2. Кыдзи донъявны лыддьысьöм да юрысь висьталöм

V–IX классъясын лыддьысьöм донъялiгöн колö кутны тöд вылын, бура-ö велöдчысь лыддис текстсö (колана шуанногöн да костъясöн). Юрысь висьталiгöн пыдди пуктыссьö художествоа текстлысь сюрöссö бура гöгöрвоöм да сьöлöмсянь висьтавны кужöм. Юрысь висьталöм отсалö велöдчысьяслы бурджыка гöгöрвоны текстлысь пытшкöссö, сöвмöдö сёрнисö, велöдö петкöдлыны сьöлöм кылöмъяссö. Сiдзкö, татшöм висьталöм донъялiгöн колö артыштны челядь сёрнитанноглысь да мöвпаланноглысь сямсö, шуанногсö, колана юкöнъяс да кывъяс тöдчöдны кужöмсö.

«5» пуктыссьö, велöдчысь кö кужö ясыда да сьöлöмсянь лыддьыны; литературнöй кывйöн кужö висьтавны лыддьöмторсö да петкöдлыны сы вылö ассьыс видзöдлассö.

«4» пуктыссьö пöшти татшöм жö лыддьöмысь, но та дырйи велöдчысь:

– öти-кыкысь дзугсьö;

– оз дзик колана ногöн вöч костъяс да торкыштö шуанногсö;

– вежöр серти висьталiгöн оз петкöдлы тыр-бура текст тöдöм.

«3» пуктыссьö, велöдчысь кö оз сяммы лыддьыны бура, висьталiгöн дзугö текстсö, тэрмасьö либö вывтi ньöжйö висьталö, колялö велöдöмторлысь öткымын юкöн.

«2» пуктыссьö, велöдчысьлöн кö абу сöвмöма лыддьысян сямыс (лыддьö öти ногöн, ёна дзугсялö, «ньылалö» кывъяссö).

3. Кыдзи донъявны художествоа гижöд видлалöм

V–IX КЛАССЪЯСЫН

«5» пуктыссьö:

• художествоа гижöдлысь сюрöссö бура тöдöмысь да сюрöса мöвпсö восьтöмысь;

• геройяслысь вöчöмторсö кужöмöн донъялöмысь;

• художествоа гижöд кывлысь мичлунсö да аслыспöлöслунсö аддзöмысь да восьтöмысь;

• гижöд юкöнъяссö, эпиграфсö, персонаж системасö йитны кужöмысь;

• велöдчысьöн ассьыс мöвпсö подулалöмöн восьтöмысь;

• литературнöй кывйöн, серпасалан ногъясöн бура вöдитчöмысь;

• литература теорияöн бура вöдитчöмысь.

«4» пуктыссьö пöшти татшöм жö вочакывйысь, но велöдчысь кö та дырйи:

• оз пыр вайöд стöч, колана видлöгъяс;

• гижöдыслысь сюрöссö восьтiгöн оз пыр вöдитчы литература теорияöн;

• стиль боксянь вöчö öткымын тырмытöмтор.

«3» пуктыссьö, велöдчысь кö тöдö да гöгöрвоö художествоа гижöдыслысь сюрöссö, но та дырйи:

• торкалö гижöдын серпасалöм лоöмторъяслысь сьöрсьöн-бöрсьöн мунöмсö;

• велöдысь отсöгтöг оз вермы колана ногöн донъявны литература геройлысь этшсö;

• дзугсьö литература туялан кывворын;

• оз вöдитчы кызвыннас литературнöй сёрниöн.

«2» пуктыссьö, велöдчысь кö омöля тöдö либö оз тöд гижöдыслысь сюрöссö, оз гöгöрво сылысь шöр мöвпсö.

X–XI КЛАССЪЯСЫН

«5» пуктыссьö, сэк кор велöдчысь:

• бура тöдö художествоа гижöдыслысь сюрöссö да колана ногöн восьтö шöр мöвпсö;

• бура гöгöрвоö гижöдыслысь мичлунсö, серпасалунсö, тöдчанлунсö да кужö та йылысь лöсьыда висьтавны;

• гижысьлысь олöмсö да гижан туйсö йитö эпохаыскöд, войтыр олöмын торъя кадколастъяскöд;

• петкöдлö бур тöдöмлунъяс литература теорияысь;

• вочавидзö мичаа, стöча, тырвыйö, сьöрсьöн-бöрсьöн мöвпъяссö висьталöмöн, кужö вайöдны колана цитатаяс, ас кежысь вöчö кывкöртöдъяс.

«4» пуктыссьö пöшти татшöм жö вочакывйысь, но велöдчысь кö та дырйи:

• оз вермы вайöдны став колана видлöгсö;

• оз тырвыйö вöдитчы велöдöм литература терминъясöн;

• оз пыр колана шуанногöн висьтав текстсö.

«3» пуктыссьö, велöдчысь кö тöдö да гöгöрвоö видлаланторйыслысь унджыксö, но та дырйи:

• дзугсялö висьталiгöн; вежлалö стильсö;

• оз тырвыйö бура да ставнас восьты темасö;

• оз вöдитчы велöдöм литература терминъясöн;

• оз колана шуанногöн висьтав текстсö, дзугсялö сiйöс лыддигöн.

«2» пуктыссьö, велöдчысь кö омöля тöдö либö оз тöд гижöдыслысь сюрöссö, оз гöгöрво сылысь сюрöса мöвпсö, оз куж восьтыны ассьыс видзöдлассö.