Послание Новгородского Архиепископа Геннадия Митрополиту Симону об организации училищ для детей и кандидатов в священники (ок. 1499).

«Господину Отцу моему Симону Митропо­литу всея Русии, сын твой Apxиепископ Ве­ликого Новагорода и Пскова, Владыка Генадей челом биет. Что, господине, говорил ecи о подьяческом ставление, которые подьякы малы ставлены, неженаты, и которые обещаются девствовати [действовать – А.Р.] тем ослобожено и дияконский и ерейский сан взяти, а которые ся женят тем не войти в дияконский сан ни в ерейский, да и список ми еси прислал о том от божественых правил: ино, госпо­дине, Апостольское Правило 26-е в причет преже брака пришедшим велит четцем и певцом токмо, аще хотят, да женятся; а на­ши, господине, подъякы мало ся рознили с четци и с певци, толко одним стихарем и входу во святый олтарь; а четцем и певцем ведь писано предолтарие, приимшим рукопо­ложение от Епископа, верх прострижен, носящи краткий фелонь; а подьякы аще имеют вход во святый олтарь, а ведъ не причащают­ся, причастие им токмо в великое говейно бывает; а Анкирскаго Собора Правило 10-е в толковании того правила, сице глаголет: «аще диякон преж поставления вопрошен будет от Епископа, свидетелствует о себе предстоящими ту, яко не могу девьствовати, но хощу на общение браку прийти, да не възбранится ему и по поставлении к браку прийти, и пребывати в той службе и ч[ес]ти»; а подьякы ведь робята глупые, над собою того не ведали; ино ми ся мнит, как бы то подоб­но тому Анкирскому Правилу, что будет им непоступно в дияконский чин или в ерейский, а подьяческой сан познают, пригоже им держати после женитбы. Да как ты, господин Отец наш, на что преложишь, и ты пожалуй и мне вели о том ведомо учинить, чтобы еси пожаловал прислал грамоту за своею печатью. А пущи того беззаконие в всей Руской земле ведется, мужикы озорные на крылосе поют, и паремью и апостол на амбоне чтут, да еще и в олтарь ходят: ино бы то беззаконъе вывести. А яз, твой сын, ныне у себя ставлю диякы да и грамоты им ставленые даю, занеже изобрел есми в Новегороде на крылосе поют диякы двоеженци; да и к тобе есми о Федке о двоеженце посылал грамоту, и ты, господин Отец наш, ко мне о том и отписал: и каковы гра­моты ставленые даю сторожем и дьяком, и яз с тех грамот к тебе господину своему Отцю противен слово в слово послал, и ты, господин Отец наш, сам того дозришь, приятно ли то будет, да мне бы еси сыну своему и о том отписал. Да бил есми челом Государю Великому Князю, чтобы велел училища учинити; а ведь яз своему Государю воспоминаю на его же честь да и на спасение, а нам бы простор был: занеже ведь толко приведут кого грамоте горазда, и мы ему велим одны октении учити, да поставив его да отпущаю боржае, и научив как ему бо­жественая служба совершати; ино им на меня ропту нет. А се приведут ко мне мужика, и яз велю ему апостол дати чести и он, не умеет ни ступити, и яз ему велю псалтырю дати и он и по тому едва бредет, и яз его оторку [отторгну – А.Р.], и они извет творят: «земля, госпо­дине, такова, не можем добыти кто бы горазд грамоте»: ино де ведь-то всю землю излаял, что нет человека в земле, кого бы избрати на поповство. Да мне бьют челом: «пожалуй деи, господине, вели учити»; и яз прикажу учити их октении, и он и к сло­ву не может пристати, ты говоришь ему то, а он иное говорит; и яз велю им учити азбуку, и они поучився мало азбуки да про­сятся прочь, а и не хотят ее учити. А иным ведь силы книжные немощно достати, толко же азбуку границу и с подтителными словы выучить, и он силу познает в книгах велику; а они не хотят учитись азбуке, да хотя и учится, а не от усердия, и он живет долго; да тем-то на меня брань бывает от их нерадения, а моей силы нет, что ми их не учив ставити. А яз того для бью челом Государю, чтобы велел училища учинити, да его разумом и грозою, а твоим благословеньем, то дело исправится; а ты бы, господин Отец наш, Государем нашим, а своим детем Великим Князем, печаловался, чтобы велели училища учинити; а мой совет о том, что учити во училище, первое азбука граница истолкована совсем, да и подтителные слова, да псалтыря с следованием накрепко; и коли то изучят, может после того проучивая и конархати и чести всякыя кни­ги. А се мужики невежи учят робят да речь ему испортит, да первое изучит ему вечерню, ино то мастеру принести каша да гривна денег, а завтреня также, а и свыше того, а часы то особно, да те поминки опроче могорца, что рядил от него; а от мастера отъидет, и он ничего не умеет, толко-то бредет по книге, а церковнаго постатия ни­чего не знает. Толко ж Государь укажет псалтырю с следованием изучити да и все, что выше писано, да что от того укажет имати, ино учащимся легко, а сяк не смеют огурятися. А чтобы и попов ставленых велел учити, занеже то нерадение в землю вошло, и толко послышать то учащиися, и они с усердием приймут учение. А ныне у меня побежали ставленикы четыре, Максимко, да Куземка, да Офоноско, да Омельянко мясник, а тот с неделю не поучився ступил прочь с ними ж; а и православны ли те будут? По мне, ино те непригожи в попы; о тех-то Бог Пророком рече: «ты разум мой отверже, аз же отрину тебе, да не будеши мне служитель». И ты бы, господин Отец наш, Государем Великым Князем печаловался; а яз твой сын тебе своему го­сподину Отцу челом бию».

Акты исторические, собранные и изданные Археографическою комиссиею. –

Т.1. 1334-1598. – СПб.: Тип. Эксп. загот. Госуд. бумаг, 1841. – С. 146-148.

* псалтырного