Столовöйын



Кöдзыт кузь тöв. Дженытöсь луннэс: шондiыс оз ешты мыччисьны — бöр ни саясьö. Кöр усьö лым, кöр вижгö тöв, уннялö керку угöввезын, трубаын, а кöр лёк мороз чеплялö рожабаннэз, кöть öтöрö эн пет. Но ми велалiм овны тöвнас, кужам джендöтны гажтöм луннэз, ог полö не пургаись, не кöдзытiсь. Отирыс öтiк лун тшыгйöн оз ов, а каёккес кыдз? Кытiсь нылö тöвнас вайны гаггез? Кытчö дзебсисьны лёк морозiсь?

Тöда, что таррез, дозмöррез да сьöлаэз тöвнас сёйöны кыдз гар, пожум лыс, ойезнас узьлöны лымын, кытöн шоныт и бур, кытiсь кайесö оз казяв не варыш, не рысь, не руч. А вот учöтжык ёрттэзным кыдз? Мый сёйöны пистöггез, дзулиммез, сьöвбöррез, жаккез да мöдiк кайез, кöдна тöв кежас некытчö оз лэбзьö, тöвйöны миян вöррезын? Тöда, что нiя оз тшыгьялö, но тöв эд, и чöскыт сёянсö гожумнас моз сёжö оз сёйö.

Курытжык оланыс и воробейезлöн. Нiя лэбалöны-гардчöны керкуэз гöгöр, узьлöны крышаэз увтын, вердчöны сэтöн, кытчö кисьтлöны помойез да ёг и ошшасьöны: «Чив-чив, миян коллектив! Ми оламö да немись ог полö!»

Пыри ме столовöйö, пукси пызан сайö сёйны, а воробейыс сэтöн и эм: быркнитiс-пуксис пызан вылö, сьöд синоккезнас пондiс видзöтны мелань и горалö: «Чив-чив, нянь да сов!»

— Спасибо! — висьталi каёкыслö да юалi. — Кыдз олан? Кытшöм здоровье?

— Чив-чив! Бура ола! — ошшасьö воробейыс. — Татöн шоныт и пыр пöт, а сэсся мый колö, чив-чив?! Вот локтас тулыс, лэбзя öтöрö, сэк чив-чив!

— Чож! — висьталi каёкыслö да одзас пуктi нянь тор, ачым пондi сёйны-панявны яяшыд. Ме сёйи, и воробейыс сёйис, сыбöрын петi öтöрö, а каёкыс кольччис овны столовöйыс пытшкын да быдöнлö ошшасьны: «Чив-чив, миян коллектив! Ми олам да немись ог полö!»

Кортöм гöсь



Локтö ар. Пуэз вылын вежöтö лист. Йöрись дзимлялöны картов, öшын увтаным льöмпуэз вылын лэбалöны да ас кежаныс шутнялöны пистöггезлöн быдса семья. Нiя весь миянö эз локтö: ме каёккесö быд тöв верда госöн, шыдöн, нянь торрезöн. Каёккес и радöсь, что ме нiйö ог вунöт, верда кöдзыт погоддяö, отсала джендöтны кузь тöвсö.

Кыдзкö локтi уджалансянь и адзза, что гöссезлiсь кинкö сёянсö сёйöм, гусялöм. «Кин жö адззисис сэтшöмыс? Поди, каньным? Или катшаэз да ракаэз адззисö заптöмсö да сёйисö-мырддисö пистöггезлiсь и öнi кытöнкö пукалöны да öтамöдныс коласын ошшасьöны: «Шедiс сёяныс, öнi тшыгйöн ог ни кулö!» Но меным сэтшöм гöссес оз бы колö, кöдна вердсьöны нятьын да ваын да эшö гусясьöны. Думайта этадз ас кежам и учöт каёккеслö пукта виль сёян. Эг на ешты пуктыны сёянсö, сэтчö быркнитiс гöрд шапкаа кыр и пондiс кузь нырнас сизьдыны-кокавны сёянсö да сiдз масьтö-сёйö, топ куим неделя ни тшыгьялöм.

Вашöтi кайсö, но сiя локтiс бöр, вердi уна, но сiя сё эз пöт. Беда сэтшöм горш гöсьыскöт.

Сэк ме кырсö кыйи пезимöн ¹. Сувтi лыжаэз вылö и нуöтi деревняным сайö да лэдзи вöрас, мыся, лэбзьы да сэсся эн лок, тэ меным он ков. Гортö вöрсяняс эг ешты локны, видзöта: кырыс одзалöм лэбзьыны öшын увтаным и бöра кокасьö, сёйö пистöггезлiсь сёянсö.

Мый жö тэкöт керны? Кыдз кидтыны öшын увтсиным? Öши да пондi думайтны кырыс йылiсь. Думайтi-кери, бöра сиялi пезиммез и бöра кырыс шедiс киам. Кайсö пыртi керкуö, узьтöтi коробка пытшкын, ашынас пукси додьö да ыскöвтi шогалiссез дынö Демидовкаö, öлöдзам коробкаын кырсö кыски йöз деревняö, лэдзи сэтчин.

Сыбöрсянь кортöм гöсьыс эз вовлы. Натьтö, миянö ылiсь деревнясянь туйсö эз адззы.

КÖК



Ме олi вöррез коласын роднöй посадын, кытöн керку гöгöраным быдмисö льöмпуэз да кыдззез, рябинаэз да жовпу, сэтöр да öмидз. Нiйö ме садитлi, кöр велöтчи витöт классын. Сэк жö и кери кайпоззэз, öшлi нiйö льöмпуэз да кыдззез вылö, пондi вочны быд тулыс да видзчисьны сьöдкайезöс. Тулыснас нiя пыр медодз вовлiсö миян керку дынö, медодз гажöтiсö асланыс тулысся песняöн. Эшö тöв и гожум льöмпуэз да рябинаэз вылын чивзiсö воробейез, кöдна пияннэзнысö пöжисö öшын вевдöрын. Пес костёр коласö познысö тэчлiсö сырчиккез, мукöдпыр чом жолоб увтын пияннэзнысö быдтывлiс зяблик. Кыдзкö эшö чом юр вылö локтiс кöк и сiдз асывнас пондiс кöкны да ошшасьны, что любо лоис кывзыны.

— Ку-ку! Пуктi! — Кöкыс кöкö, баитö-ошшасьö, бытьтö кытöнкö да мыйкö пуктöм и только öтнас тöдö, мый да кытчö пуктiс.

— Кук-ку! Пуктi! Кук-ку! Пуктi! — Чом юр вылын кöкис кöкыс да сэтöн жö серöмтчис: — китш-китш-китш! ― да виньдiс.

— Мый обороникалö колö?! Сiя чом выланым весь оз китшсьы... Умöль юöр новйöтö! — пондiс видны кайсö мамö.

— Мед кöкö, — висьталi ме, а сэсся вунöтi кöкыс йылiсь, кöда öтiк асылö пуксьылiс чомным вылö да сыбöрсянь лэбзис Картабöр видз вылö.

Гожумыс оз узь, чулалö: тöн садитiм картошка, бергöтчим öтöрö да мöдöрö, видзöтам, колö ытшкисьны ни. Топ тöн только сьылiсö сьöдкайез, а талун кайпозiсь лэбзисö ни пияннэзныс, и воробейес öшын вевдöрын лэбалöны лун-лун, пияннэзнысö вердöны гаггезöн.

Öтпыр асывнас мамö пырис öтöрсянь да шуис:

— Но-о-о, кин нö öшын вевдöрись воробейеслiсь пияннэсö шупкалöм?! А каньыс абу на ештöм пышшöтны...

Петi öтöрö, видзöта — сiдз и эм: воробейеслöн пияннэс му вылын, паськöтöмась бордоккезнысö, осьтöмась веж öммезнысö да корöны сёйны, а айныс да мамныс пияннэзнысö бытьтö оз и адззö, лэбалöны картошка коласö да бöр, ваялöны гаггез, вердöны. Тыдалö, кöда медлюбо, кольччöм позаныс.

Öшын увтiсь сиротаэсö ме каннес горшö кольны эг вермы: чомным бокись вайи пос, сувтöтi сiйö öшын берданым, морос одзам öктi кайпияннэсö и кайи посыс кузя воробейес поз дынö. И только киöс нюжöтi позыслань, кыдз паныт юрсö мыччис варыш не варыш... Но не воробей!

— Тэ мый сэтöн керан?! — лöсьöтчи йöз кайсö вашöтны позсис, но сiя пондiс кокавны киöс. А аймам-воробейес чирзöны-чирзöны, топ позаныс асланыс пиянныс.

— Кöть тi мый керö! — думайтi кайес йылiсь, кöр казялi, что воробейес вердöны кöклiсь пиян. Сэк жö турун чирись öшын вевдöраным жö тэчи öтiк поз дынö мöдiк поз и коли виль позас воробейеслiсь пияннэзнысö да пондi синйыны, мый жö, мыся, лоас одзлань.

Одзлань эг адззыв, медбы сэсся воробейезлöн пияннэс усьлiсö позсиныс, сiдз кö кайес быдтiсö и кöксö, и ассиныс кагаоккезнысö.

ЁРТТЭЗ



Олöны менам гортын пон Жучка да кань Мурка. Жучкаыс любитö ветлöтны вöрö, котрасьны да вувтны уррез вылö. Любитö вöравны менам нёль кока ёртö, но öддьöн ни оз любит каннез: лэдза понсö улицаö, сiя дзир-бар керас, казялас кö каньöс и — сэтчин! Ешты пышшыны!.. Жучкасянь öтöрись коттэслö олан абу, а кыдз керкуö пырас, сылö паныт чеччöвтö Мурка да пондö коккез дынын ниртчыны, ачыс мурзьö — рад, бытьтö куим неделя Жучкаыскöт эз пантасьлы и сэтчöдз гажтöмтчис, что оз тöд, мый керны. Кыдз висьтавны Жучкаыслö, что оз жö бы ков йöз каннез сьöрын вöтлiсьны, стыд жö бы вунöтны Муркасö, эд сiя видзчисьны оз вермы ёртсö? Каньыс мурзьö поныс дынын, а поныс нюлö каньсö, бöжнас öвтыштлö. А синнэзас сэтшöм, бытьтö сiя медсчастливöй, кöр гортын Муркаыс.

Нiя чужисö öтiк годö, только Жучкаыс тулыснас, а Муркаыс арнас, Жучкаыс быдмис чожажык, а Муркаыс жагöник. Öтыс пыр вöлi мыгöрнас ыджытжык да вынажык, а мöдыс учöт да вынтöмжык. Думайтсис, кöр пондасö орсны, дак поныс сё ни вермас каньсö, киж-каж керас, курччалас, вияс. Но поныс каньыскöт сiдз орсiс, что сiя öтпыр кив эз кер, эз пышшы Жучкаыс дынiсь, а пыр кошшис ёртсö, гажтöмтчис сытöг.

Öтпыр поныс öтöрын котрасьтöн сiдз доймис, что гортö локтiс куим кок вылын и öддьöн пондiс шогавны. Сiя водiс посöдзö, лэдзис бöжсö, синнэзас эз вöв одзза гаж. Сылö вöлi öддьöн сьöкыт.

— Эх, Жучка, Жучка! Колiс я сiдз? Мыля асьтö он берегит? — вида да жалейта понсö, а сiя видзöтö вылам, кыдз лöсьöтчö горзöмöн шуны: «Ачым эд... Кутчиси Тузикыскöт и сылö мыччалi!..». «Сэк и куйлы, мый меным...» — поныслiсь малыштi юрсö, пыри керкуö. А Муркаыс кольччис посöдзас ёртыс дынö да сэтчин и узис öтiк ой, сыбöрын мöдiкö...

— Вот бесыс! — только горöтчис мамö.

А «бесыс» эшö не сiйö мыччалiс... Палисадниканым быдмисö цветтэз. Ны коласiсь öтiк вöлi медбасöк, медъюгыт, гöрд рöма, цветитiс, кыдз бичир öгралiс, синнэз гусялiс. Асывнас мамö петалiс öтöрö, пырис и шуö:

— Цветыс кинлöкö колöм... Сiйö ни гусялöмась...

Ме тожö вöлi öтöрын, адззылi ни этö да паныт шыаси мамöлö:

— Абу я каньыс йыла пиннезнас курччалöм цветокыслiсь засö, орöтöм да кыскöм посöдзас поныс дынö, пуктöм Жучкаыс одзö коккес бердö...

— Вот бесыс! — бöра шуис пöрись мамö нето дивуйтчöмöн, нето гажöн, веритiс и эз, что каньыс вермас палисадникись нетшкöвтны цветсö да козьнавны поныслö.

— Он верит?! Мун да видзöт сэк, аслат синнэзлö мыччав...

— Оз куж баитны, а морт кодь жö ылöса, — содтiс каньыс йылiсь мамö.

Веськалiс Жучкаыс. Ми сыкöт одзлань ветлöтам вöрö, бöра сысянь улицаын коттэслö эз ло оланыс, бöра сiя тышкасьö соседдэз Тузиккöт, а кöр пырас керкуö, бöра ниртчö да нювсьö Муркакöт. И ежели Муркаыс шедас посöдзö, пондас нявзыны, пырö бы керкуö, Жучкаыс оз видзчись, кöр осьтасö ыбöссö, а ачыс öдззöтчас, лапаэзнас тангас ыбöсас и...: «Мурка, пыр!».

— Вот бесыс! — горöтчас пöрись мамö.