1161772304_Tipikon
.pdfесть делати и множае, елико может без вреда прейти вящший труд. И паки, егда несть работы, достоит упражднятися на рукоделие, и поучения божественных писаний, и ино, еже аще подобает на потребу.
Глава 43. О дому особном.
Дом же един, рекше келлиа устроена на рукоделие собрания ради, должно есть бывати, и в ней собиратися: но еже делати вкупе, елика от рукоделия подобает, по уставу общежительных завещаний. единому же от братии свидетельствовану в добродетели, подобает предстояти же и наставляти: и овогда убо чести братиям делающим, овогда же смотряти и воспрещати им, во еже умолчавати им от всякаго празднословия. но и стих начинати им: потом же и прочая, овогда же и делати с ними и просто рещи, и вне на работу, и внутрь на рукоделие, той да бывает назирая и наставляя их. Такожде и безкнижныя учити божественным писанием. Такожде егда несть ту настояй, подобает быти вместо его и в духовных, аще доволен есть. Аще же ни, поне в телесных довлеет: да есть и во обоих действуя и служя, настоящаго же законному разуму, и божественным писанием последовати, дондеже видит настоятель таковаго довольна суща к служением. егда же увесть известно, истиною и страхом божиим, того настояй, недовольна суща к служением, или не действующа, якоже благоугодно есть Богу, подобает оставляти его, и инаго в него место поставляти, аще имать. аще ли несть кто на сие доволен, да оставится служение, дондеже обрящется достоин кто к служению тому.
Глава 44. О делании во общине.
Подобает ведати, яко всем братиям лепо есть делати, якоже и предречеся: обаче в каковейлюбо хитрости, кийждо художне имать: и могущему убо подобает делати землю до уставленнаго времене, и потом делати в рукоделии своем. Не могущии же землю делати, таковии во иных некиих различных, и противу силы да делают, и по апостольскому слову, не делаяй бо, рече, да не яст: пребывание бо, рече и потреба братняя от них хощет строитися. Иже ли от братии или неблагоумен есть на рукоделие: или се убо несть, и по коварству же некоему и лукавству не научается, таковаго подобает на множайшее дело земное устрояти, аще есть телом здрав, и пищею крепок. Аще ли есть немощен во обоих, на иная служения подобающая да повелевает, якоже и божественнии отцы глаголют, яко да не безплоден будет, и не вина соблазну в прочиих братиях, якоже рече господь: лукавый рабе и ленивый, и прочая. якоже прежде рекохом о пищи и питии, яко ради благословны некия вины бывати особне: и абие приведохом указание благословно от божественных писаний. Темже образом по благословней вине, с настоящаго законным повелением же и понуждением, аще на пользу есть, да бывает и о неких делающих: и да будет кождо особно делая подобное ему. Аще ли несть по чрезсловесней вине: вникнув бо в житие святаго пахомиа, и се обрящеши тамо по многу, изряднее же о оном, иже две рогозине соделавшем на день в келлии своей особь, со гнилым помыслом и тщеславным усердием. Сие же и инии от отец мнози правым помыслом содеяша и научиша: опасство же многое предано бысть нам о сем от святых отец, яко да от праведных трудов и своего делания дневную пищу притяжем себе, и прочая нуждная потребная телеси. Господь и пречистая его мати, яже о нас управит.
Глава 45. О стяжании чуждих трудов.
Стяжание же чуждих трудов вносити каковолюбо, отнюд несть на пользу нам, и паче же яко страстнии, и душею немощнии приимати во обители: но яко яда смертоносна отбегати же и отгоняти, яже о таковых, от божественных писаний сочетахом, по разуму, егоже возлюбихом соглашающа и утверждающа иже по бозе таковый разум имущим, во едино
собравшимся общебратство. главизны же законны, обдержны, а не смотрительны, или от части: яже бо от части, смотрительны, некоего ради слова содеянная, или глаголанная, не достоит восприимати во обдержная и законная свидетельства. сего ради яже от части, смотрительная в сих не сочетахом: но обдержная же и законная во всем списании сем сочетахом о господе, сего устава церковнаго уставления, и чина непреложнаго: в негоже вникающу настоятелю общаго братства, такожде и церкви начальнику всечастне вникающу во обдержную сию книгу: и по настоящаго разсуждению, всегда учреждается, и украшается церковное исполнение. Приложим же и сие к ведению, ибо мирское жительство, заповеди господни обещавается: иноческое же сих вящше. что же есть сие, еже умертвитися миру всему, и распятое житие восприяти, во время пострижения и повиновения своего, которыйждо монах Богу обещавается? обдержна бо заповедь и предание монашеское сие есть. и мы убо сия исповедуем и мудрствуем.
Глава 46. О больнице и странноприимстве, и о старых и больных.
Подобает игумену тщатися больным на врачевство, или в монастыре живущим, или страннопришедшим, в тяжких недузех скораго просящим исцеления. Аще приидет кто, абие недужнаго призирати, и подавати ему здравие: аще ли нерадети начнет, велика есть беда. но врачем убо в монастыре, якоже речено есть, быти, и потщатися: устроити же ему пластырь и масло, и ино еже подобает уготовати на тех издание от хранительника подаемое, да кто в требовании тех будет. повелит же игумен хранительнику всяко потребное даровати: прежде купити, и полагати мед, и грузити зелие сушеное, вино, сливы, смоквы, елико врачеви угодно. елики же суть в монастыре монахи, или бельцы, недугом одержими будут, вся убо зелия подавати им: игумену же убо начасте приходити к ним, и промышляти о больных, по врачевской воли, и потребная да повелевает даяти. Врачеве же всею хитростию подвигшеся, крепость и здравие страждущим да подавают. Аще ли кто странен и бездомок в гостинницу приидет, недугом одержимь, иже с недужными, от игумена и от врача да получит покой во всем: и повелит пребывати в недужном храме, дондеже устрабится: и тогда потребное на путь от игумена с молитвою приим да отпущен будет. Старым же, и всякия помощи не имущим, повелевает требованных насладитися, и одры тем равночислены поставляти на покой им: от нихже старец да емлет на всяк день потребная им.
Глава 47. О знамениях владычних, и богородичных праздников, и святых.
Подобает ведати, яко праздницы разделени суть на великия, средния же и малыя.
Велицыи убо праздницы христовы, и богородичны, и предтечева два: рождество и усекновение: и обоих верховных апостолов, петра и павла, имут знамения, крест окружен
(+): имже бдение и вся служба праздника совершается по уставу.
Среднии же праздницы святых имут двема виды, крест с полукружием: (+ имже бдение совершается: прилагается же и канон Богородицы на Утрени по уставу: Друзии же крест
един точию + : имже бдение не совершается. На вечерни, блажен муж, 1-й антифон: и на Господи воззвах, стихиры на 6: от произвола же на 8: и чтения 3, и на стиховне. На Утрени полиелей, и евангелие, канон на 8: и славословие великое: и прочая служба по уставу.
Малии же праздницы имут двема виды три точки несовершенно окружены. Красен убо вид имущим (:. . На вечерни кафисма обычная: на Господи воззвах, стихиры на 6. На
Утрени канон на 6, и славословие великое: и прочая служба по уставу. Черн же вид
имущим (:. : точию на Господи воззвах, стихиры на 6: на Утрени канон на 6. На Литургии по чину устава. Не имущим же знамения, стихиры на 3: канон же на Утрени на
4.
Глава 48. Месяцеслов.
Последование церковнаго псалмопения же и сочинения всего лета, начинающееся от месяца септемвриа, до месяца августа.
Месяц септемврий,
имеяй дней 30. День имать часов 12, и нощь 12.
1. + [Начало индикта, сиречь новаго лета. И память преподобнаго отца нашего симеона столпника, и архимандрита: И матере его марфы: И собор пресвятыя Богородицы, иже в миасинех: И святаго мученка аифала: И святых мученц четыредесяти жен: И святаго аммуна диакона, и учителя их: И святых мученк, каллисты, евода и ермогена, самобратных: И память праведнаго иисусуса сына навина.
Вечер, во светильничное, стихологисуем: блажен муж, 1 антифон. Аще же в субботу вечера, стихологисуем всю кафисму. На Господи воззвах, поставим стихов 10: И поем стихиры индикта, 3: Глас 1. Подобен: небесных чинов: Самословнаго и божественнаго: И преподобнаго 3: Глас 5. Подобен: преподобне отче: Ины стихиры самогласны 4, глас 2: от корене благаго: Слава, глас 6: божественная благодать: И ныне, индикта, глас тойже: Иже со духом святым: И бывает вход. Прокимен дне. И чтения 3: 1-е, пророчества исаиина: дух господень на мне: 2, Левит: Глагола Господь сыном израилевым: 3, святаго, Премудрости соломони: праведник аще постигнет: Посем ектениа. Таже, Сподоби Господи в вечер сей: И паки ектениа, Исполним вечернюю молитву: И возглас. Таже поем, На стиховне, стихиры индикта, глас 1, самогласны: Наста вход лета: с припевы. Припев 1, Тебе подобает песнь, Боже, в сионе: 2, Исполнимся во благих: 3, благословиши венец лета: Слава, святаго, глас 5: преподобне отче: И ныне, индикта, глас тойже: Ты царю сый: Таже, Ныне отпущаеши: Трисвятое, и Отче наш.
Тропарь индикта, глас 2: Всея твари содетелю, времена и лета во своей власти положивый, благослови венец лета благости твоея Господи, сохраняя в мире императора и град твой, молитвами Богородицы, и спаси ны.
Слава, преподобнаго, глас 1: Терпения столп был еси, ревновавый праотцем преподобне: иову во страстех, иосифу во искушениих, и безплотных жительству, сый в телеси, симеоне Отче наш, моли Христа Бога, спастися душам нашим.
И ныне, Богородицы, глас тойже: Радуйся обрадованная Богородице Дево, пристанище и предстательство рода человеческаго, из тебе бо воплотися избавитель мира: едина бо еси мати и дева, присноблагословенная и препрославленная. моли Христа Бога, мир даровати всей вселенней.
Посем, иерей, Премудрость. Лик, благослови. иерей, Сый благословен: И лик, утверди Боже: И прочая и отпуст. На Утрени, на Бог господь, Тропарь индикта, дважды. Слава,
преподобнаго: И ныне, Богородицы: Радуйся обрадованная: И обычныя кафисмы. По 1-й кафисме, Седален индикта, глас 4. Подобен: удивися иосиф: яко владыце всех: Слава, преподобнаго, глас 8. Подобен: Премудрости и слова: крест господень взем мудре: И ныне, индикта, яко владыце всех: И чтение.
[Смотри] от днесь начинается чести метафраст логофета симеона, и маргарит златоустов, и толкования посланий святаго апостола павла.
По 2-й кафисме седален преподобнаго, глас 8. Подобен, Премудрости: Воздержанием и труды: Слава, глас 4, подобен: Скоро предвари: Вошла еси в подвиг мучения: И ныне, богородичен: Скоро приими, владычице, мольбы наша: И чтение. псалом 50. Таже поем каноны, 3: индикта, глас 1, со ирмосом на 6. Кир Иоанна, ирмос по дважды: Тропари на 4, и святых жен на 4, глас 4: И преподобнаго симеона на 4, глас 8. Катавасиа, крест начертав: [И до отдания воздвижения честнаго креста. По 3-й песни,
Кондак индикта, глас 2: В вышних живый Христе царю, всех видимых и невидимых творче и зиждителю, иже дни и нощи, времена и лета сотворивый, благослови ныне венец лета, соблюди и сохрани в мире православнаго императора и град, и люди твоя, многомилостиве.
Таже седален индикта, глас 8. Подобен, Премудрости: Иже времена плодоносна: Другий седален преподобнаго, глас 8 подобен тойже: Земная вся оставив: Слава, святых жен, глас 1. Подобен: Гроб твой: Агницы словесныя: И ныне, богородичен, Настави ны: По 6-й песни:
Кондак преподобнаго, глас 2: Вышних ищяй, вышним совокупляяйся, и колесницу огненную столп соделавый: тем собеседник ангелом был еси преподобне, с ними христу Богу моляся непрестанно о всех нас.
И икос. И чтем пролог. По 9-й песни, Катавасиа: Таин еси Богородице рай: И другий, Снедию древа: Светилен, индикта: Подобен: учеником: Боже богов и Господи: Слава, преподобнаго. Подобен: тойже: якоже светило: И ныне, индикта. Подобен: тойже, Содетелю и правителю: На хвалитех стихиры индикта, на 4, самогласны, глас 3: Превечное слово: Слава, преподобнаго, глас 2: от корене благаго: И ныне, индикта, глас 8: Неизреченною мудростию: Славословие великое. По трисвятом тропарь индикта: Слава, святаго: И ныне, Радуйся обрадованная: ектении: И отпуст. И час 1. На 1-м часе тропарь индикта: Слава, святаго: И ныне, богородичен часов. По трисвятом кондак индикта, и святаго, глаголем пременяюще: и прочая, и совершенный отпуст. На Литургии, блаженна от канона индикта, песнь 3-я на 4: И преподобнаго, песнь 6 на 4. По входе тропарь прежде индикта: И Богородицы: Радуйся обрадованная: И преподобнаго: Слава, кондак преподобнаго: И ныне, индикта. [Аще же храм Богородицы, И ныне, храма Богородицы: индикта же кондак глаголи в начале.] Прокимен индикта, глас 3: Велий Господь наш, и велия крепость его, и разума его несть числа. Стих: Хвалите Господа, яко благ псалом. И преподобнаго, глас 6: честна пред господем смерть преподобных его. Апостол к тимофею, зачало 282: Чадо тимофее, молю прежде: И преподобнаго к колоссаем, зачало сыни: Братие, облецытеся убо: Аллилуиа, глас 4: Тебе по добает песнь, Боже, в сионе. Стих: благословиши венец лета благости твоея Господи. И преподобнаго: блажен муж бояйся Господа, в заповедех его восхощет зело. евангелие луки, зачало 13: Во время оно, вниде Иисус в назарет, идеже бе воспитан: И преподобнаго: матфеа, зачало 43: Вся мне предана суть: Причастен: благословиши венец лета благости твоея Господи. Другий: В память вечную: [Смотри] Дневный же апостол и евангелие вычитаем напреди.
МРК Подобает ведати. Аще случится первый день месяца септемвриа в неделю, оставляется служба святых жен, и поется егда екклисиарх разсудит. Поется же воскресна служба со возследованием индикта, и преподобнаго симеона, сице: На малей вечерни, стихиры воскресны, и Богородицы по обычаю. Тропарь воскресн: Слава, и ныне, богородичен. На Велицей Вечерни поем, блажен муж: кафисму всю. На Господи воззвах, стихиры воскресны 3: и анатолиев един, и индикта 3, и святаго 3. Слава, индикта: И ныне, богородичен гласа. И чтения индикта два: И святаго едино. На литии стихира храма, и индикта, стихиры стиховныя. Слава, святаго: И ныне, индикта, писан на хвалитех. На стиховне стихиры воскресны но алфавиту, с припевы их. Слава, святаго: И ныне, индикта. На благословении хлебов, Богородице Дево радуйся, дважды: и индикта, единожды. И чтение в посланиих апостольских. На Утрени, на Бог господь, тропарь воскресн, дважды: Слава, святаго: И ныне, индикта. По кафисме седальны воскресны с богородичны их. И чтение в толкованиих евангельских, еже на ряду. По непорочнах тропари и впакои: И чтение. Степенны. и прокимен гласа, и Всякое дыхание: евангелие воскресное. воскресение христово: псалом 50. Стихира воскресна. Канон воскресн, со ирмосом на 4. Богородицы на два: индикта на 4, и святаго на 4. Катавасиа: крест начертав: По 3-й песни, кондак индикта, и святаго, и седален святаго, дважды. Слава, и ныне, индикта. И чтение жития святаго симеона: По 6-й песни, кондак воскресн и икос. И чтем пролог. На 9-й песни поем, честнейшую: Светилен воскресный. Слава, святаго: И ныне, индикта. На хвалитех стихиры воскресны 4: И индикта 3, глас 3. Превечное слово: с припевом индикта. Таже самогласен святаго, глас 2-й, с припевом: честна пред господем смерть преподобных его. От корене благаго: Слава, стихира евангельская. И ныне, Преблагословенна еси: Славословие великое. По трисвятом тропарь воскресн точию, ектении, и отпуст, и оглашение, и обычное исхождение: и час 1-й в притворе: и конечный отпуст. На часех глаголем тропарь воскресн: Слава, индикта: И ныне, богородичен, часов. По Отче наш, кондак индикта. На 3-м часе тропарь воскресн: Слава, святаго: И ныне, богородичен часов. По Отче наш, кондак святаго. Такожде и на прочих часех кондак воскресн, и индикта, и святаго, глаголем пременяюще. На Литургии: блаженна воскресна гласа, на 4: И от канона индикта песнь 3-я на 4: И святаго песнь 6-я на 4. По входе тропарь воскресн, и индикта, и святаго. Кондак воскресн: Слава, святаго: И ныне, индикта. Прокимен, апостол, аллилуиа, и евангелие, прежде индикта: воскресно же под зачало: Таже святаго. Причастен, индикта, потом святаго.
2. святаго мученка маманта: И преподобнаго отца нашего Иоанна постника, патриарха царя града.
Вечер обычная кафисма: На Господи воззвах, стихиры мученка 3, глас 8. Подобен: о преславнаго чудесе! И преподобнаго 3, глас и подобен тойже: Слава, мученка, глас 2, самогласен: Нов сад: И ныне, богородичен, в тойже глас. Аще среда, или пяток, И ныне, крестобогородичен. На стиховне октоиха: Слава, мученка: глас 4, самогласен: Приидите согласно вернии: И ныне, богородичен, или крестобогородичен.
Тропарь мученка, глас 4: мученк твой Господи, мамант, во страдании своем венец прият нетленный от тебе бога нашего: имеяй бо крепость твою, мучителей низложи, сокруши и демонов немощныя дерзости: того молитвами спаси души наша.
Слава, тропарь преподобнаго, глас тойже: Правило веры и образ кротости, воздержания учителя яви тя стаду твоему, яже вещей истина: сего ради стяжал еси смирением высокая, нищетою богатая, отче иоанне, моли Христа бога спастися душам нашим.
И ныне, богородичен, или крестобогородичен. На Утрени, на Бог господь, тропарь мученка, дважды: Слава, преподобнаго: И ныне, богородичен, или крестобогородичен: и
обычныя кафисмы: и седальны октоиха: И чтения. Канон октоиха един со ирмосом на 6: мученка на 4, глас 8, и преподобнаго на 4, глас тойже. По 3-й песни, седален мученка: глас 8. Слава, преподобнаго, глас 3: И ныне, богородичен, или крестобогородичен. По 6-й песни:
Кондак мученка, глас 3. Подобен: дева днесь: Жезлом святе от бога тебе данным люди твоя упаси на пажитех живоносных, звери же невидимыя и неукротимыя сокруши под ноги тя поющих, яко вси иже в бедах, предстателя тя тепла, маманте, имут.
И икос. и чтем пролог. По 9-й песни, светилен октоиха: Слава, мученка: И ныне, богородичен, или крестобогородичен: На стиховне октоиха.
Припевы же поем во все лето. Припев 1-й: Исполнихомся заутра: весь до конца. 2-й: И буди светлость: и прочая, и час 1: и отпуст, и обычное исхождение в притвор: И бывает литиа о усопших. На часех, тропарь мученка: Слава, преподобнаго: И ныне, богородичен часов. По трисвятом, кондак святых. На Литургии, блаженна октоиха. Прокимен, глас 6: Возвеселится праведник о господе, и уповает на него. Стих: услыши, Боже, глас мой: Апостол к римляном, зачало 99: Вемы, яко любящим бога: Аллилуиа, глас 4: праведник яко финикс процветет: евангелие Иоанна, зачало 50: Аз есмь лоза истинная: Причастен: Радуйтеся:
3. святаго священномученка анфима, епискпа никомидийскаго: И преподобнаго отца нашего феоктиста, спостника великаго евфимиа.
Вечер обычная кафисма. На Господи воззвах, стихиры святых, на 6: Анфима, 3: глас 1. Подобен: Всехвальнии мученцы: И феоктиста, 3: глас и подобен тойже. Слава, анфима, глас 6. Самогласен: священник законен: И ныне, богородичен, или крестобогородичен. На стиховне октоиха: Слава, преподобнаго, глас 6: преподобне отче, во всю землю: И ныне, богородичен, или крестобогородичен.
Тропарь, глас 4: И нравом причастник, и престолом наместник апостолом быв, деяние обрел еси богодохновенне, в видения восход: сего ради слово истины исправляя, и веры ради пострадал еси даже до крове, священномучениче анфиме, моли Христа бога спастися душам нашим.
Слава, тропарь преподобнаго, глас 8: Слез твоих теченьми пустыни безплодное возделал еси, и иже из глубины воздыханьми, во сто трудов уплодоносил еси, и был еси светильник вселенней, сияя чудесы, феоктисте Отче наш, моли Христа бога спастися душам нашим.
И ныне, богородичен, или крестобогородичен. На Утрени, на Бог господь, тропарь анфима, дважды: Слава, преподобнаго: И ныне, богородичен. И обычныя кафисмы: И седальны октоиха: И чтения. Канон октоиха един, со ирмосом на 6: И святым два: анфима, глас 8: и преподобнаго, глас тойже. По 3-й песни, седален анфима, глас 1: Слава, преподобнаго, глас 4: И ныне, богородичен. И чтение. По 6-й песни,
Кондак анфиму, глас 4. Подобен: Вознесыйся: Во священницех благочестно пожив, и мучения путь скончав, идольская угасил еси служения, поборник быв твоему стаду, Богомудре. темже тя и почитаем ныне тайно вопиюще: от бед избави нас твоими молитвами, приснопамятне анфиме.
И икос: И чтем пролог. По 9-й песни, Светилен октоиха. Слава, святаго. И ныне, богородичен. На стиховне октоиха. Слава, самогласен, глас 4: Никомидийскому
великограду: И ныне, богородичен, или крестобогородичен. На Литургии, блаженна октоиха на 4: И анфима песнь 3, на 4. Прокимен, глас 6: честна пред господем смерть преподобных его. Стих: Что воздам господеви: Апостол ко евреем, зачало 334: Братие, поминайте наставники ваша: Аллилуиа, глас 2: священницы твои: Стих: блажен муж: евангелие Иоанна, зачало 36: Рече господь: аз есмь дверь: Причастен: В память вечную:
4. святаго священномученка вавилы. епископа великия антиохии: И святаго пророка и боговидца моисеа.
На Господи воззвах, стихиры на 6. Вавилы, 3: глас 6. Подобен: Всю отложивше: И пророка, 3: глас 4. Подобен: Званный свыше: Слава, вавилы, глас 6. Самогласен: Восходный степень: И ныне, богородичен, или крестобогородичен. На стиховне октоиха: Слава, святаго, глас 6: Судищу мучителеву: И ныне, богородичен. Тропарь вавилы, глас 4: И нравом причастник: Вчерашний.
Слава, тропарь пророка, глас 2: пророка твоего моисеа память, Господи, празднующе, тем тя молим, спаси души наша.
Или сей, глас тойже: На высоту добродетелей возшел еси, пророче моисее: и сего ради сподобился еси видети славу божию. скрижали благодатныя закона прият, и начертаний благодать в себе нося, и пророков был еси честная похвала, и благочестия великое таинство.
На Утрени, на Бог господь, тропарь вавилы дважды. Слава, пророка: И ныне, богородичен. И обычныя кафисмы.: И седальны октоиха: И чтение. Канон октоиха един, со ирмосом на 6: И святых два: Вавилы, глас 6: И пророка, глас 4. По 3-й песни,
Кондак пророка, глас 2: Лик пророческий с моисеем и аароном, веселием днесь веселится, яко конец пророчествия их на нас исполнися: днесь сияет крест, имже нас спасл еси. тех молитвами Христе Боже помилуй нас.
Иседален, вавилы, глас 3. Слава, пророка, глас 4: И ныне, богородичен. По 6-й песни, Кондак вавилы, глас 8. Подобен: яко начатки: яко благочестия проповедника, и страдальцев утверждение, церковь славит тя вавило славне, освещаема днесь: но яко имея дерзновение ко господу, в мире совершеннем, величающия и восхваляющия тя, сохранити христу молися, о многострадальне.
Иикос, и пролог. По 9-й песни, светилен октоиха: Слава, вавилы: И ныне, богородичен: На стиховне октоиха. На Литургии прокимен, глас 4: святым иже суть на земли его, удиви Господь вся хотения своя в них. Стих: Предзрех Господа: Апостол к евреем, зачало 330: святии вси, верою: Аллилуиа, глас 4: Воззваша праведнии: евангелие луки, зачало 67: Не бойся малое стадо: Причастен, Радуйтеся:
5. (:. святаго пророка захарии, отца честнаго Иоанна предтечи: И святыя праведныя елисаветы.
Вечер, обычная кафисма. На Господи воззвах, стихиры на 6, глас 4. Подобен: Дал еси знамение: Масть имея: Слава, глас 8, самогласен: священства законнаго: И ныне, богородичен или крестобогородичен. На стиховне октоиха: Слава, святаго, глас 2: яко чист:
Тропарь, глас 4: священства одеждею обложен премудре, по закону божию всесожжения приятна священнолепно приносил еси захарие, и был еси светильник и зритель тайных, знамения в тебе благодати нося явственно всемудре, и мечем убиен быв в храме божии, христов пророче, с предтечею моли спастися душам нашим.
На Утрени, на Бог господь, тропарь пророка, дважды. Слава, и ныне, богородичен. и обычныя кафисмы, и седальны октоиха, и чтения. Каноны октоиха оба без мученичнов: И святаго на 6: глас 8. По 3-й песни, седален святаго, глас 8, дважды. Слава, и ныне, богородичен, или крестобогородичен. По 6-й песни,
Кондак, глас 3. Подобен: дева днесь: пророк днесь и священник вышняго, захариа предложи предтечев родитель трапезу своея памяти, верныя питая: питие бо правды всем растворив, сего ради скончавается, яко божественный таинник божия благодати.
И икос: и пролог. По 9-й песни, светилен октоиха: Слава, святаго: И ныне, богородичен. На стиховне октоиха, Слава, святаго, глас 8. Жертвы принося: На Литургии, блаженна октоиха, на 4. И святаго, песнь 3-я на 4. Прокимен, глас 6: Возвеселится праведник о господе: Стих: услыши Боже глас мой. Апостол ко евреем, зачало 314. Аврааму обетовая бог: Аллилуиа, глас 6: Свет возсия праведнику. евангелие матфеа, зачало 97: Горе вам книжницы и фарисее лицемери: Причастен, В память вечную:
6. (:. Воспоминание бывшаго чудесе в колоссаех, еже есть в хонех, от архистратига михаила: И святаго мученка евдоксиа, и иже с ним: И преподобнаго отца нашего архиппа.
Вечер, обычная кафисма: На Господи воззвах, стихиры архангела, на 6, глас 4. Подобен: яко добля: Трисолнечнаго божества: Слава, глас 6, самогласен: Срадуйтеся нам: И ныне, богородичен: Срадуйтеся нам вся: На стиховне октоиха, Слава, и ныне, глас 8: яко чиноначальник: Тропарь, глас 4: небесных воинств архистратиже, молим тя присно мы недостойнии, да твоими молитвами оградиши нас кровом крил невещественныя твоея славы, сохраняя нас припадающих прилежно, и вопиющих: о бед избави нас, яко чиноначальник вышних сил. Слава, и ныне, богородичен, или крестобогородичен.
Служба святаго евдоксиа поется на повечерии.
[Смотри] На Утрени, на Бог господь, тропарь архангела, дважды. Слава, и ныне, богородичен, или крестобогородичен. И обычныя кафисмы, и седальны октоиха, и чтения. Оба канона октоиха, без мученичнов: И архангела, на 6, глас 4. По 3-й песни седален, глас 8. Слава, глас 1. По 6-й песни,
Кондак, глас 2: Архистратиже Божий, служителю божественныя славы, ангелов начальниче, и человеков наставниче, полезное нам проси, и велию милость, яко безплотных архистратиг.
И икос. По 9-й песни, Светилен октоиха: Слава, архангела: И ныне, богородичен. На хвалитех стихиры архангела, на 4, глас 1-й. Подобен: небесных чинов: Ангельски в мире: Слава, глас тойже, самогласен: Чиноначальник вышних сил: И ныне, богородичен, или крестобогородичен: На стиховне, октоиха: Слава, архангела, глас 5: Идеже осеняет: И ныне, богородичен. На Литургии блаженна, архангела, песнь 3-я и 6-я. Прокимен, глас 4: Творяй ангелы своя духи, и слуги своя пламень огненный. Стих: благослови душе моя Господа: Апостол ко евреем, зачало 305: Братие, аще глаголанное ангелы слово бысть: Аллилуиа, глас 5: Хвалите Господа вси ангели его, хвалите его вся силы его. Стих: яко той
рече, и быша: той повеле, и создашася. евангелие луки, зачало 51: Рече господь, слушаяй вас: Причастен, Творяй ангелы своя духи:
7. (:. Предпразднство рождества пресвятыя Богородицы: И святаго мученка созонта: На Господи воззвах, стихиры предпразднства 3, глас 1-й. Подобен. небесных чинов: Всемирныя миру радости: и мученка 3, глас 4. Подобен: Дал еси знамение: Слава, и ныне: предпразднства, глас 4: Всечестное твое рождество: Аще же в пяток вечера, Слава, предпразднства: И ныне, догматик гласа настоящаго. На стиховне стихиры, глас 8. Подобен: о преславнаго чудесе! о преславнаго чудесе, яко от нераждающия: с припевы, 1- й, Слыши дщи: 2-й, Лицу твоему: Слава, и ныне, предпразднства, глас 4: Всемирная радость: Тропарь мученка, глас 4: мученк твой Господи: писан сего месяца во 2 день.
Слава, и ныне, предпразднства, глас тойже: от корене иессеева, и от чресл давидовых богоотроковица мариам раждается днесь нам: радостию бо радуются всяческая и обновляются. срадуйтеся купно небо и земля, восхвалите ю отечествия языков: иоаким веселится, и анна торжествует зовущи: неплоды раждает богородицу, и питательницу жизни нашея.
На Утрени, на Бог господь, тропарь предпразднства дважды. Слава, мученка: и ныне, предпразднства. И обычныя кафисмы. По 1-й кафисме седален, глас 1, подобен: Камени: Рождшися преславно: Слава, и ныне, тойже. По 2-й кафисме седален, глас 5, подобен: Собезначальное: небесная вся: Слава, и ныне, тойже: и чтение. Канон предпразднства, со ирмосом на 8, глас 4: И мученка на 4, глас тойже. По 3-й песни.
Кондак мученка, глас 2. Подобен: Твердыя: Истиннаго и Богомудраго мученка, страдальца благочестия искуснаго, сошедшеся днесь, велегласно восхвалим, созонта таинника благодати, исцелений дателя богатейшаго: молит бо Христа бога о всех нас.
И икос, и седален, глас 4. Подобен: Скоро предвари: Спаслся верою созонте: Слава, и ныне, предпразднства, глас 8: Да радуется небо: По 6-й песни,
Кондак предпразднства, глас 3. Подобен: дева днесь: дева днесь и богородица мариа, чертог безконечный небеснаго жениха, раждается от неплодове, божиим советом: колесница слова благоукрашается. на сие бо преднаречеся божественная дверь, и мати сущия жизни.
И икос. По 9-й песни, светилен мученка: Слава, и ныне, предпразднства. На стиховне стихиры, глас 2. Подобен: Доме евфрафов: Приидите, иже от адама: Слава, и ныне, глас 2, самогласен: Пронареченная всех царица: На Литургии, блаженна, предпразднства, песнь 3, на 4: И святаго песнь 6, на 4. Прокимен, глас 6: Возвеселится праведник о господе: Стих: услыши, Боже, глас мой: Апостол к ефесеем, зачало 233: Возмогайте о господе: Аллилуиа, глас 4: Воззваша праведнии: Стих: Многи скорби праведным: евангелие
Иоанна, зачало 52: Си заповедаю вам: Причастен: В память вечную: (:. И память иже во святых отца нашего Иоанна, архиепископа новгородскаго, чудотворца.
Совершается собор его, идеже лежат мощи его, и идеже храм его.
Тропарь, глас 8: Днесь светло красуется славнейший великий нов град, имея мощи твоя в себе, святителю иоанне, яко солнечныя лучи испущающия, и подающия исцеления притекающим с верою к раце мощей твоих. молися христу Богу, избавити град сей невредимь от варварскаго пленения, и междоусобныя брани, и огненнаго запаления,
святителю Богомудре и чудоносче, небесный человече, и земный ангеле: да сошедшеся любовию в память твою, светло празднуем в песнех и пениих радующеся, и Христа славяще, тебе таковую благодать даровавшаго исцелений, и великому нову граду заступление и утверждение.
Кондак, глас 4. Подобен: Вознесыйся: Возвеселися явленно честная церковь Христова, в память днесь приснословущаго святителя Иоанна, от великаго нова града возсиявшаго, и всю страну удивившаго преславными чудодеянии, и всеми добродетельми украсившагося: и по преставлении бо честное тело его обретеся нетленно, истощающее велия чудеса. темже зовем ему: о всеблаженне, моли Христа бога непрестанно о всех нас.
МРК Аще случится предпразднство рождества пресвятыя Богородицы, и святаго мученка созонта, в неделю. В субботу на малей вечерни, стихиры воскресны, и Богородицы по обычаю. Тропарь воскресн: Слава, и ныне, богородичен его. На Велицей Вечерни, по кафисме, на Господи воззвах, стихиры воскресны 3: и анатолиев един. И предпразднства, 3, и мученка 3: Слава, предпразднства: И ныне, богородичен настоящаго гласа. На литии стихира храма: Таже стихиры стиховны предпразднства вечерния. Слава, и ныне, предпразднства: писан на Утрени на стиховне. На стиховне, стихиры воскресны. Слава, и ныне, предпразднства. На благословении хлебов тропарь: Богородице Дево: дважды, и предпразднства единожды. И чтение в посланиих апостольских. На Утрени, на Бог господь: тропарь воскресн дважды. Слава, мученка: И ныне, предпразднства. По кафисмах седальны воскресны, и богородичны их: И чтение во евангелии толковом: неделя пред воздвижением. Посем непорочны: И впакои: И чтение, неделя ряд. Степенны, и прокимен гласа: Всякое дыхание: и евангелие воскресно: и воскресение христово: Таже канон воскресн, со ирмосом на 4: и Богородицы на два и предпразднства на 4: и мученка на 4. Катавасиа, крест начертав: По 3-й песни, кондак и икос предпразднства, и мученка. Слава, седален мученка: И ныне, предпразднства. По 6-й песни, кондак и икос воскресн. И чтем пролог. На 9-й песни, поем честнейшую: Светилен воскресн: Слава, мученка: И ныне предпразднства. На хвалитех, стихиры воскресны 4, и анатолиев един един, и предпразднства, подобны 3 стиховныя с припевы их. Слава, стихира евангельская: И ныне, Преблагословенна еси: Славословие великое. Тропарь воскресн точию. ектении: и отпуст: и оглашение. И обычное исхождение в притвор: И час 1-й. На 1-м часе тропарь воскресн: Слава, предпразднства: И ныне, богородичен часов. По Отче наш: кондак предпразднства: И конечный отпуст. На 3-м часе тропарь воскресн: Слава, мученка: И ныне, богородичен часов. По Отче наш, кондак воскресн. Такожде и на прочих часех, глаголем воскресн тропарь прежде: а предпразднства и мученка, пременяюще. Кондаки же воскресн и предпразднства, глаголем пременяюще. На Литургии блаженна октоиха на 6, и с троичным и предпразднства песнь 3, на 4. По входе тропарь воскресн, и предпразднства: таже храма святаго, и мученка. Кондак воскресн, и храма святаго: Слава, мученка: И ныне, предпразднства. Прокимен, апостол, Аллилуиа и евангелие, прежде недели пред воздвижением: И ряд недели под зачало: таже святаго. Прокимен же гласа оставляется. Причастен: Хвалите Господа: и мученка. В память вечную:
8. (+) рождество пресвятыя владычицы нашея Богородицы и приснодевы марии.
На малей вечерни, на Господи воззвах, стихиры на 4, глас 1-й. Подобен: небесных чинов: иоаким и анна торжествуют: Слава, и ныне, глас 4: Всечестное твое рождество: На стиховне стихиры, глас 2. Подобен: Доме евфрафов: Радуйся иоаким: с припевы: 1-й, Слыши дщи и виждь: 2-й, Лицу твоему помолятся: Слава, и ныне, подобен тойже: Храм Божий едина богородица: Тропарь, глас 4: рождество твое, Богородице Дево, радость возвести всей вселенней: из тебе бо возсия солнце правды Христос Бог наш, и разрушив клятву, даде благословение: и упразднив смерть, дарова нам живот вечный.