Коми литератураысь 9 классын вомгора да гижан уджъяс

1. Художествоа, велöдан, туялан да публицистика текстъяс колана ногöн да öдöн лыддьöм. Художествоа гижöд велöдöм.

2. Литература гижöд серти юалöмъяс да вочавидзöмъяс лöсьöдöм.

3. Паськöдöм план лöсьöдöм.

4. Видлалöм гижöд серти, олöмын лоöмтор серти, искусстволöн мукöд сикас произведение серти сочинение лöсьöдöм.

5. Литературно-критическöй статья дiнö тезис лöсьöдöм.

6. Литература тема серти доклад дасьтöм.

7. Олöмын да литератураын проблемаяс серти гижöд дасьтöм.

8. Гижысь да сылöн творчество йылысь висьталöм.

9 Классын тöдöмлунъяс да кужöмлунъяс сöвмöдöм

Велöдчысьлы колö тöдны:

• йöзкостса лирика сьыланкывлысь шöр аслыспöлöслунъяс

• 19-öд нэмся коми литературалысь сöвмöмсö; И.А.Куратовлысь олан да гижан туйсö;

• 20-öд нэмся коми литературалы подув пуктысьяслысь творчествосö;

• видлалöм произведениелысь аслыспöлöслунсö;

• литература теорияысь велöдöм понятиеяс

• эпос, лирика да драма гижöдлы медшöр лöсяланаторсö;

Велöдчысьлы колö кужны:

• видлавны художествоа гижöдсö сылöн род да жанр серти;

• восьтыны герой образлысь аслыспöлöслунсö;

• гöгöрвоöдны велöдöм кадколастъясса литературалысь аслыспöлöслунсö;

• лöсьöдны öти гижöд серти доклад да реферат;

• гижны отзыв асшöр лыддьöм небöг, видзöдöм кинофильм, телепередача либö спектак йылысь;

• вöдитчыны велöдчан да отсасян литератураöн, кывкудъясöн.

10 Класс (102 час)

ПЫРТÖД (2 час)

Гижысьлöн олöм. Гижысьлысь олан туйсö тöдмалöм. Художествоа творчествоын гижысь биографиялöн петкöдчöм. Художествоа автобиография да биография.

КОМИ ЛИТЕРАТУРА ХIХ НЭМÖ (5 час)

И.А.КУРАТОВ «Кор вöйписны-керисны Лессинг, да Шиллер, да Гете…», «Тэ гöль да сы пыдди тэ бур …» (Бернслöн), «Антикъяс Парижын» (Шиллер серти), «Колумб» (Шиллерлöн). «Вöт» (Вольтерлöн), «Виччысьöм и лоöм» (Шиллерлöн).

И.А.Куратов да суйöрсайса поэзия.

«КОР ВÖЙПИСНЫ-КЕРИСНЫ ЛЕССИНГ, ДА ШИЛЛЕР, ДА ГЕТЕ…». Германиялысь кык сикас вын паныд сувтöдöм. Культура сöвмöдöмын, олöмсö видзöмын ыджыд таланта йöзлöн тöдчанлун. Поэтъясöс вунöдöм Германия – война пестысь страна. Античнöй ен Афина-Палладакöд да салдаткакöд Германияöс орччöдöм.

«ТЭ ГÖЛЬ ДА СЫ ПЫДДИ ТЭ БУР …» (БЕРНСЛÖН). Гöль мортöс ошкöм-ышöдöм. Мортлысь мывкыдлун да уджавны сям зарниысь вылöджык пуктöм.

«АНТИКЪЯС ПАРИЖЫН» (ШИЛЛЕР СЕРТИ). Кывбурын война да культура тема. Искусство дорö кын сьöлöма мортöс вандалкöд орччöдöм. Збыльысь вöвлöмторлы – Наполеон войскаяслöн Европаын шобсьöмлы – паськыд вежöртас сетöм.

«КОЛУМБ» (ШИЛЛЕРЛÖН). Кывбурлöн шöр мöвп: генийлысь кывзысьö ачыс вöр-ваыс, муюгыдыс. Колумб образлöн аллегорическöй вежöртас.

«ВИЧЫСЬÖМ И ЛОÖМ» (ШИЛЛЕРЛÖН). Кывбурын аллегория нога серпас: томлун да пöрысьлун, овны пондысьöс да олöмсö вуджöм мортöс орччöдöм.

«ВÖТ» (ВОЛЬТЕРЛÖН). Царлöн корона – йöз вылын власьтлöн символ. Вöтлöн вежöртас. Кывбурлöн виччысьтöм пом, шуда олöм вылö лирика геройлöн видзöдлас.