Вовалöн сьöдкай

Сибöтчис тулыс. Вынöнжык пондiс öгравны шондi. Сылiс лым. Горöн визывтiсö шоррез. Шоныт местаэзын тöвйöм бöрсянь гортö пондiсö бертны быдкодь кайез. Ны сьылöмсянь гора да гажа говкöн тырис öтöр.

Кресення лунö Вовалö эз ков мунны челядь садö. Зоночка лунтыр вермис овны гортын. Но шоныт да гажа погоддя коста керкуас сiйö эз пукöт.

Вова асывсянь кöмалiс ассис резиновöй сапоггезда пасьталiс вылас кокнитик куртка. Юр вылас зоночка кышалiс лöз рöма гöрдззöм шапочка. Öтлаын папыскöт сiя петiс öтöрö.

Сiя лунö зоночкалöн айыс лöсьöтчис чапкыны ограда вылiсь кольччöм лым. Вова корсис отсасьны.

Уджавтöнняс ни зоночка пельшы бердöдз сибалiс кинлöнкö öддьöн гора да басöк сьылöм. Эта мича сьылöмсянь зоночка вунöтiс недырик кежö нельки аслас удж йылiсь. Сiя сувтiс, лэбтiс юрсö да пондiс нёджжасьны ас гöгöр.

Недыр мыйись Вова казялiс и асьсö сьылiсьсö. Улица мöдöрас öшалан кайпоз вылын пукалiс вöснитик вывтыра, сьöд пежьялан гöна, кузь да веж ныра басöкся-басöк кай. Вывтырнас вывлань нюжöтчöмöн да паськöтыштöм борддэзнас кадiсь-кадö шевкйышавтöн, сiя питиртiс-горалiс, кыдз только вермис.

― Па-ап! Па-ап! Кывзы жö, кывзы, кытшöм басöка сьылö, — эз вермы видзсьыны да горöтчис радувья зоночка. — Эта кин сэтшöмыс?

— Тэ разь сiйö эшö он тöд? — Юалiс паныт Вовалiсь папыс.

― Тöда.

— Мый нö сэк юасян?

— Ме коли вунöтчи, кыдз сылiсь нимсö шуöны.

— Эта сьöдкай.

— Ой, былись эд. Сьöдка-а-ай, — гажмыштiс папыс юöрсянь Вова.

Мыйкö дырна зоночка эшö кывзöв-керис сьöдкайлiсь сьылöмсö, а бöртiжык юалiс:

— А кинлöн, пап, сiя сьöдкайыс?

— Андрейкалöн, натьтö. Сы кайпоз вылын эд пукалö.

— А мыля миян сьöдкайыс абу? Меным тожö колö сьöдкай,

— Сэк перво сылö поз колö керны.

— Талун, пап, да?

— Позяс и талун.— Мунам сэк öнi жö кайпозсö керны. — Эстöн ни зоночка лэдзис кисис зыр, иньдöтчис чапкытöм лым кузя лиснич ладорö.

— Сiдз оз позь. Медперво колö ограда вывсис лымсö чапкыны.

— И вöлись?

— Да.

Эта басни бöрсянь Вова недырик кежö лöньсис. Сiя бертiс бöр, вились кутчисис аслас зыр бердö. Öнi зоночка пондiс уджавны, мымда вын да чож, мед только перытжыка ештыны керны этö удж.

Час кыным бöртi ограда вылiсь лым и былись чапкиссис. А павжун бöрсянь ая-зона кутчисисö кайпоз бердö. Кыкöн нiя кошшисö да чукöртiсö колана пöввез, пондiсö меряйтны да орлавны колана кузяöн.

Пилитчыны ножовкаöн да кужöмöн дорны кöрттуввезöн öтамöд бердö пöввез Вова, вежöртана, эшö и эз прокмы. Но зоночка вешшывтöг бергалiс папыс гöгöр да отсалiс мыйöн вермис. То сiя видзышалiс öтамöд бердын пöввез, то мыччывлiс папыслö молоток да кöрттуввез. Сiдз, öтласа вынöн и вöлi керöм виль кайпоз.

Сiя жö лунö, рытъявыв, кайпозыс вöлi öшöтöм потш вылö, Вова öшын весьтö. Öнi кольччис видзчисьны, кöр локтас сэтчö сьöдкай. Сэк вöлись зоночка, мыдзöм да тшыг, пырис керкуö. Сiя пуксис öшын одзö, пондiс видзчисьны. Дыр видзöтiс Вова то кайпоз вылö, то нёджжасис быд ладорö, огородеч пасьта, кыдз позис этö керны öшынсянь. Но кайез эзö вöлö. А кадыс вöлi сёр ни. Виль кайпозсö сьöдкайез, тыдалö, эз ни казялö и адззывны нiйö öшöтöм кайпоз вылiсь сiя лунö эз усь. Мыдз зоночка сiдз öшын дорас и öнмöссис.

Но мымда жö вöлi Вовалöн гажыс ашынас!

Зоночка саймис одз асывнас. Эшö ольпась вывсянь öшынöттяс сiя сэтöн жö дзар керыштiс öшалан кайпоз вылö.Сэк кежö сьöдкайыс ештöм вöлi локны ни. То зелёнöй, то гöрд рöмöн пежьялан вывтыра, öнi сiя пукалiс пыранiн увтö крепитöм тув вылын. Шондiыслань паныт нюжöтчöмöн, сьöдкай радвевйöн шевкйышалiс борддэзнас, горöн да гажöн сьылiс.

Эталö зэв ёна гажмис и ачыс Вова. Кутöм гажсянь сiя нельки местаас видзсьыны эз вермы. Зоночка перыта чепöссис айыс дынö. Сьöдкайыс моз жö киэзнас шевкйисьтöн, горöн да гажöн Вова юöртiс:

― Па-ап! Па-ап! Локтöм ни эд менам сьöдкайыс! Локтöм! Лок кöть видзöт дак. Быль и быль.