Шойнаок дорын



Миян санаторий вöлi медбасöк — картинка. Быд угöв, быд жыр керöм сiдз, нельки синнэтö гусялö. Этö керкусö строитлöм миллионер, сэтöн шоччисьлöмась кöркö богатöй отир. Неылын котöртö шор, шор дорас сулалö неыджыт вичку, и вичку одзас дзебöмöсь отир. Омöн зелёнöй пуэз кыдз вöрын, етша кылö городсис оланыс эта шойнаок дынö.

Ме шедi эта шойнаок дынö казявтöг: ветлöтi пуэз коласöт и, вдруг, невна эг тальччы цементiсь кисьтöм пöлоккез вылö. Пöлоккес вöлiсö тэчöмöсь басöка, ряддэзö, а ряддэс коласын быдмисö быд рöма цветоккез. Перво ме эг вежöрт, мый куйлö одзам, только лыддьöтi пöлоккез вылiсь ниммез. Пöлоккез вöлiсö унаöсь. Ме жагвыв шагнялi ны коласöт да лыддьöтi, и, кöр локтi ни шöрöдззас, меным юрам вачкис, что сэтöн куйлöны вийöм отир. Эстöн куйлiсö том отир, кöдналö талун колiс бы овны. Быдöнлöн вöлi гижöм чужан год.

Лыддьöтi и думайтi, вежöртi и эг вежöрт, что ме одзын вермасö куйлыны сымда кулöм том отир. И сэк сьöлöмам бытшкис, что эстi шагнялöм война. Кыдзкö эз веритсьы, что эстöн гымалiс война и вийис отирсö: вöлi лöнь, шоныт, цветитiсö цветтэз да сьылiсö кайез, воздухыс вöлi сöстöм, некытшöм порох дук эз патшкы нырö. Шоччись пöттöдз, некин тэнö оз адззы и оз вöрöт! И вот — сэтöн война. Война, кöдалöн следдэс вöлiсö ме одзын и сэтшöм следдэз, кöдна патшкисö гореöн, печальöн; война, кöда нетшкöвтiс том отирлiсь олан, керис кинлöкö вöвлытöм горе. Ме лыддьöтi кулöммеслiсь ниммесö, и сьöлöмöс пондiс бытшкыны öбида, пондiс менö давитны невежöртана тоска, и öзйис лöг чувство смерть вылö, кöда мырддис тöдтöм том отирлiсь олансö. Ме сувтi, кыдз öшöм, кыдз чарöтöм, ме эг тöд, мый меным керны: или жалейтны энö отирсö, или ыксыны быд вынсим, быд горшсим отирыслö, медбы быдöнныс локтiсö эта шойнаок дынö, сетiсö поклон эна отирлö. Ме эг адззыв, мый сэтшöм войнаыс, кытшöм сiя, но тöда, мый сэтшöм мортлöн смерть.

Сьöлöм уджалö, но сылö мылякö зубыт. Зубыт, ась эстöн отирыс куйлöны и тöдтöмöсь... Сьöлöм тöдö, мый сэтшöм войнаыс, кöть ачым войнасö эг адззыв и ог тöд, кыдз сiя гымалö. Сьöлöм тöдö, мый вöлi одзжык и мый вермас лоны одзлань может, войнаыс только дзебсисис, может, сiя видзчисьö, кöр тэ бергöтчан, и сiя бöрсянят тэнö бытшкас. Вот мыля охота горöтны быд горшись, ыкöстны отирсö, медбы нiя сулалыштiсö эта шойна одзын, ась нылöн сьöлöммезныс думайтасö менчим жö думаэсö.

Сьылöны каёккез — радöсь оланыс вылö, цветитöны цветтэз — радуйтчöны шондiыс вылö, лэбалöны бабыввез да гуттэз — тожö счастливöйöсь ас мознаныс, что олöны светас. Кытöнкö гажöн сералöны нывкаэз, кытöнкö укöстiс паровоз. И отирыс, и каёккес, и цветтэс, и гаггес олöны, уджалöны ассиныс удж, только эна вийöммес куйлöны шысеттöг. Мый бы керисö эна отирыс, ежели бы вöлiсö ловьяöсь?!

Дыр ме сулала вичку одзас, сё лыддьöта вийöммеслiсь ниммесö, и менам сьöлöмö баитö ныкöт, кöдна кöркö вöлiсö отирöн.

Гажтöм, лöньсьöм ме муна санаторийö. Туёк вылын пантасьöны уна отир, нiя басöка пасьтасьöмась и рада сералöны — эта экскурсия.

— Эта керкуын шоччисис Муссолини, — висьтасьö экскурсоводыс, — шоччисисö Гитлерлöн генераллэз, богатöй американеццез.

«А ми киннэз? — думайта ме. — Сашка, менам ёрт, — токарь, Василий Петрович — шофёр, ме — фельдшер. И ежели бы Латвия вöлi не советскöй, кин бы сэтöн шоччисис öнi? Адззылiм ли бы ми этö санаторийсö, кöдö нарошно строитлöмась богатöйез понда? И ежели бы не нiя отирыс, кöдна куйлöны вичкуок одзас...»

Ме тöда, что этö керкусö, кытöн ми олам, фашисттэз лöсьöтiсö взрывайтны, но нылöн нем эз пет: вашöтiсö фашисттэсö эта керкуись, кыдз кортöм гöссезöс, и меным этасянь охота локны да висьтавны экскурсанттэзлö: «Мый тi кывзат эта керку йылiсь, тi мунö да видзöтö вичку одзсис отирсö, кöдна сетiсö ассиныс оланнысö миян понда!» Но ме нем ог шу: отирыс жагвыв иньдöтчöны вичкулань, и нiя асьныс пантасясö эта шойнаоккöт, вежöртасö быдöс и висьтасясö мöдiккезлö, висьтасясö асланыс челядьлö. И, конечно, лэбтасö кинысö война вылö, мыччасö кулакнысö эта войналö, медбы сiя эз лысьт соровтны олансö аслас смертьöн.

ДОТТЭЗ



Мийö уйим учöтик пароходöн Лиелупа ю кузя Рижскöй заливöдз и сэтчинсянь бöр Юрмала городокö. Вöлi гажа, шондiа, жар. Мийö дюттясим ва вылын, юим сур, сёйим огуреццез, видзöтiм береггесö да береггез дорись керкуэз, вöр да отирсö. Миянлö вöлi керны напрочь нем кыдз отирлö, кöдна лечитчисö и шоччисисö.

Рижскöй залив дорын, кыдз только миян пароход сувтiс, отирыс гизьнитiсö баля табунöн берег вылö и каждöйыс öшис: курортник жаднöй, сылö колö море, море дорын песок, медбы пöжны боккез да лолавны сöстöм морскöй воздухöн. А миянлö Сашкакöт да Василий Петровичкöт песокыс эз ков: öткö, сiйöн, что миян шогöт шондiсö эз любит, мöдкö, ми инмим öткодьöсь, душа миян сё кошшö мыйкö вильö, адззывлытöмö.

Вот и ветлöтам берег дорöт, кывзам кыдз лолалö море, кыдз сiя ружтö ас кежас, видзöтам, кыдз чепсасьö ваввезöн берег вылö и петитчö дюттясьöмöн бöр. Вдруг син вылам меным мыйкö усис сэтшöм, кöдö ме эг вермы вежöртны, мый сiя сэтшöмыс: ыджыт изовöй туис.

— Видзöтам, — висьталiсö ёрттэз да иньдöтчисö эта туис дынö.

Туисыс вöлi ваза, только изовöй, неджуджыт да граньчатöй.

— Дот, — висьталiс Василий Петровичыс.

Ме кывлi дотыс йылiсь, но адззылi первуись. Пырим пытшкас: пемыт и кöдзыт, кыдз могилаын.

Мый эстöн вöлi, кöр сiйö строитiсö? Ог тöдö. Тöдам öтiкö — эта войналöн удж. А мый керис войнаыс?

Неылын мöдiк дот, сэтшöм жö. Одзаным море, бытьтö войнаыс пышшöм, котöртöм берег дорöдззас, кольöм коккесис сапоггесö берегас, а ачыс сунгисьöм мореас, медбы кокнитжык вöлi уйны, медбы не вöйны. Ми видзöтам войнаыс сапоггез вылö дивуйтчöмöн. Ме думайта гажöн: «Кöть бы войнаыс вöйис мореас и сэсся некöр эз мыччись отирыс син одзö!»