс, петкöтiс пишаль и кропкис-лыйис зверьыслö, юрсö чатыртiс и бытьтö пондiс корны отирсö: «Эй! Локтö отсалö кульнытö! Яйсö сета. Быдöнлö тырмас!»

— Ачыт сёй! — Спирья дедыс жö горöтчис ас кежас.

— Тыткы! Бат пöтан ни, — шыасис Игнатика.

— Сёй, Митрей! — гажöн висьталiс бригадирыс. — Миян яйыс сымда, что ог тöдö кытчö воштыны.

Некин веськыта эз висьтав, что, Митрей, весь эд гожумнас зверьсö торкин, но быдöнныс думаэзнаныс сувтiсö паныт — тöдöны и озö сэтшöм вöралiсьсö, бытьтö сьöлöммезныс гудыртчöны...

Митрейыс кулис зверьсö, кералiс торрез вылö, яйсö солалiс кöньöсö, иньыслö висьталiс: «Метöг эн вöрзьöт!»

— Начкы! ¹— Василисаыс бобгыштiс ас кежас. — Вижлöк!

Ашынас яйсö пöжис горын ведра тöран чугунöн, вайис пызаныс вылö мужикыслö. Инькаыслöн вотялiс дульыс, думанас сёйис жö бы вöрмöсыслiсь яйсö, но Митрейыс чугунсö гуж кыскис одзас, сувтöтiс нырыс увтö и пондiс пишкыны да сёйны... Талун сёйис, ашын сёйис, мöдлун пешлiс и, тыдалö, пöтiс, а луннэс шонытöсь, жар, гутыс керкуыс гöгöрын лэбалö ройöн, кырнышшес Тимина весьтын гольксьöны, ракаэс кривзöны, катшаэс китшкöны, ошыс нач зэв ветлöтö деревняыс дынöт — быдöн кылö яй дуксö, быдöн бы сёйö. Митрейыс сёйис лосьсö, сёйис да дуксялöм яйсö пондiс шупкавны картаныс бöрö...

Гожумыс вынсялö. Луннэс содöны, быдмöны сюэз, турун. Гожумыс кöсйö бöра бур урожай. Спирья старикыс öктöма ни масляккез. Борисыс Лолымись кыйöма метра кузя щука, кöдаись ашын мамыс керас черинянь, вердас мужиккесö, а, поди, гöсьöс — тöдтöмöс или тöдсаöс, кöда пондас мунны Усольеö и пырас Тиминаö.

Гожумся асылыс гажа. Ыббес лолалöны кизерик руöн, туман öшалö рудзöггес вевдöрын, йöррес орсöны шондi югöр весьтын, варыш лэбалö садник кырылын, кыдз öтiк местаын öшалö кымöрас. Сьылö ыбшар. Бригадирыс мужиккесö иньдiс тшупны колхозлö гид, ачыс пуксис посöдзаныс и пондiс куритны. Пукалö Степаныс, видзöтö, кыдз садниккес весьтын ни лэбалö варышыс, и эшö адззö, кыдз Пальникланьсянь туйыс кузя вöлöн гöнитö морт, öддьöн эд, тыдалö, тэрмасьö. «Кин нö? Кытчö мунö одзся-одз?» — думайтö бригадирыс, куритö. Эз ешты табак тшынсö кыкись горшас кыскыны, видзöтö: вöвнас гöнитö Пальникись Фёдор. Жеребецыс татш сувтiс посöдзыс дынö, пирснитiс нырнас, синнэс вирдалöны, пымалöм, и Фёдорыс вöлыс вылын пымалöм жö, синнэс ыждöмась жö, дзик повзьöм и голосыс сибдöм, киргыштiс рака моз: «Война эд, Степан...»

Тиминсалö мый? Тиминса нем бы эз тöдö, ежели бы татчö эз лок Фёдорыс. Уджалöны отирыс, а сэтöн, на! Война!

— Он жö бöбöт?! — оз верит Фёдорлö Степаныс.

— Сiдз, — синваэсö чышкö сельисполнительыс. Вот, Степан, и овсис...

Бригадирыс пондiс видзöтны Лолымланяс, топ сылiсь гусялiсö вöрсö и ыббесö, мырддисö Тиминасö, пукалö и синваэс петöны, горшас курыт.

Жеребецыс педзö коккезнас, öвтö бöжнас, пирскайтö нырнас — тышкасьö вирьюись лöдззескöт. Мужиккес думайтöны...

― Кынöмыт эд сималö... — дыр-мыйись Степаныс горöтчис Фёдорыслö.

— Кытшöм ни сэтöн кынöм сималöм?! — горöтчис мужикыс, бергöтiс вöвсö и бöр сöтiс гортланяс.

«Но мый, Степан? Колас эд висьтавны отирыслö», — бригадирыс топ нач мыдзис, кыскис кадсö, дыша чеччис да лэдзчис посöдзсис, малыштiс Бускоыслiсь юрсö, кöда пондiс пöрисьмыны ни.

Мужиккес тшупсисö деревняыс сайын. Кылiс, кыдз тюкисö-керасисö черрезнаныс. Мужиккес эшö нем эз тöдö. Бригадирыс жагвыв локтiс уджалiссес дынö, висьталiс: «Шоччисьö да вöлись...» — И, натьтö, сылöн чужöмыс вылын тöдчис, кытшöм беда вöтiс олансö, сiдз кыдз Митрейыс жö юалiс:

— Мый нö бöра лоис? Или бöра милиционер мыйкö вылö локтiс Тиминааным? Да-а-а...

— Локтiс тай... — шыасис бригадирыс, пуксис кер вылö, гардiс чигарка, и сэтшöм сылö лоис гажтöм, топ янсöтчис ни отирыскöт...

— Мый нö лоис?! Мый он висьтав?! — лякасис Митрейыс.

— Война эд, челядь... — сэтöн вöлись шуис бригадирыс, чышкис чунь йывнас син дорсö.

Мужиккес кыдз виньдiсö — шы некинлöн абу, куритiсö да видзöтiсö кытчöкö мöдöрö. Дыр я не дыр я, Митрейыс горöтчис:

— Но мый, мужиккез? Шы эз сетö мужиккес.

— Ась! — лöгасис Митрейыс, босьтiс черсö и пондiс масьтыны-керавны гид угöв, тшупис, тэрмасис, топ сiйö медодз нуöтасö войнаыс вылö, только Игнатыс чеччис кер вылiсь, нюжöтчис, бытьтö узис, видзöтiс Степаныс вылö кыдзкö асмознас и шуис:

— Мунны да висьтавны, ась инькаö тэчö котома...

— Тэ мый, Игнат, сэтшöм чожа?! — повзис бригадирыс, кöть и тöдiс, что вермасö нуöтны чожа.

— Чожа и колас эд, поди... — гортланяс мунтöн ни висьталiс мöдыс.

Медодз быль война вылö босьтiсö Игнатсö, а сыбöрын томмес, Борис, Ваня да Толя сiйö и пондiсö модьны: «Кöр нö ни миянöс корасö?»

— Кытчö тэрмасят?! Или гортаныт од бы олö? Смертьыс сьöрö вöтчат бы... — томмесö осудитiс Степаныс.

Ивансö, Бориссö да Толясö босьтiсö тöвнас и öтiк лунö, кöр нiя уджалiсö вöрын, олiсö бараккезын. Челядьсö гортö эз и лэдзö вовлыны: уджалöм бöрсянь рытнас вежисö ва паськöмнысö, сёйыштiсö, пуксисö додьö да мунiсö военкоматö. Степаныс зоннэсö ачыс нуöтiс Кöчöдз, янсöтчис, кыдз колö и гортö. Тöдiс эд, что сэсся оз адззыв зоннэсö, тöдiс, но мый вермис керны, кыдз видзны дынас нiйö, кöднö бытьтö сы понда и быдтiс, медбы мырддис войнаыс и томся-томöн сёйис...

Сымда и адззылiс Степаныс Ивансö да Бориссö. Сымда и адззылiс Митрейыс Толясö, кöдö пыр лыддис томöн, кöр лöгасяс, видлiс: «Зырымöсь куль тэ! Ныр увтсит он ылöст чышкынытö, а ыджытö ни пуксян!»

Мунiсö война вылö челядьыс (челядьöн и пондам шуны, челядьöн, кöр нылö тырис семнадцать годöн...) Степаныс Митрейыслö висьталiс:

— Öнi миянлö ковсяс...

— Мунам, мыля ог мунö! — кокнита висьталiс Митрейыс. — Мед инькаэс öтнаныс олыштöны, пешлöны мужиктöм олансö, а то пыр менö видö...

20

Годыс сьöкыт. Гажтöммис Тиминаыс, говмис отирöн, говмис и няньöн. Степаныс таво отирсö вердiс содзсяняс ни — быд сю тусьсö öшлiс безменöн, кин мымда шедтiс, сымда и босьтiс: унажык гортö он нöбöт, пöтжыка он сёй, быдöс кыскöны посадö. Тиминса эшö оз тшыгьялö, но вöснямисö кынöммезныс.

— Мед... Кыдзкö олам, тшыгйöн ог кулö, — баитö Митрейыс. — Зоннэзным бы сэтчин... Да-а-а...

Митрейыс öнi иньыс вылö эмсис и абусис оз ыксы, öтнас пызаныс сайö оз пуксьы, Василисаыс одзись бекöрсö оз мырддьы, кытчö мунö — иньыс сьöрас, баитö: «Тэ, батя, Василиса, сьöкыта эн уджав...»

— Мый ме? Жаль я мый я? Черпезьда кö, вильö адззан, не ме кодь косьмöм таракан, — паныт висьталö иньыс.

— Да, некыдз ме тэнö ог вермы велöтны, пыр ассит... Гажтöм эд меным зонкаыстöг.

— Эн гольксьы! Еныс дорьяс Толясö, — мужиксö öмалö Василисаыс.

— Дорйис бы... — öмсö пиньöвтö Митрейыс. Аймамыс ен вылö надейтчöны, енлö юрбитöны, кеймöны, медбы война вылын зоннэзныс кольччисö ловьяöсь, но еныс, тыдалö, быдöнöс оз вермы синйыны: тулысланяс кузь да гажа луннэзö Митрейлö вайисö вийöм гижöт ¹. Митрейыс медодз эз вежöрт, кытшöм гижöт вайисö, петiс Степаннэзас. Степаныслö сетiс гижöтсö: «Лыддьöт жö... Мыйкö ме ог вежöрт, мый сэтчö гардöмась... Кытшöмкö виль налог я мый я пуктöмась?..» Бригадирыс босьтiс гижöтсö и сэк жö вежöртiс, мый сiя сэтшöмыс, но ружтiс-керис и вöлись висьталiс: «Толяыскöт тай умöль пö...»

Митрейыс керкутыр герйöвтiс инька моз, ружтiс-керис и висьталiс: «Пышша-а-а...»

— Кытчö?! — эз вежöрт Ульяныс, кöда горзiс öтлаын ни.

— Этчин... — кинас öвтыштiс Митрейыс и петiс керкусис.

Узисö ойсö. Ашынас пемыт сорöн эз юась, эз висьтась мунiс Митрей военкоматö. Ветлöтiс куим лун, локтiс кымöра: оз баит, оз сёй, топ кувны лöсьöтчö.

— Мый нö? — юалö Степаныс.

— Оз босьтö... Кытшöмкö шогöт адззисö. «Колам ми тэкöт, Митрей... — сьöкыт дума думайтiс Ульяныс, сiйö жö видзчисис, что гортö кольччас öтнас, кöр Степаныс спинаыс сайö кышалас котома, и мамыс пондас ойлунсö джендöтны медучöт зоныскöт, а нылыс гортын эз ни тöвйы: керис вöр.

— Быдмасö учöттэс... — вунöтлiс топ недыр кежö Митрейыс Толя зонсö, гöтрала Таняыс вылö Гаврилсö, и пондам овны, эх!

Но и Митрей! Кöр эшö учöтжыккес быдмасö да лоасö жöник-невеста, а сiя гöтралö ни бы!

Олiсö да уджалiсö тиминса. Öтiккезöс быдтiсö. Митрейыс бöра спинаыс сайö кышалiс котома да кытчöкö öшис, кöр ыб вылын уджалiссес öтiк местö колöны бы кыка: эз ештö турун керны, воисö рудзöггез, кöдна быдмисö дружнöя, кыдз нерисö сьöкыт олансö.

Таво одзжык кутчисисö чарлаэз бердö. Ештiсö сувтöтны медодзза суслоннэз, районсянь локтiс уполномоченнöй и пондiс чувйыны бригадирсö, тэрмöтны, медбы сетны государствоö нянь — суслонсянь телегаö. Сэтöн Степаныс уполномоченнöйыслö ордчис паныт, веськыта висьталiс: «Медодз пуктам кöдзыс!»

— Кöдзысыс, мужик, оз енды, — шуисö бригадирыслö, но Степаныс тарабайкаö доддялiс вöввез, вартiс медодзза вундöмсö и пуктiс кöдзыс. Эта коста локтiс кысянькö Митрейыс (бöра эд вöрсянь петiс): тошсялöм, паськöмыс косясьöм, кыдз шедлöм ош увтö, и кывсö кыдз öштöм — некинкöт оз баит. Лöсьöтчис бригадирыс соседыслö висьтавны кыв-мöд, медбы йиджис сьöлöмöдззас, но кытчöдз нем эз шу: видзчисис, мый жö одзлань лоас, кытшöм жö кикимора эшö мыччалас Митрейыс? Эта коста Тиминаö локтiс мöдiк уполномоченнöй. Туй вывсянь веськыта пырис бригадиррезас, юасьтöг пызан вылiсь босьтiс туисöн ырöш, юис и пондiс ошкыны хозяйкасö, бытьтö сiя сэтшöм да этатшöм, а Степаныс нюмралö öмсö, но шы оз сет, кöр тöдö ни, что сьöкыт кадö уполномоченнöйыс татчö весь оз лок. Сiдз и эм, гöсьыс сёрнитöв-керис да юалö:

— Тэ сюсö дзебин эд?

— Кытшöм сю? Кытчö дзеба?! — кыдз кольмис бригадирыс. — Кинлöн киыс лэбас сэтшöм уджсö уджавны öння кадö?

— Жулик тэ, Степан Андриянович, — бöра Степанлö бытшкöны нёштöм кылöн.

«Жулик да жулик... Мый керан, кöр этадз шуöны? Он эд рожааныс чеччöвт да понды гыжьявны... Начальство... Нiя бурöсь, а тэ кин? Степан, Степан... Бытьтö тэ сы понда татöн и олан, медбы гусясьны, а кытiсь да мый? Вöлi... Дзеблiм и суськывлiм сюсö, но öнi эд война... Мед... Мымда шуасö, сымда и лоас — öманыс кольччас...» — думайтö бригадирыс, но шы оз сет, сьöлöмсö чувйö, топ кинкö чушкалö, а кин? Эз эд ыксы быд вынсис...

Война... Сiя оз юась пöт тэ или тшыг. И бурсö, Степан, нем видзчисьны, нем думайтны медодз ас пондасит, а думайтö бригадирыс, ойесö оз узь, умöльтчис, чужöмыс сьöдöтiс, жöдзö ой и лун — места оз адззы, а сэтöн эшö...

Война эд... Сiя эз орддьы вöр коласiсь деревнясö, и бригадирыс пондiс ни думайтны: «Тырмас! Мыйöн ме отирся умöльжык? Киэзö абу или коккезö чукыляöсь?! Или пишальнас ог куж лыйсьыны? Натьтö, эд тырмас кывзыны лёк кыввесö уполномоченнöйеслiсь...»

Степаныс оз любит думаэзнас асьсö вийны, доддялiс вöв, гöнитiс районö, пырис райкомö и пондiс кеймисьны секретарьыслö, медбы лэдзисö фронт вылö.

— Тэнат жö здоровьеыт...

— А ме добровольнöя!

Гортö локтiс ойнас, вежис вывтсис паськöмсö, кöмалiс виль нинкöммез, спинаыс сайö чапкис котома, окалiс учöт зонсö, и сiя жö вöлöн, кöда эз ешты сайкавны пымалöмувья, бöр иньдöтчис кузь туйö.

Ульяныс мужиксö кольлалiс деревня сайöдз, чышкис синваэсö, ньылалiс курыт-сола дульсö, но йöз моз быд горшсис эз горзы, а дыр видзöтiс вöрлань, кöда сайö, кыдз вöйис, саясис мужикыс.

Кымöра да ыркыт вöлi асылыс и сэтшöм гажтöм, что висьтавны он куж.

21

Уна деревняыс вылiсь Лолымö визывтiс ваыс: то усяс арнас лым да сылас тулыснас, то гожуммезнас вöр сайсянь лэбтiсяс кымöр и ведра понiсь кисьтас-зэрас, миськалас короминаэз, улицаись нöбöтас ёг.

Ульяна олö мужиктöг, уджалö да медучöт зонсö быдтö. Сылö сьöкыт. Не челядьыс бы, мый бы и лоис, только учöтыс и шонтö сьöлöмсö да уджавтöнняс отирыскöт басниыс вермö шогöтсö.

Етша Тиминаын керкуэс, етша и отирыс, сiдз, что врагыслö паныт нем вöлi бы уна сувтöтны, но мымда вермисö, тиминса отсасисö, кыдз сiя жö тулысся ваыс, кöда визывтiс деревняись Лолымас, юкталiс неыджыт юсö, а учöтыс ыджытжыккеслö ни козьналiс вын.

Тимина... Кин талун томмес коласын тöдö, что вöлi этатшöм деревняыс? Разьсис деревня, и öшис отир, кыдз татöн эз и олö, но, думайта, что эз бы вöлö Тимина кодь деревняэс, эз бы вöлö Степан да Митрей кодь отирыс, кöдна эз полö овны да уджавны вöр коласын, эшö сьöкытжык бы вöлi вермыны лёк врагсö.

Мужиккес мунiсö фронт вылö, а Митрейсö чожа Степаныс бöрсянь босьтiсö трудармияö, не фронт вылö, кöда йылiсь ошшасьны бы немöн.

Вöр шöрын кольччисö инь отир, челядь да Спирья старикыс, эшö зверрез. Нiя смевмисö и зэв пондiсö локны керкуэс дынö, только поннэс и вашöтiсö керкуэс дынiсь ошшесö, а кöиннэс... Тöвнас узьлiсö посöдззезын — öтнат эн пет!

Спирья старикыс, кыдз бригадирыс мунiс гортiсь, чукöртiс отирсö и висьталiс:

— Челядь, кувны эшö миянлö одзöв. Мый отирлö, сiя и миянлö. Пондам уджавны да овны, мед Гитлерыс сьöлöмö мöртчö йылажык пурт!

И кин тöн эшö котрасис лабич дор, сiя пуксис вöв вылö и пондiс пинявны, а кöда тöн пинялiс, кутчисис гöр бердö, и инькаэс гöрисö, кöдзисö, вундiсö да черöн керасисö.

Гожумыс чулалiс ни Степантöг. Эз казялö, кыдз вöтiс ар, вöрыс пасьтасис золотöй паськöмöн, лоис гора: ыкöстан и говкыс лэбзьö ылö-ылö. Тиминаöдз кывсис, что враглiсь пондiсö ныждыны нырсö.

Падмис врагыс, но умöль юöррез эз орддьö вöр колассö, Ульянлöн сьöлöмыс весь эз пессьы, кöр сылö öтiк месяцö вайисö кык вийöм гижöт: кыкнан зоныс усьöмась öтiк часö, бытьтö пö сотчöмась öтiк танкын. Ытшкыштiс врагыс масiсь туруннэсö, ытшкыштiс, и еныс эз кыв мамыслiсь кыввесö, эз кыв.

Öнi быдмöны öшын увтын сыспуэз, öддьöн жагöн быдмöны. Сьöкыт быдтыны челядьсö. Мамыс тöдö нылiсь быд шагсö, тöдö кöда медодз сувтiс коккес вылö, кöда медодз мамсö шуис мамöн, мамыс оз вунöт, кыным ой чулöтiс зыбка дынын и кынымись нимöтiс кагасö, оз вунöт... А разь врагыслöн мамыс абу, сiя разь Ульяныс моз ассис челядьсö эз быдты? Мыля нö еныс сiдз олансö керöма, мыля? Киссисö мамыс дынiсь зоннэс, кыдз арнас пипу вылiсь листыс. Ульяныс оз тöд, кытчö усисö челядьыс, куйлöны я нiя öтiк гуын, дзебисö я нiйö торйын или сiсьмöны вевдöрас. «Ваши сыновья Иван и Борис пали смертью храбрых за нашу любимую Родину...» Сымда и эм, мам! И кытiсь тэ зоннэтö пондан касьтывны семикнас нянь-солыс дорö, локтасö я нiя тэ ордö гöститнытö, кöр тэ мунан отирыскöт шойнаыс вылö, пондан юрбитны да медодз модьны: «Вошйö Ванька да Бориска...»

Ульяныс етша горзö, но сьöлöмыс висьö. Лун-мöдöн кельдöтiс, кöр локтiс умöль юöрыс.

— Терпит, Ульяна, терпит... Тэнат эд мужикыт эшö ловья, а миян... Локтас гортö Степаныс, — сьöлöмсö бурмöтöны инькаэс, горзöны быдöнныс öтлаын, кöда зон понда, кöда мужиксö öштiс, а кöдалöн сьöлöмыс висьö быдöн понда. Кин эз пешлы этö олансö, мед сiя ошшасьö, что кокнит янсöтчыны мужиккескöт, а миян маммезным пешлiсö, тöдöны, мый сэтшöм войнаыс, кыдз колö видзчисьны любимöйесö.

Дыр кыссис войнаыс — быд луныс год кузя. Дыр гортö эз лок Степаныс. Сiя гортö пырис медбöрья войнаыс годö. Локтiс ойнас, чорппезнас сяткöтiс öшынö, саймöтiс иньсö, том зонсö и посöдзас жö юалiс:

— Мый ни керат? Кыдз ни олат? Матiськушыс вылiсь вартiт ни рудзöгсö? — видзöтö, топ тöн гортiсь мунiс бригадирыс, вунöтiс висьтавны колхозниккеслö, что Матiськушыс вылiсь колö сюсö вартны. — Игнатыслö висьтав, ась ашын одзжык доддялö вöвсö да ветлö правленнёас... Оз я предыс кульзöрсö лэдз отирыслö сетавны, а то ме видзöта, что тi нач ни тшыгьялат.

— Нем миянлö оз ло, — висьталiс Ульяныс, курччöвтiс тырпсö и содтiс. — Игнатсö эд мöйму вийисö...

Курччöвтiс тырпсö и Степаныс, куритiс-керис да висьталiс:

— Сэк ась Митишыс.

— Митишыслöн тöн локтiс вийöм гижöтыс...

Мужикыс гичыртiс пиннесö, сьöкыта горöтчис:

— Некин я мый я эз кольччö?

— Челядьыс тай уджалöны...

Эз ни вöв Степаныслöн синнэзас одзза гажыс. Öнi сылöн öтiк пельпоныс лажмытжык, мöдыс вылынжык, узьтöнняс кивзышалö, ружтö, а уджавтöнняс черсö умöля вермö видзны, коккес топ абу ни сэтшöмöсь — мунö да муöттяс гужгö моз и топ кöиннэслiсь уннялöмсö оз кыв, кöдна нач ни вельмисö — некинiсь оз полö, луннас син одзын джагöтасö понöс и баляöс.

— Лыйин бы тэ враггесö, — Ульяныс медодз пондiс норасьны мужикыслö.

— Мыйлö? — бытьтö иньсö эз вежöрт Степаныс. — Ась олöны. Нiя эд сэтшöм жö душаöн и сьöлöмöн. Локтас кадыс и дугдасö разбойничайтны... Тэ медодз думайт, кыдз одзлань овны да кинкöт уджавны!

— А ми мый? Не отир я мый я? Талунöдз йöзыс ыбыс вылö эз вовлы, быдöс асьным, — обидитчис кодь Ульяныс.

Сiдз, челядьыс Степаныстöг быдмöмась, Романыс айыслö пельпонöдззас, и Таняыс невеста ни.

Керкуö пырис меддона морт, а пызан вылö вайисö сола тшаккез да шöма йöв, няньыс местö сьöд кöвдöм — курччöвтан и пиннез оз мöртчö, нянь или турун, он вежöрт, но сёйис иньыслiсь няньсö мужикыс и бöра думайтiс, что сытöг Тиминаын оланыс курзьöм, сiйöн гажтöма да лэчыта тöв и вижгö сыспуэзас. Степаныс кыдз гортö локтiс тшыг, сiдз и чеччис пызаныс сайись, спасибо висьталiс иньыслö, петiс чомö, важ сийöс коласiсь кыскис пишаль, патроннэз и пемыт сорöн петiс вöрö. Горт дынсянь мунiс недыр, чигарка эз ешты куритны, вуджис Лолым юсö, кайис ягыс вылö и сэтöн панталiс дозмöрöс. Эшö шаг-мöд, лэбтiсисö сьöлаэз. Дозмöрыс вöлi сылöн, сьöласö дзебис котомаö, вуджис гуменничасö и сэтiсь пöрöтiс вöрмöсöс. Колiс я сымдасö торкны, кöр семьяыслö тырмисö бы сьöлаэс да дозмöрыс, но Степаныслöн семьяыс ыджыткодь — быдöс деревняыс эд тшыгьялö!

Вöрын ылö лэбзис лыйсьöмлöн говкыс. Зверреслö юöртiс, что Тиминаö локтiс мужик — хозяин и тi, кöиннэз да ошшез, талунсянь эд вöрöтö подасö! И кöиннэс кежисö ойланяс...

Вöралiсьыс вöрсянь иньдöтчис гортö. Добычасö янсöтiс том и пöриськöт, кöть и эз тöд, кыдз эшö таво тöвьяс, кыдз тулыснас пондас кöдзны инькаэскöт, стариккескöт да челядьыскöт, кытшöмö еныс козьналас погоддясö, кыдз быдмасö сюэс — уна эшö мортсö полöтiсö думаэс, но сiя смела ни лöсьöтчис овны одзлань.

22

Неделя етш олiсö, видзöтöны, Усольеланьсянь шагнялö Митрей. Тэрмасьö бы, но тöлыс кузь мыгöрсö öвтö, коккес муыс бердöт гужгисьöны.

Сысъялöм городыс мортсö. Митрейыс пырис гортас, сэк жö пуксис порог вылö, иньыслö гусьöн горöтчис: «Вай жö чожжык няньтор... Сёя да вöлись кула...

— Он кув, — соседыс вылын сералö Степаныс. — Вердö жö чожажык гöсьсö Тиминасиным няньнас!

Керкуын пöжöм яй дук — дуль вотялö и няньыс нянь кодь. Митрейыс порогыс вылын и кутчисис нянь бердö, сёйис, эз и курччав, сiдз, тыдалö, и ньылалiс, шоччисьыштiс да шуис:

— Вöлись пöтi! Да-а-а, няньыс миян лекарсво кодь вöлöма...

Митрейыс бытьтö ловзисис и колiс бы сылö медодз иньсö окавны, а сiя Василисаыслiсь юалö:

— Но, Кузь бурись, кыдз метöг олiн? Эн я котрась Спирья старикыс дынö?!

— Котраси, — синваэс петiсö жö инькаыслöн, но эз понды пеничайтны, кыдз сiя мужикыстöг уджалiс, кöр тöдö, что Митрейыссянь нем унажыксö видзчисьны.

— Тять, ме гöтрасьны бы думайта, — сэтöн гажöн айыслö висьталiс Гаврилыс. Сiя айыстöг быдмöм: туша-рожаыс эмöсь, а ачыс винерик эшö. Но бытшöм бы жöник. И Митрейыс эз понды панласьны, висьталiс:

— Ме ог видз. Кöть тэ луннас куимись гöтрась. Гавриллö эта и колiс: прыг да скок котöртiс Степаннэзö, кöр сылö вывтi ни гленитчö Таняыс и пондiс модьны: «Сетö ме сайö нывнытö...»

— Адззисьöм жöник, — дундöтчис Ульяныс.

— Некытчö бы сылö тэрмасьны, — висьталiс Степаныс.

Таняыс чикисьсö кыйис, кöрталiс лентаэз — любо видзöтны, гулю моз муныштiс жöникыс одзöт, гажöн сярзьыштiс:

— Мый тi Гаврилсö и кулитат? Сы кодьыс Тиминааным некин абу — етша баитö да уна керö.

Степаныс осьтiс öмсö, видзöтö иньыс вылö, топ юалö: «Быль я мый я сiдз?!», сыбöрын малыштiс уссэсö, öзтiс ассис любимöй чигаркасö и пондiс думайтны... Вежöрт, что не сэтчин, не татчö, сiдз и этадз бергöтлы — эстöн тэ абу судья: томмес асьныс бöрйöны, кин нылö колö, сiйöн и висьталiс: «Тiянлö овны».

Кадыс зэлыт, беднöй, но керисö свадьба, мед отирыс оз сералö.

Гöтралiс Митрейыс зонсö Степаныс ныв вылö, и кык сват пондiсö овны: не ваöн он янсöт, не биöн он сот — чеччöны и водöны öтлаын.

Томмес томмöны, син одзын эшö вынсялöны да быдмöны, а Степаныс син одзын пöрисьмö. Ранитöм киыс висьö öддьöнжык — одзлань тöдö погоддясö. Ульяныс лун-мöд и бöра ни лонтö баня, кытöн мужикыс пывсьö да пöжö ранаэсö, — ойезнас ружтö, бергалö, а луннэзнас бöра отирыс коласын уджалö — вöтчыны он вермы.

Чулалö лун, неделя, кадыс оз сулав, ны весьтöт уджыс оз енды: видзöтан и вöввезнас эз ни пондö гöрны. Посадын электричество да радио, а Тиминаын сё керосин сотöны, радио местö öксясö Степаныс гöгöрö, кывзасö сказкаэз, приёмник, кöдö небöм Öсипыс, Игнатлöн медучöт зоныс — сэтöн кинкö и горöтчис:

— Мунны колö татiсь... — И сiдз шуас, топ Тиминаын не олан, а пемыт ой, и оланыс овсьö да няньыс сёйсьö. — Кытöнкö, кывзö, отирыс олöны, а татöн пессям — вöр шушкö пель одзын.

— Хе, — сэтчö серöмтчис Степаныс. — Вöр коласас оланыс эд и эм! Мунö да кошшö бур олансö, поди, кинкö заптiс... Эд кö пешлö... Степаныс аслас дженыт векын олiс гортын и йöзын, адззылiс бурö и умöльö, но некытöн сылö эз шуö, что пукав тэ, Степан, а ми уджалам да тэнö вердам — быд местаын колö аслыт бергавны — асьтö вердны. Бура туйö овны Тиминаын — эн дышöтчы, пöт и код лоан, няньыс эм и яйыс бокат, а тi, томмез, кошшат бы мöдiк олан. А электричество...

Эз бы киэс висьö, Степаныс сувтöтiс бы Лолымыс вылö сэтшöм электростанция, что ой и лун бы масiсь кодь би сотчис вöр коласын, медбы видзöтiсö йöз отирыс, а öнi мый?! Степан, Степан... Олiн, олiн, думайтiн, что томмес тэ следö жö тальччасö, что Тиминаыт пондас быдмыны да быд годö паськавны, а нiя видзöт жö кыдз...

— А мыйöн вот пондам прудйыны Лолымсö? — бригадирсö сералöны томмес. — Кöртзыррезнаным панявны мусö?..

— Кöртзыррезöн... — куритö Степаныс. — Том бы вöлi, паньöн бы прудйи! Видзöтö жö... Быд шор вылын вöлiсö мельничаэз... А кин нö нiйö прудйылiс да керис? Йöзыс эз вöвлы, машинаэс öннямоз эз вöлö, но керлiм да сiдз, что бöрсяняным мöдпöв эз ков уджавнытö, — пондiс серавны, кыдз Пальникас фермаыс дынын куим год ни прудйöны шорсö и пруднысö кылöтö, бытьтö ваыс сералö.

Чож Степаныс. Кывнас уна бы эшö öтiк-мöдiкö керö, но прокыс абу ни: нырыс ни лöзöтöм и лолыс пöрись вöв моз тырö. Кывзы сэк, пöрись, томмесö да шы ни эн сет, мый нылö колö, сiдз мед и уджалöны.

Сёрнитöны ас коласаныс мужиккес, унажык быргöны томмес вылö. Больгö-визывтö Лолымын ва. Мымда ни сiя визывтiс Степаныс овтöн? Быль бы доддявны юсö, медбы сiя уджалiс отирлö, но, кыдз шуöны, кылыт кузь да киэт дженытöсь: некин ни öнi оз кутчись сьöкыт уджсö керны. Тимина бокын, кыдз колхозыс дынiсь чайдöм ув, кежöм вöр коласö бригада. Колхозсиныс предыс öння кадö пондiс видзöтны кыдз йöззэз вылö, топ тиминсаыс оз ни колö, бытьтö асьнысö ни няньнас оз вермö вердны: одзжык сюсö сетiсö государствоö, а öнi нылö вайöны целинаись да вузалöны магазинын, топ муэс вежсисö, сюэс эз пондö быдмыны. Мый вылö сэк вöрыс коласын видзны Тиминасö?

Тиминаын томмес топ уджалöны одззамоз жö: оз дышöтчö, йöз вылö оз надейтчö и одззамоз жö рыттэзнас пукалöны Степаннэз посöдзын да кывзöны пöрисьжыккесö.

Китшсьö баня сайын катша — юöр вайö. Мужиккес мунiсö горттэзаныс. Шоччисьö мыдз луныс. Степаныс пырис гортас, кыв-мöд горöтчис зоныслö, кöда вачкисьö ни мужик вылö. Романыслö висьталiс, что ашын колö бы ветлыны Тылаыб вылö, поди, сэтчин ошыс зöрсö сёйö...

Мужиккес баитöны, а Ульяныслö некинкöт сёрнитны инькаэс удж йылiсь. Инькаыс петалiс карта вылö и лöсьöтчис водны ни, кыдз керкуас пырис Таня нылыс — ыбöссянь комö, мамыс дынö и пондiсö кыкöн шушкыны (ас коласаныс öшлыны олансö).

Мужиккеслö нем вылö бы тöдны инькаэслiсь баснисö, но недолыткодь лоис Степаныслö, кöр сiя керкуас лоö топ йöз, сiйöн лöгöн и висьталiс:

— Петö ыбöсыс бöрö да сэтчин китшсьö!

Пöрисьмö мортыс и топ бöбсялö, желлясьö быд местаын, но сыись дзик некин оз пов. Шушкисö-керисö забор сайын мама-ныла, баитiсö асланыс олан йылiсь. Поди, Таняыс ошшасис, кыдз мужикыс öтнас тшупис виль посöдз, поди, висьтасис, кыдз Гаврилыс керис додь. Сыбöрсянь Ульяныс чывкнитiс джоджыс шöрö (кытöн коккес висьöны жö ни, а сэтöн чож), чатыртiс юрсö и пондiс тотьны:

— Мун! Пышшы! Коль öтнассö! Мый сэтшöм мужикыскöт пондан сiсьмыны?! Облезьянаыскöт...

Степаныс вежöртiс ни кин «облезьянаыс» Тиминаын, но кытчöдзкö иньсö кывзiс да ас кежас тешитчис: «Но тэ менам и чож! Но тэ и инь! А ачыт кытшöм облезьянакöт олан? Поди, Гаврилысся умöльжык Степаныс вöлi, но терпитiн тай... Ой и кужан!..»

Пыр эд Ульяныс зятьыскöт ветлöтö оча пельпон: чеччöны и водöны — быд лун блиннэзöн бы вердö, а талун, кывзö жö, блиныс горшас тасасис. И мыля бы, Степан, сiдз? Кытшöм кань томмес коласöт котöртiс?

— Мый лоис, кузь бöжжез? — серöмтчис Степаныс. — Кытшöм пон пурис?

— Ог ме сыкöт понды овны... — бринь горöтiс Таняыс. Сэтшöмыскöт...

— Да-а-а... — пиннесö гичыртiс Степаныс.

23

Öтiк годö арыс вöлi сэтшöм гажтöм да зэра, что сюэсö вундiсö потшшез вывсянь: коккез вöйисö кизермöм муö.

Степаныс эз ни бригадирав: ныжмис и мыдзис мортыт — пöрисьмис.

Эта арö Митрейыс вайöтiс виль монь. Би кодь нывкаыс! Мый пондас керны, киэс пизьöны, некытшöм уджись оз пов, что гортын, что колхозын, чужöмыс вылын лöсьыт: гöгрöса да дженыт рожабана, сьöд синкыма, топыт, и мывкыдыс рам — пыр шынь видзö.

Кöть уджавны, кöть овны — öткодь невестаыс, а кыдз эшö нюжöтас сьыланкыв, вöрыс топ ловзьö, саймö, гажмö, йöктыны лöсьöтчö. Вот тэныт и Гаврил: öтiк вылö гöтрасьлiс — бытшöмся-бытшöм вöлi, пышшис сiя, но адззис эшö бытшöмжыкö. Тэ, зонка, осьтöн öмтö эн ни видз, эн ни иньтö лэдз пышшынытö, ов ни бытшöмика. А кыдз бытшöма овнытö? Кин жö бы висьталас? Кöда отсалас? Ачыс Гаврилыс тöдö кыдз овны, олö да отирсö нерö. Завидуйтö ни йöзыс йöз инь вылö. Степаныс адззö жö соседыслiсь иньсö и думайтö (грех и мый, но сьöлöмтö эд он öмлöсав): «Романыслö бы этатшöмсö...» Зонсö чожа колас гöтравны жö, а невестаэс сы сьöртi гортын абу... Романыс етша басниа, но айыс кодь жö, кöть гортын, кöть отиркöт — некытöн оз джöмды. Айыслiсь оз видзчись, кöр сiя зонсö велöтас нывкаэс сьöрын котрасьны.

Рыттэзнас шыблялö посадлань: рыт — не рыт, сöтас сизим верста Пальникöдз и абу, кошшы! Гортö локтö шондiыс петтöн, оз и шоччись, кутчисьö уджавны.

Степаныс гордитчö: «Тöд миянöс! Ме эд томнам сiдз жö...» Сiдз да не Романыс моз — сизим верстасö рытнас сэтчин да татчö эн котрась, а зоныт котрасьö и син одзын косьмö.

«Сысъяв, Степан, чанёксö, доддяв чожажык, кытчöдз Романыт нач эз тшык! — видзöтö зоныс вылö айыс да думайтö.

— Гöтрась! — зоныслö висьталö мамыс.

— Одз эшö, — сералö Романыс. Мый сэтöн унажык баитны?

Котрасис, котрасис Романыс посадö, лойис кузь туйын нятьсö, но, тыдалö, эз адззы аслыс бур невестасö, кöда бы эз повзьы петны вöр коласö, и сэк зонкасö кыдз вежисö: пондiс узьлыны гортын да удж бердö пондiс лякасьны: отсасьö айыслö да мамыслö пес керавны и турун вайны. Степаныс сэк бöра и сералö зонсö:

— Мый нö, зон? Зуралiс невестаыт...

Шынь керис зоныс, нем эз висьтав: вежöрт, старик, что эмöсь нывкаэс, пантасяс эшö, кытшöм колö, вайöтас эшö Романыс тэныт сэтшöм монь, что пеллетö пондан адззыны.

Но вот мужиккес медбöрья кадö ас коласаныс пондiсö серавны, бытьтö пö Романыс йöзлiсь иньсö «чилькöтö...»

«Йöзлiсь инь любитö... Но-о-о, мый эта? — кылiс Степаныс мужиккеслiсь баснисö, повзис. — Быль или бöбöтöны?» Аслас эд томувья вöвлi жö, что бокö эз кеж, кöр пантасьлiсö басöк инь отирыс — любитöны и мыля бы не любитны, только колö кужны, медбы некин эз тöд, но Романыс моз эз сералö, а сiйö сералöны. «Эх, Роман! Сiдз я колö? Соседытлiсь эд иньсö пö мырддян? Быль или абу? Вермас я сiдз лоны? — айыс видзöтö ни зоныс вылö, но кытчöдзкö шы оз сет, а олö да гусьöн синйö, кытчö рыттэзнас зоныс петö, кытöн шыралö, но нем сэтшöмсö оз казяв: Романыс локтас уджалансянь, водас и сылас-онмöссяс.

Бöбöтöны отирыс!

— Оз бöбöтö! — кыдзкö Ульяныс висьталiс мужикыслö. — Ачым ни казялi, а тэ бытьтö нем он адззы. Ныжмисö синнэт, старик!

— Тэ уна адззан да уна кылан!

— Горштö кужан летны, а сэтöн... — Ульяныс видö Степансö. Вежöртiн, Степан? Сiдз пондiсö баитны, и тэ шы эн сет, но айыслöн думаэс öддьöнжык ни бергалöны соседкаыс гöгöрын, и зоныслö тшупö, что сiдз оз ков керны, оз ков Степановскöйесö позоритны, мед нiйö отирыс тöдiсö да эзö.

Романыс кылö да оз айсö — шы оз сет. А погоддяыс топ отирсö сералö: кыдз вундiссис, мыччисис шондi. Арся вöрыс пондiс öгравны быдкодь рöмöн, лоис сэтшöм шоныт, кöть öтöрын узьлы.

Тиминаын чукöртiсö чарлачöвтан — праздникся-праздник: начкылiсö бараннэз, инькаэс одзлань пöжисö да сысъялiсö ырöшшез, да вийöтiсö суррез. И праздник лунö павжун бöрсянь отирыс чукöртчисö Степаннэзö — гöссес керкутыр, кин да кытiсь и эм, кытшöм деревняын и олöны, а тэ, Ульяна, вöрöтчы! Сысъясь, пöжась да пызан вылö ешты ваявны, а уджалiсь отирыс сёясö.

Сёйисö-юисö, мымда кинлö тöрис, гажмис отирыс и чеччöвтiс том и пöрись джодж шöрö йöктыны-тойны тусь да сiдз, что керкуыс пондiс ружтыны, потолоксис буждiс песок, дзуртiс джодж. Йöктiсö пымавтöдз, кöть пидзырт йöрнöссэзнысö, кымöссэз вылiсь ньылöм вотялö. Степаныс юыштiс отирыскöт, сьöлöмыс томмис, чеччöвтiс джоджыс шöрö йöктыны, быркнитiс петух моз, китöстiс, сьылыштiс, уссэсö гардыштiс — быдöнöс кыскö сьöрас, и пöрись Куличикаыс, старушкаыс, берездасис гор вывсянь йöктыны жö бы, чеччöвтiс бы томмес моз, но важ сьöлöмыс джöмдiс, берездасис моросас да сувтiс. Аминь! Сэтчö мортыслöн лолыс петiс, сэтöн старухатö смертьыс и видзчисьöм, а эд таво эшö Куличикаыс раз-мöд кайлiс матiсь ыб вылö, чарлаöн гардчис отирыс коласын, сiдзкö, мымда вермис, отсасис вундыны... Дыр олiс мортыс, спасибо сылö да спасибо. Кöть миян отирыс мукöдпыр пöрисьыслö и вунöтöны висьтавны спасибосö, а шуасö эшö: «Сэтчин тэныт и туй!..» Бöбöта: тиминса эз вöвлö сэтшöмöсь... Аскоддя Тиминаын таво лоис чарлачöвтаныс: кин сьылö, кöда горзö...

24

Рытнас Романыс гортсис петiс ыркöтчыны. Рытыс тöлiся, гажа — кок увтö ем уськöт и адззан. Муыс челядёк моз узьö чöскыт онöн да сiдз, что полан и несйöвтны.

Зонкаыс кань моз гусьöн лэдзчис посöдзсиныс, дзир-бар керис ас гöгöрас, скок чеччöвтiс чом сайö, пыдынжыка ловзисис да ас кежас шынньöвтiс — öтöрас некин эз вуджрась, только понныс чеччöвтiс, нюлiс рожабаннэсö, и эшö кылiс, кыдз кинкö горзiс Куличикаэзын. Романлöн сьöлöмыс пессис моросас, кыскис-тэрмöтiс одзлань, кыдз каньöс шыравны петшöррез коласö, кытöн дзескыт, но добычаыс лоас. Сiя петшöралiс кисö и рожабансö (коккезас эд шедiсö важ отопкиэз, кöднö мамыс посöдзаныс видзö ветлöтны мöс дынö, но эз пов мыччисьны этатшöм кöмкöтнас сы дынö, кин ойсö оз узь, но зонкасö видзчисьö), и бур эд, что деревняыс учöт, отирыс етша, а кин талун кежö локтiс гöститны, важын ни пöтiс суррезöн и шоччисис кытöнкö полатьын или лабич увтын. Тöлiсьыс кыдз сералiс, но сы вылö Романыс эз видзöт, а рысь моз йöрыс бердöт зэв куим-нёлись чеччöвтiс Митрейез öшын увтö, вуджöртчис и öшис пытшкись посöдзас.

Тышкасисö коттэз, быд горшсиныс нёштöма нявзiсö улицатыр — спинаö киссьыштiс топ кöдзыт ва. Романыс посöдзас сувтчыштiс, кывзiсис, оз я керкуас кинкö кыв йöз, но Митрейезлöн некин эз вöв. Хозяиныс зоныскöт луннас доддялiсö вöв и гöнитiсö посадö (сэтчин нылö и туй!), и зонкаыс радувья кымöснас люкалiс косяксö, маласьтöн адззис ыбöс вуг, нетшкöвтiс ыбöссö асланяс. Керкуыс паныт ловзисис шоныт руöн, кöда сорласьöм сюромка да пода юкталан ваöн. Пызан вылын сотчис «шыр би» — семилинейнöй лампа, джоджын праздник кежö вöвдöмась аскыйöм сера половиккез, джоджыс шöрын пукалö кань и «миссьö» — лапаэзнас ниртö рожабаннэсö.

— Здоровöн олат, — гусьöнмоз челядь голосöн здоровайтчис Романыс — хитрöй, эмöсь кö пöриссес, мед думайтöны, что петiс сюромка юны.

Паныт некин эз шыась. Потолокын да стенаэзын, газетаэзöн лякöм заборын кышöтчисö тараканнэз, нiя сымда, что пызан вылö оз туй кольны не няньтор, не туисöн ырöш — сёясö и суктасö юансö. Не весь Митрейыс ошшасьö, что тараканнэс пö богатство одзын... А кытшöм, поди, богатство Митрейыслöн? Но ошшасьö эд...

Мöдiк бы брезгуйтiс тараканнэзсис, но Романыс татчö сёр рытнас локтiс не ны дынö, сылöн сьöлöмыс кыссис мöдiклаö, только полiс öтiкись: некин бы эз адззыв да эз кут!

Комын кроватьын пыдына лолалiс Надя да бытьтö узис, но сiя эз узь и эз видзчись Гаврилсö, сылöн сьöлöмыс тёпкöтiс моросас, важын ни чеччöвтiс бы Романыс дынö, но мыйиськö полiс. Нем и баитны — басöк Митрейлöн моньыс, кыдз горадзуль, не весь батшкоыс ошшасьö: «Менам эта моньыс! Менам... Некинлö ог мыччав, мед оз вомдзалö!» Ох и Митрей! Кужан ошшасьны, а зоныт пеллесö лэдзöм, öмсö осьтöм, синнэсö пöрись котыс моз жö куньöм и топ нем оз кыв и оз адззы, но и ась... Сы местö том бригадирыс оз узь (годся унажык ни Романыс уджалö айыс местö бригадирнас), сiя пырис керкуас, бöрсяняс пöдналiс ыбöссö, жагвыв маласьтöн кыссис йöз кровать дынö, уськöтчис Надяыс дынö и пондiс сiйö пыма окавны. Надяыс öгралiс би жарöн, сы дынын сэтшöм шоныт, что Романлöн öмас косьмö дульыс, дрöжитöны киэс и джöмдалö сьöлöмыс.

— Роман, стыдитчы! — счастливöя лёбö Надяыс, ачыс кутчисьö зонкаыс голя бердö и окалö — пöтны оз вермы.

Каньыс мурзьö да ниртчö зонкаыс коккез бердын. Гор увтын курöг позын китöстiс петух, посöдзын тапкис-чеччöвтiс поныс. Ох, Роман! Шедiн эд... Зонкаыс лэбтыштiс юрсö, кывзiсьыштiс, сьöлöмыс моросас, кыдз кöчлöн, сiйö и видзöт, кыдз чеччöвтас, но кытчö! Кыт петан керкусис? Или джоджулас заргисян?

— Некин абу, — бöра голяыс бердö кутчисис Надяыс, жмитiс ас бердас да сiдз, что ловзисьны немöн.

Талун эд кулiс Тиминаын пöрись морт — Куличика, грех бы тiянлö окасьны, томмез, но мый керан? Оланыс эд, баб, тэ бöрын оз джöмды, и кин шуö, что томмеслö грех окасьны? Только эд пöриссес кöркö асьныс сэтшöмöсь жö вöлiсö...

Окасьöны томмес и пöтны оз вермö, нiя счастливöйöсь эта минутаö — некин оз ков, и кöть эм, кöть абу Надялöн мужикыс. И пондiс Надяыс шушкыны Романыслö пель одзас, что мужиксö оз любит, нем сэтшöм жöникнас керны, кöдзыт изнас, кöда водас бокас и куйлö — колода! Не мужик и не инька — он вежöрт. Синваэс визывтöны инькаыслöн, шушкö зонкаыс пель одзын, норасьö аслас олан вылö, видзчисьö отсöт. Любитö Романсö Надяыс — öтiк минута кежö бы оз янсöтчы, но оз туй! Грех эд, Роман! Отирыс мый пондасö шуны? А ась кöть мый шуöны, ась... Зонкаыс нем оз висьтав, ниртчö и окасьö йöз инькöт.

Кадыс лэбзьö, чулалö казявтöг. Счастливöйöсь томмес, но, кывзö, эмöсь умöль отир, кöдна нем оз вежöртö, олöны враггез местö, и дульныс вотялö йöз счастье вылö — этö Мититiкалöн, Анналöн да Пальникись Важ Прокопикалöн, куим кикиморалöн, кöдна некöр и немöн оз пöтö, оз кужö гажöтчыны отир коласын, мöссэз моз янсöтчöмась гармошка дынiсь и öктiсьöны öтнаныс, бытьтö отирыскöт оз пöтö сюромкаэзнас, сiйöн гусьöн и сибöтчисö Митрейез керку дынö, хи-хи да ха-ха-ха! И гусьöн жö кайисö посöдзö, кывзiсьыштiсö, пондiсö маласьны пемытiнас, кошшыны ыбöс вугсö.

— Ой! — повзис Надяыс, дынсис тойыштiс Романсö, ачыс заргисис шебрас увтö.

Романыс оз тэрмась, сылö еныс абу шуöм овны дира-вара, а пыр жагвыв, керны дак керны, медбы мöдпöв уджсö не моновтны. И öнi кымöсыс вылiсь чышкис ньылöмсö и вöлись калян моз заргисис кровать увтö и абу! Но вунöтiс отопкиэсö кровать юрыс дынö. Мед, отопкиэс эд эмöсь и Митрейыслöн, и мыйöн тэ пыкан, что нiя бригадирыслöн?

Ойшöр. Петухыс важын ни китсасис, а инькаэслö оз узьсьы, нiя пырисö керкуö, серавтöн пуксисö западня вылö и сэкжö пондiсö лёбны, что талун нiя кошшöны жöниккез, но некин оз пантась, а пантасис бы... Нетшкисö бы куим тор вылö — юрыс Мититiкалö, сьöлöмыс Анналö. Важ Прокопикалö коккес.

— А тэныт мый, Надя? Эй, Надька! Тэ мый? Быль я мый я узян?! Быль эд узьö... Но и морт, но и инька, этадз тэ Гаврилтö öштан...

Инькаэс лёбöны — öмсиныс дуль резсьö. Стенаын шовкöтö часы. Надяыс бытьтö узис медчöскыт онöн, бытьтö сiйö саймöтiсö ойся-ойшöр, и сылöн дышыс петö чеччыны, но колö чеччыны, гöссесö юктавны сюромкаöн.. Надяыс нюжöтчис кань моз кроватьын, осьтiс öмсö, кивнитiс, лэбтiс юрсö и дыркодь видзöтiс инькаэслань, кöдна сералiсö, что некин сiйö ойезнас оз вöрöт, а колiс бы... Видзöт, госсялöм ни пö курöг моз, сiйöн оз и тырсяв, сiдз и пондас овны кагатöг, нетель.

Инькаэс модьöны — солалöны олансö. Тараканнэз — кинлöн да кытчö туй! Дзебсисисö син одзись, а кöдна нагладь мыччисö и котрасьöны джоджас.

— Тi мый ойнас кошшисят? Кинöс öштiт? — Надяыс пасьталö йöрнöс кроватьыс дынын и баитö гöссескöт.

— Бур тэныт, (невна öмсис эз чеччöвт Аннаыслöн, что гортат локтöны), бур тэныт вот, кöр кöть кытшöм да мужик эм, а миян вылö некин ни оз видзöт, — нырнас вишкайтö пон моз, кыдз кылö бригадирыслiсь дуксö и висьталö. — Ой, Надя! Мылякö тэнат йöз мужикöн керкуас патшкö — ныр чегö.

— Кытшöм йöз мужик? — оз вежöрт хозяйкаыс. — Асланым жö куритiсö, — тэрмасьö, сунилабичись босьтö тыра туис, юктасьö: — Ю, тётка, ю!

Мöдыс шванитчö: «Ог, ог!» и нюжöтö туисыс дынö киэсö.

Романыс куйлö кровать увтын не кулöм и не ловья, оз бы и лолав, но котыс локтiс дынас да пондiс орсны: лапанас малыштас синсö, чеччöвтас кынöмыс вылö и мурзьö, и мурзьö...

— Кин тэнат сэтчин кылö? Гуддисьö кроватьыс увтын... — юасьö Аннаыс. — Вай жö видзöта?

— Кин? Кык кока кöин, натьтö! — öмтырнас ваксьö Паладьыс. — Дзебсисис миянiсь... Надя, сiдз и пондан кувтöдз сiсьмыны-косьмыны? Он и пешлы мужик кöрсö. Мужиккес тай баитöны, бытьтö пö Гаврилыслöн кöктоиныс абу?

— Мый тэ и лёбан?! — Аннаыс тупкалö бы Паладьыслiсь öмсö. — Тэ узьлiн я мый я Гаврилыс бокын?

— Тöдчö эд...

Надялöн петöны синваэс — курыт сьöлöмыс вылын, юкталö гöссесö, дзик рад, а юрас кольмöт.

Быздöны инькаэс, бöрйöны мужиккесö, вежлалöны, баснинаныс: öтiк нылö гленитчö, мöдiк оз, бытьтö сiдз нылö мужиккес и шедöны, сiдз и адззöны войнаыс бöрсянь — баснинаныс сьöлöммезнысö бурмöтöны, тешитчöны, что томсяняныс вöлiсö басöкöсь жö, что ны моз некин эз куж любитны и уджавны, только нiя кужисö. Войнаыс янсöтiс любимöйезныс дынiсь, кöднö некöр эз вежлалö и кувтöдз ни оз вежö.

Талун праздник — вежалун, и инькаэз кыдз кужöны, сiдз сiйö и чулöтöны.

— Надя, — гажöн баитö Аннаыс, сералö — пиннес гер. — Ме бы тэ местын! — пизьö инькаыс, вирыс чужöмыс вылын орсö — сöт и чепöссяс россолыс: инькаыслö мужик бы колö, умöлик, кöсыник, учöтик мыгöра, но мужик, а татöн нiя абу (бöбöта: эмöсь, да эд не сылöн), абу мужиккес и кытiсь нiйö вайны? Сiйöн и горзö да норасьö: — Надька! Вöлi бы менам мужик, быд гожум бы кольттялi, и некинлö шуны бы...

— Мыдзин бы... — горзьöтö Мититiкаыс.

— Ме мыдза?! — лег-лег керис юрнас мöдыс. — Этö тэ уджавнытö дыш, а ме немись ог пов.

Инькаэс юöны сюромка, кеслöны пиннезнысö, вишкайтöны ныррезнаныс и пукалöны — кыскöны кадсö, а Романыс... Ромка тэ, Ромка! Мыля тэ сiдз и шедiн кроватьыс увтö?! Мый и пондан керны, кöр инькаэслö юраныс пырас овны татöн асылöдз? Этö ме сiдз думайта, а зонкаыс оз пов — кин да кинöс! Натьтö, эд инькаэс пукаласö, пукаласö да мунасö жö горттэзаныс, медбы асывнас одзжык лонтны горрез да вöдитны пода, только вот котыс... Эх, Васька! Но мый тэ лапаэтö нюжлалан зонкаыс дынö? Гильöтö котыс зонкаыслiсь боккесö, орсö, бытьтö сы одзын ыджыт шыр, сiдз бы и серöмтчö Романыс, но видзсьö — ружтö да видзсьö.

— Надька, мый бы и вöлi, ежели бы эз вöлö мужиккес? Кыдз бы и олiсö томмес? — готсьö Аннаыс.

— Öддьöн тай... Мымда ни ме мужиктöг ола да ог кув, — шуö Мититiкаыс.

— Бытьтö öтчид Мититыс бöрсянь эн и пешлы?! — рызъялö Аннаыс.

— Тьфу тэ, господи! Мый сiя, нянь я мый я, что сытöг бытьтö овны ни ог вермы? Этö тэ эд кулан бы чöскыт торыстöг...

Кывзы, Роман, кытшöмöсь миян инькаэс! Ачыт эд тöдан, кыдз нiя вöввез моз ниртöны-уджалöны ой и лун, немымда и некытöн асьнысö оз жалейтö, а кыдз личытжык кадыс, топ ловзясö, томмасö, и — вай! Мужиккез йылiсь и басни — оз керö, но кыввезныс орсöны.

Котыс пукалö кровать увтын Романыс бокын и видзöтö зонкаыс вылö да мурзьö. Зонкасö серöмтöтöны инькаэс, кöдна вунöтласö ни мужиккес йылiсь, кежласö ни баснинаныс мöдöрö, но сiя жö Аннаыс пондö бöра гывны Гаврил йылiсь:

— Кытöн татöн и эм, поди, бур мужикыс? Надя! Тэнат вот мужик дак мужик! Туша-рожаыс айыс кодь жö и киэс золотöйöсь... Видзöт жö, кытшöм бöра сапоггез симöтсис кыйöма! Мунан, дак только дзурка-вирка, кыдз енерал, мыся... А туиссэс! И пестерресö сэтшöммесö некысь он адззы, и кöньöссэс... Сет меным Гаврилтö!

И бöра Надяыслöн петöны синваэс, бöра сiя дульсö ньылалö да паныт нем оз вермы висьтавны.

Петухыс важын ни китсасис, котокыс мыдзис ни Романсö гильöтны кровать увтын, а инькаэс пукалöны, быздöны-баитöны, юöны сюромка, топ пöтны оз вермö. Романыс куйлö кроватьыс увтын не öтiк час ни. Луннас пöт жö юис сюромкасö, öнi кынöмыс польдiс — дундiс, кишкаэс пондiсö горавны, кынöмас топ телегаöн ысласьöны: котрасьны бы öтöрöдз и быдöс бы бур лоис, кöть сыбöрсянь югытöдз тараканнэскöт куйлы. Бур окасьны, но умöль кроватьыс увтын куйлыны, пöжны боккез, и зонкаыс пондiс думайтны, кыдз медодзись пантасис Надякöт.

25

Эта вöлi неважын. Вöрыс пасьтасис ни арся рöма паськöмöн — праздник природаыслöн! Каёккес лэбалiсö табуннэзöн, лöсьöтчисö лэбзьыны шонытлань, лог дорын пиксiс сьöла. Тиминса вундiсö. Кадыс дзескыт. Бригадирлö некöр пöт узьны, ой и лун Романыс коккез вылын. Вот дзимляссясö сюэс, сэк зонкаыс пондас котрасьны Пальникöдз, кытöн нывкаэс уна — бöрйы кытшöм колö! Мамыс бöра пондас модьны: «Гöтрасьны ни колö!» «Колö — гöтрась, а меным эн модь, — думайтö Романыс, думаэс бергалöны Юля гöгöрын, кöдакöт гожумнас дружитiс, талис туйсö посадöдз, а öнi, кывсьö, бытьтö пö нывкаыс ветлöтö Сенич Петракöт, и мед... Адззам мöдiкöс!»

Романыслö вöлi недолыт жö, кöр мырддисö невестасö, но мый керан? Он эд быд лун сизим верстасö котрась Пальникöдз... Юлькаыс эшö унаись касьтылас Романсö.

Тöждiсьöв-керис зонкаыс Юлькаыс понда, да вунлыны ни пондiс. Уджыс сорö думаэсö. Вундöны инькаэс ыб вылын — киэзныс уджалöны, а öмныс осьта: сералöны том бригадирыс вылын, что сiя ыджыт, бытшöм, а невестасö öмсис лэдзис и, натьтö, Юляыс кодьсö оз ни кут.

— Эн гöтрась, Роман! — сэтчö висьталiс Надяыс, а рожабаннэс гöрдöтiсö, топ нывкалöн, да содтiс: — Мый гöтрасьöмсис?

— А мый колö миянлö? — готсьöны инькаэс. — Вöлi бы мужик.

Радöсь инькаэс, кöр таво вундöны медбöрья ыб ни: погоддяыс вöлi умöль, а талун мыччисис шондi.

— Вöлi бы мужикö, некинлö бы эг и мыччав! — синваэсö чышкö Игнатика.

— Вайöт Спирья стариксö, поди, эшö бокат узьлас!

— Аслам бы колö!

— Но и инькаэз! Кыдз пондiт пöтжыка сёйны, сiя и басни... Од вунöтö мужиккезныт йылiсь — нетшкöвт да вай! Сiдз эд, Надя?!

Анналöн киас чарлаыс орсö, кольтаэс содöны, сувтöны сьöрсьöн-бöрсьöн суслоннэз — любо видзöтны, любо видзöтны и Аннаыс вылö: том, визыв, чочком юрсиа, чужöмыс рöмсялöм, басöк.

Надялöн öмыс нюмыр-нямыр, пиньöвтчис, басöк тырппес жугалiсö, синнэс дорын мыччисисö синваэз — сэтöр гырися воттез.

Инькаэс баснинаныс дзугсисö, вундöны и пöв синнэзнаныс видзöтöны томжыкыс вылö, быдöнныслöн дума: «Мыля нö горзö Надяыс? Мый сылö лоис? Умöля Митрейеслöн видзöны или мужикыс не сы сьöртi?» Инькаэсö он бöбöт, нiя ылiсянь адззöны, кыдз лолалан, сёян, юан, и вежöртöны чужöмыт сьöртi, кыдз мужикыт бокын узьлан. Талун инькаэс адззöны, что Надяыс не весь уна оз баит: Гаврилыс иньсö, тыдалö, видзö умöля, кöть Митрейыс ошшасьö, топ сы кодь мортыс абу — быдöс моньыслö да моньыслö, а моньыс... Кинкö кылöм ни (баитöны эд öтамöдныс коласын), что Надяыс кытöнкö горзöм ни, пеняйтöм, что мамыс вузалöм-сетöм нывкасö, кытчö оз ков, что Гаврилыс эм и абу, иньсö пö оз куж любитны — не ласковöй кыв он кыв, не оз куж шонтны... Колода пö бытьтö и эм, а не мужик...

— Тэ мый томся-томöн сiсьман?! — сэтчö лöгöн горöтчис Аннаыс — веськыта шырзьыштiс. — Мый тэ?!

Сэтшöм и эм Аннаыс: мый синас, сiя и öмас — кулактö он заргы. Романыс сулалö суслоннэз коласын, кывзö, мый баитöны отирыс, шыннялö, гусьöн видзöтö Надя вылö, кыдз сiя мышкырасьö чарланас и мыгöрыс син одзын орсö: коккес ёнöсь, коскыс вöснит, топыт и чож да сэтшöм, что вундыны сы мымдасö етша кин вермö — пöвсалас луннас пятнадцать-двадцать соток и рытнас гортö мунö сьывтöн. Надяыс топ быль инька и не инька: унажык вачкисьö стройнöй нывка вылö, кöда олас-олас и оз пöрисьмы.

Кадыс рытлань ни. Инькаэс вундöны да шондi вылö видзöтлöны, модьöны: «Бригадир, гортö ни бы колö...»

— Уджалыштö да вöлись! — висьталö бригадирыс и видзöтлö шондiыс вылö жö, кöда эшö кöззэс вылö эз öшöтчы.

Мöссэс, кылö, баксöны гортын ни, петуххес китсасьöны седала вылын ни — шоччисьны бы, но бригадирыс тшöктö вундыны медбöрья лекасö и пондö меряйтны вундöммесö сэк, кöр нач ни шондiыс саясьö вöр саяс. Уджалö бригадирыс, инькаэс лöсьöтчöны гортö, а Надяыс топ оз тэрмась — бригадирсö син вылiсь оз öшты.

— Грех, кага, йöз иннез вылö видзöтлыны! — вак-вак серöмтчис сiя жö Аннаыс.

Зонкаыс шы эз сет.

Арпоныс вачкисьö тулыс вылö: руыс сöстöм, гывьялö вöрресö, кöдна топ лэбтiсисö вевдöрö и лöсьöтчисö лэбзьыны.

Тöн инькаэс вундiсö, талун уджалöны гуна вылын: вартöны да тöлöтчöны. Сярзьö тарабайка, сiйö одззамоз оз ни бергöтö вöввез, а уджалö трактор «Беларусь». Машиналöн шыыс лэбзьö вöррезö, павкö Лолым дынöдз, бертö бöр, тэрмöтö удж, кытчöдз погоддяыс бур сулалö.

Бригадирыс отсасис инькаэслö: кытöн телегаö тэчис тыра мешöккез, кытöн куралiс ведраэзö сю. Гортö мунiсö мыдзöсь, но радöсь.

Торьякуш вывсянь туйыс мунö вöрöт, вуджö ключ-логок. Шорокыс тöв и гожум больгö, висьтасьö ассис олан. Быд шагын коккез дынiсь быркайтöны каёккез, кöз уввез бердö чераньыс кыйöм сэтшöм дöра, что сiя югьялö шондi югöрыс вылын бисерöн: босьт бы, сюйышт зепат и ошшась, что адззин дона тор.

Эта вöрокын ключыс дорын бригадирыс и панталiс Надясö: инь мортыс чышьянасьöм басöк цвета чышьянöн, вылас пасьталöм гöрд цвета платье, коккезас виль сапоггез, кыдз локтö не уджалансянь, а мунö гöститны. Вöрын туёкыс оттöм — тальччы бокö и кокыт вöйö небыт да кузь нитшö. И люкасисö кыдззез коласын кык морт: Романыс Надяыс одзын паськöтiс киэсö, вевттис туйсö, ачыс шыннялö.

— Мый лоис? — топ повзис Гавриллöн иньыс, а синнэзас гаж, кыдз нывкалöн зонка одзын.

Гора арся вöрыс, быд шыыс топ вичкуын — ловзисян горöнжык и кылö Тиминаöдз. «Курлы-курлы! — сöстöм небоын лэбзьöны туриэз, топ шуöны: — Адззисьлытöдз, ёрттэз!» Чожа ни усяс лымыс, локтас бöра кузь да кöдзыт тöв, но талун эд гажа. Романыс гусьöн горöтчис:

— Надь...

Веж мороса учöтик каёк пукалö юррезныс вевдöрын, öвтö бöжнас, сьылыштлö ас мознас, лэбалö ув вылiсь ув вылö, топ лöсьöтчö быдöнлö висьтавны томмес йылiсь. Тшöк кöзоккез коласöт котöртiс ур.

— Сет туйсö, — гусьöн горöтчис Надяыс, нюжöтiс киэсö зонкалань.

— Кытчö тэрмасян? — Романыс жмитiс моросыс бердö Надясö и пондiс окавны гладь да басöк рожабаннэсö.

— Тэ мый керан? Отирыс адззыласö... — рамыника горöтчис инькаыс и кыдз сылiс зонкаыс морос бердын.

Кылiс тракторлöн шы, кöда уджалöм бöрсянь тарöвтчис посадлань, ылын ни шыасисö туриэс. Медодзза минутаö кыкнанныс кыдз повзисö öтамöдсиныс, но ёнжыка жмитчисö, кыдз важын ни видзчисисö этö пантасьöмсö и вывтi ни гажтöммисö да сiдз, что локтiс бы кинкö дынаныс, эз бы и кылö.

Окасисö, пуксисö мыр бокö и полöмöн пондiсö видзöтны öтамöдныс вылö, топ гусясисö и полiсö, что öнi жö шедасö и пондас ковны быдöн одзын гöрдöтны, но некин йöзыс ны дынын эз вöв: уджалiссес, кылö, бобгисö ни деревняын, сералiсö да мыйкö баитiсö öтамöдныскöт, кöда видiс ассис мöссö, кинкö ыксiс пон вылö, и быдöс эта томмес дынiсь олiс торйын, только Романлöн поныс бергалiс хозяиныс дынын, никсiс-гажöтчис. Вунöтiсö, что эм Гаврилыс, что сiя талунсянь ны коласын кыдз враг и некыдз сы дынiсь оз мезмö.

Больгö шорок-ключ, тэрмасьö сöстöм ваыс, визывтö Лолымö, öтлаасьö юкöт, вынсялö; ключыс юкталö каёккез, туруннэз, зверрез, чöскыт васö юöны и отир. Больгö-визывтö ваыс, мыйкö, натьтö, висьталö бы томмеслö, но нiя оз кылö и оз адззö ас гöгöрсиныс, ёнжыка жмитчöны öтамöдныс бердö, и Надяыс дивуйтчö: «Ой, Роман! Мый тэ и керин мекöт?!» «Надюша!» — жмитö ас бердас инькасö Романыс, и сэсся нем оз адззы висьтавны.

А эта коста Аннаыс дзöдзыв моз кыссьö-мунö тшöк кöззэз коласöт, кошшö тшаккез да кывзiсьö, мый висьтасьö сылö гора арся вöрыс. Аннаыс бытьтö кошшö тшаккез, а ачыс югыт синнэзнас чувйö вöрсö, видзöтлö, кытöн жö бригадирыс пукалö Надьыскöт, кыдз нiя мыйкö гусялiсö Аннаыслiсь, мырддисö и видзöны дынаныс — нылöн эм, а сылöн абу.

Завидуйтö Аннаыс томмеслö... Сьöлöмыс пессьö и лöгыс петö, мыля сiдз овсьö, сэтшöм еныс, что öтiк счастьесö лэбзьö да кутö, а мöдiк вöтлiсьö и вöтны оз вермы.

Томмес окасьöны, ниртчöны öтамöдныс бердö, а Аннаыс кокнита чывкнитiс и сувтчыштiс кыз кöз сайö, дзебсисис: синнэс вирдалöны-югьялöны, туйис-вермис бы, мырддис бы Романсö и некин бы эз шу, что мыля сiдз керан — мужикыс эд абу, а мöдыслöн эм...

Ох, бригадир! Но тэ и бригадир, Степанлöн зон, он думайт, мый керан, кыдз ашын жö Аннаыс пондас висьтасьны, кытöн вöлiн да мый керин? Сiдз, но Аннаыс абу ни том, тöдö ни мужиккеслiсь мывкыдсö, сiя абу Надяыс кодь, кужö ни овнытö и весь бригадиррес вылö оз уськöтчы, а видзöтö боксянь да ньылалö дульсö.

Пукалöны томмес вöрокын, кывзöны, кыдз больгö-висьтасьö шорокыс. Пукалöны томмес и бытьтö сiдз и колö, ны моз и лоас — некин нiйö оз адззыв, оз кут и пондасö этадз пантасьлыны отир син сайын да пöттöдз окасьны.

...Чулалiс арся рытыс. Ойыс кöдзыт, асывнас усис кыз пуж. Аннаыс чеччис одзся-одз (ойбыт эз вермы узьны: рытсянь вöтасис кытшöмкö арттöм вöт, повзис и сэсся кöть синнэсö ляк, эз ни ланьт), лонтiс гор и, кыдз öтöрас пондiс тыдавны, котöртiс бригадиррезö. Инькаыслö колiс вöв, медбы посадö кыскыны картошка, а Романыс эшö узис. Инькаыс пырис керкуас, бригадирыслiсь малыштiс юрсö, гажöн горöтчис:

— Чеччы, бригадир! Ракаэс эд поздiсьöмась юрыт вылö.

Зонкаыс узис порог дорын аскерöм кроватьын, и онсö кыдз киöн босьтiсö. Пуксис, видзöтö: одзас Аннаыс и синнэзас сэтшöм югöр, топ тэ, бригадир, шедiн и некытчö öнi он пышшы. Вежöртiс Романыс, что инькаыс быдöс ни тöдö, но кытiсь? Сiйöн лöгöн и юалiс:

— Мый колö?!

Мöдыс чукыль-мукыль и нем оз висьтав. Бригадирыс чеччöвтiс кроватьсис и ыбöсö!

Öтöрас кöдзыт, баняэз сайын вувтö пон — вöрсö гажöтö. Ыркыт бы сулавны посöдзас, но он сулав: кок пятаэз йирö Аннаыс — бöрас ни и вöт висьталö, топ ключыс дынiсь тэнö адззылöм Надяыскöт. «Ой, Роман! Кыдз эд бытте окасят, кыдз окасят... Менам чисто дульö вотялö, топ аслам тырппезö окасьöмсяняс пымалiсö, а сьöлöмö... Ой, Роман! Мый одзын жö бы эта?»

— Мый одзын... — нерö инькасö бригадирыс. — Поди, тэкöт окасям?

— Окасян ме кодьыскöт... Чукыра-пакыра рожаыскöт, тэнат невестаыт гладь эд.

— Мый тэныт колö?! — бöра лöга юалö бригадирыс.

Инькаыс юрсö чукыльтiс, синнэсö чикыртiс, китшсьö ассис:

— Вöтаси, мыся... Мыся, вöтаси... Ох, Роман! Мыля ме одз и пондi пöрисьмыны?! Мыля сэтшöм вöттэз и вöтася? Поди, тэ быль тöдан? — модис-керис, но мöдыс шы эз сет. — Вöв бы меным, Роман, колö...

— Мый вöвнас керан? Вöввес гортын колöны. Виналогсис талун шогдiсö пондам ваявны.

— А ме думайтi... Али норасьны Надяыслö?!

Но не бес я Аннаыс? Вот кытöн вöлись тальччис бригадирыс бöж вылö!

— Уна пондан тöдны!..

— Тэ мый, Роман?! Ме эд ачым том вöлi, вежöрта, поди...

— Кут Чалкосö! — мурзьыштiс бригадирыс — вештiс бедасö дынсис, но дыр кежö я?

26

Этадз вöлi, а талун...

Сьöкыт ой чулалiс Романыслöн, и луныс сэтшöм жö вöлi: ачыс оз тöд, мый сьöлöмыс вылын: нето гаж, нето шог, отирыс син одзö оз бы и мыччись, но колö! Бригадир эд.

Лунсö тойыштiс, рытнас одзся-одз чужйисис кроватьö. Мамыс эшö юалiс: «Шогалан я мый я, зон?» «Юрö висьö, — зонкаыс бизгыштiс ныр увтас и пондiс осьта синнэзнас куйлыны да думаэзнас овны Надяыскöт, кöдö туйис бы, дзебис бы гортас, и некин эз тöд, что сiя сы дынын.

Ашынас айыс чеччöтö: «Чеччы, зон. Öвинсис сюсö колö бы лэдзны. Ме одз чеччи да косьтi зöрсö. Поди, бöра тракторыс локтас, и мед лоö жö мый вартнытö...»

Бригадирыс чеччис: юрыс висьö и сьöлöмыс гудрасьö. Пызан вылiсь босьтiс тыра кувшин, лэбтiс дозсö и öмас кисьтiс шöма ырöш, сэтчин жö чапкис сола тшак и öтiк йöрнöсöн петiс öтöрö.

Тимина кырылын видззес миссисö сук туманöн. Межа дорын гажöтiс гöрд листа пипу, кöда некыдз бы эз чöвт арся паськöмсö. Вöрыс Лолым сайын грива вылын шыннялiс медодзза асывся югöрöн. Романыс куим шагöн вожмöвтiс улицасö, кайис Митрейез посöдзö, пырис керкуас, пырис гусьöнмоз, виноватöй, негорöн здоровайтчис, пуксис лабичö, топ тöн нем эз вöв, кыдз сiдз и колö, да пондiс видзчисьны, кöр ваясö юны.

Сiйö медодз кыдз керкусис некин эз адззы, некин шы эз сет: Надяыс кокнит коккез вылын чывкйис джоджын, петкöтлiс юны подалö и пöв синнас видзöтышалiс бригадирыслань, шонтiс и сотiс. Митрейезлöн кыдз пыр пызан вылын котрасисö тараканнэз, джоджыс шöрын куйлiс рыжöй понныс, комсянь ныр чегис шöм дук. Недолыт бы этадз пукавны йöз керкуын, кöр тэ вылö оз видзöтö, но бригадирыс пукалiс и гажöн думайтiс: «Сiдз тэныт и колö! Сiдз и колö, мед он горшась...»

Романыс талун немись эз пов, эз стыдитчы, кöр татчö сьöлöмсö кыскис Надяыс, адззылас и сэсся нем оз ков. И пукалö бригадирыс Митрейезын, видзöтö кровать вылö да чувйö мортсö гаж, син одзас тöння часыс и сiя, кыдз сiйö инькаэс видзисö кроватьыс увтын. Оз я нiя талун öтамöдныслö бöра ошшасьö ни, кыдз бригадирнысö ойнас йöртлiсö Митрейезас? Но Гаврилыс и Митрейыс нем оз тöдö. Пукалö Романыс Гавриллэзын, дыр-мыйись Митрейыс пондiс висьтасьны, кыдз гöститöм Пальникын, только öтнас Митрейлöн иньыс öшлiс юрсö, сьöкыта лолалiс, тöдчис, что пöрисьжыксö он бöбöт...

Пукалö бригадирыс соседдэзас, шыннялö, рад, что бöра Надяыс син одзас, ачыс баитö мужиккескöт, эд Гаврилыскöт öтлаын быдмисö, уджалöны и... Мöдiк бы, натьтö, татчö эз пыр, а пырис кö — симöт бы павдöтiс рожабаннэзас, а Романлö бур.

Бригадирыс пукалöв-керис западняын, сыбöрын сiйö пуксьöтiсö пызан сайö, вердiсö масьтöм сьöла яйöн, юкталiсö сюромка лякöн, и петiс керкусис. Петiс бригадирыс Митрейезiсь, колис Надялö гаж. Том инькаыс веритiс, что Романыс сылöн, что некинлö сiйö оз сет, жмитас, а Гаврилыс мед синйö аймамсö, ась уджалö гортын: кыйö симöтiсь сапоггез, пестеррез, керö кöньöссэз да табуреткаэз. Надяыслö охота лоис лэбзьыны отир коласö, и эз ешты саясьны бригадирыслöн спинаыс, инькаыс котöртiс ни уджавны — медодз петiс гортсис, сьöрас кыскис отирсö, тэрмöтiс, медбы праздникыс бöрсянь дыр эз суналö.

Гуна вылын уджыс етша: ректiсö овинiсь сю и абу.

...Кывза Ульян баблiсь висьтасьöмсö: кузь арся ойыс и кузь басниыс, бытьтö ачым том — челядёк, челядь кадö вовлi Тиминаö и сыбöрын сибавлi татчö, тöдi быд мортсö, но талун бабыс топ мöдпöв осьтiс синнэзöс да мöдпöв мыччалiс ассис деревнясö. Кузь арся ойыс, кузь оланыс, топ тöн вöлi эшö учöт, а талун вуджи ни сороковöй годдэз, топ тöн пöрисьыс вöлöм нывка, а талун, видзöт, старуха ни и мымда сiя тöдö отирсö, кöднö ме ог тöд, кöдна кулiсö ни...

Тöлiсьыс улицаыс весьтiсь öшис. Керкуын пемдiс, а ми эг узьö. Бабыс баснинас бöр бергöтчис кöркöся оланö и пондiс висьтасьны, кыдз Романыс öтiк рытö баитö айыслö:

— Тять, менö предыс тшöктö видзны порссез. Мый керны?

Зонкаыс, бригадир — ачыс ни хозяин бы, но айыстöг кытчöдзкö шаг оз шагньöвт, уджалö и быд лун юасьö да висьтасьö.

Тятьыс куритöв-керис, думайтiс недыр и зоныслö висьталiс:

— Колö, видз! Тэ хозяиныс... — содтiс: — А тырмас я, зон, Тиминааным отирыс сымда подаыс сьöрын котрасьны? Адззан, челядьыс гожумнас вöввес вылiсь оз и лэдзчывлö, отсасьöны, а порссес дынö учöттэсö он сувтöт. Сiдз?

— Сiдз...

Но предыс керис ас мознас! Тиминаö вайöтiсö кыкдас дзут. Нiя тшыгöсь, гöнныс спинаэзныс вылын — зу, ныррезныс крысаэзлöн кодьöсь, кузьöсь да йылаöсь, и бöжжезныс сэтшöм жö кузьöсь — полан видзöтны, ой и лун виксöны, сёйöны бы... Кытiсь сэтшöм порссесö предыс адззöм, кытшöм сэтшöм порода панталöм — некин оз тöд. Кытшöм жö бы яй этатшöм подасис керны?

Степаныс кыдз адззис дзуттэсö, сiдз и шуис: «Но, Роман... Эна сёясö миянöс öтлаын Тиминананым!..» Öтыс кулитö, а мöдыс ошшасьö:

— Эн пов, тять! Адззылан, мый петас! Вердам сiдз, что...

— Но, но! — айыс синнэзын гаж ни. — Ошшась, да эн вомдзав...

И кутчисисö тиминса видзны порссез. Медодз подасö пондiс вердны Надяыс: öшис гортсис, мыччасьлö только сьöд ойнас, медбы öмас чапкыны няньтор, да бöр öшö колхознöй гиддэзö, пестунничайтö дзуттэсö, топ кагаэзöс. Сiдз инькаыс уджалö, что умöльтчис, нырыс нюжалiс, но сэтшöм жö басöк, кытшöм колö Романыслö.

Надяыс лун и ой порссез гöгöрын бергалö, мыйöн вермö, сiйöн и вердö — гусялö да одзаныс кисьтö: киль заваритас, сiйö пизьöн сорлалас, сю бригадирыслiсь корас, петшöр ытшкас да пуас — öтiкö и мöдiкö вайö, пуö, пöжö, масьтö, кералö, ньылöм рожабаннэзсис визывтö, сiдз вердö дзуттэсö, а нiя пыр вик-вик да рюк-рюк, эшö пö кынöмным сималö, унажык бы сёям.

Одз асывнас Надяыс котöртö фермаö, пемыт локтö аслас дзуттэз дынö, и видзчисьö ни сiйö фермас дынын бригадирыс, бытътö сьöлöмыс медöддьöн висьö порссес понда, а ачыс мöдiкö думайтö — медодз морос одзас жмитö инькасö, окалö, модьö, что любитö...

— Стыд тэныт абу, — видö моз Надяыс Романсö. — Отирыс адззыласö...

— Мед адззылöны...

— Тэныт мый?! А меным колö овны...

— Овны пондам...

«Ойи-и-и, ойи-и-и, — гидын кивзö дзут — ловсö кыскалö, топ лöсьöтчö тшыгйöн кувны. — Ойи-и и...»

— Мыйöн ни нiйö верднытö?! Мый ни одзаныс чапкыны? Роман, вай сюсö! Или нiя менö öтлаын сёясö!

— Кытiсь ме тэныт сюсö вая? Сiдз ни ректiсö йöртöттэсö...

— Вай! Или пышша!

Надялiсь гортын уна он кыв, оз куж гортын видчыны, а колхозыс понда, ой-ой! Хозяйка! Вай и быдöс сэтöн! Он кö понды, бригадир, вердны подасö, сэсся эн пантась!

— Эн пантась! — сiдз и висьталö Романыслö Надяыс.

— Пöрьясян! — висьталö Романыс да жмитö Надясö. — Гажтöм лоас метöг...

Мужик колö инькаыслö, мужик! А Гаврилыс кин? Гаврилыс иньсö адззö и оз: луннас ыб вылын, ойнас полатьын. Сiдз лунiсь лунö, ой да бöра ой... Инькаэс ассиныс, мужиккес асланяныс: Митрейыс пуксяс посöдзаныс, öзтас чунь кузя чигарка, куритö да видзöтö, кыдз иньыс отсасьö моньыслö — фермаö пельпоннэс вылын гортсянь кыскалö тыра ведраэз, коккес куснясьöны. Мый вылö бы эта Василисаыслö? Тшыгьялö я мый я, медбы керны арттöм уджсö — отсасьны моньыслö, кöр Надяыс шедтö трудодень да аслыс — эм и абу, овтыштас вот бöжнас, коляс бöра Гаврилыскöт и ов да касьтыв... «Эх, инькаэз! Да-а-а... — модьö ныр увтас Митрейыс, — Не кыв тiянлö оз мöртчы, не шать оз дöнзьы! Кут да вур да вур бы, медбы кучикныт кульсис, но вачкынытö он лысьт, бöра жö тэ виноватöй лоан, тэнö жö судитасö, а зоныт... Сэтшöм дзутсö бы... Ныр увтсис иньсö пышшöтöны и оз адззы... Чилькöтöны син одзат иньтö, Гаврил! Тьфу!.. Ме бы... Да-а-а... Василиса, чапкы ведраэтö, ась ачыс вердö чёрт кодь подасö, ась!»

— Тэныт мый?! — Василисаыс öмалö мужиксö. — Пукав! Адззы да эн...

— Бригадир эд... — ружтö Митрейыс.

— Мый бригадирыс? — чирзö Василисаыс. — Порссес колхознöйöсь... Кылан кыдз кивзöны...

— Черпезьдыны оз вермö...

Висьталiс Митрейыс, кыдз киöн пуктiс: тöн öтiк порсь пиялiс, а талун пияннэс öтiк эз кольччö, кулiсö, топ кинкö öтiк часöн джагöтiс... Мöдiк дзут оз и чеччы, ружтö, натьтö, бöра жö кулас.

— Слава богу, — модьö Митрейыс. — Еныс бы быдöннысö... Да-а-а...

Моньыс вылö лöгыс петö, а öштö порссес вылö — этатшöм Митрейыс, сылö стыд ни отирыс син одзö мыччисьны, кöр адззö, что Надяыс быд лун пантасьлö бригадирыскöт. Колö бы видны Романсö, но батшкоыс видö моньсö, шуö: «Сучкаыс бöжсö оз лэбты, пёсикыс оз нюкьясь... Жучкаыс виноватöй, да-а-а... И мый сыкöт керны? Кытшöм лекарсвоöн веськöтны? Да-а-а...»

Баитö ас кежас Митрейыс, думайтö, мый жö бы керны моньыскöт, кыдз жö бы янсöтны бригадирыс дынiсь. Лöсьöтчис ветлыны ни тöдiсь старухаэс дынö, сувтöтны бутылка, кеймисьны, медбы молитваэзöн лэдзны «нелюбка», но сэтшöм отирыс топ эмöсь и абу ни öнi — оз ни адззись дошлöй мортыс, кöда бы отсалiс бригадирыс дынiсь янсöтны моньсö, оз адззись... «Кута вот... Няпырта... Сымда и лоас!»

Зэлöтö бы Митрейыс моньсö, но кадыс оз адззись, топ Надяыс тöдö, что шедас батшкоыслö и пышшалö гортiсь, но öтпыр синйис-синйис Митрейыс моньсö да кутiс чоманыс, кöр Надяыс петiс пизьла, кутiс, зэлöтiс угöлö, гичыртiс пиннесö и пондiс пишкыны: «Тэ мый керан?!»

— Мый ме кера, тять? — гажöн сильгö Надяыс. — Мый ме кера?

— Тэ... Ы-ы-ы...

— Мый ме, тять? — сильгö моньыс, сьылö кай моз и ки ни оз лэб, медбы вачкыны, кыв ни оз бергöтчы, медбы видны.

— Тэ бригадирыскöт... Да-а-а... — мурзьö батшкоыс.

— Тять, ме тэнö любита, а тэ... Эх, тять, но мыля жö ме понда бригадирыскöт, поди? Менам эд сыкöт быд лун колö пантасьны... Подаыс понда эд... Кытчö нö воштiсьны? И абу жö Романыс пон?.. Оз жö быд инька вылö чеччав... Ой, тять! — шуис и чуп окыштiс Митрейсö да сiдз окыштiс, бытьтö мужикыс том, бытьтö öтыс зонка, а мöдыс нывка, кöр Митрейыс олiс ни вель уна, пöрисьмö ни, но талуння лунöдз йöз инькаэскöт эз окасьлы — эм сылöн Василиса и шабаш! Тырмö öтiкыс, а сэтöн, на! Моньыс... Эх, Митрей, Митрей... Но мый нö ни эта лоö?! Вийны моньтö или... Кыдз бы эд видзöтö, эд шуö — видö или ошкö, но Митрейыслöн сьöлöмыс абу жö кöртiсь дорöм, абу жö сiмöм, сiя небзис, лöгыс öшис, киэс öшöтчисö, думаэс дзугсисö да сiдз, что синваэс петiсö, кöр моньыс окыштiс, дынсис тойыштiс керкуö! Абу ни, но эм эд, гортын, и лоас гортын, мед и бригадирыскöт кыскасьö...

Öвтыштiс кинас Митрейыс: «Мед кöть мый керöны... Да-а-а... Мед кöть мый керöны, меным ныкöт не овны...» Шуис вот этадз мужикыс, петiс чомсис, пуксис посöдзаныс, öзтiс чигарка и пондiс куритны, но думаэс бергöтчисö, эз ни сёйö моньсö...

А бригадирыс эта коста бöра гардчö фермаын, не подаыс гöгöрын, а унажык синйö Надясö, кöда гортас котрасис öтöрö да керкуö, вердiс мöссö, юкталiс баляэсö и татöн ни — дзуттэс дынын котрасьö да горзöм сорöн баитö бригадирыслö:

— Эх, Роман! Весь олан, госыт пизьö, он тöд кытчö кадсö воштыны, а ме тэ кузя отирыс син одзö ог ни лысьт мыччисьны. Вай сёянсö порссеслö! Он адззы, что нiя тшыгöсь, кошшисьöны поннэз моз...

Вердiсö бы порссесö Тиминаын, шуам, кыдз талун вердöны подасö медумöль колхозын, нiя бы, поди, ой и лун эз кивзö, тшöгисö ¹бы, а нылö Надяыс одзаныс кисьтас ведраись кизерик помой, сымда и эм! И отсав, бригадир, подавöдитiсьыслö... Романыс оз ни тöд, мый керны колхознöй порссезнас, оз вежöрт, кыдз эшö подасö вердны. Ой-мöд ни кодьöн эз узь, думайтiс-керис да котöртiс предыс дынö и пондiс норасьны да кеймисьны: «Вежö бригадирсис!»

Предыс гыж-гыж керис юрсö, вирснитiс нырнас: вежöртiс Романсö ас мознас, топ тиминса нач ни тшыксисö, дышöсь лоисö, олöны да думайтöны, медбы только лоны пöтöн да кодöн, а сэсся нем.

— Уджав, эн котрась! — Романыс кылiс предыссянь. — Мыйöн вердны эшö порссесö? — Вирскайтö нырнас. — Пизьöн верд, петшöр нетшкы... Одзаныс сю кисьт...

— Петшöрсö быдöс ни Тиминаыс гöгöрись вундiм да ытшким, пизьнас вердам и сюсö торкам, но нiя сё сэтшöмöсь...

— Сэтшöмöсь и бур! Кытшöмöсь нö лоасö, кöр нiя порссез? Гортын тай кивзö жö миян, — бöра баитö предыс, совет сетö или сьöлöм бурмöтö, Романыс сiдз эз и вежöрт, эна кыввез сорöн и мунiс правленнёись бöр гортö, локтö Тиминаö и ылiсянь кылö рюк-рюк да вик-вик, и Надяыс одззамоз жö кивзö: «Бригадир, вай мыйкö дзуттэслö! Или он кыв, кыдз нiя кивзöны?! Мый думайтан? Пышша эд фермасит, пышша...»

— Надюша! — бригадирыс дзир-бар керис ас гöгöрас, видзöтiс, медбы некин эз жö адззыв, кыдз бöра жмитас моросыс одзö подавöдитiсьсö, но Надяыс эз ни сетчы — он ни ков, Роман, кöр инькаыс сiдз ни пондiс мыдзны эта уджын, сiдз ни сылö быдöс сулалö паныт, что нем ни оз ков...

— Да-а-а, — сэк шуис Митрейыс моз жö Романыс, — Да-а-а, Надюша... Гажтöм лоис зонкаыслö, гудыртчис сьöлöмыс и синнэс мöдкодьöсь, топ шогалö. Локтiс гортас, тятьыслö шуö:

— Тять, порссескöт колас янсöтчыны...

— Мый лоис? — топ оз вежöрт тятьыс.

— Сёясö нiя миянöс!

— Ачыт тöдан, зон, ачыт тöдан... Тэ абу ни учöт, юрыт пельпоннэт вылын эм...

Чулалiс ой. Асывнас бригадирыс вайöтiс «Беларусь», мужиккес лэбталiсö тележкаö порссесö и кыскисö посадö.

Мезмис бригадирыс порссес дынiсь, мезмис фермаись Надяыс, петiс нятись да ваись, но эз мезмы Романыс дынiсь, кöр ачыс ни эз вермы овны зонкаыстöг: ойнас узьö да вöтасьö Романсö, асывнас чеччас одзся-одз, медодз петас öтöрись посöдзö и видзöтö Степаннэз öшыннэзö, оз я сэтчин вуджöртчы сiя...

— Мый тiян и лоас? Вийсяна эд оланыс! — зоныс понда тöждiсьö Ульяныс, сылö жаль Романыс и Надяыс жаль — туйис, вермис бы, гöтралiс бы зонсö Митрейыс монь вылö и быдöс сэтöн! Но он эд йöзыслiсь мырддьы, он пышшöт — асьтö он серав, Тиминасö он стыдит, кöр быдöн эд пондас синнэзö бытшкыны: «А Тиминаас мый керöны-ы-ы...»

Надяыс дугдiс уджавны фермаын, и Романыс видзчисьтöг дугдiс сы дынö сибöтчыны, кыдз зонкаыслiсь туйсö кералiсö, и пондiс инькаыс дынiсь кежласьны, овны дзебсисьöмöн — сiсьтыны Надяыслiсь сьöлöмсö...

Эх мужиккез! А инькаэс... Кöдсö сэтöн видны, осудитны, стыдитны быдöн одзын или син сайын? Мыля сiдз еныс шуöма овнытö? Öтiклö счастьесö кыдз киас пуктас, а мöдiклiсь кисис мырддьö... Кöть мый шуö, но оланыс аскодя. Романыс эшö том, бытшöм, сылöн некыт оз вись, оз доймы, нывкаэс видзöтлöны бöрсяняс, а Надяыс мый? Судьба сэтшöм, что усис овны да пöрисьмыны нелюбöй сайын, кöдакöт няньыс оз кылав и шондiыс оз тыдав.

Эта коста Романыс пукалö лабичын айыс одзын. Степаныс куритö да видзöтö зоныс синнэзö — лэчыта видзöтö, лёка и тшупö:

— Кеж, Роман, Надяыс дынiсь, кеж! Кин сiя тэныт? Сылöн эм мужик. Кöть кытшöм, да мужик. Одзза кадö, кöр эшö попыс вöлi, томмесö венчайтлiсö вичкуын, сэк иннезным джоджыс кузя чорытжыка полiсö мунны, а тэ мый керан? Стыдитан Тиминанымöс! Отирсö лöгöтан, олансö дзуган, а эшö бригадир... Шуам, гöтрасян, босьтан Надясö, а сiя лэбтас бöжсö и мöдiкö адззас. Думайтан, он? Вежöртан стариксö?!

— Любита, тять... Надяыс абу сэтшöм.

— Тэ эшö инькаэсö он тöд...

Тöдö Степаныс, кыдз колö кидтыны зонсö йöз инь дынiсь — кыввезнас вермö, кыдз висьталас, сiдз и пукта.

— Думайт, Роман!

И пондiс думайтны зонкаыс, ойнас саймö да думайтö. Чеччас и шогалö, оз сёй, умöльтчис, керкусис уджалiссес дынö петалас и сэсся кыдз абу. Сьöлöмыс кыссьö Надя дынö, синнэс ны öшынлань и эмöсь, но коласаныс йöр, адззан, да он чеччöвт. И Надяыс видзчисьö, сэтчин и татчö дженыт улицаöт чывкйö, модьö, что баранныс öшис, мог лöсьöтас, пырас Степаннэзö, гажöн баитö:

— Тётка, сет жö меным чуж пизь... Романыс пызан дорын лыддьöтö книга, сьöлöмыс топ каёклöн. Любимöйыслöн кыввес — ма, тулысся шоныт тöлок моз павкöны пеллезас... Но айыс... Степаныс пукалö да быдöс кылö и адззö, видзöтö томмес вылö чорыта, кыдз шуö: «Роман! Видзöт менам...»

Дзульзьö-баитö Надяыс, Ульяныслiсь сьöлöмсö йирö, эд и сiя адззö, мый томмеслöн, тöждiсьö ны понда, но шы оз сет.

Надяыс сулалöв-керö порог дорын, корö чуж пизь. Сылö Ульяныс сетö пизьсö да кольлалö посöдзöдз, но нем оз висьтав.

Том инькаыс локтö гортö, комись босьтö истöггез, петö чомö, кытöн кöдзыт, пемыт сора, и некин оз адззы, сэтöн вöлись и горзö, кытчöдз синваэзнас оз пöт, оз дугды пильскыны, а дугдас горзыны, разьö истöг коробоксö, чегö кык истöг и нiйö чапкö пöв вылö... Öтöрын кымöра, кöдзыт. Керкуын инькаыскöт некин оз баит: пырас и петас — шы абу, кыдз быдöнныс кывтöмöсь и пельтöмöсь, только поныс и рад, сiя кольлалö и панталö, сiя жö чомас пырö öтлаын, нюлö хозяйкаыслiсь киэсö, рожабаннэсö, видзöтö, кыдз Надяыс чапкалö истöггесö, сьöкыта лолалö да видзöтö пöв вылас — ворожитö.

Инькаыс эз ворожитчывлы и оз куж этö керны, но кык чегöм истöгыс усисö öтамöдныс вылö крест-накрест: видзöт, инька, Романыс усис тэ дынö, но счастьенытö дзугö морт, пырö коласаныт, сорö, и нем тэ сыкöт он вермы керны.

Чапкис Надяыс истöггесö öтпыр, пильскис-горзiс, мöдöтпыр чапкис — сiдз жö. И сьöлöмыс кыдз шöри потiс, кöр посöдзö, кылö, петiс Митрейыс, сьöвзис да пондiс мурзьыны: «Бöра кытчöкö мунiс кöбельыскöт... Да-а-а...»

«Татчö бы эг пыр!.. — сьöлöмыс пессьö инькаыслöн. — Пырас кö, мый и лоас...» — кынмö, киэс гöжисö, чуннес оз вöрöтчö, сьöлöмыс жмитчис, видзчисьö, кöр посöдзсис керкуас пырас ошыс, и пырис Митрейыс... Öтыс пырис керкуас, мöдыс чом ыбöсö да Анна дынö!

Аннаыс олö зэв — куимись чеччöвт и сэтчин! Видзчисьö — видзöтö öшын одзын, сьöлöмыс кыдз кырнышлöн, быдöс тöдö одзлань. Аннаыс Надясö панталö ыбöс одзын, öмыс осьта, модьö:

— Эн горзы Романыс понда. Ми сiйö сiдз кöрталам, что сьöрат пондас вöтлiсьны учöт куканёк моз.

«Быль бы... Кывветö бы ен пельö!» — Надяöс гажöтö дума, бöбöтö, нем абу жаль, быдöс сетас, вöлi бы только тэ моз, Анна!

Аннаыс кужö смилитчыны, тöдö бур молитваэз, но весь нем оз кер: вай ма, сэк сёпкас... Надяыс писис кыскис басöк чышьян, кöдö медодзза луннэзö, кыдз вайöтiсö татчö, козьналiс Гаврилыс, нюжöтiс соседкаыслö. Курым-карым и абу ни чышьяныс, Аннаыс киын ни, и синнэс югьялöны — жаднöй.

Инькаыс олö öтнас, керкуыс учöт — баля гид, но сöстöм, кыдз чача. Порог увтын кровать, сiя шебралöм аскыйöм басöк дöраöн. Аннаыс пода оз видз, олö только ас пондасис. Бура олö, но тöждiсьö: вежöрт, что öтнасыслö абу жö оланыс — синва.

Хозяйкаыс кутчисис истöггез бердö, чапкис нiйö пызаныс вылö, öвтыштiс юрнас и висьталiс:

— Лöгась — эн лöгась, нывка, а Романыс дзескыт местаын... Но... — гажöн горöтчис и гажöн видзöтыштiс веськыта Надяыс синнэзö. — Сьöлöмыс... Да, нывка, тэ понда сiсьмö!

Надяыс пондiс горзыны, синваэсö чышкис юр вылiсь чышьян пельöснас, — синнэс гöрдöсь.

— Адззöмыт мый понда синваэтö кисьтны! — Аннаыс гажöн горöтiс. — Сiдз керам, что ачыс пондас бöра вöтлiсьны! Вай бутылка вина.

— Абу бутылкаыс, — пильскö Надяыс.

— Эх тэ... А эшö... Мужиккес винаыс вылö горшöсь... Кыдз но одзлань думайтан овнытö, арттöм дзель? Вай сэк деньга!

Надяыс кыскис деньга. Аннаыс жаднöя босьтiс деньгасö, дзебис пиас, комись петкöтiс тыра бутылка, осьтiс сiйö сьöктанöн, кисьтiс винаоксö кружкаö и син одзын кружкаыс весьтын пондiс модьны аскодя кыввез, сыбöрын сьöлалiс и чуннезнас кресталiс.

Шедiн, Роман! Сьöвталiсö ки-коктö, кöрталiсö Надяыс бердö, öнi он ни понды пышшавны, öтiк лун он понды вермыны овны Надяыстöг, кыдз кагаок нянятöг.

― Юкталам этöн и тэнат лоас! — висьталiс Аннаыс.

«Сiдз бы. Быль бы!..» — шоналö сьöлöмыс Надялöн: оз ков виль чышьяныс — вöлi бы любимöйыс!

— А кыдз юктавны? — сiйö ни оз вежöрт, оз тöд, мый винанас керны.

— Ачым, — висьталö Аннаыс, кружкасö нöбöтö комö и пондö ошшасьны, кыдз смилитлiс мужиккесö: «Вот вöлi! А тэ!.. Надя... Öтiкö адззин да и сiя пышшалö... Любитö я Романыс? Ме бы... Э-э-э, Надюша...»

А Надялöн сьöлöмыс висьö. Кинлöн, поди, любимöйыс понда сьöлöмыс оз вись? Кöр эшö локтас асылыс, да Аннаыс юкталас Романсö?

Пондöтчö кузь да пемыт ар. Кöр эшö локтас тулысыс, сыбöрын гожумыс?

Öтiккес бригадирсö кыскöны дынаныс, а мамыс... Ульяныс важын ни думайтö, что Надяыс дынö зонсö смилитiс Аннаыс. Лöгыс петö сэтшöм инькаыс вылö, гортсис оз бы лэдз зонсö, но бригадирыслö колö быд асыв петны отирыс дынö, мунны улицаöт и висьтавны, кин да кытчö мунас уджавны. Орддис бы Романыс Митрейлiсь керкусö, но Митрейыс бригадирсö видзчисис посöдзаныс, юалiс, кытчö мунасö инькаэс, мый пондасö керны. Романыс висьталiс и перыта кежис Аннаэзлань, эз ни кыв, кыдз бöрсяняс Митрейыс горöтчис : «Мун, моньö эз шед, дак Аннасö чилькöт, сылöн небытöсь бекреннес. Кöбель!»

Бригадирыс эз кыв, кыдз бöрсяняс сiйö видiсö, кылiс кöбы, эз бы, натьтö, и кеж Аннаэзас, кöда видзöтчис ыбöс косяк сайсянь: вылас басöк йöрнöс, чышьянасьöм басöк чышьянöн — цветитö и юрнас легöтö:

— Пырав жö, бригадир! Мыйкö ме тэныт пель одзат бы висьтала...

— Ме сiдз кыла...

— Польдан... А оз бы ков сiдз, тэ эд миян бригадир... Отирсö оз ков кыввезнат дойдны да орддьыны.

Романыс ружтытöн пырис Аннаэзö, пуксис западня вылö. Эз ешты пыдынжыка ловзисьны, хозяйкаыс комсяняс лег-лег и одзас кружкатыр вайис вина: «Ю. Ачыт кодя овлан!»

— Асывсяняс?! — повзис бригадирыс. — Отирыс...

— Отирыслiсь öммезнысö позьö тупкавны, — горöтчис хозяйкаыс. — Ю, кöр юкталöны!

И чатыртiс бригадирыс кружкасö, ружтыштiс да пондiс кывзыны, кыдз винаыс чепöссис быд жилаö — шонтö, öдззöтö вир, а хозяйкаыс... Хозяйкаыс пеничайтö ни:

— Роман... Тэ вылö горзöны эд отирыс. Мыля сiдз керан? Тэнö любитöны, оз вермö овны, а тэ... Ой, Роман, Роман... Сэтшöм инькасö тэ местын ме бы ошыс öмись мырдди и некинлö эг сет! А тэ! Öмсит лэдзан! Роман!

Вöрзьöтiс сьöлöмсö Аннаыс да сiдз, что синваэс петiсö и чеччöвтiс керкусис öтöрö...

27

Степаныс пукалö гортын öшын одзын и думайтö сьöкыт дума. Шогалö мортыс. Кöр уджалiс, пыр вöлi гажа, а öнi ойыс — абу ой, луныс — абу лун: ойезнас оз узь, ружтö да бергалö бок вылiсь бок вылö, чеччас ойся-ойшöр, пуксяс западня вылö, öзтас чунь кыза чигарка и куритö.

— Кыт висьö?! — лöгöн юалас иньыс.

Шы оз сет, нималö чигаркасö. Куритö пöрись Степаныс, видзöтö öшынö и адззö: бöра зоныс пырис Аннаэс ордö. Мый сэтчинiсь кошшö? Мый öштiс? Видзöт жö, кыдз бöра сьöвталасö! Керасö и дорасö!

Тöждiсьö Степаныс зоныс понда, веритö ерекничаэзлö, кöдна быдöс вермасö керны — шогöт веськöтны, смилитны и вийны.

Думаэс бергалöв-керöны Анна гöгöрын, сыбöрын кежöны мöдöрö — öзйö сьöлöмыс: том бы вöлi, керис бы виль Тимина! Вöрсö октiс бы Вöрью бердöдз, гöрис бы, кöдзис и сюсö кытшöмö вундiс! Тi бы эд вöлись адззылiт! Оланыс бы эшö кытшöм лоис, но...

— Жаднöй вöлiн, сiйöн сэтчö и локтiн. — Степансö пондö кöритны иньыс, кыдз кылö, мый думайтö мужикыс.

— Тэ бытьтö эд вöв жаднöй...

Мый баитны иньыскöт, кöр сiя тэнö оз вежöрт? Пасьтасьö Степаныс, петö öтöрö да ойнас мунö гуна вылö. Сэтчин кералö пес, овин увтö öзтö би. Ойыс пемыт. Ыб и кымöрыс свалясьöны öтлаö. Лöнь. Овин увтын чискö би, тачкöтö-сотчö пес, потолок бердын öшалö тшын.

Би одзын вöрзьытöг пукалö Степаныс, сьöд уссэз лэдзчисьöмась увдöр, кыдз моржлöн. Спинаыс горбылякодь, коскаэс тöдчöны паськöмыс увтiсь, куритö, кызöтö да сьöласьö. Оз бы ков куритны да вермас разь овны табактöг.

Ойыс кузь. Би вылын чискö пес. Жарсянь шовкнитас-потас кер, петалас кытiськö шырок, котрасьöв-керас мортыс дынöт зэв и öшас, одзлань овин увтын лöнь.

Öтнас гуна вылын ойнас Степаныс. Нем бы сюсö тшупöтны ни, кöр вундöны комбайннэзöн, но Тиминаын мукöд ыббес вöр коласын, логгез сайын, кытчö тракторнас он пыр и комбайныс матö оз лок, сюсö кытчöдзкö кöдзöны киöн, ваялöны вöввезöн, тшупöтöны овиннэзын, а вартнытö... Локтас комбайн или оз — мöдiк ни басниыс. И косьтiсьö Степаныс. А мый сылö керны, кöр этадз пукавтöн некин оз дзуг думаэсö? Думайтö унажык не ас йывсис — гортыс понда юрыс оз вись, а колхоз понда тöждiсьö — зоныс понда юрсö жугдö, кöр Романыс бригадир. Бригадаыс учöт, быд мортыс син одзын, но овны пондiм кыдзкö мöднёж — абу ни одззакодь оланыс: то öтiклаын не сiдз — джöмдö да падмö, то мöдiклаын личамö. Томмеслöн мывкыддэзныс лоисö кокнитöсь, пондiсö уджавны, топ не аслыныс, а йöзлö — колхозлö пö... Видзöт: вундiсö комбайннэзöн... Чожа сюсö дзимлялiсö и ошшасьöны: «Степан дядь, ми!...» «Ми... — думайтö Степаныс. — Тi... Ме бы тiян местын стыдитчи ачымöс ошкыны, кöр джынсö вундiт, мöд джынсö нилит-талит комбайннаныт... Эз пондö томмес жалейтны сюсö, пöт пондiсö сёйны... Эх! Тшыгьялiт бы миян моз, пешлiт бы тридцать третьöй годсö, сэк бы быд сю тусьсö муыс вылiсь öктiт... Или во...»

Кытшöмкö додьжуг понда лöгыс пондiс петны Анна вылö, кöр тöн инькаыс ваялiс вöлöн пес и жугдöма додьсö. Вочны кö, бöра эд трудодень колас... Или турунсö ваялöмась и промежокыс коласö ноша-мöд кольöмась. Колö разь сiдз керны бы? Кинлö уджалам?

Абу хозяиныс деревняын! Эз ло! Романлö висьталан кö — керас, он — оз адззы, а кöр и вунöтас. Быд местаын бы томмесö ныррезнаныс тюкöтны, сэк бы вöлись керисö, но бöра жö мый шуан, лöгасьöны.

Вежсьö, Степан, оланыс. Тракторрезöн гöрöны. Машинаэс вынаöсь, оз ков вердны не юктавны, а кыдз гöрöны? Тэ бы видзöтiн... Сьöлöм гудыртчö: межаыс дорö гöртöнняс полöны локны — швырк бергöтчасö — колясö гöртöг сажень-мöд, и бытьтö сiдз и колö, мöдiк год видзöтан кö межаат быдмö вöр ни. Вот и сёй ёгсö! А вöввес... Любимöйез да кагаэз! Мый бы миян вöлi нытöг? Тшыгйöн бы эд кулiм, кынмин бы керкуэзаным, а öнi яй вылö сетöны.

«Тэ, старик, горзы вöввет понда! Миян эмöсь машинаэз! — нерöны Степансö томмес...

«Машинаэз... Тьфу! Турунсö ноша етш и сiйö тракторöн пондiсö вайны, оз жалейтö горючейсö. Чожа садниксö тракторнас жö пондасö гöрны, — куритö овин увтын Степаныс да нырсö шонтö би одзын, содтас би вылö пессэз, кывзас, кыдз чискö биыс, и бöра думаэс бергалöны колхоз гöгöрын, öнi видö ни предсö, кöда колхозниккес дынö вовлö гöститöм могись — мыччалас чужöмсö и абу, кöть быдöс онняюртчы, сьöлöмыс нем понда оз вись.

Ойыс кузь. Пöрись мортыслö тырмö аскöттяс баитны. Поныс куйлö бокас, кывзö хозяинсö, топ баитö жö, видö, что пыр мыйкö бытьтö оз тырмы. Пукалiн ни бы сэк, старик, гор вылын!

Пукалö би одзын ойнас старикыс, кытöн думайтö, а кытöн и суналö да вöтасьö, медодз вöтöн адззылö айсö, топ Андрияныс локтiс дынас и жöдзö, ветлöтö, нерö, ошшасьö, что мöдöр югытас олö медбура, что сылöн быдöс аслас эм, а тэнат, Степан, мый? Ха-ха, чожа вот Тиминаыт разьсяс, некинлö лоас уджавны, öтнат кольччан и тшыгйöн черпезьдан.

— Да мун тэ! — лöгасьö Степаныс. — Быдöс менам эм, муыс и шондiыс, а тэнат? Жалейта вот, что ачым эг раскулачит...

— А ме жалейта, что кымöсат эг пöжав... Киö вöрзис, то бы öтлаын татöн гырниччесö керин, — айыс нерö, касьтылö, кыдз Степансö пондылiс вийны, да эз вий.

— Мать твою! — лöгасьö Степаныс и саймö — öшö оныс.

Овин увтын биыс ештöм ни, шаялöны шоммез, но шоныт. Поныс куйлö аслас местаын. Умöль вöтсянь Степанлöн дрöжитöны киэс, видчö: «Бес! Кинöс полöтан?! Эх, ай! Гитлерыс эз бы кö уськöтчыв, кыдз бы ми олiм! Тиминаным бы, поди, город кодь ни вöлi, а тэ пиннетö герйöтлан! Неран... Тöдам и огö тiян кодь враггесö...»

Степаныс сулалö овин шöрын, видчö айыскöт. Видiс-керис айсö, пуксис зэв биа шоммес дынö, бокас пуктiс чер, пондiс баитны поныскöт ни: «Но мый, Буско? Олiм, олiм ми тэкöт, кувны пондас ковны, а сё бы вийöны. Но эн пов, ми эшö олам! Эшö мыччалам, кыдз колö уджавнытö!»

Ойыс кузь. Степаныс тшупöтчис ойбыт, гортö локтiс одз асывнас. Ульяныс педзис гор одзын, тэрмасис-пöжалiс тупöссез. Пызан вылын сотчö лампа. Комсянь котöртiс каньыс да пондiс ниртчыны коккес дынын.

— Кытöн ойбыт и ветлöтан?! — обидаöн юалiс Ульяныс, видзöтiс саöсь чужöмыс вылö, гажтöма висьталiс. — Романсö эд армияö нуöтöны.

Зоныс рытнас мунiс посадö, локтöм ойнас и сельсоветiсь вайöм повестка.

— Но и бур! — гажмис айыс. — Ми служитiм, öнi сылöн очередьыс.

Мамыс пондiс горзыны.

— Мый горзан? Мый вылö зонтö быдтiн? Миянöс пестуничайтны я мый я? Ме эшö ачымöс верда!

Кöть тэ мый шу, а айыслöн сьöлöмыс кöдзытжык. Мамыс Степаныс кыввез бöрсянь эшö öддьöнжык горзö — жальöсь зоннэс, кöдна войнаыс вылiсь эз локтö, и бöра колö кольлавны армияö.

— Эн горзы! Сiя оз служит, кöдалöн кикокыс чукыля-векыля, нем вылö оз туй, а Романыс... Гвардеец! — ассис модьö Степаныс. — Кытöн Романыс?!

Мамыс оз тöд кытöн зоныс. Шондiыс мыччисьлiс и бöр саясис чорыт кымöррез сайö. Кöдздöтiс. Быд вынсис китшсис катша, а Романыс абу. Эз жö эд пет Митрейезас?!

Дыр-мыйись Романыс пырис Öсипкöт, кöдакöт öтлаын быдмисö и öтлаын лöсьöтчöны армияö.

Степаныс шынньöвтiс, здоровайтчис Öсипкöт и гор сайись кыскис бутылка, пуксис томмескöт пызан сайö, винасö кисьтлiс стаканнэзö и горöтчис:

— Но, зоннэз, миянöс эд позоритö! — и петiсö синваэс.

— Тять, — зоныслö жаль айыс. — Тять, тэ миянiсь эн пов.

— Бöр гортö локтö. Пондам ышö уджавны... Тиминаным ышö ошшасяс, — синваэс сорöн тятьыс ньылалiс дульсö. Романыс оз мун война вылö, но топ керкусö кольö öтнассö — некинкöт лоас кыв горöтчыны, и мымда бы тэ, Ульяна, асыввезнас он понды видзöтлыны Митрейезлань, Надяыс оз ни понды ветлöтны керкуныс дынын да нёджжасьны тiянлань.

Кольлалiсö Романöс армияö, пондiсö овны кыкöн.

— Муна ме, — кыдзкö висьталiс Степаныс. — Городö ветла.

— Мый сэтчин öштiн?

— Поди, томжык невеста адзза, — сералö и содтö. — Тэкöт гажтöм лоис. Висьталiс, но некытчö эз мун, а корисö правленнёö да пондiсö модьны: «Уджалышт бригадирöн... Кытчöдз зоныт оз лок».

— Гробö водтöдз я мый я бригадиравны? Или томмес абу?

— Эмöсь, Степан, томмес, эмöсь, но нiя кокнита бы олöны и полöны бригадиравнытö, а тэ велалiн ни...

Велалiс... Степаныс видзöтö кымöрас, одзлань тöдö, что погоддяыс дзугсяс, а уджыс öтiк-мöдiк кертöм... И эз бы висьö киэс да коккес, эз бы тшепит спинаас, уджалiс бы...

— Но кыдз, Степан Андриянович? — модьö предыс.

— Кыдз, кыдз... Кывзiсьны кö пондасö отирыс... И рытнас бöра тиминса чукöртчисö Степаннэзö, пукалöны, думайтöны, бытьтö мыйкö öштöмöсь, кошшöны, но оз адззö, и Степаныссянь видзчисьöны, бытьтö сiя адззас и ваяс.

— Бöрйö бригадирнытö, менам уджассис, — баитö Степаныс.

— Да-а а, — табаксö нютшкö Митрейыс. — Кулам ми тэкöт, Степан, и Тиминаным кулас... Он верит?! Вот адззылан, что миян бöрсянь оз разьсьы деревняыс! Эстöн и пукала... Но тэ ышö додьсö, мыся, кыскан... Уджалан ышö...

— Уджалан эшö, Степан дядь, некытчö он воштiсь, — гажöн баитö Надяыс.

— Уджалан, дядь! — рад Аннаыс.

Баитiсö, голосуйтiсö и быдöс сэтöн — быдöс да не сiдз...

— Электричествоыс кöр лоас?! — видзчисьтöг пöрисьжыккеслiсь юалö Игнатикалöн нылочкаыс, кöда котрасьö нёльöдз классö — грамотнöйжык ни тэсся, Степан, адззылiн кыдз тэнö öтiк кылöн сьöвталiс: посадас пö электричество, а миян и керосиныс кöр оз овлы.

Сартас сотiм, да эг кулö, а öнi керосиновöй лампаыс эз понды ковны. Мый сэтöн, бригадир, керны? Честнöя висьтав честнöй отирыслö.

Бригадирыс сэтчин-татчö, эз ни понды кывнас прудйыны Лолымсö, а шуис, что олыштам и, поди, оланыс эшö буржык лоас, сэк и нюжöтасö миянлö электричествосö.

— Да-а-а, бригадир, — кывнас шлёчкö Митрейыс. — Електричесво... Öнджа эд сiя... Бытьтö пö отирсö уна вийö, чарöтас и абу! Колас я сэтшöмыс Тиминааным?

— Не сiдз, — шуис бригадирыс. — Преднымлiсь корам мотор, керам аслыным станция, нюжöтам проводдэз, и светыс лоас.

Тиминса öддьöн эз веритö предныслö, кöда кужис пöрьясьны, но соссэзнысö пуджисö и одзлань пондiсö уджавны, кöр тöдiсö, что некин ны дынö йöзыс оз лок да няньнас оз понды вердны. Одзлань олöны тиминса. Видзöтан кö эм и абу бы деревняыс, топ некинлö бы сiя оз ков, но государствосис татöн няньсö оз корö и яйыс асланыс пöт, эшö сетöны мымда вермöны — город отсалöны вердны. Уджалöны тиминса. Таво виль чарлачöвтансö кольлалiсö Романтöг и сiдз жö, кыдз колiс, кыдз одзжык, чулöтiсö праздниккесö, кин да кытiсь гöссес и локтiсö, юисö да сёйисö пöт, сьылiсö да йöктiсö не öтiк лун и мунiсö горттэзаныс.

Чарлачöвтан бöрсянь Степаныс зоныссянь босьтiс письмо. Зонкаыс ошшасьö, что служитö бура, нем сылö оз ков, мед сы понда гортын оз тöждiсьö и ась оз полö, что лэбтiсяс война. Чож, Роман! Письмонат бурмöтiн отирыслiсь сьöлöммез, кöр, видзöт, эстöн инь отирыс кывзöны радио да горзöны: «Степан, оз я бöра война йылiсь лёбö? Поди, ог и пондö ни уджавны? Сiдз и этадз эд...»

— Кин лёбö?! — лöгасис бригадирыс. — Кытшöм враг адззисис миян коласын?!

— Радиоас... И газетаэзас гижöны, — Аннаыс жö чуклялö юрнас.

— Весьолiссеслö нем керны, вот и лёбöны да гижöны, — веськыта висьталö Степаныс.

28

Чулалiсö куим тулыс, кыдз Романыс мунiс армияö. Бöра сылiс лым, локтiсö сьöдкайез, цветитiс льöмпу.

Отирыс уджалiсö и эз казялö, кыдз чулалiс кадыс. И гожумсö олiсö, нем сэтшöмыс Тиминаын эз вöв, медбы туйис ошшасьны. Арнас, кöр усис медодзза лым, ойнас Степаннэз садникö вовлöм кöч, а асывнас Митрейез öшын увтiсь кыдз вылö пуксис ыджыт сьöд дозмöр. Отирыс осьтiсö öммезнысö да видзöтiсö кайыс вылö, топ некöр эз адззывлö, а дозмöрыс пукалiс, нюжлалiс голясö, кыдз нерис Митрейсö да мыччалiс асьсö.

— Добросö эн видзчись, — гажтöма висьталiс мужикыслö Василисаыс. — Весь бесыс керку юр вылат эз пуксьы...

— Мун тэ! — мурзьыштiс Митрейыс, босьтiс пишаль и öшынсяняс лыйис кайыслö.

— Митрей, — кивзö ни Аннаыс. — Весь эд кайсö лыйин. Эта эд абу дозмöр, а Вöрисьыслöн пияныс...

— Мун тэ... — вöлись öшис Митрейыс, топ быдöн сьöвзис чужöмас, и оз тöд, мый керны: заргисис чоманыс, пизь коласiсь кыскис бутылка, юис винасö, пуксис посöдзаныс и пондiс модьны: «Мда-а-а... Этö... Быль эд сэрпöсьтi сотанаыс бердö киэзöс, да-а-а...»

Кымöра асылыс, öшалö туман, зэрö и оз — пызитö. Митрейыс посöдзаныс ружтiс-керис и пезьдiс: коккес муын, юрыс посöдзын, узис посöдзаныс асывсянь рытöдз, эз адззыв, кыдз гортас локтiс Романыс, кыдз зонкаыс солдат паськöмнас медодз мунiс Митрейес öшын увтöт — любо видзöтны!

Инь отирыс чепöссисö öтöрö, медодз бытьтö эз и тöдö, кин локтö Тиминааныс, но кинкö горöтчис: «Ой, Романыс!», — и öтамöднысö одзасьöмöн öдззисö Степаннэзлань, кин Романыс пельпон вылын ни öшалö, кöда окалö, кöда малалö погоннэсö, кöда модьö ни, что шоччисьышт, да веж айтö, то сiя мыдзис... Отирыс коласын эз вöв Надяыс, и некин эз казяв медодз, мыля Надяыс абу, кытöн сiя, мый керö, кöр Романыслöн синнэс кошшисö Надясö, и сьöлöмыс зонкаыслöн чеччöвтiс бы сы дынö. Некин эз казяв, кыдз зонкаыс петалiс керкусис да дыр видзöтiс Митрейеслань, некин эз тöд, мый сiя гортын думайтiс медодзза часö, но Аннаыс жö гардчис гöгöрас, быдöс адззис, думайтiс ас кежас: «Вöлi бы томжык... Некинлö бы эг сет Романсö!»

Локтiс армиясянь гортö Романыс, и медодз рад вöлi мамыс. Ульянлö зоныс топ вайис да козьналiс борддэз, томтiс, и пондiс мам лэбавны-котрасьны керкуас.

Пырис Ульянлöн зоныс гортас, сьöрсяняс быдöс тиминсаыс ыбöссянь — веськыта пызан сайö. Кин тöрис öтлаö, кöда эз, но судзöтчисö нянь дынö, паньыштiсö шыд. Öтлаын отирыскöт пукалiс Гаврилыс, бытьтö нем эз вöв, нем оз тöд. Быдöс отирыс Тиминаись Степаннэзын, а Надяыс куйлö гортас гор вылын и ачыс оз тöд, мый сыкöт: горзö гусьöн и лöсьöтчö пышшыны Тиминасис, медбы сэсся Романсö синöн не адззыны да голоссö пельнас не кывны.

Романыс баитiс-керис тиминсакöт и видзчисьтöг, кыдз лыйис-висьталiс:

— Ме татöн ог понды овны.

— Кыдз он понды овны? — айыслöн öмас няньыс катыльтчис и оз ньылыштсьы, видзöтö зоныс вылö, кыдз одзас йöз пондiс пукавны, кöдö вежöмöсь. — Мый лоис?

— Нем эстöн кернытö... — содтiс Романыс. Степаныс вöлись öшис гортас, вöлись зоныслö эз адззы кыввез, медбы падтыны-видзны. Дойдiс айсö Романыс, ой кыдз дойдiс! Быдöн одзын Степаныс горбыльтчис, топ пондiс öддьöнжык сивмыны. Пöрись айыс ни, но эз эшö сэтшöм вöв пöрись, а öнi... Одззамоз Степаныслö эшö некин бы эз ков, кöть быдöнныс бы мунiсö Тиминасис, мед... Сiя кольччис бы Ульяныскöт, пондiс уджавны, и няньыс бы вöлi — сёйин бы да эн вермы, а öнi мый? Овсис эд, тыдалö, Степан! Мымда бы эн горзы, но зоныт оз видзöт синваэт вылö, мунас кошшыны кокнит олан, чöскыт нянь сёйны... И кин Романыслö козьналiс сэтшöм кокнит мывкыдсö? Мыля сiя повзис овны гортын? Тöдан я тэ, Ульяна?

— Ась. Кыдз ен шуис, — энö кыввесö только и вермис висьтавны мамыс. — Кыдз ен шуис...

— Кыдз ен шуис, — табаксö нютшкис Степаныс. — Кулам жö эд кöркö, сто годсö ог пондö овны...

— Двестиö олам, Степан дядь! Мед йöзыс видзöтö да завидуйтö! — Аннаыс юрнас лег-лег керис.

— Да-а-а, — ружтiс Митрейыс. — Ме тай шуи, мыся, Тиминаным пондас разьсьыны.

— Типун тэнат кыв вылö! — Митрейсö öмалiс Игнатика.

— Мунны и колö татiсь! Мый эстöн вöр шöрас керны?! Кöиннэскöт уннявны я мый я? — пöриссесö нерö Игнатикалöн нылыс, кöда таво кончитiс сизимöт класс и лöсьöтчö велöтчыны одзлань.

— Но и мунö, Кристос тiянкöт! — топ гажмис ни Степаныс. — Некин тiянöс татчö эз кöртав.

Степаныс думайтiс — öшлiс олансö сiдз и этадз, горшсö эз лет, эз понды томмеслö висьтавны, что кытöнкö умöль, а татöн бур, а Романлöн мамыс гусьöн горзiс талун и ашынас, модис мужиккеслö:

— Кинлö ми и заптiм да керим? Мый вылö и олiм?

— Мый тэ и заптiн? Мый тэ сэтшöмсö и керин? — Степаныс жö пондiс нерны иньсö. — Кытшöм богатство и эм тэнат? Нинкöммет да дöраись вурöм дубассэт я мый я? Или пестеррес? Ох-хо-хо, старуха... Видзöт, кыдз зоныт быдöс чукöртас да шупкас öтöрö, таляс нятяс — абу дак абу!

— Кытшöм эшö буржык богатство миянлö колö?! — оз вежöрт Ульяныс. — Мый эшö оз тырмы?

— Сiя оз тырмы, кöда абу...

Лун-мöд олiс гортын Романыс, öвтчис, киас уджыс эз пыр, öтöрö и син, сьöлöмыс места оз адззы, кöин моз думайтö мыйкö ассис, а Надяыс кытöн? Или сiя зонкаыслö эз ни понды ковны? Вунöтiс ни Романыс, кыдз том инькаыскöт пантасис ключыс дынын?

Романыс олiс эшö гортын неделя етш, некытчö эз пет, эз пыр соседдэзас, сэсся тэчис котома, окалiс айсö да мамсö и пондiс петны гортсис. Айыс вöлись и юалiс:

— Роман, кытöн нö Надяыс? Мыля нö сiя оз мыччась?

Надя... Кин сiя Романыслö? Невеста или супонь, кöдöн супонявлiс том сьöлöмсö? Сералiс ассис олансö... Или тэ сэтшöм и чужин кокнит сьöлöма да кокнит мывкыда, бабыв кодь, медбы гожумнас лэбавны — пуксьыны öтiк цвет вывсянь мöдiк вылö? Роман...

А тэ, Надя? Кин тэнö вежöртö, кин сьöлöмтö бурмöтö талун ласковöй кылöн, кöр Гаврилыс кöть эм, кöть абу — öтiк, öткодь, вачкисьö мыр вылö: не кыв оз горöтчы, не бердас оз жмитышт, олö да олö ас местас? Некин оз вежöрт талун Надясö, только Аннаыс жö котöртыштас, локтас посöдзныс дынö, гусьöн шуас: «Петав...» И петö том инькаыс соседкаыс дынö, кöда панталö ыбöсыс коласын, модьö: «Эн тöждiсь, кага! Ме сiдз кера, что Романыс öтiк минута оз понды вермыны тэтöг овны... Думайтан, ог? Кера!» — бöра кутчисьö сьöлавны да пöлявны кружка весьтын, ыксö Романсö гор одзын трубаись, бытьтö быль сы моз лоас — öнi жö зонкаыс чепöссяс, локтас и сэсся некытчö оз мун. Анналöн кыввес шонытöсь, сьöлöмыс шоныт жö, но весь эд лыддьöтö молитваэсö кружкаыс весьтын, весь зонкасö ыксö трубаись — абу ни Романыс и оз ло. И öнi — эта минутаö мый вылö бы Степаныслö касьтывны ни Надясö ыбöсыс дорын, кöр зоныс пондiс петны ни керкусис, но горöтчис эд...

— Кытöн Надяыс? — Романыс падмис порогныс дынын ни, кутiс ни ыбöс вугсö, сувтiс, пондiс видзöтны айыс вылö, бытьтö гортö мыйкö вунöтiс.

— Ме ог тöд, — гажтöма висьталiс айыс, эшö мыйкö вылö надейтчис, что зоныс падмас и оз мун гортiсь..

Сулалöв-керисö порог дораныс айыс да зоныс, Романыс жö бöра горöтчис:

— Тять, ме сы понда гортiсь и муна.

— Но, зонка! — юрнас пондiс öвтны тятьыс. — Туйö разь сiдз? Счастьетö кольны...

Нем сэсся эз шу зонкаыс, курччöвтiс тырпсö и петiс. Поныс кольлалiс том хозяинсö вöрыс дорöдз, янсöтчытöнняс нюлiс Романыслiсь рожабаннэсö, чеччалiс моросас, и каньыс дыр пукалiс порогныс вылын да «миссис» чужöмсö.

Мунiс Романыс, топ сьöрас нöбöтiс быдöс, мый вöлi и эз — гажтöм. Сэтöн ыбöсыс оссис, кыдз вына тöв нетшкöвтiс, и порогыс вылö сувтiс Надяыс, юрыс вылын басöк цвета чышьян, йöрнöсыс — би öгралö, и чужöмыс вылын вирыс орсö. Падмис порогыс дорын инькаыс, видзöтö Степаныс вылö, бытьтö талун медодзись адззö, юалö бы мыйкö, и кылыс öмас оз бергöтчы. Лöсьыт Надяыс, топыт, некытшöм уджись оз пов. Натьтö, Степан, сэтшöм инькасö Тиминааныт он ни жöниккес сайö вайöт, натьтö, некин ни томмес коласiсь татчö сэтшöмыс оз лок...

— Кытöн нö вöлiн? — Степаныс юалö Надяыслiсь. — Мый керин? Видзчиси, видзчиси ме... Мыся, он я лок да падты, а тэ... Эх, Надя!

Надяыслöн öмыс пиньöвтчис, сiдз и горöтö бы, но оз жö горзы, а синваэс син доррезас сöдзисö.

— Вöтчы! Поди, вöтан кытöнкö да бергöтан, — гажтöма баитö Ульяныс.

Надяыс курччöвтiс тырпсö и петiс керкусис.

Посöдзаныс сулалiс Митрейыс да видзöтiс Степаннэслань и думайтiс: «Да-а-а... Мый жö лоас? Оз я кузь бöжыс быль Романыс сьöрö вöтчы?.. Да-а-а...»

Луныс оссис кымöра, уль, гажтöм. Карзiсö ракаэз да лэбзисö кытчöкö омöн вöрыс вевдöрöт.

29

Бура видза тöдвылам пятьдесят седьмöй год, кöр арыс вачкисис ар вылö. Лымыс усис Октябрьскöй праздник бöрсянь öтiк ойö и сэк жö лэбис лэчыт тöв, пондiс уннявны керку угöввезын да гардны виль лымсö — тöн вöлi ар, а талун кöрт тöв ни.

Эта йылiсь висьтасис Ульян бабыс. Эшö сiя висьтасис шогöт йылiсь, кöда Тиминаö локтiс юасьтöг-висьтасьтöг, топ усис кымöрсяняс и медодз пырис Аннаö, пöрöтiс инькасö и сiдз нярьялiс, что думайтiсö, оз ни чеччы мортыс, но сiя чеччис да повзьöтiс тиминсасö: чужöмыс кельдöтöм, синнэс сингуэзас вöйöмась, нырыс нюжалöм, тырппесö пизьöтöм и нiя дойсялöмась.

— Да-а-а, — Митрейыс жö шуис. — Шедлiс вöлись кузь бöжыс... Еныс, тыдалö, эм жö, али чёртыс смилитчöмыс понда сiдз сысъялiс ерекничасö?..

— Уна эн тöд. Тэ бердö кутчисяс, сэк видзöта, мый пондан сьывны, — мужиксö нерис Василисаыс.

Сiдз и лоис: талун Митрейыс гольксис Аннаыс вылö, ашын чеччынытö эз вермы, кивзö да ойзö, не оз сёй, не оз ю, öтiк кыв кылан, что кулас ни, сымда и олас...

Шогöтыс пырис öтiк керкуö, вожмöвтiс мöдiкö, некинöс эз коль, эз орддьы, быдöнöс сотiс жарöн. Не öтпыр посадсянь вовлiсö фельдшеррез, сеталiсö кытшöмкö веж рöма таблеткаэз, но мый ныись? Немымда лекарствоыс эз отсав. Фельдшеррес жö шуисö, что локтöма пö кытшöмкö грипп.

— Сулема тай... — чеччис ни Митрейыс и öвтчис керкуас. — Америкаыс пöльыштiс-койыштiс, быдь, а сэсся мый? Вияс быдöннымöс, сэк пондам тöдны...

И вийис шогöтыс медодз Спирья стариксö. Эз ештö пöрисьсö дзебны, кыдз больницаö кыскисö Öсиплiсь мамсö.

— Кöть бы миянöс еныс дорйис, — кеймис еныслö Ульяныс.

― Миянiсь шогöтыс полö, — ошшасис Степаныс да пызан дорын зарядалiс патроннэз, лöсьöтчис, сiдзкö, вöравны.

Погоддяыс топ лöсямис, дугдiс усьны лымыс, лöнь. Поныс быд лун урресö вувтö Тимина кырылас, корö хозяинсö.

— Кытшöм тэ вöралiсь ни?! Пукалiн бы гортын да йирин сухарресö! — Степансö видö иньыс, но кытчö тэ?! Степансö он вермы гортын видзны, кöр сьöлöмыс кыскö вöрас.

Рытсяняс усис лымок, и асывнас виль лымыс кузя вöралiсьыс одзся-одз петiс гортiсь. Поныслö сiя и колö: сöтiс посöдзсянь веськыта вöрас и син одзö мыччисис только ыбыс кырылын ни.

Ульяныс кольлалiс мужиксö и сыбöрын ештöтчис, юкталiс-вердiс подасö, а кöр югдiс, ветлiс отирыскöт гуна вылö, отсалiс тöлöтчыны. Уджалансянь локтiс пемыт сорöн. Степаныс гортын эз вöв, а погоддяыс луншöр гöгöрас дзугсис — не син, не пель, пондiс усьны лым да нöбöтны-гардны, кöть öтöрö эн пет.

«Мый нö сiя этатшöм лунас вöрас керö? — инькаыслöн сьöлöмыс места эз понды адззыны, кöть и тöдö, что Степаныс вöрас не первуись — шедлiс быдкодь лымнас и зэрнас, кымöрыс гымалiс и жарыс сотлiс, но талун мылякö сьöлöмыс пессьö. Пöрисьмöны пöрисьжыккес...

Рытыс нюжалiс, погоддяыс öтöрас уннялiс, Ульяныс пукалiс öшын одзын да видзчисис мужиксö, кöда пырис керкуас — йы жоль: паськöмыс вылас кынмöм, лымыс пытшкись оз и тыдав, ружтö...

Степаныс шагньöвтiс керкуас, шлёпкисис западняö, сыр-лёль лэдзис киэсö и дыша пондiс видзöтны лампа вылö. Поныс пырис керкуас, хозяиныс кодь жö лым тупыль, но эз вод шоччисьны, эз лок пызаныс дынö да понды корны сёйны, а пондiс бергавны Степаныс дынын, никсыны, чеччавны пидзöссэс вылö, нювны бы чужöмсö, бытьтö мыйкö тöдiс, висьталiс бы, но эз куж висьтавнытö.

— Тэ мый, Бусик? — сералö Ульяныс. — Дыр эн адззыв хозяинтö?

Бусикыс öвтыштiс бöжнас, пуксис хозяиныс коккез дынö и видзöтö веськыта синнэзас, мöдыс синнэсö оз бы и осьт, сiдз ни мыдзис.

— Кыкнанныт пöрисьмит, пукалiт бы гортын да сёйит няньсö, — бöра модьö Ульяныс.

― Вай юны! — лёк да кижган шыöн горöтчис Степаныс.

Иньыс мискаöн одзас вайис юны. Степаныс неöтпыр юис, шоччисис да бöра мöртчис мискаыс бердö, ректiс дозсö, пукалыштiс ва паськöмнас, дыша видзöтiс керкусис быд пельöссö и вöлись пондiс чöвтчыны.

Ульяныс отсалiс чöвтны ва да кын паськöмсö. Биыс пызаныс вылын кусö да öзйö, керосиныс нем вылö оз туй.

Степаныс иньыс сорöн чöвтчис, пöрччалiс нинкöммесö, пондiс гардны чигарка и тöдчис, кыдз дрöжитiсö киэс, öтöрын кылiс, что ойыс кежö вынсялiс тöлыс. Курöггес гуддисисö позаныс.

Иньыс мужикыслö пызан вылö вайис сёйны — порсь яйись пуöм шыд, чöскыт дук тыртiс керкусö, дуль бы вотялö, но Степаныс висьталiс, что оз сёй.

— Или вöрас кинкö вердiс?! — эз вежöрт Ульяныс.

— Вердiс... — дыша висьталiс мужикыс, пукалöв-керис, куритiс да эшö корис юны и сыбöрын вартлöм пон моз кыссис гор вылö.

— Мыжйöмась, тыдалö, талун туланнэс да уррес, — пондiс модьны Ульяныс.

— Пывсьыны бы... — гор вывсянь шыасис мужикыс.

— Кöр ме тэныт ойнас банясö лонта? — юалiс иньыс и мужикыс лöнис.

Гажöн керкутыр китöстiс петух. Комын сунилабичын жиля-жоля горшасис кань.

— Васька, сёй! — видзчисьтöг горвыв дорын пондiс баитны Степаныс. — Сёй, эн шванитчы. Ачыт гортат бур жö овлан...

— Кытшöм Васька сэтчин вердан? — серöмтчис Ульяныс.

— Васька, лый! Он адззы, танккес зэв ни... Повзис иньыс, кöр гор вылын аслыс гардiс мужикыс.

«Ме тiянлö висьталi, мый колiс керны, а тi куканнесö чилькöтат! Бригадир ме тiянлö или кин?! Ог гленитчы кö, бöрйö мöдiкöс!..»— модис Степаныс.

— Нюжöтан коккетö и сё пондан бригадиравны! — Ульяныс повзьöмувья чожа кайис гор вылас, пуктiс мужикыс кымöс вылö кисö: жар Степаныслöн, йöрнöсыс люзь ва...

Öтöрас дзирс пемыт, уннялö тöв. Кытчö мунны, мый керны, кинöс корны? Эмöсь сэтшöм отир, кöдна чирйöны, сизим верста котöртöны посадöдз, юöны лекарствоэз, а Степаннэзлöн öтiк лекарство — мыйись-мый, сiя жö Аннаыс сьöлалас, пöлялас, и веськалöны, но талун, тыдалö, шогöтыс мöдкодь, сьöлалöмнас да пöлялöмнас он веськöт...

Ульяныс сэтчин да татчö, öтöрö да керкуö, адззис косьтöм öмидз, лонтiс печка, пизьöтiс öмидзсис чай и юкталiс мужиксö. Но Степаныс ружтiс, кынмис пым горыс вылын.

— Буржык? — модис Ульяныс.

— Буржык, буржык... — Но мужикыт эд ружтö, немымда сылö абу кокнитжык. И мыля нылö еныс шуис кольччыны челядьыс сьöрись? Кин отсалас пöрисьувья? Кин ойнас котöртас посадас да ваяс лекарствоэсö? Некин абу дынат, Ульяна, абу. Кыкöн кольччит старикыткöт и кивзö да ойзö, видзчисьö смертьсö...

— Буржык? — бöра модьö Ульяныс.

— Эн модь! — мурзьö Степаныс.

Керку пöвскын нёштöм голосöн кивзöны каннез, тышкасьöны кöс гыжжез — кöдзыт ва вылö киссьö.

Степан, мый тэкöт лоис? Чеччы да висьтась иньытлö, ошшась, кыдз талун вöралiн, но некинöс гортö эн вай, висьтась...

30

Вöтасьö гор вылын Степаныс топ бöра асыв. Сiя чеччис, петiс гортiсь. Бускоыс рад, чеччалö небыт лым вылöт. Пöльтö тöв, и усьö лым, но вöралiсьлöн сьöлöмыс вылын сэтшöм кокнит, дзик томмис дас год мымда и поныс моз жö кокнита чеччалö небыт лымöт, только коккес мылякö мыдзöсь, оз бы кывзiсьö — шаг и гардыштчöны öтамöдныс коласын. Степаныс и думайтö: «Эх, Степан!.. Кытшöм тэ чож вöлiн томнат! Чанёк моз эд котрасин, вöрас ветлöтiн не öтiк лунöн и эн мыдзлы, синнэтö куньлiн да мунлiн гортсянь веськыта Велва ю дынöдз, вуджлiн визыв юсö, кытшлалiн вöрас, кытöн сьöлаыс пыр сымда, что некин тэ мымда кайсö эз адззывлы... Вöлi, что Каменкасö кольлiн бöрат, Чежжесö вожмавлiн, Чежжессянь öтiк лунöн бертлiн Уролкаыс дынö, и некытчö эн падмы, эн дзугсьы, эн öш, грива вывсянь грива вылöдз адззин туйсö, öнi мый нö лоис?! Кытчö нö коккезсит чожтö колин?»

Вöралiсьыс топ вöтасис ассис лунся туйсö, но эз вöтась, быль талун ветлöтiс этадз — талис лымсö. Деревняыс кырылын жö поныс пондiс вувтны ур, но сэтшöм кöзiсь, что лыян и дроббес, натьтö, туганыс дынöдз оз лэбзьö. Видiс Бускосö, медбы эз бöбöт уррес дынö, а кошшис донажык зверьöс. И Степаныс мунiс одзлань, кайис вöрас Таркоть шор пöлöн. Вöрсö кундiс лым. Лымыс гусялiс быдкодь шыэз, кöть и вувтас поныс ылöжык, голоссö верман и не кывны.

Вувтiс Бускоыс, ылын кытöнкö кылiс, голосыс дзик муыс пытшкын. Вöралiсьыс кежис поныс голос вылö, сэк жö сюрис колодникö, косысви вöйис лымас, пондiс пессьыны, кыссьыны колодаэс коласiсь. Сьöлöмыс вартiс кöсичаэзас, чеччалiс топ горшас, сiдз ни мыдзис, что мунiс бытьтö не öтiк дас верста, а гортыс эд эшö нач матын — курöг лэбзяс.

Петiс дзескытiнсис, пуксис колода вылö, а поныс вувтiс топ зэв ни, тэрмöтiс-корис дынас. Бускоыс бергалiс кузь пипу мыр дынын, чеччалiс да пиннезнас курччалiс сiсьмöм ни пусö.

— Эх, Бусик! Пöрисьмам кыкнанным... Шыррез пондiн кошшыны хозяинытлö, — эз верит поныслö вöралiсьыс, кöр некытшöм след эз вöв лым вылын, только поныс и чеччалöм. Бусикыс Степаныс моз жö кöритöмöн видзöтiс хозяиныс вылö, топ сiдз жö шуис: «Тэ ачыт шыррес сьöрын пондiн вöтлiсьны!..», öддьöнжык пондiс чеччавны мырыс гöгöрын, кöдö кокалöмась кыррез, и кöда гырка, кыдз туис.

Степаныс видзöтöв-керис поныс гöгöрын — омöн кузь вöр, кыдз стена, сiя кундöм лымöн, кытчö павкан, сэтiсь юр вылö и буждö, тыртö. Вöралiсьыс коссис кыскис чер, пыркöтiс кеписсес бердiсь лым и вачкис мырыс бердö. Мырыс пытшкын пондiс кывны гыжьясьöм.

— Эм, Бусик! — гажöн висьталiс Степаныс. Тшöка пондiс усьны лым, пырис öмö, синнэзö, сорис удж. Коккез вöялiсö колодаэз коласö да нильдалiсö. Степаныс чернас кералiс — писькöтiс мырас неыджыт осьта, кыдз бердiсь кульыштiс симöт, чукöртiс кöс уввез и мырыс бердö осьтаыс весьтö öзтiс би. Поныс эта коста пукалiс бокынмоз, видзöтiс хозяиныс вылö, никсышалiс и видзчисис.

Шутнялiсö каёккез, сэсся вöрын нем эз кыв, и биыс чожа пондiс нювны кöс мырсö, тшыныс пырис гыркас, кайис вевдöрö и петiс кöззэс коласö, кыдз трубаись. Туланыс гыжьясис мырыс пытшкын, чирзышалiс, но эз пет.

— Петан! — гажöн баитiс вöралiсьыс, содтiс биас кöз уввез. Поныс чеччалiс да кивзiс ни мырыс дынын... Степаныслöн öшис мыдзыс, сьöлöмыс вылын лоис кокнит, дзик томувья жö. Биыс гажöн нюлiс мырсö, нюжласис вевдöр. Видзчисьтöг поныс кивнитiс, сöтiс кöззэз коласö и кыдз вотьыштiс — öшис син вылiсь.

Вот сiдз овлö вöрас, топ добычасö киат ни видзан, а сiя чеччöвтас öмсит ни и коляс, пышшас и абу. Степаныс дзар керис кöззэз вылö, кытiсь зверьыс кисьтiс лым да шуис жö: «Степан, эз эд ков тэрмасьны...» Вежöртiс эд, что сылö не вöтны ни тулансö — абу ни коккезас одззамоз чожыс и оз ло. Стыд эта бöрсянь висьтасьны отирыслö, кыдз вöралан, кöр некытчö ни эн понды туйны, пукалiн бы гортын да боккетö шонтiн гор вылын, а тэ...

Степаныслöн петiсö синваэс... Сiя чышкис син дорресö, öм увтас модис молитваэз, кöднö тöдiс учöтсянь и веритiс, что нiя пыр отсалöны, но видзöт мый тай петiс... И чигаркасö ни оз вермы одззамоз гардны — киэс дрöжитöны... Пондiс куритны, кывзiсис, оз я кытöнкö матын вувт поныс, но поныслöн голосыс эз кыв, сэк швыргис коккес увтö чигаркасö, киэзас сюйис кеписсесö и усьöмöн-пöрöмöн иньдöтчис поныс следöт: надейтчис мыйкö вылö, надейтчис...

Сералам пöрисьсö, но сiя мунiс эшö чожакодь, вермис эшö коккес увтын лойны небыт лымсö да сiдз, что гöппезын нинкöммес эз ештö кöтасьны — тальччис и чожа шагньöвтiс и вöтiс эд Бускосö, кöда зверьсö лэбтöм кыз лапья кöз вылö и вувтö.

Вöралiсьыс бергалöв-керис пуыс гöгöрын и синнэс вылö уввес коласiсь усис веж мороса туланыс.

«Господи! — пондiс модьны Степаныс. — Христа ради отсав!.. Мый коран, сiйö и сета. Отсав! — кеймисис еныслö, жагвыв пельпоныс вылiсь лэдзис пишальсö и пондiс: модьны молитва. Зверьыс вевдöрсяняс видзöтiс, бытьтö видзчисис, кöр сылö лыясö. Степаныс лэбтiс пишальсö, эшö несйöтiс, эшö синас шлёпкис-павкис лымтор, но тэрмасьны эз туй, и вöралiсьыс эз тэрмась, тiльсис да чышкисис и вöлись лыйис. Пишальыс тангис моросас, пöльыштiс кöзыс вылiсь лым, син одзас гардыштсис тшын. Кивнитiс Бускоыс...

Туланыс эз вöв...

Сэтöн вöлись и сырлёль öшöтчисö киэс, сэтöн вöлись аслыс нач ни эз понды веритны, эстöн вöлись мый и лоис — эз бы и вöрзьы ни местасис, сэтшöм ни мыдз вожасис пельпоннэс вылö, пондiс лязны колодаэс коласö, что водiс и куйлiс бы, но чожа пондiс сайкавны, чожа кöдзытыс вöрзьöтiс кöзыс увтiсь. Степаныс шутньöвтiс поныслö, сыбöрын ыкöстiс да пондiс видны горзöмöн сорöн асьсö и Аннасö, кöда дзöдзыв синнэзнас, кыдз видзöтас — эн и пет гортiсь, буржык лоас, кöр бергöтчан, но талун эз бергöтчы и на!

Жагвыв усис лым, вöрас лöнь, топ сiдз кинкö кывзiсьö, сералö тэ вылын.

«Буско, кытöн тэ менам, кага? Эз вермы тэныт сирота-хозяиныт кутны тулансö... Лок гортö!» — модис ас кежас, корис бы дынас понсö, но Бускоыс öшис и абу.

Степаныс босьтiс бедь, беддьыштчис, коккес увтын дзуркнитiс лымыс, нильдiсö нинкöммес. Вöрыс вевдöрын шутньöвтiс тöв, кисьтiс кöззэс вылiсь лымсö да повзьöтiс сьöла, кöда лэбзис нач матi и зэв пуксис вöралiсьыс одзö, но Степаныс эз и думайт лыйны кайыслö — нем ни сылö вöрас эз ков...

Öнi куйлiс гор вылын да ыксiс: «Буско! Буско! Лок жö, кага!..»

Бускоыс куйлiс лабич увтын, лэбтiс юрсö, видзöтiс горвывлань — синнэзас сэтшöм югöр, топ горзыны лöсьöтчö, а Ульяныс оз тöд мый керны — гор вылö да комö, комсянь бöр гор вылö: мужикыслö то нюжöтö юны, то кымöсас пуктö вадöм рукля, но Степаныслö этасянь абу кокнитжык, сэк иньыслiсь сьöлöмсö и пурöны думаэз: «Кин дынö жö бы медодз сёр рытнас котöртны?! Кин жö бы локтас да отсалас? Кин?!...» Вачкисьö, топ некин оз отсав Степаныслö, кöр пöрис коккес вылiсь, некинлö нiя пöрисьувья оз ни колö, но пасьтöг чепöссис öтöрас и тöлiсь югöрыс весьтiсь керкуныс дынiсь казялiс Гаврилсö. Мый вöлi, эз вöв коласаныс, но эз эд пурсьö, эз лöгалö кинкö моз, кулаккезнысö эз мыччалö, эз пиньласьö поннэз моз, и öнiУльяныс рад лоис, что Гаврилыс гортаныс, сылö и ыкöстiс: «Гаврил!..»

— Мый, тётка? — Гаврилыс кокнита горöтчис и кокнита бергöтчыштiс Ульяныслань.

— Старикыс шогалö...

Мöдыс кыдз сiйö и видзчисьöм: кисис чапкис песжуг, заргисис посöдзаныс, синöн эн ешты кваркыштны, бöр ни петiс, котöртiс Степаннэс öшын увтö, бöра юалiс: «Мый, тётка?!»

Кöть кыдз шуöны мортсö, но зонкаыс абу пон кодь: некинкöт оз видчы, мый висьталасö, керас, колö — кулас йöз понда. Гаврилыс сэк жö пырис керкуас, отсалiс пасьтöтны Степансö, котрасис дворö, доддялiс вöв, вайöтiс öшыныс увтö.

31

— Поди, ме тэкöт больничаас муна жö? — Ульяныс чышкис синваэсö да котрасис керкуас и эз тöд, мый бердö кутчисьны, мый керны.

— Подасö кинлö колян? Или Бусикыс пондас вердны да юктавны мöстö?! — лöгасис Степаныс, — эрзö да видчö, дынас оз сибöт. Петö гортiсь кык ки коласын ни и видö иньсö, но оз ружты, оз кивзы, оз норась, бытьтö шогалiсьыслöн некыт оз вись, а Ульяныслöн синваэс петöны, горзö бы да оз лысьт, думайтö: «Кулас ни, кулас...»

— Эн горзы, тётка! Нем умöльыс оз ло, туйыс тöдса, ме чожа кыска дядьöс больничаöдззас. Эн горзы, эн...

Мужиккес пуксисö додьö. Степаныс сэкжö водiс туруныс вылö, а иньыс пернапасалiс бöрсяняс, шуис «Христос тэкöт», чышкис синваэсö и вöлись сьöлöмыс вылын топ лоис кокнитжык, вöлись топ пондiс веритны, что быдöс лоас бур. Ямщикыс вачкис вöлыслö, и Чалкоыс сöтiс котöртны. Вöвсö одзалiс Бускоыс: гардыштчис лымыс коласö и öшис син одзись.

— Тётка, — пемытiнас, кыдз му пытшсис петiс-мыччисис Аннаыс, кöда тöдöма ни, что Степансö кыскöны больницаö. — Тётка, öддьöн шогалö дядьö? Мый нö сiдз?..

— Шогалö... — бöра курыт лоис горшас Ульяныслöн.

— Веськалас, — висьталiс Аннаыс. — Веськалас. Оз я тэныт мыйкö ков отсавны?

— Мый отсалан? Кытчöдз нем оз ков, — Аннаыслö висьталiс Ульяныс, пырис керкуас.

Гажтöм. Жöдзис-керис, пöрöтчис западня вылö, эз ешты куньны синнэсö, кыдз пондiс вöтасьны, топ Степаныс орсö гармошкаöн, а сiя сьылö да сэтшöм чинньöн-гажöн, что керкусиныс петöм Надяыс, видзöтö и сералö: «Тётка, тэ мый? Абу я код?»

Сьылö вöтöн, а аслас сьöлöмыс сiдз и быркайтö — öмöттяс бы чеччöвтö. Видзчисьтöг Степаныс чапкис гармошкасö, зубыта видзöтiс-керис и лёка пондiс видчыны:

— Ыбöссö мыля он ось?! Он кыв, что гöссез локтöны!

Ульяныс саймис, топ бокас кинкö чувйыштiс бедьöн: ыбöсас кинкö вынöн йоркöтiс.

— Ме, тётка! Осьт... — Гаврилыс эд кылö...

«Вот и кулiс...» — юрыс бергöтчыштiс Ульяныслöн, сьöлöмыс топ вотьыштiс. Оз тöд, кыдз петiс посöдзас да осьтiс ыбöссö.

Öтöрас тöлiсь югыта. Гажа. Вöлыс пирскайтö зэв посöдзыс дынын, пымалöм, вывсис пар кайö и юрсö öшöтöм, а Степаныс топ узьö доддяс. Бускоыс чеччöвтiс моросас и никсiс.

— Гöрд нятяс баддес весьтын и кулiс... — синваэсö чышкис Гаврилыс.

— Мыля ме тэкöт эг мун?! — быд вынсис пондiс герьявны Ульяныс.

Вöлi да эз ло мортыс. Дыр я сiя олiс? Кузь я векыс? Топ тöн локтiсö овны Тиминаö, а талун Степаныс абу ни. Туйын лолыс петiс. Ачыс баитлiс, что кулас вöрын, и мед дзебасö кудриа кыдз увтö, ась бы тулыснас юрыс вевдöрын сьылiсö кайез, гожуммезнас пель одзас шушкис шоныт тöлок, арнас омöн быдмис тшак да ягöд и син одзас котрасисö кöччез. Любитiс Степаныс отирсö и вöрсö.

Дзебисö бура. Дзебтöнняс локтiсö предыс, партийнöй секретарьыс, гортiсь отирыс и посадiсь, ылiсь и матiсь, бытьтö быд мортыс вöлöм ёрт, быдöнкöт кытöнкö пантасьлöм, чулöтöм гажа кад и сьöкыт чассэз, уджалöм и шоччисьöм. Уна дзебтöнняс вöлiсö отирыс, эз вöв только зоныс: эз тöд мамыс, кытiсь корны Романсö, кытчö иньдыны телеграмма.

Дзебисö Степансö, колис мортыс ассис Тиминасö, эз ло пöрись бригадирыс, и некин бы томмес сы бöрсянь оз бригадирав — грехö бы оз пыр, кöр томмес олöны ни мöднёжа — кокнита бы уджалöны, кокнита шедтöны няньсö, асыввезнас узьöны бы дыр, грамотнöйöсь, тöдöны, кыным час уджавны, мымда шоччисьны — законнэсö лыддьöтöны, кужöны йöзöс видны и дорйыны асьнысö. Дыр Тиминаын кошшисö бригадирсö — кык неделя öвтчисö, кöда уджалiс, кöда шоччисис, петö, что саймöт бы Степансö шойнаыс вылiсь и мед одзлань уджалö, сiя эд вöр коласас пондöтчис керны Тиминасö. Отирыс олiс и эз ни бы вöрыс коласын, сэк Аннаыс жö бöра и горöтчис, что нем кеймисьны мужиккеслö, бригадирнас колö пуктыны инь мортöс, шуам, Надясö жö. Оз разь Надяыс вермы уджавны бригадирнас?! Вермас!

Рытнас лёбисö эта йылiсь, асывнас саймисö и видзöтöны: Митрейлöн иньыс шатласьö горзытöн, пильскö да норасьö, бытьтö моньыс рытнас жö пемыт сорöн конувтас кутöм чышьянок нянь да пань, петöм керкусис и часöт абу. Василиса сэтчин да татчö, оз адззы моньсö, пильскö, модьö, бытьтö Надяыс джагöтчис или уськöтчис ваö, кöр Митрейыс жö летöм горшсö: «Тi разь öнi отир?! Адззисьöм бригадир... Пон да порсь вылын быд кужас бригадиравны, а отирыс... Тьфу! Да-а-а... Адззöмась кинöс пуктыны бригадирас, бырöм нинкöмсö, Роман мульöссö...»

Ёна пö гортас гымалöм Митрейыс, сэтчöдз, что зоныскöт кутчисьлöмась оча морос, сiйöн, натьтö, моньыс и пышшис гортiсь.

Бригадирö бы Надясö пуктiсö, а сiя абу. Аннаыс жö бöра пондiс туткыны: «Натьтö, Романыс дынö мунiс...»

— Тэнат пыр юрат Романнэс и олöны, ны понда и тöждiсян! — Игнатикаыс öмалiс Аннасö, а Ульяныс гажöнжык ни думайтiс: «Бур бы эд... Сiдз бы и колiс... Кодяжык иньсö Романыслö не адззыны... Гортiсь жö бы иньсö, то городскöйескöт он и куж эд миян кодьыс баитны...»

Гажа гожумыс. Отирыс турунасьöны. Ульяныс гардчö жö видззез вылын, мымда вермö отсасьö отирыслö. Уджавтöг оз вермы овны, оз вермы податöг ой-лунсö джендöтны, видзö мöс, кукань да баляэз, а нiйö эд тöвнас мыйöнкö пондас ковны вердны. Он кö уджав, мый мöсыслö чапкан одзас? А колхозас видзöтан кö, керасö ведомость и турунсö сетасö... Олö Ульяныс öтнас, луннас эшö отирыскöт кокнитжык, а рытнас пырас керкуас, сэтчин да татчö, öтöрö да керкуö, чилькöтас мöссö, юкталас, а сэсся мый керны, кöр эшö одз воднытö?

— Господи-и-и! — клап вачкас долоннезнас боккезас. — Мыля нö менö еныс сiдз? Мый ме сылö умöльсö кери? Янсöтiс быдöн дынiсь и колис öтнамöс?! — горзас-керас, поныскöт баитас, кöда пöрисьмис — не вöрö оз мун, не öтöрö ни оз пет, умöля адззö, умöля кылö, видзöтö хозяйкаыс вылö, кыдз шуö: «Олан сэтшöм, Ульяна, олан... Эн горзы, кыдзкö олам жö... Сё ни колö овны...»

— Кöть бы Надяыс... — Бускоыскöт баитö хозяйкаыс. — Сiйö бы монь местö видзöтлi, да мунiс».

Олö мамыс öтнас, горзас да бöра одзлань олö. Арланяс гортö вовлiс нылыс. Олiс лун-мöд и бöр, топ мыйкö городас ендöм, модьö:

— Ме тэнö, мам, нуöта... Гераыскöт баитчам и нуöта... — висьталiс — петiс и абу: небыта кывнас ольсалiс да чорыт узьнытö, и думайтö Ульяныс, что некытчö гортiсь оз мун, кытчöдз вермö асьсö вердны — одзсис няньсö некин оз мырддьы. И олö, луннэсö öштö да ойесö сорлалö — онöн кольлалö, оз тöд, узьö кöркö бура или оз, но гортiсь некытчö оз пышшы, подасö оз торк, кöр эшö отсасьöны отирыс, кöть турун вайны, кöть пес керавны, сэтöн и эмöсь, только вöлi бы вина да пызаныс вылын нянь.

Тöв шöрнас Романыссянь босьтiс письмо, зоныс гижö: «Здравствуйте, ая да мама! Ме ола бура, квартираыс бур и уджыс кокнит. Жалейта, что одзжык Тиминасис эг пышшы...» Вежöртiн, мам? Айыс кулiс ни, а зоныт лыддьö ловйöн, но и мед... Грех оз ло...» Грех оз ло, кöр енсö ог тöдö, но колiс жö бы зоныслö öтпыр вовлыны мамыс дынö, видзöтны, кыдз олö пöрисьыс, айыс шойна вылö кежавны, но оз, дак оз, и он эд мун да вайöт...

Чулалö тöв, локтö тулыс. Ульяныс керкуас öтнас. Гажтöм, медодз Степаныстöг, кöдакöт сымда олiсö öтлаын, сымда пешлiсö сьöкыт кадсö, что синваэз ни оз тырмö горзынытö. Кадыс чулалö, нылыссянь бöра босьтiс письмо, сiя бöра арнас кöсйисьö нуöтны городö, а гожумсö кыдз чулöтны, оз юась, оз висьтась, оз тöждiсь.

«Кулi бы... Натьтö, раджык ни бы вöлi... — сералö ас кежас нывсö Ульяныс. — Эз бы понды ковны гижны письмоэсö да тöждiсьны...» Но и мед, асьныс тöдöны, а ми кытчöдз вермам, гудыртам, видзöт, бöра эд локтö тулыс, бöра шоныт, отирыскöт петас видз вылö и мымда вермас, пондас уджавны, и видзöтан кö, арыс вöтас, а сэтчин тшак да ягöд...

Гожумыс дженыт, топ тöн кöкис кöк, а талун луннэс ни чинiсö, лоис кöдзытжык. Мамыс видзчисис, видзчисис нывсö да мыдзис видзчисьнытö: Таняыс сiдз эз и лок, но и мед, кöр сьöлöмыс Ульяныслöн олö бы гортын, кулö бы Тиминаын, медбы дзебисö Степаныс бокö.

Олiс бы Тиминаын, но тулыснас, кöр лöсьöтчисö гöрны да кöдзны, Тиминаö локтiсö начальство — этö колхозсиныс и сельсоветсис преддэс и эшö куш юра уполномоченнöй. Нiя одззамоз жö Степаннэзас чукöртiсö отирсö, юасисö-керисö, кыдз олат да мый керат, бытьтö тиминсаыс кувны лöсьöтчöны, и пондiсö бöрйыны бригадирсö, кöр бригадиралiс Игнатикалöн зоныс — Öсипыс, сiдзкö.

— А мый Öсипыс? — эз вежöрт предсö Митрейыс. — Китöм или коктöм зонкаыс? Топ юрыс пельпоннэс вылын эм жö... Ми, мыся, зонкаыскöт кужам бы овнытö.

— Асныра Öсипныт! — Митрейсö кывнас кералiс предыс. — Уна тöдö. Оз кывзiсь. Оз ков миянлö сэтшöм бригадирыс. Мöдiкöс бöрйö...

— А кин миян мöдiкыс? Ошсö, быдь, корны? Сiя, быдь, кужас тiянкöт уджавнытö... — Анналöн мый синмас, сiя и öмас — резгас и абу, кöть одзас пред, кöть уполномоченнöй. — Абу миян томмес ни, кöдна кужасö бы уджавны бригадирнас.

— Абу и олö бригадиртöг! — лöгасис предныс — эн вöрзьöт! — Кыдз кужат, сiдз и олö.

— Сiдзкö, öнджа... Некинлö эг пондö ковны... — Митрейыс жö бобгö. — Кулам пöриссес и Тиминаным кулас, да-а-а... Думайтi ме сэтшöмсö, но чожа эг видзчись.

— Видзчисьны колiс!

— Электричество бы миянлö! — западня вылiсь чеччöвтiс Öсипыс, кöда нач ни гажтöмтчис — öшöтiс юрсö и пукалö.

— Чож тэ кывнат... Электричество! Пальниканым электричествосö кодьöн ог адззывлö, а тэ бы Тиминаат öзтан... Шоччисян, натьтö...

— Мыля шоччися?! — пизьö Öсипыс. — Уна я коласö столббес да проводыс? Моторсö сетö, а ми столббесö сувтöтам и проводсö адззам. Ачым понда уджавны моторыс дынын и трудоденьсö ог кор!

— Вывтi тэ кывнат, зонка, чож, — предыс баснинас вермис зонкасö. — Кыдз бы эн, öнджа, кер... Бригадиравнытö эн куж, а сэтöн чож... Мыля вот мöсыс кулiс? Висьтав!

— Тiянлiсь сiйö колö юавны! — предыскöт паныт пурсьö зонкаыс. — Ме нагладь правленнёаныт вовлi, кори ветеринарсö, а сiя мый керис? Кытöн вöлi? Мыля эз вовлы? А öнi менö пурат... Бöбöтат, ёрттэз, Öсипыс кытöн и виноватöй, но эстöн сы вылö бöрöн эд кайö. Вот и бригадиралö асьныт, поди, тiян мöссэс оз пондö кувны, и турунсö пондат тöвнас подаыслö пöт вердны.

— Адззам бригадирсö!

Собраннё и абу бы собраннё... Мылякö одзжык этадз öксясö, баитчасö — некин некинöс кывнас вывтi эз пур, эз дойд, а талун мыля нö сiдз?! Тиминса юррезнысö öшöтiсö.

— Бöрйö бригадирнытö, — модьö предыс. — Тiянлö эд уджавнытö.

— Эм миян бригадирыс, — чирзö ни Аннаыс, кöр адззö, что обухсö шатьнас он лöсйы — тэ моз оз ло, мымда бы эн чеччав.

— Тэнö кö пуктам? — Аннаыслö горöтчис сельсоветсис предыс.

— Менö?! Ха-ха, — сералö Аннаыс. — Да ме Тиминаас кужа öтiкö керны... Ворожитчыны да смилитчыны, а сэсся меись, кыдз этаись... Öтiк лунöн разя бригадасö!

— Сэк олö бригадиртöг! — предыслöн чочкоммис рожаыс, юрыс вылö пуктiс моршень кодь шапкасö и — ыбöсö!

— Мунны колас кытчöкö, — гажтöма висьталiс Öсипыс.

— Кытчö мунан? — öшис Митрейыс.

— Мый керны, кöр вашöтöны? И невестаэс абуöсь...

— Гöтрасям мекöт! — чукыльтiс юрсö Аннаыс, но сылiсь шуткасö бытьтö некин эз кыв.

— Да-а-а... Жаль бы кольны Тиминанымöс, — табаксö чепöльнас гижöт вылö пуктö Митрейыс. — Керим, керим ыббесö, а кинлö да мыйлö? Видзöт тай начальсвоыс кытшöмöсь. Нем нылö оз ков, кывзö: предыс подасö пö мöдö нуöтны... А мыля бы? Нач некинлö я мый я лоис ни подаыс гöгöрын бергавнытö? Инькаэс мый нö пондасö керны?

— Бытьтö пö зоотехниктöг да ветеринартöг татöн оз туй мöссэсö да куканнесö видзны, умöля пö зорамöны, — шуö Аннаыс.

— Чужим зоотехниктöг, кулам ветеринартöг, но олiм эд, а талун... Да-а-а... Вылына нырнысö видзöны начальсвоыс, вылына. Оз адззö ас гöгöрсиныс отирсö, нем туйö оз пуктö.

— Пондасö эшö тэ кодьыскöт баитны! — Аннаыслöн сэтöн и эмöсь кыввес.

— Да-а-а, — куритö Митрейыс. — Сiдз. Мый миян кодьыскöт баитны? Нем баитны.

Сибалiс Тиминаö начальство, кымöссö мыччалiс и — аллё! Абу и ась оз вовлö эшö куим год. Мый нысянь бурыс... Предыс отирсö оз и адззы, уна оз баит: шуас — этö керö да этö керö, а одö кö — асьныт тöдат, только сы син одзö эд мыччасьö сэсся. Нето умöль лоас. Чорыт мывкыда колхозсис начальствоыс!

— Ась! Пондам овны öтнаным! — медбöрын висьталiс Митрейыс. Тэ, Öсип, пондан бригадиравны, а ми пондам уджавны.

— Но и уджалö, мый меным...

Но уджавны эз сетö: чулалiс собраннё бöрсянь неделя, и посадсянь локтiс юöр, медбы подасö вашöтiсö посадö.

— Некытчö мöссэсö эд нуöтö! — пондiс бизгыны Митрейыс.

— Ог сетö, дядь! — готсьö Аннаыс.

— А меным мый? Тшöктöны и керам... — кокнита висьталiс Öсипыс. — Нетеллескöт öтлаын инькаэсö вашöтам, и бур лоас. Öттэс сэтчин, мöддэс татчö, а ме муна вонö дынö Челябинскö, ог öш, адзза аслым кытшöмкö удж.

— А ме кытчö? — оз вежöрт олансö Митрейыс.

— Кольччан!

— Да-а-а, батя, разьсьö Тиминаным. И кин сiйö, думайтат, разьö? Начальсвоыс эд? Во, — пондiс лэбтыны и лэдзны олансö Митрейыс, видö быдöнöс, а томмес нерöны:

— Ошшескöт пондан овны, дед.

— Эг думайт, эг думайт...

— Мый сэтöн думайтны? — пиннесö вузалö Öсипыс. — Талун эм, ашын абу, талун нерис пöрисьсö, ашынас чеччисö — зонкаыслöн сайкалöм следыс, быль эд, видно, мунiс воныс дынö.

Талун гортiсь пышшис öтiк, ашын мöдiк. Видзöтö Ульяныс, что Тиминаö кольччö Митрейкöт, кöдалöн иньыс мунiс гöститны зоныс ордö да сэтчин сибдiс, Пешлiсь öнi, дед, öтнат овнытö, кöр пыр дзескамин инькаыткöт, керкуас и öтöрас эн тöр!

Сэксянь Митрейыс и пондiс модьны Ульяныслö: «Гöтрасям, Ульяна, — синваэсö чышкö. — Ми тэкöт ышö сiдз пондам овны. Отирыс завидуйтны пондас. Ышö, да-а-а... Виль керку керам, кагаэз быдтам. Ульяна-а-а... Мый нö нем он висьтав?»

— Сiдз тэныт и колö, öтнат ов! — стариксö нерö Ульяныс. — Мый кошшин, сiйö и панталiн. Эн горзы, эн норась. Кодя бы вöлiн, иньыткöт бы олiн, а тэ сюра жö эд.

— Да-а-а, — табаксö нютшкö Митрейыс и унажык нем оз вермы висьтавны: некинлö эд, дед, эд пондö ковны, некинлö. И Ульяныс тэ вылö абу рад, пыр вöтасьö Степансö, быд лун бур кылöн касьтылö.

32

Туйес миян тöввезнас бурöсь, морозыс нiйö дорö, гладьöтö. Лöнь да кöдзыт луннэзö Ульянлöн городiсь локтiсö гöссез: нылыс мужикыскöт. Танялöн мужикыс — майöг: кузь да векнит. Пырис керкуас, чöвтчис, вишнитiс нырнас русö, несйöвтiс и пондiс голясö нюжлавны да гырись синнэзнас чувйыны быд пельöссö, бытьтö мыйкö татчö кольöм или öштöм. Оз баит мужикыс, топ кылыс абу, а тёщаыс пусьö да пöжасьö, тэрмасьö вердны зятьсö блиннэзöн, тупöссезöн да пирöггезöн — дуль öмын сöдзö.

Кодя тёщалöн кодя бы и зятьыс, но Танялöн мужикыс оз сёй, оз ю — брезгуйтö пирöггезнас и блиннэзнас, бытьтö вывтi грамотнöй, миян кодьсö деревнясис адззö и оз, сёяныс и юаныс не сы сьöртi.

Вот и думайт, кыдз сэтшöмыскöт нылыт олö! Кыдз тöрöны керкуас и узьлöны öтлаын?

— Мам, тэ эн пов! — ошшасьö Ульянлö нылыс. — Куканёк сiя менам. Ме сiйö гортын рос угöлын пукöта (комиöн висьталö, сiдз, что мужикыслöн синнэс ыждöны, и видзöтö иньыс да тёщаыс вылö, топ панталiс ошшезöс).

«Чож, кага, чож! — гажöн видзöтышалö Ульяныс и думайтö нылыс йылiсь. — Кин жö бы мужикыт? Кытшöм породаись, кытшöм отир коласiсь петöма? Бытьтö абу роч, не абу коми... Кин и эм? Паськöтас мöс кодь сьöд синнэсö и кин вылö и вачкисьö, он вежöрт. Тьфу тэ, господи Сусе Христе! Кин жö бы этатшöм отирсö вайöм да быдтöм?!»

— Нем эн шу, мам! Ме сэтiсь мортсö сэтшöмö кера, что отирыс пондас завидуйтны, — бöра ошшасьö Таняыс.

«Керан... — мамыслöн сьöлöмыс висьö. — Песжугсис эд сё керлöны отирсö...»

Пöжасьö мамыс, оз тöд, мый бердö кутчисьны, мыйöн вердны дона гöссесö. Локтiс нылыс мужикнас, колiс бы керкуас вайны гаж, но Таняыс эз ешты пырны — лöсьöтчö вузасьны ни.

— Кин миянлiсь да мый вöрыс шöрын босьтас? — тöждiсьö мамыс.

— Ме, старуха, быд торыслö туйсö адзза! — висьталiс нылыс и пондiс вузавны мамыслiсь дозмук и паськöм, мый колö и оз эта Митрейлö жö — öтiкö — копейка вылö, мöдiкö — кык вылö.

Öтыс вузасьö, а мамыс горзö — быд торыс жаль: нинкöммесö эшö кыйис Степаныс, пестерсö гардiс Романыс, сов дозыс пыр син одзас, а öнi оз ло. Тiльö пöрисьыс синнэсö, а эта коста нинкöммес «лэбзисö», сов дозыс «котöртiс», и паньыс да бекöрыс «керисö коккез». Ульяныс чышкö синваэсö, а Таняыс китшсьö «Мам, эн горзы. Ме тэнö вöр шöрас ог коль, нуöта городас, и сэтчин пондан сьывны да овны, вунöтан нинкöмметö и сов дозтö!» Мамыслöн синваэс курöтöны горшсö, но нем ни оз шу — судьба сэтшöм.

Зятьыс пукалö джодж шöрын да тупка моз видзöтö тёщаыс вылö, топ ньылыштны лöсьöтчö: «Не миян родiсь, — думайтö Ульяныс. — Кыдз ме сыкöт понда овны?», юрсö бергöтö öшынлань, видзöтö роднöй деревнясö ни, кытöн тöвнас некин ни оз понды, поди, овны, только лэбзяс катша да пуксяс öшын увтаныс и пондас китшсьыны, бытьтö вийöм зоннэзсянь ваяс юöр...

— Мам, тэрмась! Миянлö некöр, — орöттöг модьö нылыс.

Пырö Митрейыс, здоровайтчö да пуксьö западня вылö, öзтö чигарка и пондö баитны:

— Мд-а-а-а, öтнам Тиминааным кольчча. А кин татчö медодз поздiсис? Ме да Степаныс эд! А тэ, Степаника, сэтшöм жö... Пышшан гортiсь... Кольччы, öтлаасям и пондам овны. Мый тэныт городыс козьналас? Бус да шум, тьфу!

— Мый тэ, Митрей, лёбан?! — Таняыслöн вирдыштiсö синнэс. — Эн дзуг мамöс, мун гортат да ов ош моз!

Вашöтiс томыс Митрейсö, эз видзöт, что старикыс пöрисьжык, эшö сосед да и батшко кöркö вöлi: смевмöм инькаыт городас, смевмöм да мöдöрö...

Кык лунöн Ульянлöн нылыс рез-паз вузалiс мамыслiсь добросö, кыдз тöв вылö кöдзис, но мамыслö копейка эз сет, висьталiс: «Тэ, мам, деньгасö öштан, городас шпанаэс мырддясö...»

— Мый ме деньганас кера? Тшыгйöн, бат, од жö пондö видзны, — шыасьö Ульяныс, эна думаэзöн и петiс гортсис кузь туйö, волокöт вöтчис нылыс сьöрö Усолье туй кузя, кытöн быд шорокыс и расыс тöдса, и сэтшöм сылö гажтöм, топ нуöтiсö кытчöкö мöдöр югытас.

Пöрисьувья вежö пöрисьыс олансö. И мый сiя сылö висьталас да мыччалас? Городын топ бур: пöт кынöмыт и шоныт угöлыс, но гажтöм, сэтшöм гажтöм. Вот рытнас водiс бы татчö, а чеччис Тиминаын! И висьö сьöлöмыс Ульянлöн, тшепитö ой и лун да сiдз, что чочком няньыс курыт, чайыс абу чöскыт — юыштны бы ырöш или сюромка, натьтö, сьöлöмыс бы бурмис. Городын отирыс тыр, но некытчö петны, некинкöт кыв горöтчыны, соседыт ыбöссö ой и лун пöданöн видзö — эн лок, эн вöрзьöт! Мöд соседыскöт быд лун пантасян, но бытьтö некöр он адззись: оз видзöт, оз здоровайтчы ― эм тэ сылö и абу, бытьтö не морт, кыдз враггез. Сiдз разь овсьö деревняын? Сэтшöм я отирыс Тиминаын вöлi? Город... Кин сэтöн олö, ась бы сiя и ов, только не Ульяныс бы. Оз вежöрт йöзiсь олансö пöрисьыс — абу сы сьöртi... Кыскö сьöлöмыс деревняö, аслас гортö.

«Кытöн татöн сымда отирыс уджалö и мый керö? Кытiсь нылö сымда няньсö вайöны? Ежели кö быд мортыслö шöрöмöн, то колö мымда... Не-е-е, Ульяна, оз кö шогмы деревняын сюыс, городскöйес öтамöднысö тшыгувья пондасö сёйны. Тиминаын мый? Тиминаас эд сюэс оз быдмö кö, быдмас вöрас тшак-ягöдыс, а татöн... — думайтö Ульян бабыс городскöй олан йылiсь, осудитö, сьöлöмыс öт джыныс татöн, мöд джыныс деревняын. — Мый эстöн? Шум, бус... А гортын! Погоддяыс, вöрыс, руыс кытшöм чöскыт, ловзисян и пöтан! А видззес гожумнас... Господи! Кытшöм греххез понда менö еныс татчö пöрисьувья иньдiс?! Мыля ме татчö шедi?!» Пöрисьыслöн топ пель дынас пондöны сьывны каёккез, баксö мöсыс, китсасьö петухыс, а татöн шум да гам, машинаэз да машинаэз... Сiйö и видзöт, старуха, кыдз петан керкусит, и талясö. Пукав, баб, керкуын нёль стена сайын, пукав кыдз тюрьмаын. И бöра Ульян бабыс аслыс висьталö: «Не-е-е, Ульяна... Пышшыны колö! Тулысöдз ола и, аллё! Гортö...»

Тöлыс кузь. Зятьыс локтас уджалансянь, пырас гортö, чöвтчас, пуксяс диван вылö и пишкö, кыдз тёщасö керкусис оз адззы, öшынö видзöтö Ульяныс, адззö машинаэз, кöззэзся джуджыт керкуэз, тшын, öтöрö петас, и кайес городын абу кай чужöмаöсь, воробейес, кыдз петöмась му пытшкись, и горзöны-чивзöны: «Ой-ой, овсьö оланыс!»

Öшынö видзöтö пöрисьыс да чуннес вылын лыддьö, кöр ни локтас тулысыс.

Тулысыс локтiс одзжык, нежели деревняын: одзжык пондiс сывны лым, нятьöсьмисö улицаэз, но пуэс вылын почкаэс эз потö, кайез эз сьылö. Тöлыс абу тöв кодь, и тулысыс оз вачкись тулыс вылö... Сэтшöм я деревняын тулысыс? Тиминаын кыдз пондас шонтны шондiыс, медодз локтасö кайез, пондасö сьывны — сьöлöм орсö да олö. И эшö öддьöнжык пöрисьыслöн городын пондö висьны сьöлöмыс, сiя олö да видзöтлö шондiыс вылö, надз шондiыс лунiсь лунö лэбтiсьö кымöрас вылöжык, содöны луннэс, и лоö топ гажажык ни.

Ульяныс, поди, и олiс бы эшö нылыс дынын, терпитiс, но öтiк лунö Таняыс сетiс куим руб деньга, тшöктiс ветлыны магазинö, медбы мамыс босьтiс сахар. Мамыс деньгасö дзебис пыдöжык пиас, петiс керкусис. Сiя эшö чож, мунö и топ коккес муас оз сидзалö, мунö да видзöтлö öтöрö и мöдöрö, полö, медбы машинаэс увтö не шедны. Дзескыт городын, но улицаын отирыскöт топ гажажык, кöть нiя тöдтöмöсь. Гортсянь мунiс неылö, бергалiс öтмöдöрö, синнэс кошшисö бы тöдса отир, кöдна мукöдпыр пантасьлöны татöн и ныкöт туйö сёрнитны, касьтывны гортiсь олансö. Ульянлöн талун сьöлöмыс кыдз тöдiс: магазин посöдзыс дынын люкасис Проша дедкöт, кöда зоныс дынö деревняись локтiс важын ни, мортсö лыддисö, что кулiс ни, а сiя, видзöт, öмсö осьтiс, синнэсö барöтiс да горöтiс: «Тэ я мый я, Ульяна?!»

Уна я пöрись мортлö колö, медбы этадз улицаын пантавны счастьесö? Кöр ни городын олö Проша дедыс, а кыдз адззис тöдса мортсö, пондiс горзыны, юасис, кысянь да кыдз, кин гортын ловья эшö, а кин кулiс ни, кытшöм ыб вылö кöдзöны ид, а кытчö рудзöг, топ старикыстöг деревняын оз кужö и оз тöдö, кытшöм сю быдтыны. Баитö Прошакöт Ульяныс. Рад, топ панталiс роднöйся роднöй мортöс, кöда абу вунöтöм коми кывсö, вежöртö тэнö. Баитiсö. Горзiсö и сералiсö, час етш сулалiсö улицаын, а кöр бабыс пырис магазинö да сюйыштiс пиас кисö, деньгаыс эз вöв.

— Ой, ой! Проша, мый эта лоö?! — горзöмöн сорöн горöтчис Ульяныс, бергöтчис бöрлань, но старикыс абу ни — одзын и бöрын отир, и некинлö тэ, старуха, он ков...

Куим рубыс абу ни деньга... Куим рубыс кинлöкö, поди, куим копейка местö, но пöрисьыслö богатство, кöр пенсиясö босьтö — курöгыс сералö, но и сiя деньга, спасибо государствоыслö, что оз вунöт пöриссесö. Етша пенсиясö босьтö бабыс, сiйöн, натьтö, оз и куж видзны деньгасö: босьтас да нылыслö сетас, аслыс лекарство небны оз коль, вот и медбöрья руббесö öштiс.

Ульяныс одзын оланыс кыдз пемдiс, локтiс гортö, пуксис клетка-квартираö и пондiс горзыны. Горзö да думайтö.. Думаэс кузьöсь, лёкöсь. Горзiс-керис и одзлань олö. Нылыслö нем эз висьтав, но неделя бöртiтэчис котома, спасибо висьталiс и петiс улицаö да кытöн подöн, кытöн машинаöн иньдöтчис гортлань — аслас Тиминаö.

Гортöдз туйыс кузь, мунiс талун, ашын и мöдлун, вöлись петiс Тимина ыб дорö, сэтöн пуксис кöз увтö, лоис сэтшöм рад, бытьтö мезмис кытiськö сэтшöминiсь, что стыд и висьтасьны. Сьылiсö каёккез, кöкис кöк, кивзiс канюк, лэбалiсö номмез — быдöн олiс топ бабыс понда, сьылiс и бизгис, лэбалiс и чеччалiс. Бабыс мыдзувья эз казяв, кыдз ланьтiс кöзыс увтö, узис пöт и саймис сэк, кöр шондiыс öшалiс кöз йыввезас. Рамыник тöлок малыштiс рожабаннэсö, топ шуис: «Но, баб, гортö ни колö. Тырмас узьны кöзыс увтын». Кокнитжыка ни локтiс гортö, пуксис посöдзö. Ыбöсыс пöдана, керкуыс, кыдз öшöм, кулöм. Посöдзын чеччалö сырчик, гулюэс абу пышшöмöсь посадö, а уксöны карта вылын, öшымöсыс дынö вöрсис петiс кöч да пондiс чеччавны Ульяныслань, шушкöны öшын увтын баблö сыспуэс, топ норасьöны, кыдз олiсö öтнаныс ― гажтöмтчöмась жö хозяйканыстöг.

Шоччисис Ульяныс посöдзаныс, и син вылас йöр бердiсь усис столб, кöда пиньöвтчöм ни да видзчисьö хозяинöс. Столбсö сувтöтлiс эшö Степаныс, кыным год ни чулалiс сэксянь... Абу хозяиныс керкуас... Абу...

— Степан, кытöн тэ? — челядь моз пондiс баитны Ульяныс. — Лок гортö, видзчисьöны тэнö керкуыс и пуэс...

Сизимись ни талун тöждiсис, горзiс и гажöтчис. Пукалöв-керис бабыс посöдзас, чеччис, мунiс сыспуэс дынö, жмитчис чорыт кач бердö и пондiс пильскыны: «Роднöйез тi менам!..»

— Мда-а-а, — сэтöн бöрас кылiс Митрейлöн голосыс. — Тэ кысянь, Ульян?

Повзьöтiс Митрейыс кыз голоснас, пондiс серавны: «Бöр вартiн гортö... Али нылыт няньнас оз бы верд? Ме тэныт эд шуи, мыся, пукав гортын, пукав, а тэ эн кывзы... Да-а-а, некинлö ми эг пондö ковны...»

Ульяныс шы эз сет, топ эз кыв и эз адззы Митрейсö, кайис посöдзаныс, осьтiс ыбöссö и пырис керкуас. Бöрсяняс локтiс кысянькö котыс, пондiс гыжьявны ыбöссö.

И одзлань бабыс пондiс овны вöр шöрын. Гожйисö котыскöт. Гожумнас заптiс тшак да ягöд, и спасибо отирлö, кöдна пондiсö керны вöр кыскалан туй и узьлiсö пöрисьыс ордын. Тöв кежас нiя жö кералiсö пес. Гожумнас уджыс вöлi — не öтiк, дак мöдiк адззисис, а тöвнас мый пондас керны? Бöра эд ковсяс мунны нылыс дынö, бöра Тиминаö öтнас кольччас Митрей дедыс, пондас тöждiсьны да корны аслыс смерть, кöда бытьтö бы орддьö пöрисьсö — талун орддьö, а ашын... Вöлiсö да оз лоö Тиминаын отирыс. Нач кусасö деревняын биэз. И кинöс эта понда видны, мый висьтавны челядьнымлö?