Lektsiya-6

6 - lektsiya.

ETHERNET (802.3) TEXNOLOGİYASININ’ STANDARTLARI.

Jobası.

1. 10BASE - 5 STANDARTI

2. 10BASE - 2 STANDARTI

3. 10BASE - T STANDARTI

4. 10BASE - F STANDARTI

1. 10BASE - 5 STANDARTI

Bul standart Xerox firması ta’repinen islep shıg’arılg’an tarmaq bolıp onı klassikalıq Ethernet, tiykarg’ı Ethernet tarmag’ı dep ataladı. 10Base-5 standartında mag’lıwmatlardı uzatıw ortalıg’ı retinde 50 Om tolqın qarsılıqqa iye bolg’an koaksial kabel qollanılg’an. Kabeldin’ orayınan o’tken mıs sımnın’ diametri 2,17 mm. RG-8 ha’m RG-11 kabelleri mine usınday ko’rsetkishlerge iye. Bul standarttı “juwan Ethernet” dep te ataladı. Kabeldin’ sırtqı diametri 10 mm ge jetedi.

6.1.-su’wret. U’sh segmentten ibarat bolg’an 10Base-5 standartının’ fizikalıq beti quramına kiriwshi qurılmalar.

Bul kabel barlıq stantsiyalar, yag’nıy kompyuterler ushın monokanal retinde qollanıladı. Kabel segmentinin’ uzınlıg’ı 500 m ge shekem jetiwi mu’mkin. Olardın’ aqırlarında 50 Om qarsılıqqa iye bolg’an terminatorlar jalg’ang’an bolıwı kerek.

2. 10BASE - 2 STANDARTI

10Base2 standartında informatsiyanı uzatıw ortalıg’ı retinde orayınan diametri 0,89 mm bolg’an mıs sım o’tken, sırtqı diametri bolsa 5 mm bolg’an jin’ishke koaksial kabelden paydalanıladı (“тонкий” Ethernet). Bul kabeldin’ tolqın qarsılıg’ı 50 Om g’a ten’. RG-58 /U, RG-58 A/U ha’m RG-58 C/U kabelleri mine usınday ko’rsetkishke iye kabeller bolıp tabıladı.

6.2-su’wret. 10Base-2 tarmaq standartı.

Bir segmenttin’ uzınlıg’ı 185 m ge shekem bolıwı mu’mkin. Segmenttin’ eki ta’repinde, yag’nıy aqırlarında 50 Om qarsılıqqa iye bolg’an terminatorlar jalg’ang’an bolıwı kerek. 10Base-2 standartında ta’kirarlanıwshılardı qollanıp tarmaqtın’ uzınlıg’ın asırıw imkaniyatı bar. Bunda da l0Base-5 standartındag’ı sıyaqlı “5-4-3 qag’ıydasına” a’mel etiw kerek. Tarmaqtın’ maksimal uzınlıg’ı 5x185=925 m di qurarawı mu’mkin. Bir segmentten ibarat bolg’an 10Base-2 tarmag’ının’ ko’rinisi 6.2.-su’wrette keltirilgen. Bul standarttı a’meliyatta qollanıw onsha qıyın emes, sebebi tarmaqtı payda etiw ushın tek g’ana tarmaq adapterleri, T-konnektorları ha’m 50 Om lı terminatorlar bolsa jetkilikli.

3. 10BASE - T STANDARTI

10Base-T tarmag’ında mag’lıwmatlardı uzatıw ortalıg’ı retinde eki ekranlanbag’an oralma juplıq (Unshielded Twisted Pair, UTP) kabeli qollanıladı. 3-shi kategoriyalı ko’p juplı (2 ha’m 4 juplı) UTP kabeli telefon apparatların jalg’aw ushın da qollanıladı. Sonlıqtan Voice Grade, yag’nıy dawıs uzatiw kabeli dep te ataladı. (6.3.-su’wret).

6.3.- su’wret. 10Bаse-T standartı tarmag’ı:

Т_х - uzatıwshı; R_х – qabıl etiwshi.

Bunda oralma juplıqtın’ birewi kompyuterdi ta’kirarlawshıg’a, yag’nıy kontsentratorg’a mag’lıwmatlardı uzatıw ushın (Т_х), ekinshisi bolsa kontsentratordan kompyuterge mag’lıwmatlardı uzatıw ushın (R_х) qollanıladı (6.4.-su’wret).Bul kabeldin’ uzınlıg’ı 100 m ge shekem jetedi. 10Base-T standartına “4-ke shekm kontsentratorlar” qag’ıydası a’mel qıladı. Sog’an bola tarmaqtın’ uzınlıg’ı 500 m ge shekem jetedi. Yag’nıy 5 segmenttin’ ha’r biri 100 m den bolg’anda tarmaqtın’ diametri 500 m boladı. Tarmaqqa en’ ko’p degende 1024 kompyuterdi jalg’awg’a ruxsat etiledi. Bunda kontsentratorlardı eki betli ierarxiyalıq ko’riniste jalg’aw menen a’melge asırıwg’a boladı.

6.4.- su’wret. Ethernet kontsentratorlardı ierarxiyalıq ta’rizde jalg’aw.

4. 10BASE - F STANDARTI

10Bаse-F standartında mag’lıwmatlardı uzatıw ortalıg’ı retinde o’tkeriw uqıplıg’ı 500-800 MGts bolg’an uzınlıg’ı bolsa 1 km ge shekem jetkeriliwi mu’mkin arzan bolıp tabılg’an optikalıq talalı kabel qollanıladı. Bul standarttın’ du’zilis sxeması 10Base-T standartının’ sızılması menen bir qıylı boladı (6.4.-su’wret). Bunda da tarmaq adapterin kontsentrator menen jalg’aw ushın eki optikalıq talalı kabel qollanıladı, yag’nıy adapterdin’ Т_х shıg’ıwın, kontsentratordın’ R_х kiriwi menen, ha’m adapterdin’ R_х kiriwi bolsa kontsentratordın’ Т_х shıg’ıwı menen jalg’anadı.

10Bаse-F standartının’ u’sh tu’rli variantları bar:

a) FOIRL (Fiber Optic Inter-Repeater Link) standartı – bul variantta kontsentratorlar arasındag’ı aralıq ko’bi menen 1 km, tarmaqtın’ ulıwma uzınlıg’ı, yag’nıy diametri bolsa 2500 m bolıwı mu’mkin. Qa’legen alıng’an stantsiyalar arasında 4 ke shekemgi kontsentrator jalg’anıwı mu’mkin, yag’nıy “4 ke shekemgi xablar” qag’ıydasına a’mel etiw kerek.

b) 10Base-FL standartı – bunday tarmaqlardın’ FOIRL standartı tarmaqlarınan parqı sonday, stantsiya menen kontsentrator arasındag’ı (kontsentrator menen kontsentrator arasındag’ı) aralıq ko’bi menen 2 km ge shekem bolıwında.

v) 10Base-FB standartı - bul standart bolsa kontsentratorlardı jalg’aw ushın qollanıladı. Stantsiyalar onnan paydalana almaydı. Bunda bir segmenttin’ uzınlıg’ı 2 km ge shekem bolıwı, segmentler sanı bolsa 6 g’a shekem bolıwı (yag’nıy 5 ke shekem kontsentratorlar jalg’anıwı) mu’mkin, ha’mde tarmaqtın’ ulıwma uzınlıg’ı 2740 m bolıwı mu’mkin.

Tayanısh tu’sinikler

Ethernet texnologiyası standartları, 10Base – 5, 10Base – 2, 10Base –T ha’m 10Base – F standartları, ta’kirarlawshı, kontsentrator, segment, ju’klengen segment, tarmaq diametri, koaksial kabel, oralma juplıq kabel, optikalıq kabel, konnektor, terminator, transiver, uzatıw ortalıg’ına mu’ra’jat etiw algoritmi CSMA/CD, kolliziya, kolliziyalar domeni, to’rtke shekemgi xablar qag’ıydası.

Baqlaw sorawları

1. Ulıwma shina topologiyası. Ulıwma shina topologiyası tiykarında qurılg’an LKTlar ha’m olardın’ tiykarg’ı ko’rsetkishleri.

2. 10Base-2 standartı. Tiykarg’ı ko’rsetkishleri ha’m sheklewleri.

3. 10Base-T standartı. Tiykarg’ı ko’rsetkishleri ha’m sheklewleri.

4. Optikalıq talalı Ethernet texnologiyası. Tiykarg’ı ko’rsetkishleri ha’m du’zilisi.

5. To’rtke shekemgi xablar qag’ıydasının’ ma’nisin tu’sindirip berin’.