- •Федосеев
- •Сьöд цветтэз
- •Повессез
- •Счастье ас киын
- •Виль гортын
- •Повны — не овны
- •Кöиннэз
- •Кусöм биэз
- •Сiсьмöм вужжез
- •Сьöлöмö туй
- •Висьттэз
- •Праздник панытö
- •Невунöтан луннэз
- •Эмöсь бур отирыс
- •Зэра кад бöрын овлö мич
- •Фермаын
- •Поперёк обычайлö
- •Вот эд кыдз овлö
- •Пантиль, ен, чёрт да смерть
- •Колö унажык
- •Кизертöм краска
- •Оз кут некытшöм висян
- •Пиньшедталiсь
- •Лекарствоыс оз ков
- •Учöтик басняэз
- •Öнi уджалöны
- •Справка
- •Неполiсь симчик
- •Колö кужны
- •Тöлiся ойö
- •Гажыс уджын
- •Шойнаок дорын
- •Чарöм вылöт
- •Булибарда
- •Кыдз гöтрасис да иньыскöт олiс паша
- •Кыдз судитiсö ручöс
- •Демократия йылiсь
- •Проллöн инь
- •Челядьлö
- •Куим ёрт вöрын
- •Некодя морт
- •Гриша, вася да бес пилика
- •Горш чери
- •Мед ни донаыс — пиян
- •Бедаыс öтлаöтö
- •Кыксувда гоб
- •Тшакьявтöн
- •Чёрт тöдö
- •Уна тöдiссез
- •Сырчик да йы
- •Столовöйын
- •Кортöм гöсь
- •Мыля кöиныс лёк
- •Тöвся цветтэз
- •Кыдз ми вашöтiм тараканнэз
- •Статтяэз
- •Баитам веськыта
- •Ягöдавтöн
- •Ас йывсим
- •Пытшкöс:
Колö кужны
Менам эм вöралан пон. Морт кодь жö ылöса. Адззö не только кайсö, но и чериавны отсасьö. Ог понды висьтасьны, кыдз сiя меным чериавны отсалö — од веритö. Бöра шуат: кульпизьсö изö. А вöралöм йылiсь висьтышта невна.
Öтпыр арнас ме лöсьöтчи дозмöрöс вийны. Одз асывнас чапки пишаль пельпон сайö — и вöрö. — Сьöдпель, Сьöдпель! — кытсала понöс. Шы абу, дзик ваö вöйис. Ошшаси поннам, а сiя... Сiдз и мунi — понтöг.
Мымда ме ветлöтi вöрöттяс — ог тöд: некин оз меряйт вöралiсьыслiсь туйсö. Лунтыр ветлöтi и эг мыдз. Этö сысянь, что арся вöрыс — рай ме понда. Ме и няньсö ог сёй, и юансö ог ю, а муна вöрö — и пöт. Эх, кин оз любит природасö, счастьетöм сiя мортыс...
Ветлöтi, ветлöтi — некинöс эг адззы. И вдруг: брррр! — лэбтiсис одзам сьöд дозмöр. Баран, а не кай — ыджыт! Кыдз только эта ыждаыс вермö му бердсис калькавны!
Сьöлöм пондiс тёпкöтны. Вот понöс бы этчö! Пондiс бы сiя увтны, а ме бы сы коста гусьöника кысси дозмöрыс дынöдз. Эх! Вот кытöн сiя несчастьеыс вöралiсьыслöн!
А дозмöрыс дзебсисис пожумö и гажöн горалыштлö. Эх, Сьöдпель, Сьöдпель! Голяат бы петля да кеписсез вылö кульны!
И пырис юрам öтiк штука. Ноко, мыся, пондыла. Шапкаöс юр вывсим босьтi, юрсиöс лэдзи синнэз вылö. Лои не морт не зверь — дозмöрыс оз вежöрт.
— Тэкö-тэк, — шуö дозмöрыс. А ме сувтi пидзöсчаннез вылö и сылö паныт:
— Гав-гав!
— Тэкö-тэк!
— Гав-гав!
— Тэк-тэк, — гогыньтiс юрнас кайыс, дзик ошкыштiс менö.
— Гав-гав, гав-гав! — увтыштi ме и кысси одзлань. Ме кысся, а кайиньöй видзöтö ме вылö и оз вежöрт, кин сы дынö сибöтчö.
А дозмöр сё ошкö менö:
— Тэк-тэк, тэк! А ме и старайтча:
— Гав-гав-гав! Гавв!
Джын час дырна, может, увтi — нельки голосö бырис, а сё жö уськöтi кайсö. Локта гортö — пеллезöс адзза. Пантасьö пишальöн соседö — тожö ветлöм вöравны.
— Вайин? — дивуйтчö сiя, кайсö видзöтiкö.
— Вайи, — шынняла ме.
— А ме эг, — сьöкыта ловзисьöмöн шуö сiя, — кöть и тэнат поныт да и аслам вöлi.
— Колö кужны, — висьталi ме и содтi оськöввез.
ДРУЖБА
Меным некытöн сэсся абу долытжык оланыс, кыдз деревняын. Эстöн быдöс ме сьöртi: и шондiыс, и кокнит тöлокыс, и чочком вурун вылö вачкисяна кымöррез лöз и лöз небоын, и читкыля зелёной луд улицаэзын. Кöр ме чечча асывнас, шондi югöррез менö окыштöны керкуын. Ме радöн шынньöвта шондiыслö, кыдз басöк нывкалö, а кöр шагньöвта посöдзö, менö панталö донася-дона ёртö, кöдö ме пондi радейтны сэксянь, кыдз бертi городiсь. Эта виль ёртö не нывка, не шондi и некытшöм не морт — сiя сьöдкодь, свиттялан мороса да басöк бöжока учöтик каёк — чикись. Быд асыв сiя пукалö посöдз весьтiсь электрическöй провод вылын и, кöр ме сайма да пета öтöрö, чикисьыс вдруг шовкнитас бордоккезнас, öддьöн радöн чивöстас да и пондöтас ассис песнясö.
Эта песняыс не простöй, а кытшöмкö особеннöй: сiя сэтшöм, кöдасянь меным охота лоö не только сьывны, но и керны мыйкö бурö, ыджытö, вöвлытöмö. Чикисьлöн абу гора сьылöмыс, мукöдыс оз и кылö сiйö и шуöны, что сiя оз сьыв. А ме кыла. Сiя сьылö быдсöн аслас неыджыт вывтырöн, и меным охота пуксьыны сыкöт ордчöн провод вылас, окыштны каёксö и лэбзьыны кымöррез увтö, а то и эшö вылöжык. Но менам борддэзö абуöсь, и ме кывза, кывза... Чикись недыр кежö дугдö сьывны, паськöтыштö борддэсö и усьö провод вывсис, усьö шумтöг менам юр дынöдз, сэсся керыштö русö борддэзнас, кокнита визьгö-лэбзьö вывланьö и сё дзульзьö-сьылö асмознас.
Сiдз чикисьыс сьывтöн кытшöвтас размöд керку гöгöрöт и бöр пуксяс провод вылö. Ме жö эта коста сулала тувдöм масiсьöн — пола вöрзьыны местасим, только сьöлöмö быдсöн нетшкöвтчö вевдöрö, лэбзьö бы каёкыс сьöрö. А чикисьыс сьылö гажа песня олан йылiсь...
Луннас ме гортын абу, чикисьыс тожö оз пукав провод вылас: сiя лэбалö деревня весьтöт, куталö гуттэзöс да мошкаэзöс и орöттöг сьылö.
А рытнас, кöр ме локта гортö уджалансянь, каёкыс бöра панталö менö гаж песняöн, кöдасянь öшö менам мыдзöмö и дугдöжык симавны кынöмö.
Сiдз чикисьыс сьылö меным рыт и асыв, сьылö сэк, кöр меын öгралö гаж и кöр менö нырыштö шог. И сэтшöм кадас, кöр меным öддьöн ни недолыт, сылöн сьылöмыс ме понда бур лекарство...
Öтiк рытö, кöр ме пукалi посöдзын и кывзi чикисьыслiсь басöк песнясö, вдруг керку сайсянь вирдыштiс кайварыш, и чикисьлöн орис сöстöм, гажа песняыс.
Сьöлöмöс дзикмалiс, пöдтiс ыджыт лöг. Ме чепöсси керкуö, кватитi пишаль, но варышыс эз ни вöв. Моросöс нырыштiс, дзик сьöкыт из, вöвлытöм шог, и ме садьтöг лэдзчиси поспу вылас.
Дыр я ме сiдз пукалi — ог тöд, но вдруг юр вевдöрам öдззис горавны тöдса песня. Ме дзар кери вывланьö и казялi чикисьöс. Менö сывьялiс кыкпöвса гаж сысянь, что менам эм виль ёрт, эм сылöн песня, и что оланыс вермö варышшесö.