Эмöсь бур отирыс



1

Вижгис лэчыт февральскöй тöв, гардiс лымсö, везтiс югытсö. Вижгис сiдз, что туй бокись телефон столббез уннялiсö-горзiсö, и бытьтö горзiсö сiйöн, мыля нем эз вермö керны арттöм тöлыскöт. Столббес сайын, нöрысас, лöгöн шушкисö лапья кöззэз, дзик лöсьöтчисö бунтуйтны тöвлö паныт. Уннялiс небо, нёштöма ружтiс лым.

Öнi Алексей шагнялiс шочыник расöт, вöлöна туй кузя. Сы паськыт жаралöм чужöм вылын сылiс лым, пыдын сингöппезiсь котöртiсö шороккес ныр боккезöт. Но эта том мортыс, кöдалöн и кузь пеля шапкаыс, и дженытик фуфайкаыс, вешьян да пимиэз — быдöс тырöм уль лымöн, эз горзы. Сiя öт киас видзис балетка, а мöд кинас кадiсь кадö чышкылiс вазьöм чужöмсö и сё шагнялiс, шагнялiс. Сьöлöм вылас быркайтiс песня, кöда корис лэбтiсьны зонкаöс небоас кымöррес вевдöрö да окыштны гажа шондiсö, сетны поклон вселеннöйыслö сы понда, что эм Му и эта Му вылын олö Морт.

Но вот расыс тшöкамис, туйыс векнямис — дзескöтiс туйсö пемыт вöр, и некытöн лоис чепсасьны ой тöвлö. Öнi позьö паськöтны фуфайка полаэз, лэбтыны шапка пеллез. И туйыс кок увтын чорыт, и лолавны кокнит — оз пöдты лымсора тöлыс.

Алексейлö тöдвылас усис, кыдз тöн рытнас фельдшерскöй пунктö пырис мужик. Сiя вöлi пöрись, неыджыт мыгöра, сьöд тоша, югыт синнэза морт. Мужик здоровайтчис ыбöс колассяняс, кöр эшö эз на ешты вожмöвтны порогсö, бытьтö полiс, что оз кö висьтав ыбöс коласас «Здорово», то вунöтас этö кывсö ыбöс бöрас, а пöрись мортлö эта кывтöг оз туй овны.

Алексей локтiсь мортыслö вештiс стул, тшöктiс пуксьыны.

— Ог, зонö, — откажитчис старикыс. — Пыри тэ дынö отсöт корны: старухаö не öддьöн здоровьенас, может, мыся, сетан лекарство?

— Аслым колас ветлыны.

— Мый ни, зонö, мунан, — пöдтiс Алексейсö старикыс. — Оз эд кув, не первöй неделя шогалö. Дзуртан пуыс пö дыржык тырмö, — шынньöвтiс синнэзнас пöрись мортыс да содтiс: — Сет лекарство да и ладно...

— Ме ачым видзöта, вöлись и сета, мый колö.

— Ачыт тöдан, зонö, — согласитчис старикыс. — Только локтан кыдз миян деревняö, дак юав: кытöн пö Тошаыс олö — висьталасö. Тошаöн менö тöдöны, не нимö сьöртi.

Ойнас видзчисьтöг лэбис пурга. Керкуыс ружтiс-уннялiс угöввезнас да крышанас, вына тöв öшыннэзö чажгис лымöн. То ли эта ылöстöм погоддясянь, то ли радиолöн гора баитöмсянь, Алексей саймис талун одзжык. Мöдiс эшö ланьтöтчыны, но эз ни вермы и чеччис, пасьтасис да петiс öтöрö — мый пö сэтчин керсьö? — и посöдз ыбöссянь люкасис пургакöт: шардöм тöлыс койыштiс лымöн чужöм кузя, сюйис сiйö öмö, синнэзö, воротник сайö; лым ванырöн ветлiс посöдзöт, керку бердöт, омöн улица кузя, ловья кымöрöн пизис посад вевдöрын. «Ежели эм ад, дак то этшöм сiя, натьтö», — думайтiс Алексей и чожжык пырис бöр керкуö. Степановна, Алексейлöн хозяйкаыс, ештöтöма ни гор, кыскалö пöжасьöм нянь пирöггез и баитö:

— Но и погоддя, Алёша! Кодя хозяин этшöмас понсö öтöрас оз лэдз, а тэ лöсьöтчан подöн деревняö. Буржык бы вöлi, эн мун дак.

— Муна, Степановна. Кöсъяси, — шуö Алексей и пондö миссьыны.

— Да мый пöриссеслö лоас? — баитö Степановна. — Ми век олам, век ог кулö... Но мунан дак мун, ен тэкöт, — шоныта шуö Степановна, — только эн кынтiсь.

Степановна — бытшöм сьöлöма старуха, дзормöм юрсиа да чукыра чужöма. Кольöм война вылын сылiсь вийöмась кык зон, хозяиныс гортас ни кулöма, и видзö старуха квартиранттэзöс. Не деньга понда — ачыс весь стряпайтö, миськалö нылö, — а гаж понда» Неважын сы дынö локтiс Алексей, а зон туйö пуктö сiйö Степановна, кыдз кужö, сiдз и отсалö фельдшерлö.

Кöд коста зонка сёйис да лöсьöтiс сьöрас босьтны лекарствоэз, тöв лöньсис моз. Но только петiс керкусис — бöра ылöсмис: бытьтö сiйö и видзчисис, кöр мортыс петас, мед варыш гыжжезöн лякасьны рожабаннэзас, слептыны синнэсö — ась мортыс оз адззы туйсö! Но Алексей топыта тальччис лым вылас, нетшкöвтчис быдсöн телонас одзлань. Сiйöн, что морткöт нем эз вермы керны, пурга пондiс ойзыны-горзыны да бöбись ваксьыны-серавны и вдруг кинитчис электрическöй столббез да керкуэз вылö. И этаись нем эз пет пургалöн — эз вермы не тыртны, не пöрöтны нiйö, — и бöра кутчис йöктыны морт юр вылын, спина вылас, лым столаэз вылын. Сiдз и мунiс пурга Алексейкöт ордчöн деревняö. И кыным унажык бöрö колис туй, сыным перытжыка öшис зонкалöн гажыс. А час бöртi, кыдз петiс гортсяняс, юрсö гудыртiсö ни быдкодь думаэз. Мороссö сотiс öбида ас вылас, что локтiс уджавны эта деревняö, кöр туйис кольччыны городö нето мунны ыджытжык посадö, кытöн эз бы ковсьы ветлöтны деревняись деревняö подöн. Видiс ёрттэсö, кöдна кольччисö уджавны городас и öнi эз кынмö пурга пытшкын, эз ветлöтö подöн умöль туйез вылöт. Но сэтчö кытöнкö ордчöн китшсьыштiс катша и дзугис фельдшерлiсь думаэсö. Лöгасис Алексей ас вылас: то кытшöмкö катшажуг и то абу повзьöм непогодьсис, а сiя вынтöмсялiс, дзик проктöм старуха нето кага. И только думайтiс этадз — сразу сьöлöм вылас гажажык лоис, öшис мыдзöмыс, пондiс кокнитжыка шагняссьыны уброд туй кузяс.

Чожа мыччисисö керкуэз, кöдна пукалiсö неылын вöрыс дорсянь. Алексей нёджжалiс ыджыт пожум увтiсь керкусö, кöдаын, кыдз висьталiс Степановна, олö Тошаыс, но пурга пыр сiя эз тыдав. Ковсис пыравны дорись керкуас юасьны, мед не меряйтны весись кузь улицаэсö.

2

Луншöр гöгöр дугдiс гардны-уннявны пургаыс, петiс мича-мича шондi, и быдöс, мый вöлi му вылын, пондiс гажöна серавны. Алексей öнi мунiс ни бöр гортас и шыннялiс, кыдз шондi петiкö жельнöгчача. Тöдвылас усисö и небыт яя чöскыт налиммез, кöднö, кыдз баитiс старикыс, кыскис васис — да бекöрö, усис тöдвылас, кыдз корисö сiйö быд керкуö. И корисö не шогалiсь дынö, а просто радейтöм могись. Деревня панталiс том фельдшерсö сiдз, кыдз бытьтö

Алексейыс чужис и быдмис татöн. И сэк Алексей вежöртiс, что не весись локтiс уджавны деревняас, не весись пургаыс пыр пессис-кыссис отирыс дынö талун асывнас, и вежöртiс эшö, что отирыслö сiя колö. Вот этасянь öзйис сьöлöм вылас шоныт би, мыйсянь, ежели бы вермис, сiдз и жмитiс бы морос бердас быдöс мирсö.

Туй вылö шебралiсö ассиныс вуджöрсö кöззэз, югьялiс лым вылын шондi югöр, сöстöм воздухын пондiс кöвьясьны чöскыт вöр дук. Быдсöн природаыс дзик онiсь саймис: гажöна шушкö вöр — сьылöмöн моз, кытöнкö пондöтчис тарскöтны кыр, öдззисö жексыны жаккез. Туй вылö пуксис катша, прыг-скок чеччöвтiс размöд Алексей одзын, китшкыштiс-серöмтчис гора голосöн, кöдасянь Алексейлö лоис эшö гажажык.

— Эй, чочком бока катша, кытшöм юöр вайин Валясянь?! — ыкöстiс Алексей кайыслö. — Али он эшö тöд, что сiя менам инь и олö городын? А ноко висьтав!

Катша öвтыштiс бöжнас, быркнитiс кöззэз коласö. Алексей мыйкö дырна видзöтiс катша бöрсянь, сэсся паокжыка кутiс балеткасö да шутнялöмöн иньдöтчис посадлань. Кокнита мунсьö, кöр сьöлöм вылын гажа! Ась и туйыс абу юж, и не шоччисьны мунан, а коккез сiдз и мунöны асьныс, бытьтö оз и кылö мыдзöмсö, оз и джöмдалö.

Вот керöс сайсянь мыччисис виль крышаа школа, öвтыштiс гöрд кумачöн сельсовет вевдöрын флаг, бытьтö Валяыс гöрд чышьянöн макнитiс. Керкуэз весьтын öшалан тшын столббезöн тасалö небосö. И Алексей квартира весьтын тшын столб сулалö: этö Степановна лонтö печка, шонтö квартирантыслiсь лёк тöлöн сайкöтöм жырсö да пуö сёян. Тöдö Алексей, что панталас сiйö старуха мам голосöн: «Но кыдз, зонö? Быдöс я бур?» Этадз Степановна пыр панталö, кöр Алексей ветлас деревняö. Но талун Степановна панталiс Алексейöс кыдзкö виноватöя, полана синнэзöн, эз и юав, кыдз ветлiс Алексей деревняö, эз тэрмöт чöвтчöмöн.

— Этö тэныт, — нюжöтiс Степановна неыджыт гижöт-телеграмма. Алексейлöн сьöлöмыс дрöгнитiс. Сiя чапкис шапкасö стул вылö, паськöтiс гижöтсö, пондiс лыддьöтны. Медодзза жö кывсянь син одзас пемдiс, сьöлöмас вирыс сувтыштiс, рожабаннэс чочкоммисö.

Степановна, кöда пешлiс оланлiсь и бурсö и умöльсö аслас векын, сэк жö казялiс Алексейлiсь шогсö, гусьöнмоз юалiс:

— Мый, Алёша?

— Шогалö, — öшöмöн висьталiс Алексейыс, — öддьöн шогалö...

— Кин?

— Валяыс, иньö, — сьöкыта горöтчис Алексей. — Поди, кулö ни... Степановналöн дзик вöйис кок увтас джоджыс, тöдвылас усис, кыдз сiя зонсö видзчисис война вылiсь гортас, а сы местаö киас сетiсö вот этшöм жö умöль гижöт.

Алексей пуктiс юр вылас шапкасö, кватитiс лекарствоэзöн балетка, кöдöн ветлiс деревняас, и шагньöвтiс ыбöслань.

— Сулав жö, зонö! Сёй да вöлись... — горöтчис бöрсяняс старуха, но мöдыс вöлi öтöрын ни, мунiс лымья туй кузя и нем эз кыв. Да и шондiа луныс пöрис öнi сы син одзын рöма-дзара рытö, пемытсялiс моз, лоис гажтöм-гажтöм. И коккес мылякö вынтöмсялiсö, пондiсö гардчыны. И кыным ёнжыка тэрмасис, сыным коккес мунiсö жагöнжыка. Быдöс мöдiк думаэз ныжмисö, юр вемын вöлi только öтiк: чожажык, чожажык!

Вот и тракт. Эта туй кузя лун и ой, лымсö бöраныс каттьöмöн, мунöны городö машинаэз. Эссянь городöдз шестьдесят километр ылына. Инмас машина — кык час бöртi лоан гортын. Но тракт вылын лöнь, машинаэс абу. Может, тыртiс пургаыс туйсö? Но сiйö шоча тыртлö, и туйыс некöр оз пöднассьывлы. Сiдзкö, машина лоас.

Недыр видзчисис Алексей, но сылö кажитчис, что чулалiс уна кад: эд минутаыс этшöм пораас нюжалö часö, а часыс лоö сутки кузя. Мöдiс ни мунны подöн — оз сулассьы местаас, но кытöнкö керöс увтас ружтыштiс машина. Волненнёсянь Алексей дрöгнитiс, чепöссис вирыс юрас. Только бы пуксьöтiс!

Жагвыв мыччисис зелёнöй кабина вевдöр, сэсся югйöвтiс стекло, вöлись петiсö сьöд колесоэз — крут керöсок вылö кайис МАЗ. Алексей нюжöтiс кисö паныт машиналö, бытьтö мöдiс пыкöтавны сiйö, сувтöтны.

Шофёрыс осьтiс ни кабина ыбöссö, а фельдшер сё сулалiс одзас нюжöтöм кинас. Сылö кажитчис мылякö, что ежели Алексей лэдзас кисö, то шофёрыс жавкнитас ыбöссö, машинаыс сьöвзяс дука газзэзöн сы чужöмö, и кольччас Алексейыс, кыдз мед ни донтöм свет вылас существо, кыдз бордтöм кай, и некин и некöр оз понды тöдны сылiсь сьöкыт горесö, кöда тыртiс сьöлöмсö. Öбидасянь Алексей пöдiс аслас лолöн, неммис.

Шы сеттöг шофёр кыскис кармансис папироса, катлялiс сiйö чуннес коласын, не тэрмасьöмöн сюйыштiс öмас и öзтiс. Лöз тшынок папиросаись нюжалiс ленточкаöн кабина пыр. Тачнитiс километровöй столбын мороз и вöрзьöтiс местасис Алексейсö.

— Тэрмася, — кеймисьöмöн шуис Алексей.

— Пуксьы, — öвтыштiс юрнас шофёрыс. И кöр бокас пуксис пассажирыс, юалiс горöн:

— Кытчö?

— Гортö, городö. Иньö шогалö, — мыдзöм голосöн вашкис Алексейыс.

— Ми чожа, — висьталiс шофёр, и МАЗ сьöкыта, дзик опоённöй вöв, вöрзьöтчис местасис. Шофёр сэсся эз баит. Сылöн вöлi, может, сэтшöм характер учöтсянь, а может, вöлi вежöртана сылö быдöс, мый керсис эта кадö Алексей душаын и, медбы пыдöжык не гарйыны тöдтöм мортлiсь горесö, öнi сё зэлöтiс веськыт кокнас кöрток вылö, кöда машиналö сетiс вын да чож. Лэбзисö паныт туй бокись километровöй да телеграфнöй столббез, öтка кöззэз. Мотор гугйис-сьылiс öткодь негора песня, и Алексейöс пондiс сунöтны.

И сэк, кыдз небоись усис, сувтчис машина одзö инька: чышьянтöм, юрсиыс — рака поз, синнэс тырöмась биöн, тырппесö кöрчитöм повзьöм — вот-вот уськöтчас колесоэс увтö. Машина тангис-сувтiс, Алексейлöн юрыс öвтыштчис одзлань, а шофёрыс козьналiс инькасö крепыт кылöн, ванйöвтiс ыбöссö да рявкнитiс:

— Мый колö?!

Инька мыкталöмöн синваэз сорöн кеймисис:

— Отсалö, дона отир! Отсалö!.. Ой-ой-ой!

— Мый отсавны? — лöгöн юалiс шофёрыс. — Висьтав бытшöмик.

— Нылочка менам кулö... — и инька рожабаннэз вылын кöдзыт биокöн югйöвтiсö сöдз, кыдз шондi увтын лысва, синваэз. Эна синваэс вöлiсö совсем мöдкодьöсь — вежöртанаöсь только фельдшерыслö, кöда тöдiс, мыля нiя котöртöны мамлöн рожабаннэз кузя. Эна синваэс Алексей одзö сувтöтiсö решеннё, кöдö колiс керны öнi жö, öтiк секундаöн: мортлöн, может, öшö меддона тор — кага, и колö сылö отсавны. И вермас öнi отсавны только сiя — Алексейыс, только сылöн киэс вермасö мырддьыны смерть дынiсь кагасö.

— Ме муна, — негорöн висьталiс Алексей, петiс кабинасис да иньдöтчис векнитик туёк кузя деревнялань. Инькаыс, тыдалö, нем эз вежöрт — сё горзiс, видзчисис отсöт шофёрсянь.

— Но, тэ мый? Мортыс эд мунiс, — ласковöя висьталiс шофёрыс инькаыслö, кöда сэк жö ышки-пойки пондiс вöтчыны мортыс сьöрö.

Алексей веськыта ыбöссянь чапкис фуфайка, миссис, локтiс кровать дынö, кытöн ружтiс чочком юрсиа нылочка. Сiя вöлi винерик, блед, квать нето сизим годся. Фельдшер керис быдöс кыдз вöтöн, кыдз заводитöм машина: видзöтiс пульссö, пуктылiс кисö кымöс вылас — пешлiс жарсö. Нылочка лолалiс сьöкыта, ружтöмöн — пöдтiс ыджыт жар, синнэс югьялiсö нёштöм биокöн, но надейтчöмöн видзöтiсö тöдтöм мортыс вылö. Эна гудыртчöм синнэс висьталiсö фельдшерлö, что нылочкалö часöт жö колö отсавны, и этö вермас керны только Алексей — и некин сысся: нылочка вермас овны отсöттöг джын час. Алексей тöдiс, кытшöм дона кагаыс мамлö, кытшöм дона сылö простöй, быдлö учöтсянь тöдса кыв — мам, кöр сiя горалö вöснитик-вöснитик, дзик учöтик силькан, гажа голосокöн. Гаж да счастье — вот мый мамлö кагаыс. Этö тöдiс Алексей аслас уджись, кöр отсавлiс мырддьыны шогöтыс киись кагаэсö.

— Кыдз шуöны? — сибдалöм голосöн юалiс Алексей.

— Валяöн, — висьталiс сыркьялöмöн нылочкалöн мамыс, кыдз бытьтö нылочкаыс эз ни вöв ловья, эз ни вöв сы син одзын. Алексей дрöгнитiс эта нимсянь, жаралiс. «Бöра Валя? Ох, Валя, Валя!..»

— Кыным год?

— Сизим тырас тулыснас. Первöй майся, — сё эшö сыркьялiс мамыс.

— Эн горзы, — öлiс инькасö Алексей. — Не тэнат только этöн шогöтнас шогалö, да веськалöны тай... Врачлö мыччалiт? Лекарствоэз сетлiт?

— Кысь татöн врачыс? И фельдшерыс абу... Куимись ни баняын пывсьöтiс бабыс... Тыдалö, еныслö колö менам кагаö.

Кытчöдз эшö кыссяс отир коласын эта сiсьмöм веританыс енлö да старухаэз дулёвöй лекарстволö? Кыным год ни этшöм наркозыс абу миян странаын, а сылöн парыс сё эшö гуляйтö пöрись юррезын, сорö бур оланiсь сöстöм минутаэз! Тыдалö, не чожа петö юрись сiя, кöдö веккезöн изiсö поппез ой и лун отир син одзын да вердiсö сiйö отирлö нянься унажык.

Алексей терпитiс, нем эз висьтав, а осьтiс балеткасö да кыскис лекарствоэз, шприццез, вата, фонэндоскоп. Киэз Алексейлöн уджалiсö автоматтэз моз, и юрас ровно эз вöв некытшöм дума. Но час бöртi сiйö быдсöн сывьялiс полöм не только эта нылочка понда, но и эшö мöдiк морт понда, кöда вöлi сьöлöмыслö мед ни дона. И ежели эта дона морт йылiсь мыйкö дырна кежö вунöтлiс уджавтöн, то, кöр лоис керны нем, кöр удассисö лекарствоэз и керсисö уколлэз и колiс видзчисьны öнi мöдiк уколлэз керанöдз нёль час, сьöлöмсö Алексейлiсь жмитiс дзик кусакаöн, и синнэзсис чепöссисö синваэз. Алексей эз мыччав ассис синваэсö не нылочкалö, не сы мамлö — бергöтчис öшынлань, курччöвтiс тырппесö зубытöдз и дыр сiдз сулалiс шы сеттöг. Кöр синваэз öшисö, фельдшер лöгасис ас вылас: «Тырмас месянь! Ме тожö морт, не кöртовöй».

Былись некин и некытшöм закон эз видзö Алексейсö эта керкуын: мый колiс да мый вермис — керис, отсалiс шогалiсь нылочкалö, а одзлань мый лоас, сiя оз ло виноватöй. Иньыс, поди, гортын кулö ни, видзчисьöмöн-видзчисьö любимöй ёртсö.

Алексей миссис, пöдналiс балеткасö, пасьтасис, пуктiс юр вылас шапка, эшö öтпыр висьталiс, кытшöм чассэзö да мымдаöн юны лекарствоэз, и бергöтчис мунны, но сэтöн кылiс вöснитик голосок:

— Дядя, эн коль менö...

Алексей дрöгнитiс, сувтiс. Сьöлöмсö чепöльтiс жаль чувство эта учöтик морток дынö, кöда сьöкыта пессис аслас шогöткöт. Фельдшер пуксис лабичö. Сылöн, дзик стыдсянь, öзйис быдсöн чужöмыс, бытьтö сiйö кутiсö гусясикö, а пеляс кинкö шушкис лöгöн, тшöктiс висьтавны: «Кытшöм тэнат эм право кольны нылочкасö? Некытшöм закон, шуан, тэнö оз вермы видзны? Чожа лоас нылочкаыслöн кризис, и сiя вермас кувны. А кыдз сэк совестьтö бурöтан? Совесть — вот тэнат закон!» «Но менам иньö тожö шогалö...» «Сiя городын, и сэтчин сылö отсаласö отир, кöдналö, может, тожö колö гортаныс отсасьны, но нiя шогалiсьсö оз чапкö — совесть сiдз тшöктö...» Этадз пессисö кык чувство, кык дума, кык морт Алексей пытшкын. Öтыс дорйис сiйö, мöдыс видiс. И эстöн, и сэтчин вöлiсö миян, советскöй отир. Кык Валя. Только öтыс велöтiс ни школаын, а мöдыс, натьтö, оз на куж бытшöмика и карандашсö видзны киас. Но нiя кыкнанныс öтдонаöсь Родиналö. А Алексейлö?

«Мый ме кера? Колö мунны!» — решитiс Алексей и чеччис, кыдз код морт, шатласьöмöн, но сэтöн бöра нылочкаыс норöн-норöн корис:

— Дядя, эн мун... — Öтöрын пемытыс дзебис ни югытсö аслас пола увтö, только рытланяс поснит кымöррез öшалiсö дзик вирöсьöсь, гажтöмöсь, нёштöмöсь.

И бöра Алексей пуксис лабич вылö. Вдруг сылö охота лоис куритны, кöть важын ни чапкис этö здоровье тшыкöтан забавасö. Сюйыштiс карманас кисö — папироса пачка туйö шедiс тупöсь. Алексей эз вежöрт, кыдз эта тупöсьыс шедiс карманас, но кыскис тупöсьсö и курччöвтiс. Тупöсьыс солакодь, небыт, патшкис чöскыт пöжалöм нянь дукöн. Сэк тöдвылас усис Алексейлö, что талун Степановна пöжавлiс тупöссез и, натьтö, сiя сюйыштiс карманас этö.

Нылочкалöн мамыс казялiс Алексей киись нянь тороксö, хлоп вачкис боккезас:

— Мый инö ме думайта бöбмöм юрнам! — и котöртiс комö. Алексей шы эз сет, пукалiс лабич вылын и видзöтiс öтöрас. Некин эз тöд, мый думайтiс фельдшерыс, мый пусис сылöн гыркас, юрас. А югытсö сё жмитiс и жмитiс пемыт ойыс. Но вот деревняын öзйис öтiк биок, мöдiк. Кытöнкö жекöстiс гармоння и пондiс питиривайтны басöка-басöка. Керкуö пырис инька, юалiс, оз я пö ков мыйкö отсавны хозяйкаыслö, а то, натьтö пö, Валяыс дынiсь мунны оз позь.

Отир отсасьöны öтамöдныслö.

«Не öтнас жö гортын Валяö, — шуис аскежас Алексей. — Эмöсь бур отирыс, отсаласö...»

1965 г.

ЗВЕЗДА



— А-а-а, б-ö-ö, — мыччалö учитель чуньнас букваэз вылö.

— А-а-а, б-ö-ö, — сьöрсьöн-бöрсьöн полöмöн моз модьöны велöтчиссез.

Изба-читальняын пемыт. Пызан вылын сотчö шырбиок, да порог дорас нем оз тыдав.

Керкуын кöдзыт, кöть и гажöн лонтiсьö печка. Учöт сiя, оз вермы шонтны важ керкусö: уна щеллезöт да ыджыт öшыннэзöт пырö керкуас кöдзытыс, тшакыльöн катыльтчö джодж кузя, кыссьö паськöм увтö.

Быдöнныс пукалöны паськöмöн, кушкыртчöмöн, кыдз курöггез кöдзыт зэр увтын. Етша баитöны, ловнаныс шонтöны киэзнысö. Велöтчиссес не öткодьöсь не только мыгöрнаныс, но и годдэзнаныс: öтiк скамья вылын пукалöны тоша стариккез и гöтыртöм отир; мöдiк скамья вылын, öтамöдныс бердö жмитчöмöн, кывзöны иннез, кöдналöн асланыс ни челядьыс ветлöны школаö.

Пызан вылын кумачовöй пызандöра, стенаö дорöмась сьöд краскаöн краситöм пöввез, кöдна вылö учительыс гижö букваэз. Мöд стенаын гöрд ситец вылö гижöмöсь лозунггез. Букваэс гырисьöсь, неöтыждаöсь, но синнэз вылö усьöны ылiсянь. Нем умöльыс абу, что букваэс не öддьöн басöкöсь. Нiя тыдалöны быдöнлö, и быдöн нiйö вежöртö: «Вашöтам пемыт олансö, велöтчам лыддьöтны да гижны! Быдöнным кутчам велöтчыны!»

Стена вылын öшалöны и мöдiк лозунггез, но эта гижöма мед гырися, öшалö мед шöрас и усьö син вылö медодз, кыдз пыран изба-читальняö.

«Вашöтам пемыт олансö...»

Этö вежöртöны быдöнныс: и роччез, и комиэз. Этö нельки кужöны лыддьöтны нiя, кöдна öтiк буква оз тöдö. Этö лозунгсö тöдö том и пöрись, эта лозунгыс букварь туйö, кöда сьöртiвелöтöны букваэз, велöтчöны овны. Вот сiя кытшöм лозунгыс ― отирлöн гаж, надея.

«Вашöтам пемыт олансö...»

Этö лозунгсö любитö висьтавны и том велöтiсь, неыджыт, кок вылас кокнит морт. Сiя шагнялö отир одзын, пызан сайын, пöлялыштлö-шонтö ки долоннесö, гажöн видзöтö аслас велöтчиссез вылö. А синнэзас орсö характерыс: смев и чорыт, гажа и визыв — ковсяс кö, то вермас вуджны кöть кытшöм нять, кöть кытшöм ва, кöть кытшöм би.

Велöтiсь гардыштö чуннезнас винерик уссэсö, шынньöвтö синнэзнас да юалö:

— Мый гажтöмöсь? Али велöтчаныс нырыштö?

— Тэныт, Матвей Кузьмич, вот гажа, — серöтö кокнит басниöн хитрöйкодь Васька Паша. — Тэныт вот гажа, а меным вот и абу... Ачым ог тöд, мыля меным гажтöм. Ноко, тэ висьтав, Кузьмич, мыля меным абу гажа? Раз тэ менö велöтан — тэ тöдан, натьтö, быдöс.

Велöтчиссезлöн шы абу. Пукалöны сё сiдз жö кушкыртчöмöн, гажтöма, бытьтö шогалöны, только мужикпöлöсыс юррезнысö лэбтöны, кыдз дзодзоггез, кöдна кылiсö тöдтöм шы, хитрöя пондöны видзöтны велöтiсь вылö да видзчисьны, мый сiя висьталас Васька Пашалö, кужас я висьтавны асся унаöн пöрисьжык мортлö.

Матвей Кузьмич виноватöя шыннялö, гардышавлö уссö, думайтö. Сiдз оз тöд, мый колö висьтавны Васька Пашалö, но тöдö, что öнiсылö оз ков джöмдыны — колö висьтавны сiдз, мед не обидитны Васька Пашасö и мед сiя лоис гажа. Васька Паша видзчисьö ответсö, видзчисьö хитрöя шыннялöмöн, шысеттöг, и, кöр велöтiсь сылö нем оз висьтав, сiя баитö:

— Он тöд, тыдалö, Кузьмич, мыля меным гажтöм.

— Ог тöд, — виноватöя шуö велöтiсь.

— Ме сiдз и тöдi, Кузьмич, — баитö Васька Паша. — И тöдны он понды сэтчöдз, кытчöдз миян нуждаыс тэ бердö оз кышась... Вот, шуам, тэнат гортат кинкö эм?

— Кыдз инö?

— Мамыт?

— Мамö.

— Мамыт. А менам вот мамыт абу, гырниччез керö сiя могилёвскöй губернияын, но менам эм старуха, кöда понда менам эстöн сьöлöмö сiсьмö-косьмö. Старухаö узьö метöг гор вылас: öт бокыс сылöн шоналö, а мöдыс сайкалö. Бур сылö, думайтан, сэтчин? Тэ, Кузьмич, этö эшö он вежöрт, сiдз кыдз тэ мортыс гöтыртöм, бобыль. Тэныт кöть татöн, кöть гортын — öткодь.

Велöтчиссез пондöны серавны, мыйсянь учительлöн невна гöрдöтöны пеллес, и керкуын сэк жö лоö шонытжык. Матвей Кузьмич торскöтö карандашöн пызан кузя. Велöтчиссез вежöртöны, что нiя öддьöнöв баитöны, вунöтiсö, кытöн нiя, и басни сразу орö. Лоö сэтшöм лöнь, что кылö, кыдз öтöрын кышöтö усян лым. Кузьмич этасянь дзик öшыштiс да пондiс юасьны, мыля талун эз локтö быдöнныс.

— Полöны кольны иннезнысö, — сералö Васька Паша.

— А иннезныс то нiйö оз полö кольны, — баитöны инькаэз.

— Сёравно эд весь кадсö öштам, — кылö вöснитик голос порог дорсянь. — Вексö тай велöтчытöг овлöмась да...

Абу локтöмась талун только морт-мöд: öтiклöн йöвсялöма мöс, мöдiклö некытчö кольны кага, куимöтöс абу лэдзöма мужикыс.

Сьöкыт велöтчыны, ежели тэнат гортат челядь и колö нiйö вердны-пасьтöтны, ежели тэныт колö уджавны öт пемытсянь мöд пемытöдз, кöр уджавтöн мыдзан кок вылiсь усьтöдз.

Быдöс этö вежöртö том велöтiсь. Сiя вежöртö, кытшöм сьöкыт отирлö пукавны рытöн книга бердын, но сiя вежöртö, что этатöг одзлань овны оз туй — сiдз висьталiс партия, сэтшöм удж сувтöтiс сылö комсомол. Да, комсомол сiйö тшöктiс лоны велöтiсьöн, кöть Матвей велалiс лыддьöтны да гижны вöлись армияын.

— Ёрттэз! — пондöтö Матвей. — Ёрттэз, миянлö колö велöтчыны, миянлö велöтчытöг одзлань овны оз туй... Миянöс одзжык нарошно эз велöтö, мед кокнитжык вöлiбöбöтны синтöм отирсö. ÖнiСовет власть быд народлiсь осьтö синнэсö, туйдö виль оланö, велöтö грамотаö. Медбы строитны буржык олансö, колö велöтчыны. Только грамотнöй отир кужасö строитны счастливöй олансö. А тiшуат: немлö! Немлö — эта не миян лозунг. Миян — то одзаным гижöм.

Матвей баитö, мый думайтö, баитö сьöлöмсяняс, пыма, баитö, кыдз кужö.

Изба-читальняын Матвей басни бöрсянь дыркодь шы абу, только кылö, кыдз лолалöны отирыс, кыдз чалöтö-лонтiсьö печка, и öтöрын тачöтö лёк мороз. Недыр мыйись сьöкыта ловзисьö пöрись морт и висьталö:

— Мыйлö бы меным грамотасö? Мöдöр югытас, поди, сiдз примитасö.

— Мöдöр югытас тожö пö революция, — горöтчö паныт стариклö Васька Паша, но öнiнекин оз серав, тыдалö, думайтöны Матвей кыввез вылын.

— Но, ёрттэз, баитыштiм — и тырмас! Только ме висьтала эшö: велöтчыны миянлö колас, кыдз бы эз вöв сьöкыт. Но а öнiмунам одзлань, — и Матвей гижö виль буква доска вылö.

Деревняын эта годö отирыс олiсö велöтчöмöн. Велöтчисö сяко, кин кыдз вермис: öтiккезöс велöтiсö гортаныс челядьныс, мöдiккез ветлiсö изба-читальняö. И пондöтчис эта делоыс и кокнита и сьöкыта: öтiккез асьныс локтiсö, мöдiккезöс колiс вайöтны сельсовет отсöтöн. Часто инькаэз пышшывлiсö баняэзö куделясьны да печкыны, шогалiсö шогöттöг. Велöтчисö сьöкыта, но велöтчисö. Велöтчисö сiйöн, что этатöг эз туй строитны виль олансö. Велöтчöмыс öнiвöлiудж, вöлiолан. И кыдз удж йылiсь, кыдз олан йылiсь, отирыс баитiсö часто. Баитiсö и гортаныс, и пукаланiнын, и помечын. Баитiсö том и пöрись — быдöс деревня.

* * *

Кыдз только велöтчиссез пондiсö баитны горттэзныс йылiсь, кыдз только Васька Паша гардыштiс ассис шуткасö, Öринлiсь сьöлöмсö вундыштiс пуртöн. Зубытсяняс сьöлöмыс пондiс пессьыны, корсьыны гортö. Сiя нетшкöвтчис мороссис, лöсьöтчис чеччöвтны öмöттяс и эз сет зника том инькалö. Сэтчö жö кöдзытыс, кöдакöт некыдз эз вермы пессьыны учöтик печкаокыс, сэк жö пырис важ пась увтас, сайкöтiс мороссö, кикоксö. Этö сысянь, что син одзас сувтiс мужикыс, кöда видзчисис Öринöс гортас, кöда лёк, сёяна чужöмöн кольлалiс иньсö изба-читальняö. Öрин тöдiс, что эта велöтчöмсянь сылö бурыс оз ло: вермас лоны калекаöн, вермас кольччыны тшыгйöн, пасьтöг, вермас öштыны быдöс. Тöдiс, что сiя талун вермас узьны пон моз западня вылын и мужикыс вöрзьöтчöмсянь, кöда пондас узьны небыт ольпасьын, вирыс пондас сувтны жилаэзас, быдöс телоыс пондас видзчисьны мыйкö страшнöйö. Вермас лоны сiдз, что Öринöс мужикыс панталас ыбöс коласын, кватитас баличаэзöт, пондас кыскавны джодж кузя, тальны, вартлыны кытчö шедас, вартлыны сэтчöдз, кытчöдз оз быр иньыслöн садьыс, кытчöдз видзсяс моросас лолыс.

Öринлöн дрöжитö сьöлöмыс эта олöмсянь, мöжжитö-висьö быдöс телоыс, дзик умöль погоддя одзын.

Кин отсалас Öринлö? Кин сы оланын виноватыс? Öрин уна думайтö, думайтö и некыдз оз вермы вежöртны, мыля сылöн судьбаыс не отир кодь. Инька думайтö, что этадз овны сылö шуис ен и воштiсьны öнiсылö некытчö. Мукöдпыр Öрин винитö аймамсö, кöдна сетiсö сiйö Авдей сайö.

Тöдiс Öриныс Авдейöс учöтсянь, тöдiс, кытшöм сiя вöлiмывкыднас, аслас бöб вынöн, ош мыгöрöн. Мужиклö колiс бергöтны уджсö вöв мымда, но Авдей уджавны эз любит, вöлiстрась дыш, асныра да лёк и часто эмсис и немсис лэдзлывлiс кулаккесö тышкасьны. Öрин некöр эз думайт мунны Авдей сайö, вöтöн эз вöтась, что Авдей лоас кöркö сылöн жöникöн.

А вот лоис сiдз. Гленитчис Авдейлö Öриныс. Авдейыс кöть и вöлiбогатöй пиян, эз адззы аслыс парасö богатствоыс сьöртi. Сылö и козин эз ков — вöлiбы инька басöк да здоровöй. Корасис

Авдей Öринöс, аймамыс и сетiсö нывнысö, эз откажитö. Лоис Öриныс Авдейлöн иньöн.

Кöдзыт вöлiводны нелюбöй жöник бокö, но воштiсьны некытчö, ежели тэнö благословитiсö аймамыт и венчайтiс вичкуын поп.

Эз любит Öриныс мужиксö. Эта понда Авдей вештiсис Öринлö кулаккезнас. Вартлывлiс часто, невна ли не быд недельын. Вартлывлiс страшнöй вартлöмöн — садь бырöттöдз. Авдейлö этасянь вöвлiгажажык, радмывлiс сьöлöмыс. Кöр Авдей эз вартлывлы иньсö, ветлöтiс гажтöм, кыдз öшöм. Сiдз Öрин, неважын эшö чатыра да кыз мороса нывка, мужикыскöт овтöн öтiк годö кусiс, пöрисьмис, сотчис, кыдз масiсь, сылöн нывкася оланыс.

Отирыс адззисö Öринлiсь мужика олансö, жалейтiсö, но отсавны эз вермö, а веськыта висьтавны — эз кутчисьö. Некинлöн юрыс эз вись йöз инь понда, некин юрсö эз сюйышт йöз гозъя коласö. А Авдейлö эта только и колiс. Вот и олiс — миссис синванас, пöтiс кулаккезöн. Только медбöрья годдэзас ни кыдзкö лоис кокнитжык: Öринлöн быдмис пиянок, кöда дорйис мымдакö мамсö, а Авдей, тыдалö, эз лысьт вöрзьöтны зонсö — род нюжöтiсьсö.

Кöр быдöс отирöс пондiсö велöтны, Авдей бöра серöмтчис:

— Ежели инь лоас грамотнöй, кин лоас керкуас хозяиныс?

Авдей умöля вежöртiс олансö, эз верит Совет властьлö. Сiя сё видзчисис, что лоас кад, кöр сiя бöра сизим мöс да куим работник пондас видзны. Только эз лок сiя кадыс, а эшö ылöжык мунiс деревнясис. То тай и ыджыттэс понда школа осьтöмась. Уналö ни баитлiс Авдей, медбы мужиккес эз лэдзö иннезнысö велöтчыны, да мыйкö сё нем оз пет.

Не велöтчыны бы Öринлö, кольччыны бы сылö пемыт мортöн, ежели бы не комсомол, не Матвей. Авдей иньсö эз думайт велöтны. И рытöн öтöрö эз лэдзлы петны. А комсомол мырддис сы киись вожжиэсö. Öринлö аслыс не öддьöн охота вöлiвелöтчыны: сьöкыт оланыс, сьöкыт уджыс эз гажöтö. Но томыник инькаэс да нывкаэс прокод ошшасьлiсö, что нiя кужöны ни лыддьöтны, ошшасьлiсö, мый нылö висьтасьö Матвей, кытшöм кывлытöм олан лоас пö одзлань. Эта бöрсянь Öринлö тожö охота вöлiмунны рытöн инькаэз дынö, отирыс коласö, кывзыны Матвейлiсь висьтасьöм, велöтны букваэз, но вот сьöлöмтöм жöникыс! Мун, боккет лудöны дак, ордлыэт дзоньöсь дак.

Шаялiс эта думаыс юрас, сьöлöмыс кошшис мыйкö вильö, кыдз и нывка коста. Смевмис кыдзкö, шыасис мужикыслö. Авдей пишнитiс нырнас, и эз баит иньыскöт быдса неделя, бытьтö виньдiс. Öрин видзчисис, что мужикыс вот-вот вартлас, но Авдей иньсö эз вартлы, а олiс кыдз берлогаын.

Öтпыр Öринöс корисö сельсоветö, юасисö, мыля сiя оз велöтчы. Баитiсö, öтiк кылöн эз öбидитö, эз дойдö, и этасянь Öринлöн душаас вöрзис. Первуись сэк Öринкöт баитiсö кыдз морткöт. А баитiсö начальниккез — бур отир.

Öрин висьтасис быдöс, мый сылöн вöлiсьöлöм вылас, и сэтшöм кокнит лоис сылö, бытьтö чöвтiс ас вывсис дзескыт да нятьöсь паськöм, кöда зэлöтiс мороссö и пöдтiс.

Эта бöрсянь сельсоветö корлiсö Авдейöс да висьталiсö веськыта, что ежели сiя пондас поперегавны Совет властьлiсь туйсö, сыкöт пондасö баитны мöднёж. Авдей вежöртiс. Сiя эз на вунöт, мый лоис сы айкöт, кöр старик велавлiс лыйлыны коммунисттэз öшыннэзö.

И Öрин пондiс велöтчыны. Велалiс сiя чожа, кокнита. Абу вермöм пыркöтны юр веммесö мужикыс, кöть и неетша ни сизьдiс юрсö. Но велöтчис и полiс, что мужикыс этадз сiйö оз коль — вештiсяс велöтчöмыс понда.

Матвей быд рыт, кöр дугдывлiс велöтны отирöс, кутчисьлiс лыддьöтны книгаэз. Медодз сiя лыддьöтлiс Ленин йылiсь, революция йылiсь. Уна невежöртана сэтöн вöлi, и том морт часто котрасьлiс посадö, пöрись учитель дынö, кöда пантасьлöма Ленинкöт. Матвей сысянь и тöдiс, кыдз олiс да уджалiс Лениныс, кыдз пессис отир счастье понда, кынымись пукалiс эта понда тюрьмаын. Быдöс этö Матвей висьталiс аслас соседдэзлö, висьталiс, кытшöм оланыс лоас одзлань: гöрны пондас машина, кöдзны — тожö, и вундыны пондас машина.

Эта оланыс вачкисис сказка вылö, кöдаö сьöкыт вöлiверитны, но и эз туй не веритны, сiдз кыдз мужиккез, кöдна вöлiсö ни армияын да йöз коласын, висьтасисö, что машинаэз эмöсь ни городдэзын, а этасянь былись вермас лоны, что и гöрны вöлöн оз пондö.

Матвей эз чуж велöтiсьöн, нельки и школаын эз велöтчы. Сiя некöр эз думайт, что кöркö пондас велöтны отирöс. Матвей чужис деревняын, кыдз Öриныс, кыдз Васька Паша, и öнöдз олö деревняын. Но сiйö радейтö да уважайтö быдöс деревня. А уважайтö сiйöн, что морт умнöй — уна книга ни лыддьöтöма, уна тöдö. И эшö сы понда, мыля том морт почитайтö пöрись отирöс.

Ежели бы не революция, не Совет властьыс — лоны бы Матвейлö грамотатöг, ниртны-уджавны бы Авдейлö нето мöдiк шоныта олiсьлö. Но Матвейлöн вöлöма счастьеыс: сiйö велöтiс Совет власть не только лыддьöны да гижны, но и овны. Эта понда том морт эз кольччы долгын народыс одзын. Сiя старайтчис, пуктiс быдöс ассис вынсö да кужöмсö, мед керны ассис уджсö бура, мед тыртны задача, кöдö сувтöтiсö сы одзын Советтэз.

Но Матвей досповна эз вöв эшö учительöн. Сiя вöлiтолько солдатöн, кöда строитiс виль олан. Сiя эшö вöлiтом, сылö мукöдпыр уна вöлiневежöртана. Матвей, кöдö лыддисö умнöй мортöн, ачыс эшö эз тöд, мыля овлö тöв да гожум, мыйсянь вирдалö да зэрö. «Быдöс енсянь», — шувлiсö пöрись отир. «Не, не енсянь», — висьтавлiс Матвей. «А мыйсянь?» — эз лöньсьывлö пöриссез. «Мöдпыр висьтала», — кöсйисис велöтiсь и сёр рытöн бöра котöртлiс посадö — учитель дынö.

Том велöтiсьлöн унажыкыс петлiс бура-бытшöма. Радуйтчис Матвей, что вот быдыс, кин велöтчис, пондiс кужны лыддьöтны книга. Кöть и мыкталöмöн, кöть öддьöн жагöна, но лыддьöтлiс.

Армияын красноармеец Федосов быдлаын вöлiмедодзын: и грамотаö велöтчыны, и служба нуöтны. Сiя бура кужис котрасьны, уявны, чеччавны, а лыйсьыны сы моз ротаас некин эз вермы. Эта понда кыдз чемпионлö сылö командир козьналiс неыджыт звезда.

Вайис этö звездасö Матвей гортас. И кöр кывсис, что Матвей вайöма гортас басöк командирскöй козин, ыджыт и учöт вовлiсö сы ордö видзöтны бикыв кодь гöрд, дзик öгралан шом, звездасö.

Вот как раз этö басöк торсö Матвей Кузьмич кыдзкö вайис изба-читальняö, лэбтiс вывлань, медбы тыдалiс сiя быдöнныслö, и висьталiс:

— Кин медбура пондас лыддьöтны, кин правильнöя пондас гижны, ме сылö козьнала этö дона козинсö.

— А мый бы сiйöн, Кузьмич, пондас керны мортыс, кöдалö дöнзяс сiя? — юалiс медодз Васька Паша. — Али перна туйö новйыны сiйö?

— Награда сiя лоас, бур велöтчöм понда подарок, — шуис Матвей. — Внучеккетлö кöркö висьталан, кыдз сiя тэныт дöнзис.

— Но, сiдз-ту позьö, — висьталiс Васька Паша.

* * *

Матвей казялiс, что велöтчиссез коласын велалö медбура Авдейлöн иньыс — эта кöсыник, сьöд сина инькаыс, кöда мыйиськö полiс пыр, сё олiс берегитчöмöн, но бура пасьтасьöм-кöмасьöм киподöн.

Öрин велалiс кокнита, бытьтö кöркö велöтлöм ни букваэсö и öнiтолько повторяйтö. Тöв джыныс эз чулав, а инька бура ни лыддьöтiс, велалiс гижны ассис ним да фамиллё, пондiс тöдны деньга лыд.

— Вот эта морт! — дивуйтчисö инькаэс Öрин вылын. — И кыдз только, Öринушка, тэнат юрыт уджалö! Сетöм мамыт счастьесö, да еныс абу шуöм сiйöн овнытö. Не Авдейыткöт бы тэныт öтлаасьны.

— Лоны тэныт öнiсеклетарöн, Öринка, али эшö ыджытжык начальникöн, а жöниктö стряпка местö видзны, — ошкис инькасö Васька Паша да сьöкыта ловзисис: тöдiс, что Öрин кувтöдз лоас Авдей кипод увтын.

Öрин нем оз шу паныт, только гöрдöтыштас да юрсö лэдзас. Эта инькаыс былись мыйöнкö мöдкодьжык мöддэс сьöртi. Мöдкодьжык не только аслас характерöн, но и быдсöн мывкыднас, природанас. Мый сiя кылiс нето адззылiс, то эз ни вунöтчывлы.

Матвей пондiс видзöтны Öрин вылö шоныта, ласковöя. Сылö гленитчис Öринлöн характерыс, умыс. И ежели Öрин эз вовлы рытöн велöтчыны, Матвейлö вöлiгажтöмкодь, рытыс кыссис жагöна, велöтсис сэк кыдзкö дышажык.

Öтпыр Матвей ошкыштiс отир син одзын ассис мывкыда велöтчисьсö, и сылöн синнэсис сöдзис синва. Только не сэтшöм, кытшöм сöдзлiс одзжык зубыт обидасянь, умöль олансянь, а чöскыт, долыт, ласковöй кывсянь шогмöм синва. Этö синвасö том инька эз сайöвт, эз дзеб, эз чышкы. Синваыс котöртiс чужöм кузяс, а Öрин шыннялiс и видзöтiс одзас, бытьтö казялiс стена вывсис мыйкö öддьöн басöкö, вöвлытöмö.

И лоис сiдз, что Матвей звездасö сетiс Öринлö. Быдöс отир дырни, велöтчиссез дырни сетiс инькалö киись киö.

— Этö звездасö ме козьнала часöт медбур велöтчисьлö, — висьталiс сэк Матвей Кузьмич негорöн, но торжественнöя. — Эттшöм звездасö новйöны Краснöй Армиялöн солдаттэз, сэтшöм звезда миян знамя вылын. Сiя пемдöтö враглiсь син, а миянлiсь гажöтö олан... Сы понда ми кисьтам вир... Ме козьнала этö звездасö тожö солдатлö, виль олан понда пессисьлö — медбура велöтчисьлö.

Кынымкö рыт Öрин сё чöлiс и чöлiс, но чужöм вылас вöлiгаж, синнэс сiдз и шыннялiсö. Кажитчис Матвейлö, что чулалас эта гажыс, и инька бöра горбыльтчас, бöра пондас полöмöн ветлöтны да баитны.

Но Öринлöн сьöлöмыс отир коласын шоналiс, тöдчöмöн радмис, кокнямис да вынсялiс. Мортыс пондiс кывны асьсö мортöн, одзза оланыс эз ни вöтлiсь сы сьöрын отир коласöт, а кольччывлiс гортас Авдейкöт. Эшö невна — и одзза оланыс кольччас кытчöкö кок увтас, дугдас пöдтыны том сьöлöмсö, а Öрин бöра лоас том, вына да гажа, кыдз и нывканас.

Отир коласын Öринлö вöлiкокнит, долыт. Изба-читальняись велöтчöм бöрсянь сiйö гортас эз кыскы. Гортыс сылö öнiвачкисис ош гу вылö, кытöн вöлiкöдзыт да пемыт. Охота велöтчыны асылöдз, охота сулавны öтöрын мороз вылын, но не пырны гортö. Нельки эз вöв гажтöм зонокыстöг, кöда пыр рада, киоккесö паськöтöмöн, пантавлiс мамсö ыбöс дорын. Да и мыйись гажтöмтчыны, зоночка пöт, олö шонытын. Рыт и асыв мамыс орсö сыкöт, а ойнас ордчöн узьтöтлö.

Олiс морт, олiс, и некин эз тöд, кыдз и кытöн сiя олiс, мый сылö колiс, мый сылöн юрас да сьöлöм вылас. И вот колiс только мортыслiсь невночка ворзьöтны душасö, колiс только невна шонтышны сьöлöмсö ласков кылöн — и мортыс вежсис, öтiк лунöн быдмыштiс. Сэксянь, кöр сылö Матвейыс сетiс звездасö бура велöтчöм понда, Öрин, тыдалö, вежöртiс öддьöн важнöй тор: сiя — морт, и не умöльжык мöдiкся.

Учöттэз Öринкöт пантасьтöн здоровайтчисö и видзöтлiсö вылас, кыдз бытьтö адззисö сiйö первуись. Отирыс коласын лэбалiс ни шутка, что Öриныс чожа лоас учительшаöн.

Кöть и Öринöс сьöлöмыс гортас эз кыскы, да воштiсьны вöлiнекытчö. Не тэрмасьöмöн сiя мунлiс пемыт оградаöт, кытчö и кайлö оз позь пырны, пыравлiс гортас. Пантавлiс сiйö зоныс рада, тельган басниöн, и тожö шонтiс мамыслiсь сьöлöмсö, содтiс надея одзза олан кежö.

Только мужикыс вöлiэшö лöгжык, лёкжыка мурзис:

— Мый, пöтiн велöтчöмнат? Чöскыт, тыдалö, мужиккес коласын рыттэсö чулöтны...

Öрин нем эз шувлы паныт. Брякнитчас-водас зонокыс бокö, жмитас сiйö морос бердас и ньылалö сола синваэсö, кытчöдз лунся мыдзöмыс оз пöднав синнэсö.

Кузь тöвся ойез чулалiсö Öрин понда öддьöн сьöкыта, гажтöма, умöль вöттэзöн.

Асывсянь пондöтчывлiс бöра сьöкыт удж, кöда томувьяс жö пöрисьтö инькаöс. Колiс тэрмасьны пуны-пöжавны, уджавны пода гöгöр, миськасьны-песласьны. Бергалас, бергалас сiдз лунтыр кок йылас — сэтчö и пемдас. Чапкас öмас сола няньторок, вежас коккезiсь кын нинкöммез и бöра котöртö изба-читальняö.

Велöтчыны Öрин öнiмунiс эшö раджыка, эз думайт кольччыны гортас, и некытшöм вын эз вермы падтыны öнiсiйö велöтчанiсь. Эз бы мун велöтчыны, дак, натьтö, совестьыс досповна йирис бы сьöлöмсö. Мукöдпыр стрась нырыштiс он нето шог, но Öрин вермывлiс этö онсö и мунiс изба-читальняö.

Сьöлöмыс кыскис отирыс коласö, кöднакöт вöлiгажа да кокнит; кыскис учительыс дынö, кöда берсясö висьтасис. Сiя висьтасис уна, сымда висьтасис, мымда Васька Паша сказкаэз оз тöд. Велöтчöм сiйö кыскис мöдкодь оланö, кытшöмын Öриныс эз на ов, но кöда йылiсь öнiчасто думайтiс ас кежас, думайтiс гусьöн, думайтiс луннас и ойнас. И мый бы эз вöв öнi, а Öрин сё ни бы ветлiс велöтчыны — сылöн сьöлöмыс эз ни вермы овны этатöг. Грамотаыс осьтiс сылiсь синнэсö, кöть и не чожа, не кокнита, но мортсö кыскис одззася олансис.

Öрин видзис звездасö пыдын, дзебис аслас венчайтчан сарафан коласö. Дзебис и полiс сы вылö видзöтны, кöть и прокод сiя вöлiтöдвылас, прокод вöлiсин одзас — югьялiс мича югöрöн. Полiс ассис, полiс жöниксис. Тöдiс, что ежели адззылас звездасö мужикыс — бурсö видзчисьны нем.

Да, Öринлöн звездаыс эз öшлы тöдвывсис. Сiя пыр вöлiсьöлöм вылас: шонтiс и полöтiс. Звездаыс сетiс Öринлö вын, радуйтiс, но и полöтiс. Полöтiс и радуйтiс. Но унажык радуйтiс. «Козьнала ме сiйö зонöлö, кöр сiя быдмас да пондас велöтчыны. Ежели пондас велöтчыны умöля, то понда ошшасьны сылö. Ась видзöтö, кытшöм вöлiсылöн кöркö мамыс, — думайтiс Öриныс. — А öнiнекинлö ог мыччав, некинлö ог сет».

Берегитiс звездасö инькаыт ёна, берегитiс кыдз меддона козин. Но кыдз бы эз берегит мужикыс шогья, только Авдей сёравно пондiс тöдны звездаыс йылiсь. Не весь, натьтö, баитсьö эд: умöльсö оз туй видзны замок саяс, а бурсö подавно он видз. Бурыс чожа борддэз быдтö. Бурсö некин оз видз гусьöн, öтамöдкöт янсöтö, умöльсис — пыксьö.

Авдей кыдзкö пырис зятьыс ордö, сьöд Мирон ордö. Сiя любитiс юыштны аскур, но аслас некöр эз вöвлы, и часто вовлiс зятьыс ордö — сылöн пыр эм.

— Кыдз инö овлат? — юалiс Авдейлiсь зятьыс.

— Няньыс тай эм, — шуис мöдыс, — тшыгьявны ог тшыгьялö. А сэсся сяко жö овлö.

— Ме тэнö пыр ас кежам вида и сякöйсö думайта, — пондöтiс невежöртана басни Мирон.

Авдей шы эз сет, бергöтiс синнэсö ыбöс вылö.

— Мый инö чöлан? Иньыт эз на пышшы?

— Кинлö сiя, öнджаыс, колас! — сьöвзис Авдей джоджас.

— Слепöй кутю тэ! Кытшöм тэ мужик, ежели иньтö сюррезöттяс видзан, а кинкö чилькöтö! — чепöссис комсянь, кыдз кычанок конураись, Авдейлöн сойыс да пондiс лявзыны воныс одзын. — Отирыс баитöны, а тэ синнэзнат кваркышалан, бытьтö он и кыв!

— Но ась, — бобгыштiс ныр увтас Авдей, а аслас сьöлöмыс мороссис вотьыштiс, джоджыс кок увтсис пондiс ыскöвтны. Да и душаыс пондiс пизьны, тырис вынöн, лöгöн, кöда пöдтiс ловсö, пемдöтiс синнэз. — Абу эд жаль...

— Абу жаль?! — горöтiс Авдейлöн сойыс. — Абу пö жаль! Етша эшö вешьянтöммес сералiсö миян вывтi! Айöлiсь ловсö кыскисö мороссис да öнiмиян вывтiсералöны! Кык юр, дак öтiкыс бы и ор! Ох, ох! Пыкö иньыт Матвеюшкоыскöт угöввез, а тэ сё думайтан, что велöтчö грамотаö. Вот, ужо, лоас грамотнöй! Велöтас комсомолечыс иньтö, Авдеюшко, видзчись. Стыд да срам, кöть öтöрö эн пет! Быдöн öнiсинö пондас бытшкыны, ник и някыс пондас чуньнас мыччавны. Кытшöмкö звезда тай Матвейыс сетöма иньытлö. Думайтан, весь этö?

Авдейлöн сойыс видiс, кыдз кужис, Öринöс, кисьтiс нятьсö Совет власть вылö, отирыс вылö, мыля сылiсь айсö накажитiсö кыдз врагöс.

Авдей чепöссис сойыс ордсянь синнэзнас вирдалöмöн и лёк думаэзöн, кöднасянь варкйис-пизис моросас ыджыт лöг. Эта лöгыс тыртiс лёк вынöн сьöлöмсö, тшöктiс йирны пиннез, пуджны йöрнöс соссэз. Думайтiс öтiкö: вештыны Öринлö, вештыны кöть кыдз — вартны, тальны, масьтыны, вийны — керны сiдз, медбы иньыс эз вöв син одзас.

Гортас пырис зверься зверь, но иньсö керкусис эз адззы. Синнэзнас бергöтiс быд пельöссö, щельсö, бытьтö иньыс, кыдз гут, вермис дзебсисьны кытшöмкö щельö. Джодж шöрын орсiс зонокыс. Сiя лэбтiс айыс вылö синнэсö — и повзьöмсянь сылöн öмыс пиньöвтчис, синнэс гудыртчисö. Мöдiс горöтны зоночкаыс, но эз лысьт.

— Кытöн мамыт? — пишнитiс Авдей.

— Мама-а-а! — вöлись горöтiс зоночкаыс, и синваэс сылöн пондiсö вотявны йöрнöс вылас.

— Тэ эшö! — кватитiс Авдей зонсö йöрнöсöттяс да шентiс джодж пöлöнняс пуовöй кровать увтö. Зоночкаыс чирнитiс и лöнис: сiя тöдiс ни, что сылö оз ков горзыны, оз ков уна баитны, корны сёян, а колö овны полöмöн.

Авдей брынгис кокнас джек, пöрöтiс джодж шöрö. Пызан вылiсь брякнитiс сов доз, сöтiс пызанпöв кузя кулакнас сiдз, что пызанпöлыс чеччöвтiс местасис, ачыс пуксис лабичö, пондiс видзчисьны хозяйкасö.

Öрин чилькöтiс мöс и, кöр пырис керкуас да казялiс мужиксö, син одзас пемдыштiс, сьöлöмыс öдззис чепсасьны моросас. Вежöртiс сiя, что Авдейыс лöг и лöсьöтчö сiйö вартлыны, и дзик кынмис ыбöс одзас.

Инькалöн вöлiэшö öтiк надея: чеччöвтны бöр öтöрас, пöднавны ыбöссö бöрсяняс. Кольны гортас быдöс, мый эм, и пышшыны, кытчö коккес нуöтасö, пышшыны, медбы сэсся некöр не пантасьны аслас мужиккöт, не пырны аслас гортö. Но Öринöс мыйкö падтiс этаись, мыйкö сiйö видзис гортас, мыйкö невежöртана сулöтiс сiйö порог дорас, мылякö коккес эз кыскö, эз бергöтчö öтöрланяс, бытьтö вöлiлякасьöмась джодж бердас.

Авдей гичыртiс пиннесö, сувтöтiс иньыс вылö синнэсö и пиннес пыр тэчöмöн горöтчис:

— Полан жö, чуча! Тöдан, видно, что панталан ассит! Жагвыв чеччис лабич вылiсь, няпыртiс кулаккесö да иньдöтчис иньыс дынö. Сибöтчис жагвыв, сёйис иньсö синнэзнас. Тöдiс, что добычаыс сы киын, и некин сiйö оз вермы мырддьыны сылiсь.

— Тэ мый, Авдей! — немöй голосöн горöтiс Öриныс и лэбтiс юр вевдöрас киэсö.

— Тэ тöдан — мый! Ме тэнчит сьöлöмтö нетшкöвта да пöжала би вылын! — нёштöма горöтiс Авдей и быд вынсис вачкис нöш кулакнас иньыслö юр кузяс. Öринлöн пеллезас чиньöвтiс, дзик чарöтiс гым кымöр, синнэзсис чеччалiсö бичиррез. Сiя жагвыв усис пидзöс вылас, подойничаыс пöрис, йöлыс котöртiс джодж кузя пызанлань.

Кровать увтын чирнитiс зоныс, но Авдей сiйö эз кыв часöт. Сiя брынгис иньыслö. Öрин павгисис гатш порог одзас, негорöн ойкнитiс.

— Тэ эшö лысьтан ойзыны, скотина! — рявöстiс Авдей да öдззис брынöтны иньсö. Этö сiя керис тэрмасьöмöн, вынöн, ружтöмöн, кыдз бытьтö уджалiс сьöкыт, но кодя удж, кöдö лöсьöтчис уджавны важын ни и сё эз ешты. Иньыс чöлiс, и сьöкыт вöлiтöдны, зубыт ли сылö али сiя нем эз кыв.

Кöр Öринлöн телоыс быдсöн небзис и Авдей кок увтын пондiс вештасьны, кыдз небыт мешöк пизьöн, мустöм морт садясис, повзьыштiс да дугдiс брынöтны. Сьöкыта лолалöмöн сiя дыркодь сулалiс иньыс весьтын да чышкис пымалöм кымöссö. Синнэс вöлiсö бöбöсь, ачыс вачкисис пороз вылö, кöда уськöтчылiс вийтöдз люкавны ассис врагсö и öнiшоччисис, медбы, ковсяс кö, вились уськöтчыны аслас враг вылö. Öрин чöлiс, и Авдей кыссис порог дорсянь пызан дорöдз, пуксис лабич вылö. Лöгыс жагвыв öшис, сы местö локтiс полöтан дума: «Эз я чезнит?» Колiс чеччыны да локны иньыс дынö, кывзыны, лолалö ли сiя, но Авдей асьсö эз вермы лэбтыны лабич вывсис. Пукалiс сiя пызан сайын кыдз виноватöй пон, кöда горшасис и видзчисис аслыс боккезас горшасьöмыс понда. Но Авдейкöт вöлiвештiсьны некинлö — сiя керкуас медвына: ош мыгöра да зверь мывкыда.

Чулалiс джын час етш. Авдей радуйтчис, что велöтiс иньсö, и полiс, что эта сiдз оз чулав, ежели кулiс иньыс.

А Öрин эз кув, вына вöлöма сылöн сьöлöмыс. Том сьöлöм пессис виль олан понда, и Авдейлö сьöкыт вöлiсувтöтны сiйö кулаккезнас да коккезнас. Öрин вöрзьöтчис, ойнитiс зубытсяняс и зубытсяняс жö саймис. Осьтiс синнэсö, адззис мужиксö — и вежöртiс быдöс, мый сыкöт лоис.

— Сёйин менö? — винерик голосöн юалiс сiя мужикыслiсь. — Тэ бы напрочь ни... Ачымöс ог понды вермыны верднытö... Ох! Калека ме öнi.

Висьталiс этадз Öрин, и сiдз сылö лоис охота овны. Тöдвылас усис быдöс оланыс. Сылöн некыт эз ло зубыт, только сьöлöмыс пондiс доймыны-висьны олан понда, кöда эз вöв олан кодь, кöда вачкисис умöлик вöт вылö. Öринлö охота лоис чеччыны да мунны отир коласö, кытöн сылö вöлiкокнитжык, кытöн сiйö вежöртiсö и бурмöтiсö сылiсь сьöлöмсö.

Öрин жагвыв лэбтiс джоджись ассис жугдöм-пидзралöм телосö. Бергалiс юрыс, гудрасис сьöлöмыс. Вöлiсьöкыт; сэтшöм сьöкыт, что, кажитчис, оз вермы чеччыны аслас местаись, а ежели чеччас, то оз вермы керны öтiк оськöв — сувтас сьöлöмыс. Но сiя вермис лэбтыны асьсö джоджсис. Чеччис, осьтiс ыбöссö и, кыдз кольмöм, жагвыв кыссис öтöрö, петiс ворота сайö.

Лöнь. Кöдзыт. Лым вылын рытся заряыс вачкисис гöрд шебрас вылö. Керку трубаэзiсь кыссисö винерик тшыноккез пемдан небоас. Öтöрын некин эз вöв. Быдöн олiс аслас позын. Некин некинöс öтöрö эз вашöт, некин некинкöт эз дзескам аслас гортын.

Öринлöн коккес джöмдiсö, усис лым вылас. Кöдзыт руыс пöдтiс сьöлöмсö, и Öрин чеччыны эз вермы. Сэк сiя ыкöстiс быд вынсис:

— Отир, отсалö-ö-ö!

Голосыс вöлiвинерик, и некинлö сiя эз кыв.

Авдей дзарнитiс öшынö. Син вылас усис иньыс, кöда гаг моз кыссис улица шöрö. Вились гуркнитiс мустöм сьöлöмыс иньыс вылö. «Ах, тэ эшö öтöрö, тэ эшö, эшö... норасьны ме вылö!» Гичыртiс пиннесö, пасьтöг, шапкатöг чепöссис öтöрö. Посöдзись кватитiс ниновöй гез, уськöтчис вöв дынö. Сермöталiс вöвсö, петкöтiс öтöрö.

Быдöс керис кыдз вöтын, нем эз кыв, не эз адззы. Син одзас вöлiтолько иньыс — врагся враг.

Локтiс иньыс дынö, забгис кулакнас моросас. Öрин пöрис. Сэк Авдей зэлыта кöрталiс гезнас иньсö коскöттяс, гужöпöн кыскис вöлыс дынö. Вöлыс пырснитiс, пиньöлöн видзöтыштiс Öриныс вылö, пондiс дрöжитны — лöсьöтчис ускокöн гöнитны, но вöлiдомöта посöдз бердын.

— Но-о-о, скотина, сулав! — рявкнитiс вöлыс вылö Авдей и тэрмасьöмöн пондiс домавны вöлыс бöж бердö иньсö гезнас. Öрин унньöвтiс горзыны, пондiс кеймисьны мужикыслö, но Авдей шытöг керис ассис уджсö, сэсся пуксис вöв вылö, вартiс коккезнас вöв кынöмö. Вöлыс рöктiс улица кузя, сы бöж бердын котöртiс Öриныс да горзiс деревнятыр. Отир петiсö керкуэзiсь, дзарьясисö посöдз понсянь. Нiя эз вежöртö, мый лоис деревняын: может, кинкö кулiс и горзöны сы понда.

Отирыс этатшöмсö асланыс векын эз на адззывлö. Нiя только кывлiсö, что кöркö пö этадз жö öтiк мужик позоритöм иньсö сы понда, что мöдыс чеччалöм йöз мужиккез дынö. Öнiбöра сiя жö? Или не сiя? Шушкöтчöны инькаэз, асланыс мужиккез вылö видзöттöн:

— Эта мый лоö, а?

— Морт или скотина Öриныс? О господи! Кыз голос бобгö:

— Эд уннялö весись, не эта эшö лоас. Эд висьтасьлiсö отирыс, что пö лоас оланыс кыдз подалöн: некин некинöс оз понды тöдны... Ачыс Авдейыс тöдö, мый сылö керны — сылöн иньыс. Йöз гозъя коласö юртö эн сюй.

Томжыккес гичыралiсö пиннезнысö:

— Да эм жö миян кытшöмкö власть али абу?

— Шуöны: эн сюй юртö...

* * *

Матвей только локтiс уджалансянь, вежис вывсö да лöсьöтчис мунны изба-читальняö. Талун сiя босьтас сьöрас интереснöй книга, виль газетаэз. Радейтöны кывзыны отирыс. А Öриныс, Öриныс!..

Мамыс пырис öтöрсянь, висьталiс:

— Авдей пö иньсö вöв бöж бердö кöрталöма.

— Мый, мый? — эз вежöрт Матвейыс. — Тэ былись этö? Сьöлöмыс Матвейлöн öзйис, пондiс сотчыны гура биöн.

Пасьтöг чеччöвтiс сiя öтöрö, пондiс котöртны улица кузя. Улицаыс вöлiне кузь, и Матвей чожа лоис Авдей дын. Ачыс эз казяв, кыдз быд вынсис нетшкöвтiс лёк зверьöс вöв вывсис, сöтiс кулакнас сылö кымöс кузяс да октiс ош мыгöрсö кок вывсис и пондiс пöрччавны Öрин бердiсь гезсö. Матвей öнiнем ни эз адззы и эз кыв, сылöн вöлiöтiк дума: мынöтны Öринöс вöлыс бöж бердiсь — и сiйöн эз казяв, кыдз чеччис лым вылiсь Авдейыс, эз адззыв, кыдз сiя пиньöла öмöн турьялöмöн пырис посöдзö, кöда весьтын куйлiс часöт. Чожа мыйись сiя петiс посöдзсис черöн, не тэрмасьöмöн локтiс Матвей дынö и сöтiс голяас.

Усис Матвей кöдзыт лым вылö, дзирыт вир, том вир чижнитiс-резыштiс сы гöгöр, мичöтiс чочком лымсö. Кусiс визыв сьöлöм, а синнэс Матвейлöн сё эшö вöлiсö осьтаöсь, видзöтiсö дивуйтчöмöн небоас.

Ойнитiс деревняыс, повзис. Повзис не сымда смертьсянь, мымда сысянь, что эта смертьыс видзчисьтöм — йöз морт понда юрсö сетiс йöз морт.

Ойнитiс деревня и уськöтчис морт вийись дынö.

Лун чулалiс. Деревня весьтын öзйис медодзза звезда. Сiя югьялiс Матвей весьтын, дзик öтка масiсь покойник морос вылын.

1968