Челядьлö

Куим ёрт вöрын



1

Лымыс колодниккезöт вöлi пидзöсöдз ни, а вöраинын сё эшö тыдалiс пуягöд кокыс.

Арся вöрыс не ни гожумсякодь гажа да зелёнöй, а совсем мöдкодь — шучтыдалана, кыдз бытьтö сiя осьтiс ассис душасö мортыс одзын и шуö: «Видзöт, морт, ме тэсянь нем ог сайöвт, быдсöн тэнат». И кин адззö, вежöртö душасö арся вöрлiсь, сiя оз вермы сытöг овны.

Эз вермö овны вöртöг миян деревняись и кык ёрт Коля да Петя. Нiя прокод вöрын. И сьöраныс кыскалöны важ пишаль, кöдö важын ни колiс сетны музейö. Эна зоночкаэзлöн эм эшö ёрт — удав пон Беля.

— Асланыт смертьöн не кувны тiянлö, челядь: вийсят пишальнаныт нето öшат вöрас, — баитiс отирыс Колялö да Петялö. Мырддьыны пишальсö челядьлiсь вöлi некинлö: эна годдэзö мунiс война, и айезныс гортын эз вöлö. А маммезныс баитiсö:

— Ась ветлöтöны, ась кöть пишаль дукнас кöиннэсö повзьöтлöны, а то öдöлейтiсö. Да и абу ни учöтöсь, витöт год школаö котрасьöны.

Велöтчытöдз челядьлö эшö туйис вöравны, а тöвнас зэлыт лоис. Локтасö челядь школасянь — и вöрö. А вöрсяняс, может, ойшöр бертасö. Но и, конечно, ашынас двойка босьтасö. Öтпыр Коляöс да Петяöс нельки стенгазетаö рисуйтiсö: бытьтö узьöны вöр дорын кыкöн, и кöч эта коста пишальнысö гусялö. «Ась, — решитiсö Коля да Петя, — терпитам и этö, но вöрсö ог чапкö». И ветлöтiсö уроккез бöрсянь да кресенняэзö. Сэтöн жö колхозсис председательыс, кöда неважын локтiс фронт вывсянь и кöдалöн эз вöв шульга киыс, ветлöма директор дынö да баитöма, что челядьыс пö бур дело керöны: виясö пö десяток ур, дак и то шапка-мöд боеццезлö лоас. Эта бöрсянь школаын стенгазетаö эзö ни рисуйтлö том ёрттэсö.

Петя часто иньдалiс воныслö фронт вылö письмоэз и каждöй письмоын гижис, что деревняын тожö отирыс пессьö победа понда ой и лун и что нiя таво Колякöт вийисö уна уррез — подарок армиялö. А бöрья письмоас гижис, что, может, ачыс ваяс воныслö уровöй шапка. Эта йылiсь Коляся некин эз тöд.

Эта быдöс усис тöдвылас Петялö талун, кöр сiя шагнялiс вöрöт аслас ёрткöт. Кок увтын дзуртiс лым, орсiс пеллезын аскодь музыка. Эта орсöмыс да мечтаэз нуöтiсö Петяöс воныс дынö, кытöн горалiсö пушкаэз, танккез, самолёттэз, кытöн миян солдаттэз паздiсö фашисттэзöс. Вот бы сэтчин сюрны. А татöн мый? Разь уржугöс бöра виян...

Неылын гажöн пондiс вувтны Беля. Петя саймыштiс думаэзсянь, лэбтiс юрсö.

— Ур-р! — негорöн шуис Коля и тэрмасьöмöн, лымсö кöз уввез вылiсь пыркöтöмöн, мунiс поныс дынö. Беля чеччалö кöз гöгöр, орсö пеллезнас, рада видзöтыштлö челядьыслань. Беля — пон ылöса, кыдз морт, и некöр оз гыжьяв кöзсö, оз чеглав пиннезнас уввез. Тöдö сiя: пондас гыжьясьны — урыс повзяс и пышшас.

Челядьыс бура видзöтöны неыджыт кöзлiсь быд увсö, но син вылö оз усь урыс — дзебсисьöм уввез коласö.

— Эм-эм-эм! — рада вувтö Беля.

— Эм, — шуö Петя. — Видзöт, серöтöма лапкаэзнас лымсö.

— Тышкы,— тшöктö Петя Коляöс. Петя куим недельöн пöрисьжык ёртысся, лыйсьыны инмö буржыка, и Коля сiйö быдсöн кывзö. Кыдз Петя тшöктö, сiдз Коля и керö. Вöрын, кыдз и армияын жö, колö дисциплина видзны.

Коля кыскö косксис черок. Петя мунö ылöжык, мед тыдалiс кöзыс быдсöн — дынсянь йылöдз.

— Бум-м! — вачкö кöз бердö обухöн Коля. Кöзыс зэгнитчö, уввез вылiсь киссьö поснит лым. Сiя жагвыв пуксьö увдöрö, чежмасьö — сотчö шондi югöррез вылын, и вачкисьö, бытьтö кöзыс койыштiс челядьыс вылö жемчугöн.

Ур дрöгнитö, чылö вывлань, только паськыт бöжыс мелькайтö уввез коласын. Сэсся ур каттисьö витикöн кöз йылын, кынмö комочокö.

— Гым-м! — лыйö Петя. Ур берездасьöмöн, уввезö кышасьлöмöн усьö веськыта Беля öмö. Беля перыта жмитö пиннезнас урсö лым бердö, вийö урсö сiдз, что öтiк рана абу кучикас. Коля черöн орлалö урлiсь коккез, сетö нiйö Белялö, вöлись сюйыштö коскас вийöм урсö. Беля рад, чеччалö челядьыс мороссэзö — окалö бы. Кыдз вылö быркнитöны пистöггез, чирзöны-пиксöны, дзик видчöны, мыля урсö зоночка сюйыштiс ремень сайö.

— Кошшы, — сетö команда Белялö Коля. Поныс чеччöвтö кöззэз коласö, только кольта бöжыс öвтыштчö син одзын.

Учöтик вöралiссез мунöны одзлань, пыдöжык вöрас. Пантасьöны масiсь кодь веськыт пожуммез. Ны увтын, кыдз паркын, öтiк колода абу — росöн чышкöм; пантасьöны кыдззаиннэз, пантасьöны и крут чальöссэз да тöлöн пöрлалöм пу кучаэз, кыт мунны сьöкыт. Но челядьыс мунöны и сук кöзъя вöрöт, кытчö шондiыс етша видзöтлö, и вуджöны чашьяöн тырöм чальöссэз, и кыссьöны зу кодь тшöк том пипуаинöт. И быдлаын чочком лым да сöстöм, кокнита лолалан ру.

Челядьлö вöрыс — мöдi горт, и нiя уна тöдöны вöрлiсь олансö: сiя гижöм вöрас чуть тöдчана приметаэзöн и лым вылын, и пуэз вылын, и нельки кöдзыт руас. Не быдöн вежöртö этö, а вот Петяöс да Коляöс он бöбöт. Вежöртöны том вöралiссез, что лым кузя чеччалiс, шуам, не тар, а рака, что одзаныс чашья коласöт котрасьöм не чужмöр, а учкись. Радейтö эта понда вöрыс челядьсö, а челядьыс ― вöрсö. Уна нiя вöрсис адззылöны и тöдöны сэтшöмö, кöдö не быд пöрись морт адззылö деревняын. Вот, шуам, талун. Пондiсö челядь вуджны кынмытöм юок и повзьöтiсö воробейöс. А сiя не вывлань му вывсис лэбзис, а тульгисис ваас. Петя Колякöт кынмисö местааныс: «Тыдалö, бöбöв кайыс, вöйöтчис... Не весись шуöны, что воробейыс некодя кай, тöв и гожум гарйисьö нятьын». Но минута бöртi каёкыс бöр чеччöвтiс ва вевдöрас ловйöн — чудо! Или босьтны мöдiкö. Эта одзын, мöд кресеннянас, челядь пуксисö колода вылö шоччисьны. И вдруг юр вевдöраныс, кыдз снаряд, брякнитчис пожум бердö сьöд, сивöйсора пöрись дозмöр. Видзöтöны челядь: голяас пиннесö мöртöм чужмöр да сiдз и кулöм — кайыс аслас оланöн вийис ассис врагсö.

Мунöны том вöралiссез одзлань, лыддьöтöны вöрлiсь олансö. Вот котöртöма лым кузя туан. Эта басöк чож зверёкыс — хищник. Уна сы шогья кулöны кайез да уррез. И котрасьö сiдз, что чожа он вöт сiйö. Туан ветлöтö чашьяöт, колодаэз увтöт, лым кузя котöртас, лэбзяс-чеччалас пуэз вылöт, вились лэдзчас лым вылö и сы кузя серöтö аслас лэчыт гыжа коккезöн. Сылiсь следсö некöр он сорав мöдiккöт: дзик машинкаöн печатайтöма, быд шагыс öткодь, не кузьжык не дженытжык.

— Петька, туан эд котöртöма! — горöтiс Коля.

— Туан, — ыш ловзисис Петя, ачыс босьтiс пымалöм юр вывсис шапкасö да видзöтiс кöдзыт шондi вылö, кöда лöсьöтчис нöбöтны сьöрас югытсö да сетны ойлö этö вöрсö и энö учöтик вöралiссесö. — Ойнас мунöма, — тюкнитiс следсö чуньнас Петя. — А может, асъяпоннас, абу эшö чорзьöма следыс.

— Пемдам, Петя, — шуис Коля, кöр видзöтiс ёртыс синнэзö и вежöртiс сылiсь думасö.

— Пемдам, дак узям, но кутам, — висьталiс Петя и пиннес пыр шутньöвтiс не умöльжыка Соловей-разбойникся. Колода сайсянь чеччöвтiс Беля. Кылыс öмсис кузя öшöтчöма — мыдзöм поныс, чашыктö чожа, öмтырнас, но синнэс радöсь.

— Мыдзин? Но эн тöждiсь. Ме тожö тай мыдзи... То следыс, — Петя иньдiс Беляöс туан след вылö.

Беля невна котöртiс одзын, сэсся öвтыштiс бöжнас, вишкыштiс воздухсö нырнас — и öшис син одзись.

То ли туанлöн следыс, то ли поныслöн гажыс сетiс том вöралiссезлö вын, и Петя да Коля уськöтчисö туан следдэз кузя.

Туан, натьтö, тöдiс, что сы сьöрö пондасö вöтчыны, и котöртöма сэтшöм местаэзöт, что нельки Беляыс сувтчывлiс думайтыштны, кыдз сэтi мунны.

Том вöралiссезлöн вамисö йöрнöссэзныс, коккезныс дрöжитiсö мыдзöмсянь. А туан сё серöтöм и серöтöм лымсö, не öтпыр ни кайлöм пуэз вылö.

Вот и саясис ни шондi. Локтiс рыт.

— Тырмас, — мыдз голосöн висьталiс Петя. — Ашын лун локтас, а этадз нем оз пет.

Керисö бытшöм нодья, нельки лыссэзiсь шалашокöн. Ужнайтiсö тожö кыдз колö: пизьöтiсö ва, чай туйö заваритiсö пуягöд кор. Но баитiсö етша — дзик изöн нырыштiс мыдз да он.

Петя сетiс Белялö нянь тор, нюжöтчис лыссэз вылö и пондiс мечтайтны, кыдз нiя ашын вöтасö туансö и виясö сiйö, но сэтöн вдруг кисö нюжöтiс воныс да шуис: «Здравствуй, Петька!» И сэк жö Петя вылö, гусеницаэзöн жольöтöмöн, кайис немецкöй танк. Чеччöвтiс бы Петя, но эз вермы: чöскыт оныс эз лэдз аслас киэзiсь зоночкасö. А танкыс вöлi Беляыс, кöда пуктiс юрсö Петя морос вылö да онмöссис тожö чöскыт, но кокнит онöн.

2

Асывнас погоддя чорзис, лоис кöдзытжык. Кöдзыт руыс пырис том вöралiссез шалашö, еммезöн чуткöтiс быдöс вывтырнысö. Петя осьтыштiс синнэсö: вöр весьтын öшалiс лöзъюгыт, небоын кусiсö калитöм звездаэз, чискис нодья. «Узьышта эшö», — думайтiс аскежас зоночкаыс и вешшис матöжык билань, но сэтчö саймис Коля. Сылiсь мыдзöмсö и онсö ойыс кыдз киöн босьтöм, сiйöн только осьтiс синнэсö и рада горöтчис:

— О-о, югдö ни тай! Мед эз коль туанным... Коля перыта чеччис — он ни сэсся онмöссьы.

Кыдз и рытнас, пизьöтiсö чай, юисö. Чай бöрсянь Коля вартiс польдöм кынöм кузяас кидолоннезнас да ошшасис:

— Вот дак чай! Эта чай понда ме готов вöр шöрын лов сетны.

Петя шы эз сет, а чужöм вылас гижöм: «Ошшась буржыка!.. Бöра и лов ни сетан». Только Беля орсiс пеллезнас: сiя корис сёйны, да мый вот сетан? Чайыс не сы сьöртi.

Югдiс досповна, öшисö звездаэз; кöззэз, кöдна ойнас сулалiсö сьöдöсь, повзьöтчанаöсь, лоисö öнi вежжыкöсь, басöкöсь, а кыдз уввез пыр шуч тыдалiс сöстöм небоыс. И кыдз только небоын öшисö звездаэз, саймис вöрыс: стайкаэзöн, дзик ыджыт бабыввез, лэбалiсö пистöггез; неылын быд горшсис китшкис катша; кытöнкö карзiсö ракаэз. А кöз уввез вылын йöктiсö дзулюммез, питьыртiсö гöрд мороса жоннез.

Öшис тöння мыдзыс и Петялöн. Сiя радмис сысянь, что вот Беля, Коля да Петя öтлаын вöрись оланкöт тожö панталöны гажа асыв. Зоночкалöн гажажык лоис сьöлöм вылас и сысянь, что ойнас усьöма небыт лымок, и öнi каждöй букваыс вöр оланлöн талуння — свежöй.

— Но, мунам, — висьталiс Петя, и Беля котöртiс туан след кузя. Сы бöрсянь, бура видзöтчöмöн, мунiсö Петя да Коля. Вот лым вылöт чеччалöма ур; то лэбтiсьöма дозмöр — лымсö койыштöма борддэзнас. Но Беля талун оз кыв не оз адззы урресö да дозмöрресö, сiйö одзлань нетшкöвтö туан след. А учöт хищник мунöма колодаэз коласöт, тшöк тэлляинöт, кайлöма пуэз вылö — öштöм бы следсö. Но сэсся, тыдалö, мыдзöм, кыдз и том вöралiссес, и пырöм джуджыт мыр гыркö да узьöм сэтöн. Талун сiя мунöма неважын, может, öтдруг челядькöт. Беля кытшöвтöма гырка мырсö, пешлöма воздухсö нырнас, гыжьялöма мырсö и вöлись чеччалöма туан след кузя.

— Чожажык! — öтдруг горöтiсö вöралiссез, бытьтö зверёкыс син одзаныс чеччöвтiс кöзiсь кöзö, и сьöлöммезныс öддьöнжык пондiсö вартны мороссэзаныс.

Одзаныс лöга пондiс вувтны Беля. Вувтiс дугдывтöг, и вöрыс горалiс сiдз, бытьтö ордчöн орöттöг лыйсисö уна пишались.

Челядьыс чепöссисö поныс голос вылö. Вдруг Коля син вылö усис морт след, кöда поперегалiс вöралiссезлiсь туйнысö.

— Петя! — корис Коля негорöн ассис ёртсö.

Петя вежöртiс, что не весись корö Коляыс, повзьыштiс. Юрас койыштiсö не öтiк дума. Секунда бöртi Петя чеччöвтiс Колялань.

— Но, мый тэнат?

— То, видзöт.

Петя сувтiс ордчöн Колякöт, сьöкыта лолалiс ёртыслö голяас.

— Эх, кинкö одзалiс туансö кутны, — висьталiс Коля. Беля сё вувтiс лöга, орöттöг — вöрсö чарлалiс аслас гора голосöн, и сылöн голосыс жагвыв вешшис ылöжык.

Петя шы эз сет, мöртiс синнэсö морт следас. Мортыс шагнялöм кыдз код — öвтчöмöн, а коккезас, тыдалö, бырöм нинкöммез — следдэс паськытöсь.

— А может, ош? — повзьыштiс Коля.

Öнi вöлись Петялö тöдвылас усис, что вöрын эм ош, и эта следыс ошлöн.

Петя шысеттöг сюйыштiс карманас кисö, кытöн вöлi патрон пуляöн. Только öтiк патрон...

* * *

Пöрись вöралiсь, кöр сылöн карманас только öтiк патрон пуляöн, ордйö ошсö. Тöдiсö я челядь эта йылiсь? Может, и кывлiсö, но öнi, кöр нiя инмисö ош след вылö, натьтö, вунöтiсö этö гижтöм правилосö.

— Мунам? — юалiс Коля.

— Вöтчам! — шуис Петя да вежис пишальсис патронсö. — Только чертö кыскы косксит да мун шаг-мöд бокынжык. Чепöссяс — сöт, эн повзьы.

Вöралiссез пымалiсö, пессис сьöлöмныс. Но полöм эз вöв, а вöлi смев решеннё — вöтны ошсö. Нiя эз тэрмасьö: тöдöны, что ош оз пышшы; абу Белялöн сэтшöмыс, медбы лэдзны зверьöс, кытчöдз эз адззыв хозяиныс.

— Натьтö, сылöтас, — баитiс Коля. — Ошыс оз пö вод лым усьтöдз. А эз вод, дак сылöтас...

— Может, сiдз, — согласитчис Петя. — А может, шатласись ошыс.

А Беля сё камгö-вувтö. Матын сiя — киöн судзöт, — но син вылö оз усьö не Беляыс, не ошыс.

Эшö оськöв, эшö... Вот рякöстiс ошыс — вöрыс зэгнитчис. Том вöралiссесö кöдзыт ваöн кисьтiс. Ордчöн орöттöг чирзiс-жексiс сера кай — жак, дзик корис вöралiссесö чожжык вийны ошсö.

Öнi Петя шагнялiс гусясись кань моз: полö тальччыны кузьжыка да чорытжыка, мед ошыс эз чеччöвт пу сайсянь. Син одзаныс, шондi югöррес увтын, орсö-югьялö лымыс, мешайтö видзöтны, пемдöтö синнэз. Эшö оськöв, эшö... Дас метр ылына одзаныс чеччöвтiс бокö Беля.

Мурзьыштiс ошыс, — челядь чочкоммыштiсö. Петялöн киас пишальыс вöрис чуть тöдчана дрöжитöмсянь.

Эшö оськöв, эшö. Лымыс сiдз дзуртö кок увтын, нельки пеллез лоöны зубытöсь, нельки вевттьö Белялiсь вувтöмсö. Жак лэбзьыштiс кöзоккез сайсянь, горöтiс повзьöм горшнас и бöр дзебсисис тэлляинö. Петя жаралiс. Колялö лоис кöдзыт. Но нiя эз сувтчö. Петя шагньöвтiс колода. Паныт сылö, кöзоккесö монлалöмöн, чеччöвтiс ыджыт, ота кымöса ош. Шед эта зверь лапа увтö — ляпкöтас, кыдз номöс, он ешты и горöтны. Брр!.. Беля вирдыштiс-чеччöвтiс ошыс спина вылö, лякасис, топ зi, кучик бердас. Ош рякöстiс, перыта бергöтчис бöрись лапаэз вылас, камыртiс бы понсö, но сiя, дзик мяч, чеччöвтiс бокö.

— Уу-ах-х! — поткöтiс и вöрсö, и небосö лыйöм. Не только пуляыс, но и пишались биыс пöжалiс ошсö. Сiя рякöстiс, вачкис лапанас ордчöн сулалан кöзокö. Кöзокыс сiдз зэгнитчис, что не только голиэз киссисö, но и уввес эз вермö öшшыны асланыс местаын. Быдöс этö ештiс адззывны кынымкö секундаöн Коля. А сэсся лоис сiя страшнöй минутаыс, кöдö некöр оз вунöтлы Коля: синнас эз ешты кваркыштны, кыдз ошыс вожасис Петя вылö.

Колялöн сьöлöмыс янсалiс, син одзас пемдiс. Но этадз вöлi только öтiк секунда. Мöд секундаас син одзсис öшис пемытыс, и зоночка казялiс югыт шондi да ыджыт зверьöс. Эта зверьыс сразу кисьтiс зонкаыс киэзö сэтшöм вын, что Коля только кыкись чеччöвтiс ошыс дынöдз и быд вынсис сöтiс чернас сылö пеллес коласö. Ошыс ружöктiс сьöкыта, сувтiс бы бöрись коккес вылö, но эз вермы: Коля сё масьтiс, кыдз заводитöм, голясö, кымöссö, пеллесö. Вир чижйис сы синнэзö, паськöм вылас, резсис небыт лым вылö. И Колялöн эз вöв некытшöм полöм, вöлi ыджыт лöг да öтiк дума: вежтыны зверьлö öбидасö аслас ёрт понда.

Беля öшалiс ош голя бердын и киргис-пöдiс то ли лöгсяняс, то ли ош вирсянь, кöда бульгис-петiс ош голяись веськыта поныс öмö.

Но вот ошыс сыр-лёль пöрис Петя бокö, Беля нетшкöвтiс пиннесö зверь горшись и öдззис летны ошлiсь пеллесö.

Коля вöрзьöтiс Петяöс. Сiя шы эз сет.

— Петя! Петька! — зэгйö ёртсö Коля. — Чеччы, Петька, тэ мый?!

3

Вот кытчöдз вайöтiс том вöралiссезöс туанлöн след — Петяöс ляпкöтiс ош. Мыля сiйö, нелюбöй душаöс, абу вермöмась вийны одзжык? Мыля сiя пантасис челядьлö, а не пöрись вöралiсьлö?

Беля торйöтчис ош бердiсь, никсытöн нюлiс Петялiсь киэсö, синнэсö, öмсö.

— Ой-и-и-и, — вдруг ружöктiс Петя.

— Петька-а! — дрöжитан голосöн ыкöстiс Коля. — Петя!

Петя осьтiс гудыра синнэсö, дыр видзöтiс Беля да Коля вылö.

— Петька! — пöдöмöн ыксiс Коля да малалiс ёртыслiсь вирöсь юрсисö. — Кылан, саймы...

— Зубыт, — шуис Петя.

— Кыт зубыт? Юрыт? — юалiс Коля да чöвтiс ассис йöрнöссö, косявлiс сiйö торрез вылö и нiйöн каттис Петялiсь юрсö да голясö.

— Юа бы, — корис Петя.

Коля чожа öзтiс биок, сылöтiс лым — керис чай. Кöр пизис чайыс, Коля йöктiс би гöгöр: рад лоис, что Петя ловзис. Беля тожö вöлi рад: чеччалiс Коля моросö, нюлiс Петялiсь чужöмсö да горöн никсiс. Петялöн эна кык другыс часöт готовöсь быдöс керны, мый тшöктас Петя. Тшöктiс бы асьсö лэбтыны тöлiсь вылö — пондылiсö бы.

Шондiыс локтiс луншöрас, орсiс аслас югöрöн ош вылын, дзик сералiс зверьсö. А челядь юисö чай — сэтöр да пуягöд кор сорöн пизьöтöм лым ва. Сiя тöвся вöрас и сахартöг, и няньтöг чöскыт...

— Коль менö этчö, — корö ёртсö Петя. — Коль, ог жö кув. А тэ вайöтан кинöскö гортiсь.

Коля эз кывзы этö баснисö Петялiсь, а шысеттöг керис нинпу качись лоток, пуксьöтiс сэтчö ёртсö да кыскис гортланяс. Мунны сьöкыт, колö ордйыны быд колодасö. А туйыс кузь. Коля мыдзис. Мыдзöмсянь висис юрыс, гудрасис сьöлöмыс. И стрась сималiс кынöмыс. Но сёйны нем.

Оськöв, эшö оськöв. Лым дзуркöтö кок увтын, дзик нерсьö. Колялöн коксадь орö. Син одзас орсöны гöрд номмез. Горшыс сотчö-косьмö — баитны ни оз вермы.

Сьöкыт, öддьöн сьöкыт. Лымыс и вöрыс дзик личкöны сiйö — пичкöны бы зоночкалiсь сьöлöмсö öмöттяс. Но сы ёртлö эшö сьöкытжык, и колö отсавны сылö. Кувны, но отсавны.

— Мун öтнат, — корö Петя.

Коля лöгасьö ас вылас, гичыртö пиннесö и мунö одзлань. Беля котрасьö ордчöн и оз тöд, кыдз отсавны Колялö. Беля эз ов тундраын и оз куж кыскыны Петяöс. Коля öнi оз ни ордйы колодаэсö, а киэзас вуджöтö ёртсö. Вот и бöра колода. Коля öдва-öдва вуджöтiс ёртсö. Эшö кымöс вылас кытiськö петiс сола ньылöмлöн воть, эшö кытiськö локтiс коккезас вын, медбы мунны одзлань.

— Мун öтнат! — ыксö нёштöм голосöн Петя. Коля шысеттöг шагнялö одзлань. Сiя талун ачыс тöдö, мый керны. А лымыс сё дзуртö кок увтын, дзик шувлö: «Мун öт-нат, мун öт-нат». Этасянь юр дурмö, и мукöдпырся Колялö кажитчö, что смертьыс чанзö пель одзас: «Мун öт-нат, мун öт-нат!» Коля падмö колодаö, саймыштö вöтсис. А пеляс сё смертьыс ыксö: «Мун öт-нат, а ме сёя ёрттö!»

— Бöбöтан! — лöга киргö зоночка. — Ог коль...

— Чапкы кöть пишальсö, — корö Петя. Коля шагнялö одзлань.

Шондiыс öшö син одзись вöр коласö, лоö пемытжык да кöдзытжык. Адззö Коля: луныс чулалö, и сылö талун не локны гортöдз. А школаын и, натьтö, гортас полöны, что мыйкö лоис ныкöт. Кутö öбида, что эз вермö вийны туансö и нем лоас нöбöтны боеццезлö фронт вылö. И ошлiсь кучиксö колисö вöрас. И Петяыс... «Петька, Петька! Эн жö кув!» Колялöн горшас тасасьö тшакыль, сола синваэз вотялöны лым вылö.

— Колька, юа бы, — бöра корö Петя.

Коля коккезö дзик домалöмöсь гиряэз — сэтшöм сьöкытöсь нiя. Но Коля чеглалö кöс уввез, öзтö биок, сылöтö лым. Сэтöн и вöтiс ойыс вöралiссесö. Коля кыськö кыскис бöрья вынсö, керис нодья, кыза ольсалiс лым вылö лыссэз, водтöтiс шогалiсьсö матöжык би бокö.

— Эх, Коля! Мыйлö тэ менö кыскан? — баитö Петя. — Кöть бы ачыт вермин муннытö... Чорзям вот кыкнанным этчö.

— Но и морт жö тэ, Петька, — дивуйтчö Коля. — Тöн баитiн öтiкö, талун — мöдiкö!

— Мый ме тöн баитi? — оз вежöрт Петя.

— Вунöтiн разь? А воныт дынö кöр мунан? Али модьны весись кокнитжык? — кöритö ёртсö Коля.

— Ме ог лёб весись, Колька. Веськала — вот и мунам. Петя пондö баитны гажöнжыка, и Колялöн сьöлöм вылас лоö кокнитжык. И мыдзыс чинö.

— Мунам, — баитö Петя, — и фашисттэсö начкылам, кыдз ошсö жö... Эх, и рад лоас вонö, Коль!.. И тэнат, натьтö, тятюыт тожö...

— Конечно, рад...

Би бокын шонтiсьö ыджыт мечта. Не этасянь я Петялöн ранаэс дугдöны доймыны, а Колялöн и мыдзыс öшö, и кынöмыс оз симав? Беля умнöй синнэзнас видзöтö аслас ёрттэз вылö и вежöртö быдöс, но оз вермы баитны. А пемыт вöрыс шушкö гажтöма, полöтöмöн, кыдз отир шушкöны керкуын, кытöн куйлö покойник. Только биыс сетö невна гажсö аслас чалöтöмöн, сетö шонытсö.

Шушкö, кышöтö гусьöника тöвся вöр и тач оз кер. Этасянь Колялö öддьöн сьöкыт, сiдз и чеччöвтöны бы синваэс, но зонкаыс гичралö пиннесö, да оз горзы.

Ружтö Петя би бокын: то ли гажтöмсянь, то ли зубытсянь, то ли онзыльувьяс. А то и чирöстас мый вын:

— Коля, ошыс, ошыс!!!

Коля, кöть и мыдз, узьö кокнит онöн, сразу саймö и чеччöвтö Петя дынö, а сэтчин Беля окалö ни ёртсö. Петя осьтыштö гудыра синнэсö и бöра пондö ружтыны.

Ох-хо-хо! Сьöкыт шогалiськöт ойся вöр шöрын. И некин оз вермы отсавны. Только вöрыслö кокнит: сё шушкö-сьылö мыйкö ассис. И звездаэзлö кокнит: нiя дзардöны-радуйтчöны небоас и не оз кынмö, не кынöмныс оз симав, И смертьыс ны дынöт оз ветлöт.

Коля водö зэв Петя бокö, кутö сiйö кинас. Öнi Петялöн сьöлöмыс токöтö ёртыс ки увтын, öнi Петя некинлö оз сет ёртыслiсь сьöлöмсö.

Кузь арся ойыс, да дженыт оныс вöралiссезлöн: оз узьöт талун. Колялöн юрас öтiк дума: кыскыны чожажык гортö ёртсö. Но кöр югдас, кöр шондiыс гажсö ваяс?

Сiдз и эз куньлы Коля синнэсö остатки ояс: то пукалiс би дынын, то ветлöтiс ордчöн.

Югдандорас Коля бöра доддясис лотокас. Вот и саймисö ни каёккез, гöрдöтiс ни асывланься небоыс, лöсьöтчис мыччисьны шондi. Вдруг Беля эрзытöн чепöссис чашья коласö. Коля дрöгнитiс, сувтiс, мöртiс синнэсö Беля ладорö и сэк жö казялiс, кыдз пу вывсянь уськöтчис поныс вылö кытшöмкö зверь. Коля кватитiс спина сайсис пишальсö, чеччöвтiс Белялань. Поныс эрзiс лёка, орöттöг. Коля петiс кöзоккез сайö и эз вермы вежöртны, мый сэтöн керсьö: лымыс тшакыльöн гардчис поныс гöгöр, и эта тшакыльын кинкö кивзiс, эрзiс, бытьтö поныс пурис асьсö лешаксö горшöттяс. «Понсö кинкö летö», — мелькнитiс Коля юрын, и зоночка метитчытöг лыйис руд тшакыляс медбöрья патроннэс. Кöр разьсис тшакыльыс, Коля казялiс лым вывсис куим туша: Белялiсь да кык вöрканьлiсь — рыссезлiсь.

Зоночка котöртiс поныс дынö. Сiя киргис-лолалiс, öмсис петiс быгсора вир.

— Белька, Белька! — кытсалiс понсö Коля. Белялöн чепöссисö синваэз. Коля первуись адззис, что пон вермö горзыны. Зоночка кватитiс морос одзас понсö, окалiс нырсö, синнэсö, малалiс голясö. Но Беля только сьöкыта ловзисис, дрöгнитiс и сэк жö юрыс сыр-лёль öшöтчис.

— Белька-а! Белю менам! — повзьöмöн баитiс Коля. — Эн жö кöть кув. Кылан, Белю?

Но поныс нем ни эз кыв. Эз ло Колялöн умнöй нёль кока ёртыс. Вежöртiс этö Коля и брякнитчис öтлаын поныскöт лым вылö... Синнэсис чужöм пасьтас чепöссисö пым синваэз...

Горзöм бöрсянь сьöлöм вылас лоис кокнитжык, только öшис коксадь. Коля нёльподöн кыссис поннас колодаэз коласö, тыртiс лымнас Белясö, крест туйö сувтöтiс поныс могила вылö пишальсö и, юрсö öшöтöмöн, колис этö умöль местасö. Гажтöма шушкисö ыджыт кöззэз, кöдна öтнаныс адззылiсö вына вöрканнезлiсь öтка понкöт нечестнöй битвасö...

Петя саймöма, видзчисьö, тыдалö, ёртсö.

— Мый сэтчин? — юалiс сiя негорöн и бергöтiс синнэсö кöззэзлань, кöдна вылын карзiсö ни ракаэз да китшкис катша — кайес öксисö кокавны кулöм вöрканнезлiсь синнэз.

— Урöс тай пезьдöтi, — висьталiс Коля. — Давай, Петя, мунам.

* * *

Мöдöдз лун ни отирыс кошшисö вöралiссесö, но некыдз эз вермö адззыны: ыджыт миян вöрыс, и мортыс сыын — кыдз идзасын ем. Но рытъяв гöгöрас деревня сайись, вöр дорись, челядёккез казялiсö мортöс. Мортыс мыйкö кыскис дадьöн, кыскис сьöкыта, джöмдалöмöн. Ошöс я мый я вийöма?

Челядь дыр видзöтiсö эта вылö, кытчöдз кинкö эз горöт:

— Коля! Коля эта!

И быдöс деревняыс уськöтчис ыб вылö, паныт Колялö.

Коля эз горзы, эз норась, только мыдзöм синнэзас югьялiс кöдзыт биок да кымöс пасьтас нюжалöма векнитик чукыр. И эшö голосыс лоöма кызжык да ровно ныр вывсис чангыльыс чинöма.