Гажыс уджын



Уджалi ме клубын. Вöлi том. Клубын уджалiсьыслö колö уна кужны керны: гармошкаöн орсны, лозунггез гижны, рисуйтны, лекцияэз лыддьöтны... Деревняын сэтшöм мортсö шоча панталан. И ме сэтшöмöн эг вöв.

Усьö тöдвылö öтiк страда. Машинаэс сэк вöлiсö етша, унажык уджсö киöн бергöтiсö. Но йöзыс вöлi уна: томмес горт гöгöр поздiсисö, городас туйсö эз кошшö. Может, сэтöн и менам лозунггезö отсалiсö. Нiя быд угöлын: «Дзимлялам сюсö дас лунöн!», «Быдöс вын урожай дзимлялöм вылö!». Быд лозунг бöрын горöтан знак, сiйö быдöн адззö и бура вежöртö.

Локтiс районiсь уполномоченнöй, баитö:

— Быдöс бур, ёрт завклуб, только мыйкö невна оз тырмы. Кыдзкö бы гажöтны отирсö...

Колö пö сувтöтны концерт. Да, колö бы. А кытiсь ме артисттэсö вая? Эмöсь том отирыс, любитöны сьывны, да кöр нiя пондасö клубас вовлыны, коли ой и лун гуна вылын. Эм миян и артистка — гöгинь-баб. Восьмöй десяток сылö, а уд сур, кышалас юр вылас кокошник и öдззöтас песня да быдöс олансö сьылас. Да öтiк мортнас эд сцена вылас он кай.

Уполномоченнöйыс лёк, пола сiйö не кывзыны. Звонитi районö, мыся, артисттэзöс отирыс корöны. И рытнас быдса машина артисттэс локтiсö. Нывкаэс öтiк мöдiкся басöкжык — любо видзöтны.

Ыджыт гижöт вылö рисуйтi объявленнё, öшöтi клуб дынö. Локтiс рыт, отирыс удж вывсянь локтöны. Сёйыштасö, вежасö паськöм — и клубас тыр народ лоас. Но чулалiс унакодь кад, а клубын — шатьöн вачкöм. Челядьыс котрасьöны деревняöт — чукöртöны бы йöзсö, а локтiс гöгинь-баб да эшö Опонь дед бедь вылын кыссис. Артисттэс места оз адззö, лöсьöтчöны летны менö торрез вылö. Видзöта: котöртö Елька. Нывкаыс — би: уджнас, кывнас и кузь чикисьнас сьöвталас.

— Иван! Культура! — ыксö нывкаыс. — Кытшöм городскöй чачаэз татчö вайöтiн да пестунничайтан? Чапкы нiйö, лок гуна вылö, тэтöг миян уджыс оз аркмы!

Эх, Елька! Кыдз сiя горöтас, ме сiдз и öша, виньда. А сэтöн эшö чужöй нывкаэс!

— Мун, Елька, эн гудырт олансö, — кеймися ме. — Менö тшöктiсö концерт мыччавны.

— Кытöн отирыс? Кинлö мыччалан? — лöгöн юалöны артисттэс. Кысянькö локтiс бригадир да сiдз жö пондiс кыскыны гуна вылö, медбы ашын кежö лöсьöтны места виль сю понда.

Гажми, что бригадирыс корö уджавны. Бергöтчи да котöртi, коли артисттэсö клубас — ась, мыся, уполномоченнöйыс ныкöт олö. Нывкаэс гуна вылас радöсь, что локтi.

Öдззим уджавны — бус гардчö, фонаррезын биыс кыдз гуын тыдалö. Жольöтö-тöлöтö машина — кык морт бергöтöны сiйö. Кин сю кисьтлö, кин мешöккез тыртö, кин телега грузитö. Да эшö песняэз горалöны, бытьтö абу и мыдзöмась нывкаэс, кöть луннас тожö эз шоччисьö, кыдз ме.

Час-мöд уджалiм, видзöта: артисттэс гуна вылас кыссьöны. Думайта: ойнас лöсьöтчöны мыччавны концертсö. А нiя мича сарафаннэзнаныс и кутчисö уджавны миянкöт öтлаын. Не бусiсь, не сьöкытiсь эз повзьö.

Асылöдз сюыс тöлöтны эз тырмы. Быдöс дзимлялiм гуна долонь вывсис и гажöн, песняэзöн иньдöтчим гортö.

Елька гардчö ме гöгöр, минута кежö оз мун дынсим.

— Вот тэныт и концерт! — шуö сiя. — А тэ... Тэ бура керин, что кайин тöлöтчыны.

Нывкаыт талун мыйкö баитö гажöнжыка мекöт, дзик дорйö, медбы районсис нывкаэс эз гусялö менö. А ме ог и лысьт баитны сыкöт, только меным тожö öддьöн гажа: эттшöм бура уджалiм!