Тöлiся ойö



Вöлi пыд ар. Часто зэрис и улицаэз купайтчисö кизер нятьын, но рытыс вöлi гажа, тöлiся. Тöлiсьыс рытнас мыччисис ыджыт шарöн, бытьтö этö шарсö кинкö лэдзис вöр сайсянь, и сiя воздухас чеччöвтiс боёка, öзтiс ойсö сказочнöй биöн. Быдöс вöлi кыдз сказкаын, быд керкуыс пöртчис сказкаись избушкаö, быд пуыс вежис ассис мыгöрсö, быдöслöн, мый вöлi му вылас, лоис вуджöр и эта вуджöрыс сулалiс да вöтлiсис быд сьöрын кыдз домалöм, вöтлiсис гусьöн, дзебсисьöмöн.

Ме любитi сулавны эта сказка вылö вачкисяна улицаын, любитi видзöтны мича тöлiся небоö, кытöн вöлi кöдзöма унася-уна звездаэз и мукöдпыр эна звездаэс коласöт уйлiс спутник. Спутникыс невна югытжык звездаэсся, уйö жагвыв и öзтö сьöлöмын сэтшöм рад биок, что охота чеччавны да рада ыксыны челядёк моз. Ме чеччала, серала, мыйкö ыкса и кора керкуись ассим айöс да мамöс видзöтны эта бичирок вылö, кöдö небоас лэбтiсö отирыс и кöдö пöриссез адззöны первуись. Пöриссес видзöтöны бичирок вылö и радуйтчöны ме моз жö, ме моз жö кынымкö минута кежö стариккез пöрöны челядёккезö. Мый пöриссес адззывлiсö ме годдэзын?!.

Спутникыс, кыдз морт, кöда видзчисьтöг пантасьö тэкöт и вайö рад да счастье. Етша спутниккес, и не öддьöн уна сэтшöм отирыс, кöдна вайöны пыр счастье, но ежели пантасяс — кувтöдз он вунöт.

Талун, кöр небоас öзйисö медодзза звездаэз, лэбтiсис вöр сайсянь тöлiсьыс, ме сулалi посöдзын. Ме одзö локтыштiс зонкаок. Локтiс сiя казявтöг: учöтик да боёк, стын пöлöн, кыдз шырок.

— Здравствуйте! — шыасис сiя негорöн. — Здравствуйте! — горöтчи ме паныт.

— Дядя Саша, — волнуйтчöмöн шуис зонкаокыс, — дядя Саша, Зоя тётка шогалö да тэнö корис.

— Зоя тёткаыт?— эг вежöрт ме.

— Ага.

Зоночкаыс басниын кылiс тэрмасьöм, но сiя полiс тэрмöтны менö.

Чожа ми зоночкаыскöт шагнялiм Зоя тётка дынö. Туйыс миян мунiс вöрöт и вöрыс вöлi напрочь тöдтöм, Миян юр вевдöрын вöлi не шондi, а тöлiсь, вöлi не лун, а ой. Пöрись пуэз асланыс дзор пырейöн да паськыт уввезнаныс вачкисисö чудо-богатыррез вылö, кöдна лöсьöтчисö кутны миянöс. Мыррез вöлiсö зверь мыгöраöсь. Кытöнкö гажтöма дзуртiс пу.

Ванькаöс жö гажöтiс эта ойыс. Менам ёртö мунiс бытьтö не ойся вöрöт, топ шагнялiс не пу вуджöррез вылöт, а ковёр кузя, кытчö вöлiсö рисуйтöмöсь тöдтöм зверрез. Ванька радуйтчис, видзöтiс зверрезлiсь олансö. Сiя шагнялiс ме одзын, сярзис-баитiс, висьтасис аслас олан йылiсь, велöтчöм йылiсь, аслас ёрттэз йылiсь, пон йылiсь, кöдö сiя быдтöм ачыс и кöдакöт ветлö гожумнас тшакла. Ванька эз вунöт висьтасьны, кытшöм сiя книгаэз лыддьöтöм и мый отсалöм керны мамыслö гортын.

Зонкаокыслöн басниыс вештiс ме гöгöрись ойсö, джендöтiс туйсö.

Чожа ми локтiм деревняö. Зоя тётка быль шогалiс сьöкыта и видзчисис менö.

— Локтiт? — юалiс Зоя тётка.

— Локтiм, — гажöн висьталiс Ванькаыс.

— Вот спасибо, Ванька, вот спасибо. Ась тэныт еныс шуö ыджыта быдмыны, ась тэ лоан пыр чож да некöр он понды шогавны.

— Еныс абу, — шуис Ванькаыс.

— Эм али абу — ми огö тöдö, только ась тэныт сетö здоровье, — баитiс Зоя тётка.

Сiя вöлi пöрись и олiс дзир öтнас.

Ванька сулалiс западня дорын, дивуйтчöмöн видзöтiс Зоя тётка вылö. Туй кузяс зонкаокыс уна баитiс, а öнi эз адззы баснисö. Вдруг керкуас пырис инька да пондiс видчыны:

— Тэ, разбойник! Тэ кытöн ветлöтiн? Ме тэнö кöр ни кошша, ме тэнö ожось...

— Ванька, мамыт...

— Ванька, окояннöй! Тэ кытöн вöлiн?

Ванька пукалiс западня вылын да гусьöн сералыштлiс.

— Марья, тэ зонкасö эн вид... Ме сiйö иньдылi фельдшер дынö, — пöдöмöн висьталiс Зоя тётка

— Фельдшер дынö?! — дивуйтчис Ванькалöн мамыс да радмис. — Öтнас?

— Öтнам, — шуис зонокыс.

— Ой, зон, ой тэ, зон, да кин сьöрья тэ шогмöмыт? — дугдiс видчыны Ванькалöн мамыс.

Ме кери ассим удж и эг казяв, кöр мунiс гортас инькаыс. Сьöлöм вылам вöлi мича, кыдз гажа ойö кöр небоас бичирöн лэбзьö спутник да дыр кежö кольö гажсö.

Гажсö меным колис Ванька, боёк руд синока винерик мыгöра морток.