Зэра кад бöрын овлö мич



1

Кöр Федя велöтчис öкмысöт классын и вöлiсылö семнадцать, вермывлiс öт кинас лэбтыны юр вевдöрö кык пуд сьöкыта гири, гожумбыт ытшкисьны колхознöй видззез вылын. Том морт дружитiс ни нывкакöт и рыттэзöн кольлавлiс сiйö клубсянь гортöдз. Но сы сьöлöмын эз на сотчы любитöм. Унажыксö Федя эна годдэзö мечтайтiс. Мечтайтiс любитны, мыйкö керны öддьöн бурö отир понда и лöсьöтчис лоны лётчикöн — чож кай моз нетшкöвтчыны лöз небоö. Мечтаэз кыдз мечтаэз, кытшöмöсь вермасö лоны странаись миян быд том мортлöн.

Вöлiсö Федялöн кык ёрт: öтыс — Дима, öтiк годся и öтiк лунся Федякöт, только мыгöрыс ыджытжык; мöдыс — Петька, томжык, но стрась аскоддя характера: пиннез саяс кывсö эз видз, вöлiмывкыда и хитрöйкодь зонка. Петька вöлiбы не Петька, ежели бы сiя кытчöкö сибдiс басниын нето уджын. Сiя вачкисис тулысся визыв ва вылö: кужис кокнита из увтö пырны и адззис туйсö из увтсис петны. А Дима, медбы мыйкö керны, куимпöв думайтас да вöлись кутчас. Нельки оз горöтчы думайттöг. Но а Федя ны коласын вöлiкыдз ньöр майöггез коласын. И характерыс сылöн веськыт, и кылыс абу кузь. Эна не öткодь морттэз олiсö дзик воннэз. Ежели гожумöн кöдакö ытшкисис колхознöй видззез вылын — мöддэс сулалiсö сiя жö покосын. И сёйисö сэтчин öтiк бекöрись, юисö ырöш öтiк туисiсь. Отирыс сералiсö, что ёрттэз пондасö видзны, натьтö, öтiк инь.

Любитiсö ёрттэз орсны и футболöн. Сiя, кыдз и удж колхознöй ыббез да видззез вылын, вынсьöтiс том отирöс.

Сiдз чулалiс эшö öтiк гожум — футболöн, уджöн гажа видззез вылын, мича мечтаэзöн. Чулалiс гожум, гусьöн сибöтчис ар. Сiя вöлiылын эшö — не син одзын, но лолалiс ни му чужöмö: джендамисö луннэз, содiсö ойез, пондiсö вежöтны сю ыббез.

Том ёрттэзлö эта гожумыс сетiс мыйкö вильö, мöдкодьö, кöда öнöдз эз вöв некинлöн: лоис дзескыткодь деревняын, ковсис кытчöкö мунны, мыйкö адззывны, бытьтö гожумыс лöсьöтчис нöбöтны мыйкö донаö ны сьöлöммезiсь.

И эта кадö Дима висьталiс ёрттэслö:

— Миянö пыралiс юны ыджыт старик. Кошшö уджалiссезöс. Экспедицияö.

Вежöртiсö Димаöс. Шы эз сетö, только видзöтiсö öтамöдныс вылö.

— Сöтам? Гуляйтыштам вöрас, а? — öзтiс Дима ёрттэслiсь сьöлöммезнысö.

— А быль эд! — горöтiс Петька. — Мый öтiк местас старухаэз моз пукавны! Может, и деньга сöдзас невна.

А Федя только и горöтчис:

— Мунны дак мунны. Давай лöсьöтчыны

2

Васькина — неыджыт, но гажа деревня. Сы одзын шондiюгöр вылын чежмасьö юок, а гöгöр сук вöррез — купайтчö деревня гажын да сöстöм воздухын.

Эстöн и сулалiс экспедиция.

Зонкаэзöс панталiс очкиа, невна горбыля, ыджыт мыгöра морт. Том годдэзö, тыдалö, вöлöм сiя вына, басöк да боёк, но öнi... Юрсиыс сылöн чежмасис пужöн, бытьтö вöрыс козьналöм мортыслö кöззэслiсь серебрянöй нитшсö. Юрсянь коккезöдз эта мортыс вöлiмöдкодь, нежели эта деревняись отир. И не сiйöн, что сы вылын вöлiсолдатскöй гимнастёрка, коккезас — сапоггез, öмас — трубка. Вачкисис, что природаыс мортсö лöсйöма крепыт, пожумовöй мырись, кöда оз пов не ваись, не морозiсь, кöдалö вöрыс — горт.

Тöдтöм мортыс панталiс ёрттэсö не юасьöмöн, а висьтасьöмöн:

— Пенсия вылö бы, челядь, да мый керан! Сьöлöмö кыскö вöрö. Дзескыт городас. Ог вермы видзчисьны, кöр локтас гожумыс. — И рада юалiс: — А тiйö мый?

— Уджавны.

— Сiдз. Ме тiян годдэзын вöрсис эг и петавлы, кыдз лось. — И гажöн, том голосöн пондiс баитны: — Вöрыс, челядь, богатство, здоровье! Медодзза мортыс чужис вöрын, сiйö вöрыс пасьтöтiс, шонтiс и быдтiс! А öнiмукöдыс вöрсис полöны. Лешакись, ошись полöны. Да мыйсис только оз полö! Но тiйö, челядь, эд полö вöрсис — сiя миян мöдiгорт. Любитö сiйö, и сетас вöрыс тiянлö здоровье, вын, счастье.

Пöрись мортыс тэрмасис баснинас, бытьтö полiс, что сiйö оз пондö кывзыны зонкаэс, повзясö да пышшасö сы дынiсь. Но вот дугдiс тшынöтны трубкаыс, и басниыс джöмдiс.

Начальник не тэрмасьöмöн бöра тэчис трубкаас небытик, нитш кодь табак, öзтiс трубкасö и пöльыштiс чöскыт дука тшынöн, шуис:

— Поди, куритат?

— Огö, — öтдруг откажитчисö зонкаэз.

— Оз и ков... Вайö документтэзнытö.

Куимнанныс сетiсö öткодь документ — чужан свидетельство. Пöрись мортыс босьтiс свидетельствоэз и дыркодь лыддьöтiс, сэсся тiльыштiс очкиэсö, лэбтiс юрсö да гажöн юалiс:

— Öтiк фамиллёöн гижсят?

— Öтiкöн.

— Семнадцатьöн?

— Восемнадцатöйöн.

— Сiдз, — начальник нютшкыштiс трубкасö, кыдз кагаок резиновöй няня. — А тöдат я сэтшöм инструмент — чер? Может, эдö на киэзаныт видзлö?

Петька чеччöвтiс аслас местаись и — ыбöсö. Быдöнныс бар вайисö — мый лоис? А сiя сiдз жö видзчисьтöг нетшкöвтчис бöр керкуас, пыртiс зорок да чер и пондiс сизьдыны-керавны зорсö. Чеччалiсö поснитик чаггез, резсисö начальникыс пызан вылöдз. Öтiк уджалiс, куима чöлiсö. А куим минута бöртiкерасисьыс сувтöтiс начальникыс одзö пуовöй акань... Петька вöлiПетька — сiя вермис петны из увтiсь.

3

Весь олiсö быдса лун: видзчисисö кытшöмкö Светаöс, кöда уджалiс пыд вöрын и вовлывлiс деревняö только няньла. Пётр Петрович, начальникыс, висьталiс: «Света — техник, менам веськыт ки, и сытöг некытшöм удж оз аркмы». И сiя, что пыд вöрын уджалiс нывка, зонкаэзлö лоис диво. Кыдз сiя сэтчин олö лунiсь лунö, кöр нельки деревняын нерадсявтöдз сёйöны номмез? Да номмес разь только? Нывка ны син одзын вöлiто геройöн, то мортöн, кöда мöдiк уджöн юрсö оз вермы вердны.

Рытъявнас ни, кöр старушка Прокопика ордын лöсьöтiсö ольпась да вугыррез и лэдзчисö чериавны, локтiс Света. Сiя мыччисис пруд сайсянь, бадь кусттэз колассянь, сибöтчис зонкаэслань нетэрмасяна, но кокнит походкаöн. Мыйкö вöлiэта мортлöн öткодь кайкöт, вöр дудiкöт. Может, сысянь, что пасьтасьöм лöзкодь комбинезонö и вевттьöм юрсö лöз чышьянокöн? Мыгöрыс абу ыджыт, ачыс винерик, жаритчöм чужöма. Нывка шынньöвтiс гажöн, бытьтö куим ёртсö адззö не первуись. И эта шынньöлыс да мыдзöм, лöз синнэс сэк жö вöрзьöтiсö челядьлiсь сьöлöмнысö.

— Туристтэз? — юалiс Света.

— Куим мушкетёр, — висьталiс Дима.

— Дон-Кихот, Санчо да Панчо, — содтiс Петька. — Мунöны кошшыны счастье и эшö öтiк-мöдiкö.

Света горöн серöмтчис. Натьтö, сысянь, что Петька сорлалiс Санчо Пансаöс. И шуис сё сiдз жö шыннялöмöн:

— А Дон-Жуаныс абу тiян коласын? — и мылякö мöртчöтiс синнэсö Федя чужöмö...

Федя лöсьöтчис висьтавны мыйкö смешнöйö, но нем эз адззы сэтшöмсö и веськыта горöтчис:

— Локтiм уджавны.

— Бу-ур! Меным как раз колöны этатшöм рыцаррес, да некыдз ог вермы ме нiйö видзны татöн: эд вöрас уджавны — не бекöрись панявны.

— Вöлiсö ни разь миян коддес? — юалiс Дима.

— Вöлiсö. Только не донкихоттэз, а донжуаннэз, — серöмтчис Света,

4

Луныс оссис гажа, лöнь. Сöстöм небоын дзульзисö ыбшаррез, пышналiсö воздухсö чикиссез. Быдöс вачкисис гожум шöр вылö, но ыббесö пöрисьтiс ни чочком рöма рудзöг.

Эта вöлiмöдiк лун, кöдö панталiсö ёрттэз шор дорись деревняын.

Вöрö мунiсö павжун бöрсянь. Мунiсö куимöн. Петька кольччис начальниккöт. Быдöнлöн мышкас сьöкыт котомка — няньöн. Федялöн эшö пишаль, а Дималöн стальнöй лента. Быдöс, мый кыскисö вöрö, колiс: и пишальыс, и лентаыс, и няньыс, и кружкаыс, и истöггез, и сов. Быдöс этö тшöктiс босьтны техник Света.

Нывкаыс баитiс нюжвыла, ласкова. Öтпыр эз ыкöст зонкаэз вылö, эз пукты асьсö нысся ыджытжыкöн, эз горöтчы, что тöдö мöдiккезся унажык. Медодзза лунсянь ёрттэз примитiсö сiйö кыдз сойöс. И нывка эта кадсянь пондiс сёйны öтiк чöвпанiсь ныкöт.

Светлана Николаевна мунö одзас и тожö нöбöтö котомка, только коскас оз öшав чер. Мунö кокнита, сiдз и кирзовöй сапоггес мелькайтöны вужья коласын — öтпыр оз джöмды, оз падмы колодаэзö.

Сулалö жар, пöдтана, улькодь дука жар, кöда отсалö котомкаэзлö нырыштны спина. Мунны сьöкыт. Сола ньылöм дзулля ваöн визывтö кымöс вылiсь синнэзö, шедö öмö, йöрнöс лякасьö яй бердö. Юр гöгöр уöтö ном-гебыс, юö бы мортлiсь вирсö.

Первуись Федя бур кылöн касьтылö футбол да колхозын удж, кöдна тыртiсö сылiсь яйсö вынöн. А то важын ни колiс бы корсьыны шоччисьны. Мый бы думайтiс сэки Света?

Юöны быд шорок дын — пöдтöны бы горш косьмансö. А юöтö сё öддьöнжык и öддьöнжык. И кыным унажык юан, сыным чожажык мыдзан: ваыс не только ыркöтö телотö, но и миськалö коккезiсь вын, бырöтö мыла.

Света этö бура тöдö, сiйöн и корö:

— Терпитö, челядь, эд польдö весись...

— Да кыдз тэ он ю, кöр быдöс тело косьмö, кöр öшö голос? Рытланяс локтiсö уджаланiнö, дыркодь туплясисö-шоччисисö вуджöрын, сёйыштiсö, пондiсö меряйтны стальнöй лентаöн граньлiсь кузясö, вöрлiсь пасьтасö. Зонкаэз тöдiсö ни, что öтiк мортлö лунся норма сьöртiусьö меряйтны кык километр. И не просто кыскавны сьöкыт мернöй лента, а веськыта колодаэз вывтi, тэлляинöт, кырассэзöт. Визиррез да грань вылö быд двести метр бöрын колö сувтöтны столбок, быд километр бöртi— ыджытжык столбок и нёль километр бöртi— ён квартальнöй столб. Что эта уджыс абу кокнит, виль уджалiссез казялiсö медодзза лунас жö: мыдзисö сiдз, что узисö дзик вийöмöсь и эз казялö, кыдз пыркнитiс-мунiс ой.

5

Пётр Петрович любитiс Петькаöс, отсасисьсö, кыдз ассис зонсö, кöдö вийисö война вылын. Пöрись таксатор эшö войнаöдз уджавлiс экспедицияэзын и пыр мöдiс нуöтны зонсö вöрö, кыдз только сiя быдмыштас, но мечтаэсö сылiсь дзугис война.

Кöр куим ёрт локтiсö уджавны экспедицияö, таксатор Петькаись адззис мыйкö öткодьö аслас зонкöт и босьтiс сiйö ас дынас. «Уджалыштам öтлаын, а согласитчас кö, велöта кытчö желайтас, ась касьтывлас сыбöрын бур кылöн. Сёровно меным некинкöт ни пöрисьувьям нянь-совсö торйöтны».

Пётр Петровичлöн уджыс öткаса: мунны вöрöт да гижны, кытöн кытшöм вöр да уна я быдмö. Сылö оз ков уджавны вынöн — монлавны киэз да нёкравны кос, но колö уджавны юрöн, колö карта вылö правильнöя пуктыны вöрлiсь быдöс богатствосö. Гижö таксатор нельки колодниккез. Зонка оз вежöрт: мыйлö нiйö нитшсялöм пуэсö, кöр омöн вöр — синöн он судзöт и кокöн он меряйт. Колода — кулöм пу, некытчö сiя оз ков, нем ни сэсь он строит. А Пётр Петрович мыйкö дырöн гуддисьö ны гöгöр. Зонкалö сiдз и охота висьтавны, что гагйöсь пуэс гöгöр только кыррез гарйисьöны, но...

Уджалöны вöрын том да пöрись, гижöны бумага вылö вöрлiсь биография, здоровье. Но Петька вежöртö начальникыслiсь уджсö зэлыта. Зонкалö мед ни öддьöн ковсьö керны сэтшöм удж, медбы отир казялiсö, что эстöн кöркö уджалöма морт. А то мый? Гажтöм лоö Пётр Петровичкöт брынöтны колодаэсö. Кытшöм эта удж? Меряйтан кöз нето ньыв, висьталан, мый кыза сiя. Начальник гижас этö да эшö мыйкö рисуйтö да чертитö. А тэ сулав, сьöлав уввесö. Не, абу эта удж. Оз кер Петька уджсö сьöлöмсянь — брынöтö лунсö. И сэтöн эшö сьöлöмыс пондiс кыскыны ёрттэс дынö — гажтöмтчис.

Только рыттэзнас би бокын невна гажажык лоö — öшö лöгыс номмез вылö, кöдна уннялöны юр гöгöр, пышналöны голя да киэз, пырöны котёлö, кытöн пусьö похлёбка. Петька гумалö котёлiсь паньöн номмесö сiдз, что кöр пусяс похлёбкаыс, джыныс киссяс бокö. А öтiк рытö зонка эз ни кыскав паньнас номмесö, а нарочно вашöтлiс парас, мед нiя усялiсö котёлö.

— Зонö, тэ мый талун стряпайтан? — казялiс этö да юалiс начальник.

— Шыд пуа, — висьталiс Петька.

— Дак тэ бы яй консерва пуин.

— Свежöй яйсис чöскытжык эд! — и сэсся нем эз висьтав. Пётр Петрович шынньöвтiс и тожö нем эз шу: страннöй зонка!

Рытся пемытас шушкисö кöззэз, дзингисö юр гöгöрын номмез — видзчисисö, кöр Петька пуас нiйö похлёбкаын.

6

Ыркыт асылыс дзик киöн босьтiс тöння мыдзсö. Только невна доймöны пельпоннэз — этö волыссэзсянь — да кокпыдöссэзö емöн чуткöтö уна ветлöтöмсянь. А кытшöм вöрыс: сöстöм-сöстöм, югьялö да свиттялö, бытьтö кисьтöмась ойнас сы вылö жемчуг — миссьöма асывся лысваöн. Полöм петö и павкöтчыны сэтшöм басöкыс бердö, мед не жугöтны пежьялан доннэсö.

Но некöр нёджжасьны вöр вылö, некöр нежитны тöння мыдзсö. И Федя мунö одзлань, километр бöрын километр, веськыта колодаэз вывтi, чашьяöт. Мукöдлаас пуэс куйлöны öтамöдныс вылын, куйлöны джуджыта — быдса короминна. Сэтöн колö лоны акробатöн. Федя да Дима сэтшöм кодьöсь и эмöсь. Да и нывкаыс керис быдöс сiйö жö, мый мöддэс, мукöд пора эшö унажык.

Светалöн киэс быдлаö лöсялöны, быдöс керö бытшöмика и зонкаэсö сiдз жö тшöктö. Вот сiя висьталö Дималö, что колö майöжоксö сувтöтны вит сантиметр кызаö. Мыйлö бы сэтшöмсö? Олас и куим сантиметр кыза, некин вöрас сiйö оз видзöт, оз ков сiйöн пыкны кытшöмкö груз — оз чег. Но нывка тшöктö керны нiйö басöка, волькыта, бытьтö лöсьöтчö нöбöтны беддесö базарö. Кинлö колö басöкыс эта пыд вöрын? Не. Светалöн сэтшöм характер: керны öтпыр да сiдз, мед бöрсянят вöлiлюбо видзöтны.

Зонкаэзлöн сэтшöм уджыс и не пыр петö: аркмас столбыс то векнитик, то кызжык, то пиньöлöн лöсйöм. Сэк Света босьтö чер и керö сiдз, кыдз колö. Дималö эта оз гленитчы: кутö öбида. Не öтпыр ни сiя аскежас модис: «Черсö оз куж видзны, а велöтö». Федя нывка лöсйисьöм вылö видзöтö шоныта, гажöн, любуйтчö сы киэзöн. Дима эта вылö перво видзöтiс сералана синнэзöн, а сыбöрын мылякö лöгыс пондiс петны. Этö чувствосö зонка эз лöсьöтчы пыр видзны сьöлöм вылас.

— Федь, мый сiя лякасьö миян бердö аслас столббезöн? Сiдз жö сiсьмасö нiя вöр шöрас, — норасис Дима, но бур кывсö ёртыс паныт эз мыччы, и лöгасись мортлö ковсис чöвны да керны сiдз, кыдз колö. Удж велöтiс дисциплинаö, велöтiс нюжласьтöг асылöн янсöтчыны чöскыт онкöт, миссьыны ключ ваöн, велöтiс стряпайтны. Вöр велöтiс уджавны, удж велöтiс овны.

Рытнас гажа биок дорын öтлаö чукöртчöны книгаэзiсь, сказкаэзiсь геройез, том отир эстöн касьтылöны школаись ёрттэзöс, висьтасьöны ассиныс думаэз, мечтаэз. Би дорын Дима вунöтö öбидасö Света вылö, кöр патшкö чöскыт дукöн сьöлаовöй шыд да сэтöровöй чай. Пукалöны би бокын том отир, баитöны сэтчöдз, кытчöдз оз понды нырыштны чöскыт он. А кöр юр пондö гогышасьны, пырöны палаткаö.

— Бур ой тiянлö, — водтöтö Света зонкаэзöс аслас небыт, сьылан голосöн. Но палаткаын пишкöмыс медодз пондö кывны сiя пельöсын, кытöн узьö нывкаыс.

Чожа чулалö ой, казявтöг локтö асыв. Будильник нылöн абу, зато сы туйö эмöсь кайез. Пуксяс кытшöм-нибудь каёк кытчöкö матö палатка дынсянь и пондö стыдитны: «Дыр узят, дыр узят!» Каёклöн сьылöмыс кылö кыдз сказкаын, ылын-ылын, и колö бы, мед эта сказкаыс кыссис дыр и дыр, но пондöны кынмыны казявтöг кушöтöм коккез. Öтiк саймис — чеччöны быдöнныс. А палатка одзын сё чискö биа пес да лэдзö лöз тшынок. Тшыныс лыдтöм суниссэзöн öшалö вöр коласö сидзöм шондiюгöррез вылын, каттисьö ульсалöм уввез коласын.

А öтпыр саймöтiс ош. Биыс сэк кусöм ойнас, и зверь локтöма матö палатка дынö, адззöма мыр бокись кöдзывкар и давай гуддисьны сэтöн, мырсö жугдыны. И кöр Света мыччис юрсö палаткаись да ойнитiс, ош ружтыштiс сьöкыта и сылiс син одзись.

7

Пётр Петрович тiльыштiс очкиэсö чышьянокöн, нюжöтiс Петькалö картасö, кöда вылö гижис вöрлiсь богатствосö, да тшöктiс:

— На-ко, зонö, менчим уджсö керышт, а ме — тэнчит.

Этöн пöрись морт эшö öтпыр пондöтiс кошшыны ключ ёртыс сьöлöм дынö, кöда öнiуджалiс дыша, дзик невольник.

— Оз ков, Пётр Петрович... Ме, пожалуй, эшö не сiдз мыйкö кера. Таксаторöс кутiс öбида: сiя тöдö, что отсасисьыс быдöс кужö керны, да не сы сьöртiэта уджыс — оз гленитчы. Абу охота сылö янсöтчыны зонкакöт, но сёжö шуис:

— Он бы уджав мекöт — ог видз... Эх тэ, Петя-Петушок!

Зонка барöтiс синнэсö, чуймискодь, сылiс местаас. Ась бы сiя висьталiс лöга: «Мун син одзись, мед тэнат и дукыт эстöн эз вöв!», а то: Петя-Петушок...

Дзик из вöрзис да бергöтчис Петька моросын — жаль лоис этö добрöй пöрись мортсö. Весь öбидитiс, лöгöтiс сiйö. А мымда сысянь бурсö кылiс да босьтiс? Öтiк минутаö Петькалö тöдвылас усис быдöс вöрын чулöтöм кадыс.

Зонка дузгыльтчис, баитiс етша, но быдöс керис перыта и бытшöма, мый висьталас таксатор.

Пётр Петрович адззис вежсьöмсö, но шы эз сет: ась пö думайтö, может, мыйкö и буржыкö думайтас. Эх, том годдэз, томся кад! Пётр Петрович тöдö нiйö — тожö кöркö эд том вöлi...

Павжуннас Петька пуксис матöжык таксатор бокö, дзарнитiс веськыта сылö синнэзас и быдöс висьталiс, мый куйлiс дзирыт сьöлöм вылас

8

Дима мунiс Васькинаö няньла. Нянь бырсис эшö тöн, и колiс сiйö вайны. Няньыс колiс уджся öддьöнжык. Няньтöг эз туй уджавны. И вайны сiйö тожö абу кокнит, колö кыскыны ас вылат пятнадцать километр ылына, вöрöт, туйтöг.

Света иньдöтiс Димаöс. Мыля сiйö — Федя эз вермы висьтавны. Может, сiйöн, что Дима вöлiбыдöннысся вынажык, а может, сiйöн, что Дима мукöдпырся споритiс уджавтöн, асныралiс. А может, и эшö мыйкö...

Тöн быдöнныс сiдз мыдзисö, что юррезын пондiс пизьны-шумитны, дзик больгис шорок, а син одзын лэбалiсö бичиррез. Уджалiсö пöттöдз, коккез ортöдз вöрсö чегисö, но колiс эшö меряйтны джын километр гöгöр. Ежели не керны сiйö талун, то ковсяс локны ашын — весись öштыны кад сэтчин-татчö ветлöтöмын. И решитiсö керыштны.

Вот эстöн и аркмис етшасьöм. Дима сувтöтiс столб местö майöжок: Света пö мыдзувьяс оз понды тшöктыны керны мöдпöв

— Бöра ас мознат? — кöритыштiс ёртсö Федя.

— Олас. Не выставка вылö, — макнитiс кинас Дима да уськöтчис небыт нитш вылö. Пуксис и Федя. Локтiс Света, кöда кольччылiс буссольöн грань вылö, видзöтыштiс сувтöтöм майöгсö

— Вöснитöв, — висьталiс Света.

— Ен сыкöт, кыдз бабö баитö. Мыдзи, — сьöкыта ловзисис Дима да бергöтчис бок вылас.

Света шагньöвтiс Дималань, босьтiс сы бокись чер. Зонка синöн эз кваркышт — то ли узис, то ли мыдзыс досповна дорис сiйö му бердö.

Федялiсь сьöлöмсö бытшкис öбида. Дима бöра керис ас мознас, и лоис жаль Светаöс. Федя чеччис местасис, кватитiс нывка киись черсö, швыргис сiйö грань шöрö и пондiс рукйыны-керасьны сьöкыта лолалöмöн.

Федя сувтöтiс столбсö öтнас, шысеттöг, не тэрмасьöмöн. Тэрмасьны эз судз выныс, эз лэдз тэрмасьны жар, кöда джагöтiс горшсö, пичкис кучикись бöрья воттез. Ордчöн кыдз увтын пукалiс Света, мöд ладорас куйлiс Дима да шлёпкöтiс ки долоньнас голя вывсис номмез. Мый сiя öнiдумайтiс? И думайтiс я мыйкö? Может, былись сiйö мыдзыс пöрöтiс?

И Федя öнiэз лöсьöтчы вежöртны думаэсö аслас ёртлiсь, кöдакöт талунöдз олiсö воннэз моз, кöдакöт öтдруг чеччисö и водiсö учöтсянь, сёйисö öтiк нянь кусöк. А мый думайтiс Света? Мый бы эз думайт, но Федя адззис, что сылö öнiсьöкыт. Сьöкытжык, нежели зонкаэзлö. И сылö öддьöн охота лоис сибöтчыны нывкаыс дынö да висьтавны сылö бур, шоныт кыв. Только одзжык бур кывсö мыччис бöра жö Света, мыйсянь сiя Федялö лоис эшö матынжык, эшö донажык.

— Локтö, челядь, мунам шоччисьны... Öддьöн ни ме тiянöс маитi. Но бура уджалан — долытжыка шоччисян.

Света мунiс одзас, баитiс сё важмоз спокойнöя, кыдз бытьтö нем эз и вöв. А виновник шы эз сет, мунiс чужьясьöмöн да пишкайтiс нырнас то ли лöгсянь, то ли мыдзöмсянь. И, натьтö, бöра думайтiс нывка йылiсь: «Похлёбкасö оз куж пуны, а указывайтö».

Света вöрас етша пусьывлiс ачыс.

— Челядь, тiйö прокмат пуны чöскыта. Да и ме тiян öтнам — вердат, грех оз ло, — серавлiс сiя.

Федя этö вежöртiс сiдз: кыдз не кыдз Света — нывка и мыдзö нысся ёнжыка, ась и оз мыччав этö.

Рытыс öшöтчис вöр весьтö гажтöма, сьöкыта, орöттöг бизгис пель одзын ном. Уджалiссез сiйöн и дзебсисисö палаткаас талун одзжык. Эз вöв пырся басни одзланься олан йылiсь, мечтаэз йылiсь, водiсö лöня, гусьöна. Этадз, может, шогмис эшö и сысянь, что рытнас сёйисö почти няньтöг — кольччис джын чöвпан.

Асылыс петiс мича, кыдз и одзза луннэзö: тумана, уль дука, лöнь. Но ежели тэ внимательнöя панталан быд асывсö, казялан, что лунiсь лунö сiя не öткодь. Вот талун сук туман быдсöн каттьöм вöрсö йывсянь вужжезöдз небыт шучтыдалана паськöмö. Шондiлöн вöснитик золотöй югöррез сидзöны только пу йыввезви, и кыз лысва оз чежмась син одзын. И вöрыс абужык гора, вачкисьö арся вылö. Вот кытöнкö пондö уджавны кыр: тук-тук, тук-тук-тук. Сылö шыасьö мöдiк, куимöт. Но эта тукöтöмыс талун умöля горалö, оз паськав говкöн öтмöдöрö. Нельки матiсь шорокыс больгö не сiдз ятнöя — и сiйö пöдтö сук туман. Сэсся не шы, не тöв. Только асылыслöн аскоддя ружтана лолалöмыс. Дзик сказкаын олан — волшебнöй мирын... Кытчöдз Дима лöсьöтiс сёян, туман пакмис, дзик пöльыштiсö сiйö.

— Мöдö зэрны талун, — висьталiс Дима.

— Кин висьталiс? Не я кыррес? — шыннялö Света.

— И нырнам, и пеллезнам кыла, и синнэзнам адзза...

И пондiсö киссьыны приметаэз зэр йылiсь, бытьтö вöр шöрын баитiсö не том отир, а тоша стариккез. И эна приметаэз сьöртiпетiс, что луннас зэрас.

Сёйöм бöрын Света висьталiс, что часöт няньла мунас Дима.

9

Федя кольччис уджавны Светакöт, и дзик мыйкö эз понды тырмыны, гажтöмкодь лоис. Может, Димаыс нöбöтiс сьöрас гажсö?

— Мыля не менö, Светлана, няньысла мöдöтiн? — öбидитчыштiс Федя, кöр мöдпырся ни пуксисö шоччисьны.

— Мый, тэ мекöт полан уджавнытö? — серöмтчис Света. — Чайтан, кок йылiсь усьтöдз понда уджöтны?

— Ме бы уджала отирысся не умöльжыка и немись ог пов, — чорыта шуис зонка.

— Меным сэтшöммес и колöны, Федя, — серьёзнöя висьталiс Света и содтiс: — Эта йылiсь ог пондö баитны. Давай уджавны.

Светакöт вöлiуджавны кокнит, сiя керис быдöс Федя моз, кыдз опытнöй морт.

Кöр Света буссольöн видзöтö, кöдöрö колö писькöтны вöрöт грань, Федя боксяняс видзöтö сы мича чужöмö, видзчисьö, кöр тшöктас сувтöтны вешкаэз. Нывка лэбтö юрсö, бергöтö зонкалань голубöй синнэсö, кöднаын орсö сэтшöм би, что Федялiсь сотö сьöлöмсö. Но зонка оз сыв местаас, оз нетшкöвт да чапкы ассис сьöлöмсö Света одзö, а пондöтчö сöтавны медодзза пуэз, медбы писькöтны виль грань.

Уджавны сьöкыт. Шондiыс кисьтö юр вылö дзик пым пöим, сотö. Вывтыр вамö ньылöмöн, бытьтö тульгылöмась тэнö юö. Сэтчö жö дозыляйтö номыс, лöдзыс, стрöкаыс. А горш сiдз косьмö, что юр вем, и сьöлöм, и быд жилаыс модьöны öтiкö: юны, юны, юны! И нельки номмес орöттöг лёбöны пель одзын: юны-ы-ы!

«Кытшöм юöм? Не юны, а уджавны локтiм татчö! Одзлань!» — лöгасьö Федя ас вылас и эшö вынöнжык пондö керавны одзсис пуэсö. А шондiыс сералö, палитö, видзöтö, кин кинöс вермас. Кынымкö минута бöртiФедя сувтö, веськöтö спинасö, öмтырнас кыскö моросас русö. Но гыркас шедö дзик калитöм сир, кöда сотö и косьтö тымуссö. Öнiньылöм оз и котöрт кымöс вылiсь, и вывтыр косьмöма сэтчöдз, что кажитчö, вир пизьö жилаэзын, кыдз самоварын ва. Юр лоö сьöкыт, öвтчö пельпоннэз вылын.

— Шоччись! — ыксö Света. Не ыксö, а кижгö, кыдз виньдöм курöг — öшöма нывкалöн мича голосыс. — Колö адззыны ва, — и кыскö писис карта. Петö, что ваыс не матын: уджалöны грива вылын. Грива боккезсянь пондöтчöны шоррез — гриваыс янсöтö ваэсö, но кысянь нiя пондöтчöны? Бöрлань мунны эм туйыс, весöтöм, но ваыс ылын; одзлань туйыс абу, но ылын я ва дынöдз?

Думайтöны том отир. Нiя тöдöны: вöрыс любитö не уна басниа отирöс. Шедiн вöрö — думайт. Вöр любитö ылöса да повтöм отирöс.

— Кöдöрö? — юалö Света.

— Одзлань, — висьталö Федя. — Уджалöмöн кыссьыны одзлань. Локтас ваыс.

— Ме сiдз жö шуа.

Бöра уджалöны. Шоччисьлöмöн, дыр шоччисьлöмöн. Но пеллезын сё мылякö сулалö öтiк шы: дзинь-нь-нь-нь — бытьтö воздухыс дзингö.

Дак вот кытшöм сiя горш косьманыс! Тшыгйöн не öтiк лун туйö овны, а ватöг? Тöдвылö усьöны Брестiсь геройез. Ежели бы нылöн вöлiва, уна бы век кежö ланьтiсö фашисттэс.

— Федя, — шыасьö Света, — чапкам уджсö, рытнас дыржык уджалам.

— Ме ветла кошшыны васö, Светлана, — висьталö Федя.

10

Дима öбед кадö локтiс деревняö. Прокопика панталiс зонкасö дивуйтчöмöн:

— Кытöн сы дырна вöлiт? Думайтi, öшит нето ош сёйис.

— Сiя оз вöрöт миянöс, — баитö зонка. — Аслас ёрттэзöн лыддьö, вовлiсям ми сыкöт.

Старуха только боккесö кöс киэзнас вартiс да юрнас гогинялiс, а юасьны унасö эз понды: уджыс тэрмöтiс — колö лöсьöтны нянь шöмöс, ырöшок керны. Быдöс юсис и сёйсис.

Кöда коста квартирант лöсьöтiс пöрöм йöр — деревняас некин эд абу мужиккес — да ветлiс чери кыйны, Прокопикалöн ештiс квашня, и ойшöрнас сiя горись кыскалiс чöвпаннэз. Этö, конечно, Дима эз ни кыв — сарайын узис кыз онöн. Чеччис сэк, кöр хозяйка тэчис няньсö котомаö.

Лун бöра пондöтчис тöннямоз. Но талун жарыс вöлiмöдкодьжык: уль, сир дука, сорлассьöм багульник дукöн. Талун эз сот — пöжис.

Номмез, кыдз только Дима колис деревнясö и пырис вöрö, ванырöн уськöтчисö сы вылö: лякасисö голяö, киэз бердö, пырисö нырпыссэзö.

Небоöт уйисö пух кодь кокнит кымöррез, туй бокын öддьöнжык гуддисисö кöдзыввез, частожык лэбалiсö и полöмöн чирзiсö кайез.

Вöр лöсьöтчис пантавны зэр.

Луншöр гöгöрас, кöр Дима мунiс ни джын туйсö, руыс вежсис, сöстöмсялiс, бытьтö кинкö сысъялiс сiйö, юр вевдöрын содiсö палаккез¹.

И вдруг, кöр Дима мунiс кöзъяинöт, вöрыс öтiк минутаö вежсис: пемдiс, лöнис, видзчисис мыйкö сэтшöмö, кöда вот-вот локтас да брякнитчас невежöртана вынöн пуэз вылö. Вöлiсэтшöм лöнь, что чиннялiсö пеллез. И öтiк каёк эз лысьт дзугны этö лöньсö, только уна бабыввез мелькайтiсö — лэбзисö ойланьö.

Дима жöв керсис, сувтiс, кывзыштiс вöрлiсь тöждiсяна лолалöмсö и вежöртiс, что мыйкö локтö умöль, но мыля умöль — эз тöд. И сэк сылö пеллезас вачкис кытшöмкö невежöртана шы: кытöнкö мыйкö уöтiс, уöтiс грöзитöмöн, нёштöм вынöн, уöтiс сэтшöм шыöн, кытшöмö кылiс зонкаыс первуись. Эта шыыс вачкисис тысяча етш лэбзян самолёттэз шум вылö, и Дима кошшис синнэзнас нiйö небосис, но эз адззы нем, только важмоз öшалiс шондi, и вöлiсiя кытшöмкö вежкодь. И эшö казялiс, что öнiлэбзисö бабыввес тöдчöмöн унажык. Зонка чикыртiс синнэсö, ки долоньнас вевттис кымöс весьтiсь шондiсö и эшö дыркодь видзöтiс вевдöрö и сэк вöлись тöдiс, что бабыввес лэбзьöны öтi-öтiи лажмыта, кöззэз коласöт, а вылынжыка лэбзьö пуэзлöн шырзьöм лист.

Сэк полöм сывьялiс Димаöс, и сiя эз тöд, мый öнiкерны, только жöдзис местаас да дзарьясис. А кöр вились лэбтiс синнэсö шондiлань, то сы весьтiсь адззис гудыра-сьöд гардчан кымöр, кöда вачкисис ыджыт чудовище вылö и бытьтö лöсьöтчис уськöтчыны улö да ньылыштны вöрсö. Вдруг лöньсьöм, повзьöм вöрсö саймöтiс рака аслас горöтöмöн, бытьтö шедiс сiя капканö. И сэк жö ёркнитiс-гымыштiс. Дрöгнитiс муыс, кöззэзлiсь йыввесö зэгнитiс лэчыт тöв. И пондiс нетшкыны-летны лыссö да листсö. Зонкаыс öнiэз вежöрт, мый керсис сы гöгöр: кажитчис, вöрсö кинкö мутэйöн соровтiс, мыйсянь быдöс ряксiс, горзiс, уннялiс, то ружтiс зубытсянь, то öтдруг и сьылiсö, и горзiсö уна код отир. Дима одзö татшкисис чегöм кöзлöн йыв. И сразу жö курöг кольть гырися шер пондiс масьтыны и пуэзлiсь листсö, и кок увтiсь турунсö.

Дима чеччöвтiс туй дорись вужья сайö, ляпкöтчис му бердö да пондiс чöвтны спина сайсис котомасö. Сэтчö мыйкö зубыта вачкис сы коккез кузя, и зонка öштiс садьсö.

Саймис Дима сысянь, что сылö веськыта синнэзас павгис гажа, югыт шондi. Эта висьталiс, что юр вевдöрын абу ни лёк кымöрыс и колö чеччыны. Зонка сувтiс бы коккес вылö, но юрас нöшöн вачкис зубытыс, син одзас шондiыс паськалiс торрезöн — кусiс. Кöр сiя мöдöтпыр садясис, эз ни сувт сэк жö, а нырышсис гырдззаэс вылö да дыркодь думайтiс, мый сыкöт лоис и кыдз öнiмунны. Некыдз эз веритсьы, что вермас лоны коктöм. «Бордтöм кай, некин тэнö оз тöд, кытöн тэ и мый керан...» — думайтiс ас йывсис Дима и бöра водiс. А сэтöн пель одзын дзик кинкö шушкö: «Шедiн эд вöлись, он вöрзьы öнi. Коккезтöг кытчö тэ? Кокаласö ракаэс синнэтö». «Кыдз кытчö? — думайта Дима. — Не эстöн жö вот, туяс, весись кувны! А кыдз инö Мересьевыс? Кысся бöр, деревнялань... А кыдз нö нiя няньтöгьяс? Колö нiйö вердны пöттöдз чöскыт няньнас, колö адззыны Светаöс да Федяöс».

Гичыртö пиннесö да кыссьö киэз вылас. Кыссьöв-керас да пуксьö: кöдзыт ньылöм койыштö вывтырас, юрыс бергалö, коккезсянь зубытыс лыйлö юрöдззас, пидзралö сьöлöмсö, пöдтö ловсö. Шоччисьö, нёджжалö буря бöрсянь вöрсö: мысыс, кытöн час-мöд бöртiсулалiс зелёной стенаöн вöр, öнiвачкисис битва бöрсянь ыб вылö: лёдззезöн и лёдззезтöг куйлiсö му вылын чеглалöм да вужьянас пöрлалöм пуэз. Но и калечитöм вöрыс сё гажа да мича: синнэз ёрис сöстöм, зэр пытшкын купайтчöм шондi. Лоöм сэтшöм лöнь, что кайезлöн песняыс вундалiс пеллез. Буряыс, тыдалö, абу вермöм мырддьыны басöк олансö вöрыслiсь: кöть уна пуэз чегласьöмöсь, пöрöмöсь, но победаыс дöнзьöм вöрыслö. Вон ота грань аркмöм, öтiпу оз сулав, только вылын мыррез чуй видзöны — эстiлёк тöлыс мунöма нырöн. Только невна бокижык сiя местасянь, кытöн Дима куйлiс. А ежели бы сы весьтöт? Кöдзыт ва киссис Дима спина вылö, а мороссö палитiс дзирыт кöртöн. Син вылас усис котома. Сiйö колö нöбöтны. Кöбы не сiя, позис бы пукавны эстöн. «Нянь — олан, нянь — вын, няньыс и гаж, и чож», — этадз баитлiс Дималöн мамыс. Да и ачыс сiя тöдiс няньлiсь чöскытсö да вынсö учöтсянь. А войнабöрся сьöкыт кадыс? Часто ужнайтлiсö няньтöг, панявлiсö туруннэзсора похлёбка.

Дима курччöвтö тырппесö и чеччö. Жагöника, старик моз. Но зубытыс эшö öддьöнжык, вынöнжык сотö быдöс телосö. Кöбы эз кутчись пöрöм пу уввез бердö, натьтö, усис бы. Этадз сулалiс сэтчöдз, кытчöдз эз чулав зубытыс. Кöр невна лоис кокнитжык, кöр син одзын дугдiсö орсны бичиррес, Дима казялiс, что сылöн эз кольччы выныс, медбы лэбтыны да кышавны спина сайö котомасö. Тöдвылö усьö быдöс, кыдз быдмис, кыдз велöтчис, кыдз дружитiс Федякöт, кыдз уджалiсö вöрын эна луннэзö и сiя споритiс Светакöт.

Сьöкыт эна думаэзсянь. Сьöкыт сiйöн, что оз вермы нöбöтны ёрттэслö нянь. Мый думайтасö нiя? Шуасö: «Видзöт, оз бы уджав... пышшис и няньсö эз вай. Трус!» Эта думасянь лоис мед ни сьöкыт, сьöкытжык зубытысся, буряысся.

Пуксис ва нитш вылö, кыскис таджьялöмöн веськыт кок нырас шульга сапогсö, разис нямöтсö. Кокыс абу чегöм, разь лыыс потiс. Чулькаыс¹весьтöт лöзöтöм и лöсьöтчö пыктыны.

Ыркöтiс коксö, кöмасис, лöсьöтiс бедь и бöра одзлань. Кöть жагöника, пöв кок вылын, но одзлань. Сё сiдз жö зубытыс лыйлiс быд шагын, нельки дзикталiс коссö, дзулля ва котöртiс рожабаннэзiсь. Эта жарсянь и зубытсянь мукöдпырсяс жарыс öшлiс, вывтырсö койыштлiс кöдзыт ваöн, и кажитчис сылö, что öнiжö вот усяс и сэсся чеччыны оз вермы. Вильöтасö сэк сiйö номмес, кöдна кымöрöн койöны сы гöгöр, видзчисьöны, кöр усяс мортыс.

Дима сувтчывлiс пуэз бокö, слон моз пыксьöмöн шоччисьлiс, полiс пуксьыны. Кöр сулалiс, думайтiс. Думаэз чожöсь, кыдз кайез, бергалöны öтамöд гöгöр, вермасьöны. Öтыс, дума-варыш, кокалö бы мöдсö, дума-чикисьöс. Варышыс вöлiхитрöй, но чикисьыс боёкжык, смевжык и некыдз эз сетчы варышыслö. Бурыс да бытшöмыс прокод вöтлö лёксö.

Номмез öнiповтöг юöны зонкалiсь вирсö: Дима оз ни вашöтлы нiйö, а вешшö одзлань да одзлань. А тöдвылас сё Мересьевыс, кöда вот коккезтöг вермис керны чудо.

Колодаэз вуджтöн шоччисьлiс дыржыкöн, пукавлiс сэтöн: этадз кок вылö сувтны кокнитжык.

11

Том сьöлöм прокод кошшö мыйкö вильö, кöда богатсьöтö, паськöтö мортлiсь олансö, мыччалö тöдтöм местаэз, пантасьöтö интереснöй отиркöт, берсяыскöт — буркöт и умöлькöт. Да, оз пукöт том сьöлöммесö öтiк местаын, кыскö кытчöкö одзлань: тöдтöмö, ылынiнö, сьöкыт туйö.

И пöрись таксатор иньдiс Петькаöс ас дынсис öткаса удж вылö. Эта уджыс вöлiнеыджыт: грань вылын сувтöтны кык квартальнöй столб и гижны сэтчö номеррез. Зонка рад сьöлöмöн мунiс вöрö. Рад вöлiне уджлö, а что этö уджсö керас öтнас, некин сылö оз отсав. Вот эстöн и вöтiс буряыс Петькасö. Сiя сувтöтiс ни öт столбсö и лöсьöтчис гижны номеррез.

Вирдыштiс, и сэк жö чаркнитiс да сiдз, бытьтö муыс потiс шöри. Петькалöн сьöлöмыс кытчöкö вотьыштiс. Сiя кöч моз котöртiс бы кытчö коккес нуöтiсö, но сэтчö вöр вылö уськöтчис лёк тöв. Вöрыс бöбмис: горзiс, йöктiс да сералiс. Кöззэз куснясисö, топ турун тылöппез. Петька сулалiс дзор кöз бокын и полiс видзöтны ас гöгöрас. Но сажень ылынаын сы дынсянь чегис-ризьнитiс пу, и зонка казялiс, кыдз дюттясьö кок увтас муыс öтлаын вужжезкöт. Тöдвылас усис, что эта коста колö водны пöрöм пуэз коласö. И чеччöвтiс вевсьöн куйлан кöззэз дынö.

Мый вöлiэта бöрсянь — сiя оз вермы висьтавны. Тöдö, что сулалiс кывлытöм шум и люзьгис вöвлытöм зэр.

Кытöнкö мурзис эшö кымöр, но Петька весьтын югьялiс ни шондi, и сiя котöртiс чожажык Пётр Петрович дынö. Квартал дорын, кытöн поперегалiсö öтамöднысö граннез, син вылас усис ловья существо, кöда вöрöтчис турун коласын. Зверь али морт? А может, лешакыс, кöда йылiсь уна висьтасьöны васькинса? А мыля кынöм вылас кыссьö? Зонка мöртiс сыö синнэсö, видзöтö: морт. Матöжык сибöтчис.

— Дима? — повзис Петька. — Этö тэ али мый?

— Лок татчö, — негорöн кижгыштiс кынöм вылас кыссисьыс. — Юны бы...

Петька гöпокись адззис ва, гумыштiс кепканас. Гудыра сiя вöлi, лыс дука, но сёжö ва.

Дима висьталiс, мый сыкöт лоис. Кыкöн кыскисö сапог, видзöтiсö коксö: пыктöма, лöзöтöм. Нем и думайтны мунöм йылiсь. Сiйöн и öзтö Петька тшынас, медбы эз пичкы вирсö ёртыслiсь гебыс.

— Коль менö, но няньсö нöбöт, — кеймисьö Дима. — Нiя тшыгöсь. А ме видзчися тэнö татöн.

Петька тöдö, что сэсся нем споритны Димакöт, и кышалö пельпоннэз вылас волыссэз.

12

Шондiлöн югöрыс мöртчис палаткаö, саймöтiс узиссезöс.

Талун некин некытчö эз тэрмась — видзчисисö Димаöс, кöда локтас луншöр гöгöр. Эта видзчисьöмыс вайöтiс дыш, дюттьöтiс суналöмын. Кыдз абу удж, морт дышмö. Нельки юр дышöтчö думайтны.

Федя пукалö биок одзын, суналö. Суналöмöн узьны чöскытжык, да эшö одз асылöн вöрын, шондiюгöррез увтын, кöр некин тэнö оз адззы и оз вöрöт, кöр кöззэз караулитöны тэнö шысеттöг. Кин эз узьлывлы вöрын, кин эз сунасьлы одз асылöн биок дын, сiя оз тöд быдсöн природалiсь олансö. Сунасян тэ гожся асылöн биок одзын, и тэныт долытся-долыт. И этö долытсö керö тэныт мам-природа: нежитö, дюттьöтö, шонтö, тыртö гажöн.

Вот дзульзьыштас каёк — этö тэ понда онмöсьтан песня; кап-кап усялöны кöз ув вылiсь югыт ва воттез — этö тэ понда нiя лыддьöны секундаэз — кузьöсь, донаöсь — узь пöттöдз; вот ловзисис муыс небыт, ыркыткодь руöн, и шушкыштiсö пу йыввез: ш-ш-ш! Некин шы эд сетö — узьö морт!

Но морт жö и дзугис Федялiсь чöскыт онсö: локтiс Толя, кöда мöдiк группаын уджалiс Уролка сайын, и пондiс корны Светалiсь нянь — нылöн тожö бырсьöма.

— Ме няньтöг ог мун уджавны, — кыз голосöн бобгö Толя. — Только уна я вежтасö луныс понда?

Федя саймö, тöдвылас вöрзьö неважся басниыс Толялöн: «Федя, эн на чупкы этö ягöдоксö?» Сiдз сiя Света йылiсь шуис, но сразу жö лöньсис, кöр казялiс ныр увтсис Федялiсь кулаксö. Толялöн пыр аслас кокнит басни. Нывкаэз да деньга йылiсь. Уджалас лун, дак не керöмсö лыддьö, а мымда шедтiс: «Десятка эм бöра талун!» Федя лöгасьö:

— Тэ перво кер, вöлись и деньгасö кор.. Нем он уджав — нем он босьт.

— Мый, тэнчит оз нимав тшыгыс сьöлöмтö? — сералö Федя вылын Толя. Но Федя сэсся нем оз шу, кöмалö бырöм сапоггесö, чапкö пельпон сайö пишаль и öшö вöрö. Недыр мыйись вöрсö поткöтö лыйсьöмлöн говк...

Завтракайтiсö сьöлаовöй шыдöн — пöттöдз сёйисö.

— Но, Светлана Николаевна, — шуö Федя, — сёйим-юим — колö и честь тöдны: мунам уджалыштам!

— Мунам, ежели киэт лудöны, — шыннялö Света и висьталö: — А тiйö видзчисьö Димаöс. Сiя чожа локтас няньнас.

— Курорт, батя, татöн няньтöг! — быгыльтчис нитш вылö Толя. — Сетасö жö, поди, быглясьöмö понда руб-мöдсö.

...Света Федякöт пуксисö шоччисьны крут берега ключ дорö. Кок увтын больгис-котöртiс сöстöм ва, а юр вевдöрын палитiс шондi, кöда, кажитчис, калитчöм сэтчöдз, что вот-вот сылас да пондас вотявны юр вылö. Натьтö, быдöс ловьяыс часöт пöдiс, лолалiс медбöрья вынöн, а вот яг чикиссез дзик эз и кылö жарсö, лэбалiсö чожа, чирзöмöн. И вдруг вöрыс лöнис, öшисö чикиссез. Лöнис сэтчöдз, что пеллезын пондiс чинньöтны. И сэк ылын-ылын кылiс невежöртана шум, кöда содiс, вынсялiс быд минутаöн, и нем сiйö эз пондыв падтыны и вермыны.

— Мый эта сэтшöмыс? — юалiс Света.

— Марсиана локтöны, — шуткаöн висьталiс Федя. — Вон, бабыввес пышшöны ны шогья, — и серьёзнöя содтiс: — Зэрны мöдö.

И сэтöн ружöктiс вöрыс.

— Пышшам! — горöтiс Света да мöдiс котöртны матiсь ньыввез дынö.

— Кытчö? — кватитiс киöттяс сiйö Федя и нуöтiс колодаэз коласö. Неылын пöрис шумöн, бытьтö бöрдчис кага, пу. Света жмитчис Федя бердö.

— Полан? — юалiс Федя.

— Невна... Ежели бы öтнам... А кыдз пöрöтас мыйкö миян вылö?

— Оз лысьт... Не öтнам эд ме пукала эстöн, а тэкöт. Сiйöн оз лысьт! — горöтлiс уöтöм пыр Федя.

Света эшö зэвжык жмитчис ёртыс бердö и кунис синнэсö, мед не адззывны, кыдз ыждалö лёк буря, кыдз пазöтö поснит лыссö гырись шер.

Но вот кымöрыс вешшис бокö, сы местö мыччисис шондi. Вöрыс бöра лöнис.

Света öктiс шер туссез, чапкалiс öмас и нималiс, кыдз леденеццезöс.

— Кытшöм басöкöсь, — бергöтлiс сiя шер туссесö долонь вылас.

— Тэ эд неважын полiн ныись и ёрдiн нiйö, — сералiс Федя, — а часöт радуйтчан.

— Эг бы пов сэк — эг бы радуйтчы и öнi, Федя. Счастьеыс локтö сэк, кöр тэ верман сьöкыт минутаэсö!

— Вот и миян лёк минутаэс кольччисö бöрö. Петö, что миян счастьеным локтiс ни?

— Может, и локтiс, — гусьöника шуис Света.

Федя сэсся эз вермы терпитны — сьöлöмыс нетшкöвтчис нывка дынö — и зонка жмитiс Светаöс морос бердас да окыштiс.

— Тэ мый, Федька, — и повзьöмöн, и рада нывка тангис ас дынсис зонкасö и бергöтчис мöдöрö.

Дыркодь сулалiсö вöрзьöтчытöг, бытьтö керисö мыйкö умöльö, и кöр казялiсö этö, повзисö. И былись повзьыштiс Федя, кыдз павкöтчис нывка пельпон бердö да нёджжöвтiс сы синнэзö: техник горзiс.

13

Синваэз... Колiс ли тiянлö котöртны рожабаннэзöт, кöр локтiс мортлöн счастье? Эд счастьесö, шуöны, не гым кымöрыс оз вий, не шерыс оз варт.

Тыдалö, колiс.

Синваэз... Тiйö сöдзат синнэзiсь и горе коста, и счастье одзын.

Федя эз куж сувтöтны нывкалiсь синваэсö. И некыдз эз вермы вежöртны, мыля шорöн котöртöны нiя. Света и ачыс эз вермы вежöртны — мыля. Может, сiйöн, что юасьтöг-висьтасьтöг окыштiс сiйö Федя? Али сiйöн, что сьöлöмсö сотiс радейтöмлöн дзирыт чувство и öзйис гаж сы сьöлöмын? Может, сысянь, что, кыдз баитсьö, окасьöм бöрсянь колö думайтны и кага рузуммез йылiсь? А может, усис тöдвылас одззася, эшö не кузь, но курыт олан?

Да, оланыс сылöн вöлiöткодь и мöдкодь. Света умöля тöдö айсö. Öтiк пыр кежö кольччис сы синнэз одзö: чорыт тоша рожабаннэз, гöрдкодьöсь узьöмсянь синнэз, зелёнöй солдатскöй гимнастёрка. Кытшöм вöлiайыслöн голосыс, мыйöн сiя вöлiмöдкодь мöдiккезся — Света оз тöд. Нывкалö кажитчö, что айыс сылöн и талунöдз сэтшöм и сё тышкасьö враггезкöт.

Эшö мый пыр кежö кольччис учöтсяыс, дак этö отир. Уна отир, кöда лун и ой кытчöкö тэрмасьö-мунö. Отир, кöдö вöрзьöтiс война аслас горттэзiсь и вашöтiс öтöрö — кузь туйö. Сiдз Света мамыскöт шедiс Уралö, неыджыт городö, кöда немымда эз вачкись Ленинград вылö, но гленитчис Светалö. Гленитчис и отирыс, кöда медодзза луннэзсянь пондiс любитны локтiссесö. Дасгодся роч нылочка часто котрасьлiс челядькöт öтöрын, ветлывлiс ягöдавны да тшакьявны, отсалiс гарйыны картов — прокод вöлiкоми челядькöт. Этасянь и велалiс баитны ны моз медодзза жö месяццезö. А кöр Светалöн мамыс кулiс сьöкыт операция бöрсянь и нылочка кольччис öтнас, сэк тётя Поля, солдатскöй дöва, висьталiс:

— Да мыйлö, отир, тiйö мöдат детдомас сiйö сетны? Менам эд некин абу, быдта нылочкасö!

И лоис Светалöн виль мам — тётя Поля. Быдтiс сiя Светаöс бура, любитiс кыдз ассис жö, но роднöй мамсö Светаыс юрись некöр эз вермы вештыны бокö.

14

Узьланiн местаын Светаöс да Федяöс панталiс Толя аслас ёрткöт. Толя быдсöн вежсьöм: öшöм кытчöкö кокнит басниыс, кымöра, лöг.

— Ловьяöсь? А мийö эстöн не досповна... Ох, и мыччалiс жö страстьсö! Часöт сьöлöмö не аслас местаын. Палатканым кытöнкö — фью-у!

— Тöдчö, что не досповна, — сералiс Толяöс Федя, — лöзöтöмöсь, бытьтö мöдöр югытсис командировкаö локтöмась.

— Командировкаö, командировкаö, — дразнитыштiс Толя, — невна эшö бы, дак и совсем... Но сiйö, деньгасö! Эстöн копейка понда, пожалуй, юр вузалан.

Сэтöн кöззэз колассянь ышки-пойки мыччисис Петька.

— Димкаыс!..

— Мый, Димаыс? Мый? — повзисö быдöнныс. А Петька лёбö мыйкö, кылыс гардчö. Но сёжö вежöртiсö Петялiсь баснисö, и шы эз ло.

Петька сьöкыта ловзисис, соснас чышкыштiс ньылöмсö кымöс вывсис, мöртiс синнэсö Федя вылö и сибдöм голосöн висьталiс:

— А няньсö вайи, то сiя. — И чапкис спина сайсис котомасö.

— Тэ мый, Петька!

— Эх, Петька! Ёрттö нянь вылö вежин...

— Дак эд тшöктiс сiя. Он мун, шуö, дак ачым муна.

— Тырмас, челядь, — шуис Света, — колö отсавны Дималö.

Федя вунöтiс ас йывсис, вунöтiс Света йылiсь, стыд сылö лоис Петька да Дима одзын.

...Дима пукалiс биок дынын и мыйкö сьöкыта думайтiс. А кыдз казялiс морттэсö, лэбтыштiс юрсö, серöмтчис только тырппезнас.

— Мый тэкöт, Димка? — дрöжитана голосöн юалiс Федя.

— Мый повзин, Федя? Мый сiдз видзöтан ме вылö? Повзин меись? — юалiс Дима.

Вöлiмыйись повзьыны, Дима вылö видзöттöн: чужöмыс сырсмöм, нюжалöм, кымöс вылас лоöмась бороздаэз. Только синнэс чорыта видзöтöны, только синнэс сьöртiи туйö тöдны, что тэ одзын не ваись куль, а морт.

— Тiйö артельöн? Али дзебны ни локтiт? — Дималöн голосыс лöгкодь, сералö.

— Дзебсян, дак дзебам, не тöв — муыс сыв гарйынытö, — дзульзьыштiс Петька.

— Попугай, куль, тэ бöра ме одзын ни! — гажмис Дима. Бурмöтö Федяöс эта голосыс. Сiя не кулiсь мортлöн — оз лöсьöтчы Дима кувны.

Света шысеттöг пöрччалö Дималiсь коксö. Нямöт увтiсь мыччисьö сьöдкодь лöзöтöм, пыктöм яй. Пыкöсыс паськалö, грöзитчö кайны вылöжык кок кузя. Эм мыйись повзьыны, кöр отсавны немöн, кöр карманын и бинтыс абу. Но Света бытьтö оз и адззы пыкöссö Дима кокись, кöритыштлö сiйö:

— Дмитрий Васильич, тэ, конечно, йöктан эшö аслат свадьба вылын, но доймин, дак няньсö эз ни ков кыскыны.

— А ме полi, Светлана Николаевна, — сiдз жö шутитö шогалiсь, — что тiйö тшыгйöн вермат кувны и меным тiян свадьба вылын оз усь йöктынытö.

Мылякö Федялö кажитчö, что Дима быдöс тöдö, тöдö, что Федя любитö Светаöс, и полö видзöтны ёртыс чужöмö.

Косялiсö палаткатор, кöдö кытiськö адззöма Петька, и керисö сыись носилка, водтöтiсö сы вылö доймöм кока мортöс.

Димаöс кыскöны вежласьöмöн. Рытнас ни, кöр деревняын быдöнныс узисö, нiя локтiсö Васькинаö.

15

Васькинаын отсöтсö не чожа адззан: не врач, не фельдшер, колö мунны посадöдз — дас километр ылына. Мый сэтöн керны?

Öшöтiс юрсö нельки Петька. Сьöкыта бы чулалiс эта ойыс ёрттэзлöн, да локтiс Пётр Петрович, не кулöм не ловья: öнöдз кошшöма Петькаöс и абу адззöма.

— Ен батюшко, Петька! Петька! Да тэ ловья! — эз тöд кыдз радуйтчыны Пётр Петрович, кöр казялiс Петькаöс. — А ме тэнö быд куст увтiсь садь быртöдз кошши. Мыся, ог адззы — юрöс петляö! Мый вöрыс мыччалiс! Мымда ни вöррезас ола, но этатшöм страстьсö эг адззыв. Кыдз чаркнитас, кыдз чаркнитас — ме клина-клёна пернапасася. Ме эд еныслö öнöдз верита, кыдз кöбылалö: кöр сiя кыскö, ме сы дор, кöр сiя оз мун, кöиннэзлö вöзъя. Былись, челядь, — ваксис Пётр Петрович, — кыдз чаркнитас — пернапас пукта, кыдз ризьнитас пуыс бокам — ме бöра. И молитва лыддя: эн вöрзьöт, мыся, лёк тöв-чарньöв менчим кагаэзöс, ась лоасö нiя дзоньöсь-здоровöсь... Унажыксö вон эта понда кори, — мыччалiс сiя Петька вылö и бергöтчис Дималаньö. — Только бы ойсö узьны, а ашын ме вайöта сэтшöм краля — сiя öтiк часöн сувтöтас тэнö кок вылö.

— Не ашын, а талун колö мыйкö керны, — шыасис сэтчö Прокопика. — Ме пондыла отсавны, — и домалiс Дималö пыктöм кок бердас майöвсора уль нянь.

Пётр Петрович одз асывнас, шондiтöг, мунiс посадö. Фельдшер локтiс луншöр гöгöрас, пешлiс Дималiсь коксö сiдз и этадз. Пыктöмыс ямöм: отсалöм Прокопикалöн лекарствоыс. Фельдшер сетiс мазь да порошоккез и мунiс бöр.

Эта бöрсянь зонкаэз да Света уджалiсö эшö куим лун, но Диматöг: сылö эшö эз туй ветлöтны.

Эна вöлiсö гажа, шондiа луннэз, но природаыс лöсьöтчис ар кежö, небура кельдöтiс. Ёрттэз лöсьöтчисö школаö — удж вöрын керсис. Света тожö лöсьöтчис мунны городö: гижис отчёттэз. Светалöн уна гижан удж, но кöр усяс минута шоччисьыштны, котöртö öтлаö ёрттэз дынö. Но частожык нывка чулöтлiс уджбöрся кадсö Федякöт.

И вот локтiс час янсöтчыны Светакöт. Вöлiмылякö быдöнлö гажтöмкодь, мылякö эз аркмы одззамоз басни. Кольлалiс нiйö Света ю сайöдз, мича Уролка сайöдз, быдыслiсь жмитiс кисö, висьталiс:

— Адззисьлытöдз, ёрттэз! Мöдгод татöн жö пантасямö!

Федя сулалiс бокынмоз, чöлiс. Сы моросын öнiолiс мыйкö шоныт, дона. Эта чувствоись сiя полiс и радуйтчис. Полiс, что Света примитас этö не былись; и радуйтчис, что эта лоис сыкöт первуись и былись.

— А этö тэныт, Федя, мед эн вунöт менö, — гажтöмамоз шуис Света и нюжöтiс сылö серöтöм чышьянок...