Кöдзыввез

Арвыв миян деревняö локтiс виль велöтiсь. Шуисö сiйö Александра Михайловнаöн. Овнытö сiя сувтчис öтiк пуста керкуö, кöдна сэк кежö миян деревняын сулалiсö вель уна ни.

Медодзза жö луннэзö аслас локтöм бöрсянь Александра Михайловна ветлöтiс омöн деревня пасьта, тöдсасис аслас велöтчиссезкöт. Быдöннымöс, сизимгодся нылочкаэзöс да зоночкаэзöс, сiя гижлiс школаö, первöй классö. Öткоста Александра Михайловна тöдсöтiс миянöс аслас зонкöт, Толиккöт, кöдö новйöтiс сьöрас да тшöктiс миянöс сыкöт орсны.

Тöдсасьнытö ми, вежöртана, и тöдсасим. Но вот орснытö сыкöт медперво некин эз мöд. Оз позь висьтавны, мед миян виль ёртным вöлi мыйöнкö умöль. Вöлi сiя миянкöт не только öтiк годся, но и öтыжда вывтыра, дзир винержык мукöдся. Сэтчö жö и баитiс Толик сiя жö коми кыв вылын, не казьмöтны кö сэтшöм тор йылiсь, что быд «л» шы местö аслас басниын сiя шувлiс «в». Сiдз кыв «ветлi» местö ёртнымлöн шогмывлiс «ветви», «локтi» местö — «воктi», «вöлi» местö —«вöи», «вöл» местö — «вöв». Эта кузя кинкö миян коласiсь и нимкодялiс сiйö перво жö сiдз — Ветви-Воктi. А сэксянь эта нимкодьыс сiдз и лякасис сы бердö пыр кежö. Часто эта бöрсянь и, нельки ёртным син одзын, ми сiйö сiдз и шуим — ветви-Воктi. «Кытчö тэ, Ветви-Воктi?» — нето: «Мунам миянкöт, Ветви-Воктi!»

Эта увья Толик öддьöнсö и эз лöгав. Сiя öтпырись миян вылö нельки мамыслö эз норась. Но вöлi этася эшö öтiк тор, кöда кузя сiя некыдз эз лöсяв миян коласö да мыччассис чочком ракаöн. Этö кöмкöт-паськöм, кöдö сiя новйис.

Мийö, сьöкыт войнакадся деревенскöй челядь, тöв и гожум сымда и тöдiм, ниртiм аскыйöм дöраовöй паськöмын. Эта паськöмись быдöнным вылын вöлiсö дженытик йöрнöс да сэтшöм жö, пидзöссэзся невночка улынжык кока, вешьян. Мукöд коста да мукöдыс вылын миян коласiсь нiя вöвлiсö мичöтöмöсь то ли сюрöм кыськö химическöй карандашöн, то ли чöдъягöд ваöн. А унажык сэтшöм паськöмсö ми новйим мичöттöг, кыдз эм — чочкомнас. Ёртным жö, кöр петавлiс орсны, пасьтавлiс вылас то ли майка, то ли дженытик соса йöрнöс. Миян кодь дöраовöй вешьян местö сы вылын вöвлiсö трусиккез. Вежöртана, что Толик вылын паськöмыс вöлi ылын не сiя матерьёись, кыдз миян вылын. Сэтчö жö сiя вöлi мичöтöм то гöрд, то виж, то лöз рöмö. Сэтшöмсö ас вылын ми не только некöр эг новйö, но некин да некöр эшö эг и адззывлö. Сэтчö жö дöраовöйыс сьöртi ёртным вылын басöк рöма да небыт матерьёись паськöмыс мыччассис миянлö сэтшöм рышкыт-жебытöн, кöда бердö нельки сибöтчынытö миян петiс полöм. Кутышт, думайтсис, казявтöг сэтшöмсö чепöль коласö, кыдз сiя сэтöн жö и орласяс. Но меддивуйтанаыс быдöнным понда вöлi Толиклöн кöмкöт или, кыдз сiя шуис нiйö, сандалеттэз.

Миян, сэкся деревенскöй челядьлöн, школаö ветлытöдз некытшöм кöмкöт, позьö шуны, эз и вöвлы. Одз тулыссянь, кыдз только пондывлiс шольны лым, кöмкöтыс миянлö эз ни ков. Сэксянь ни ми пондывлiм котрасьны кöмтöг. Сiя жö вöвлi и сёр арнас, кытчöдз эз усьлы пидзöс сувда лым да эз вачкывлö тöвся мороззэз. Улица мöдöрын олiсь ёрт дынö адззисьлöм-орсöм могись миянлö нем эз видз котöртны минута кыным сьöрна кöдзыт лым кузя кöмтöг. Сэтчин эта бöрсянь шонтiсьлiм то ли горвылын, то ли лонтiсян печка одзын. Сiдз жö, кынымкö час бöртi, бертлiм бöр гортö, эгö кö ылавлö эта коста мунны сiдз деревня вылöдз.

Медгырись тöвся мороззэз коста, кöр кынувья лыйсьöмöн горöн потласисö пуэз, а борд вылын кынмисö-усялiсö нельки катшаэз, ми унажыксö пукавлiм керкуись петавтöг, горвыв сёрдын. А ковсис кö кöр кин ордö — кöмкöтсö коканым кöмавлiм гырисьжык отирлiсь.

Мый баитсяс шоныт гожумся кад йылiсь, дак не асывся лысва, не луншöрся жар, не рытъявыв ыркыт коста некытшöм кöмкöт йылiсь миян и дума некöр эз вöвлы. Мунiм я ми вöрö тшакла, пырим я лöмö ^öмидзла, чылiм я уррез моз пуэз вылö, котрасим я деревня пасьта öтамöд коласын орсöм могись — быдлаын кöмтöг. И кöр ми первуись казялiм ёртным коккезiсь свиттялан спенёка сандалеттэз, кöднаын сiя сибöтчис миян дынö, ми быдöнным видзöтiм сы вылö, дзик йöймöм вылö. Эта увья и примитны сiйö орсöм могись ас коласö охота миян öшис.

— Мыля не кöмтöг? — юалiс Толиклiсь повтöмжык быдöнным коласiсь Митька.

— А желляа кö кокöс? — юасьöмöн жö шыасис паныт ёртным.

— Желляа, желляа... Тожö меным, Ветви-Воктi, — керыштiс одзлань Митька, швычкис-сьöвзис пиннес коласöт, бергöтчис.

— Нiя эд кокниöсь, оз мешайтö... — пондылiс дорйисьны Толик. Но сылiсь одзланься баснисö Митька эз ни кывзы.

— Вот и мешайтасö. Кольччыны пондан миян сьöрись, колö кö тэныт тöдны дак, — висьталiс Митька, а одзлань быдöннымлö ни содтiс: — Мунам, челяда, — да сы коста жö уськöтчис котöртны деревня вывсис ю ладорö.

Кадыс вöлi павжун гöгöр. Позис ветлыны купайтчыны. Но вöлi эстöн и сэтшöм висьтавтöм дума, — мед кольны ёртнымöс. Эд ми быдöнным вöлiм кöмтöмöсь. Этасянь и думайтсис сiдз, что вöтчыны миян сьöрö кöмкöта кока ёртным оз вермы да кольччас. И колiс дзир Митькалö вöрзьыны аслас местаись, кыдз ми быдöнным öтдруг, öтамöд коласын одзасьöмöн, уськöтчим сы сьöрö. Но чожа мый, деревня саяс ни казялiм, что и Толик тожö вöтчö миян сьöрö жö и кольччынытö кыдз бытьтö оз и думайт. Кытчöдз ми вуджим деревня сайись завор мöдöрö, эта дорын ни миянöс ёртным вöтiс. И мый эшö этася вöлi дивуйтанаыс быдöнным понда, дак этö сiя, что горöтлыны миян сьöрö да корны, мед ми сiйö видзчисим да эгö кольö, кыдз керлiс сэтшöм кадö унажыкыс миян коласiсь, Толик кыдз бытьтö эз и ылöст.

Вежöртана, что эта сылöн чöлöмыс эз гленитчы миянлö сiдз жö, кыдз и сылöн сандалеттэс. Сiйöн завор саяс вуджöм бöрсянь ми быдöнным öтдруг вились уськöтчим пышшыны одзлань. Но Толикöс и эта эз сувтöт. Сiя сiдз жö, кыдз и ми, чувизнитiс-вуджис заворняэс коласöт, сандалета коккесö кокнита да перыта одзлань чапкалöмöн, котöрöн иньдöтчис миян сьöрö. Но и эта ёртнымлö унасö эз отсав, а миянöс лöгöтiс эшö öддьöнжык. Сiйöн и миритчыны сыкöт некин эз думайт.

— Чожжык, челяда, вöр бердöдззас, — горöтчис котöртiканым миян юралiсь Митька да уськöтчис быдöнным одзын эшö одззася перытжыка. Сiйö жö, вежöртана, керим и ми. Быдыс миян коласiсь одзлань ни тöдiс, мый лоас сэтчин, вöр коласас. И былись. Колiс дзир сибöтчыны медодзза лапья кöззэз коласöдз, кöдна быдмисö зэв туй бердас, кыдз ми быдöнным, дзик команда сьöртi, кежим туй вывсис да уськöтчим вöрö. Ми сайöвтчим ёртным шогья пуэз коласö, лöньсим. Но нельки этаись прокыс унасö тожö эз вöв.

Вöр бердас Толик котöртнытö дугдiс. Тöдiс, натьтö, что ылö сы увья вöрöттяс ми сё ни ог пышшö. Горзыны-корны сiя миянöс эз понды. Кошшисьны, тыдалö, тожö эз мöд. Сiя сымда и керис, что лэбтiс кок увтсис неыджыт шатёк, сiйöн туй боксис сизьюрресö шырзьышавтöн жагвыв иньдöтчис одзлань. Что эта бöрсянь и миянлö кернытö кольччис нем. Ковсис петны бöр да миритчыны.

Сёрöнжык, öтлаын ни орстöн-котрасьтöн, ёртным сандалеттэз кузя вöвлiсö уна быдкодь, и гажа, и гажтöм историяэз. То вöвлi, что вöрöт мунтöн, мед неколана кадас Толик кышасяс аслас сандалетöн кытшöмкö ув нето вуж бердö, усяс да кисьтас дозсис öктöм тшак нето ягöд. То вунöтас ассис сандалеттэсö ю дорын купайтчöм бöрсянь, то сибдас нiйöн кытчöкö нятьö да сэтчö и коляс. А öтпырись ны увья жö, этна сандалеттэз увья, ёртным невна нельки коктöг эз кольччы.

Котрасим-орсiм ми сiя лунö гунадорын. Медперво пöттöдз орсiм куруöн. Сэсся лэдзчылiм ключ дорö, мед пöттöдз жö юны сöстöм, кöдзыт да кöра ва. Ключыс вöлi неылын, гуна сайись пыдын да крут кырасын, кытöн медзыбуна местаас вöлiсö гарйöмöсь эшö унася-уна пыштыэз, кöднаын кöркö тыöтлöмась пыш.

Ключ дынсянь ми эг дышöтчö кежавны ыб дорöдз. Сэтчин готтьыштiм да сёйим тшыгувья воöм ни сэк кежö рудзöг шеппезiсь сю. А кöр вились бертiм гунадорö, кинлöкö миян коласiсь юрас пырис ысласьыштны вартан машина привод вылын. Ысласьöмыс сыын и вöлi, что öтiккез миян коласiсь бергöтлiсö дышлоöт приводлiсь ыджыт шестерня, а мöдiккез сы коста пукалiсö эта шестерня вылын да бергалiсö сыкöт öтiк местаын. Вот и быдöс ысласьöм.

Пытшксяняс эта шестерняыс бергöтiс аслас пиннезöн мöдiк, учöтжык шестерня. Привод вылас пукавтöн этна шестерня пиннез коласö кыдзкö казявтöг и шедöм вöлi Толиклöн подошва бердсянь сандалет пяткаыс. Бур кöть сiя ни, что öтлаын сандалетыскöт эз сюр шестерняэс коласö ёртнымлöн кокыс. Но повзьöмувья Толик и этатöг вовлiс горзытöдз. Ёнакодь повзим и мийö быдöнным, а повзьöмувья перыта вунöтiм привод йылiсь. Вежöртана, что некытшöм орсöм эта бöрсянь миян коласын эз ни шогмы.

Горзынытö Толик чожа мый и дугдiс. Но мийö, повзьöмöсь сы сандалет кузя, перыта пышшим не только вартан машина привод дынiсь, но и гунадорись. Няжнитöм-курччöвтöм пятаа сандалетöн мунiс гортас и Толик.

Эта бöрсянь быдöннымлö думайтсис, что кöмавнытö сiйö ёртнымлö сэсся оз ни позь. А некытшöм мöдiк кöмкöт Толиклöн сэсся тожö эз вöв. Этасянь быдöннымöс полöтiс эшö сiя, мый миянöс видзчисьö эта сандалет понда. Но мый бы миянöс одзлань эз видзчись, öткоста этакöт гажöтiс сiя, что эта бöрсянь Толик, кыдз и ми жö, вöлиськö пондас котрасьны кöмтöг. И колö висьтавны, что этаын ми и былись эг сорасьö.

Сiя лунö, умöльсö орддьöм могись, павжун бöрсянь ми быдöнным иньдöтчим вöрö тшакла. Сэтчин, вöрас, не только тшакьялiм, но и орсiм пöттöдз. Гортö бертiм сёрöн ни, шондi пуксян гöгöр. А сэсся нельки грива вылöдз эг петалö, водiм узьны.

Ашынас, одз асывсянь, кöр пöрисьжыккес мунiсö удж вылö, ми, кыдз и пыр, чукöртчим медодз деревня шöрын. Сэтчö жö, öтлаö быдöнным дынö, локтiс и Толик. Вежöртана, что эта миянöс гажöтiс. Эд сы сьöртi ни позис вежöртны, что тöння понда сiя миян вылö оз лöгав. Некин эд миян коласiсь эз тшöкты сюйыштны сылö ассис коксö шестерняэс коласö. Нарошно или казявтöг, но этö сiя керис ачыс. Сiдзкö, лöгавны нето обижайтчыны сылö миян вылö вöлi нем. Но быдöннымöс миянöс медöддьöн гажöтiс сiя, что эта лунö Толик, кыдз и ми жö быдöнным, первуись локтiс миян коласö кöмтöг. Радувья миянлö думайтсис ни, что öнiсянь пыр лоас сiдз.

Кынымкö лун сьöрна и былись вöлi сiдз: котрасьны да орсны миян дынö Толик вовлiс кöмтöг. Сiдз жö кынымиськö ветлiс сiя öтлаын миянкöт вöрöдз. Ёртнымöс ошкöм могись ми баитлiм: «Важын ни сiдз колiс» — нето: «Кокнитжык жö кöмтöг и некытчö он кышась». Но сэтöн, кыдз нарошно, тшыксис погоддя. Кадыс вöлi арвыв ни. Кымöртчис не öтiк лун кежö. Ыркöтiс. Пондiс зэрасьны. И сэк ёртным вились пырис аслас сандалеттэзö, öтыс кöдна коласiсь кинкö киэзöн сэк кежö вöлi вочöм ни.

Оз позь висьтавны, мый дырна бы Толик новйис эшö ассис сандалеттэз, не петны кöбы ныкöт эшö öтiк гажтöмкодь историялö.

Вöлiм ми сiя лунö, быдсöн асланым компанияöн, бöра жö Сия ю дорын. Купайтчынытö эта кадö эз ни позь. Но мый керны ю дорас, миянлö и сытöг адззисис. Ми волькöтiм берег дорись кöс песок да шатёккезöн киын рисуйтiм эта песок вылын керкуэз, башняэз, а кытöн и асьнымöс. Сэтöн жö, кыдз доска вылын да кыдз кужим-вермим гижим медодзза букваэз — велöтчим. Эд чожа мый быдöнным лöсьöтчим мунны школаö.

Ю дорсис бöр берттöн кежим деревня увтiсь ытшкöм видз вылö, кытöн зэв паськыта быдмисö льöмпуэз. Ны вылын воöм льöмыс увдöрсяняс вöлi шырзьöм ни. Но гырисьжык льöмпуэс вылын да медйылас сiя вöлi эшö вöрöттöм, и чöсмасьнытö миянлö адззисис мыйöн.

Быдыс миян коласiсь эшö ылiсянь сибöтчытöн бöрйис аслыс льöмпу да сы дынö перво жö и уськöтчис. Кынымкö минута бöртi ми быдöнным, кыдз обезьянаэз, вöлiм льöмпуэз вылын, нёкралiм асланьö ягöдöн уввез, судзласим, кöдöрö вермим да сёйим бытшöма ни сэк кежö воöм ягöд.

Льöмпуэс кузя чывтöн и орис Толиклöн сандалетiсь ремешок. Кокись мынöм сандалет усис улöдз. Толик лэдзчис сьöрсяняс, пуксис льöмпу увтiсь неыджыт кöчкаок вылö, пондiс гуддисьны. Мийö эта коста сё эшö кольччим льöмпуэз вылын, готтисим-сёйим, а коласас поснит роззэзöн лэдзалiм и ёртнымлö.

Но вот кытшöмкö кадö Толик, кыдз чушкалöм, чепöссис аслас местаись, кöчка вывсис, кутыштiс киэзнас бöр гöгöрсö, горöтiс:

— Уик-уик-уик, кыдз кинкö заваритiс!

Ми öдззим горöн ваксьыны. А Толик и эта вылын эз лöньсьы. Сiя, кыдз бöр гöгöрöт чушкалöм кычан, бергалiс öтiк местаын, кöчка гöгöр, кинкö увья сайласьöм могись перыта öвтышалiс киэзнас, öткоста кутышалiс то юрсö, то бöрсö, то киэсö, то коккесö, одззамоз горöн горöтлiс:

— Уик-уик, кинкö петшöралö! Уик-уик, кинкö чушкалö! Эстöн и ми гира-вара лэдзчим льöмпуэз вылiсь, сё эшö ваксьытöн-серавтöн чукöртчим ёртным дынö. Сэк вöлись и усис казявны, что сы гöгöр быдса кымöрöн, шытöг лэбалöны кытшöмкö негырись да гöрдвевья то ли гутоккез, то ли номмез. Нiя жö перыта котрасисö и Толик вывтыр пасьта, кöдна увья сiя и мырсис-мездiсис. Но вот этö жö заваритöмсö, кинöс киöт, кинöс кокöт, кынöмöт, голяöт, кылiм и ми быдöнным. Быдöнным пондiм изны-бергавны, кыдз ёртным жö, öтiк местаын да, кыдз шедiс, öвтiм киэзöн. Но эта изöвтöм-бергалöмыс да киэзöн öвтышалöмыс некинлö миян коласiсь эз ни отсав. А чушкалöм ёртным сэк кежö горзiс ни. Öткоста, горöн ойкайттöнняс, сiя, кыдз вермис, педзис кикокнас, то зыртышалiс зубытсяняс заваритöм местаэсö, то чышкышалiс чужöмсö, голясö. А гöрдвевья да борда номоккес сiйö и керисö, сё лякасисö да лякасисö быдöнным бердö. Некытшöм спасеннё нысянь эз ни вöв. Сэк вöлись кинкö миян коласiсь и горöтчис:

— Пышьям, челяда! Этна мукöдзыллэз! Бордаöсь нiя! Кулясö миянöс!

Öнi вöлись мымда чож, ми уськöтчим пышшыны льöмпуэз увтiсь. Котöртiм, кин кинöс одзалас, веськыта видз кузя деревня ладорö. А котöртiканым кыдз вермим сё эшö öвтышалiм киэзöн, мездiсим, сiдз кыдз борда кöдзыввес и эстöн эшö миян сьöрись эз кольччö. Мымдакö нiя сё эшö лэбзисö-вöтчисö миян сьöрö, вöтiсö да лякасисö вывтыр бердö. Сiйöн, то öтiк, то мöдiк миян коласiсь сё эшö ойкайтiс петшöраланкодь зубытсянь, кутышалiс вились заваритöм местасö да, кыдз вермис, содтiс чож аслас коккезлö.

Толик, кöдалö этна мукöдзыввезсянь, и баитны нем, дöнöвтiс* медъёна, одззамоз зубытсяняс кивзышавтöн эстöн ни быдöннымöс одзалiс. Öнi сiя котöртiс медодзын да сэтчö жö эшö и пöвкокöн. Öт кокас сылöн сандалетыс эта коста эшö вöлi, а мöдас эз ни вöв.

Деревня дорас петтöдз миянлö колiс вуджны неыджыт шорок, кöда визывтiс гунадор кырасiсь ключсянь. Видз кузя шорокыс котöртiс ытшкöмыс бöрсянь ни вились джуджыта лэбтiсьöм, вундасян осока коласöт.

Вежöртана, что кошшыны буржык вуджан местасö кад миян эз вöв. Кытшöм местаöт лöсялiс, сэтшöминöт сувтчывтöг и уськöтчим шор мöдöрас. Сiйöн вуджтöнняным быдöннымлö ковсис бродитны пидзöсöдз. А кöр сьöрсьöн-бöрсьöн петiм шор мöдöрас, ёртным кокын и мöд сандалетыс эз ни вöв.

Сэк кежö и кöдзыввес миян сьöрись кольччисö. Повнытö одзлань лоис некинiсь. Кöсiнас ни быдöнным чукöртчыштiм öтлаö.

— А кытöн нö сандалеттэт? — юалiс кинкö миян коласiсь ёртнымлiсь.

Дöнöвтiс — дöнзис.

Толик дзир нёджжöвтыштiс шор ладорö да сылань жö öвтыштiс чöлöмöн кинас.

— Дак ветлыны, батi, бöр? Öнöдз эд, натьтö, лöньсисö ни...

— А ну нiйö...

Эта вылын сандалеттэз йылiсь басниыс и баитсис.

Вот эд кыдз мукöд коста оланас овлö. Мый дырна ми ёртнымöс кывнаным велöтiм, мед сiя миян моз жö, кöмтöг котрасис, но велöтнытö сiдз и эг вермö. А мукöдзыввес, кыдз кутiсö, дак кынымкö минута сьöрна велöтiсö.